4. போதலியஸுத்தவண்ணனா

31. அங்கா³ நாம ஜனபதி³னோ ராஜகுமாரா, தேஸம் நிவாஸோ ஏகோபி ஜனபதோ³ ருள்ஹிவஸேன அங்கா³த்வேவ வுச்சதீதி ஆஹ ‘‘அங்கா³யேவ ஸோ ஜனபதோ³’’தி. மஹியா பனஸ்ஸ உத்தரேன யா ஆபோதி மஹியா நதி³யா யா ஆபோ தஸ்ஸ ஜனபத³ஸ்ஸ உத்தரேன ஹோந்தி. தாஸம் அவிதூ³ரத்தா ஸோ ஜனபதோ³ உத்தராபோதி வுச்சதி. ஸா பன மஹீ கத்த²சி கத்த²சி பி⁴ஜ்ஜித்வா க³தாதி ஆஹ ‘‘கதரமஹியா உத்தரேன யா ஆபோ’’தி. தத்தா²தி தஸ்ஸா மஹியா ஆக³மனதோ பட்டா²ய அயம் ஆவிபா⁴வகதா². யஸ்மா (அ. நி. டீ. 3.8.19) லோகியா ஜம்பு³தீ³போ ஹிமவா தத்த² பதிட்டி²தஸமுத்³த³த³ஹபப்³ப³தனதி³யோதி ஏதேஸு யம் யம் ந மனுஸ்ஸகோ³சரம், தத்த² ஸயம் ஸம்மூள்ஹா அஞ்ஞேபி ஸம்மோஹயந்தி, தத்த² தத்த² ஸம்மோஹவித⁴மனத்த²ம் ‘‘அயம் கிர ஜம்பு³தீ³போ’’திஆதி³மாரத்³த⁴ம். த³ஸஸஹஸ்ஸயோஜனபரிமாணோ ஆயாமதோ ச வித்தா²ரதோ சாதி அதி⁴ப்பாயோ. தேனாஹ ‘‘தத்தா²’’திஆதி³. உத³கேன அஜ்ஜோ²த்த²டோ தது³பபோ⁴கி³ஸத்தானம் புஞ்ஞக்க²யேன.

ஸுந்த³ரத³ஸ்ஸனம் கூடந்தி ஸுத³ஸ்ஸனகூடம், யம் லோகே ‘‘ஹேமகூட’’ந்தி வுச்சதி. மூலக³ந்தோ⁴ காளானுஸாரியாதி³. ஸாரக³ந்தோ⁴ சந்த³னாதி³. பே²க்³கு³க³ந்தோ⁴ ஸலலாதி³. தசக³ந்தோ⁴ லவங்கா³தி³. பபடிகக³ந்தோ⁴ கபி³த்தா²தி³. ரஸக³ந்தோ⁴ ஸஜ்ஜாதி³, பத்தக³ந்தோ⁴ தமாலஹிரிவேராதி³. புப்ப²க³ந்தோ⁴ நாக³குங்குமாதி³. ப²லக³ந்தோ⁴ ஜாதிப²லாதி³. க³ந்த⁴க³ந்தோ⁴ ஸப்³பே³ஸம் க³ந்தா⁴னம் க³ந்தோ⁴. யஸ்ஸ ஹி ருக்க²ஸ்ஸ ஸப்³பே³ஸம்பி மூலாதீ³னம் க³ந்தோ⁴ அத்தி², ஸோ இத⁴ க³ந்தோ⁴ நாம. தஸ்ஸ க³ந்த⁴ஸ்ஸ க³ந்தோ⁴ க³ந்த⁴க³ந்தோ⁴. ஸப்³பா³னி புது²லதோ பஞ்ஞாஸயோஜனானி, ஆயாமதோ பன உப்³பே³த⁴தோ விய த்³வியோஜனஸதானேவாதி வத³ந்தி.

மனோஹரஸிலாதலானீதி ஓதரணத்தா²ய மனுஞ்ஞஸோபானஸிலாதலானி. ஸுபடியத்தானீதி தது³பபோ⁴கி³ஸத்தானம் ஸாதா⁴ரணகம்மானுபா⁴வேன ஸுட்டு² படியத்தானி ஸுப்பவத்திதானி ஹோந்தி. மச்ச²கச்ச²பாத³யோ உத³கம் மலினம் கரோந்தி, தத³பா⁴வதோ ப²லிகஸதி³ஸனிம்மலுத³கானி. திரியதோ தீ³க⁴ம் உக்³க³தகூடந்தி ‘‘திரச்சா²னபப்³ப³த’’ந்தி ஆஹ.

ஆபணானி ஏவ வோஹாரஸ்ஸ முக²பூ⁴தானீதி ஆஹ ‘‘ஆபணமுக²ஸஹஸ்ஸானீ’’தி. விப⁴த்தானீதி வவத்தி²தானி அஞ்ஞமஞ்ஞாஸம்பி⁴ன்னானி. வஸனட்டா²னந்தி அத்தனோ யதா²பா²ஸுகம் வஸிதப்³ப³ட்டா²னம். ஆஸதி ஏத்தா²தி ஆஸனம், நிஸீதி³தப்³ப³ட்டா²னானி.

அஸாருப்பம் படிச்ச உப்பஜ்ஜனகஸ்ஸ சா²த³னதோ ச²ன்னம் அனுச்ச²விகம், ததே³வ அஜ்ஜா²ஸயஸம்பத்திம் பதிரூபேதி பகாஸேதீதி பதிரூபம். தேனாஹ ‘‘நப்பதிரூப’’ந்தி. காரணவேவசனானீதி ஞாபககாரணவேவசனானி. ஞாபகஞ்ஹி காரணம் அதி⁴ப்பேதம். அத்த²ம் ஆகரோதி பகாஸேதீதி ஆகாரோ, தமேவ லீனம் கு³ள்ஹம் அத்த²ம் க³மேதீதி லிங்க³ம், ஸோ தேன நிமீயதீதி நிமித்தந்தி வுச்சதி. இதா³னி தமேவத்த²ம் விவரிதும் ‘‘தீ³க⁴த³ஸவத்த²…பே… நிமித்தாதி வுத்தா’’தி ஆஹ. தேதி ஆகாராத³யோ. ததா² ஹி பன மேதிஆதி³னா போதலியோ க³ஹபதி ‘‘பரிப்³பா³ஜகனியாமேன அஹம் ஜீவாமி, தஸ்மா க³ஹபதி ந ஹோமீதி வத³தி. ஓவத³ந்தோதி அனுஸாஸந்தோ. உபவத³ந்தோதி பரிபா⁴ஸந்தோ.

32. கே³த⁴பூ⁴தோ லோபோ⁴தி கி³ஜ்ஜ²னஸபா⁴வோ லோபோ⁴. அகி³ஜ்ஜ²னலக்க²ணோ ந லோபோ⁴, அனிந்தா³பூ⁴தம் அக⁴ட்டனந்தி நிந்தா³ய படிபக்க²பூ⁴தம் பரேஸம் அக⁴ட்டனம். நிந்தா³க⁴ட்டனாதி நிந்தா³வஸேன பரேஸம் க⁴ட்டனா அக்கோஸனா. ப்³யவஹாரவோஹாரோபீதி கயவிக்கயலக்க²ணோ ஸப்³யோஹாரோபி தா³னக்³க³ஹணம் வோஹாரோ. ‘‘த³த்தோ திஸ்ஸோ’’ திஆதி³னா வோஹரணம் பஞ்ஞாபனந்தி பஞ்ஞத்தி வோஹாரோ. யதா²தி⁴ப்பேதஸ்ஸ அத்த²ஸ்ஸ வோஹரணம் கத²னம் போ³த⁴னந்தி வசனம் வோஹாரோ. யாதா²வதோ அயாதா²வதோ ச வோஹரதி ஏதேனாதி வோஹாரோ, சேதனா. அயமிதா⁴தி⁴ப்பேதோதி அயம் சேதனாலக்க²ணோ வோஹாரோ இத⁴ இமஸ்மிம் அத்தே² அதி⁴ப்பேதோ, ஸோ ச கோ² ஸாவஜ்ஜோவ ஸமுச்சே²த³ஸ்ஸ இச்சி²தத்தா. இதா³னி சதுப்³பி³த⁴ஸ்ஸபி வோஹாரஸ்ஸ இத⁴ ஸம்ப⁴வம் த³ஸ்ஸேதும் ‘‘யஸ்மா வா’’திஆதி³ வுத்தம். கி³ஹீதி சேதனா நத்தீ²தி அஹம் கி³ஹீதி சேதனாபவத்தி நத்தி². கி³ஹீதி வசனம் நத்தீ²தி கி³ஹீதி அத்தனோ பரேஸஞ்ச வசனப்பவத்தி நத்தி². கி³ஹீதி பண்ணத்தி நத்தீ²தி கி³ஹீதி ஸமஞ்ஞா நத்தி². கி³ஹீதி ப்³யவஹாரோ நத்தீ²தி ஸமுதா³சாரோ நத்தி².

33. பாணாதிபாதோவ ஸம்யோஜனம். கஸ்மா? ப³ந்த⁴னபா⁴வேன பவத்தனதோ நிஸ்ஸரிதும் அப்பதா³னதோ. பாணாதிபாதஸ்ஸ அத்தி²தாய ஸோ புக்³க³லோ ‘‘பாணாதிபாதீ’’தி வுச்சதீதி ஆஹ – ‘‘பாணாதிபாதஸ்ஸ…பே… ஹோதீ’’தி. யஞ்ஹி யஸ்ஸ அத்தி², தேன ஸோ அபதி³ஸ்ஸதீதி. ப³ஹுதாயாதி அசக்கு²காதி³பே⁴தே³ன ப³ஹுபா⁴வதோ. பாணாதிபாதஸ்ஸ படிபக்கோ² அபாணாதிபாதோ. ஸோ பன அத்த²தோ காயத்³வாரிகோ ஸீலஸம்வரோதி ஆஹ ‘‘காயிகஸீலஸம்வரேனா’’தி. அத்தாபி மம் உபவதே³ய்யாதிஆதி³ பாணாதிபாதே ஆதீ³னவத³ஸ்ஸனம். ஆதீ³னவத³ஸ்ஸினோ ஹி ததோ ஓரமணம். தே³ஸனாவஸேனாதி அஞ்ஞத்த² ஸுத்தே அபி⁴த⁴ம்மே ச த³ஸஸு ஸம்யோஜனேஸு பஞ்சஸு நீவரணேஸு தே³ஸனாவஸேன அபரியாபன்னம்பி ஸம்யோஜனந்திபி நீவரணந்திபி இத⁴ வுத்தம். கஸ்மா? தத³த்த²ஸம்ப⁴வதோ. தேனாஹ – ‘‘வட்டப³ந்த⁴னட்டே²ன ஹிதப்படிச்சா²த³னட்டே²ன சா’’தி, பாணாதிபாதோ ஹி அபாணாதிபாதபச்சயம் ஹிதம் படிச்சா²தே³ந்தோவ உப்பஜ்ஜதீதி. ஏகோ அவிஜ்ஜாஸவோதி இத³ம் ஸஹஜாதவஸேன வுத்தம், உபனிஸ்ஸயவஸேன பன இதரேஸம்பி ஆஸவானம் யதா²ரஹம் ஸம்ப⁴வோ வேதி³தப்³போ³. பாணாதிபாதீ ஹி புக்³க³லோ ‘‘தப்பச்சயம் அத்த²ம் கரிஸ்ஸாமீ’’தி காமே பத்தே²தி. தி³ட்டி²ம் க³ண்ஹாதி, ப⁴வவிஸேஸம் பச்சாஸீஸதி. தத்த² உப்பன்னம் விஹனதி பா³த⁴தீதி விகா⁴தோ, து³க்க²ம், பரிளாஹனம் அனத்து²ப்பாத³வஸேன உபதாபனம் பரிளாஹோ, அயமேதேஸம் விஸேஸோ. ஸப்³ப³த்தா²தி ஸப்³பே³ஸு வாரேஸு. இமினா உபாயேனாதி அதிதே³ஸேன பன பரிக்³க³ஹிதோ அத்தோ² பரதோ ஆக³மிஸ்ஸதீதி.

34-40. இமஸ்மிம் பதே³தி ஏதேன ஸத்தஸுபி வாரேஸு ததா² ஆக³தம் பத³ம் ஸாமஞ்ஞதோ க³ஹிதம். தேனாஹ ‘‘இமினா’’திஆதி³. ரோஸனம் காயிகம் வாசஸிகஞ்சாதி தப்படிபக்கோ² அரோஸோபி ததா² து³விதோ⁴தி ஆஹ ‘‘காயிகவாசஸிகஸம்வரேனா’’தி. யதா² அபி⁴ஜ்ஜா² லோபோ⁴, அனபி⁴ஜ்ஜா² அலோபோ⁴, ஏவம் அகோதூ⁴பாயாஸோ அப்³யாபாதோ³, ஸம்வரே ஸுக²ந்தி ஸம்வரோதி த³ட்ட²ப்³போ³, அனதிலோபோ⁴ பன ஸதிஸம்வரே, அனதிமானோ ஞாணஸம்வரே ஸங்க³ஹம் க³ச்ச²தீதி த³ட்ட²ப்³ப³ம். இமேஸு பன பதே³ஸு ஏவம் ஸப்³ப³வாரேஸு யோஜனா காதப்³பா³தி ஸம்ப³ந்தோ⁴.

ஏவம் ஆஸவுப்பத்தி வேதி³தப்³பா³தி ஏத்த² வுத்தஸ்ஸபி ஏகஜ்ஜ²ம் வுச்சமானத்தா ‘‘புன அயம் ஸங்கே²பவினிச்ச²யோ’’தி வுத்தம். அஸம்மோஹத்த²ம் ஆரம்மணஸ்ஸ. புரிமேஸு தாவ சதூஸு வாரேஸு விரமிதும் ந ஸக்கோமீதி வத்தப்³ப³ம். ‘‘அத்தாபி மம் உபவதே³ய்யா’’தி ஏதஸ்ஸ பத³ஸ்ஸ அத்த²வண்ணனாயம் ‘‘ந ஸக்கோமீ’’தி, ‘‘அனுவிஜ்ஜாபி மம் விஞ்ஞூ க³ரஹேய்யு’’ந்தி ஏதஸ்ஸ பத³ஸ்ஸ அத்த²வண்ணனாயம் ‘‘ந ஸக்கோதீ’’தி வத்தப்³ப³ம், இமினா நயேன பச்சி²மேஸுபி சதூஸு யதா²ரஹம் யோஜனா வேதி³தப்³பா³. அதிமானே ப⁴வாஸவஅவிஜ்ஜாஸவாதி வுத்தம் மானேன ஸஹ தி³ட்டி²யா அனுப்பஜ்ஜனதோ, அதிமானோ பன காமராகே³னபி உப்பஜ்ஜதேவாதி ‘‘அதிமானே காமாஸவஅவிஜ்ஜாஸவா’’தி வத்தப்³ப³ம் ஸியா, ஸ்வாயம் நயோ வுத்தனயத்தா ஸுவிஞ்ஞேய்யோதி ந த³ஸ்ஸிதோ. பாதிமோக்க²ஸம்வரஸீலம் கதி²தம் ஆதி³தோ சதூஹி ச²ட்டே²ன வாதி பஞ்சஹி வாரேஹி, ஸேஸேஹி தீஹி பாதிமோக்க²ஸம்வரஸீலே டி²தஸ்ஸ பி⁴க்கு²னோ படிஸங்கா²பஹானம், ஸப்³பே³ஹிபி பன பி⁴க்கு²பா⁴வே டி²தஸ்ஸ கி³ஹிவோஹாரஸமுச்சே²தோ³ கதி²தோ. தத்த² ஸப்³ப³த்த² வத்தம் ‘‘இத³ஞ்சித³ஞ்ச மய்ஹம் காதும் நப்பதிரூப’’ந்தி படிஸங்கா²னவஸேன அகரணம் பஜஹனஞ்ச படிஸங்கா²பஹானம்.

காமாதீ³னவகதா²வண்ணனா

42. உபஸும்பே⁴ய்யாதி ஏத்த² உப-ஸத்³தோ³ ஸமீபத்தோ², ஸும்ப⁴னம் விக்கே²பனம். தேனேவ தமேனந்தி பு⁴ம்மத்தே² உபயோக³வசனந்தி ஆஹ – ‘‘தஸ்ஸ ஸமீபே கி²பேய்யா’’தி, தஸ்ஸ குக்குரஸ்ஸ ஸமீபே அட்டி²கங்கலம் கி²பேய்யாதி அத்தோ². நிம்மம்ஸத்தா கங்கலந்தி வுச்சதீதி இமினா விக³தமம்ஸாய அட்டி²கங்கலிகாய உரட்டி²ம்ஹி வா பிட்டி²கண்டகே வா ஸீஸட்டி²ம்ஹி வா கங்கல-ஸத்³தோ³ நிருள்ஹோதி த³ஸ்ஸேதி. ஸுனிக்கந்தந்தி நில்லிகி²தம் கத்வாவ நிப்³பி³ஸேஸம் லிகி²தம்.

ஏகத்துபட்டா²னஸ்ஸ அஜ்ஜு²பேக்க²னவஸேன பவத்தியா ஏகத்தா. தேனாஹ ‘‘சதுத்த²ஜா²னுபேக்கா²’’தி. யஸ்மா பனஸ்ஸ ஆரம்மணம்பி ஏகஸபா⁴வமேவ, தஸ்மா ஆஹ ‘‘ஸா ஹீ’’திஆதி³. லோகாமிஸஸங்கா²தாதி அபரிஞ்ஞாதவத்து²னா லோகேன ஆமஸிதப்³ப³தோ, லோகே வா ஆமிஸோதி ஸங்க²ம் க³தாய வஸேன காமகு³ணானம் காமபா⁴வோ ச ஆமிஸபா⁴வோ ச, ஸோ ஏவ நிப்பரியாயதோ ஆமிஸந்தி வத்தப்³ப³தம் அரஹதி. காமகு³ணாமிஸாதி காமகு³ணே ச²ந்த³ராகா³. க³ஹணட்டே²ன பு⁴ஸம் ஆதா³னட்டே²ன.

43. ட³யனம் ஆகாஸேன க³மனந்தி ஆஹ ‘‘உப்பதித்வா க³ச்சே²ய்யா’’தி. கி³ஜ்ஜா²தீ³னம் வாஸிப²ரஸு ந ஹோதீதி ஆஹ – ‘‘முக²துண்ட³கேன ட³ஸந்தா தச்சே²ய்யு’’ந்தி. விஸ்ஸஜ்ஜேய்யுந்தி ஏத்த² ‘‘விஸ்ஸஜ்ஜன’’ந்தி ஆகட்³ட⁴னம் அதி⁴ப்பேதம் அனேகத்த²த்தா தா⁴தூனம், ஆகட்³ட⁴னஞ்ச அனுப³ந்தி⁴த்வா பாதனந்தி ஆஹ ‘‘மம்ஸபேஸிம் நகே²ஹி கட்³டி⁴த்வா பாதேய்யு’’ந்தி.

47. புரிஸஸ்ஸ ஆரோஹனயோக்³யம் போரிஸேய்யம்.

48. ஸம்பன்னம் ஸுந்த³ரம் ப²லமஸ்ஸாதி ஸம்பன்னப²லம். ப²லூபபன்னந்தி ப²லேஹி உபேதந்தி ஆஹ ‘‘ப³ஹுப²ல’’ந்தி.

50. ஸுவிதூ³ரவிதூ³ரேதி அரியஸ்ஸ வினயே வோஹாரஸமுச்சே²த³தோ ஸுட்டு² விதூ³ரபூ⁴தே ஏவ விதூ³ரே அஹம் டி²தோ. கஸ்ஸசி நாம அத்த²ஸ்ஸபி அஜானனதோ ந ஆஜானந்தீதி அனாஜானீயாதி கத்துஸாத⁴னமஸ்ஸ த³ஸ்ஸேந்தோ அஜானனகேதி அஜானந்தபோ⁴ஜனஸீஸேன தேஸம் தா³தப்³ப³பச்சயே வத³தி. ஸேஸம் ஸுவிஞ்ஞேய்யமேவ.

போதலியஸுத்தவண்ணனாய லீனத்த²ப்பகாஸனா ஸமத்தா.