7. இஸ்ஸரியஸுத்தவண்ணனா

77. ஸத்த²ஸ்ஸ மலந்தி ஸத்த²மலம், யேன ஸத்த²ம் மலீனம் ஹோதி, ஸத்த²மலக்³க³ஹணேன சேத்த² மலீனம் ஸத்த²மேவ க³ஹிதந்தி ஆஹ ‘‘மலக்³க³ஹிதஸத்த²’’ந்தி. ஆணாபவத்தனந்தி அப்பகே வா மஹந்தே வா யத்த² கத்த²சி அத்தனோ ஆணாய பவத்தனவஸேன வஸனம் இஸ்ஸரியத்தமிச்ச²ந்தி. மணிரதனம்பி விஸ்ஸஜ்ஜனீயபக்கி²கத்தா உத்தமம் ப⁴ண்ட³ம் நாம ந ஹோதி, இத்தீ² பன பரிச்சத்தகுலாசாரித்தி²காயபி அனிஸ்ஸஜ்ஜனீயதாய உத்தமப⁴ண்ட³ம் நாம. தேனாஹ ‘‘இத்தீ² ப⁴ண்டா³னமுத்தம’’ந்தி. தேஸம் தேஸஞ்ஹி புரிஸாஜானீயானம் உப்பத்திட்டா²னதாய உத்தமரதனாகரத்தா இத்தீ² ப⁴ண்டா³னமுத்தமம். மலக்³க³ஹிதஸத்த²ஸதி³ஸோ அவபோ³த⁴கிச்சவிப³ந்த⁴னதோ. ஸத்த²மலம் விய ஸத்த²ஸ்ஸ பஞ்ஞாஸத்த²ஸ்ஸ கு³ணாபா⁴வகரணதோ பஞ்ஞாஸத்த²மலம். அப்³பு³ வுச்சதி உபத்³த³வம், தம் தே³தீதி அப்³பு³த³ம், வினாஸகாரணம். நனு ஹரணம் ஸமணஸ்ஸ அயுத்தந்தி? யுத்தம். தஸ்ஸ அன்வயதோ ப்³யதிரேகதோ ச யுத்ததம் த³ஸ்ஸேந்தோ ‘‘ஸலாகப⁴த்தாதீ³னீ’’திஆதி³மாஹ.

இஸ்ஸரியஸுத்தவண்ணனா நிட்டி²தா.