5. பூ⁴மிஜஸுத்தவண்ணனா

25. புரிமஸுத்தேதி அனந்தரே புரிமே ஸுத்தே. வுத்தனயேனேவ வேதி³தப்³ப³ந்தி பத³த்தே² ததோ விஸிட்ட²ம் அனித்³தி³ஸித்வா இதரம் அத்த²தோ விபா⁴வேதும் ‘‘அயம் பன விஸேஸோ’’திஆதி³மாஹ. ந கேவலம் ப²ஸ்ஸபச்சயா உப்பஜ்ஜதி, அத² கோ² ப²ஸ்ஸஸ்ஸ ஸஹகாரீகாரணபூ⁴தஅஞ்ஞபச்சயா ச உப்பஜ்ஜதீதி. காயேனாதி சோபனகாயேன, காயவிஞ்ஞத்தியாதி அத்தோ². ஸா ஹி காமம் பட்டா²னே ஆக³தேஸு சதுவீஸதியா பச்சயேஸு கேனசி பச்சயேன சேதனாய பச்சயோ ந ஹோதி. யஸ்மா பன காயே ஸதி ஏவ காயகம்மம் நாம ஹோதி, நாஸதி, தஸ்மா ஸா தஸ்ஸா ஸாமக்³கி³யபா⁴வேன இச்சி²தப்³பா³தி வுத்தம் ‘‘காயேனபி கரியமானம் கரீயதீ’’தி. தேனாஹ ப⁴க³வா ‘‘காயே வா, ஹானந்த³, ஸதி காயஸஞ்சேதனாஹேது உப்பஜ்ஜதி அஜ்ஜ²த்தம் ஸுக²ம் து³க்க²’’ந்தி. வாசாயபீதி ஏத்தா²பி ஏஸேவ நயோ. மனஸாதி பாதுபூ⁴தேன மனஸா, ந மனமத்தேனாதி. அத்தனா பரேஹி அனுஸ்ஸாஹிதேன. பரேனாதி பரேன அனுஸ்ஸாஹேன. ஸம்பஜானேனாதி ஞாணஸம்பயுத்தசித்தவஸேன பஜானந்தேன. அஸம்பஜானேனாதி ததா² ந ஸம்பஜானந்தேன. தஸ்ஸாதி ஸுக²து³க்க²ஸ்ஸ. காயஸஞ்சேதனாஹேதூதி காயகம்மனிமித்தம், காயிகஸ்ஸ கம்மஸ்ஸ கதத்தா உபசிதத்தாதி அத்தோ². ஏஸ நயோ ஸேஸஸஞ்சேதனாஸுபி. உத்³த⁴ச்சஸஹக³தசேதனா பவத்தியம் விபாகம் தே³தியேவாதி ‘‘வீஸதி சேதனா லப்³ப⁴ந்தீ’’தி வுத்தம். ததா² வசீத்³வாரேதி ஏத்த² ‘‘காமாவசரகுஸலாகுஸலவஸேன வீஸதி சேதனா லப்³ப⁴ந்தீ’’தி இத³ம் ததா²-ஸத்³தே³ன உபஸம்ஹரதி. ரூபாரூபசேதனாஹீதி ரூபாவசராரூபாவசரகுஸலசேதனாஹி. தப்பச்சயம் யதா²ரஹந்தி அதி⁴ப்பாயோ. தாபி சேதனாதி யதா²வுத்தா ஏகூனவீஸதி சேதனா அவிஜ்ஜாபச்சயா ஹோந்தி குஸலானம்பி பகே³வ இதராதி⁴ட்ட²ஹிதாவிஜ்ஜஸ்ஸேவ உப்பஜ்ஜனதோ, அஞ்ஞதா² அனுப்பஜ்ஜனதோ. யதா²வுத்தசேதனாபே⁴த³ந்தி யதா²வுத்தம் காயசேதனாதி³விபா⁴க³ம். பரேஹி அனுஸ்ஸாஹிதோ ஸரஸேனேவ பவத்தமானோ. பரேஹி காரியமானோதி பரேஹி உஸ்ஸாஹிதோ ஹுத்வா கயிரமானோ. ஜானந்தோபீதி அனுஸ்ஸவாதி³வஸேன ஜானந்தோபி. கம்மமேவ ஜானந்தோதி ததா³ அத்தனா கரியமானகம்மமேவ ஜானந்தோ.

சதூஸூதி ‘‘ஸாமம் வா பரே வா ஸம்பஜானோ வா அஸம்பஜானோ வா’’தி ஏவம் வுத்தேஸு சதூஸு டா²னேஸு. யதா²வுத்தே ஏகூனவீஸதிசேதனாத⁴ம்மே அஸங்கா²ரிகஸஸங்கா²ரிகபா⁴வேன ஸம்பஜானகதாஸம்பஜானகதபா⁴வேன சதுகு³ணே கத்வா வுத்தம் ‘‘ச²ஸத்ததி த்³வேஸதா சேதனாத⁴ம்மா’’தி. யேஸம் ஸஹஜாதகோடி லப்³ப⁴தி, தேஸம்பி உபனிஸ்ஸயகோடி லப்³ப⁴தேவாதி ‘‘உபனிஸ்ஸயகோடியா அனுபதிதா’’திஇச்சேவ வுத்தா. தேதி யதா²வுத்தா ஸப்³பே³பி த⁴ம்மா. ஸோ காயோ ந ஹோதீதி ஏத்த² பஸாத³காயோபி க³ஹேதப்³போ³. தேனாஹ ‘‘யஸ்மிம் காயே ஸதீ’’திஆதி³. ஸோ காயோ ந ஹோதீதி ஸோ காயோ பச்சயனிரோதே⁴ன ந ஹோதி. வாசாதி ஸத்³த³வாசா. மனோதி யம் கிஞ்சி விஞ்ஞாணம். இதா³னி கம்மவஸேனேவ யோஜேதும் ‘‘அபிசா’’திஆதி³ வுத்தம். ஏஸேவ நயோ ‘‘வாசாபி த்³வாரபூ⁴தா மனோபி த்³வாரபூ⁴தோ’’தி. கீ²ணாஸவஸ்ஸ கத²ம் காயோ ந ஹோதி, ந தஸ்ஸ காயகம்மாதி⁴ட்டா²னந்தி அதி⁴ப்பாயோ. அவிபாகத்தாதி அவிபாகத⁴ம்மத்தாதி அத்தோ². காயோ ந ஹோதீதி வுத்தம் அகம்மகரணபா⁴வதோ.

தந்தி கம்மம். கே²த்தம் ந ஹோதீதி தஸ்ஸ து³க்க²ஸ்ஸ அவிருஹனட்டா²னத்தா. விருஹனட்டா²னாத³யோ ப்³யதிரேகவஸேன வுத்தா. தேனாஹ ‘‘ந ஹோதீ’’தி. காரணட்டே²னாதி ஆதா⁴ரபூ⁴தகாரணபா⁴வேன. ஸஞ்சேதனாமூலகந்தி ஸஞ்சேதனானிமித்தம். விருஹனாதீ³னம் அத்தா²னந்தி ‘‘விருஹனட்டே²னா’’திஆதி³னா வுத்தானம் அத்தா²னம். இமினா விருஹனாதி³பா⁴வேன வேத³னா ‘‘ஸுக²து³க்க²வேத³னா’’தி கதி²தா, நயித⁴ ஜேட்ட²லக்க²ணம் ஸுக²து³க்க²ம் நிப்பயோஜகஸ்ஸ ஸுக²ஸ்ஸ து³க்க²ஸ்ஸ ச அதி⁴ப்பேதத்தா. உபேக்கா²வேத³னாபேத்த² ஸுக²ஸண்ஹஸபா⁴வவிபாகபூ⁴தா வேத³னாவ.

பூ⁴மிஜஸுத்தவண்ணனா நிட்டி²தா.