5. நிவாபஸுத்தவண்ணனா

261. நிவப்பதீதி நிவாபோ, நிவாபம் வத்தேதி, நிவாபபோ⁴ஜனம் வா ஏதஸ்ஸாதி நேவாபிகோ, நிவாபேன மிகே³ பலோபே⁴த்வா க³ண்ஹனகமாக³விகோ. திணபீ³ஜானீதி நிவாபதிணபீ³ஜானி. வப்பந்தி ஸஸ்ஸம் விய வபிதப்³ப³ட்டே²ன வப்பம். ‘‘மயம் விய அஞ்ஞே கே ஈதி³ஸம் லபி⁴ஸ்ஸந்தீ’’தி மானமத³ம் ஆபஜ்ஜிஸ்ஸந்தி. விஸ்ஸட்ட²ஸதிபா⁴வந்தி அனுஸ்ஸங்கிதபரிஸங்கிதபா⁴வம். திரச்சா²னா ஹி விஜாதியப³லவதிரச்சா²னவஸனட்டா²னேஸு ஸாஸங்கா உப்³பி³க்³க³ஹத³யா அப்பமத்தா ஹோந்தி விஸேஸதோ மாக³விகாதி³மனுஸ்ஸூபசாரே, ரஸதண்ஹாய பன ப³த்³தா⁴ பமாத³ம் ஆபஜ்ஜஸ்ஸந்தி. நிவபதி ஏத்தா²தி நிவாபோ, நிவாபபூ⁴மி நிவாபட்டா²னம். தேனாஹ ‘‘நிவாபட்டா²னே’’தி. ‘‘யதா²காமகரணீயா’’தி வுத்தமத்த²ம் விவரிதும் ‘‘ஏகம் கிரா’’திஆதி³ வுத்தம். தத்த² நீவாரவனம் வியாதி நீவாரஸ்ஸ ஸமூஹோ விய. நீவாரோ நாம அரஞ்ஞே ஸயம்ஜாதவீஹிஜாதி. மேக⁴மாலா வியாதி மேக⁴க⁴டா விய. ஏகக்³க⁴னந்தி ஏகஜ்ஜ²ம் விய அவிரட்ட²ம். பக்கமந்தீதி ஆஸங்கபரிஸங்கா ஹுத்வா பக்கமந்தி. கண்ணே சாலயமானாதி அனாஸங்கந்தானம் பஹட்டா²காரத³ஸ்ஸனம். மண்ட³லகு³ம்ப³ந்தி மண்ட³லகாகாரேன டி²தம் கு³ம்ப³ம்.

262. கப்பேத்வாதி உபமாபா⁴வேன பரிகப்பேத்வா. மிகே³ அத்தனோ வஸே வத்தாபனம் வஸீபா⁴வோ. ஸோ ஏவ இஜ்ஜ²னட்டே²ன இத்³தி⁴, பபா⁴வனட்டே²ன ஆனுபா⁴வோ.

263. ப⁴யேன போ⁴க³தோதி ப⁴யேன ஸஹ ஸப⁴யம் நிவாபபரிபோ⁴க³தோ. ப³லவீரியந்தி காயப³லஞ்ச உட்டா²னவீரியஞ்ச. அட்ட²கதா²யம் பன ப³லமேவ வீரியம். ப³லந்தி ச ஸரீரப³லம், தஞ்ச அத்த²தோ மனஸிகாரமக்³கே³ஹி அபராபரம் ஸஞ்சரணகவாதோதி வுத்தம் ‘‘அபராபரம் ஸஞ்சரணவாயோதா⁴தூ’’தி.

264. ஸிக்கி²தகேராடிகாதி பரிசிதஸாடே²ய்யா, வஞ்சகாதி அத்தோ². இத்³தி⁴மந்தோ விய ஆனுபா⁴வவந்தோ விய. பசுரஜனேஹி பரபூ⁴தா ஜாதாதி பரஜனா, மஹாபூ⁴தா. தேனாஹ ‘‘யக்கா²’’தி. ஸமந்தா ஸப்பதே³ஸந்தி ஸமந்ததோ பதே³ஸவந்தம் விபுலோகாஸஸன்னிவாஸட்டா²னம். தஸ்ஸ பன ஸப்பதே³ஸதா மஹாஓகாஸதாயாதி வுத்தம் ‘‘மஹந்தம் ஓகாஸ’’ந்தி.

265. க⁴ட்டேஸ்ஸந்தீதி ‘‘ஸப⁴யஸமுட்டா²ன’’ந்தி ஸஞ்ஞாதா³னவஸேன சித்தம் சேதேஸ்ஸந்தி, தாஸேஸ்ஸந்தீதி அத்தோ². பரிச்சஜிஸ்ஸந்தீதி நிப்³பி³ஸிஸ்ஸந்தி. மஹல்லகோதி ஜாதியா மஹல்லகோ ஜிண்ணோ. து³ப்³ப³லோதி ப்³யாதி⁴வஸேன, பகதியா வா ப³லவிரஹிதோ.

267. நிவாபஸதி³ஸதாய நிவாபோதி வா. லோகபரியாபன்னம் ஹுத்வா கிலேஸேஹி ஆமஸிதப்³ப³தாய லோகாமிஸானீதி வா. வட்டே ஆமிஸபூ⁴தத்தா வட்டாமிஸபூ⁴தானம். வஸம் வத்தேதீதி காமகு³ணேஹி காமகு³ணே கி³த்³தே⁴ ஸத்தே தஸ்ஸேவ கே³த⁴ஸ்ஸ வஸேன அத்தனோ வஸே வத்தேதீதி. தேனாஹ –

‘‘அந்தலிக்க²சரோ பாஸோ, ய்வாயம் சரதி மானஸோ;

தேன தம் பா³த⁴யிஸ்ஸாமி, ந மே ஸமண மோக்க²ஸீ’’தி. (ஸம். நி. 1.151; மஹாவ. 33);

அயந்தி பட²மமிக³ஜாதூபமா. வானபத்த²ஸ்ஸ ஸதோவ பபஞ்சபரத³த்திகாதி³ஸபுத்ததா³ரனிக்க²மனம் ஸந்தா⁴யாஹ ‘‘ஸபுத்தப⁴ரியபப்³ப³ஜ்ஜாயா’’தி.

268. காமதோ சித்தஸ்ஸ விமுத்தி இத⁴ சேதோவிமுத்தீதி அதி⁴ப்பேதாதி ஆஹ ‘‘சேதோவிமுத்தி நாம…பே… உப்பன்னஅஜ்ஜா²ஸயோ’’தி. காமே விஸ்ஸஜ்ஜேத்வா புன தத்த² நிமுக்³க³தாய து³தியஸமணப்³ராஹ்மணா து³தியமிக³ஜாதூபமா வுத்தா.

269. ததியஸமணப்³ராஹ்மணா யதா²பரிச்சத்தே காமே பரிச்சஜித்வா ஏவம் டி²தா, ந து³தியா விய தத்த² நிமுக்³கா³தி அதி⁴ப்பாயேன ‘‘கிம் பன தே அகம்ஸூ’’தி புச்ச²தி. இதரே காமம் உஜுகம் காமகு³ணேஸு ந நிமுக்³கா³, பரியாயேன பன நிமுக்³கா³ தி³ட்டி²ஜாலேன ச அஜ்ஜோ²த்த²டாதி த³ஸ்ஸேந்தோ ‘‘கா³மனிக³மஜனபத³ராஜதா⁴னியோ’’திஆதி³மாஹ. தி³ட்டி²ஜாலம்பி தண்ஹாஜாலானுக³தமேவாதி ஆஹ ‘‘மாரஸ்ஸ பாபிமதோ தி³ட்டி²ஜாலேன பரிக்கி²பித்வா’’தி.

271. க²ந்த⁴கிலேஸாபி⁴ஸங்கா²ரமாரா வா இத⁴ மாரக்³க³ஹணேன க³ஹிதாதி த³ட்ட²ப்³ப³ம். அக்கீ²னி பி⁴ந்தி³ த³ட்டு²ம் அஸமத்த²பா⁴வாபாத³னேன. தேனாஹ ‘‘விபஸ்ஸனாபாத³கஜ்ஜா²ன’’ந்திஆதி³. கிஞ்சாபி மாரோ யம் கிஞ்சி ஜா²னம் ஸமாபன்னஸ்ஸபி பி⁴க்கு²னோ சித்தம் இமம் நாம ஆரம்மணம் நிஸ்ஸாய வத்ததீதி ந ஜானாதி, இதா⁴தி⁴ப்பேதஸ்ஸ பன பி⁴க்கு²னோ வஸேன ‘‘விபஸ்ஸனாபாத³கஜ்ஜா²ன’’ந்தி வுத்தம். தேனேவ பரியாயேனாதி ‘‘ந மாரஸ்ஸ அக்கீ²னி பி⁴ந்தீ³’’தி ஏவமாதி³னா யதா²வுத்தபரியாயேன. அத³ஸ்ஸனம் க³தோதி ஏத்தா²பி ஏஸேவ நயோ. சக்கு²ஸ்ஸ பத³ம் பதிட்டா²தி ச இத⁴ ஆரம்மணம் அதி⁴ப்பேதம் தம் பரிக்³க³ய்ஹ பவத்தனதோதி ஆஹ ‘‘அப்பதிட்ட²ம் நிராரம்மண’’ந்தி. ஸோதி மாரோ. தி³ஸ்வாதி த³ஸ்ஸனஹேது. யஸ்மா மக்³கே³ன சதுஸச்சத³ஸ்ஸனஹேது ஆஸவா ந பரிக்கீ²ணா. ப²லக்க²ணே ஹி தே கீ²ணாதி வுச்சந்தீதி.

லோகேதி ஸத்தலோகே ஸங்கா²ரலோகே ச. ஸத்தவிஸத்தபா⁴வேனாதி லக்³க³பா⁴வேன சேவ ஸவிஸேஸம் ஆஸத்தபா⁴வேன ச. அத² வாதிஆதி³னா நித்³தே³ஸனயவஸேன (மஹானி. 3, சூளனி. மேத்தகூ³மாணவபுச்சா²னித்³தே³ஸ 22, 23; சூளனி. க²க்³க³விஸாணஸுத்தனித்³தே³ஸ 124) விஸத்திகாபத³ம் நித்³தி³ஸதி. விஸதாதி வித்த²டா ரூபாதீ³ஸு தேபூ⁴மகத⁴ம்மேஸு ப்³யாபனவஸேன விஸடாதி புரிமவசனமேவ தகாரஸ்ஸ டகாரம் கத்வா வுத்தம். விஸாலாதி விபுலா. விஸக்கதீதி பரிஸக்கதி ஸஹதி. ரத்தோ ஹி ராக³வத்து²னா பாதே³ன தாலியமானோபி ஸஹதி. ஓஸக்கனம், விப்ப²ந்த³னம் வா விஸக்கனந்திபி வத³ந்தி. விஸம்ஹரதீதி யதா² ததா² காமேஸு ஆனிஸம்ஸம் த³ஸ்ஸேந்தீ விவிதே⁴ஹி ஆகாரேஹி நேக்க²ம்மாபி⁴முக²ப்பவத்திதோ சித்தம் ஸம்ஹரதி ஸங்கி²பதி, விஸம் வா து³க்க²ம், தம் ஹரதி உபனேதீதி அத்தோ². விஸம்வாதி³காதி அனிச்சாதி³ம் நிச்சாதி³தோ க³ண்ஹாபேந்தீ விஸம்வாதி³கா ஹோதி. து³க்க²னிப்³ப³த்தகஸ்ஸ கம்மஸ்ஸ ஹேதுபா⁴வதோ விஸமூலா, விஸம் வா து³க்க²து³க்கா²தி³பூ⁴தா வேத³னா மூலம் ஏதிஸ்ஸாதி விஸமூலா. து³க்க²ஸமுத³யத்தா விஸம் ப²லம் ஏதிஸ்ஸாதி விஸப²லா. தண்ஹாய ரூபாதி³கஸ்ஸ து³க்க²ஸ்ஸேவ பரிபோ⁴கோ³ ஹோதி, ந அமதஸ்ஸாதி ஸா ‘‘விஸபரிபோ⁴கா³’’தி வுத்தா. ஸப்³ப³த்த² நிருத்திவஸேன ஸத்³த³ஸித்³தி⁴ வேதி³தப்³பா³. யோ பனேத்த² பதா⁴னோ அத்தோ², தம் த³ஸ்ஸேதும் புன ‘‘விஸாலா வா பனா’’திஆதி³ வுத்தம். நித்திண்ணோ உத்திண்ணோதி உபஸக்³க³வஸேன பத³ம் வட்³டி⁴தம். நிரவஸேஸதோ வா திண்ணோ நித்திண்ணோ. தேன தேன மக்³கே³ன உத்³த⁴முத்³த⁴ம் திண்ணோ உத்திண்ணோ. யம் பனேத்த² அத்த²தோ அவிப⁴த்தம், தம் ஸுவிஞ்ஞேய்யமேவ.

நிவாபஸுத்தவண்ணனாய லீனத்த²ப்பகாஸனா ஸமத்தா.