6. ஜராவக்³கோ³

1. ஜராஸுத்தவண்ணனா

51. ஹிதஸ்ஸ ஸாத⁴னதோ ஸாது⁴, யம் கிஞ்சி அத்த²ஜாதம். தம் பன அத்த²காமேன லபி⁴தப்³ப³தோ உபஸேவிதப்³ப³தோ லத்³த⁴கம், கல்யாணட்டே²ன ப⁴த்³த³கந்தி வுச்சதீதி ஆஹ ‘‘ஸாதூ⁴தி லத்³த⁴கம் ப⁴த்³த³க’’ந்தி. ‘‘ஸீலம் யாவ ஜரா ஸாதூ⁴’’தி வுத்தமத்த²ம் ப்³யதிரேகதோ விபா⁴வேதும் ‘‘இமினா இத³ம் த³ஸ்ஸேதீ’’தி வுத்தம். இத³ந்தி இத³ம் அத்த²ஜாதம்.

பதிட்டி²தாதி சித்தஸந்தானே லத்³த⁴பதிட்டா², கேனசி அஸம்ஹாரியா. தேனாஹ ‘‘மக்³கே³ன ஆக³தா’’தி. சித்தீகதட்டா²தீ³ஹீதி பூஜனீயபா⁴வாதீ³ஹி. வுத்தம் ஹேதம் போராணட்ட²கதா²யம். சித்தீகதந்தி ரதனந்தி இத³ம் ரதனம் நாம லோகே சித்தீகதம் வத்தூ²னம் ஸஹஸ்ஸக்³க⁴னதாதி³வஸேன. யேபி லோகே சித்தீகதா க²த்தியபண்டி³த-சதுமஹாராஜ-ஸக்க-ஸுயாம-மஹாப்³ரஹ்மாத³யோ, தேஸம் சித்தீகதோ தேஹி ஸரணந்தி உபக³ந்தப்³ப³தாதி³வஸேன. ரதிகரந்தி பீதிஸுகா²வஹம். ஜா²னரதிஸுகே²னாதி து³விதே⁴னபி ஜா²னரதிஸுகே²ன. துலேதுந்தி பரிச்சி²ந்தி³தும். கு³ணபாரமிந்தி கு³ணானம் உக்கம்ஸபாரமிம். து³ல்லபோ⁴ அனேகானி அஸங்க்²யேய்யானி அதிதா⁴வித்வாபி லத்³து⁴ம் அஸக்குணேய்யத்தா. அனோமோதி அனூனோ பரிபுண்ணோ. தத்த² விஸேஸதோ அனோமஸத்தபரிபோ⁴க³தோ தேஹி ‘‘ஸம்மாஸம்பு³த்³தோ⁴ ப⁴க³வா’’தி அனுஸ்ஸரிதப்³ப³தோதி ஆஹ ‘‘ப⁴க³வா அனோமோ ஸீலேனா’’திஆதி³.

அரியமக்³க³பஞ்ஞாயேவ இத⁴ அதி⁴ப்பேதாதி ‘‘இத⁴ பன து³ல்லப⁴பாதுபா⁴வட்டே²ன பஞ்ஞா ‘ரதன’ந்தி வுத்த’’ந்தி ஆஹ. புஜ்ஜப²லனிப்³ப³த்தனதோ, அத்தனோ ஸந்தானம் புனாதீதி ச புஞ்ஞசேதனா புஞ்ஞம், ஸா பன யஸ்ஸ உப்பன்னா, தஸ்ஸேவ ஆவேணிகதாய அனஞ்ஞஸாதா⁴ரணத்தா கேனசிபி அனாஹடா, அட்ட²கதா²யம் பன ‘‘அரூபத்தா’’தி வுத்தம்.

ஜராஸுத்தவண்ணனா நிட்டி²தா.

2. அஜரஸாஸுத்தவண்ணனா

52. அஜீரணேனாதி ஜிண்ணபா⁴வானாபஜ்ஜனேன. லக்க²ணவசனஞ்சேதம் அவினாஸப்பத்தியா. தேனாஹ ‘‘அவிபத்தியாதி அத்தோ²’’தி. நித்³த⁴மிதப்³போ³தி நீஹரிதப்³போ³.

அஜரஸாஸுத்தவண்ணனா நிட்டி²தா.

3. மித்தஸுத்தவண்ணனா

53. ஸஹ அத்தே²ன வத்ததீதி ஸத்தோ², ப⁴ண்ட³மூலம் க³ஹேத்வா வாணிஜ்ஜவஸேன தே³ஸந்தராதீ³ஸு விசரணகஜனஸமூஹோ. தேனாஹ ‘‘ஸத்³தி⁴ம்சரோ’’தி, ஸஹசரணகோதி அத்தோ². மித்தந்தி ஸினேஹயோகே³ன மித்தகிச்சயுத்தம். இதா⁴தி⁴ப்பேதப்பகாரம் த³ஸ்ஸேதும் ‘‘ரோகே³ உப்பன்னே’’திஆதி³ வுத்தம். ததா²ரூபேதி ஜிகு³ச்ச²னீயே, து³த்திகிச்சே² வா. யதா² அஸண்டி²தானம் ஸண்டா²பனவஸேன பவஸதோ புரிஸஸ்ஸ போ⁴க³ப்³யஸனே நாத²தா, ஏவம் புத்தஸினேஹவஸேன புத்தஸ்ஸ மாதுயா அந்தோகே³ஹே நாத²தாதி வுத்தம் ‘‘மாதா மித்தம் ஸகே க⁴ரே’’தி. அத்த²ஜாதஸ்ஸாதி உபட்டி²தபயோஜனஸ்ஸாதி அத்தோ²தி ஆஹ ‘‘உப்பன்னகிச்சஸ்ஸா’’தி. ஸம்பராயஹிதந்தி ஸம்பராயே ஹிதாவஹம்.

மித்தஸுத்தவண்ணனா நிட்டி²தா.

4. வத்து²ஸுத்தவண்ணனா

54. பதிட்டா²தி அவஸ்ஸயோ. கு³ய்ஹஸ்ஸாதி கு³ஹிதப்³ப³ஸ்ஸ ரஹஸ்ஸஸ்ஸ. பரமோ ஸகா² நாம அதிபியட்டா²னதாய.

வத்து²ஸுத்தவண்ணனா நிட்டி²தா.

5. பட²மஜனஸுத்தவண்ணனா

55. விதா⁴வதீதி விவித⁴ம் ரூபம் பதா⁴வதி, யதா²காமம் பவத்ததீதி அத்தோ².

பட²மஜனஸுத்தவண்ணனா நிட்டி²தா.

6. து³தியஜனஸுத்தவண்ணனா

56. வட்டது³க்க²தோதி ஸம்ஸாரது³க்க²தோ. ஸம்ஸாரோ ஹி கிலேஸகம்மவிபாகானம் அபராபருப்பத்திதாய விதா⁴வதி. தஞ்ச து³க்க²ம் து³க்க²மத்தாய நானாவித⁴து³க்க²ராஸிபா⁴வதோ.

து³தியஜனஸுத்தவண்ணனா நிட்டி²தா.

7. ததியஜனஸுத்தவண்ணனா

57. நிப்ப²த்தீதி இட்டா²னிட்ட²விபாகானம் நிப்ப²ஜ்ஜனதோ நிப்ப²த்தி. ததோ ஏவ அவஸ்ஸயோ, நிப்ப²த்திதவிபாகஸ்ஸ அவஸ்ஸயோ அதி⁴ட்டா²னம் காரணந்தி அத்தோ².

ததியஜனஸுத்தவண்ணனா நிட்டி²தா.

8. உப்பத²ஸுத்தவண்ணனா

58. அமக்³கோ³தி ந மக்³கோ³ அனுபாயோ. ரத்திந்தி³வக்க²யோதி தத்த² வயக்க²ணஸ்ஸ பாகடபா⁴வதோ. வுத்தக்க²ணோபி ஹி ஸயம் கீ²யதேவ. ஸேஸம் பா³ஹிரமலம் வத்த²ஸரீராதி³பூ⁴தம். ததா² ஹி ‘‘ப⁴ஸ்மகா²ராதீ³ஹி தோ⁴வித்வா ஸக்கா ஸோதே⁴து’’ந்தி வுத்தம். து³ட்டோ²தி தூ³ஸிதோ ஸத்தஸந்தானோ ந ஸக்கா ஸுத்³தோ⁴ நாம காதும் அப்³ப⁴ந்தரமலீனபா⁴வாபாத³னதோ. இத்தி²யந்தி ப்³ரஹ்மசரியஸ்ஸ அந்தராயகராயபி. பஜாதி ஸத்தகாயோ ஸஜ்ஜதி ஸங்க³ம் கரோதி யாதா²வதோ ஆதீ³னவம் அபஸ்ஸந்தோ. இந்த்³ரியஸம்வராதி³ கிலேஸானம் தாபனதோ தபோ, தேனாஹ ‘‘ஸப்³பா³பீ’’திஆதி³.

உப்பத²ஸுத்தவண்ணனா நிட்டி²தா.

9. து³தியஸுத்தவண்ணனா

59. கிஸ்ஸாதி பு⁴ம்மத்தே² ஸாமிவசனந்தி ஆஹ ‘‘கிஸ்மிம் அபி⁴ரதோ’’தி. ஸத்³தா⁴ நாம அனவஜ்ஜஸபா⁴வா, தஸ்மா லோகியலோகுத்தரஹிதஸுகா²வஹாதி ஆஹ ‘‘ஸுக³திஞ்சேவ நிப்³பா³னஞ்ச க³ச்ச²ந்தஸ்ஸ து³தியிகா’’தி. அனுஸாஸதி ஹிதசரியாய பரிணாயிகபா⁴வதோ.

து³தியஸுத்தவண்ணனா நிட்டி²தா.

10. கவிஸுத்தவண்ணனா

60. கா³யத்திஆதி³கோதி ச²ப்³பீ³ஸதியா ச²ந்தே³ஸு கா³யத்திஆதி³கோ உக்கதிபரியோஸானோ ச²ந்தோ³ கா³தா²னம் நிதா³னம் ஸமுட்டா²னம் ‘‘ஸமுட்ட²ஹதி ஏதேனா’’தி கத்வா. தேஹி பன அனுட்டு²பா⁴தி³கோ ஹோதீதி ஆஹ ‘‘ச²ந்தோ³ கா³தா²னம் நிதா³ன’’ந்தி. புப்³ப³பட்டா²பனகா³தா²தி த⁴ம்மகதா²ய ஆதி³தோ ஆரோசனபா⁴வஜானனத்த²ம் ஸதிஜனனம் விய பவத்திதகா³தா². அக்க²ரஞ்ஹி பத³ம் ஜனேதீதி யஸ்மா அக்க²ரஸமுதா³யோ பத³ம், பத³ஸமுதா³யோ கா³தா², ஸமுதா³யோ ச ஸமுதா³யீஹி ப்³யஞ்ஜீயதி தம்பவத்தனதோ, தஸ்மா ப்³யஞ்ஜனபா⁴வே டி²தம் அக்க²ரம், தம்ஸமுதா³யோ பத³ம், பத³ம் தம் வியஞ்ஜேதா ஜனேதா விய ஹோதீதி ‘‘அக்க²ரஞ்ஹி பத³ம் ஜனேதீ’’தி வுத்தம். அக்க²ரம் ஹி உச்சாரிதவித்³த⁴ம்ஸிதாய தம்தம்க²ணமத்தாவட்டா²யீபி பரதோ பவத்தியா மனோவிஞ்ஞாணவீதி²யா ஸங்கலனவஸேன ஏகஜ்ஜ²ம் கத்வா பத³பா⁴வேன க³ய்ஹமானம் யதா²ஸங்கேதமத்த²ம் ப்³யஞ்ஜேதி. பத³ம் கா³த²ம் ஜனேதீதி ஏத்தா²பி ஏஸேவ நயோ. கா³தா² அத்த²ம் பகாஸேதீதி கா³தா²ஸஞ்ஞிதோ பத³ஸமுதா³யோ கிரியாகாரகஸம்ப³ந்த⁴வஸேன ஸம்ப³ந்தி⁴தோ கத்துஅதி⁴ப்பாயானுரூபம் ஆலோசிதவிலோசிதம் ஸம்ஹிதம் அத்த²ம் விபா⁴வேதி. ஸமுத்³தா³தி³பண்ணத்தினிஸ்ஸிதா வோஹாரஸன்னிஸ்ஸயேனேவ பவத்ததீதி கத்வா. தேனாஹ ‘‘கா³தா² ஆரப⁴ந்தோ’’திஆதி³. ஆஸயோதி அவஸ்ஸயோதி ஆஹ ‘‘பதிட்டா²’’தி கவிதோதி விசித்தகதீ²ஆதி³தோ.

கவிஸுத்தவண்ணனா நிட்டி²தா.

ஜராவக்³க³வண்ணனா நிட்டி²தா.