5-6. மஹாருக்க²ஸுத்தத்³வயவண்ணனா

55-56. ஓஜம் அபி⁴ஹரந்தீதி ரஸஹரணியோ விய புரிஸஸ்ஸ ஸரீரே ருக்க²மூலானி ருக்க²ஸ்ஸ பத²வீஆபோரஸே உபரி ஆரோபேந்தி. தேஸம் ததா² ஆரோபனம் ‘‘ஓஜாயா’’திஆதி³னா விபா⁴வேதி. ஹத்த²ஸதுப்³பே³த⁴மஸ்ஸாதி ஹத்த²ஸதுப்³பே³தோ⁴, ஹத்த²ஸதம் உப்³பி³த்³த⁴ஸ்ஸபி. ஏத்தா²தி ஏதிஸ்ஸம் வட்டகதா²யம். கம்மாரோஹனந்தி கம்மபச்சயோ.

புன ஏத்தா²தி ஏதிஸ்ஸம் விவட்டகதா²யம். வட்டது³க்க²ம் நாஸேதுகாமஸ்ஸ த³ள்ஹம் உப்பன்னஸம்வேக³ஞாணம் ஸந்தா⁴ய ‘‘குத்³தா³லோ வியா’’தி ஆஹ. ததோ நிப்³ப³த்திதஞாணம் ஸமாதி⁴பச்சி²யா டி²தம் நிஸ்ஸாய பவத்தேதப்³ப³விபஸ்ஸனாரம்ப⁴ஞாணம். ருக்க²ச்சே²த³னப²ரஸு வியாதி ஏவம்பூ⁴தஸ்ஸ விபஸ்ஸனா ஏகந்ததோ வட்டச்சே²தா³ய ஹோதியேவாதி ஆஹ ‘‘ருக்க²ஸ்ஸ…பே… மனஸிகரோந்தஸ்ஸ பஞ்ஞா’’தி. தத்த² கம்மட்டா²னந்தி விபஸ்ஸனாகம்மட்டா²னம். தம் சதுப்³பி³த⁴வவத்தா²னவஸேன வீஸதி பத²வீகோட்டா²ஸா, த்³வாத³ஸ ஆபோகோட்டா²ஸா, சத்தாரோ தேஜோகோட்டா²ஸா, ச² வாயோகோட்டா²ஸாதி த்³வேசத்தாலீஸாய கோட்டா²ஸேஸு. விஞ்ஞாணஸ்ஸ சாதி இதி-ஸத்³தோ³ ஆதி³அத்தோ² பகாரத்தோ² ச. தேன பூ⁴தரூபானி விஞ்ஞாணஸம்பயுத்தத⁴ம்மே ச ஸங்க³ண்ஹாதி. ஸத்தஸு ஸப்பாயேஸு யஸ்ஸ அலப⁴ந்தஸ்ஸ கம்மட்டா²னம் விபூ⁴தம் ஹுத்வா ந உபட்டா²தி, தம் ஸந்தா⁴யாஹ ‘‘அஞ்ஞதரம் ஸப்பாய’’ந்தி. ஸேஸம் ஸுவிஞ்ஞேய்யமேவ.

மஹாருக்க²ஸுத்தத்³வயவண்ணனா நிட்டி²தா.