7. பவாரணாஸுத்தவண்ணனா

215. தஸ்மிம் அஹூதி தஸ்மிம் அஹனீதி ஆஹ ‘‘தஸ்மிம் தி³வஸே’’தி. அனஸனேனாதி ஸப்³ப³ஸோ ஆஹாரஸ்ஸ அபு⁴ஞ்ஜனேன. ஸாஸனிகஸீலேன பா³ஹிரகஅனஸனேன வா உபேதா ஹுத்வாதி யோஜனா. வா-ஸத்³தே³ன கீ²ரபானமது⁴ஸாயனாதீ³னிபி ஸங்க³ண்ஹாதி. பகாரேஹி தி³ட்டா²தீ³ஹி வாரேதி காயகம்மாதி³கே ஸராபேதி கா³ரய்ஹே கரோதி ஏதாயாதி பவாரணா, படிபத்திவிஸோத⁴னாய அத்தனோ அத்தனோ வஜ்ஜஸோத⁴னாய ஓகாஸதா³னம். யஸ்மா யேபு⁴ய்யேன வஸ்ஸம்வுட்டே²ஹி காதப்³பா³ ஏஸா விஸுத்³தி⁴தே³ஸனா, தஸ்மா வுத்தம் ‘‘வஸ்ஸம்வுட்ட²பவாரணாய. விஸுத்³தி⁴பவாரணாதிபி ஏதிஸ்ஸாவ நாம’’ந்தி. ததா³ தஸ்ஸ பி⁴க்கு²ஸங்க⁴ஸ்ஸ துண்ஹீபா⁴வஸ்ஸ அனவஸேஸதாயபி வண்ணம் த³ஸ்ஸேதும் பாளியம் ‘‘துண்ஹீபூ⁴த’’ந்தி வுத்தந்தி ஆஹ ‘‘யதோ யதோ…பே…நத்தீ²’’தி. ஹத்த²ஸ்ஸ குக்குச்சதா அஸம்யமோ அஸம்பஜஞ்ஞகிரியா ஹத்த²குக்குச்சம். ததா² பாத³குக்குச்சம் வேதி³தப்³ப³ம், வா-ஸத்³தோ³ அவுத்தவிகப்பத்தோ², தேன தத³ஞ்ஞேஸமபா⁴வோ விபா⁴விதோதி த³ட்ட²ப்³ப³ம்.

பஞ்சபஸாதே³ஹீதி பஞ்சவண்ணேஹி பஸாதே³ஹி. வோஸ்ஸக்³க³த்தோ² யதா²ருசி கிரியாய வோஸ்ஸஜ்ஜனம். புச்ச²னத்தே²தி படிக்கே²பமுகே²னேவ புச்ச²னத்தே² நகாரோ, மே கிஞ்சி கிரியம் வா வாசஸிகம் வா ந க³ரஹத², கிம் நு க³ரஹத² காயவாசாஹீதி அத்தோ². கேசி ‘‘த்³வாரானேவா’’தி த்³வாரஸீஸேன த்³வாரப்பவத்தசரியம் வத³ந்தி. விஸுத்³தி⁴பவாரணாய அதி⁴ப்பேதத்தா யேன பவாரிதம், தேனேவ விஸுத்³தீ⁴தி ஞாயதி, யேன ந பவாரிதம். கிம் நு தம் அவிஸுத்³த⁴ந்தி ஸியா கஸ்ஸசி புது²ஜ்ஜனஸ்ஸ ஆஸங்கா? தன்னிவாரணத்த²மாஹ ‘‘நோ அபரிஸுத்³த⁴த்தா’’தி. மனோத்³வாரம் பரிஸுத்³த⁴ம் அஸுசிகாரகஉபக்கிலேஸானம் தூ³ரீகதத்தா. இதா³னி ஏதரஹி பு³த்³த⁴காலே. ஏத்தா²தி மனோத்³வாரபரிஸுத்³தி⁴யம்.

காயவசீஸமாசாரபரிஸுத்³தி⁴யா பவேதி³தாய மனோஸமாசாரபரிஸுத்³தி⁴ அத்த²தோ பவேதி³தாவ ஹோதீதி ‘‘காயிகம் வா வாசஸிகம் வா’’இச்சேவாஹ. ததா² ஹி வுத்தம் ‘‘காயிகம் வா வாசஸிகம் வாதி இத³ம் சதுன்னம் அரக்கி²யதம் ஸந்தா⁴ய தே²ரோ ஆஹா’’தி. ‘‘பி⁴க்க²வே, பவாரேமி வோ’’தி பி⁴க்கு²ஸங்க⁴விஸயத்தா பவாரணாய தத்த² பி⁴க்கு²ஸங்கே⁴ன வத்தப்³ப³ம் படிவசனம் தே³ந்தோ த⁴ம்மஸேனாபதி ‘‘பி⁴க்கு²ஸங்க⁴ஸ்ஸ பா⁴ரம் வஹந்தோ’’தி வுத்தோ. தேனாஹ ‘‘ந கோ² மயம், ப⁴ந்தே’’திஆதி³. அரக்கி²யானீதி பரானுவாத³தோ ந பா⁴யிதப்³பா³னி ஸுபரிஸுத்³த⁴பா⁴வதோ.

‘‘அனுப்பன்னஸ்ஸா’’தி இத³ம் அதி⁴ப்பாயிகவசனந்தி தத³தி⁴ப்பாயம் விவரந்தோ ‘‘கஸ்ஸபஸம்மாஸம்பு³த்³த⁴தோ பட்டா²யா’’திஆதி³மாஹ. கஸ்ஸபஸம்மாஸம்பு³த்³த⁴தோதி விப⁴த்தே நிஸ்ஸக்கம், தஸ்மா கஸ்ஸபஸம்மாஸம்பு³த்³த⁴தோ ஓரந்தி அத்தோ²தி. அஞ்ஞேனாதி இதோ ப⁴க³வதோ அஞ்ஞேன. அனுப்பாதி³தபுப்³ப³ஸ்ஸாதி பரஸந்தானே ந உப்பாதி³தபுப்³ப³ஸ்ஸ. ஸஸந்தானே பன பச்சேகபு³த்³தா⁴னம் வஸேன ந உப்பாதி³தோதி ந ஸக்கா வத்தும். ஸமனுஆக³தாதி ஸம்மா அனு உபக³தா. ப⁴க³வதோ ஸீலாத³யோ கு³ணாதி பு³த்³த⁴பூ⁴தஸ்ஸ கு³ணா அதி⁴ப்பேதாதி ஆஹ ‘‘அரஹத்தமக்³க³மேவ நிஸ்ஸாய ஆக³தா’’தி. ஸப்³ப³கு³ணாதி த³ஸப³லஞாணாத³யோ ஸப்³பே³ பு³த்³த⁴கு³ணா. ப⁴ந்தேதி ஏத்த² இதிஸத்³தோ³ ஆதி³அத்தோ². தேன ‘‘இமேஸம் பன…பே… வாசஸிகம் வா’’தி யாவாயம் பாளிபதே³ஸோ, தம் ஸப்³ப³ம் க³ண்ஹாதி. தேனாஹ ‘‘இத³ம் தே²ரோ…பே… பவாரேந்தோ ஆஹா’’தி.

யம் அத்தனோ புஞ்ஞானுபா⁴வஸித்³த⁴ம் சக்கரதனம் நிப்பரியாயதோ தேன பவத்திதம் நாம, ந இதரந்தி பட²மனயோ வுத்தோ. யஸ்மா பவத்திதஸ்ஸேவ அனுபவத்தனம், பட²மனயோ ச தம்ஸதி³ஸே தப்³போ³ஹாரவஸேன வுத்தோதி தம் அனாதி³யித்வா து³தியனயோ வுத்தோ. த³ஸவித⁴ந்தி அந்தோஜனஸ்மிம், ப³லகாயே ரக்கா²வரணகு³த்தியா ஸம்விதா⁴னம், க²த்தியேஸு அனுயுத்தேஸு, ப்³ராஹ்மணக³ஹபதிகேஸு, நேக³மஜானபதே³ஸு, ஸமணப்³ராஹ்மணேஸு, மிக³பக்கீ²ஸு அத⁴ம்மசாரபடிக்கே²போ, அத⁴னானம் த⁴னானுப்பதா³னம், ஸமணப்³ராஹ்மணே உபஸங்கமித்வா பஞ்ஹபுச்ச²னந்தி ஏவம் த³ஸவித⁴ம். தத்த² க³ஹபதிகே பக்கி²ஜாதே ச விஸும் கத்வா க³ஹணவஸேன த்³வாத³ஸவித⁴ம். சக்கவத்திவத்தந்தி சக்கவத்திபா⁴வாவஹம் வத்தம். யஸ்மா யாதா²வதோ பவத்திதம், தத³னுரூபகம் பன ஞாயேன யுத்தகேன பவத்திதம் நாம ஹோதீதி ஆஹ ‘‘ஸம்மா நயேன ஹேதுனா காரணேனா’’தி. உப⁴தோபா⁴க³விமுத்தாதி உப⁴யபா⁴கே³ஹி உப⁴யபா⁴க³தோ விமுத்தாதி அயமேத்த² அத்தோ²தி த³ஸ்ஸேதி ‘‘த்³வீஹி பா⁴கே³ஹி விமுத்தா, அரூபா…பே… நாமகாயதோ’’தி இமினா. தேவிஜ்ஜாதி³பா⁴வந்தி தேவிஜ்ஜச²ளபி⁴ஞ்ஞசதுப்படிஸம்பி⁴த³பா⁴வம். பஞ்ஞாவிமுத்தா ஹி தம் திவித⁴ம் அப்பத்தா கேவலம் பஞ்ஞாய ஏவ விமுத்தா.

விஸுத்³த⁴த்தா²யாதி விஸுத்³தி⁴பவாரணத்தா²ய. ஸம்யோஜனட்டே²ன ஸம்யோஜனஸங்கா²தே சேவ ப³ந்த⁴னட்டே²ன ப³ந்த⁴னஸங்கா²தே ச. விஜிதஸங்கா³மந்தி யதா² ராகா³த³யோ புன ந ஸீஸம் உக்கி²பந்தி, ஏவம் அரியமக்³க³ஸேனாய வஸேன விஜிதஸங்கா³மம். தேனாஹ ‘‘விஜிதராக³தோ³ஸமோஹஸங்கா³ம’’ந்தி. மாரப³லஸ்ஸாதி மாரஸேனாய, மாரஸ்ஸ வா ஸாமத்தி²யஸ்ஸ. வேனேய்யஸத்த²ந்தி வினேதப்³ப³ஜனஸமூஹம். ஸகடாதி³ஸத்த²ஸபா⁴க³தோ வினேய்யோவ ஸத்தோ²தி தம் வேனேய்யஸத்த²ம். ஸீலஸாராதி³அபா⁴வதோ அந்தோதுச்சோ².

பவாரணாஸுத்தவண்ணனா நிட்டி²தா.