1. கோஸியஸிக்கா²பத³வண்ணனா

ஏளகலோமவக்³க³ஸ்ஸ பட²மே கோஸியமிஸ்ஸகந்தி ஏகேனாபி கோஸியம்ஸுனா அந்தமஸோ தஸ்ஸ கரணட்டா²னே வாதவேகே³ன நிபாதிதேனாபி மிஸ்ஸீகதம். ஸந்த²தந்தி ஸமே பூ⁴மிபா⁴கே³ கோஸியம்ஸூனி உபரூபரி ஸந்த²ரித்வா கஞ்ஜியாதீ³ஹி ஸிஞ்சித்வா கத்தப்³ப³தாலக்க²ணம். காராபேய்ய நிஸ்ஸக்³கி³யந்தி கரணகாராபனப்பயோகே³ஸு து³க்கடம், படிலாபே⁴ன நிஸ்ஸக்³கி³யம் ஹோதி. ஏத்த² ச ‘‘இத³ம் மே, ப⁴ந்தே, கோஸியமிஸ்ஸகம் ஸந்த²தம் காராபிதம் நிஸ்ஸக்³கி³ய’’ந்தி (பாரா. 544) இமினா நயேன நிஸ்ஸஜ்ஜனவிதா⁴னம் வேதி³தப்³ப³ம், இமஸ்ஸேவ வசனஸ்ஸ அனுஸாரேன இதோ பரம் ஸப்³ப³ஸந்த²தம் வேதி³தப்³ப³ம். ஸக்கா ஹி ஏத்தாவதா ஜானிதுந்தி ந தம் இதோ பரம் த³ஸ்ஸயிஸ்ஸாம.

ஆளவியம் ச²ப்³ப³க்³கி³யே ஆரப்³ப⁴ கோஸியமிஸ்ஸகம் ஸந்த²தம் காராபனவத்து²ஸ்மிம் பஞ்ஞத்தம், அஸாதா⁴ரணபஞ்ஞத்தி, அத்தனோ அத்தா²ய காராபனவஸேன ஸாணத்திகம், அத்தனா விப்பகதபஅயோஸாபனனயேன சதுக்கபாசித்தியம், அஞ்ஞஸ்ஸத்தா²ய கரணகாராபனேஸு அஞ்ஞேன கதம் படிலபி⁴த்வா பரிபு⁴ஞ்ஜனே ச து³க்கடம். விதானாதி³கரணே, உம்மத்தகாதீ³னஞ்ச அனாபத்தி. கோஸியமிஸ்ஸகபா⁴வோ, அத்தனோ அத்தா²ய ஸந்த²தஸ்ஸ கரணகாராபனம், படிலாபோ⁴ சாதி இமானேத்த² தீணி அங்கா³னி. ஸமுட்டா²னாதீ³னி தோ⁴வாபனஸிக்கா²பதே³ வுத்தனயேனேவாதி.

கோஸியஸிக்கா²பத³வண்ணனா நிட்டி²தா.