7. குக்குரவதிகஸுத்தவண்ணனா

78. கோலியேஸூதி ப³ஹுவசனவஸேனாயம் பாளி ஆக³தா. ஏவம்னாமகே ஜனபதே³தி அத்த²வசனம் கஸ்மா வுத்தந்தி ஆஹ ‘‘ஸோ ஹீ’’திஆதி³. ந நியமிதோதி ‘‘அஸுகம்ஹி நாம விஹாரே’’தி ந நியமேத்வா வுத்தோ. ஸேனாஸனேயேவாதி ஆவாஸேயேவ, ந ருக்க²மூலாதி³கே. வேஸகிரியா கா⁴ஸக்³க³ஹணாதி³னா ஸமாதா³தப்³ப³ட்டே²ன கோ³வதம், தஸ்மிம் நியுத்தோ கோ³வதிகோ. தேனாஹ ‘‘ஸமாதி³ன்னகோ³வதோ’’தி. யம் ஸந்தா⁴யாஹு வேத³வேதி³னோ – ‘‘க³ச்ச²ம் ப⁴க்கே²தி, திட்ட²ம் முத்தேதி, உபாஹா உத³கம் தூ⁴பேதி, திணானி சி²ந்த³தீ’’திஆதி³. அயம் அசேலோதி அசேலகபப்³ப³ஜ்ஜாவஸேன அசேலோ, புரிமோ பன கோ³வதிகோ குக்குரவதிகோதி ஏத்த² வுத்தனயானுஸாரேன அத்தோ² வத்தப்³போ³. பலிகுண்டி²த்வாதி உபோ⁴ ஹத்தே² உபோ⁴ பாதே³ ச ஸமிஞ்ஜித்வா. ‘‘உக்குடிகோ ஹுத்வா’’திபி வத³ந்தி. க³மனம் நிப்ப²ஜ்ஜனம் க³தீதி ஆஹ – ‘‘கா க³தீதி கா நிப்ப²த்தீ’’தி. நிப்ப²த்திபரியோஸானா ஹி விபாகத⁴ம்மப்பவத்தி. கதூபசிதகம்மவஸேன அபி⁴ஸம்பரேதி ஏத்தா²தி அபி⁴ஸம்பராயோ, பரலோகோ. தத்த²ஸ்ஸ ச நிப்ப²த்திம் புச்ச²தீதி ஆஹ – ‘‘அபி⁴ஸம்பராயம்ஹி கத்த² நிப்³ப³த்தீ’’தி. குக்குரவதஸமாதா³னந்தி குக்குரபா⁴வஸமாதா³னம், ‘‘அஜ்ஜ பட்டா²ய அஹம் குக்குரோ’’தி குக்குரபா⁴வாதி⁴ட்டா²னம்.

79. பரிபுண்ணந்தி யத்தகா குக்குரவிகாரா, தேஹி பரிபுண்ணம். தேனாஹ ‘‘அனூன’’ந்தி. அப்³போ³கிண்ணந்தி தேஹி அவோமிஸ்ஸம். குக்குராசாரந்தி குக்குரானம் க³மனாகாரோதிஆதி³ஆசாரேன குக்குரபா⁴வாதி⁴ட்டா²னசித்தமாஹ. ததா² ததா² ஆகப்பேதப்³ப³தோ ஆகப்போ, பவத்திஆகாரோ. ஸோ பனேத்த² க³மனாதி³கோதி ஆஹ ‘‘குக்குரானம் க³மனாகாரோ’’திஆதி³. ஆசாரேனாதி குக்குரஸீலாசாரேன. வதஸமாதா³னேனாதி குக்குரவதாதி⁴ட்டா²னேன. குக்குரசரியாதி³யேவ து³க்கரதபசரணம். தேன க³திவிபரியேஸாகாரேன பவத்தா லத்³தி⁴. அஸ்ஸ குக்குரவதிகஸ்ஸ அஞ்ஞா க³தி நத்தீ²தி இதரக³திம் படிக்கி²பதி, இதராஸம் பன ஸம்ப⁴வோ ஏவ நத்தீ²தி. நிபஜ்ஜமானந்தி வதஸீலாதீ³னம் ஸம்கோ³பனவஸேன ஸிஜ்ஜ²மானம். யதா² ஸகம்மகதா⁴துஸத்³தா³ அத்த²விஸேஸவஸேன அகம்மகா ஹோந்தி ‘‘விபு³த்³தோ⁴ புரிஸோ விபு³த்³தோ⁴ கமலஸண்டோ³’’தி, ஏவம் அத்த²விஸேஸவஸேன அகம்மகாபி ஸகம்மகா ஹோந்தீதி த³ஸ்ஸேந்தோ ‘‘ந பரிதே³வாமி ந அனுத்து²னாமீ’’திஆதி³மாஹ. அனுத்து²னஸத்³தோ³ ச ஸகம்மகவஸேன பயுஜ்ஜதி ‘‘புராணானி அனுத்து²ன’’ந்திஆதீ³ஸு. அயஞ்சேத்த² பயோகோ³தி இமினா கா³தா²யஞ்ச அனுத்து²னனரோத³னம் அதி⁴ப்பேதந்தி த³ஸ்ஸேதி.

80. வுத்தனயேனேவாதி இமினா கோ³வதந்தி கோ³வதஸமாதா³னம். கோ³ஸீலந்தி க³வாசாரம். கோ³சித்தந்தி ‘‘அஜ்ஜ பட்டா²ய கோ³ஹி காதப்³ப³ம் கரிஸ்ஸாமீ’’தி உப்பன்னசித்தந்தி இமமத்த²ம் அதிதி³ஸதி. க்³வாகப்பே பன வத்தப்³ப³ம் அவஸிட்ட²ம் ‘‘குக்குராகப்பே வுத்தஸதி³ஸமேவா’’தி இமினாவ அதிதி³ட்ட²ம், விஸிட்ட²ஞ்ச யதா² பன தத்தா²திஆதி³னா வுத்தமேவ. யம் பனேத்த² வத்தப்³ப³ம், தம் குக்குரவதாதீ³ஸு வுத்தனயமேவ.

81. ஏகச்சகம்மகிரியாவஸேனாதி ஏகச்சஸ்ஸ அகுஸலகம்மஸ்ஸ குஸலகம்மஸ்ஸ கரணப்பஸங்கே³ன. இமேஸந்தி கோ³வதிககுக்குரவதிகானம். கிரியாதி கோ³வதபா⁴வனாதி³வஸேன பவத்தா கிரியா. பாகடா ப⁴விஸ்ஸதீதி ‘‘இமஸ்மிம் கம்மசதுக்கே இத³ம் நாம கம்மம் ப⁴ஜதீ’’தி பாகடா ப⁴விஸ்ஸதி.

காளகந்தி (அ. நி. டீ. 2.4.232) மலீனம், சித்தஸ்ஸ அபப⁴ஸ்ஸரபா⁴வகரணந்தி அத்தோ². தம் பனேத்த² கம்மபத²ஸம்பத்தமேவ அதி⁴ப்பேதந்தி ஆஹ ‘‘த³ஸஅகுஸலகம்மபத²’’ந்தி. கண்ஹந்தி கண்ஹாபி⁴ஜாதிஹேதுதோ வா கண்ஹம். தேனாஹ ‘‘கண்ஹவிபாக’’ந்தி. அபாயூபபத்தி மனுஸ்ஸேஸு ச தோ³ப⁴க்³கி³யம் கண்ஹவிபாகோ, யதா² தமபா⁴வோ வுத்தோ, ஏகத்தனித்³தே³ஸேன பன ‘‘அபாயே நிப்³ப³த்தனதோ’’தி வுத்தம், நிப்³ப³த்தாபனதோதி அத்தோ². ஸுக்கந்தி ஓதா³தம், சித்தஸ்ஸ பப⁴ஸ்ஸரபா⁴வகரணந்தி அத்தோ², ஸுக்காபி⁴ஜாதிஹேதுதோ வா ஸுக்கம். தேனாஹ ‘‘ஸுக்கவிபாக’’ந்தி. ஸக்³கூ³பபத்தி மனுஸ்ஸலோகே ஸோப⁴க்³கி³யஞ்ச ஸுக்கவிபாகோ, யதா² ச ஜோதிபா⁴வோ வுத்தோ, ஏகத்தனித்³தே³ஸேன பன ‘‘ஸக்³கே³ நிப்³ப³த்தனதோ’’தி வுத்தம், நிப்³ப³த்தாபனதோதி அத்தோ², வோமிஸ்ஸககம்மந்தி காலேன கண்ஹம், காலேன ஸுக்கந்தி ஏவம் மிஸ்ஸகவஸேன கதகம்மம். ‘‘ஸுக²து³க்க²விபாக’’ந்தி வத்வா ஸுக²து³க்கா²னம் பவத்திஆகாரம் த³ஸ்ஸேதும் ‘‘மிஸ்ஸககம்மஞ்ஹீ’’திஆதி³ வுத்தம். கம்மஸ்ஸ கண்ஹஸுக்கஸமஞ்ஞா கண்ஹஸுக்காபி⁴ஜாதிஹேதுதாயாதி, அபச்சயகா³மிதாய தது³ப⁴யவினிமுத்தஸ்ஸ கம்மக்க²யகரகம்மஸ்ஸ இத⁴ ஸுக்கபரியாயோபி ந இச்சி²தோதி ஆஹ – ‘‘உப⁴ய…பே… அஸுக்கந்தி வுத்த’’ந்தி. தத்த² உப⁴யவிபாகஸ்ஸாதி யதா²தி⁴க³தஸ்ஸ விபாகஸ்ஸ. ஸம்பத்திப⁴வபரியாபன்னோ ஹி விபாகோ இத⁴ ‘‘ஸுக்கவிபாகோ’’தி அதி⁴ப்பேதோ, ந அச்சந்தபரிஸுத்³தோ⁴.

ஸது³க்க²ந்தி அத்தனா உப்பாதே³தப்³பே³ன து³க்கே²ன ஸது³க்க²ம், து³க்க²ஸம்வத்தனிகந்தி அத்தோ². ‘‘இமஸ்மிம் ஸுத்தே சேதனா து⁴ரம், உபாலிஸுத்தே (ம. நி. 2.56) கம்ம’’ந்தி ஹேட்டா² வுத்தம்பி அத்த²ம் இத⁴ ஸாத⁴யதி விஜானனத்த²ம். அபி⁴ஸங்க²ரித்வாதி ஆயூஹித்வா. தம் பன பச்சயஸமவாயஸித்³தி⁴தோ ஸம்கட்³ட⁴னம் பிண்ட³னம் விய ஹோதீதி ஆஹ – ‘‘ஸங்கட்³டி⁴த்வா, பிண்ட³ம் கத்வாதி அத்தோ²’’தி, ஸது³க்க²ம் லோகந்தி அபாயலோகமாஹ. விபாகப²ஸ்ஸாதி ப²ஸ்ஸஸீஸேன தத்த² விபாகபவத்தமாஹ. பூ⁴தகம்மதோதி நிப்³ப³த்தகம்மதோ அத்தனா கதூபசிதகம்மதோ. யதா²பூ⁴தந்தி யாதி³ஸம். கம்மஸபா⁴க³வஸேனாதி கம்மஸரிக்க²கவஸேன. உபபத்தி ஹோதீதி அபதா³தி³பே⁴தா³ உபபத்தி. கம்மேன விய வுத்தாதி யம் கரோதி, தேன உபபஜ்ஜதீதி ஏககம்மேனேவ ஜாயமானா விய வுத்தா அபதா³தி³பே⁴தா³. உபபத்தி ச நாம விபாகேன ஹோதி விபாகே ஸம்ப⁴வந்தே ஏகம்ஸேன தே உபபத்திவிஸேஸா ஸம்ப⁴வந்தி. யதி³ ஏவம் கஸ்மா ‘‘தேன உபபஜ்ஜதீ’’தி உபபத்திகம்மஹேதுகா வுத்தாதி ஆஹ ‘‘யஸ்மா பனா’’திஆதி³. யேன கம்மவிபாகேன நிப்³ப³த்தோதி யேன கம்மவிபாகேன விபச்சமானேன அயம் ஸத்தோ நிப்³ப³த்தோதி வுச்சதி. தம்கம்மவிபாகப²ஸ்ஸாதி தஸ்ஸ தஸ்ஸ கம்மஸ்ஸ விபாகபூ⁴தா ப²ஸ்ஸா. கம்மேன தா³தப்³ப³ம் தா³யம் தப்³பி³பாகம் ஆதி³யந்தீதி கம்மதா³யாதா³, ப²ஸ்ஸா. கம்மஸ்ஸ தா³யஜ்ஜதா கம்மப²லஸ்ஸ தா³யஜ்ஜம், தஸ்மா வுத்தம் ‘‘கம்மதா³யஜ்ஜா’’தி. தேனாஹ ‘‘கம்மமேவ நேஸம் தா³யஜ்ஜம் ஸந்தக’’ந்தி.

திஸ்ஸோ ச ஹேட்டி²மஜ்ஜா²னசேதனாதி இத³ம் அப்³யாப³ஜ்ஜ²வேத³னம் வேதி³யனஏகந்தஸுகு²ப்பத்தியா ஹேதுபா⁴வஸாத⁴னம். யதி³ ஏவம் யதா²வுத்தா ஜா²னசேதனா தாவ ஹோது ஏகந்தஸுகு²ப்பத்திஹேதுபா⁴வதோ. காமாவசரா கிந்தீதி காமாவசரா பன குஸலசேதனா தம்ஸபா⁴வாபா⁴வதோ கிந்தி கேன பகாரேன அப்³யாப³ஜ்ஜ²மனோஸங்கா²ரோ நாம ஜாதோதி சோதே³தி, இதரோ பன ந ஸப்³பா³ காமாவசரகுஸலசேதனா ததா² க³ஹிதா, அத² கோ² ஏகச்சா ஜா²னசேதனானுகூலாதி த³ஸ்ஸேந்தோ ‘‘கஸிணஸஜ்ஜனகாலே கஸிணாஸேவனகாலே லப்³ப⁴ந்தீ’’தி ஆஹ. தத்த² கஸிணாஸேவனசேதனா க³ஹேதப்³பா³, ஸா உபசாரஜ்ஜா²னஸ்ஸ ஸாதி⁴கா. தேன காமாவசரசேதனா பட²மஜ்ஜா²னசேதனாய க⁴டிதாதி கஸிணஸஜ்ஜனசேதனாபி கதா³சி தாதி³ஸா ஹோதீதி க³ஹிதா. பரிகம்மாதி³வஸேன ஹி பவத்தா பா⁴வனாமயா காமாவசரகுஸலசேதனா பட²மஜ்ஜா²னஸ்ஸ ஆஸன்னதாய வுத்தா. சதுத்த²ஜ்ஜா²னசேதனா ததியஜ்ஜா²னசேதனாய க⁴டிதாதி இத³ம் ஏகத்தகாயஏகத்தஸஞ்ஞீஸத்தாவாஸவதாய தம்ஸரிக்க²கா உபேக்கா²பி ஈதி³ஸேஸு டா²னேஸு ஸுக²ஸரிக்க²தா, ஏவம் ஸந்தஸபா⁴வதா ஞாணஸஹிததா ச. கேசி பன சதுத்த²ஜ்ஜா²னசேதனானுகு³ணாதி நித³ஸ்ஸேந்தா கஸிணஸஜ்ஜனகாலே கஸிணஜ்ஜா²னகாலே கஸிணாஸேவனகாலே லப்³ப⁴தீதி ததியஜ்ஜா²னசேதனாய ஆஸன்னக⁴டிததா வுத்தாதி வத³ந்தி, தம் தேஸம் மதிமத்தம், வுத்தனயேனேவ தாஸம் க⁴டிததா வேதி³தப்³பா³. உப⁴யமிஸ்ஸகவஸேனாதி உப⁴யேஸம் குஸலாகுஸலஸங்கா²ரானம் ஸுக²து³க்கா²னஞ்ச மிஸ்ஸகபா⁴வவஸேன. வேமானிகபேதானந்தி இத³ம் பா³ஹுல்லதோ வுத்தம், இதரேஸம்பி வினிபாதிகானம் காலேன து³க்க²ம் ஹோதியேவ.

தஸ்ஸ பஹானாயாதி தஸ்ஸ யதா²வுத்தஸ்ஸ கம்மஸ்ஸ அனுப்பத்தித⁴ம்மதாபாத³னாய. யா சேதனாதி யா அபசயகா³மினிசேதனா. கம்மம் பத்வாதி ஸுக²கம்மந்தி வுச்சமானே மக்³க³சேதனாய அஞ்ஞோ பண்ட³ரதரோ த⁴ம்மோ நாம நத்தி² அச்சந்தபாரிஸுத்³தி⁴பா⁴வதோ. அகண்ஹா அஸுக்காதி ஆக³தாதி ஏத்த² ஸுக்கபா⁴வபடிக்கே²பகாரணம் ஹேட்டா² வுத்தனயமேவ. தேனாஹ ‘‘இத³ம் பன கம்மசதுக்கம் பத்வா’’திஆதி³.

82. அனிய்யானிகபக்கே²தி அசேளகபப்³ப³ஜ்ஜாய குக்குரவதே ச. யோகே³தி ஞாயத⁴ம்மபடிபத்தியந்தி அத்தோ². யோனேனாதி யோ தித்தி²யபரிவாஸோ தேன ப⁴க³வதா பஞ்ஞத்தோ. யம் தித்தி²யபரிவாஸம் ஸமாதி³யித்வாதி அயமேத்த² யோஜனா. க⁴ம்ஸித்வா ஸுவண்ணம் விய நிக⁴ம்ஸோப்பலே. கோட்டேத்வா ஹத்தே²ன விய குலாலபா⁴ஜனம்.

வூபகட்டோ²தி விவித்தோ ஏகீபூ⁴தோ. பேஸிதத்தோதி நிப்³பா³னம் பதி பேஸிதத்தோ. காமம் தத³னுத்தரம் ப்³ரஹ்மசரியபரியோஸானம்…பே… விஹாஸீதி இமினாவ அரஹத்தனிகூடேன தே³ஸனா நிட்டா²பிதா ஹோதி, ஆயஸ்மதோ பன ஸேனியஸ்ஸ படிபத்திகித்தனபரமேதம் உஜுகம் ஆபன்னஅரஹத்தபா⁴வதீ³பனம், யதி³த³ம் ‘‘அஞ்ஞதரோ கோ² பனா’’திஆதி³வசனந்தி ஆஹ ‘‘அரஹத்தனிகூடேனேவா’’தி. அரஹத்தாதி⁴க³மோயேவ தஸ்ஸ தேஸம் அப்³ப⁴ந்தரதா. ஸேஸம் ஸப்³ப³ம் ஸுவிஞ்ஞேய்யமேவ.

குக்குரவதிகஸுத்தவண்ணனாய லீனத்த²ப்பகாஸனா ஸமத்தா.