7. பச்சயஸுத்தவண்ணனா

27. படிபாடியாதி படிபாடியா ட²பனேன. சதுஸச்சயோஜனம் த³ஸ்ஸேதும் பரியோஸான…பே… ஆதி³ வுத்தம். து³க்க²ஸச்சவஸேனாதி பரிஞ்ஞேய்யபா⁴வவஸேன. ஜராமரணாபதே³ஸேன ஹி பஞ்சுபாதா³னக்க²ந்தா⁴ வுத்தா, தே சஸ்ஸ அத்தனோ ப²லஸ்ஸ பச்சயா ந ஹோந்தி. தம் ஸந்தா⁴ய வுத்தம் ‘‘பச்சயம் ஜானாதீ’’தி. வினேய்யஜ்ஜா²ஸயவஸேன ஹேத்த² தே³ஸனா பவத்தா. ஸம்பன்னோதி ஸமன்னாக³தோ. ஆக³தோதி உபக³தோ, அதி⁴க³தோதி அத்தோ². பஸ்ஸதீதி பச்சவேக்க²ணஞாணேன பச்சக்க²தோ பஸ்ஸதி, மக்³க³பஞ்ஞாய ஏவம் அஸம்மோஹபடிவேத⁴வஸேன பஸ்ஸதி. மக்³க³ஞாணேனேவ, ந ப²லஞாணேன. த⁴ம்மஸோதம் ஸமாபன்னோதி அரியத⁴ம்மஸோதம் ஸம்மதே³வ ஆபன்னோ பத்தோ. அனயே நஇரியனதோ, அயே ச இரியனதோ, ஸதே³வகேன ச லோகேன ‘‘ஸரண’’ந்தி அகரணீயதோ அரியபக்க²ம் ப⁴ஜந்தோ புது²ஜ்ஜனபூ⁴மிம் அதிக்கந்தோ. நிப்³பே³தி⁴கபஞ்ஞாயாதி சதுன்னம் அரியஸச்சானம் நிப்³பி³ஜ்ஜ²னகபஞ்ஞாய. ஆஹச்ச திட்ட²தி மக்³க³க்க²ணே, ப²லக்க²ணே பன ஆஹச்ச டி²தோ நாம.

பச்சயஸுத்தவண்ணனா நிட்டி²தா.