7. ப்³ராஹ்மணஸம்யுத்தம்

1. அரஹந்தவக்³கோ³

1. த⁴னஞ்ஜானீஸுத்தவண்ணனா

187. த⁴னஞ்ஜானிகோ³த்தாதி ஏத்த² புப்³ப³புரிஸதோ ஆக³தஸ்ஸ குலவம்ஸஸ்ஸ நாமாபி⁴தா⁴னஸங்கா²தம் க³ம் தாயதீதி கோ³த்தம். (கிம் பன தந்தி? அஞ்ஞகுலபரம்பராஸாதா⁴ரணம் தஸ்ஸ குலஸ்ஸ ஆதி³புரிஸஸமுதா³க³தம் தம்குலபரியாபன்னஸாதா⁴ரணம் ஸாமஞ்ஞரூபந்தி த³ட்ட²ப்³ப³ம்.) த⁴னஞ்ஜானிகோ³த்தம் ஏதிஸ்ஸந்தி த⁴னஞ்ஜானிகோ³த்தா. தஸ்ஸா உதா³னஸ்ஸ காரணம் புச்சி²த்வா ஆதி³தோ பட்டா²ய விபா⁴வேதும் ‘‘ஸோ கிரா’’திஆதி³ வுத்தம். நானாரஸபோ⁴ஜனம் தே³தீதி யோஜனா. பஞ்சகோ³ரஸஸம்பாதி³தம் ஸாலிப⁴த்தம் ஸூபஸாகப்³யஞ்ஜனம் நானாரஸம் ப்³ராஹ்மணபோ⁴ஜனம். மண்ட³லக்³க³க²க்³க³ந்தி மண்ட³லக்³க³ஸங்கா²தம் க²க்³க³ம். து³விதோ⁴ ஹி க²க்³கோ³ மண்ட³லக்³கோ³ தீ³க⁴க்³கோ³தி. தத்த² யஸ்ஸ அக்³கோ³ மண்ட³லாகாரேன டி²தோ, ஸோ மண்ட³லக்³கோ³. யஸ்ஸ பன அஸிபுத்திகா விய தீ³கோ⁴, ஸோ தீ³க⁴க்³கோ³.

ஸாஸனாதி அனுஸாஸனா. ‘‘நமோ…பே… ஸம்பு³த்³த⁴ஸ்ஸா’’தி ஏவம் வுத்தா பஞ்சபதி³ககா³தா². ஸத்து²ஸாஸனே ஹி லோகியச்ச²ந்த³ம் அனபேக்கி²த்வா ஏஸா பஞ்சபதி³ககா³தா²தி த³ட்ட²ப்³பா³. ஓக்காவரத⁴ராதி புப்³ப³புரிஸஸங்கா²தஉக்காகவம்ஸவரதா⁴ரிகா. ஸக்காதி ஸக்குணேய்யம்.

ஏவந்தி ‘‘ஸசே மே அங்க³மங்கா³னீ’’திஆதி³னா இமினா பகாரேன. ‘‘பஞ்ச கா³தா²ஸதானி பன அட்ட²கத²ம் ஆருள்ஹானி, இத⁴ பன த்³வே ஏவ உத்³த⁴டா’’தி வத³ந்தி. பஹரிதும் வாதி ஏகவாரம்பி ஹத்தே²ன வா பாதே³ன வா பஹரிதும்பி பராமஸிதும்பி அஸக்கோந்தோதி அத்தோ². ஸோ ஹி தஸ்ஸா அரியஸாவிகாய ஆனுபா⁴வேன அத்தனோ ஸாமத்தி²யேன வஸே வத்தாபனத்த²ம் ஸந்தஜ்ஜித்வாபி தத³னுவத்தந்தோ நிப்³பி³ஸோ அஹோஸி. தேனாஹ ‘‘போ⁴தீ’’திஆதி³.

தஸ்ஸ ப்³ராஹ்மணஸ்ஸாதி அத்தனோ ஸாமிகப்³ராஹ்மணஸ்ஸ. உபஸம்ஹரந்தீதி உபனேந்தீ. தஸ்மிம் ஸமயேதி தஸ்மிம் து³க்கு²ப்பத்திகாலே ‘‘ஸப்³பே³ ஸங்கா²ரா து³க்கா²’’தி ப⁴க³வதோ வசனம் அனுஸ்ஸரித்வா ‘‘த³ஸப³லஸ்ஸ ப⁴க³வதோ’’திஆதீ³ஸு யதா²பரிசிதம் கு³ணபத³ம் அனுஸ்ஸரி. தேனாஹ ‘‘த³ஸப³லம் ஸரீ’’தி.

க²ந்திஸோரச்சரஹிததாய குஜ்ஜி²த்வா. பி⁴ஜ்ஜித்வாதி ஸம்யதாபா⁴வதோ தஸ்ஸ ப்³ராஹ்மணஸ்ஸ அந்தரே மேத்திபே⁴தே³ன பி⁴ஜ்ஜித்வா. ஏவமேவாதி யதா² ஏதரஹி அகாரணேன, ஏவமேவ அஞ்ஞதா³பி அகாரணேனாதி அத்தோ². நிக்காரணதாதீ³பனே ஏவம்-ஸத்³தோ³, ஏவ-ஸத்³தோ³ பன அவதா⁴ரணத்தோ². நிக்காரணதா ச நாம நிரத்த²கதா, நிரத்த²கவிப்பலாபபா⁴வேனேத்த² ஏவம்-ஸத்³த³ஸ்ஸ க³ஹணே பவத்தி க³வேஸிதப்³பா³. க³ரஹத்தோ² வாயம் ஏவம்-ஸத்³தோ³ அனேகத்த²த்தா நிபாதானம். க³ரஹத்த²தா சஸ்ஸ வஸலிஸத்³த³ஸன்னிதா⁴னதோ பாகடா ஏவ.

கா³மனிக³மரட்ட²பூஜிதோதி இமினா கா³மனிக³மரட்ட²ஸாமிகேஹி பூஜிதபா⁴வோ தீ³பிதோ கா³மாதீ³னம் தேஸம் வஸே வத்தனதோ. அஸுகஸ்ஸ நாம புக்³க³லஸ்ஸ. ஸேஸந்தி அபி⁴க்கந்தந்திஆதி³, யம்பி சஞ்ஞம் இதா⁴க³தம் ஹேட்டா² வண்ணிதஞ்ச.

த⁴னஞ்ஜானீஸுத்தவண்ணனா நிட்டி²தா.

2. அக்கோஸஸுத்தவண்ணனா

188. பா⁴ரத்³வாஜோவ ஸோதி பா⁴ரத்³வாஜோ நாம ஏவ ஸோ ப்³ராஹ்மணோ. கோ³த்தவஸேன ஹி தயித³ம் நாமம், விஸேஸேன பனேதம் ஜாதந்தி த³ஸ்ஸேதும் ‘‘பஞ்சமத்தேஹீ’’திஆதி³ வுத்தம். ஜானிகதாதி ஞாதிவக்³க³ஹானிகதா. பக்கோ² பி⁴ன்னோதி ததோ ஏவ ஞாதிபக்கோ² நட்டோ². யதா² தோ³மனஸ்ஸிதோ அனத்தமனோதி வத்தப்³ப³ம் லப⁴தி, ஏவம் குபிதோதி ஆஹ ‘‘தோ³மனஸ்ஸேன சா’’தி. த³ஸஹீதி அனவஸேஸபரியாதா³னவஸேன வுத்தம் பஞ்சஹி கா³தா²ஸதேஹி அக்கோஸந்தோ ததா² அக்கோஸேய்யாதி கத்வா. தத்த² பன யேன கேனசி அக்கோஸந்தோபி அக்கோஸதியேவ நாம. கரோஸி மம பா⁴திகஸ்ஸ பப்³ப³ஜ்ஜம்.

ஸம்பு⁴ஞ்ஜதீதி ஸம்போ⁴க³ம் கரோதி. அக்கோஸாதீ³ஹி ஏகதோ பு⁴ஞ்ஜதி. வீதிஹரதீதி ப்³யதிஹாரம் கரோதி, அக்கோஸதோ பச்சக்கோஸனாதி³னா வினிமயம் கரோதீதி அத்தோ². தேனாஹ ‘‘கதஸ்ஸ படிகாரம் கரோதீ’’தி. அஸ்ஸ அனுஸ்ஸவவஸேன ஸுத்வா ‘‘ஸபதி ம’’ந்தி ஸஞ்ஞினோ ப⁴யம் உப்பஜ்ஜீதி யோஜனா. அஸ்ஸாதி ப்³ராஹ்மணஸ்ஸ. ஸுத்வாதி பத³ம் உப⁴யத்தா²பி யோஜேதப்³ப³ம் ‘‘தவேவேதம் ப்³ராஹ்மணாதி ஸுத்வா, அனுஸ்ஸவவஸேன ஸுத்வா’’தி ச. காமம் கிஸவச்சா²த³யோ ஸபனம் நாத³ம்ஸு, தே³வதானம்யேவ ஹி ஸோ அத்தோ², ஸத்தானம் பன ததா² ஸஞ்ஞா உப்பன்னா, ஸோபி ததா²ஸஞ்ஞீ அஹோஸி. தேனாஹ ‘‘அனுஸ்ஸவவஸேனா’’தி.

த³ந்தஸ்ஸ ஸப்³ப³ஸோ த³மத²ம் உபக³தத்தா. நிப்³பி³ஸேவனஸ்ஸாதி ராக³தோ³ஸாதி³ஹேதுகவிப்ப²ந்த³னரஹிதஸ்ஸ. தஸ்ஸேவாதி படிகுஜ்ஜ²ந்தஸ்ஸேவ புக்³க³லஸ்ஸ தேன கோதே⁴ன பாபம் ஹோதி பாபஸ்ஸ ஸந்தானந்தரஸங்கந்தியா அபா⁴வதோ. கேசி பன ‘‘தஸ்ஸேவாதி தஸ்ஸேவ படிகுஜ்ஜ²ந்தபுரிஸஸ்ஸ தேன படிகுஜ்ஜ²னேன. பாபியோதி படிகுஜ்ஜ²ந்தபுக்³க³லஸ்ஸ லாமகதரோ’’தி ஏவமேத்த² அத்த²ம் வத³ந்தி. ஸதியா ஸமன்னாக³தோ ஹுத்வா படிஸங்கா²னே டி²தோ அதி⁴வாஸேதி, ந ஸஹோ மூள்ஹோ ஹுத்வாதி அதி⁴ப்பாயோ. உபி⁴ன்னம் திகிச்ச²ந்தந்தி உபி⁴ன்னம் உப்பன்னகோத⁴ஸங்கா²தம் கிலேஸப்³யாதி⁴ம் திகிச்ச²ந்தம் வூபஸமேந்தம் தம் புக்³க³லம். யோ புக்³க³லோதிஆதி³னா புரிமாஸு கா³தா²ஸு பவத்திதானி பதா³னி ஸம்ப³ந்தி⁴த்வா த³ஸ்ஸேதி. பஞ்சஸு க²ந்தே⁴ஸு யாதா²வதோ வினீதா அரியத⁴ம்மஸ்ஸ கோவிதா³ நாம ஹோந்தீதி ஆஹ ‘‘த⁴ம்மஸ்ஸாதி பஞ்சக்க²ந்த⁴த⁴ம்மஸ்ஸா’’தி. இதா³னி தமத்த²ம் பரிபுண்ணம் கத்வா த³ஸ்ஸேந்தோ ஆஹ ‘‘சதுஸச்சத⁴ம்மஸ்ஸ வா’’தி.

அக்கோஸஸுத்தவண்ணனா நிட்டி²தா.

3. அஸுரிந்த³கஸுத்தவண்ணனா

189. தேனேவாதி பா⁴துபப்³ப³ஜிதேனேவ. அஸ்ஸேவாதி திதிக்க²ஸ்ஸ. ‘‘தம் ஜயம் ஹோதீ’’தி லிங்க³விபல்லாஸவஸேன வுத்தந்தி ஆஹ ‘‘ஸோ ஜயோ ஹோதீ’’தி, து³ஜ்ஜயம் கோத⁴ம் திதிக்கா²ய ஜினந்தஸ்ஸாதி அதி⁴ப்பாயோ. யஸ்மா திதிக்கா²த³யோ ந கோத⁴வஸிகம் து⁴ரம், தம் பன பா³லானம் மஞ்ஞனாமத்தந்தி இத⁴ இமமத்த²ம் விபா⁴வேதும் ‘‘கதமஸ்ஸா’’திஆதி³ வுத்தம். விஜானதோவ ஜயோ ந அவிஜானதோ திதிக்கா²ய அபா⁴வதோ. ந ஹி அவிஜானந்தோ அந்த⁴பா³லோ கோத⁴ம் விஜேதும் ஸக்கோதி. கேவலம் ஜயம் மஞ்ஞதி கிலேஸேஹி பராஜிதோ ஸமானோபீதி அதி⁴ப்பாயோ.

அஸுரிந்த³கஸுத்தவண்ணனா நிட்டி²தா.

4. பி³லங்கி³கஸுத்தவண்ணனா

190. ஸுத்³த⁴ந்தி கேவலம் ஸம்பா⁴ரவிரஹிதம். ஸம்பா⁴ரயுத்தந்தி கடுகப⁴ண்டா³தி³ஸம்பா⁴ரஸஹிதம். கஞ்ஜிதோ நிப்³ப³த்தத்தா கஞ்ஜிகம், ஆரனாலம், பி³லங்க³ந்தி அத்தோ². நாமம் க³ஹிதம் ஸங்கீ³திகாலே ‘‘பி³லங்கி³கபா⁴ரத்³வாஜோ’’தி விஸேஸனவஸேன. தயோதி த⁴னஞ்ஜானியா ஸாமிகோ பா⁴ரத்³வாஜோ, அக்கோஸகபா⁴ரத்³வாஜோ, அஸுந்த³ரிகபா⁴ரத்³வாஜோதி ஆதி³தோ தீஸு ஸுத்தேஸு ஆக³தா தயோ. மேதி மய்ஹம்.

பி³லங்கி³கஸுத்தவண்ணனா நிட்டி²தா.

5. அஹிம்ஸகஸுத்தவண்ணனா

191. ஏஸாதி ப்³ராஹ்மணோ. ‘‘அஹிம்ஸகோ அஹ’’ந்தி தத³த்த²ம் ஸாதே⁴தும் இச்சா²ய கதே²ஸீதி வுத்தம் ‘‘அஹிம்ஸகபஞ்ஹம் புச்சீ²’’தி. ததா² சே அஸ்ஸாதி யதா² தே நாமஸ்ஸ அத்தோ², ததா² சேதம் ப⁴வேய்யாஸி அன்வத்த²னாமகோ ப⁴வேய்யாஸி அஹிம்ஸகோ ஏவ ஸியாதி. ந து³க்கா²பேதி து³க்க²மத்தம்பி ந உப்பாதே³தி, து³க்க²தோ அபனேதீதி அத்தோ².

அஹிம்ஸகஸுத்தவண்ணனா நிட்டி²தா.

6. ஜடாஸுத்தவண்ணனா

192. ஜடாபஞ்ஹஸ்ஸாதி ‘‘அந்தோஜடா ப³ஹிஜடா’’தி ஏவம் ஜடாபரியாயஸ்ஸ பஞ்ஹஸ்ஸ.

ஜடாஸுத்தவண்ணனா நிட்டி²தா.

7. ஸுத்³தி⁴கஸுத்தவண்ணனா

193. ஸுத்³தி⁴கபஞ்ஹஸ்ஸாதி ‘‘நாப்³ராஹ்மணோ ஸுஜ்ஜ²தீ’’தி ஏவம் ஸுத்³த⁴ஸன்னிஸ்ஸிதஸ்ஸ பஞ்ஹஸ்ஸ. ஸீலஸம்பன்னோதி பஞ்சவித⁴னியமலக்க²ணேன ஸீலேன ஸமன்னாக³தோ. தபோகம்மந்தி அனஸனபஞ்சாதபதப்பனாதி³பரிபே⁴த³னதபோகம்மம் கரோந்தோபி. விஜ்ஜாதி தயோ வேதா³தி வத³ந்தி ‘‘தாய இத⁴லோகத்த²ம் பரலோகத்த²ம் ஞாயந்தீ’’தி கத்வா. கோ³த்தசரணந்தி கோ³த்தஸங்கா²தம் சரணம். ப்³ராஹ்மணோ ஸுஜ்ஜ²தி ஜேட்ட²ஜாதிகத்தா. ததா² ஹி ஸோ ஏவ தபம் ஆசரிதும் லப⁴தி, ந இதரோ. அஞ்ஞா லாமிகா பஜாதி இதரவண்ணம் வத³தி. வசனஸஹஸ்ஸம்பீதி கா³தா²னேகஸஹஸ்ஸம்பி. அந்தோ கிலேஸேஹி பூதிகோ ஸபா⁴வேன பூதிகோ. கிலிட்டே²ஹி காயகம்மாதீ³ஹி காயது³ச்சரிதாதீ³ஹி.

ஸுத்³தி⁴கஸுத்தவண்ணனா நிட்டி²தா.

8. அக்³கி³கஸுத்தவண்ணனா

194. அக்³கி³பரிசரணவஸேனாதி அக்³கி³ஹுத்தஜுஹனவஸேன. ஸன்னிஹிதோதி மிஸ்ஸீபா⁴வம் ஸம்பாபிதோ. ததா²பூ⁴தோ ச ஸோ ஸப்பினா ஸத்³தி⁴ம் யோஜிதோ நாம ஹோதீதி ஆஹ ‘‘ஸம்யோஜிதோ’’தி. அபாயமக்³க³ம் ஓக்கமதி மிச்சா²தி³ட்டி²மிச்சா²ஸங்கப்பாதீ³னம் அத்தனோ ஸந்தானே ஸமுப்பாத³னதோ. தேனாஹ ‘‘இமம் லத்³தி⁴’’ந்திஆதி³.

ஜாதியாதி ஸதோ³ஸகிரியாபராத⁴ஸ்ஸ அஸம்ப⁴வேன பரிஸுத்³தா⁴ய ஜாதியா. நானப்பகாரே அட்டா²ரஸவிஜ்ஜாட்டா²னஸஞ்ஞிதே க³ந்தே². ஸுதவாதி ஸுத்வா நிட்ட²ம் பத்தோ அக்³க³த³க்கி²ணேய்யத்தாதி அதி⁴ப்பாயோ.

புப்³பே³னிவாஸஞாணேனாதி இத³ம் லோகே ஸாஸனே ச நிருள்ஹதாவஸேன வுத்தம். அஞ்ஞே ஹி புப்³பே³னிவாஸம் ஜானந்தா புப்³பே³னிவாஸஞாணேனேவ ஜானந்தி, ப⁴க³வா பன ஸப்³ப³ஞ்ஞுதஞ்ஞாணேனபி ஜானாதி. தி³ப்³பே³ன சக்கு²னாதி ஏத்தா²பி ஏஸேவ நயோ. ஸப்³ப³ஸோ ஜாதி கீ²யதி ஏதேனாதி ஜாதிக்க²யோ, அக்³க³மக்³கோ³, தேன பத்தப்³ப³த்தா ஆபன்னத்தா ச ஜாதிக்க²யோ அரஹத்தம். ஜானித்வா வோஸிதவோஸானோதி விஜானிதப்³ப³ம் சதுஸச்சத⁴ம்மம் மக்³க³ஞாணேன ஜானித்வா ஸோளஸன்னம்பி கிச்சானம் வோஸிதவோஸானோ.

உப்பத்திம் தீ³பேத்வாதி பாயஸதா³னஸ்ஸ ஆக³மனம் பகாஸேத்வா. கா³தா²ஹி அபி⁴கீ³தந்தி த்³வீஹி கா³தா²ஹி மயா அபி⁴கீ³தம். அபு⁴ஞ்ஜிதப்³ப³ந்தி பு⁴ஞ்ஜிதும் ந யுத்தம். ‘‘அபோ⁴ஜனேய்ய’’ந்தி கஸ்மா வுத்தம், நனு ப⁴க³வதோ அஜ்ஜா²ஸயோ அச்சந்தமேவ ஸுத்³தோ⁴தி? ஸச்சமேதம், ப்³ராஹ்மணோ பன புப்³பே³ அதா³துகாமோ பச்சா² கா³தா² ஸுத்வா த⁴ம்மதே³ஸனாய முது³ஹத³யோ ஹுத்வா தா³துகாமோ அஹோஸி, தஸ்மா தம் பி⁴க்கூ²னம் அனாக³தே தி³ட்டா²னுக³திஆபஜ்ஜனத்த²ம் படிக்கி²பி. ததா² ஹி அனந்தரஸுத்தே கஸிபா⁴ரத்³வாஜஸுத்தே ச ஏவமேவ படிபஜ்ஜி. தேனாஹ ‘‘த்வம் ப்³ராஹ்மணா’’திஆதி³. கிலஞ்ஜம்ஹி…பே… பகாஸிதாதி ஏதேன கா³த²ம் உத்³தே³ஸட்டா²னேவ ட²பேத்வா ப⁴க³வா ப்³ராஹ்மணஸ்ஸ வித்தா²ரேன த⁴ம்மம் தே³ஸேஸீதி த³ஸ்ஸேதி. கா³யனேனாதி கா³யனகேன, கா³னேன வா. அத்த²ஞ்ச த⁴ம்மஞ்சாதி ஸதே³வகஸ்ஸ லோகஸ்ஸ ஹிதஞ்சேவ தஸ்ஸ காரணஞ்ச. ஸம்பஸ்ஸந்தானந்தி ஸம்மதே³வ பஸ்ஸந்தானம். த⁴ம்மோதி பவேணிஆக³தோ சாரித்தத⁴ம்மோ ந ஹோதி. போ⁴ஜனேஸு உக்கம்ஸக³தம் த³ஸ்ஸேதும் ‘‘ஸுதா⁴போ⁴ஜன’’ந்தி ஆஹ. த⁴ம்மே ஸதீதி அரியானம் ஆசாரத⁴ம்மே ஸதி தம் ஆலம்பி³த்வா ஜீவந்தானம் ஏததே³வ ஸேட்ட²ந்தி ‘‘ஸோமம் பு⁴ஞ்ஜேய்ய பாயஸ’’ந்தி தம் ஆரப்³ப⁴ கதா²ய உப்பன்னத்தா.

ஸல்லக்கே²தி அயம் ப்³ராஹ்மணோ. ஸேஸா பச்சயா நித்³தோ³ஸா தே ஆரப்³ப⁴ கதா²ய அப்பவத்திதத்தா. குக்குச்சவூபஸந்தந்தி அக்³கி³ஆஹிதபத³ஸ்ஸ விய ஸத்³த³ஸித்³தி⁴ வேதி³தப்³பா³. அன்னேன பானேனாதி லக்க²ணவசனமேதம் யதா² ‘‘காகேஹி ஸப்பி ரக்கி²தப்³ப³’’ந்தி. தேனாஹ ‘‘தே³ஸனாமத்தமேத’’ந்தி. ப³ஹுஸஸ்ஸப²லதா³யகம் ஸுகே²த்தம் விய படியத்தந்தி ஸம்மா கஸனபீ³ஜனஉத³கானயனாபனயனாதி³னா ஸுஸஜ்ஜிதம் கே²த்தம் விய ஸீலாதி³கு³ணவிஸேஸஸம்பாத³னேன படியத்தம் புஞ்ஞக்கே²த்தம் ஏதம்.

அக்³கி³கஸுத்தவண்ணனா நிட்டி²தா.

9. ஸுந்த³ரிகஸுத்தவண்ணனா

195. ஆனேத்வா ஹுனிதப்³ப³தோ ஆஹுதி. ஸப்பிமது⁴பாயஸாதீ³ஹி அக்³கி³ம் ஜுஹோதி ஏத்தா²தி அக்³கி³ஹுத்தம், ஸாதி⁴ட்டா²னம் வேதி³தப்³ப³ம். தேனாஹ ‘‘அக்³யாயதன’’ந்திஆதி³. ஸுவிஸோதி⁴தோ சஸ்ஸாதி நிஹீனஜாதிகானம் அனேன ஸுட்டு² விஸோதி⁴தோ ச ப⁴வேய்ய. ‘‘மே’’தி பத³ம் ஆனேத்வா ஸம்ப³ந்தோ⁴.

அப²லம் கரோதீதி இதோ பட்டா²ய யாவ தே³மீதி பத³ம். தாவ அனந்தரஸுத்தவண்ணனாய ஆக³தஸதி³ஸமேவாதி பேய்யாலவஸேன ட²பேஸி, ந ஸப்பிஸங்கா²ரட்ட²பனம். ஹிமபாதஸ்ஸ ச ஸீதவாதஸ்ஸ ச படிபா³ஹனத்த²ந்தி அகாரணமேதந்தி தம் அனாதி³யித்வா அஞ்ஞமேவ ஸுகாரணம் த³ஸ்ஸேதும் ‘‘படிப³லோவா’’திஆதி³ வுத்தம். ஸஞ்ஜானித்வாதி ‘‘நாயம் ப்³ராஹ்மணோ’’தி ஸஞ்ஜானித்வா.

நீசகேஸந்தந்தி ரஸ்ஸகேஸந்தம். ப்³ராஹ்மணானம் ஸுத்³தி⁴அத்தா² ஸிகா²தி ஆஹ ‘‘பவத்தமத்தம்பி, ஸிக²ம் அதி³ஸ்வா’’தி, ‘‘பரமஹம்ஸபரிக்கா²தி³னா’’தி கேசி.

அகாரணம் த³க்கி²ணேய்யபா⁴வஸ்ஸ ஜாதி அத³க்கி²ணேய்யபா⁴வஹேதூனம் பாபத⁴ம்மானம் அபடிக்கே²பபா⁴வதோ. ஏதந்தி ஸீலாதி³பே⁴த³ம் சரணம். த³க்கி²ணேய்யபா⁴வஸ்ஸ காரணம் அத³க்கி²ணேய்யபா⁴வகாரகபாபத⁴ம்மானம் தத³ங்கா³தி³வஸேன பஜஹனதோ. அஸ்ஸாதி ப்³ராஹ்மணஸ்ஸ. தமத்த²ந்தி தம் த³க்கி²ணேய்யபா⁴வஸ்ஸ காரணதாஸங்கா²தமத்த²ம் உபமாய விபா⁴வேந்தோ. ஸாலாதி³கட்டா² ஜாதோவாதி ஸாலாதி³விஸுத்³த⁴கட்டா²வ ஜாதோ. ஸாபானதோ³ணிஆதி³அவிஸுத்³த⁴கட்டா² ஜாதோ அக்³கி³கிச்சம் ந ச ந கரோதி. ஏவந்தி யதா² அக்³கி³ யதோ குதோசி ஜாதோபி அக்³கி³கிச்சம் கரோதியேவ, ஏவம் சண்டா³லகுலாதீ³ஸு ஜாதோபி த³க்கி²ணேய்யோ ந ந ஹோதி கு³ணஸம்பதா³வஸேன அரியானம் வம்ஸே பஜாதத்தாதி ஆஹ ‘‘கு³ணஸம்பத்தியா ஜாதிமா’’தி. தி⁴தியா கு³ணஸம்பத்தியா பமுக²பா⁴வம் த³ஸ்ஸேதும் ‘‘ஸோ ஹீ’’திஆதி³ வுத்தம். தத்த² தி⁴தியாதி வீரியேன. தஞ்ஹி அனுப்பன்னானம் குஸலத⁴ம்மானம் உப்பாத³னபரிப்³ரூஹனேஹி தே தா⁴ரேதி. ஹிரியா தோ³ஸே நிஸேதே⁴தி, ஸம்மதே³வ பாபானம் ஜிகு³ச்ச²னே ஸதி தேஸம் பவத்தியா அவஸரோ ஏவ நத்தி². மோனத⁴ம்மேன ஞாணஸங்கா²தேன ஓத்தப்பத⁴ம்மேன. காரணாகாரணஜானனகோதி தேஸம் தேஸம் த⁴ம்மானம் யதா²பூ⁴தம் டா²னம், பாபத⁴ம்மானம் வா விப்பகாரஸபா⁴வட்டா²னம் ஜானனகோ.

பரமத்த²ஸச்சேன நிப்³பா³னேன ஆரம்மணபச்சயபூ⁴தேன அரியமக்³கே³ன த³ந்தோ. இந்த்³ரியத³மேனாதி ததோ ஏவ அரியேன இந்த்³ரியஸம்வரேன உபக³தோ. வித³ந்தி தேஹி ஸச்சானீதி வேதா³. மக்³க³வேதா³னம் அந்தந்தி அரியப²லம். கிலேஸானம் அந்தந்தி தேஸம் அனுப்பாத³னிரோத⁴ட்டா²னம். யஞ்ஞோதி அக்³க³ப²லம். நிரத்த²கந்தி அப²லம் தேஸம் அனாக³மனதோ, ஆக³தானம்பி அக்³க³த³க்கி²ணேய்யாபா⁴வதோ. ஜுஹதி தே³தி.

ஸுயிட்ட²ந்தி ஸுதா³னம் அக்³க³த³க்கி²ணேய்யலாபே⁴ன. ஸுஹுதந்தி தஸ்ஸேவ வேவசனம். அத² வா ஸுயிட்ட²ந்தி ஸுட்டு² ஸம்மதே³வ யிட்ட²ம் ஸாரே உபனீதம் மம இத³ம் தே³ய்யவத்து². ஸுஹுதந்தி ஏத்தா²பி ஏஸேவ நயோ.

உபஹடமத்தேதி ப்³ராஹ்மணேன ‘‘பு⁴ஞ்ஜது ப⁴வ’’ந்தி உபனீதமத்தே. நிப்³ப³த்திதோஜமேவாதி ஸவத்து²கம் அக்³க³ஹேத்வா வத்து²தோ விவேசிதஓஜமேவ. தேன தம் ஸுகு²மத்தம் க³தந்தி தம் ஹப்³யஸேஸம் ஸப்³ப³ஸோ ஸுகு²மபா⁴வம் க³தந்தி ஓஜாய அனோளாரிகதாய புரிமாகாரேனேவ பஞ்ஞாயமானதம் ஸந்தா⁴ய வுத்தம், ந பன ஓஜாய ஏவ கேவலாய க³ஹணம் ஸந்தா⁴ய. ஸா ஹி அவினிப்³போ⁴க³வுத்திதாய விஸும் க³ண்ஹிதும் ந ஸக்கா, தஸ்மா தே³வதாஹிபி ஸவத்து²கா க³ய்ஹதி. மனுஸ்ஸானம் வத்தூ²தி கரஜகாயமாஹ. ஓளாரிகவத்து²தாய தே³வானம் விய க³ஹணீ ந திக்கா²தி தி³ப்³போ³ஜஸம்மிஸ்ஸதாய ஸம்மா பரிணாமம் ந க³ச்ச²தி. ஸுகு²மாபி ஸமானா தி³ப்³போ³ஜா தேன பாயஸேன மிஸ்ஸிதா ஓளாரிகஸம்மிஸ்ஸதாய ஸுகு²மவத்து²கானம் தே³வானம் ஸுக²தா³ ந ஹோதீதி இமமத்த²ம் த³ஸ்ஸேதி ‘‘கோ³யூஸே பனா’’திஆதி³னா. பரிபோ⁴க³வத்து²னோ ஓளாரிகதாய வா தே³வானம் து³க்கரம் ஸம்மா பரிணாமேதும், தி³ப்³போ³ஜாய க³ருதரபா⁴வேன மனுஸ்ஸானம். தேனாஹ ப⁴க³வா ‘‘ந க்²வாஹ’’ந்திஆதி³. ஸமாபத்திசித்தஸமுட்டி²தா தேஜோதா⁴து ஜா²னானுபா⁴வஸந்தேஜிதா திக்க²தரா ஹோதீதி வுத்தம் ‘‘அட்ட²…பே… பரிணாமேய்யா’’தி. ப⁴க³வதோ பன ஸுத்³தே⁴னேவ பரிணமதீதி வுத்தம் ‘‘பாகதிகேனேவா’’தி, ஜா²னானுபா⁴வப்பத்தேன ஜா²னேன வினா ஸபா⁴வஸித்³தே⁴னேவ.

‘‘அப்பஹரிதே’’தி ஏத்த² அப்ப-ஸத்³தோ³ ‘‘அப்பிச்சோ²’’திஆதீ³ஸு விய அபா⁴வத்தோ²தி ஆஹ ‘‘அப்பஹரிதேதி அஹரிதே’’தி. பாதிஸதேபி பாயஸே. ந ஆலுளதீதி ந ஆவிலம் ஹோதி. அனாக³ந்தாவ க³ச்சே²ய்ய ‘‘அத்தனாபி ந பரிபு⁴ஞ்ஜி, அஞ்ஞேஸம் ந தா³பேஸி, கேவலம் பாயஸம் நாஸேஸீ’’தி தோ³மனஸ்ஸப்பத்தோ.

தா³ரு ஸமாத³ஹானோதி தா³ருஹரித்³தி³ தா³ருஸ்மிம் தஸ்ஸ த³ஹந்தோ. யதீ³திஆதி³ தா³ருஜா²பனஸ்ஸ ப³ஹித்³த⁴பா⁴வஸாத⁴னம் அஸுத்³த⁴ஹேதூனம் படிபக்கா²பா⁴வதோ தஸ்ஸ. க²ந்தா⁴தீ³ஸு குஸலாதி தேஸு ஸபா⁴வதோ ஸமுத³யதோ அத்த²ங்க³மதோ அஸ்ஸாத³தோ ஆதீ³னவதோ நிஸ்ஸரணதோ ஜானனதோ சே²கா பண்டி³தா. ஞாணஜோதிந்தி ஞாணமயம் ஜோதிம். ஜாலேமீதி பஜ்ஜலிதம் கரோமி. நிச்சம் பஜ்ஜலிதக்³கி³ ஸப்³ப³த்த²கமேவ விக³தஸம்மோஹந்த⁴காரதாய ஏகோபா⁴ஸபா⁴வதோ. ஸப்³ப³ஸோ விக்கே²பாபா⁴வதோ நிச்சஸமாஹிதத்தோ. ஏவம் வத³தீதி சரிதம் ப்³ரஹ்மசரியம் க³ஹேத்வா சராமீதி ஏவம் வத்தமானம் விய வத³தி ஆஸன்னதம் ஹத³யே ட²பேத்வா.

கா²ரிபா⁴ரோதி கா²ரிபா⁴ரஸதி³ஸோ. தேனாஹ ‘‘யதா²’’திஆதி³. க²ந்தே⁴ன வய்ஹமானோதி காஜே பக்கி²பித்வா க²ந்தே⁴ன வய்ஹமானோ. பத²வியா ஸத்³தி⁴ம் பு²ஸேதி பா⁴ரஸ்ஸ க³ருகபா⁴வேன காஜஸ்ஸ பரிணமனேன. மானேன அத்தனோ ஜாதிஆதீ³னி பக்³க³ண்ஹதோ அஞ்ஞஸ்ஸ தானி ந ஸஹதீதி ஆஹ – ‘‘தத்த² தத்த² இஸ்ஸம் உப்பாதே³ந்தோ’’தி, தத்த² தத்த² ஜாதிஆதி³மானவத்து²ஸ்மிம் க³ருதரக்³க³ஹணேன ஸம்ஸீதே³ய்யாதி அதி⁴ப்பாயோ. கோதோ⁴ தூ⁴மோதி யதா²பி பா⁴ஸுரோ அக்³கி³ தூ⁴மேன உபக்கிலிட்டோ², ஏவம் கோதே⁴ன உபக்கிலிட்டோ². ஞாணக்³கீ³தி தஸ்ஸ கோதோ⁴ தூ⁴மோ. முஸாவாதோ³வ மோஸவஜ்ஜம். யதா² ஞாணே ஸதி முஸாவாதோ³ நத்தி², ஏவம் முஸாவாதே³ ஸதி ஞாணம்பீதி தேன தம் நிரோதி⁴தம் விய ஹோதீதி ஆஹ – ‘‘முஸாவாதே³ன படிச்ச²ன்னம் ஞாண’’ந்தி. யதா² ஸுஜாய வினா ப்³ராஹ்மணானம் யாகோ³ ந இஜ்ஜ²தி, ஏவம் பஹூதஜிவ்ஹாய வினா ஸத்து² த⁴ம்மயாகோ³ ந இஜ்ஜ²தீதி ஜிவ்ஹா ஸுஜாபரியாயா வுத்தா. ஜோதி டி²யதி ஏத்தா²தி ஜோதிட்டா²னம் வேதி³, யம் அக்³கி³குண்ட³ம். ஸத்தானம் ஹத³யம் ஜோதிட்டா²னம் ஞாணக்³கி³னோ தத்த² ஸமுஜ்ஜலனதோ. அத்தாதி சித்தம் ‘‘ஆஹிதோ அஹம் மானோ ஏத்தா²’’தி கத்வா.

த⁴ம்மோ ரஹதோ³தி அஸ்ஸத்³தி⁴யாதி³ஆலஸியாபா⁴வதோ கிலேஸமலபக்கா²லனதோ பரமக்³கி³னிப்³பு³தாவஹனதோ அரியமக்³க³த⁴ம்மோ அனாவிலோ ரஹதோ³. ஹேட்டு²பரியவாலுகாதி விபரிவத்திதவாலுகா ஹுத்வா. ஆலுளாதி ஆகுலஜாதா. பண்டி³தானம் பஸத்தோ²தி பண்டி³தானம் புரதோ ஸேட்டோ². ஸேட்ட²பா⁴வேன ஸந்தோ பாஸம்ஸோ ஹுத்வா கிலேஸே பி⁴ந்த³தி ஸமுச்சி²ந்த³தீதி ஸப்³பீ⁴தி வுச்சதி. தேனாஹ ‘‘உத்தமட்டே²னா’’தி. ததா² சாஹ ப⁴க³வா ‘‘மக்³கா³னட்ட²ங்கி³கோ ஸேட்டோ²’’தி (த⁴. ப. 273).

வசீஸச்சந்தி இமினா ‘‘சதுரங்க³ஸமன்னாக³தா வாசா ஸுபரிஸுத்³தா⁴ ஹோதீ’’தி ஸம்மாவாசம் த³ஸ்ஸேதி. ஸச்சஸம்யமபதே³ஹி த³ஸ்ஸிதா மக்³க³த⁴ம்மா இத⁴ ‘‘த⁴ம்மோ’’தி அதி⁴ப்பேதாதி ஆஹ – ‘‘த⁴ம்மோதி இமினா…பே… த³ஸ்ஸேதீ’’தி. மக்³க³ஸச்சம் க³ஹிதம் அனந்தரகா³தா²ய அனேகேஹி விஸேஸேத்வா வுத்தத்தா. அத்த²தோதி புப்³ப³ங்க³மத்தாதி³அத்த²தோ. தாய ஹி ஸகிச்சம் கரோந்தியா இதரே ஸப்³பே³பி தத³னுவத்திகா ஹோந்தி. தக்³க³திகத்தாதி ஸம்மாதி³ட்டி²யா உபகாரகபா⁴வேன தாய ஸமானக³திகத்தா. ஆரம்மணஞ்ஹி விதக்கேனாஹடம் பஞ்ஞா விசினிதும் ஸக்கோதி. ததா² ஹி ஸோ பஞ்ஞாக்க²ந்தே⁴ன ஸங்க³ஹம் க³தோ. த⁴ம்மோதி ஸபா⁴வதோ ஸமாதி⁴ க³ஹிதோ, இதரே த்³வே தது³பகாரத்தா. ததா² ஹி ‘‘ஏவம்த⁴ம்மா தே ப⁴க³வந்தோ’’திஆதீ³ஸு (தீ³. நி. 2.13; ம. நி. 3.197; ஸம். நி. 5.378) ஸமாதி⁴ ‘‘த⁴ம்மோ’’தி வுத்தோ. பரமத்த²ஸச்சம் க³ஹிதம் ஸப்³பே³ஸம் ஸேட்ட²பா⁴வதோ. யதா²ஹ – ‘‘யாவதா, பி⁴க்க²வே, த⁴ம்மா ஸங்க²தா வா அஸங்க²தா வா, விராகோ³ தேஸம் அக்³க³மக்கா²யதீ’’தி (இதிவு. 90; அ. நி. 4.34). அத்த²தோதி ததோ ஏவ பரமத்த²தோ, அனந்தரம் வுச்சமானானம் வா மக்³க³த⁴ம்மானம் ஆரம்மணபா⁴வதோ. பஞ்சங்கா³னி க³ஹிதானி தாஸம் மக்³க³பா⁴வதோ. தீணி அங்கா³னி. ப்³ரஹ்மசரியம் நாமாதி ஏதம் நிப்³பா³னகா³மி உத்தமட்டே²ன மக்³க³ப்³ரஹ்மசரியம் நாம. மஜ்ஜே² ஸிதாதி லீனுத்³த⁴ச்சாதி³அந்தத்³வயவிவஜ்ஜனேன மஜ்ஜே² மஜ்ஜி²மபடிபதா³பா⁴வனம் நிஸ்ஸிதா. ஸஸ்ஸதுச்சே²த³க்³க³ஹணம் ஹேத்த² பதா⁴னதாய நித³ஸ்ஸனமத்தம். ஸேட்ட²ப்பத்தீதி ஸேட்ட²பா⁴வப்பத்தி. த-காரோ பத³ஸந்தி⁴கரோதி ‘‘ஸ உஜுபூ⁴தேஸூ’’தி வத்தப்³பே³ மஜ்ஜே² த-காரோ பத³ஸந்தி⁴கரோ, ‘‘ஸ து³ஜ்ஜுபூ⁴தேஸூதி கேசி பட²ந்தி, தேஸம் த³-காரோ பத³ஸந்தி⁴கரோ. ஸ-இதி ஸுந்த³ரிகோ ப்³ராஹ்மணோ வுத்தோதி கத்வா ஆஹ ‘‘ஸ த்வ’’ந்தி, ஸோ த்வந்தி அத்தோ². த⁴ம்மோ ஸாரியோ பரிதா⁴னபூ⁴தா அலங்காரா ஏதஸ்ஸாதி த⁴ம்மஸாரீ. அத² வா த⁴ம்மேஹி ஸாரிதவாதி த⁴ம்மஸாரீ, தேஹி ஸாரேத்வா டி²தவாதி அத்தோ². தேனாஹ ‘‘குஸலத⁴ம்மேஹீ’’திஆதி³.

ஸுந்த³ரிகஸுத்தவண்ணனா நிட்டி²தா.

10. ப³ஹுதீ⁴தரஸுத்தவண்ணனா

196. ஸமந்ததோதி த³க்கி²ணவாமானம் வஸேன ஸமந்ததோ. ஊருப³த்³தா⁴ஸனந்தி ஊரூனம் ப³ந்த⁴னவஸேன நிஸஜ்ஜனம். த்³வின்னம் ஊரூனம் அஞ்ஞமஞ்ஞப³ந்த⁴னவஸேன ஆபு⁴ஜிதாகாரம் ஸந்தா⁴யாஹ ‘‘ஆபு⁴ஜித்வாதி ப³ந்தி⁴த்வா’’தி. ஹேட்டி²மகாயஸ்ஸ அனுஜுகம் ட²பனம் நிஸஜ்ஜாவசனேனேவ போ³தி⁴தந்தி ‘‘உஜும் காய’’ந்தி ஏத்த² காய-ஸத்³தோ³ உபரிமகாயவிஸயோதி ஆஹ ‘‘உபரிமம் ஸரீரம் உஜுகம் ட²பேத்வா’’தி. தம் பன உஜுகட்ட²பனம் ஸரூபதோ பயோஜனதோ ச த³ஸ்ஸேதும் ‘‘அட்டா²ரஸா’’திஆதி³ வுத்தம். பரிமுக²ந்தி ஏத்த² பரி-ஸத்³தோ³ அபி⁴ஸத்³தே³ன ஸமானத்தோ²தி ஆஹ ‘‘கம்மட்டா²னாபி⁴முக²’’ந்தி, ப³ஹித்³தா⁴ புது²த்தாரம்மணதோ நிவாரேத்வா கம்மட்டா²னம்யேவ புரேக்க²தோதி அத்தோ². பரிக்³க³ஹட்டோ² ‘‘பரிணாயிகா’’திஆதீ³ஸு விய. முக²ந்தி நிய்யானட்டோ² ‘‘ஸுஞ்ஞதவிமோக்க²முக²’’ந்திஆதீ³ஸு விய. படிபக்க²தோ நிக்³க³மனட்டோ² ஹி நிய்யானட்டோ², தஸ்மா பரிக்³க³ஹிதனிய்யானந்தி ஸப்³ப³தா² க³ஹிதஸம்மோஸம் பரிச்சத்தஸம்மோஸம் ஸதிம் கத்வா பரமம் ஸதினேபக்கம் உபட்ட²பேத்வாதி அத்தோ². ச²ப்³ப³ண்ணா…பே… நிஸீதி³ ப்³ராஹ்மணஸ்ஸ பஸாத³ஸஞ்ஜானனத்த²ம். அடவிமுகா² சரமானாதி கோ³சரம் க³ண்ஹந்தா.

அஜ்ஜஸட்டி²ந்தி அஜ்ஜ ச²ன்னம் பூரணீ ஸட்டீ² தி³வஸவுத்தி, அஜ்ஜ ஆதி³ம் கத்வா ச² தி³வஸேதி அத்தோ². அச்சந்தஸம்யோகே³ சேதம் உபயோக³வசனம். அஜ்ஜ ச²தி³வஸமத்தகாதி அஜ்ஜதோ ச²ட்ட²தி³வஸமத்தகா. லாமகாதி நிஹீனா நிப்ப²லா. தேனாஹ ‘‘திலகா²ணுகா’’திஆதி³.

உஸ்ஸாஹேனாதி உத்³த⁴ம் உத்³த⁴ம் பஸாரேன அபி⁴ப⁴வனேன. தம் பன நேஸம் அபி⁴ப⁴வனம் த³ஸ்ஸேதும் ‘‘கண்ணனங்கு³ட்டா²தீ³னீ’’திஆதி³மாஹ.

‘‘உப்பாடகபாணகா’’தி தசம் உப்பாடேத்வா விய கா²த³கபாணகா ஊகாமங்கு³லாத³யோ.

களாரபிங்க³லாதி நிக்க²ந்தபிங்க³லக்கி²கா, களாரபிங்க³லாதி வா ரத்தக³த்தா ச பிங்க³லசக்கு²கா ச. திலகாஹதாதி ஆஹததிலகா, திலப்பமாணேஹி பி³ந்தூ³ஹி ஸமந்ததோ ஸந்த²தஸரீரா.

படிகா³தா²ஹி ப்³ராஹ்மணஸ்ஸ த⁴ம்மதே³ஸனம் வட்³டே⁴ஸீதி பகதியா தஸ்ஸ அத்தனா கதே²தப்³ப³ம் த⁴ம்மதே³ஸனம் பப்³ப³ஜ்ஜாகு³ணகித்தனவஸேன ஸத்தஹி வட்³டே⁴ஸி. பப்³ப³ஜித்வாதி இணாயிகானம் அத்தனோ பலிபோ³த⁴ம் ததா² ததா² ஜானாபேத்வா பப்³ப³ஜித்வா.

யதா² ச தத்த² ப⁴க³வா படிபஜ்ஜி, தம் த³ஸ்ஸேதும் ‘‘புன தி³வஸே’’திஆதி³ வுத்தம்.

தம் தம் குலக⁴ரம் பேஸேத்வாதி தம் தம் தஸ்ஸ ப்³ராஹ்மணஸ்ஸ தீ⁴தரம் தஸ்ஸ தஸ்ஸானுச்ச²விகஸ்ஸ ப்³ராஹ்மணஸ்ஸ தே³ந்தோ தம் தம் குலக⁴ரம் பேஸேத்வா ப்³ராஹ்மணத⁴ம்மே க³ருகரணாபா⁴வதோ.

‘‘நட்டே² மதே பப்³ப³ஜிதே, நபும்ஸகேபி ப⁴த்தரி;

இத்தி²யா பதிஸேட்டா²ய, ந அஞ்ஞோ பதி இச்சி²யோ’’தி. –

அயஞ்ஹி ப்³ராஹ்மணத⁴ம்மோ. அய்யிகட்டா²னேதி மாதாமஹிட்டா²னே ட²பேஸி ஸத்து² சித்தாராத⁴னவஸேனாதி.

ப³ஹுதீ⁴தரஸுத்தவண்ணனா நிட்டி²தா.

பட²மவக்³க³வண்ணனா நிட்டி²தா.

2. உபாஸகவக்³கோ³

1. கஸிபா⁴ரத்³வாஜஸுத்தவண்ணனா

197. த³க்கி²ணாகி³ரிஸ்மிந்தி த³க்கி²ணாகி³ரிஜனபதே³, தஸ்மிம் த³க்கி²ணாகி³ரிஜனபதே³ த³க்கி²ணாகி³ரிவிஹாரே. க²ந்தே⁴ஸு ட²பேத்வா யுகே³ யோத்தேஹீதி யோத்தரஜ்ஜூஹி யுத்தானி பயோஜிதானி இச்சேவ அத்தோ².

பட²மதி³வஸேதி வபனதி³வஸேஸு பட²மதி³வஸே ஆரத்³த⁴தி³வஸே. பஞ்சங்கா³னிபி பரிபுண்ணானி, பகே³வ இதரங்கா³னீதி த³ஸ்ஸேதும் ‘‘பரிபுண்ணபஞ்சங்கா³’’இச்சேவ வுத்தம். ஹரிதாலமனோஸிலாஅஞ்ஜனேஹி உரத்த²னாதீ³ஸு ட²பிதத்தா ஆபா⁴ய உஜ்ஜலக³த்தா. அவஸேஸா ப³லீப³த்³தா³. கிலந்தகோ³ணம் மோசேத்வா அகிலந்தஸ்ஸ யோஜனம் கிலந்தபரிவத்தனம்.

ஸீஹகுண்ட³லானீதி ஸீஹமுக²குண்ட³லானி. ப்³ரஹ்மவேட²னந்தி ப்³ரஹ்முனோ வேட²னஸதி³ஸம், அஸ்ஸனக²வேட²னஸதி³ஸந்தி அத்தோ².

பு³த்³தா⁴னம் கிச்சானி காலவஸேன விப⁴த்தானி பஞ்ச கிச்சானி ப⁴வந்தி. புரேப⁴த்தகிச்சந்தி ப⁴த்ததோ புப்³பே³ பு³த்³தே⁴ன காதப்³ப³கிச்சம். வீதினாமேத்வாதி ப²லஸமாபத்தியா காலம் வீதினாமேத்வா. கதா³சி ஏகோதிஆதி³ தேஸம் தேஸம் வினேய்யானம் வினயனானுரூபபடிபத்தித³ஸ்ஸனம். பகதியாதி பகதிபு³த்³த⁴வேஸேன. பு³த்³தா⁴னம் ஹி ரூபகாயஸ்ஸ அஸீதிஅனுப்³யஞ்ஜனபடிமண்டி³த-பா³த்திம்ஸமஹாபுரிஸ- லக்க²ண-காயப்பபா⁴-ப்³யாமப்பபா⁴-கேதுமாலாவிசித்ததா பு³த்³த⁴வேஸோ. கதா³சி அனேகேஹி பாடிஹாரியேஹி வத்தமானேஹீதி இமினா பாரமீனம் நிஸ்ஸந்த³பூ⁴தானி பாடிஹாரியானி ருசிவஸேனேவ பகாஸனகானி ப⁴வந்தி, ந ஸப்³ப³தா³தி த³ஸ்ஸேதி. ஏவஞ்ச கத்வா ‘‘இந்த³கீ²லஸ்ஸ அந்தோ ட²பிதமத்தே த³க்கி²ணபாதே³’’திஆதி³வசனம் ஸமத்தி²தம் ஹோதி. ப⁴க³வதோ காயே பீதரஸ்மீனம் யேபு⁴ய்யதாய ‘‘ஸுவண்ணரஸஸிஞ்சனானி வியா’’தி வத்வா காயம்ஹி நீலாதி³ரஸ்மீஹி தஹம் தஹம் பீதமிஸ்ஸிதம் ஸந்தா⁴ய ‘‘விசித்ரபடபரிக்கி²த்தானி விய சா’’தி வுத்தம். மது⁴ரேனாகாரேன ஸத்³த³ம் கரோந்தி துட்ட²ரவரவனதோ.

தத்தா²தி விஹாரே. க³ந்த⁴மண்ட³லமாளேதி ஹத்தே²ன கதபரிப⁴ண்டே³ ஸமோஸரிதக³ந்த⁴புப்ப²தா³மே மண்ட³லமாளே.

உபட்டா²னேதி பமுகே². ‘‘ஓவத³தீ’’தி வத்வா தத்தோ²வாத³ம் ஸாமஞ்ஞதோ த³ஸ்ஸேதும், ‘‘பி⁴க்க²வே’’திஆதி³ வுத்தம். ஸம்பத்தீதி சக்கா²தி³இந்த்³ரியபாரிபூரி சேவ ஹத்தா²தி³ஸம்பதா³ ச. ஸமஸ்ஸாஸிதகாயோ கிலமத²வினோத³னேன. ‘‘தஞ்ச கோ² ஸமாபஜ்ஜனேனா’’தி வத³ந்தி. து³தியபா⁴கே³தி இமினா அபரபா⁴க³ம் தயோ பா⁴கே³ கத்வா தத்த² புரிமபா⁴க³ம் ஸேய்யனிஸஜ்ஜாவஸேன ஸமாபத்தீஹி வீதினாமேதீதி த³ஸ்ஸேதி. லோகந்தி ராஜக³ஹாதீ³ஸு யம் ததா³ உபனிஸ்ஸாய விஹரதி, தத்த² அஞ்ஞத்த² வா பு³ஜ்ஜ²னகம் வினேய்யஸத்தலோகம் பு³த்³த⁴சக்கு²னா வோலோகேதி. காலயுத்தந்தி தேஸம் இந்த்³ரியபரிபாககாலானுரூபம். ஸமயயுத்தந்தி தஸ்ஸேவ வேவசனம். ஸமயயுத்தந்தி வா தேஹி ஆஜானிதப்³ப³விஸேஸபடிலாபா⁴னுரூபம்.

படிஸல்லீனோதி காலபரிச்சே²த³ம் கத்வா ஸமாபத்திம் ஸமாபன்னோ. அதி⁴ப்பாயம் ஸம்பாதே³ந்தோ தம் அவிராதே⁴ந்தோ, அஜ்ஜா²ஸயானுரூபந்தி அத்தோ².

ஸகல…பே… தே³வதாயோதி ஏத்த² லோகதா⁴துஸாகல்யம் த³ட்ட²ப்³ப³ம், ந தே³வதாஸாகல்யம். ந ஹி மஹாஸமயே விய ஸப்³ப³தா³ மஜ்ஜி²மயாமே த³ஸஸஹஸ்ஸசக்கவாளே ஸப்³ப³த்த² ஸப்³பா³ தே³வதா ஸத்து² ஸமீபம் உபக³ச்ச²ந்தி. கிலாஸுபா⁴வோ கிலமதோ².

விஹாரசீவரபரிவத்தனவஸேனாதி விஹாரே நிவத்த²னிவாஸனபரிவத்தனவஸேன. ஆதி³யித்வாதி பாருபனவஸேன க³ஹேத்வா. தேனாஹ ‘‘தா⁴ரேத்வா’’தி. பி⁴க்கா²சாரந்தி பி⁴க்க²த்த²ம் சரிதப்³ப³ட்டா²னம்.

அதிரோசமானந்தி தம் தம் அதிக்கமித்வா ஸமந்ததோ ஸப்³ப³தி³ஸாஸு விரோசமானம். ஸரீரப்பப⁴ந்தி அத்தனோ ஸரீரப்பப⁴ம். ஜங்க³மம் விய பது³மஸரந்தி ரதனமயகிஞ்ஜக்க²ம் ரஜதமயகண்ணிகம் ஸமந்ததோ ஸம்பு²ல்லிதகஞ்சனபது³மம் ஸஞ்சாரிமஸரம் விய. க³க³னதலந்தி அப்³ப⁴மஹிகாதி³உபக்கிலேஸவிக³மேன ஸுவிஸுத்³த⁴ஆகாஸதலம் விய. தம்பி ஹி தாராக³ணகிரணஜாலஸமுஜ்ஜலதாய ஸமந்ததோ விரோசதி. கனகஸிக²ரந்தி கனககி³ரிஸிக²ரம். ஸிரியா ஜலமானந்தி ஸப்³ப³ஸோ அனவஜ்ஜாய ஸப்³பா³காரேன பரிபுண்ணகாயதாய அனஞ்ஞஸாதா⁴ரணாய ரூபகாயஸிரியா ஸமுஜ்ஜலம், யஸ்ஸா ருசிரபா⁴வோ வித்³தே⁴ விக³தவலாஹகே புண்ணமாஸியம் பரிபுண்ணகலமனோமமண்ட³லம் சந்த³மண்ட³லம் அதிரோசதி, பப⁴ஸ்ஸரபா⁴வோ ஸஹஸ்ஸரம்ஸிகிரணதேஜோஜாலஸமுஜ்ஜலம் ஸூரியமண்ட³லம் அபி⁴ப⁴வதி, ஹேமஸமுஜ்ஜலபா⁴வோ தது³ப⁴யே அபி⁴பு⁴ய்ய பவத்தமானம் ஏகக்க²ணே த³ஸஸஹஸ்ஸிலோகதா⁴துவிஜ்ஜோதனஸமத்த²-மஹாப்³ரஹ்முனோ பபா⁴ஸமுத³யம் அபி⁴விஹச்ச பா⁴ஸதி தபதி விரோசதி.

ஸமந்தபாஸாதி³கேதி ஸமந்ததோ பஸாதா³வஹே. தஞ்ச கோ² ஸப்³ப³ஸோ ஸரிதப்³ப³தாயாதி ஆஹ ‘‘பஸாத³னீயே’’தி. உத்தமத³மத²ஸமத²மனுப்பத்தேதி காயவாசாஹி அனுத்தரம் த³ந்தபா⁴வஞ்சேவ அனுத்தரம் சித்தவூபஸமஞ்ச ஸம்பத்தே. அப்பஸாதே³னாதி பஸாதா³பா⁴வேன, பஸாத³படிக்கே²பேன வா அஸ்ஸத்³தி⁴யேன. உப⁴யதா²பி நோதி அப்பஸாதோ³ மச்ச²ரியந்தி உப⁴யதா²பி நோ ஏவ, அத² கோ² அனத்தமனதாய உபாரம்பா⁴தி⁴ப்பாயேன அபஸாதே³ந்தோ, ப⁴க³வதோ முக²தோ கிஞ்சி தே³ஸேதுகாமோ வா ஏவமாஹ. தத்த² காரணம் த³ஸ்ஸேந்தோ ‘‘ப⁴க³வதோ பனா’’திஆதி³மாஹ. அதித்தந்தி தித்திம் அக³ச்ச²ந்தம். கம்மப⁴ங்க³ந்தி கம்மஹானிம்.

திக்க²பஞ்ஞோ ஏஸ ப்³ராஹ்மணோ, ததா² ஹி ந சிரஸ்ஸேவ அரஹத்தம் ஸச்சி²கரிஸ்ஸதி. கதா²பவத்தனத்த²ம்பி ஏவமாஹ – ‘‘ஏவம் அஹம் இமஸ்ஸ கஞ்சி த⁴ம்மம் ஸோதும் லபி⁴ஸ்ஸாமீ’’தி. வேனேய்யவஸேனாதி அத்தனோ கஸனகாரிபா⁴வகித்தனமுகே²ன வினேதப்³ப³புக்³க³லவஸேன.

ஓளாரிகானீதி பாகதிகானி. ‘‘ஏஸ உத்தமத³க்கி²ணேய்யோ’’தி ஸஞ்ஜாதப³ஹுமானோ. பாளியம் ‘‘யுக³ம் வா நங்க³லம் வா’’தி வா-ஸத்³தோ³ அவுத்தவிகப்பத்தோ². தேன பீ³ஜாதி³ம் ஸங்க³ண்ஹாதி, தஸ்மா பீ³ஜம் வா ஈஸம் வா பரிக்³க³ஹயோத்தானி வாதி அயமத்தோ² த³ஸ்ஸிதோ ஹோதி. ததா² ஹி ப⁴க³வா ப்³ராஹ்மணஸ்ஸ படிவசனம் தே³ந்தோ ‘‘ஸத்³தா⁴ பீ³ஜ’’ந்திஆதி³மாஹ. புப்³ப³த⁴ம்மஸபா⁴க³தாயாதி பட²மம் க³ஹிதத⁴ம்மஸபா⁴க³தாய. யம் பனேத்த² வத்தப்³ப³ம், தம் அட்ட²கதா²ருள்ஹமேவ க³ஹேதப்³ப³ஞ்ச ஸத்³த³தோ அத்தா²பத்திதோ வா இத⁴ த³ட்ட²ப்³ப³ம். பு³த்³தா⁴னம் ஆனுபா⁴வோ அயம், யதி³த³ம் பஸங்கா³க³தத⁴ம்மமுகே²ன தே³ஸனம் ஆரபி⁴த்வா வேனேய்யவினயனம்.

அனனுஸந்தி⁴காதி புச்சா²னுஸந்தி⁴வஸேன அனனுஸந்தி⁴கா. ஏவந்தி இதா³னி வுச்சமானாகாரேன. ஏத்தா²தி ஏதிஸ்ஸா தே³ஸனாய. ஸோதி ப⁴க³வா. தஸ்ஸாதி ப்³ராஹ்மணஸ்ஸ. அனுகம்பாயாதி அஸப்³ப³ஞ்ஞூ ஹி ஸதிபி அனுகம்பாய புச்சி²தமத்தே திட்டே²ய்ய, ததா² ஜானந்தோபி அனனுகம்பகோ, ப⁴க³வா பன உப⁴யத⁴ம்மபாரிபூரியா ‘‘இத³ம் அபுச்சி²த’’ந்தி அபரிஹாபேத்வா கதே²தி. ஸமூலந்திஆதி³னா ஸங்கே²பேன வுத்தமத்த²ம் விவரந்தோ ‘‘தத்தா²’’திஆதி³மாஹ. தத்த² பீ³ஜஸ்ஸ கஸியா மூலபா⁴வோ நானந்தரியதோ தப்பமாணவிதா⁴னதோ சாதி ஆஹ ‘‘தஸ்மிம்…பே… கத்தப்³ப³தோ’’தி. தேன அன்வயதோ ப்³யதிரேகதோ ச பீ³ஜஸ்ஸ கஸியா மூலபா⁴வம் விபா⁴வேதி. குஸலாதி இமினா அகுஸலா ததோ அஞ்ஞதா²பி கரோந்தி, தம் பன அப்பமாணந்தி த³ஸ்ஸேதி.

தஸ்ஸாதி ப்³ராஹ்மணஸ்ஸ பீ³ஜட்டா²னியஸ்ஸ த⁴ம்மஸ்ஸ ச உபகாரபா⁴வதோ. த⁴ம்மஸம்ப³ந்த⁴ஸமத்த²பா⁴வதோதி ததா² வுத்தத⁴ம்மஸ்ஸ ப²லேன ஸம்ப³ந்தி⁴தும் யோஜேதும் ஸமத்த²பா⁴வதோ. தபோ வுட்டீ²தி வுத்தவசனம் ஸந்தா⁴ய வுத்தம். ஸங்கே²பதோ வுத்தமத்த²ம் பாகடம் காதும் ‘‘அயம் ஹீ’’திஆதி³ வுத்தம். கஸ்ஸகஸ்ஸ உபகாரஸ்ஸ பீ³ஜஸ்ஸ அனந்தரம் வுட்டி² வுச்சமானா அட்டா²னே வுத்தா நாம ந ஹோதி. கஸ்மா? பீ³ஜஸ்ஸ வப்பகாலே அனுரூபாய வுட்டி²யா இச்சி²தப்³ப³தோ, தஸ்மா அவஸானே மஜ்ஜே² வா வுச்சமானாய த⁴ம்மஸம்ப³ந்த⁴ஸமத்த²தா தஸ்ஸா விபா⁴விதா ந ஸியா. அத்தனோ அவிஸயேதி ஜா²னாதி³உத்தரிமனுஸ்ஸத⁴ம்மே. பச்சா²பீதி கஸிஸம்பா⁴ரகத²னதோ பச்சா²பி. வத்தப்³போ³தி ஏகந்தேன வத்தப்³போ³. தத³னந்தரம்யேவாதி பீ³ஜானந்தரம்யேவ. வுச்சமானா வுட்டி² ஸமத்தா² ஹோதி, பீ³ஜஸ்ஸ ப²லேன ஸம்ப³ந்த⁴னே ஸமத்தா²தி தீ³பிதா ஹோதி அனந்தரவசனேனேவ தஸ்ஸா ஆஸன்னஉபகாரத்ததீ³பனதோ.

ஸம்பஸாத³லக்க²ணாதி பஸீதி³தப்³பே³ வத்து²ஸ்மிம் ஸம்மதே³வ பஸீத³னலக்க²ணா. ஓகப்பனலக்க²ணாதி ஸத்³தே⁴ய்யவத்து²னோ ஏவமேதந்தி பக்க²ந்த³னலக்க²ணா. மூலபீ³ஜந்திஆதீ³ஸு மூலமேவ பீ³ஜம் மூலபீ³ஜம். ஏஸ நயோ ஸேஸேஸுபி பீ³ஜகா³மஸ்ஸ அதி⁴ப்பேதத்தா. பூ⁴தகா³மோ பன மூலம் பீ³ஜம் ஏதஸ்ஸாதி மூலபீ³ஜந்திஆதி³னா வேதி³தப்³போ³. பீ³ஜபீ³ஜந்தி பஞ்சமம் பன பச்சயந்தரஸமவாயே ஸதி³ஸப²லுப்பத்தியா விஸேஸகாரணபா⁴வதோ விரூஹனஸமத்தே² ஸாரப²லே நிருள்ஹோ பீ³ஜஸத்³தோ³ தத³த்த²ஸித்³தி⁴யா மூலாதீ³ஸுபி கேஸுசி பவத்ததீதி ததோ நிவத்தனத்த²ம் ஏகேன பீ³ஜ-ஸத்³தே³ன விஸேஸேத்வா வுத்தம் ‘‘பீ³ஜபீ³ஜ’’ந்தி ‘‘து³க்க²து³க்க²ம் ரூபரூப’’ந்தி ச யதா². ஏவம்பி இமினா அத்தே²ன இமஸ்ஸபி நிப்பரியாயோவ பீ³ஜபா⁴வோதி த³ஸ்ஸேந்தோ ஆஹ ‘‘தம் ஸப்³ப³ம்பி…பே… க³ச்ச²தீ’’தி.

இதா³னி கத²ஞ்சி வத்தப்³பே³ ஸத்³தா⁴ய ஓபம்மத்தே பீ³ஜே ஸத்³தா⁴ய பீ³ஜபா⁴வம் விபா⁴வேதும் ‘‘தத்த² யதா²’’திஆதி³ ஆரத்³த⁴ம். காமம் ஸத்³தூ⁴பனிஸம் ஸீலம், ததா²பி ஸமாதி⁴ஸ்ஸ விய ஸப்³பே³ஸம்பி அனவஜ்ஜத⁴ம்மானம் ஆதி³மூலபா⁴வதோ ஸத்³தா⁴யபி பதிட்டா² ஹோதீதி ஆஹ ‘‘ஹேட்டா² ஸீலமூலேன பதிட்டா²தீ’’தி. யஸ்மா ஸப்³ப³ஸ்ஸேவ புக்³க³லஸ்ஸ ஸத்³தா⁴வஸேன ஸமத²விபஸ்ஸனாரம்போ⁴, தஸ்மா ஸா ‘‘உபரி ஸமத²விபஸ்ஸனங்குரம் உட்டா²பேதீ’’தி வுத்தா. தந்தி த⁴ஞ்ஞபீ³ஜம். பத²விரஸம் ஆபோரஸந்தி ஸஸம்பா⁴ரபத²வீஆபேஸு லப்³ப⁴மானம் ரஸம். க³ஹேத்வாதி பச்சயபரம்பராய க³ஹேத்வா. த⁴ஞ்ஞபரிபாகக³ஹணத்த²ந்தி த⁴ஞ்ஞபரிபாகனிப்³ப³த்திஅத்த²ம். ரஸந்தி ஸத்³தா⁴ஸீலமூலஹேதுஸமத²விபஸ்ஸனாபா⁴வனாரஸம் ஆதி³யித்வா. அரியமக்³க³னாளேனாதி அரியமக்³க³ஸோதேன அரியப²லத⁴ஞ்ஞபரிபாகக³ஹணத்த²ந்தி அரியப²லமேவ த⁴னாயிதப்³ப³தோ த⁴ஞ்ஞம் தஸ்ஸ நிப்³ப³த்திஅத்த²ம். த⁴ஞ்ஞனாளம் நாம கண்ட³ஸ்ஸ நிஸ்ஸயபூ⁴தோ பச்சி²மதே³ஸோ, கண்டோ³ தப்³ப⁴ந்தரோ தம்னிஸ்ஸயோயேவ த³ண்டோ³. பஸவோ நாம புப்ப²ம். வுத்³தி⁴ந்தி அவயவபாரிபூரிவஸேன வுத்³தி⁴ம். விரூள்ஹிந்தி மூலஸந்தானத³ள்ஹதாய விருள்ஹதம். வேபுல்லந்தி பத்தனாளாதீ³ஹி விபுலபா⁴வம். கீ²ரம் ஜனேத்வாதி தருணஸலாடுகபா⁴வப்பத்தியா தண்டு³லஸ்ஸ பீ³ஜஸ்ஸ பீ³ஜபூ⁴தம் கீ²ரம் உப்பாதே³த்வா. ஏஸாதி ஸத்³தா⁴. பதிட்ட²ஹித்வாதி கம்மபதா²கம்மபத²ஸம்மாதி³ட்டி²ஸஹிதேன ஆதி³தோ பவத்தஸீலமத்தேன பதிட்ட²ஹித்வா. வுத்³தி⁴ந்திஆதீ³ஸு ஸுபரிஸுத்³தா⁴ஹி ஸீலசித்தவிஸுத்³தீ⁴ஹி வுத்³தி⁴ம், தி³ட்டி²கங்கா²விதரணவிஸுத்³தீ⁴ஹி விரூள்ஹிம். மக்³கா³மக்³க³படிபதா³ஞாணத³ஸ்ஸனவிஸுத்³தீ⁴ஹி வேபுல்லம் பத்வா. ஞாணத³ஸ்ஸனவிஸுத்³தி⁴கீ²ரந்தி ஸாது³ரஸஸுவிஸுத்³தி⁴பா⁴வதோ ஞாணத³ஸ்ஸனவிஸுத்³தி⁴ஸங்கா²தம் கீ²ரம் ஜனேத்வா. அனேக…பே… ப²லந்தி அனேகபடிஸம்பி⁴தா³-அனேகாபி⁴ஞ்ஞாணபரிபுண்ணம் அரஹத்தப²லஸீஸம் நிப்பா²தே³தி.

பீ³ஜகிச்சகரணதோதி பீ³ஜகிச்சஸ்ஸ கரணதோ. யஞ்ஹி தம்ஸதி³ஸஸ்ஸ விஸதி³ஸஸ்ஸ ச அத்தனோ ப²லஸ்ஸ பதிட்டா²பனஸம்ப³ந்த⁴னனிப்பா²த³னஸங்கா²தம் பீ³ஜஸ்ஸ கிச்சம், தஸ்ஸ கரணதோ நிப்³ப³த்தனதோ ‘‘ஏவம் ஸத்³தா⁴ பீ³ஜகிச்ச’’ந்தி வுத்தம். இமினா அனஞ்ஞஸாதா⁴ரணம் ஸத்³தா⁴ய குஸலத⁴ம்மானம் பீ³ஜபா⁴வம் த³ஸ்ஸேதி. ஸா சாதிஆதி³னா தமேவத்த²ம் ஸமத்தே²தி. இதா³னி தத்த² ஆக³மம் த³ஸ்ஸேந்தோ ‘‘ஸத்³தா⁴ஜாதோ’’திஆதி³மாஹ. தேன யதா² ஸப்புரிஸூபனிஸ்ஸயஸ்ஸ ஸத்³த⁴ம்மஸ்ஸவனஸ்ஸ ச, ஏவம் அனவஸேஸாய ஸம்மாபடிபத்தியா ஸத்³தா⁴ மூலகாரணந்தி த³ஸ்ஸேதி.

இந்த்³ரியஸம்வரோ வீரியஞ்ச அகுஸலத⁴ம்மே, து³க்கரகாரிகா து⁴தங்க³ஞ்ச அகுஸலத⁴ம்மே சேவ காயஞ்ச தபதி விபா³த⁴தீதி தபோதி வுச்சதி. இந்த்³ரியஸம்வரோ அதி⁴ப்பேதோ வீரியஸ்ஸ தோ⁴ரய்ஹபா⁴வேன க³ய்ஹமானத்தா, இதரேஸம் வுட்டி²பா⁴வஸ்ஸ அனுயுஞ்ஜமானத்தா. ஆதி³-ஸத்³தே³ன கலலங்கா³ரவுட்டி²ஆதீ³னம் ஸங்க³ஹோ. ஸமனுக்³க³ஹிதந்தி உபக³தம். விருஹனாமிலாயனனிப்ப²த்திவசனேஹி த⁴ஞ்ஞபீ³ஜஸந்தானஸ்ஸ விய தேஸம் வுத்³தி⁴யா ஸத்³தா⁴பீ³ஜஸந்தானஸ்ஸ தபோவுட்டி²யா ஆதி³மஜ்ஜ²பரியோஸானேஸு உபகாரதம் த³ஸ்ஸேதி.

புரிமபதே³ஸுபீதி அபி-ஸத்³தே³ன பரபதே³ஸுபீதி அத்தோ² த³ட்ட²ப்³போ³ ‘‘ஹிரீ மே ஈஸா, மனோ மே யோத்த’’ந்தி இச்சி²தத்தா, ‘‘ஸதி மே’’தி ஏத்த² மே-ஸத்³தோ³ ஆனேத்வா யோஜேதப்³போ³. உத³கம்பி தாவ தா³தப்³ப³ம் ஹோதி நதீ³தளாகாதி³தோ ஆனேத்வா. வீரியப³லீப³த்³தே³ சதுப்³பி³தே⁴ யோஜேத்வா. நிச்சகாலம் அத்தீ²தி வசனஸேஸோ.

ஸஹ விபஸ்ஸனாய மக்³க³பஞ்ஞா அதி⁴ப்பேதா அமதப்ப²லாய கஸியா அதி⁴ப்பேதத்தா. விபஸ்ஸனா பஞ்ஞா சாதி து³விதா⁴பி பஞ்ஞா உபனிஸ்ஸயா ஹோதி விஸிட்ட²பா⁴வதோ. தேனாஹ ‘‘யதா² ஹீ’’திஆதி³. பஞ்ஞாதி பகாரேஹி ஜானாதீதி பஞ்ஞா. பஞ்ஞவதம் பஞ்ஞா புரதோ ஹோதி யோனிஸோமனஸிகாரஸ்ஸ விஸேஸபச்சயபா⁴வதோ, ஸஹஜாதாதி⁴பதீஸு ச உக்கட்ட²பா⁴வதோ. ஸிரீதி ஸோப⁴க்³க³ம். ஸதம் த⁴ம்மா ஸத்³தா⁴த³யோ, அன்வாயிகாதி அனுகா³மினோ. ஈஸாப³த்³தா⁴ ஹோதீதி ஹிரிஸங்கா²தஈஸாய ப³த்³தா⁴ ஹோதி, பஞ்ஞாய கதா³சி அப்பயோக³தோ மனோஸீஸேன ஸமாதி⁴ இத⁴ வுத்தோதி ஆஹ ‘‘மனோஸங்கா²தஸ்ஸ ஸமாதி⁴யோத்தஸ்ஸா’’தி. ஸமம் உபனேத்வா ப³ந்தி⁴த்வா ப³த்³த⁴ரஜ்ஜுகத்தா ஸமாதி⁴யோத்தம். ஏகதோ க³மனந்தி லீனச்சாரத்³த⁴ஸங்கா²தம் ஏகபஸ்ஸதோ க³மனம் வாரேதி. மஜ்ஜி²மாய விபஸ்ஸனாவீதி²யா படிபாத³னதோ காயாதீ³ஸு ஸுப⁴ஸுக²னிச்சத்தபா⁴வவிக³மனே பஞ்ஞாய விஸேஸபச்சயா ஸதீதி வுத்தம் – ‘‘ஸதியுத்தா பஞ்ஞா’’தி தஸ்ஸா ஸதிவிப்பயோகா³ஸப்³பா⁴வதோ. ஸந்ததிக⁴னாதீ³னம் அயம் விஸேஸோ – புரிமபச்சி²மானம் த⁴ம்மானம் நிரந்தரதாய ஏகீபூ⁴தானம் விய பவத்தி ஸந்ததிக⁴னதா, ஏகஸமூஹவஸேன ஏகீபூ⁴தானமிவ பவத்தி ஸமூஹக⁴னதா, து³ப்³பி³ஞ்ஞேய்யகிச்சபே⁴த³வஸேன ஏகீபூ⁴தானமிவ பவத்தி. கிச்சக⁴னதா, ஏகாரம்மணவஸேன ஏகீபூ⁴தானமிவ பவத்தி ஆரம்மணக⁴னதா. ஸப்³பே³ஸம், ஸப்³பா³னி வா கிலேஸானம் மூலஸந்தானகானி ஸப்³ப³…பே… ஸந்தானகானி. அனுப்பயோகோ³ ஹி அத்தோ². பதா³லேதீதி பி⁴ந்த³தி ஸமுச்சி²ந்த³தி. ஸா ச கோ² ‘‘பதா³லேதீ’’தி வுத்தா லோகுத்தராவ பஞ்ஞா அனுஸயப்பஹானஸ்ஸ அதி⁴ப்பேதத்தா. ஸந்ததிக⁴னாதி³பே⁴த³னா பன லோகியாபி ஹோதி விபஸ்ஸனாவஸேன க⁴னவினிப்³போ⁴க³ஸ்ஸ நிப்பா²த³னதோ. தேனாஹ ‘‘இதரா பன லோகிகாபி ஸியா’’தி.

ஹிரீயதீதி லஜ்ஜதி, ஜிகு³ச்ச²தீதி அத்தோ². தஸ்மா ‘‘பாபகேஹி த⁴ம்மேஹீ’’தி நிஸ்ஸக்கவசனம் த³ட்ட²ப்³ப³ம், ஹேதும்ஹி வா கரணவசனம். ஓத்தப்பம்பி க³ஹிதமேவ, ந ஹி லஜ்ஜனம் நிப்³ப⁴யம் பாபப⁴யம் வா அலஜ்ஜனம் அத்தீ²தி. ருக்க²லட்டீ²தி ருக்க²த³ண்டோ³. தேன பதே³ஸேன கஸனதோ விஸேஸதோ நங்க³லந்தி வுச்சதீதி ஆஹ ‘‘ஈஸா யுக³னங்க³லம் தா⁴ரேதீ’’தி. காமம் பஞ்ஞாரஹிதா ஹிரீ அத்தி², ஹிரிரஹிதா பன பஞ்ஞா நத்தே²வாதி ஆஹ ‘‘ஹிரி…பே… அபா⁴வதோ’’தி. ஸந்தி⁴ட்டா²னே கம்பனாபா⁴வதோ அசலம். தி²ரபா⁴வேன அஸிதி²லம். ஹிரிபடிப³த்³த⁴பஞ்ஞா படிபக்க²வஸேன ச அஸிதி²லபா⁴வேன ச அசலா அஸிதி²லாதி ஆஹ ‘‘அப்³போ³கிண்ணா அஹிரிகேனா’’தி. நாளியா மினமானபுரிஸோ விய ஆரம்மணம் முனாதி பரிச்சே²த³தோ ஜானாதீதி மனோ. மனோஸீஸேனாதி மனஸோ அபதே³ஸேன. தம்ஸம்பயுத்தோதி இமினா குந்தஸஹசரணதோ புரிஸோ குந்தோ விய மனஸஹசரணஸமாதி⁴ ‘‘மனோ’’தி வுத்தோதி த³ஸ்ஸேதி. ஸாரதி²னாதி கஸ்ஸகேன. ஸோ ஹி இத⁴ ப³லீப³த்³தா³னம் ஸாரணதோ பாசனதோ ‘‘ஸாரதீ²’’தி அதி⁴ப்பேதோ. ஏகாப³ந்த⁴னந்தி ஏகாப³த்³த⁴கரணம். ஸககிச்சேதி ஸககிச்சேன யுத்தே. தேன ஹி ஈஸாதீ³ஸு யதா²ரஹம் ப³ந்தி⁴த்வா ஏகாப³த்³தே⁴ஸு கதேஸு நங்க³லேஸு கிச்சம் இஜ்ஜ²தி, நோ அஞ்ஞதா²தி தம் ‘‘ஸககிச்சே படிபாதே³தீ’’தி வுத்தம். அவிக்கே²பஸபா⁴வேனாதி அத்தனோ அவிக்கே²பஸபா⁴வேன. ப³ந்தி⁴த்வாதி ஸஹஜாதாதி³பச்சயபா⁴வேன அத்தனா ஸம்ப³ந்தி⁴த்வா. ஸககிச்சேதி ஹிரீஆதீ³ஹி யதா²ஸகம் கத்தப்³பே³ கிச்சே.

சிரகதாதி³மத்த²ந்தி சிரபா⁴ஸிதம்பி அத்த²ம். ஸரதி அனுஸ்ஸரதி காயாதி³ம் அஸுபா⁴தி³தோ நிஜ்ஜா²யதி. பா²லேதீதி பதா³லேதி. பாஜேந்தி க³மேந்தீதி தம் பாஜனம். இத⁴ இமஸ்மிம் ஸுத்தே ‘‘பாசன’’ந்தி வுத்தம் ஜ-காரஸ்ஸ ச-காரம் கத்வா. பா²லபாசனந்தி இமமத்த²ம் த³ஸ்ஸேதும் ‘‘யதா² ஹி ப்³ராஹ்மண…பே… ஸதீ’’தி வுத்தம். இதா³னி தமத்த²ம் வித்தா²ரதோ த³ஸ்ஸேந்தோ ‘‘தத்த² யதா²’’திஆதி³மாஹ. நங்க³லம் அனுரக்க²தி பி⁴ஜ்ஜனபா²லனதோ. புரதோ சஸ்ஸ க³ச்ச²தீதி அஸ்ஸ நங்க³லஸ்ஸ கஸ்ஸனே பூ⁴மியா விலிக²னே புரதோ க³ச்ச²தி புப்³ப³ங்க³மா ஹோதி. க³தியோதி பவத்தியோ. ஸமன்வேஸமானாதி ஸரணவஸேன க³வேஸமானா. ஆரம்மணே வா காயாதி³கே உபட்டா²பயமானா அஸுபா⁴தி³வஸேன பஞ்ஞானங்க³லம் ரக்க²தி. ஸபா⁴வாஸபா⁴வூபக³மே பா²லோ விய நங்க³லஸ்ஸ ‘‘ஆரக்கா²’’தி வுத்தா ‘‘ஸப்³பா³னத்த²தோ ஸதி ரக்க²தீ’’தி கத்வா. ததா² ஹேஸா ஆரக்க²பச்சுபட்டா²னா. சிரகதசிரபா⁴ஸிதானம் அஸம்முஸ்ஸனவஸேன ஸதி பஞ்ஞானங்க³லஸ்ஸ புரதோ ஹோதீதி வத்வா தஸ்ஸ புரதோபா⁴வம் த³ஸ்ஸேதும் ‘‘ஸதி…பே… நோ பமுட்டே²’’தி ஆஹ. ஸதிபரிசிதேதி ஸதியா பட்டா²பிதே. ‘‘உபட்டா²பிதே’’திபி பாடோ², அயமேவத்தோ². ஸம்ஸீதி³தும் ந தே³தீதி ஸகிச்சகிரியாய ஸம்ஸீத³னம் காதும் ந தே³தி. கோஸஜ்ஜஸங்கா²தம் ஸம்ஸீத³னம் கோஸஜ்ஜஸம்ஸீத³னம்.

பாதிமோக்க²ஸம்வரஸீலம் வுத்தம் காயிகவாசஸிகஸம்யமஸ்ஸ கதி²தத்தா. ஆஹாரே உத³ரே யதோதி பரிபு⁴ஞ்ஜிதப்³ப³ஆஹாரே ஸம்யதபா⁴வத³ஸ்ஸனேன பரிபு⁴ஞ்ஜிதப்³ப³தாய சதூஸுபி பச்சயேஸு ஸம்யதபா⁴வோ தீ³பிதோதி ஆஹ ‘‘ஆஹாரமுகே²னா’’திஆதி³. ஸம்யதபா⁴வோ சேத்த² பச்சயஹேது அனேஸனாபா⁴வோதி வுத்தம் ‘‘நிருபக்கிலேஸோதி அத்தோ²’’தி. போ⁴ஜனஸத்³தோ³ ஆஹாரபரிபோ⁴கே³ நிருள்ஹோதி கத்வா வுத்தம் ‘‘போ⁴ஜனே மத்தஞ்ஞுதாமுகே²னா’’தி. பரிபு⁴ஞ்ஜனட்டே²ன பன போ⁴ஜனஸத்³த³முகே²னாதி வுத்தே அதி⁴ப்பேதத்தோ² லப்³ப⁴தேவ. தேனாதி காயகு³த்தாதிஆதி³வசனேன. ந விலும்பந்தீதி ‘‘தீ³பேதீ’’தி பத³ம் ஆனேத்வா ஸம்ப³ந்தோ⁴.

த்³வீஹாகாரேஹீதி அதி³ட்டா²தீ³னம் அதி³ட்டா²தி³வஸேன தி³ட்டா²தீ³னஞ்ச தி³ட்டா²தி³வஸேனாதி ஏவம் த்³விப்பகாரேஹி. அவிஸம்வாத³னம் அவிதத²கத²னம். சே²த³னம் மூலப்பதே³ஸே நிகந்தனம். லுனனம் யத்த² கத்த²சி சே²த³னம். உப்பாடனம் உம்மூலனம். அஸிதேனாதி த³த்தேன, லாயிதேனாதி அத்தோ². விஸம்வாத³னஸங்கா²தானம் திணானம், அட்ட²ன்னம் அனரியவோஹாரானந்தி அத்தோ². யதா²பூ⁴தஞாணந்தி நாம ரூபபரிச்சே²த³கஞாணம். ஸச்சந்தி வேதி³தப்³ப³ம் அவிபரீதவுத்திகத்தா ‘‘சே²த³கம்’’ சி²ந்த³னகம். நித்³தா³னந்தி நித்³தா³யகம். இத³மேவ ஸச்சம் மோக⁴மஞ்ஞந்தி தி³ட்டி² ‘‘தி³ட்டி²ஸச்ச’’ந்தி வுச்சதி. த்³வீஸு விகப்பேஸூதி பா⁴வகத்துஸாத⁴னவஸேன த்³வீஸு விகப்பேஸு. ‘‘நித்³தா³ன’’ந்தி உபயோக³வஸேனேவ அத்தோ².

ஸீலமேவ ‘‘ஸோரச்ச’’ந்தி வுத்தம் ‘‘பாணாதிபாதாதீ³ஹி ஸுட்டு² ஓரதஸ்ஸ கம்ம’’ந்தி கத்வா. ஸங்கா²ரது³க்கா²தீ³னம் அபா⁴வதோ ஸுந்த³ரபா⁴வதோ ஸுந்த³ரே நிப்³பா³னே ஆரம்மணகரணவஸேன ரதத்தா ஸுரதோ, அரஹா. தஸ்ஸ பா⁴வோ ஸோரச்சம், அரஹத்தம். அப்பமோசனமேவ அச்சந்தாய பமோசனம் ந ஹோதி.

யத³க்³கே³ன விபஸ்ஸனாய பஞ்ஞாய தம்ஸஹக³தவீரியஸ்ஸ ச நங்க³லதோ⁴ரய்ஹதா, ததா²பவத்தகுஸலபா⁴வனாய ச கஸிபா⁴வோ ச, தத³க்³கே³ன ததோ புரேதரம் பவத்தபஞ்ஞாவீரியபாரமீனம் நங்க³லதோ⁴ரய்ஹதா, ததா²பவத்தகுஸலபா⁴வனாய ச கஸிபா⁴வோ வேதி³தப்³போ³தி த³ஸ்ஸேந்தோ ‘‘யதா² ஹீ’’திஆதி³மாஹ. து⁴ரம் வஹதீதி தோ⁴ரய்ஹம். யதா²வுத்தம் க⁴னந்தி அஸ்மிமானாதி³பே⁴த³ம் க⁴னம். வஹிதப்³பா³ ஆதி³பூ⁴தா து⁴ரா ஏதேஸம் அத்தீ²தி து⁴ரா, புரிமது⁴ரவாஹகா. தம்மூலகா அபரம் து⁴ரம் வஹந்தா தோ⁴ரய்ஹா. து⁴ரா ச தோ⁴ரய்ஹா ச து⁴ரதோ⁴ரய்ஹம் ஏகத்தவஸேன. வஹந்தந்தி கஸனேன பவத்தந்தம்.

காமயோகா³தீ³ஹி யோகே³ஹி கே²மத்தா அனுபத்³த³வத்தா. தம் நிப்³பா³னம் அதி⁴கிச்ச உத்³தி³ஸ்ஸ. வாஹீயதி விபஸ்ஸனாய ஸஹக³தம். அபி⁴முக²ம் வாஹீயதி மக்³க³பரியாபன்னம். கே²த்தகோடிந்தி கே²த்தமரியாத³ம். தி³ட்டே²கட்டே²தி தி³ட்டி²யா ஸஹஜாதேகட்டே² பஹானேகட்டே² ச. ஓளாரிகேதி உபரிமக்³க³வஜ்ஜே² உபாதா³ய வுத்தம், அஞ்ஞதா² த³ஸ்ஸனபஹாதப்³பா³பி து³தியமக்³க³வஜ்ஜே²ஹி ஓளாரிகாதி. அணுஸஹக³தேதி அணுபூ⁴தே. இத³ம் ஹேட்டி²மமக்³க³வஜ்ஜே² உபாதா³ய வுத்தம். ஸப்³ப³கிலேஸே அவஸிட்ட²ஸப்³ப³கிலேஸே பஜஹந்தம் அனிவத்தந்தம் க³ச்ச²தி புன பஹாதப்³ப³தாய அபா⁴வதோ. அனிவத்தந்தந்தி ந நிவத்தந்தம், யதா² நிவத்தனம் ந ஹோதி, ஏவம் க³ச்ச²தீதி அத்தோ². தேனாஹ ‘‘நிவத்தனரஹித’’ந்திஆதி³. ஏதம் பன தவ து⁴ரதோ⁴ரய்ஹம்.

ஏவமேஸா கஸீதி யதா²வுத்தஸ்ஸ பச்சாமஸனம். தேனாஹ ‘‘நிக³மனம் கரோந்தோ’’தி. வுத்தஸ்ஸேவ ஹி அத்த²ஸ்ஸ புன வசனம். பஞ்ஞானங்க³லேன ஸதிபா²லம் ஆகோடேத்வாதி பஞ்ஞாஸங்கா²தேன நங்க³லேன ஸத்³தி⁴ம் ஸதிபா²லஸ்ஸ ஏகாப³த்³த⁴பா⁴வகரணேன ஆகோடேத்வா. கட்டா²தி ஏத்த² ‘‘கஸீ’’தி பத³ம் ஆனேத்வா ஸம்ப³ந்தி⁴தப்³ப³ம் ‘‘கட்டா² கஸீ’’தி. கம்மபரியோஸானந்தி யதா²வுத்தகஸிகம்மஸ்ஸ பரியோஸானபூ⁴தம். யதி³பி புப்³பே³ ‘‘பஞ்ஞா மே யுக³னங்க³ல’’ந்திஆதி³னா அத்துத்³தே³ஸிகவஸேனாயம் அமதப்ப²லா கஸி த³ஸ்ஸிதா, மஹாகாருணிகஸ்ஸ பன ப⁴க³வதோ தே³ஸனா ஸப்³ப³ஸ்ஸபி ஸத்தனிகாயஸ்ஸ ஸாதா⁴ரணா ஏவாதி த³ஸ்ஸேந்தோ ‘‘ஸா கோ² பனேஸா’’திஆதி³மாஹ.

தி³வஸேயேவாதி தம்தி³வஸே ஏவ. ஆதி³மாஹாதி ஏத்த² ஆதி³-ஸத்³தே³ன கதா²பரியோஸானே பாட²பதே³ஸோ க³ஹிதோதி தத³ஞ்ஞம் ‘‘ஏவம் வுத்தே’’திஆதி³பாட²ம் ஸந்தா⁴ய ‘‘ததோ பரஞ்சா’’தி ஆஹ.

கஸிபா⁴ரத்³வாஜஸுத்தவண்ணனா நிட்டி²தா.

2. உத³யஸுத்தவண்ணனா

198. ஏதம் வுத்தந்தி ‘‘ஓத³னேன பூரேஸீ’’தி ஏதம் வசனம் வுத்தம். ‘‘க³ஹேதும் ஸமத்தோ² நாம நாஹோஸீதி ப⁴க³வதோ அதி⁴ட்டா²னப³லேனா’’தி வத³ந்தி. தம் ப்³ராஹ்மணம் வினேதுகாமதாய கிர ப⁴க³வா ததா² அகாஸி.

உபாரம்ப⁴ப⁴யேனாதி பரூபவாத³ப⁴யேன. அவத்வாவ நிவத்தோ ‘‘அப்³பா⁴க³தோபி பாஸண்டோ³ வாசாமத்தேனபி ந பூஜேதப்³போ³’’தி ப்³ராஹ்மணத⁴ம்மே வுத்தத்தா. பக்கந்தோதி ப்³ராஹ்மணஸ்ஸ த⁴ம்மம் அவத்வா பக்கந்தோ ப்³ராஹ்மணஸ்ஸ ந தாவ ஞாணம் பரிபக்கந்தி. ஏதம் வசனம்…பே… மக³மாஸி ‘‘புனப்புனஞ்சேவ வபந்தி பீ³ஜ’’ந்திஆதி³னா த⁴ம்மம் கதே²தும் அவஸ்ஸம் ஆகங்க²ந்தோ. பகாரதோ கஸ்ஸதீதி பகட்ட²கோ, ரஸதண்ஹாய பகட்டோ²தி அத்தோ². தேனாஹ ‘‘ரஸகி³த்³தோ⁴’’தி.

‘‘புனப்புனஞ்சேவ வபந்தி பீ³ஜ’’ந்தி இமம் தே³ஸனம் ஆரபீ⁴தி ஸம்ப³ந்தோ⁴. பீ³ஜந்தி ச இதி-ஸத்³தோ³ நித³ஸ்ஸனத்தோ² வா. தேன அவயவேன ஸமுதா³யம் நித³ஸ்ஸேதி. ஓஸக்கஸீதி ஸங்கோசஸி. வுத்தந்தி வபனம் கதம். தஸ்மா வுத்தம் ‘‘அலமேத்தாவதா’’தி. ‘‘வஸ்ஸித்வா’’தி வுட்டி²ம் பவத்தேத்வா.

தே³ஸனா…பே… த³ஸ்ஸேதி ப்³ராஹ்மணேன வுத்தம் அயுத்தவசனம் பரிவட்டேந்தோபி தி³வஸே தி³வஸே பி⁴க்கா²சரியா நாம பி⁴க்கூ²னம் காயக³தா வுத்தீதி. கீ²ரம் ஹத்தே²ன நயந்தீதி வா கீ²ரனிகா. கிலமதீதி தம்தம்கிச்சகரணவஸேன கி²ஜ்ஜதி. ப²ந்த³தீதி அனத்த²ஸமாயோக³வஸேன விப்ப²ந்த³தி. அபுனப்³ப⁴வாயாதி ஆயதிம் அனுப்பத்தியா. மக்³கோ³ நாமாதி உபாயோ நாம நிப்³பா³னம், தஸ்மிம் லத்³தே⁴ புனப்³ப⁴வாபா⁴வதோ. ‘‘புனப்புன’’ந்தி வசனம் உபாதா³ய பீ³ஜவபனாத³யோ புனப்புனத⁴ம்மா நாம ஜாதாதி ஆஹ ‘‘ஸோளஸ புனப்புனத⁴ம்மே தே³ஸேந்தேனா’’தி.

உத³யஸுத்தவண்ணனா நிட்டி²தா.

3. தே³வஹிதஸுத்தவண்ணனா

199. உத³ரவாதேஹீதி வாதகதவிஜ்ஜ²னதோத³னாதி³வஸேன அபராபரம் வத்தமானேஹி உத³ரவாதேஹி, தஸ்ஸ வா விகாரேஹி. நிப³த்³து⁴பட்டா²ககாலே பன த⁴ம்மப⁴ண்டா³கா³ரிகோவ. அரஞ்ஞந்தி ப⁴க³வதோ பி⁴க்கூ²னஞ்ச வஸனட்டா²னபூ⁴தம் தபோவனம். தம் நித்³தூ⁴மம் ஹோதி உத³கதாபனஸ்ஸபி அகரணதோ. தஸ்மாதி யஸ்மா தஸ்ஸ உண்ஹோத³கவிக்கிணனசரியாய ஜீவிகாகப்பனம் ஹோதி, தஸ்மா.

வத்தமேதம் தஸ்ஸ பதிகாரத்த²ம் பரிகதா²தீ³னம்பி காதும் லப்³ப⁴னதோ. இதா³னி தத்த² காரணம்பி ஸவிஸயம் த³ஸ்ஸேதும் ‘‘வண்ணம் ஹீ’’திஆதி³ வுத்தம். ப⁴க³வா ஹி ஆயஸ்மதோ உபவாணஸ்ஸ தே³வஹிதப்³ராஹ்மணஸ்ஸ தம் ஸம்பா⁴விதம் ப⁴விஸ்ஸதி திகிச்சா²படியத்தம், தாய ச அத்தனோ ரோக³ஸ்ஸ வூபஸமனம், தப்பஸங்கே³ன ச தே³வஹிதப்³ராஹ்மணோ மம ஸந்திகம் ஆக³ந்த்வா த⁴ம்மஸ்ஸவனேன ஸரணேஸு ஸீலேஸு ச பதிட்ட²ஹிஸ்ஸதீதி ஸப்³ப³மித³ம் ஞத்வா ஏவம் ‘‘இங்க⁴ மே த்வம், உபவாண, உண்ஹோத³கம் ஜானாஹீ’’தி அவோச. ஆக³மனீயப்படிபத³ம் புப்³ப³பா⁴க³ப்படிபத³ம் புப்³ப³பா⁴க³ப்படிபத்திம் கதே²தும் வட்டதி அனுத்தரிமனுஸ்ஸத⁴ம்மத்தா. ஸதே³வகேன லோகேனாதி அனவஸேஸதோ லோகஸ்ஸ க³ஹணம். ப²லவிஸேஸாகங்கா²ய பூஜேதப்³பா³தி பூஜனீயா, தே ஏவ இத⁴ ‘‘பூஜனேய்யா’’தி வுத்தா. ததா² ஆத³ரேன பூஜேதப்³ப³தாய ஸக்காரியா, ஆ-காரஸ்ஸ ரஸ்ஸத்தம், ரி-ஸத்³த³ஸ்ஸ ச ரே-ஆதே³ஸம் கத்வா ‘‘ஸக்கரேய்யா’’தி வுத்தம். ‘‘அபசயேய்யா’’தி வத்தப்³பே³ ய-காரலோபம் கத்வா ‘‘அபசேய்யா’’தி வுத்தம். தேஸந்தி ஸதே³வகேன பூஜனேய்யாதீ³னம். ஹரிதுந்தி நேதும்.

ஏத்தகேனபீதி உபஸங்கமனாதி³னா ஏத்தகேன அப்பமத்தகேனபி கதவத்தேன அயம் கித்தி…பே… ஸோமனஸ்ஸஜாதோ.

யஜமானஸ்ஸாதி தே³ய்யத⁴ம்மம் தே³ந்தஸ்ஸ. த³க்கி²ணாய இஜ்ஜ²னம் நாம விபுலப²லபா⁴வோதி ஆஹ ‘‘மஹப்ப²லோ ஹோதீ’’தி. விதி³தந்தி படிவித்³த⁴பச்சக்க²கதம். ஆஜானாதீதி வுத்த²ப⁴வாதி³ம் பரியாதா³ய ஜானாதி படிவிஜ்ஜ²தி. ஜானித்வாதி சத்தாரி ஸச்சானி மக்³க³படிபாடியா படிவிஜ்ஜி²த்வா. அக்³க³ப்பத்ததாய கதகிச்சதம் பத்தோ. ப்³ராஹ்மணேன அத்தனா கதோ காரோ ச ப⁴க³வதோ ஏவ பச்சுபட்டா²தீதி தம் த³ஸ்ஸேந்தோ ‘‘இமினா கீ²ணாஸவே யஜனாகாரேன யஜந்தஸ்ஸா’’தி வுத்தம்.

தே³வஹிதஸுத்தவண்ணனா நிட்டி²தா.

4. மஹாஸாலஸுத்தவண்ணனா

200. யஸ்மா தஸ்ஸ ப்³ராஹ்மணஸ்ஸ அனிஸ்ஸயஸ்ஸ ஜிண்ணபா⁴வேன விஸேஸதோ காயோ லூகோ² ஜாதோ, ஜிண்ணபிலோதிகக²ண்டே³ஹி ஸங்க⁴டிதம் பாவுரணம், தஸ்மா ‘‘லூக²பாவுரணோ’’தி பத³ஸ்ஸ ‘‘ஜிண்ணபாவுரணோ’’தி அத்தோ² வுத்தோ. பாடியேக்கந்தி புத்தேஸு ஏகமேகோ ஏகமேகாய வாசாய விஸும் விஸும்.

ஸம்புச்ச²னம் நாம இத⁴ ஸம்மந்தனந்தி ஆஹ ‘‘ஸத்³தி⁴ம் மந்தயித்வா’’தி. நந்தி³ஸ்ஸந்தி அபி⁴னந்தி³ம். அதீதத்தே² ஹி இத³ம் அனாக³தவசனம். தேனாஹ ‘‘நந்தி³ஜாதோ…பே… அஹோஸி’’ந்தி. பு⁴ஸ்ஸந்தாதி நிப்³பு⁴ஸ்ஸனவஸேன ரவந்தா.

வயோக³தந்தி பச்சி²மவயம் உபக³தம். ஸோ பன யஸ்மா புரிமே த்³வே வயே அதிக்கமவஸேன க³தோ. பச்சி²மம் ஏகதே³ஸதோ அதிக்கமனவஸேன, தஸ்மா வுத்தம் – ‘‘தயோ வயே க³தம் அதிக்கந்தம் பச்சி²மவயே டி²த’’ந்தி.

நிப்பரிபோ⁴கோ³தி ஜிண்ணபா⁴வேன ஜவபரக்கமஹானியா அபரிபோ⁴கோ³ ந பு⁴ஞ்ஜிதப்³போ³. கா²த³னா அபனீயதீதி யவஸம் அத³த³ந்தா ததோ நீஹரந்தி நாம. தே²ரோதி வுட்³டோ⁴.

அனஸ்ஸவாதி ந வசனகரா. அப்பதிஸ்ஸாதி பதிஸ்ஸயரஹிதா. அவஸவத்தினோதி ந மய்ஹம் வஸேன வத்தனகா. ஸுந்த³ரதரோதி உபத்த²ம்ப⁴காரிபா⁴வேன ஸுந்த³ரதரோ.

புரதோதி உபத்த²ம்ப⁴கபா⁴வேன புரதோ கத்வா. உத³கே பதிட்ட²ம் லப⁴தி தத்த² பதிட்ட²தோ தி²ரபதிட்ட²பா⁴வதோ. அத்³த⁴பதிட்டோ² ஹி த³ண்டோ³ த³ண்ட³த⁴ரபுரிஸஸ்ஸ பதிட்ட²ம் லபா⁴பேதி.

ப்³ராஹ்மணியோதி அத்தனோ ப்³ராஹ்மணியோ. பாடியேக்கந்தி ‘‘அஸுகஸ்ஸ கே³ஹே அஸுகஸ்ஸ கே³ஹே’’தி ஏவம் உத்³தே³ஸிகம் கத்வா விஸும் விஸும். மா நிய்யாதே³ஹி, அம்ஹாகம் ருச்சனட்டா²னமேவாதி தவ புத்தானம் கே³ஹேஸு யம் அம்ஹாகம் ருச்சனட்டா²னம். தத்த²மேவ க³மிஸ்ஸாமாதி ஸப்³பே³ஸம்பி ஏதேஸம் அனுக்³க³ஹம் காதுகாமோ ப⁴க³வா ஏவமாஹ.

ததோ பட்டா²யாதி ஸோதாபத்திப²லபடிலாப⁴தோ பட்டா²ய. யத³த்த²ம் மயம் இமஸ்ஸ ப்³ராஹ்மணஸ்ஸ மஹாஸம்பத்திதா³னாதி³னா அனுக்³க³ஹோ கதோ, ஸோ சஸ்ஸ புத்தபரிஜனஸ்ஸபி அத்தோ² ஸித்³தோ⁴தி ஸத்தா² ந ஸப்³ப³காலம் தஸ்ஸ ப்³ராஹ்மணஸ்ஸ புத்தானம் கே³ஹம் அக³மாஸி, தே ஏவ பன காலேன காலம் ஸத்து² ஸந்திகம் க³ந்த்வா யதா²விப⁴வம் ஸக்காரஸம்மானம் அகம்ஸூதி அதி⁴ப்பாயோ.

மஹாஸாலஸுத்தவண்ணனா நிட்டி²தா.

5. மானத்த²த்³த⁴ஸுத்தவண்ணனா

201. மானேன த²த்³தோ⁴தி ‘‘அயம் கோ²’’திஆதி³னா பக்³க³ஹிதேன மானேன த²த்³தோ⁴ ப³ஜ்ஜி²தசித்தோ த²த்³த⁴அயோஸலாகோ விய கஸ்ஸசிபி அனோனதோ. ந கிஞ்சி ஜானாதி லோகே படிஸந்தா²ரமத்தஸ்ஸபி அஜானனதோ.

அப்³பு⁴தவித்தஜாதாதி ஸஞ்ஜாதஅப்³பு⁴தவித்தா. வித்தம் வித்தீதி ச துட்டி²பரியாயா. அபூ⁴தபுப்³பா³யாதி யா தஸ்ஸா பரிஸாய வித்தி ததா³ பூ⁴தா, ஸா இதோ புப்³பே³ அபூ⁴தா. தேனாஹ ‘‘அபூ⁴த…பே… ஸமன்னாக³தா’’தி. அஸ்ஸ புக்³க³லஸ்ஸாதி அனேன புக்³க³லேன. அபசிதாதி பரமனிபச்சேன பூஜனீயஸாமஞ்ஞதோ தத்த² அத்தனோ பக்கி²பனம் இத⁴ தே³ஸனாகோஸல்லம்.

மானத்த²த்³த⁴ஸுத்தவண்ணனா நிட்டி²தா.

6. பச்சனீகஸுத்தவண்ணனா

202. ‘‘ஸப்³ப³ம் ஸேத’’ந்தி கேனசி வுத்தே தஸ்ஸ பச்சனீகம் கரோந்தஸ்ஸேவ அஸ்ஸ ப்³ராஹ்மணஸ்ஸ. வினேத்வாதி வினாஸேத்வா. ஸுணாதீதி அத்தோ²தி ‘‘ஸுணாதீ’’தி கிரியாபத³ம் ஆஹரித்வா கா³தா²ய அத்தோ² வேதி³தப்³போ³ ‘‘ஜஞ்ஞா ஸுபா⁴ஸித’’ந்தி வுத்தத்தா. ந ஹி அஸுத்வா தே³ஸிதம் ஜானிதும் ஸக்கோந்தி.

பச்சனீகஸுத்தவண்ணனா நிட்டி²தா.

7. வனகம்மிகஸுத்தவண்ணனா

203. வனகம்மே நியுத்தோ, கிரியமானேன வனகம்மம் ஏதஸ்ஸ அத்தீ²தி வனகம்மிகோ. இமஸ்மிம் வனஸண்டே³தி இமஸ்மிம் ஏவம்மஹந்தே வனஸண்டே³. ந மே வனஸ்மிம் கரணீயமத்தி² யதா², ‘‘ப்³ராஹ்மண, துய்ஹ’’ந்தி அதி⁴ப்பாயோ. இதரம் பன யம் மஹாகிலேஸவனம், தம் மக்³க³ஞாணப²ரஸுனா ஸமாதி⁴மயஸிலாயம் ஸுனிஸிதேன ஸப்³ப³ஸோ உச்சி²ன்னமூலம், ததோ ஏவ நிப்³ப³னதோ² நிக்கிலேஸக³ஹனோ. விவேகாபி⁴ரதியா ஏககோ அபி⁴ரதோ படிபக்க²விக³மேன. தேனாஹ ‘‘அரதிம்…பே… ஜஹித்வா’’தி.

வனகம்மிகஸுத்தவண்ணனா நிட்டி²தா.

8. கட்ட²ஹாரஸுத்தவண்ணனா

204. த⁴ம்மந்தேவாஸிகாதி கிஞ்சிபி த⁴னம் அத³த்வா கேவலம் அந்தேவாஸிகா. தேனாஹ ‘‘வேய்யாவச்சம் கத்வா ஸிப்புக்³க³ண்ஹனகா’’தி. க³ம்பீ⁴ரஸபா⁴வேதி ஸமந்ததோ தூ³ரதோ க³ஹனஸச்ச²ன்னவிபுலதரருக்க²க³ச்ச²லதாய ச, ததா³ ஹிமபிண்ட³ஸின்னபா⁴வேன மயூரயானேஹி பதிட்டா²தும் அஸக்குணேய்யதாய ச க³ம்பீ⁴ரபா⁴வே.

ப³ஹுபே⁴ரவேதி ப³ஹுப⁴யானகே. அனிஞ்ஜமானேனாதி இத்த²ம்பூ⁴தத்தே² கரணவசனம். அதிஸுந்த³ரம் வதாதி ஏவம் ஸந்தே நாம அரஞ்ஞே ஏவம் நிச்சலகாயோ நிஸின்னோ ஜா²யந்தோ அதிவிய ஸுந்த³ரஞ்ச ஜா²னம் ஜா²யஸீதி வத³தி.

அச்சே²ரரூபந்தி அச்ச²ரியபா⁴வம். ஸேட்ட²ப்பத்தியாதி ஸேட்ட²பா⁴வப்பத்தியா.

‘‘லோகாதி⁴பதிஸஹப்³யதம் ஆகங்க²மானோ’’தி இமினா ப்³ராஹ்மணோ லோகாதி⁴பதிஸஹயோக³ம் புச்ச²தி, ‘‘கஸ்மா ப⁴வ’’ந்திஆதி³னா பன தத³ஞ்ஞவிஸேஸாகங்க²ம் புச்ச²தீதி ஆஹ ‘‘அபரேனபி ஆகாரேன புச்ச²தீ’’தி.

கங்கா²தி தண்ஹா அபி⁴க்க²ணவஸேன பவத்தா. அனேகஸபா⁴வேஸூதி ரூபாதி³வஸேன அஜ்ஜ²த்திகாதி³வஸேன ஏவம் நானாஸபா⁴வேஸு ஆரம்மணேஸு. அஸ்ஸாத³ராகோ³ லோபோ⁴ அபி⁴ஜ்ஜா²தி நானப்பகாரா. ஸேஸகிலேஸா வா தி³ட்டி²மானதோ³ஸாத³யோ. நிச்சகாலம் அவஸ்ஸிதா ஸத்தானம் அவஸ்ஸயபா⁴வத்தா. பஜப்பாபனவஸேனாதி பகாரேஹி தண்ஹாயனவஸேன. நிரந்தாதி அந்தரஹிதா நிரவஸேஸா.

அனுபக³மனோதி அனுபாதா³னோ. ஸப்³ப³ஞ்ஞுதஞ்ஞாணம் தீ³பேதி, தஸ்ஸ ஹி வஸேன ஏவ நானாஸபா⁴வேஸு ப⁴க³வா ஸமந்தசக்கு²னா பஸ்ஸதீதி ‘‘ஸப்³பே³…பே… த³ஸ்ஸனோ’’தி வுச்சதி. அரஹத்தம் ஸந்தா⁴யாஹ, தஞ்ஹி நிப்பரியாயதோ ‘‘அனுத்தர’’ந்தி வுச்சதி.

கட்ட²ஹாரஸுத்தவண்ணனா நிட்டி²தா.

9. மாதுபோஸகஸுத்தவண்ணனா

205. இதோதி மனுஸ்ஸத்தபா⁴வதோ. படிக³ந்த்வாதி அபி⁴க³ந்த்வா. ஸக்³கே³ ஹி நிப்³ப³த்தந்தோ கம்மப²லேன த⁴ம்மதாவஸேன படிஸந்தி⁴காலதோ பட்டா²ய அபி⁴ரதிவஸேன அபி⁴ரமதி ஏவ நாமாதி.

மாதுபோஸகஸுத்தவண்ணனா நிட்டி²தா.

10. பி⁴க்க²கஸுத்தவண்ணனா

206. விரூபம் க³ந்த⁴ம் பஸவதீதி விஸ்ஸோ, து³க்³க³ந்தோ⁴. பா³ஹித்வாதி அத்தனோ ஸந்தானதோ ப³ஹிகத்வா நீஹரித்வா. தம் பன அனவஸேஸதோ பஜஹனந்தி ஆஹ ‘‘அக்³க³மக்³கே³ன ஜஹித்வா’’தி. ஸங்கா²யதி ஸம்மதே³வ பரிச்சி²ந்த³தி ஏதாயாதி ஸங்கா², ஞாணந்தி ஆஹ ‘‘ஸங்கா²யாதி ஞாணேனா’’தி. பி⁴ன்னகிலேஸத்தாதி நிருத்தினயேன பி⁴க்கு²ஸத்³த³ஸித்³தி⁴மாஹ.

பி⁴க்க²கஸுத்தவண்ணனா நிட்டி²தா.

11. ஸங்கா³ரவஸுத்தவண்ணனா

207. பச்சேதீதி பத்தியாயதி ஸத்³த³ஹதி. ததா²பூ⁴தோ ச தமத்த²ம் நிகாமேந்தோ நாம ஹோதீதி வுத்தம் ‘‘இச்ச²தி பத்தே²தீ’’தி. ஸாது⁴, ப⁴ந்தேதி ஏத்த² ஸாது⁴-ஸத்³தோ³ ஆயாசனத்தோ², ந அபி⁴னந்த³னத்தோ²தி ‘‘ஆயாசமானோ ஆஹா’’தி வத்வா ஆயாசனே காரணம் த³ஸ்ஸேந்தோ ‘‘தே²ரஸ்ஸ கிரா’’திஆதி³மாஹ. உத³கஸுத்³தி⁴கோ ந ஏகம்ஸேன அபாயூபகோ³, லத்³தி⁴யா பன ஸாவஜ்ஜகிலேஸபூ⁴தபா⁴வதோ ஆயாசதி. அஞ்ஞம் காரணம் அபதி³ஸந்தோ ‘‘அபிசா’’திஆதி³மாஹ. ப²லபூ⁴தோ அத்தோ² ஏதஸ்ஸாதி அத்த²வஸம், காரணந்தி ஆஹ ‘‘அத்தா²னிஸம்ஸம் அத்த²காரண’’ந்தி. பபஞ்சஸூத³னியம் பன ப²லேனேவ அரணீயதோ அத்தோ², காரணந்தி கத்வா ‘‘அத்தோ² ஏவ அத்த²வஸோ, தஸ்மா த்³வே அத்த²வஸேதி த்³வே அத்தே² த்³வே காரணானீ’’தி வுத்தம்.

ஸங்கா³ரவஸுத்தவண்ணனா நிட்டி²தா.

12. கோ²மது³ஸ்ஸஸுத்தவண்ணனா

208. ஏவம்லத்³த⁴னாமம் பிண்டா³ய பாவிஸீதி யோஜனா. ஏவமேவந்தி கேனசி அனிமந்திதேன ஸயமேவ உபஸங்கமந்தே. அபா²ஸுகதா⁴துகந்தி அயுத்தரூபம். ஸபா⁴த⁴ம்மந்தி ஸபா⁴ய சரிதப்³ப³ம் சாரித்தத⁴ம்மம். அஸஞ்சாலேத்வாதி ஆஸனதோ அவுட்டா²பேத்வா. உஜுகமேவ ஆக³ச்ச²தி லோகக்³க³னாயகோ ப⁴க³வா ஸப்³ப³ஸத்துத்தமோ அத்தனோ உத்தரிதரஸ்ஸ அபா⁴வதோ லோகஸ்ஸ அபசிதிம் ந த³ஸ்ஸேதி. யே ஸப்³ப³ஸோ ஸம்கிலேஸே பஜஹந்தி, தேவ பண்டி³தே ‘‘ஸந்தோ’’தி த³ஸ்ஸேதி ‘‘ஏதே’’திஆதி³னா.

கோ²மது³ஸ்ஸஸுத்தவண்ணனா நிட்டி²தா.