6. ஏஸுகாரீஸுத்தவண்ணனா

437. கோட்டா²ஸந்தி மம்ஸபா⁴க³ம். லக்³கா³பேய்யுந்தி ந்ஹாருனா வா வாகேன வா ப³ந்தி⁴த்வா புரிஸஸ்ஸ ஹத்தே² வா வஸனகே³ஹே வா ஓலம்ப³னவஸேன ப³ந்தே⁴ய்யும். ஸத்த²த⁴ம்மந்தி ஸத்தி²கேஸு ஸத்த²வாஹேன பணேதப்³ப³ம் ஆணாத⁴ம்மம். தஸ்ஸ நிக்க²மனத்த²ந்தி தம் மூலம் ஸத்தி²கேஹி நித்த²ரணத்த²ம். பாபம் அஸ்ஸாதி பரிசரந்தஸ்ஸ பாரிசரியாய அஹிதம்வ அஸ்ஸ. தேனாஹ ‘‘ந ஸேய்யோ’’தி. உச்சகுலீனாத³யோ து³தியவாராதீ³ஹி வுச்சந்தி, இத⁴ உபதி⁴விபத்திஸம்பத்தியோ பாபியாதி³பதே³ஹி வுத்தாதி அதி⁴ப்பாயோ. தேனாஹ – ‘‘பாபியோதி பாபகோ லாமகோ அத்தபா⁴வோ அஸ்ஸா’’தி. ஸேய்யம்ஸோதி ஹிதகோட்டா²ஸோ, ஹிதஸபா⁴வோதி அத்தோ². உச்சகுலீனதாதி கரணத்தே² பச்சத்தவசனந்தி ஆஹ ‘‘உச்சாகுலீனத்தேனா’’தி. ‘‘வண்ணோ ந கீ²யேத² ததா²க³தஸ்ஸா’’திஆதீ³ஸு (தீ³. நி. அட்ட². 1.305; 3.141; ம. நி. அட்ட². 2.425; உதா³. 53; அப. அட்ட². 2.7.20; பு³. வம். அட்ட². 4.4; சரியா. அட்ட². 1.நிதா³னகதா²; 2.பகிண்ணககதா²; தீ³. நி. டீ. 1.க³ந்தா²ரம்ப⁴கதா²வண்ணனா; ஸம். நி. டீ. 1.2.1; அ. நி. டீ. 1.1.1; வஜிர. டீ. க³ந்தா²ரம்ப⁴கதா²வண்ணனா; ஸாரத்த². டீ. 1.க³ந்தா²ரம்ப⁴கதா²வண்ணனா; நேத்தி. டீ. க³ந்தா²ரம்ப⁴கதா²வண்ணனா; ம. நி. டீ. 1.1) விய வண்ணஸத்³தோ³ இத⁴ பஸம்ஸாபரியாயோதி ஆஹ ‘‘வேஸ்ஸோபி ஹி உளாரவண்ணோ ஹோதீ’’தி.

440. ‘‘நிரவோ பத³ஸத்³தோ³ ஸோளாரகோ³த்தஸ்ஸ அகிண்ணமத்திகாபத்தோ திட்டே²ய்ய அஸங்க³சாரீ’’தி வுத்தத்தா பி⁴க்கா² சரிதப்³பா³வ, அயம் தேஸம் குலத⁴ம்மோதி அதி⁴ப்பாயோ. ஹரித்வாதி அபனேத்வா. ஸத்தஜீவோ ஸத்தவாணிஜகோ. கோ³பேதி ரக்க²தீதி கோ³போ, ஆரக்கா²தி⁴காரே நியுத்தோ. அஸந்தி லூனந்தி தேனாதி அஸிதம், லவித்தம். விவித⁴ம் பா⁴ரம் ஆப⁴ஞ்ஜந்தி ஓலம்ப³ந்தி ஏத்தா²தி ப்³யாப⁴ங்கீ³, காஜம்.

441. அனுஸ்ஸரதோதி அனுஸ்ஸரணஹேது குலவம்ஸானுஸ்ஸரணக்க²ணே க²த்தியோதிஆதி³னா ஸங்க்²யம் க³ச்ச²தி. தேனாஹ ‘‘போராணே…பே… அனுஸ்ஸரியமானே’’தி. உச்சனீசத்தஜானனத்த²ஞ்ச குலவவத்தா²னம் கதம் ஹோதீதி க²த்தியாதி³குலகம்முனா தேஸம் சதுன்னம் வண்ணானம் ஸந்த⁴னம் ஜீவிகம் பஞ்ஞபேந்தி ப்³ராஹ்மணா, ததா²க³தோ பன லோகுத்தரத⁴ம்மமேவ புரிஸஸ்ஸ ஸந்த⁴னம் பஞ்ஞபேதி தேன ஸத்தஸ்ஸ லோகக்³க³பா⁴வஸித்³தி⁴தோ. ஸேஸம் ஸுவிஞ்ஞேய்யமேவ.

ஏஸுகாரீஸுத்தவண்ணனா லீனத்த²ப்பகாஸனா ஸமத்தா.