1. நந்த³னஸுத்தவண்ணனா

11. ‘‘தத்ர ப⁴க³வா’’தி வுத்தே ந ததா² ப்³யஞ்ஜனானம் ஸிலிட்ட²தா, யதா² ‘‘தத்ர கோ² ப⁴க³வா’’தி வுத்தேதி ஆஹ ‘‘ப்³யஞ்ஜனஸிலிட்ட²தாவஸேனா’’தி. பரிஸஜேட்ட²கேதி பரிஸாய ஜேட்ட²கே, யே தஸ்ஸா தே³ஸனாய விஸேஸதோ பா⁴ஜனபூ⁴தா. பரிஸஜேட்ட²கே பி⁴க்கூ²தி சதுபரிஸஜேட்ட²கே பி⁴க்கூ². சதுன்னம் ஹி பரிஸானம் ஜேட்டா² பி⁴க்கு²பரிஸா பட²முப்பன்னத்தா. ஆமந்தேஸீதி ஸம்போ³தே⁴ஸி, ஸம்போ³த⁴னஞ்ச ஜானாபனந்தி ஆஹ ‘‘ஜானாபேஸீ’’தி. ப⁴த³ந்தேதி க³ருகா³ரவஸப்பதிஸ்ஸவவசனமேதம், அத்த²தோ பன ப⁴த³ந்தேதி ப⁴த்³த³ம் தவ ஹோது அத்தனோ நிட்டா²னபரியோஸானத்தா பரேஸஞ்ச ஸந்ததாவஹத்தா. ப⁴க³வதோ பச்சஸ்ஸோஸுந்தி ஏத்த² ப⁴க³வதோதி ஸாமிவசனம் ஆமந்தனமேவ ஸம்ப³ந்தி⁴அத்த²பத³ம் அபேக்க²தீதி அதி⁴ப்பாயேனாஹ ‘‘ப⁴க³வதோ வசனம் பதிஅஸ்ஸோஸு’’ந்தி. ப⁴க³வதோதி பன இத³ம் பதிஸ்ஸவனஸம்ப³ந்தே⁴ன ஸம்பதா³னவசனம் யதா² ‘‘தே³வத³த்தஸ்ஸ படிஸ்ஸுணாதீ’’தி. யம் பனேத்த² வத்தப்³ப³ம், தம் நிதா³னவக்³க³ஸ்ஸ ஆதி³ஸுத்தவண்ணனாயம் ஆக³மிஸ்ஸதி.

தாவதிம்ஸகாயோதி தாவதிம்ஸஸஞ்ஞிதோ தே³வனிகாயோ. து³தியதே³வலோகோதி ச²ஸு காமலோகேஸு து³தியோ தே³வலோகோ. தேத்திம்ஸ ஜனா ஸஹபுஞ்ஞகாரினோ தத்த² உப்பன்னா, தம்ஸஹசரிதட்டா²னம் தாவதிம்ஸம், தன்னிவாஸினோபி தாவதிம்ஸனாமகா ஸஹசரணஞாயேனாதி ஆஹ ‘‘மகே⁴ன மாணவேனா’’திஆதி³. அயம் பன கேசிவாதோ³ ப்³யாபன்னோ ஹோதீதி தம் அரோசேந்தேன ‘‘வத³ந்தீ’’தி வுத்தம். ப்³யாபன்னதம் த³ஸ்ஸேந்தோ ‘‘யஸ்மா பனா’’திஆதி³மாஹ. ததா² ஹி வக்க²தி ‘‘ஏவம் ஹி நித்³தோ³ஸம் பத³ம் ஹோதீ’’தி. நாமபண்ணத்தியேவாதி அத்த²னிரபேக்க²த்தா நிருள்ஹஸமஞ்ஞா ஏவ.

தம் வனந்தி தம் உபவனம். பவிட்டே² பவிட்டே² து³க்க²ப்பத்தேபி அத்தனோ ஸம்பத்தியா நந்த³யதி, பகே³வ அது³க்க²ப்பத்தேதி த³ஸ்ஸேதும் ‘‘பஞ்சஸு ஹீ’’திஆதி³ வுத்தம். பவேஸிதானந்தி பகோட்ட²வாரேன பவேஸிதானம்பீதி அதி⁴ப்பாயோ. சவனகாலேயேவ தோ²கம் தி³ஸ்ஸமானவிகாரா ஹுத்வா சவந்தி, தே ஸந்தா⁴ய ‘‘ஹிமபிண்டோ³ விய விலீயந்தீ’’தி வுத்தம். யே பன அதி³ஸ்ஸமானவிகாரா ஸஹஸா அந்தரதா⁴யந்தி, தே ஸந்தா⁴ய ‘‘தீ³பஸிகா² விய விஜ்ஜா²யந்தீ’’தி வுத்தந்தி வத³ந்தி. நந்த³யதி பகதியா ஸோமனஸ்ஸிதம் தோ³மனஸ்ஸிதஞ்ச. நந்த³னேதி ஏவம்அன்வத்த²னாமகே உய்யானே. பரிவுதாதி ‘‘தே³வதா’’தி வசனம் உபாதா³ய இத்தி²லிங்க³வஸேன வுத்தம். தே³வபுத்தோ ஹி ஸோ.

தி³வி ப⁴வத்தா தி³ப்³பா³தி ஆஹ ‘‘தே³வலோகே நிப்³ப³த்தேஹீ’’தி. காமேதப்³ப³தாய காமப³ந்த⁴னேஹி, ததா² அஞ்ஞமஞ்ஞம் அஸம்கிண்ணஸபா⁴வதாய காமகோட்டா²ஸேஹி. உபேதாதி உபக³தா ஸமன்னாக³தா. பரிசாரயமானாதி பரிரமமானா. இத³ஞ்ஹி பத³ம் அபேக்கி²த்வா ‘‘காமகு³ணேஹீ’’தி கத்தரி கரணவசனம், புரிமானி அபேக்கி²த்வா ஸஹயோகே³. ரமமானா சரந்தீதி கத்வா வுத்தம் ‘‘ரமமானா’’தி. பரிசாரயமானாதி வா பரிதோ ஸமந்ததோ சாரயமானாதி அத்தோ²தி ஆஹ ‘‘இந்த்³ரியானி ஸஞ்சாரயமானா’’தி. பட²மனயே ஹி அனுப⁴வனத்தோ² பரிசரணஸத்³தோ³, து³தியனயே பரிவத்தனத்தோ². ஸோ பனாதி ‘‘தாயம் வேலாய’’ந்தி வுத்தகாலோ. அது⁴னாதி ஸம்பதி. ஸோ விசரீதி ஸம்ப³ந்தோ⁴. காமகு³ணேஹீதி ஹேதும்ஹி கரணவசனம். ஓவுதோதி யதா² தம் ந ஞாயதி, ஏவம் பிஹிதசித்தோ. நிவுதோ பரியோனத்³தோ⁴தி தஸ்ஸேவ வேவசனம். தேனாஹ ‘‘லோகாபி⁴பூ⁴தோ’’தி. ஆஸபி⁴ந்தி ஸேட்ட²ம் ‘‘அக்³கோ³ஹமஸ்மி லோகஸ்ஸா’’திஆதி³னா (தீ³. நி. 2.31; ம. நி. 3.207) பா⁴ஸந்தோ போ³தி⁴ஸத்தோ விய.

கேவலம் த³ஸ்ஸனம் கிமத்தி²யந்தி ஆஹ – ‘‘யே…பே… வஸேனா’’தி, தஸ்மிம் நந்த³னவனே அவட்டி²தகாமபா⁴கா³னுப⁴வனவஸேனாதி அத்தோ². நரதே³வானந்தி புரிஸபூ⁴ததே³வதானம். தேனாஹ ‘‘தே³வபுரிஸான’’ந்தி. அப்பகம் அதி⁴கம் ஊனம் வா க³ணனூபக³ம் நாம ந ஹோதீதி ‘‘திக்க²த்தும் த³ஸன்ன’’ந்தி வுத்தம். ‘‘தேத்திம்ஸான’’ந்தி ஹி வத்தப்³பே³ அயம் ருள்ஹீ. பரிவாரஸங்கா²தேன, ந கித்திஸங்கா²தேனாதி அதி⁴ப்பாயோ. ஸீலாசாராதி³கு³ணனேமித்திகா ஹி கித்தி. ‘‘தாவதிம்ஸா தே³வா தீ³கா⁴யுகா வண்ணவந்தோ ஸுக²ப³ஹுலா’’தி ஏவமாதி³வசனேன யஸே இச்சி²தே அவிஸேஸேத்வாவ ‘‘யஸேன ஸம்பன்னான’’ந்தி ஸக்கா வத்தும்.

அரியஸாவிகாதி ஸோதாபன்னா. ‘‘ஸகதா³கா³மினீ’’தி கேசி. அதி⁴ப்பாயம் விவட்டேத்வாதி யதா² த்வம் அந்த⁴பா³லே மஞ்ஞஸி, த⁴ம்மஸபா⁴வோ ஏவம் ந ஹோதீதி தஸ்ஸா தே³வதாய அதி⁴ப்பாயம் விபரிவத்தேத்வா. ஏகந்ததோ ஸுக²ம் நாம நிப்³பா³னமேவ. காமா ஹி து³க்கா² விபரிணாமத⁴ம்மாதி இமினா அதி⁴ப்பாயேன தஸ்ஸா அதி⁴ப்பாயம் படிக்கி²பித்வா. காமம் சதுத்த²பூ⁴மகாபி ஸங்கா²ரா அனிச்சா ஏவ, தே பன ஸம்மஸனூபகா³ ந ஹோந்தீதி தேபூ⁴மகக்³க³ஹணம் ஸம்மஸனயோக்³கே³ன. ஹுத்வாதி புப்³பே³ அவிஜ்ஜமானா பச்சயஸமவாயேன ப⁴வித்வா உப்பஜ்ஜித்வா. ஏதேன நேஸம் பா⁴வபா⁴கோ³ த³ஸ்ஸிதோ. அபா⁴வத்தே²னாதி ஸரஸனிரோத⁴பூ⁴தேன வித்³த⁴ம்ஸனபா⁴வேன.

அனிச்சா அத்³து⁴வா, ததோ ஏவ ‘‘மய்ஹம் இமே ஸுகா²’’தி வா ந இச்சாதி அனிச்சா. உப்பாத³வயஸபா⁴வாதி க²ணே க²ணே உப்பஜ்ஜனனிருஜ்ஜ²னஸபா⁴வா. தேனாஹ ‘‘உப்ப…பே… வேவசன’’ந்தி. புரிமஸ்ஸ வா பச்சி²மம் காரணவேவசனந்தி ஆஹ ‘‘யஸ்மா வா’’திஆதி³. தத³னந்தராதி தேஸம் உப்பாத³வயானம் அந்தரே. வேமஜ்ஜ²ட்டா²னந்தி டி²திக்க²ணம் வத³தி. யே பன ‘‘ஸங்கா²ரானம் டி²தி நத்தீ²’’தி வத³ந்தி, தேஸம் தம் மிச்சா². யதா² ஹி தஸ்ஸேவ த⁴ம்மஸ்ஸ உப்பாதா³வத்தா²ய பி⁴ன்னா ப⁴ங்கா³வத்தா² இச்சி²தா, அஞ்ஞதா² அஞ்ஞம் உப்பஜ்ஜதி, அஞ்ஞம் நிருஜ்ஜ²தீதி ஆபஜ்ஜதி, ஏவம் உப்பன்னஸ்ஸ ப⁴ங்கா³பி⁴முகா²வத்தா² இச்சி²தப்³பா³, ஸாவ டி²திக்க²ணோ. ந ஹி உப்பஜ்ஜமானோ பி⁴ஜ்ஜதீதி ஸக்கா விஞ்ஞாதுந்தி. வூபஸமஸங்கா²தந்தி அச்சந்தம் வூபஸமஸங்கா²தம் நிப்³பா³னமேவ ஸுக²ம், ந தயா அதி⁴ப்பேதா காமாதி அதி⁴ப்பாயோ.

நந்த³னஸுத்தவண்ணனா நிட்டி²தா.