11. ஸக்கஸம்யுத்தம்

1. பட²மவக்³கோ³

1. ஸுவீரஸுத்தவண்ணனா

247. அபி⁴யம்ஸூதி யுத்³த⁴ஸஜ்ஜாபி⁴முகா² ஹுத்வா க³ச்சி²ம்ஸு. தத்ராதி தஸ்மிம் அஸுரானம் அபி⁴யானே அயம் தா³னி வுச்சமானா அனுபுப்³ப³தோ கதா². தேத்திம்ஸ புரிஸே க³ஹேத்வாதி தேத்திம்ஸ புரிஸே புஞ்ஞகிரியாய ஸஹாயபூ⁴தே க³ஹேத்வா. ‘‘யாவஜீவம் மாதாபிதுப⁴ரோ அஸ்ஸ’’ந்திஆதி³னா ஸமாதி³ன்னானி ஸத்த வதபதா³னி பூரேத்வா. அதி⁴க³ண்ஹந்தம் அபி⁴ப⁴வந்தம். புத்தஹதாயாதி ஹதபுத்தாய. ஸா ஸுரா ந ஹோதி, ந ஸுரம் பிவிம்ஹாதி அதி⁴ப்பாயோ. ததோ பட்டா²யாதி ‘‘ந ஸுரா’’தி வுத்தகாலதோ பட்டா²ய. ‘‘ந ஸுரந்தி ந தி³ப்³ப³ந்தீதி அஸுரா’’தி கேசி. ஹேட்டி²மதலே அந்தோபூ⁴மியம் ஆயாமதோ த³ஸயோஜனஸஹஸ்ஸம்.

உரகா³தி³ஸஹசரிதானி டா²னானி உரகா³தீ³னீதி ஆஹ ‘‘உரகா³தீ³ஸு பஞ்சஸு டா²னேஸூ’’தி. பட²மாலிந்தே³தி பட²மே பரிப⁴ண்டே³. பஞ்சயோஜனஸஹஸ்ஸவித்தா²ரபுது²ப³ஹலாஹி ஸினேருஸ்ஸ சதூஸுபி பஸ்ஸேஸு சத்தாரோ பரிப⁴ண்டா³. ஸினேருஸ்ஸ ஹி தஸ்மிம் தஸ்மிம் பஸ்ஸே யுக³ந்த⁴ராதீ³ஸு பஞ்சஸதபரித்ததீ³பபரிவாரே மஹாதீ³பே ச லபி⁴தப்³ப³ஸ்ஸ மஹதோ அத்த²ஸ்ஸ வஸேன மஹத்தா². குபிதாவிலசித்தாதி குபிதேன கோபேன ஆகுலசித்தா. யுத்³தே⁴ஸீதி யுத்³தே⁴ஸினோ. ஸேஸேஸூதி ஸேஸேஸு பரிப⁴ண்டே³ஸு. ஸேஸாதி ஸுபண்ணாத³யோ.

வம்மிகமக்கி²காதி ஸபக்கி²கஉபசிகா. ஓஸக்கித்வாதி பிட்டி²பா⁴கே³ன நிவத்தித்வா.

பமாத³ம் ஆபாதே³ஸீதி ஸக்கஸ்ஸ ஆணாய பமாத³ம் ஆபஜ்ஜி. ஸட்டி²யோஜனம் வித்தா²ரேன. ஸுவண்ணமஹாவீதி²ந்தி ஸுவண்ணமயபூ⁴மிஜக³திவீதி²ம்.

அனுட்ட²ஹந்தோதி உட்டா²னம் காயிகவீரியம் அகரோந்தோ. அவாயமந்தோதி வாயாமம் சேதஸிகவீரியம் அகரோந்தோ. கிஞ்சி கிச்சந்தி கஸிவாணிஜ்ஜாதி³பே⁴த³ம் அஞ்ஞதரம் கிச்சம் கத்தப்³ப³கம்மம். வரந்தி பவரம். தேனாஹ ‘‘உத்தம’’ந்தி. தஞ்ச கோ² கஸிதப்³ப³ட்டா²னம் அதி⁴ப்பேதந்தி ஆஹ ‘‘ஓகாஸ’’ந்தி. கம்மம் அகத்வாதி கிஞ்சிபி ஜீவிதஹேதுபூ⁴தம் கம்மம் அகத்வா. ஜீவிதட்டா²னம் நாமாதி தஸ்ஸ ஜீவிதஸ்ஸ ஹேது நாம. நிப்³பா³னஸ்ஸ மக்³கோ³தி நிப்³பா³னஸ்ஸ அதி⁴க³முபாயபூ⁴தோ மக்³கோ³.

ஸுவீரஸுத்தவண்ணனா நிட்டி²தா.

2. ஸுஸீமஸுத்தவண்ணனா

248. அந்தரேதி அப்³ப⁴ந்தரே. ஏவம்னாமகந்தி ‘‘ஸுஸீமோ’’தி ஏவம்னாமகம். ஏகம் புத்தமேவ அஞ்ஞதரம் அத்தனோ புத்தமேவ.

ஸுஸீமஸுத்தவண்ணனா நிட்டி²தா.

3. த⁴ஜக்³க³ஸுத்தவண்ணனா

249. ஸமுபப்³யூள்ஹோதி உபி⁴ன்னம் ஸஹ ஏவ ஸமாக³மோ, பு⁴ஸம் வா ப்³யூள்ஹோதி அத்தோ². பு⁴ஸா பனஸ்ஸ ப்³யூள்ஹதா த்³வின்னம் ஸேனானம் ஸமாக³ந்த்வா ஸம்பிண்டி³தபா⁴வேனாதி ஆஹ ‘‘ஸம்பிண்டி³தோ ராஸிபூ⁴தோ’’தி. பச்சி²மந்தோதி ரத²பஞ்ஜரஸ்ஸ பரந்தோ பச்சி²மந்தோ பச்சி²மகோட்டா²ஸோ. ரத²ஸந்தி⁴தோதி ரத²பஞ்ஜரஸ்ஸ குப்³ப³ரேன ஸத்³தி⁴ம் ஸம்ப³ந்த⁴னட்டா²னதோ. ததே³வ பமாணந்தி ததே³வ ‘‘தி³யட்³ட⁴யோஜனஸதாயாமோ’’தி வுத்தப்பமாணமேவ. தி³கு³ணம் கத்வாதி ‘‘பச்சி²மந்தோ ஸதயோஜனோ’’திஆதி³னா தி³கு³ணம் கத்வா. சந்த³மண்ட³லஸூரியமண்ட³லகிங்கிணிகஜாலாதி³பே⁴த³ஸ்ஸ ஸேஸாலங்காரஸ்ஸ. பஸ்ஸந்தானம் தே³வானம். ராஜா நோதி அம்ஹாகம் ராஜா தே³வஸேட்டோ². து³தியம் ஆஸனம் லப⁴தீதி ஸக்கே நிஸின்னே தஸ்ஸ அனந்தரம் து³தியம் ஆஸனம் லப⁴தி. தஸ்மா தே³வஸேட்ட²தாய ஸக்கோ விய கா³ரவட்டா²னியோ, யதோ ஸக்கோ ‘‘தஸ்ஸ த⁴ஜக்³க³ம் உல்லோகேய்யாதா²’’தி ஆஹ. ஏஸ நயோ ஸேஸேஸுபி. அஸுரேஹி பராஜிதோதி அஸுரேஹி பராஜயம் ஆபாதி³தோ. ரஜத⁴ஜம் தி³ஸ்வாதி பரஸேனாய உபக³ச்ச²ந்தியா உட்டி²தரஜமத்தம்பி தி³ஸ்வா டி²தோபி தம் ரஜத⁴ஜம் தி³ஸ்வா பீ⁴ருபா⁴வேன பலாயனத⁴ம்மோ.

யஸ்ஸ த⁴ஜக்³க³பரித்தஸ்ஸ. ஆனுபா⁴வோ வத்ததி அஸம்முகீ²பூ⁴தாஹிபி தே³வதாஹி ஸிரஸா ஸம்படிச்சி²தப்³ப³தோ. சோரப⁴யாதீ³ஹீதி ஆதி³-ஸத்³தே³ன ரோக³ப⁴யாதீ³னஞ்சேவ வட்டது³க்க²ஸ்ஸ ச ஸங்க³ஹோ த³ட்ட²ப்³போ³ விதி⁴னா பா⁴விதே பரித்தஸ்ஸ அத்தே² உபசாரஜ்ஜா²னாதீ³னம்பி இஜ்ஜ²னதோ.

தீ³க⁴வாபீனாமகே கா³மே சேதியம் தீ³க⁴வாபிசேதியம். முத்³த⁴வேதி³கா நாம ஹம்மியம் பரிக்கி²பித்வா கதவேதி³கா. பு³த்³த⁴க³தம் ஸதிம் உபட்ட²பேத்வா பரித்தரக்க²கு³த்திம் ஆஹ. பரித்தஸ்ஸ ஆனுபா⁴வேன த்³வே இட்ட²கா…பே… அட்ட²ம்ஸு. ததா² ஹி தஸ்மிம் நிஸ்ஸேணியம் டி²தே…பே… அட்ட²ம்ஸூதி.

த⁴ஜக்³க³ஸுத்தவண்ணனா நிட்டி²தா.

4. வேபசித்திஸுத்தவண்ணனா

250. ‘‘மஹானுபா⁴வதாய அஸுரானம் சித்தவேபனேன வேபசித்தீ’’தி வத³ந்தி. இஸீஹி பன அப⁴யம் யாசிதே ‘‘ப⁴யமேவ த³தா³மீ’’தி வத்வா தேஹி ‘‘அக்க²யம் ஹோது தே ப⁴ய’’ந்தி அபி⁴ஸபவஸேன வுத்தகாலதோ பட்டா²ய வேபனசித்ததாய ‘‘வேபசித்தீ’’தி வுச்சதி, யம் லோகியா ‘‘புலோமோ’’தி ச வத³ந்தி. நிபாதபதா³னிபி கானிசி அத்த²விஸேஸஜோதகானி ஹோந்தீதி ஆஹ ‘‘நிபாதமத்த’’ந்தி ஹேதுஅத்தா²தீ³னமேத்த² அஸம்ப⁴வதோ. தந்தி ஸக்கம் தே³வானமிந்த³ம். கண்டே² பஞ்சமேஹீதி கண்ட²ப³ந்த⁴னபஞ்சமேஹி, விப⁴த்திஅலோபேன நித்³தே³ஸோ. சித்தேனேவாதி ‘‘இமம் ப³ந்தா⁴மி, அயம் ப³ஜ்ஜ²தூ’’தி உப்பன்னசித்தேனேவ. ப³ஜ்ஜ²தி ப³த்³தோ⁴ ஹோதி, அயம் தே³வானுபா⁴வோ. முச்சதீதி ஏத்தா²பி ஏஸேவ நயோ. த³ஸஹீதி ‘‘சோரோஸீ’’திஆதி³னா இத⁴ வுத்தேஹி த³ஸஹி. தேனாஹ ‘‘இமேஹீ’’தி. நிப்³ப³த்தித்வா சிரகாலதம் உபாதா³ய கு²ம்ஸனவஸேன வத³தி ‘‘ஜரஸக்கா’’தி. ந தம் அக்கோஸம் மனஸி கரோதி தீ³க⁴ரத்தம் க²ந்திஸோரச்சேஸு நிருள்ஹஅஜ்ஜா²ஸயத்தா. மஹாபடிக்³க³ஹணந்தி மஹந்தம் உபஸமப்³யஞ்ஜனம். அஸ்ஸாதி வேபசித்தஸ்ஸ.

படிஸம்யுஜேதி படிஸத்து ஹுத்வா ஸம்யுத்³த⁴ம் கரேய்ய. தேனாஹ ‘‘படிப்ப²ரேய்யா’’தி. உபஸமம்…பே… மஞ்ஞே உபஸமேனேவ பச்சத்தி²கஸ்ஸ நாயகபூ⁴தஸ்ஸ கோத⁴ஸ்ஸ படிஸேத⁴னதோ. தாதி³ஸே ஹி கோதோ⁴ படிகிரியம் அலப⁴ந்தோ அனுபாதா³னோ விய ஜாதவேதோ³ வூபஸம்மதி. யதா³-ஸத்³தோ³ ஹேதுஅத்தோ², ந காலத்தோ²தி ஆஹ ‘‘யஸ்மா தம் மஞ்ஞதீ’’தி. தாவதே³வ த்³வே கா³வோ யுஜ்ஜ²ந்தேதி தஸ்மிம்யேவ க²ணே த்³வீஸு கோ³ணேஸு யுஜ்ஜ²ந்தேஸு.

க²ந்திதோ உத்தரிதரோ அஞ்ஞோ அத்தோ² ந விஜ்ஜதி அனந்தரேவ அஸ்ஸ விரோத⁴ம் அனத்த²ம் படிபா³ஹித்வா தி³ட்ட²த⁴ம்மிகஸ்ஸ சேவ ஸம்பராயிகஸ்ஸ ச ஸம்விதா⁴னதோ. தம் க²ந்திம் பரமம் ஆஹு ஸேட்ட²ப³லம் விரோத⁴பச்சயம் அபி⁴பு⁴ய்ய பவத்தனதோ. பா³லயோக³தோ பா³லோ, தஸ்ஸ ப³லம் பா³லப³லம், அஞ்ஞாணந்தி ஆஹ ‘‘பா³லப³லம் நாம அஞ்ஞாணப³ல’’ந்தி. தம் யஸ்ஸ ப³லந்தி தம் அஞ்ஞாணப³லம் யஸ்ஸ புக்³க³லஸ்ஸ ப³லம், அப³லமேவ தம் பஞ்ஞாப³லேன வித்³த⁴ம்ஸேதப்³ப³தோ. படிவத்தா ந விஜ்ஜதீதி த⁴ம்மட்ட²ம் படிப்ப²ரித்வா அபி⁴ப⁴வித்வா பவத்தா நத்தி². படிவசனமத்தம் பன கோசி வதே³ய்யாபி, தம் அகாரணந்தி த³ஸ்ஸேந்தோ ‘‘படிப்ப²ரித்வா வா’’திஆதி³மாஹ. பா³லப³லந்தி ‘‘படிப்ப²ரித்வா’’தி வசனஸ்ஸ காரணவசனம். தஸ்ஸேவ புக்³க³லஸ்ஸ படிகுஜ்ஜ²னகஸ்ஸ. நானத்தாவிதக்கனதோ உபி⁴ன்னம் அத்த²ம். திகிச்ச²ந்தந்தி அனத்த²படிபா³ஹனமுகே²ன பண்டி³தகிச்சகரணேன படிஸேதே⁴ந்தம். ‘‘பா³லோ அய’’ந்தி ஏவம் பஞ்ஞபேதும் ஹேதுப²லானம் அனவபோ³த⁴தோ சதுஸச்சத⁴ம்மே அசே²காதி.

வேபசித்திஸுத்தவண்ணனா நிட்டி²தா.

5. ஸுபா⁴ஸிதஜயஸுத்தவண்ணனா

251. ‘‘சே²கதாயா’’தி வத்வா தஸ்ஸ வத்தும் சே²கபா⁴வம் த³ஸ்ஸேதும் ‘‘ஏவம் கிரஸ்ஸா’’திஆதி³மாஹ. கா³ஹந்தி லத்³தி⁴ம். மோசேத்வாதி யஸ்ஸ புன ‘‘சோரோ’’தி உத்தரி வத்தும் ந ஸக்கோதி, ஏவம் விமோசேத்வாதி பட²மம் வத்தும் ந ஸக்கா. க³ரூதி பா⁴ரியம், து³க்கரந்தி அத்தோ². பச்சா²தி ‘‘பரஸ்ஸா’’தி வுத்தோ ஸோ கிஞ்சி பட²மம் வத³ந்தோ அத்தனோ அதி⁴ப்பாயம் பவேதே³தி நாம, தம் யதா²ஸத்தி விதி³தமனோ தஸ்ஸ உத்தரி வத்தும் ஸக்கோதி. தேனாஹ ‘‘பரஸ்ஸ வசனம் அனுக³ந்த்வா பன பச்சா² ஸுக²ம் வத்து’’ந்தி. அபி ச அஸுரிந்தே³ன ‘‘ஹோது, தே³வானமிந்த³, ஸுபா⁴ஸிதேன ஜயோ’’தி பட²மம் வுத்தம், விஸேஸோ ச புப்³ப³ம் உபனேந்தம் அனுவத்ததி. வசஸி குஸலோ ஸக்கோ தே³வராஜா தம் விஸேஸம் தேனேவ புப்³ப³ம் உபனயாபேந்தோ உபலாபனவஸேன ‘‘தும்ஹே க்²வேத்தா²’’திஆதி³மாஹ. புப்³ப³தே³வாதி ஸக்கபமுகா²ய தே³வபரிஸாய லோகே புப்³பே³வ உப்பன்னத்தா ‘‘புப்³ப³தே³வா’’தி பஸம்ஸவசனம். வேபசித்திம் ஸந்தா⁴ய ‘‘தும்ஹே’’தி ‘‘புப்³ப³தே³வா’’தி ச வுத்தத்தா ‘‘தும்ஹாகம் தாவ பவேணிஆக³தம் ப⁴ணதா²’’தி வுத்தம். கா³ரவட்டா²னியத்தா வேபசித்தினோ ப³ஹுவசனபயோகோ³. த³ண்டே³ன அவசாரோ அவசரணம் த³ண்டா³வசரோ, நத்தி² ஏத்த² வுத்தோ த³ண்டா³வசரோதி அத³ண்டா³வசரா, ஸக்கேன வுத்தா கா³தா²யோ.

ஸுபா⁴ஸிதஜயஸுத்தவண்ணனா நிட்டி²தா.

6. குலாவகஸுத்தவண்ணனா

252. ரத²ஸத்³தோ³தி ரதா²லங்காரபூ⁴தானம் கிங்கிணிகஜாலாதீ³னம் ஸத்³தோ³. ததா² த⁴ஜஸத்³தோ³. ஆஜானீயஸத்³தோ³தி ஆஜானீயானம் ஹஸிதஸத்³தோ³ ச. கருணாஸமாவஜ்ஜிதஹத³யோதி பாணானம் அனுபரோதே⁴ன பணாமிதசித்தோ. ஈஸாமுகே²னாதி ரத²கப்பரமுகே²ன. புஞ்ஞபச்சயனிப்³ப³த்தோதி உளாரம் ஸுவிபுலம் புஞ்ஞம் பச்சயம் கத்வா நிப்³ப³த்தோ. ந ஸஜ்ஜதி கத்த²சி அப்படிக⁴ட்டனேன க³ச்ச²ந்தோ. ஸிம்ப³லிவனேனாதி ஸிம்ப³லிவனமஜ்ஜே²ன. விப⁴க்³க³ம் நிம்மதி²தந்தி இதோ சிதோ விப⁴க்³க³ஞ்சேவ நிரவஸேஸதோ மதி²தஞ்ச ஹோதி.

குலாவகஸுத்தவண்ணனா நிட்டி²தா.

7. நது³ப்³பி⁴யஸுத்தவண்ணனா

253. ஸுபச்சத்தி²கோதி ஸுட்டு² அதிவிய பச்சத்தி²கோ படிஸத்து. க³ஹிதோஸீதி தே³வபாஸேன ப³ந்தி⁴த்வா க³ஹிதோ அஸி. ப³த்³தோ⁴வ அஹோஸி ஸக்கஸ்ஸ புஞ்ஞானுபா⁴வேன. சேதியராஜா கிர இமஸ்மிம் கப்பே ததோ புப்³பே³ கேனசி அவுத்தபுப்³ப³ம் க²ரமுஸாவாத³ம் அபா⁴ஸி, தாவதே³வ விரஜ்ஜி²த்வா மஹாபத²வியா விவரே தி³னே நிபதித்வா அவீசிஅக்³கி³ஜாலானமிந்த³னமஹோஸி. தம் ஸந்தா⁴ய வுத்தம் ‘‘சேதியரஞ்ஞோ பாபம் ஸந்தா⁴யா’’தி. மஹாபாபானீதி மஹந்தானி க³ருதரானி பாபானி. ததா² ஹி வேபசித்தினோ ஸபத²கரணே நித³ஸ்ஸனபா⁴வேன ஏதானி அட்ட²கதா²யம் ஆக³தானீதி.

நது³ப்³பி⁴யஸுத்தவண்ணனா நிட்டி²தா.

8. வேரோசனஅஸுரிந்த³ஸுத்தவண்ணனா

254. த்³வாரபாலரூபகானி வியாதி த்³வாரபாலாகாரேன கதபடிமாயோ விய. வாயமேதே²வ, ந அந்தரா ஸம்கோசம் ஆபஜ்ஜேய்யாதி அதி⁴ப்பாயோ. நிப்ப²ன்னஸோப⁴னேஸூதி நிப்ப²ன்னபா⁴வேன ஸுந்த³ரேஸு. ஸப்³பே³ ஹி அனிப்ப²ன்னா அத்தா² ந ஸோப⁴ந்தி. கிச்சஜாதாதி விப்பகதபா⁴வேன ஸஞ்ஜாதகிச்சா. அகிச்சஜாதோதி அஸஞ்ஜாதகிச்சோ கிச்சரஹிதோ நாம நத்தி² க³மனட்டி²தஸயனனிஸஜ்ஜாதி³வஸேன உப்பஜ்ஜனகது³க்க²வினோத³னபா⁴வதோ. ஸம்யோக³பரமாத்வேவ ஸம்போ⁴கா³தி இமேஸம் ஸத்தானம் ஸம்பு⁴ஞ்ஜிதப்³ப³வத்தூ²னி நாம பகதியா விரோத⁴ஸீலானிபி அஸம்யோகே³ன வா அஸுந்த³ரானிபி, தானி அபி⁴ஸங்க²ரணபசனஸம்யோஜனபரமானி வேதி³தப்³பா³னி ததா² ஸதி ஸம்போ⁴கா³ரஹபா⁴வூபக³மனதோ. தேனாஹ ‘‘பாரிவாஸிகஓத³னாதீ³னீ’’திஆதி³. உண்ஹாபேத்வா பரிபு⁴ஞ்ஜிதப்³ப³யுத்தே பரிப⁴ஜ்ஜித்வாதி அதி⁴ப்பாயோ.

வேரோசனஅஸுரிந்த³ஸுத்தவண்ணனா நிட்டி²தா.

9. அரஞ்ஞாயதனஇஸிஸுத்தவண்ணனா

255. ஜாமாதிகா வுச்சதி தீ⁴துபதி, ஸஸுரோ ப⁴ரியாய பிதா, தஸ்மா இமே அந்தரவத்தினோ த்³வே ஜனா ஸக்கவேபசித்தினோ ஸுஜாய வஸேன ஜாமாதிகஸஸுரா. ‘‘சிரதி³க்கி²தான’’ந்தி தி³க்கி²த்வா பப்³ப³ஜித்வா சிரகாலானம் வதஸமாதா³னவஸேன இதோ பா³ஹிரகானம் பப்³ப³ஜிதானந்தி ஆஹ ‘‘சிரஸமாதி³ன்னவதான’’ந்தி. இதோ படிக்கமாதி இதோ யதா²டி²தட்டா²னதோ அபேஹி அபக்கம. ந படிக்கூலஸஞ்ஞினோ கு³ணே கா³ரவயோக³தோ. தே³வா ஹி யேபு⁴ய்யேன ‘‘மயம் புப்³பே³ கு³ணவந்தே பயிருபாஸித்வா தேஸம் ஓவாதே³ ட²த்வா புஞ்ஞானி உபசினித்வா இதூ⁴பபன்னா’’தி கு³ணவந்தேஸு ஆத³ரபா⁴வம் உபட்ட²பேந்தி.

அரஞ்ஞாயதனஇஸிஸுத்தவண்ணனா நிட்டி²தா.

10. ஸமுத்³த³கஸுத்தவண்ணனா

256. சக்கவாளமஹாஸமுத்³த³பிட்டி²யந்தி சக்கவாளபப்³ப³தபாத³ஸமந்தா மஹாஸமுத்³த³தீரபிட்டி²யம். யதே²வ ஸினேருஸமீபே மஹாஸமுத்³தோ³ அனுபுப்³ப³னின்னோ அனுபுப்³ப³போணோ அனுபுப்³ப³பப்³பா⁴ரோ, ஏவம் யேபு⁴ய்யேன சக்கவாளபாத³ஸமீபேபி. தேனாஹ ‘‘ரஜதபட்டவண்ணே வாலுகபுலினே’’தி. வுத்தப்பகாராஸூதி அனந்தரஸுத்தே வுத்தப்பகாராஸு. அஸ்ஸமபதே³னாதி அஸ்ஸமபத³வேமஜ்ஜே²ன. ஏவம் சிந்தயிம்ஸூதி ‘‘யம் நூன மய’’ந்திஆதி³னா யதா² பாளியம் ஆக³தம், ஏவம் மந்தயிம்ஸு.

இச்சி²தகரோதி யதி³ச்சி²தகரணம். து³ட்டா²னந்தி து³ராஸயானம். தே பன து³ட்ட²ஜ்ஜா²ஸயா விருத்³தா⁴ ஹோந்தீதி ஆஹ ‘‘து³ட்டா²னம் விருத்³தா⁴ன’’ந்தி. பவுத்தந்தி பீ³ஜம் ஸந்தா⁴ய வபிதம். தேனாஹ ‘‘கே²த்தே பதிட்டா²பித’’ந்தி.

ஸாயமாஸப⁴த்தந்தி ஸாயம் அஸிதப்³ப³போ⁴ஜனம். யதா²வாரம் ப⁴க்கி²தமேதம் தே³வானம் விய ஸுகு²மம் கு³ருவாஸஞ்ச ந ஹோதீதி ‘‘ப⁴த்த’’ந்தி வுத்தம். கே³லஞ்ஞஜாதந்தி ஸஞ்ஜாதகே³லஞ்ஞம். வேபதீதி கம்பதி பவேத⁴தி.

ஸமுத்³த³கஸுத்தவண்ணனா நிட்டி²தா.

பட²மவக்³க³வண்ணனா நிட்டி²தா.

2. து³தியவக்³கோ³

1. வதபத³ஸுத்தவண்ணனா

257. ஸமாதா³தப்³ப³தோ வதானி, அஞ்ஞமஞ்ஞம் அஸங்கரஸபா⁴வேன பப்³ப³ஜிதப்³ப³தோ பதா³னி, ததோ ஏவ அஸம்கிண்ணபா⁴கா³தி கத்வா ‘‘வதகோட்டா²ஸானீ’’தி வுத்தம். ஸமத்தானீதி புஞ்ஞவிஸேஸதாய புஜ்ஜப⁴வப²லனிப்³ப³த்தனேன கித்திஸஞ்ஞானேன ச ஸமம் அத்தானி ஸமத்தானி. பரிபுண்ணானீதி அக²ண்டா³தி³பா⁴வேன ஸப்³ப³ஸோ புண்ணானி. ஸமாதி³ன்னானீதி தத்த² ஸக்கச்சகாரிதாய ஸம்மா ஆதி³ன்னானி. மாதுலானீதி பிதுப⁴கி³னீ, ந யா காசி மாதுலஸ்ஸ ப⁴ரியா குலஜேட்ட²கானம் அதி⁴ப்பேதத்தா, ப⁴ரியாபி வா மாதுலஸம்ப³ந்த⁴தோ க³ஹேதப்³பா³, ததா² ஸதி மஹாபிதுப⁴ரியாதீ³னம்பி ஸங்க³ஹோ த³ட்ட²ப்³போ³.

ஆதி³-ஸத்³தே³ன ஜேட்ட²ப⁴கி³னீனம் ஸங்க³ஹோ. அபசிதிகாரகோதி தேஸம் பச்சுட்டா²னகரோ. யோ கோசி த³த³ந்தோபி ஸாபேக்கோ² தே³தி, ஸோ முத்தசாகோ³ ந ஹோதி, அயம் பன ந ஏவந்தி ‘‘முத்தசாகோ³ ஹோதீ’’தி வுத்தம். விஸ்ஸட்ட²சாகோ³தி நிரபேக்க²பரிச்சாகோ³தி அத்தோ². யதா² பாணாதிபாதப³ஹுலோ ‘‘லோஹிதபாணீ’’தி வுச்சதி, ததா² தா³னப³ஹுலோ ‘‘பயதபாணீ’’தி வுத்தோதி ஆஹ ‘‘தே³ய்யத⁴ம்மதா³னத்தா²ய ஸதா³ தோ⁴தஹத்தோ²’’தி. வோஸ்ஸக்³க³ரதோதி தே³ய்யத⁴ம்மஸ்ஸ பரிச்சஜனே அபி⁴ரதோ. பரேஹி யாசிதப்³பா³ரஹோதி பரேஹி யாசிதும் யுத்தோ இச்சி²தஸ்ஸ அத்த²ஸ்ஸ தாவதே³வ விஸ்ஸஜ்ஜனதோ. தா³னேனேவ யுத்தோதி ஸப்³ப³காலம் தா³னேனேவ யுத்தோ அபி⁴ண்ஹம் பவத்தமஹாதா³னத்தா. தா³னே ச ஸம்விபா⁴கே³ சாதி பரஸ்ஸ ஸம்புண்ணம் கத்வா பரிச்சஜனஸங்கா²தே தா³னே ச அத்தனா பரிபு⁴ஞ்ஜிதப்³ப³தோ ஸம்விப⁴ஜனஸங்கா²தே ஸம்விபா⁴கே³ ச ரதோ அபி⁴ரதோ.

வதபத³ஸுத்தவண்ணனா நிட்டி²தா.

2. ஸக்கனாமஸுத்தவண்ணனா

258. மனுஸ்ஸபூ⁴தோதி மனுஸ்ஸேஸு பூ⁴தோ, மனுஸ்ஸத்தம் வா பத்தோ. ஆவஸத²ந்தி நிவாஸட்டா²னம் காரேத்வா அதா³ஸி, தஸ்மா வாஸம் அதா³ஸீதி வாஸவோ. அத்த²-ஸத்³தோ³ இத⁴ காரணபரியாயோதி ஆஹ ‘‘ஸஹஸ்ஸம்பி காரணான’’ந்தி. ஸ்வாயமத்தோ² ஹேட்டா² விபா⁴விதோவ. வினிச்சி²னதி, தஸ்மா ஸஹஸ்ஸம் பஞ்ஞாஅக்கீ²னி ஏதஸ்ஸாதி ஸஹஸ்ஸக்கோ². மக⁴ம் வுச்சதி த⁴னம், தம் பன ஸத்³தா⁴ஸங்கா²தம் மக⁴ம் அஸ்ஸ அத்தீ²தி மக⁴வா. புரே தா³னம் த³தா³தீதி புரிந்த³தோ³ அனுனாஸிகலோபம் அகத்வா. புஞ்ஞானி காதும் ஸக்கோதீதி ஸக்கோ.

ஸக்கனாமஸுத்தவண்ணனா நிட்டி²தா.

3. மஹாலிஸுத்தவண்ணனா

259. ஸோதி ஸக்கோ தே³வராஜா. ப³ஹுவசனே வத்தப்³பே³ ஏகவசனம் வுத்தம். வுச்சதீதி வசனம், அத்தோ². தஸ்மா ப³ஹுவசனேதி ப³ஹும்ஹி அத்தே²தி அத்தோ². யதா² படிபஜ்ஜந்தோ அனுக்கமேன தே த⁴ம்மே ஸமாதி³யித்வா ஸக்கோ ஸக்கத்தம் அஜ்ஜ²கா³, தம் படிபத்திம் த³ஸ்ஸேதும் ‘‘ஸக்கோ கிரா’’திஆதி³ வுத்தம். அனந்தரேதி ஸக்கபா⁴வஸ்ஸ அதீதானந்தரே அத்தபா⁴வே. தம் ஸப்³ப³ந்தி ஸக்கஸ்ஸ மக⁴மாணவகாலே ஸம்மாபடிபத்திம், தாய ஸக்கபா⁴வூபக³மனஞ்சாதி தம் ஸப்³ப³ம். வுத்தோ, தஸ்மா தத்த² வுத்தனயேனேவ வேதி³தப்³போ³தி அதி⁴ப்பாயோ.

மஹாலிஸுத்தவண்ணனா நிட்டி²தா.

4. த³லித்³த³ஸுத்தவண்ணனா

260. மனுஸ்ஸத³லித்³தோ³தி மனுஸ்ஸேஸு து³க்³க³தோ. மனுஸ்ஸகாருஞ்ஞதந்தி மனுஸ்ஸேஸு பரமனிஹீனதம். மனுஸ்ஸகபணோதி மனுஸ்ஸேஸு வா பரமனிஹீனோ. தஸ்மிம் டா²னேதி தஸ்ஸ தே³வபுத்தஸ்ஸ தஸ்மிம் உப்பஜ்ஜனட்டா²னே. லாமகதோ சிந்தேந்தீதி தஸ்ஸ புரிமவத்து²ம் நிஸ்ஸாய ஹீனதோ சிந்தேந்தி. கதே²ந்தீதி தமேவ பரேஸம் கதே²ந்தி. வித்தா²ரேந்தீதி வுத்தமத்த²ம் வித்தா²ரிகம் கரோந்தி. ஸப்³ப³தா³ பரிச்சி²ஜ்ஜ பரிவாரஸம்பன்னோ ஹுத்வா அட்³ட⁴ட்ட²ரதனே ஹத்தி²க்க²ந்தே⁴ மஹச்சராஜானுபா⁴வேன நிஸின்னத்தா ஜனகாயேன ஸமுல்லோகியமானோ. அவலம்ப³ந்தீதி ஓலம்ப³ந்தி. வந்த³னமத்தம் வா நாஹோஸி, அஞ்ஞத³த்து² பச்சேகபு³த்³த⁴தோ அத்தனோ ஸமானாத³ரகிரியம் பச்சாஸீஸதி. தேன வுத்தம் ‘‘ஸோ’’திஆதி³. க்வாயந்தி கோ அயந்தி ப்³யாபன்னவஸேன வத³தி. காளரத்தேஹி ஸுத்தேஹி ஸிப்³பி³தத்தா வண்ணவிகாரம் தி³ஸ்வா ‘‘குட்டி²சீவரானி பாருதோ’’தி ஆஹ. மஹானிரயே நிப்³ப³த்தித்வா மஹாது³க்க²ம் பச்சனுபோ⁴தி. தத³னுரூபபாபகம்மஸ்ஸ விபாகாவஸேஸேன லத்³தோ⁴காஸேன ராஜக³ஹே…பே… படிஸந்தி⁴ம் க³ண்ஹி. காமஞ்ச ஏத்த² படிஸந்தி⁴க்³க³ஹணம் குஸலகம்மேனேவ, தஸ்ஸ பன அகுஸலகம்மஸ்ஸ விபாகினோ ப³லவபா⁴வதோ வுத்தம் ‘‘விபாகாவஸேஸேனா’’தி. தேனாஹ ‘‘க³ஹிதகாலதோ…பே… நிக்க²ந்தோ’’தி. பி⁴க்கா²ய சரிதும் ஸமத்த²காலதோ பட்டா²ய ரோக³ஸ்ஸ ப³லவதாய மம்ஸானி…பே… பதந்தி. ஞாணம் பேஸேத்வாதி விபஸ்ஸனாபடிபாடியா பா⁴வனாஞாணம் நிப்³பா³னம் படிபேஸேத்வா பவத்தேத்வா. இந்த்³ரியானம் பரிபக்கத்தா ஸத்து² தே³ஸனாவிலாஸேன ஸோதாபத்திப²லே பதிட்டி²தோ. சும்ப³டந்தி பாத³சும்ப³டம். குட்டி²னோ ஹி ஸகலபாத³தலம் மா ருஜீதி சும்ப³டம் கத்வா தம் பாத³தலே ப³ந்தி⁴த்வா க³ச்ச²ந்தி, மத்திகபாதிம் பி⁴ந்தி³த்வா விய ததா² நிஹீனமனுஸ்ஸத்தபா⁴வதோ சவித்வா ஸுவண்ணபாதிம் படிலப⁴ந்தோ விய தே³வத்தபா⁴வம் க³ண்ஹந்தோ சுதிசித்ததோ து³தியசித்தவாரே ஆதா³னசித்தக்க²ணே தே³வலோகே நிப்³ப³த்தோ.

மக்³கே³னாக³தாதி மக்³கா³தி⁴க³மனேன ஆக³தா உப்பன்னா. அரியகந்தஸீலந்தி அரியானம் கந்தம் மனாபம் மனோரமம் ஸீலத⁴ம்மம். அரியானம் அதி⁴சித்தஅதி⁴பஞ்ஞாஸிக்கா² விய அதி⁴ஸீலஸிக்கா²பி ஸப்³பா³ அதிவிய கந்தா ஏவாதி ஆஹ ‘‘கிஞ்சாபீ’’திஆதி³. இமஸ்மிம் பனத்தே²தி இமஸ்மிம் ஸோதாபன்னஸ்ஸ ப⁴வஸங்கா²தே அத்தே² நித்³தா⁴ரேத்வா வுச்சமானே. பஞ்சஸீலம்பி யஸ்மா தி³ட்டி² விய ப⁴வந்தரேபி அப்பஹீனம்.

த³லித்³த³ஸுத்தவண்ணனா நிட்டி²தா.

5. ராமணேய்யகஸுத்தவண்ணனா

261. ஆரமந்தி ஏத்த² ஸத்தாதி ஆராமா, மனோரமா உபவனாத³யோ. தே ஏவ சேதேந்தி ஏத்த² ஸத்³தா⁴ய அத்தனோ பீதிஸோமனஸ்ஸம் ஸந்த⁴ஹந்தீதி சேதியாதி ச வுச்சந்தி. மனுஸ்ஸரமணீயபா⁴வஸ்ஸாதி மனுஸ்ஸானம் ஆரமணீயபா⁴வஸ்ஸ. தஸ்ஸ பன ஸீலாதி³கு³ணவஸேன அசிந்தேய்யாபரிமேய்யானுபா⁴வதாபி ஹோதீதி ப⁴க³வா ‘‘நாக்³க⁴ந்தி ஸோளஸி’’ந்தி அவோச. அசேதனாய பூ⁴மியா ரமணீயதா நாம கு³ணவிஸிட்டா²னம் அரியானம் ஸேவனவஸேன வேதி³தப்³பா³தி வுத்தம் ‘‘இதா³னி…பே… கா³மே வாதிஆதி³மாஹா’’தி.

ராமணேய்யகஸுத்தவண்ணனா நிட்டி²தா.

6. யஜமானஸுத்தவண்ணனா

262. யஜந்தானந்தி த³க்கி²ணேய்யம் உத்³தி³ஸ்ஸ தே³ந்தானம். அட்டு²ப்பத்திகோ ஸுத்தனிக்கே²போதி த³ஸ்ஸேத்வா அத்த²வண்ணனம் காதும் ‘‘ததா³ கிரா’’திஆதி³ வுத்தம். அக்³க³ந்தி ஸேட்ட²ம். தேஹி தேஹி வா யதா²லத்³த⁴ஸப்பிஆத³யோ மா நஸ்ஸந்து, அக்³க³பா⁴வேன க³ஹிதானி ஸப்பிஆதீ³னி கேவலம் அக்³கி³ம்ஹி ஜா²பனேன, தே³வா மனுஸ்ஸா மிச்சா²கா³ஹேன மா நஸ்ஸந்து. தக்கேனாதி தக்கமத்தேன. ‘‘கதே²மா’’தி அம்ஹே மஞ்ஞத², இதா³னி பஸ்ஸத², பச்சக்க²தோ அயம் வோ…பே… ஆக³ச்ச²தீதி ஆஹம்ஸூதி யோஜனா.

உபதி⁴விபாகந்தி உபதீ⁴ஸு வா விபச்சதி, உபத⁴யோ வா விபாகா ஏதஸ்ஸாதி உபதி⁴விபாகம். விப்பா²ரவந்தம் ஹோதி விபுலபக்க²தாய. பி⁴க்கு²ஸங்க⁴ஸ்ஸ அத³ம்ஸு ‘‘ஸம்மாஸம்பு³த்³தே⁴ன மஹாப்³ரஹ்முனா ச ஏவம் ஓவாதோ³ தி³ன்னோ’’தி.

யஜமானஸுத்தவண்ணனா நிட்டி²தா.

7. பு³த்³த⁴வந்த³னாஸுத்தவண்ணனா

263. உட்ட²ஹாதி உட்டா²னம் காயிகவீரியம் கரோஹி. தேனாஹ ‘‘விசர, லோகே’’தி. சேதஸிகவீரியம் பன ப⁴க³வதா மத்த²கம் பாபிதமேவ. தேனாஹ ‘‘விஜிதஸங்கா³மா’’தி. த்³வாத³ஸயோஜனிகஸ்ஸ உச்சபா⁴வேன. வித்தா²ரதோ பன ஆயாமதோ ச அனேகயோஜனஸதஸஹஸ்ஸபரிமாணசக்கவாளம் அதிப்³யாபேத்வா டி²தஸ்ஸ. பன்னபா⁴ராதி பாதிதபா⁴ர. நிக்கே²பிதப்³ப³தோ பா⁴ராதி ஆஹ ‘‘ஓரோபிதக²ந்தா⁴’’திஆதி³. தே ஹி தம்ஸமங்கி³னோ புக்³க³லஸ்ஸ ஸம்பாதனட்டே²ன பா⁴ரா நாம. வுத்தஞ்ஹேதம் ‘‘பா⁴ரா ஹவே பஞ்சக்க²ந்தா⁴’’தி (ஸம். நி. 3.22). ததே³கதே³ஸா ச கிலேஸாபி⁴ஸங்கா²ரா. பன்னரஸாய புண்ணமாய ரத்திந்தி யதா² பன்னரஸபுண்ணமாய ரத்தியம் பரிபுண்ணகாலே உபக்கிலேஸவிமுத்தோ சந்தோ³ ஸோப⁴தி, ஏவம் தவ சித்தம் ஸப்³ப³ஸோ உபக்கிலேஸவிமுத்தம் ஸோப⁴தீதி அதி⁴ப்பாயோ.

பு³த்³த⁴வந்த³னாஸுத்தவண்ணனா நிட்டி²தா.

8. க³ஹட்ட²வந்த³னாஸுத்தவண்ணனா

264. புது²த்³தி³ஸாதி ப³ஹுதி³ஸா. கா பன தாதி ஆஹ ‘‘சதஸ்ஸோ தி³ஸா சதஸ்ஸோ அனுதி³ஸா சா’’தி. அனுதி³ஸாக³ஹணேன சேத்த² உத்³த⁴ம் அதோ⁴பி க³ய்ஹதீதி ச த³ஸ்ஸேதி. பூ⁴மிவாஸினோதி பூ⁴மிபடிப³த்³த⁴வுத்தினோ. ஏதேன ருக்க²பப்³ப³தனிவாஸினோபி க³ஹிதா ஹோந்தி. சிரரத்தஸமாஹிதசித்தேதி உபசாரப்பனாஜா²னானி உப்பாதே³த்வா அபரிஹீனஜ்ஜா²னதாய சிரகாலம் ஸமாஹிதசித்தே. ஆபாணகோடிகந்தி ஜீவிதபரியந்தம் யாவஜீவம். ஏவமாதீ³தி ஆதி³-ஸத்³தே³ன அவஸேஸபுஞ்ஞகிரியவத்தூ²னி ஸங்க³ண்ஹாதி. நிச்சஸீலவஸேன பஞ்சஹி, நியமஸீலவஸேன த³ஸஹி. பி-ஸத்³தே³ன ததோ கதிபயேஹி உபோஸத²ஸீலவஸேன அட்ட²ஹிபீதி த³ஸ்ஸேதி. த⁴ம்மிகேஹீதி த⁴ம்மதோ அனபேதேஹி. பமுகோ²தி பமோக்கோ².

க³ஹட்ட²வந்த³னாஸுத்தவண்ணனா நிட்டி²தா.

9. ஸத்தா²ரவந்த³னாஸுத்தவண்ணனா

265. ப்³ரஹ்மஜாணுகோதி த³க்கி²ணஜாணுமண்ட³லம் பத²வியம் ட²பேத்வா வந்த³மானோ ப்³ரஹ்மஜாணுகோ நாம ததா²பூ⁴தோ ஹுத்வா. யஜிதப்³ப³தோ யக்கோ², பூஜனீயோ. ஏவம் பூஜாவிஸேஸயோக³தோ ஸக்கோதி ஆஹ ‘‘ஸோ யக்கோ²தி ஸோ ஸக்கோ’’தி. ஸக்கஸ்ஸ நமக்காரபா⁴ஜனபூ⁴தஞ்ஹி புச்ச²ந்தோ மாதலி ‘‘கோ நாம ஸோ யக்கோ²’’தி ஆஹ. கு³ணனேமித்தகேஹீதி கு³ணஹேதுகேஹி அனந்தானி ஹி பு³த்³தா⁴னம் நாமானி, தானி ச கோ² ஸப்³பா³னிபி கு³ணனேமித்தகானேவ. அனந்தகு³ணத்தா. வுத்தஞ்ஹேதம் –

‘‘அஸங்க்²யேய்யானி நாமானி, ஸகு³ணேன மஹேஸினோ;

கு³ணேன நாமமுத்³தே⁴ய்யம், அபி நாமஸஹஸ்ஸதோ’’தி. –

தஸ்மா அனோமனாமந்தி பரிபுண்ணகு³ணனாமந்தி அத்தோ². ஸமதிக்கமேனாதி ஸம்மா ஸமுச்சி²ந்த³னவஸேன அதிக்கமனேன. கிலேஸாரீனம் அபேதசயோதி அபசயோ, ஸோ ஆரமிதப்³ப³ட்டே²ன ஆராமோ ஏதேஸந்தி அபசயாராமா. தேனாஹ ‘‘வட்டவித்³த⁴ம்ஸனே ரதா’’தி.

ஸத்தா²ரவந்த³னாஸுத்தவண்ணனா நிட்டி²தா.

10. ஸங்க⁴வந்த³னாஸுத்தவண்ணனா

266. பூதிம்ஹி தே³ஹே மாது ஸரீரே ஸயனதோ, அத்தனோ ஏவ வா பூதிதே³ஹம் ஸரீரம் தஸ்மிம் டி²ததாய அவத்த²ரித்வா ஸயனதோ பூதிதே³ஹஸயாதி யோஜனா. குணபம்ஹேதேதி ஏதே மனுஸ்ஸா அஸுசிது³க்³க³ந்த⁴ஜேகு³ச்ச²படிக்கூலே மாதுகுச்சி²ஸங்கா²தே குணபஸ்மிம் த³ஸ மாஸே நிமுக்³கா³. தேஸம் கின்னாம த்வம் பிஹயஸீதி யோஜனா. ஏதேஸம் ஏதம் விஹயாமீதி ஏதேஸம் இஸீனம் ஏதம் ஸம்மாபடிபத்திம் விஹயாமி. இதா³னி தம் படிபத்திம் த³ஸ்ஸேதும் ‘‘ந தே ஸம் கோட்டே² ஓபேந்தீ’’தி வுத்தம். த⁴ஞ்ஞம் கோட்டே² ந பக்கி²பந்தி பக்கி²பிதப்³ப³ஸ்ஸ ச அபா⁴வதோ. தேனாஹ ‘‘ந ஹி ஏதேஸம் த⁴ஞ்ஞ’’ந்தி. பரேஸம் நிட்டி²தந்தி பரேஸம் க³ஹிதம் ஸந்தகம் தேஸம் பாகாய நிட்டி²தம். பி⁴க்கா²சாரவத்தேனாதி பிண்டா³சரியாய. ஏஸமானா பரியேஸந்தா. ஏவம் பரியிட்டே²ன. யாபேந்தி, ந ஏஸந்தி அனேஸனம். ஸுஸமாதி³ன்னஸுந்த³ரவதாதி ஸுட்டு² ஸமாதி³ன்னஸோப⁴னவதா.

ஏவம் ஸுபா⁴ஸிதபா⁴ஸினோதி க³ந்த²து⁴ரவிபஸ்ஸனாது⁴ரானம் வஸேன கு³ணபரிமாணஸுபா⁴ஸிதஸ்ஸேவ பா⁴ஸனஸீலா. அரியேன துண்ஹீபூ⁴தேன துண்ஹீபூ⁴தா. ததோ ஏவ மனஸ்ஸ ஸாதிஸயம் ஸமஞ்சரா. க³ஹிதத³ண்டே³ஸு பராமாஸாதி³பயுத்தேஸு த³ண்டா³தா³னாதி³ஹேது உப்பஜ்ஜனககிலேஸபரிளாஹாபா⁴வதோ நிப்³பு³தா. தேனாஹ ‘‘விஸ்ஸட்ட²த³ண்டா³’’தி. ஸாதா³னேஸூதி ஸப⁴வாதா³னேஸு. அனாதா³னாதி தப்³பி³ரஹிதா. தேனாஹ ‘‘ப⁴வயோனீ’’திஆதி³.

ஸங்க⁴வந்த³னாஸுத்தவண்ணனா நிட்டி²தா.

து³தியவக்³க³வண்ணனா நிட்டி²தா.

3. ததியவக்³கோ³

1. சே²த்வாஸுத்தவண்ணனா

267. வுத்தத்த²மேவ ஹேட்டா² தே³வபுத்தஸம்யுத்தவண்ணனாயம்.

சே²த்வாஸுத்தவண்ணனா நிட்டி²தா.

3. து³ப்³ப³ண்ணியஸுத்தவண்ணனா

268. து³ப்³ப³ண்ணோ து³த்³த³ஸிகோ விரூபவண்ணோ. ஓகோடிமகோதி ரஸ்ஸபா⁴வேன அவரகோடிமகோ. ஸக்கேன க³ஹிதனாமமேவேதம், ந பன ஸோ ததா²ரூபோ கோசி யக்கோ². தேனாஹ ‘‘ஏகோ ரூபாவசரப்³ரஹ்மா’’தி. யதி³ ஏவம் கஸ்மா ஸோ ததா²ரூபோ ஹுத்வா ஆக³தோதி ஆஹ ‘‘ஸக்கோ கிரா’’தி. கத²ம் பனேத்த² ஞாயதி ‘‘ஸோ ஏகோ ரூபாவசரப்³ரஹ்மா, ந பனேஸோ அவருத்³த⁴கயக்கோ²’’தி யுத்திம் த³ஸ்ஸேந்தோ ‘‘அவருத்³த⁴கயக்கா² பனா’’திஆதி³மாஹ. தே³வானம் வசனம் ஸுத்வா. ப²ருஸேனாதி ப²ருஸஸமாசாரேன. ‘‘கோ நாம மய்ஹம் ஆஸனே ஸன்னிஸின்னோ’’தி அக்க²ந்திம் அனுப்பாதே³ந்தோ க²ந்தியம் ட²த்வா. ப³லவசித்தீகாரந்தி க³ருதரம் ஸக்காரப³ஹுமானம். நீசவுத்தியாதி பரமனிபச்சகாரே ஸுவூபஸமனே ச த³ஸ்ஸியமானே. ஸக்கஸ்ஸ தாய ஏவ ஆசாரஸம்பத்தியா ஸக்காஸனே டா²தும், அத்தனோ ச ஆவிகாதும் அஸக்கோந்தோ அந்தரதா⁴யி. உபஹதசித்தோம்ஹீதி க²ந்திமேத்தானுத்³த³யாஸப்³பா⁴வதோ பரஸ்மிம் உபஹதசித்தோம்ஹீதி ஸக்கோ அத்தனோ ஸபா⁴வம் வத³தி. கோத⁴வஸே வத்தேதுந்தி கோதே⁴ன அத்தனோ வஸே நிப்³ப³த்தேதும் ந ஸுகரோம்ஹி, அத² கோ² கோத⁴ம் மய்ஹம் வஸே ந வத்தேமீதி அதி⁴ப்பாயோ. சிரம் ந குஜ்ஜா²மீதி யதி³ மே கதா³சி கோதோ⁴ உப்பஜ்ஜேய்ய, தம் கோத⁴ம் அனுவத்தேந்தோ சிரகாலம் ந குஜ்ஜா²மி. ந உபனய்ஹாமீதி அந்தோ ஸசே மே கோதோ⁴ உப்பஜ்ஜேய்ய, கி²ப்பமேவ ச நம் படிவினேய்யந்தி தம் மே புப்³பே³வ வதம் பரிபூரிதம்.

து³ப்³ப³ண்ணியஸுத்தவண்ணனா நிட்டி²தா.

3. ஸம்ப³ரிமாயாஸுத்தவண்ணனா

269. ஆபா³தி⁴கோதி ஆபா³தோ⁴ அஸ்ஸ அத்தீ²தி ஆபா³தி⁴கோ. வாசேஸீதி ஸிக்கா²பேஸி. ஸம்ப³ரோ நாம அஸுரமாயாய ஆதி³புரிஸோ புராதனோ அஸுரிந்தோ³. தம் ஸந்தா⁴யாஹ ‘‘யதா² ஸம்ப³ரோ’’திஆதி³. ஏவம் பச்சதி அஞ்ஞோபி மாயாவீ மாயம் பயோஜேத்வா. உபவாத³ந்தராயோ நாம க²மாபனே ஸதி விக³ச்ச²தி, பாகதிகமேவ ஹோதீதி ஆஹ ‘‘ஏவமஸ்ஸ பா²ஸு ப⁴வேய்யா’’தி. தேனாதி வேபசித்தினா ஸம்ப³ரவிஜ்ஜாய அதா³னேன வஞ்சிதத்தா. ததா² அகத்வாதி இஸீனம் ஸந்திகம் நேத்வா க²மாபனவஸேன காதப்³ப³ம் அகத்வா.

ஸம்ப³ரிமாயாஸுத்தவண்ணனா நிட்டி²தா.

4. அச்சயஸுத்தவண்ணனா

270. ஸம்பயோஜேஸுந்தி அஞ்ஞமஞ்ஞம் வாசஸிகம் ப²ருஸம் பயோஜேஸும். தேனாஹ ‘‘கலஹம் அகம்ஸூ’’தி, விவாத³ம் அகம்ஸூதி அத்தோ². அதிக்கம்மவசனந்தி வசீஸம்வரம் அதிக்கமித்வா வசனம். யஸ்மா அச்சயே தே³ஸியமானே தம் கீ²ணயதி அஞ்ஞமஞ்ஞஸ்ஸ க²மமானஸ்ஸ க²மனம் படிக்³க³ண்ஹதோ, தஸ்மா வுத்தம் ‘‘நப்படிக³ண்ஹாதீதி ந க²மதீ’’தி. தும்ஹாகம் வஸே வத்தது, விஸேவிதம் அகத்வா யதா²காமகரணீயோ ஹோது. மித்தத⁴ம்மோ இத⁴ உத்தரபத³லோபேன ‘‘மித்தோ’’தி வுத்தோதி ஆஹ ‘‘மித்தத⁴ம்மே’’தி. கரணவசனந்தி ‘‘மித்தேஹீ’’தி கரணவசனம் பு⁴ம்மத்தே². தேனாஹ ‘‘மித்தேஸூ’’தி. யதா² நிப்³ப³த்தஸபா⁴வஸ்ஸ பா⁴வதோ அஞ்ஞத²த்தம் ஜரா, ஏவம் மித்தபா⁴வதோ வுத்தவிபரியாயோ அமித்தத⁴ம்மோ ஜராபரியாயேன வுத்தோ. அகா³ரய்ஹம் அனவஜ்ஜம் ஸப்³ப³ஸோ பஹீனகிலேஸம். தேனாஹ ‘‘கீ²ணாஸவபுக்³க³ல’’ந்தி.

அச்சயஸுத்தவண்ணனா நிட்டி²தா.

5. அக்கோத⁴ஸுத்தவண்ணனா

271. கோதோ⁴ தும்ஹே மா அபி⁴ப⁴வீதி ஏத்த² கோதே⁴ன அனபி⁴ப⁴வனீயத்தம் க²ந்திமேத்தாகருணாதி³தப்படிபக்க²த⁴ம்மபரிப்³ரூஹனேன. ததா² ஹி தம்ஸமங்கி³னோ கோதோ⁴ அபி⁴பு⁴ய்யதீதி ஆஹ ‘‘தும்ஹேவ கோத⁴ம் அபி⁴ப⁴வத². குஜ்ஜ²ந்தானம் மா படிகுஜ்ஜி²த்தா²’’தி. படிபதா³தி ஏஸா படிபத்தி. மேத்தாதி அப்பனாப்பத்தா மேத்தா. தது³பசாரோ மேத்தாபுப்³ப³பா⁴கோ³. ந விஹிம்ஸதி கிஞ்சி ஏதாயாதி அவிஹிம்ஸா. கருணாதி அப்பனாப்பத்தகருணா வேதி³தப்³பா³. தது³பசாரோ கருணாபுப்³ப³பா⁴கோ³. லாமகஜனந்தி க²ந்திஆதீ³ஸு யோனிஸோமனஸிகாராபா⁴வேன கா³ரய்ஹஸமாசாரஸமாயோகே³ன ச நிஹீனம் ஜனம். பச்சயபரிஸுத்³தி⁴யா கோதோ⁴ அபி⁴மத்³த³மானோ புக்³க³லம் அபி⁴மத்³த³தி, தஸ்ஸ ஸோ படிஸங்கா²னபா⁴வனாப³லேஹி ஸம்மதே³வ பஹாதப்³போ³தி.

அக்கோத⁴ஸுத்தவண்ணனா நிட்டி²தா.

ததியவக்³க³வண்ணனா நிட்டி²தா.

ஸாரத்த²ப்பகாஸினியா ஸம்யுத்தனிகாய-அட்ட²கதா²ய

ஸக்கஸம்யுத்தவண்ணனாய லீனத்த²ப்பகாஸனா ஸமத்தா.

நிட்டி²தா ச ஸாரத்த²ப்பகாஸினியா

ஸம்யுத்தனிகாய-அட்ட²கதா²ய ஸகா³தா²வக்³க³வண்ணனா.

பட²மோ பா⁴கோ³ நிட்டி²தோ.