1. சீவரவக்³கோ³

1. கதி²னஸிக்கா²பத³வண்ணனா

நிஸ்ஸக்³கி³யேஸு பன சீவரவக்³க³ஸ்ஸ தாவ பட²மஸிக்கா²பதே³ நிட்டி²தசீவரஸ்மிந்தி ஸூசிகம்மபரியோஸானேன வா, ‘‘நட்ட²ம் வா வினட்ட²ம் வா த³ட்³ட⁴ம் வா சீவராஸா வா உபச்சி²ன்னா’’தி (பாரா. 463) இமேஸு வா யேன கேனசி ஆகாரேன நிட்டி²தே சீவரஸ்மிம், சீவரஸ்ஸ கரணபலிபோ³தே⁴ உபச்சி²ன்னேதி அத்தோ². அத்த²தகதி²னஸ்ஸ ஹி பி⁴க்கு²னோ யாவ இமேஹாகாரேஹி சீவரபலிபோ³தோ⁴ ந சி²ஜ்ஜதி, தாவ கதி²னானிஸம்ஸம் லப⁴தி. உப்³ப⁴தஸ்மிம் கதி²னேதி யம் ஸங்க⁴ஸ்ஸ கதி²னம் அத்த²தம், தஸ்மிஞ்ச உப்³ப⁴தே. தத்ரேவம் ஸங்கே²பதோ கதி²னத்தா²ரோ ச உப்³பா⁴ரோ ச வேதி³தப்³போ³. அயஞ்ஹி கதி²னத்தா²ரோ நாம ப⁴க³வதா புரிமவஸ்ஸம்வுட்டா²னம் அனுஞ்ஞாதோ, ஸோ ஸப்³ப³ந்திமேன பரிச்சே²தே³ன பஞ்சன்னம் ஜனானம் வட்டதி, தஸ்மா யத்த² சத்தாரோ வா தயோ வா த்³வே வா ஏகோ வா புரிமவஸ்ஸம் உபக³தோ, தத்த² பச்சி²மவஸ்ஸூபக³தே க³ணபூரகே கத்வா அத்த²ரிதப்³ப³ம், தே ச க³ணபூரகாவ ஹோந்தி, ஆனிஸம்ஸே ந லப⁴ந்தி, தஸ்மா ஸசே புரிமவஸ்ஸம்வுட்டா²னம் க³ஹட்ட²பப்³ப³ஜிதேஸு யோ கோசி த⁴ம்மேன ஸமேன சீவரம் தே³தி ‘‘இமினா கதி²னம் அத்த²ரதா²’’தி (மஹாவ. 306-309), தம் க²ந்த⁴கே வுத்தாய ஞத்திது³தியகம்மவாசாய கதி²னத்தா²ராரஹஸ்ஸ பி⁴க்கு²னோ தா³தப்³ப³ம். தேன தத³ஹேவ பஞ்ச வா அதிரேகானி வா க²ண்டா³னி சி²ந்தி³த்வா ஸங்கா⁴டி வா உத்தராஸங்கோ³ வா அந்தரவாஸகோ வா காதப்³போ³, ஸேஸபி⁴க்கூ²ஹிபி தஸ்ஸ ஸஹாயேஹி ப⁴விதப்³ப³ம், ஸசே கதசீவரமேவ உப்பஜ்ஜதி, ஸுந்த³ரமேவ. அச்சி²ன்னாஸிப்³பி³தம் பன ந வட்டதி. தேன பி⁴க்கு²னா ஸசே ஸங்கா⁴டியா அத்த²ரிதுகாமோ ஹோதி, போராணிகம் ஸங்கா⁴டிம் பச்சுத்³த⁴ரித்வா நவம் ஸங்கா⁴டிம் அதி⁴ட்ட²ஹித்வா ‘‘இமாய ஸங்கா⁴டியா கதி²னம் அத்த²ராமீ’’தி அத்த²ரிதப்³ப³ம். உத்தராஸங்க³அந்தரவாஸகேஸுபி ஏஸேவ நயோ. ததோ தேன புரிமவஸ்ஸம்வுட்டே² அந்தோஸீமாக³தே பி⁴க்கூ² உபஸங்கமித்வா ‘‘அத்த²தம், ப⁴ந்தே, ஸங்க⁴ஸ்ஸ கதி²னம், த⁴ம்மிகோ கதி²னத்தா²ரோ, அனுமோத³தா²’’தி (பரி. 413) வத்தப்³ப³ம், தே²ரானஞ்ச நவானஞ்ச ப³ஹூனஞ்ச ஏகஸ்ஸ ச அனுரூபம் ஸல்லக்கே²த்வா வத்தப்³ப³ம். தேஹிபி ‘‘அத்த²தம், ப⁴ந்தே, ஸங்க⁴ஸ்ஸ கதி²ன’’ந்தி வா ‘‘அத்த²தம், ஆவுஸோ, ஸங்க⁴ஸ்ஸ கதி²ன’’ந்தி வா வத்வா ‘‘த⁴ம்மிகோ கதி²னத்தா²ரோ, அனுமோதா³மா’’தி வா ‘‘அனுமோதா³மீ’’தி வா வத்தப்³ப³ம். புரிமவஸ்ஸம்வுட்டே²ஸுபி யே அனுமோத³ந்தி, தேஸம்யேவ அத்த²தம் ஹோதி கதி²னம். தே ததோ பட்டா²ய யாவ கதி²னஸ்ஸுப்³பா⁴ரா அனாமந்தசாரோ, அஸமாதா³னசாரோ, யாவத³த்த²சீவரம், க³ணபோ⁴ஜனம், யோ ச தத்த² சீவருப்பாதோ³, தஸ்மிம் ஆவாஸே ஸங்க⁴ஸ்ஸ உப்பன்னசீவரஞ்சாதி இமே பஞ்சானிஸம்ஸே லப⁴ந்தி, அயம் தாவ கதி²னத்தா²ரோ. தம் பனேதம் கதி²னம் ‘‘அட்டி²மா, பி⁴க்க²வே, மாதிகா கதி²னஸ்ஸுப்³பா⁴ராய பக்கமனந்திகா நிட்டா²னந்திகா ஸன்னிட்டா²னந்திகா நாஸனந்திகா ஸவனந்திகா ஆஸாவச்சே²தி³கா ஸீமாதிக்கமனந்திகா ஸஹுப்³பா⁴ரா’’தி (மஹாவ. 310) ஏவம் வுத்தாஸு அட்ட²ஸு மாதிகாஸு அஞ்ஞதரவஸேன உத்³த⁴ரீயதி, தத்த² வித்தா²ரவினிச்ச²யோ ஸமந்தபாஸாதி³காயம் (மஹாவ. அட்ட². 310) வுத்தனயேன வேதி³தப்³போ³. இதி ‘‘உப்³ப⁴தஸ்மிம் கதி²னே’’திஇமினா ஸேஸபலிபோ³தா⁴பா⁴வம் த³ஸ்ஸேதி.

த³ஸாஹபரமந்தி த³ஸ அஹானி பரமோ பரிச்சே²தோ³ அஸ்ஸாதி த³ஸாஹபரமோ, தம் த³ஸாஹபரமம் காலம் தா⁴ரேதப்³ப³ந்தி அத்தோ². அதி⁴ட்டி²தவிகப்பிதேஸு அபரியாபன்னத்தா அதிரேகம் சீவரந்தி அதிரேகசீவரம், சீவரம் நாம கோ²மம் கப்பாஸிகம் கோஸேய்யம் கம்ப³லம் ஸாணம் ப⁴ங்க³ந்தி ஏதேஸம் வா தத³னுலோமானம் வா அஞ்ஞதரம் அயமஸ்ஸ ஜாதி, பமாணதோ பன தம் விகப்பனுபக³ம் பச்சி²மம் இத⁴ அதி⁴ப்பேதம். வுத்தஞ்ஹேதம் ‘‘அனுஜானாமி, பி⁴க்க²வே, ஆயாமதோ அட்ட²ங்கு³லம் ஸுக³தங்கு³லேன சதுரங்கு³லவித்த²தம் பச்சி²மம் சீவரம் விகப்பேது’’ந்தி (மஹாவ. 358). யம் பன வுத்தம் ‘‘அதி⁴ட்டி²தவிகப்பிதேஸு அபரியாபன்னத்தா’’தி, ஏத்த² ‘‘அனுஜானாமி, பி⁴க்க²வே, திசீவரம் அதி⁴ட்டா²தும் ந விகப்பேதும், வஸ்ஸிகஸாடிகம் வஸ்ஸானம் சதுமாஸம் அதி⁴ட்டா²தும் ததோ பரம் விகப்பேதும், நிஸீத³னம் அதி⁴ட்டா²தும் ந விகப்பேதும் பச்சத்த²ரணம் அதி⁴ட்டா²தும் ந விகப்பேதும், கண்டு³ப்படிச்சா²தி³ம் யாவ ஆபா³தா⁴ அதி⁴ட்டா²தும் ததோ பரம் விகப்பேதும், முக²புஞ்ச²னசோளகம் அதி⁴ட்டா²தும் ந விகப்பேதும், பரிக்கா²ரசோளம் அதி⁴ட்டா²தும் ந விகப்பேது’’ந்தி (மஹாவ. 358) இமினா நயேன அதி⁴ட்டா²தப்³ப³விகப்பேதப்³ப³தா ஜானிதப்³பா³. தத்த² திசீவரம் அதி⁴ட்ட²ஹந்தேன ரஜித்வா கப்பபி³ந்து³ம் த³த்வா பமாணயுத்தமேவ அதி⁴ட்டா²தப்³ப³ம், தஸ்ஸ பமாணம் உக்கட்ட²பரிச்சே²தே³ன ஸுக³தசீவரதோ ஊனகம் வட்டதி, லாமகபரிச்சே²தே³ன ஸங்கா⁴டியா தாவ உத்தராஸங்க³ஸ்ஸ ச தீ³க⁴தோ முட்டி²பஞ்சகம், திரியம் முட்டி²த்திகம், அந்தரவாஸகோ தீ³க⁴தோ முட்டி²பஞ்சகோ, திரியம் த்³விஹத்தோ²பி வட்டதி. வுத்தப்பமாணதோ பன அதிரேகஞ்ச ஊனகஞ்ச ‘‘பரிக்கா²ரசோள’’ந்தி அதி⁴ட்டா²தப்³ப³ம். தத்த² யஸ்மா ‘‘த்³வே சீவரஸ்ஸ அதி⁴ட்டா²னானி காயேன வா அதி⁴ட்டே²தி, வாசாய வா அதி⁴ட்டே²தீ’’தி வுத்தம், தஸ்மா புராணஸங்கா⁴டிம் ‘‘இமம் ஸங்கா⁴டிம் பச்சுத்³த⁴ராமீ’’தி பச்சுத்³த⁴ரித்வா நவம் ஹத்தே²ன க³ஹேத்வா ‘‘இமம் ஸங்கா⁴டிம் அதி⁴ட்டா²மீ’’தி சித்தேன ஆபோ⁴க³ம் கத்வா காயவிகாரம் கரோந்தேன காயேன வா அதி⁴ட்டா²தப்³பா³, வசீபே⁴த³ம் கத்வா வாசாய வா அதி⁴ட்டா²தப்³பா³. தத்ர து³வித⁴ம் அதி⁴ட்டா²னம் – ஸசே ஹத்த²பாஸே ஹோதி, ‘‘இமம் ஸங்கா⁴டிம் அதி⁴ட்டா²மீ’’தி வாசா பி⁴ந்தி³தப்³பா³. அத² அந்தோக³ப்³பா⁴தீ³ஸு ஸாமந்தவிஹாரே வா ஹோதி, ட²பிதட்டா²னம் ஸல்லக்கே²த்வா ‘‘ஏதம் ஸங்கா⁴டிம் அதி⁴ட்டா²மீ’’தி வாசா பி⁴ந்தி³தப்³பா³. ஏஸ நயோ உத்தராஸங்கே³ ச அந்தரவாஸகே ச. நாமமத்தமேவ ஹி விஸேஸோ. தஸ்மா ஸப்³பா³னி ஸங்கா⁴டிம் உத்தராஸங்க³ம் அந்தரவாஸகந்தி ஏவம் அத்தனோ அத்தனோ நாமேனேவ அதி⁴ட்டா²தப்³பா³னி. ஸசே அதி⁴ட்ட²ஹித்வா ட²பிதவத்தே²ஹி ஸங்கா⁴டிஆதீ³னி கரோதி, நிட்டி²தே ரஜனே ச கப்பே ச ‘‘இமம் பச்சுத்³த⁴ராமீ’’தி பச்சுத்³த⁴ரித்வா புன அதி⁴ட்டா²தப்³பா³னி. இத³ஞ்ச பன திசீவரம் ஸுக²பரிபோ⁴க³த்த²ம் பரிக்கா²ரசோளம் அதி⁴ட்டா²தும்பி வட்டதி.

வஸ்ஸிகஸாடிகா அனதிரித்தபமாணா நாமம் க³ஹேத்வா வுத்தனயேனேவ சத்தாரோ வஸ்ஸிகே மாஸே அதி⁴ட்டா²தப்³பா³, ததோ பரம் பச்சுத்³த⁴ரித்வா விகப்பேதப்³பா³, வண்ணபே⁴த³மத்தரத்தாபி சேஸா வட்டதி, த்³வே பன ந வட்டந்தி. நிஸீத³னம் வுத்தனயேன அதி⁴ட்டா²தப்³ப³மேவ, தஞ்ச கோ² பமாணயுத்தம் ஏகமேவ, த்³வே ந வட்டந்தி. பச்சத்த²ரணம்பி அதி⁴ட்டா²தப்³ப³மேவ, தம் பன மஹந்தம்பி ஏகம்பி ப³ஹூனிபி வட்டந்தி, நீலம்பி பீதகம்பி ஸத³ஸம்பி புப்ப²த³ஸம்பீதி ஸப்³ப³ப்பகாரம்பி வட்டதி. கண்டு³ப்படிச்சா²தி³ யாவ ஆபா³தோ⁴ அத்தி², தாவ பமாணிகா அதி⁴ட்டா²தப்³பா³, ஆபா³தே⁴ வூபஸந்தே பச்சுத்³த⁴ரித்வா விகப்பேதப்³பா³, ஸா ஏகாவ வட்டதி. முக²புஞ்ச²னசோளம் அதி⁴ட்டா²தப்³ப³மேவ, தம் பன ஏகம்பி ப³ஹூனிபி மஹந்தம்பி வட்டதியேவ. பரிக்கா²ரசோளே க³ணனா நத்தி², யத்தகம் இச்ச²தி, தத்தகம் அதி⁴ட்டா²தப்³ப³மேவ. த²விகாபி பரிஸ்ஸாவனம்பி விகப்பனுபக³ம் பச்சி²மபமாணம் ‘‘பரிக்கா²ரசோள’’ந்தி அதி⁴ட்டா²தப்³ப³மேவ, ப³ஹூனிபி ஏகதோ கத்வா ‘‘இமானி சீவரானி பரிக்கா²ரசோளானி அதி⁴ட்டா²மீ’’திஆதி³னா நயேன அதி⁴ட்டா²தும் வட்டதியேவ. மஞ்சபி⁴ஸி பீட²பி⁴ஸி பி³ப்³போ³ஹனம் பாவாரோ கோஜவோதி ஏதேஸு பன ஸேனாஸனபரிக்கா²ரத்தா²ய தி³ன்னபச்சத்த²ரணே ச அதி⁴ட்டா²னகிச்சம் நத்தி²யேவ. ஸப்³ப³ஞ்ச பனேதம் வுத்தப்பகாரேன அதி⁴ட்டி²தசீவரம் அஞ்ஞஸ்ஸ தா³னேன, அச்சி²ந்தி³த்வா க³ஹணேன, விஸ்ஸாஸக்³கா³ஹேன, ஹீனாயாவத்தனேன, ஸிக்கா²பச்சக்கா²னேன, காலங்கிரியாய, லிங்க³பரிவத்தனேன, பச்சுத்³த⁴ரணேனாதி இமேஹி அட்ட²ஹி காரணேஹி அதி⁴ட்டா²னம் விஜஹதி. திசீவரம் பன கனிட்ட²ங்கு³லினக²பிட்டி²ப்பமாணேன சி²த்³தே³னாபி விஜஹதி, தஞ்ச கோ² வினிப்³பே³தே⁴னேவ. ஸசே ஹி சி²த்³த³ஸ்ஸ அப்³ப⁴ந்தரே ஏகதந்துபி அச்சி²ன்னோ ஹோதி, ரக்க²தியேவ. தத்த² ஸங்கா⁴டியா ச உத்தராஸங்க³ஸ்ஸ ச தீ³க⁴ந்ததோ வித³த்தி²ப்பமாணஸ்ஸ திரியந்ததோ அட்ட²ங்கு³லப்பமாணஸ்ஸ பதே³ஸஸ்ஸ ஓரதோ சி²த்³த³ம் அதி⁴ட்டா²னம் பி⁴ந்த³தி, அந்தரவாஸகேபி தீ³க⁴ந்ததோ ஏததே³வ பமாணம், திரியந்தேன பன சதுரங்கு³லதா வேதி³தப்³பா³. திண்ணன்னம்பி வுத்தோகாஸஸ்ஸ பரதோ ந பி⁴ந்த³தி, தஸ்மா சி²த்³தே³ ஜாதே திசீவரம் அதிரேகசீவரட்டா²னே திட்ட²தி, ஸூசிகம்மம் கத்வா புன அதி⁴ட்டா²தப்³ப³ம். வஸ்ஸிகஸாடிகா வஸ்ஸானமாஸாதிக்கமேனாபி, கண்டு³ப்படிச்சா²தி³ ஆபா³த⁴வூபஸமேனாபி அதி⁴ட்டா²னம் விஜஹதி. தஸ்மா ஸா ததோ பரம் விகப்பேதப்³பா³. விகப்பனலக்க²ணம் பன ஸப்³ப³சீவரானம் விகப்பனஸிக்கா²பதே³யேவ வண்ணயிஸ்ஸாம. கேவலஞ்ஹி இமஸ்மிம் ஓகாஸே யம் ஏவம் அனதி⁴ட்டி²தம் அவிகப்பிதஞ்ச, தம் ‘‘அதிரேகசீவர’’ந்தி வேதி³தப்³ப³ம்.

தம் அதிக்காமயதோ நிஸ்ஸக்³கி³யம் பாசித்தியந்தி தம் யதா²வுத்தஜாதிப்பமாணம் சீவரம்த³ஸாஹபரமம் காலம் அதிக்காமயதோ ஏத்த²ந்தரே யதா² அதிரேகசீவரம் ந ஹோதி, ததா² அக்ருப்³ப³தோ நிஸ்ஸக்³கி³யம் பாசித்தியம், தஞ்ச சீவரம் நிஸ்ஸக்³கி³யம் ஹோதி, பாசித்தியம் ஆபத்தி சஸ்ஸ ஹோதீதி அத்தோ². அத² வா நிஸ்ஸஜ்ஜனம் நிஸ்ஸக்³கி³யம், புப்³ப³பா⁴கே³ கத்தப்³ப³ஸ்ஸ வினயகம்மஸ்ஸேதம் நாமம், நிஸ்ஸக்³கி³யமஸ்ஸ அத்தீ²தி நிஸ்ஸக்³கி³யமிச்சேவ. கிம் தம்? பாசித்தியம். தம் அதிக்காமயதோ ஸஹ நிஸ்ஸக்³கி³யேன நிஸ்ஸக்³கி³யவினயகம்மம் பாசித்தியம் ஹோதீதி அயமேத்த² அத்தோ². தஞ்ச பனேதம் சீவரம் யம் தி³வஸம் உப்பன்னம், தஸ்ஸ யோ அருணோ, ஸோ உப்பன்னதி³வஸனிஸ்ஸிதோ, தஸ்மா சீவருப்பாத³தி³வஸேன ஸத்³தி⁴ம் ஏகாத³ஸே அருணுக்³க³மனே த³ஸாஹாதிக்கமிதம் ஹோதி, தம் க³ஹேத்வா ஸங்க⁴ஸ்ஸ வா க³ணஸ்ஸ வா புக்³க³லஸ்ஸ வா நிஸ்ஸஜ்ஜிதப்³ப³ம், தத்ராயம் நயோ – ஸங்க⁴ஸ்ஸ தாவ ஏவம் நிஸ்ஸஜ்ஜிதப்³ப³ம் ‘‘இத³ம் மே, ப⁴ந்தே, சீவரம் த³ஸஹாதிக்கந்தம் நிஸ்ஸக்³கி³யம், இமாஹம் ஸங்க⁴ஸ்ஸ நிஸ்ஸஜ்ஜாமீ’’தி நிஸ்ஸஜ்ஜித்வா ‘‘அஹம், ப⁴ந்தே, ஏகம் நிஸ்ஸக்³கி³யம் பாசித்தியம் ஆபன்னோ, தம் படிதே³ஸேமீ’’தி ஏவம் ஆபத்தி தே³ஸேதப்³பா³. ஸசே த்³வே ஹோந்தி, ‘‘த்³வே’’தி வத்தப்³ப³ம், ஸசே தது³த்தரி, ‘‘ஸம்ப³ஹுலா’’தி வத்தப்³ப³ம். நிஸ்ஸஜ்ஜனேபி ஸசே த்³வே வா ப³ஹூனி வா ஹோந்தி, ‘‘இமானி மே, ப⁴ந்தே, சீவரானி த³ஸாஹாதிக்கந்தானி நிஸ்ஸக்³கி³யானி, இமானாஹம் ஸங்க⁴ஸ்ஸ நிஸ்ஸஜ்ஜாமீ’’தி வத்தப்³ப³ம், பாளிம் வத்தும் அஸக்கோந்தேன அஞ்ஞதா²பி வத்தப்³ப³ம். ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ ‘‘ஸுணாது மே, ப⁴ந்தே, ஸங்கோ⁴, அயம் இத்த²ன்னாமோ பி⁴க்கு² ஆபத்திம் ஸரதி விவரதி உத்தானிம் கரோதி தே³ஸேதி, யதி³ ஸங்க⁴ஸ்ஸ பத்தகல்லம், அஹம் இத்த²ன்னாமஸ்ஸ பி⁴க்கு²னோ ஆபத்திம் படிக்³க³ண்ஹேய்ய’’ந்தி (சூளவ. 239), இமினா லக்க²ணேன ஆபத்திம் படிக்³க³ண்ஹித்வா வத்தப்³போ³ ‘‘பஸ்ஸஸீ’’தி, ‘‘ஆம பஸ்ஸாமீ’’தி, ‘‘ஆயதிம் ஸம்வரேய்யாஸீ’’தி, ‘‘ஸாது⁴ ஸுட்டு² ஸம்வரிஸ்ஸாமீ’’தி. த்³வீஸு பன ஸம்ப³ஹுலாஸு வா புரிமனயேனேவ வசனபே⁴தோ³ காதப்³போ³. தே³ஸிதாய ஆபத்தியா ‘‘ஸுணாது மே, ப⁴ந்தே, ஸங்கோ⁴, இத³ம் சீவரம் இத்த²ன்னாமஸ்ஸ பி⁴க்கு²னோ நிஸ்ஸக்³கி³யம் ஸங்க⁴ஸ்ஸ நிஸ்ஸட்ட²ம், யதி³ ஸங்க⁴ஸ்ஸ பத்தகல்லம், ஸங்கோ⁴ இமம் சீவரம் இத்த²ன்னாமஸ்ஸ பி⁴க்கு²னோ த³தே³ய்யா’’தி (பாரா. 464) ஏவம் நிஸ்ஸட்ட²சீவரம் தா³தப்³ப³ம், த்³வீஸு ப³ஹூஸு வா வசனபே⁴தோ³ காதப்³போ³.

க³ணஸ்ஸ பன நிஸ்ஸஜ்ஜந்தேன ‘‘இமாஹ’’ந்தி வா ‘‘இமானி அஹ’’ந்தி வா வத்வா ‘‘ஆயஸ்மந்தானம் நிஸ்ஸஜ்ஜாமீ’’தி வத்தப்³ப³ம், ஆபத்திப்படிக்³கா³ஹகேனாபி ‘‘ஸுணந்து மே ஆயஸ்மந்தா, அயம் இத்த²ன்னாமோ பி⁴க்கு² ஆபத்திம் ஸரதி…பே… தே³ஸேதி, யதா³யஸ்மந்தானம் பத்தகல்ல’’ந்தி வத்தப்³ப³ம், சீவரதா³னேபி ‘‘ஸுணந்து மே ஆயஸ்மந்தா, இத³ம் சீவரம் இத்த²ன்னாமஸ்ஸ பி⁴க்கு²னோ நிஸ்ஸக்³கி³யம் ஆயஸ்மந்தானம் நிஸ்ஸட்ட²ம், யதா³யஸ்மந்தானம் பத்தகல்லம், ஆயஸ்மந்தா இமம் சீவரம் இத்த²ன்னாமஸ்ஸ பி⁴க்கு²னோ த³தே³ய்யு’’ந்தி (பாரா. 466) வத்தப்³ப³ம், ஸேஸம் புரிமஸதி³ஸமேவ. புக்³க³லஸ்ஸ பன நிஸ்ஸஜ்ஜந்தேன ‘‘இமாஹ’’ந்தி வா ‘‘இமானி அஹ’’ந்தி வா வத்வா ‘‘ஆயஸ்மதோ நிஸ்ஸஜ்ஜாமீ’’தி வத்தப்³ப³ம், நிஸ்ஸஜ்ஜித்வா ‘‘அஹம், ப⁴ந்தே, ஏகம் நிஸ்ஸக்³கி³யம் பாசித்தியம் ஆபன்னோ, தம் படிதே³ஸேமீ’’தி ஏவம் ஆபத்தி தே³ஸேதப்³பா³. ஸசே பன நவகதரோ ஹோதி, ‘‘ஆவுஸோ’’தி வத்தப்³ப³ம், தேனாபி ‘‘பஸ்ஸஸீ’’தி வா ‘‘பஸ்ஸதா²’’தி வா வுத்தே ‘‘ஆம, ப⁴ந்தே’’தி வா ‘‘ஆம ஆவுஸோ’’தி வா வத்வா ‘‘பஸ்ஸாமீ’’தி வத்தப்³ப³ம், ததோ ‘‘ஆயதிம் ஸம்வரேய்யாஸீ’’தி வா ‘‘ஸம்வரேய்யாதா²’’தி வா வுத்தே ‘‘ஸாது⁴ ஸுட்டு² ஸம்வரிஸ்ஸாமீ’’தி வத்தப்³ப³ம். ஏவம் தே³ஸிதாய ஆபத்தியா ‘‘இமம் சீவரம் ஆயஸ்மதோ த³ம்மீ’’தி தா³தப்³ப³ம், த்³வீஸு தீஸு வா புப்³பே³ வுத்தானுஸாரேனேவ நயோ வேதி³தப்³போ³. த்³வின்னம் பன யதா² க³ணஸ்ஸ, ஏவம் நிஸ்ஸஜ்ஜிதப்³ப³ம், ததோ ஆபத்திப்படிக்³க³ஹணஞ்ச நிஸ்ஸட்ட²சீவரதா³னஞ்ச தேஸம் அஞ்ஞதரேன யதா² ஏகேன புக்³க³லேன, ததா² காதப்³ப³ம், இத³ம் பன ஸப்³ப³னிஸ்ஸக்³கி³யேஸு விதா⁴னம். சீவரம் பத்தோ நிஸீத³னந்தி வத்து²மத்தமேவ ஹி நானம், பரம்முக²ம் பன வத்து² ‘‘ஏத’’ந்தி நிஸ்ஸஜ்ஜிதப்³ப³ம். ஸசே ப³ஹூனி ஹோந்தி, ‘‘ஏதானீ’’தி வத்தப்³ப³ம். நிஸ்ஸட்ட²தா³னேபி ஏஸேவ நயோ. நிஸ்ஸட்ட²வத்து²ம் ‘‘தி³ன்னமித³ம் இமினா மய்ஹ’’ந்தி ஸஞ்ஞாய ந படிதே³ந்தஸ்ஸ து³க்கடம், தஸ்ஸ ஸந்தகபா⁴வம் ஞத்வா லேஸேன அச்சி²ந்த³ந்தோ ஸாமிகஸ்ஸ து⁴ரனிக்கே²பேன ப⁴ண்ட³ம் அக்³கா⁴பேத்வா காரேதப்³போ³தி.

வேஸாலியம் ச²ப்³ப³க்³கி³யே பி⁴க்கூ² ஆரப்³ப⁴ அதிரேகசீவரதா⁴ரணவத்து²ஸ்மிம் பஞ்ஞத்தம், ‘‘த³ஸாஹபரம’’ந்தி அயமேத்த² அனுபஞ்ஞத்தி, ஸாதா⁴ரணபஞ்ஞத்தி, அனாணத்திகம், அனிஸ்ஸஜ்ஜித்வா பரிபு⁴ஞ்ஜந்தஸ்ஸ து³க்கடம், யதா² ச இத⁴, ஏவம் ஸப்³ப³த்த², தஸ்மா நம் பரதோ ந வக்கா²ம. த³ஸாஹம் அனதிக்கந்தேபி அதிக்கந்தஸஞ்ஞினோ வேமதிகஸ்ஸ ச து³க்கடம். அதிக்கந்தே அனதிக்கந்தஸஞ்ஞினோபி வேமதிகஸ்ஸபி நிஸ்ஸக்³கி³யம் பாசித்தியமேவ, ததா² அனதி⁴ட்டி²தாவிகப்பிதஅஅஸ்ஸஜ்ஜிதஅனட்டா²வினட்ட²அத³ட்³டா⁴விலுத்தேஸு அதி⁴ட்டி²தாதி³ஸஞ்ஞினோ. அந்தோத³ஸாஹம் அதி⁴ட்டி²தே விகப்பிதே விஸ்ஸஜ்ஜிதே நட்டே² வினட்டே² த³ட்³டே⁴ அச்சி²ன்னே விஸ்ஸாஸேன கா³ஹிதே உம்மத்தகாதீ³னஞ்ச அனாபத்தி. ஆசாரவிபத்தி, யதா² ச இத³ம், ஏவம் இதோ பரானிபி, உப⁴தோபாதிமோக்கே²ஸுபி ஹி பாராஜிகானி ச ஸங்கா⁴தி³ஸேஸா ச ஸீலவிபத்தி, ஸேஸாபத்தியோ ஆசாரவிபத்தி, ஆஜீவவிபத்தி வா தி³ட்டி²விபத்தி வா காசி ஆபத்தி நாம நத்தி². ஆஜீவவிபத்திபச்சயா பன ட²பேத்வா து³ப்³பா⁴ஸிதம் ச² ஆபத்திக்க²ந்தா⁴ பஞ்ஞத்தா, தி³ட்டி²விபத்திபச்சயா பாசித்தியது³க்கடவஸேன த்³வே ஆபத்திக்க²ந்தா⁴ பஞ்ஞத்தாதி, இத³மேத்த² லக்க²ணம், இதி விபத்திகதா² இதே⁴வ நிட்டி²தாதி, ந நம் இதோ பரம் விசாரயிஸ்ஸாம. ஜாதிப்பமாணஸம்பன்னஸ்ஸ சீவரஸ்ஸ அத்தனோ ஸந்தகதா, க³ணனுபக³தா, சி²ன்னபலிபோ³த⁴பா⁴வோ, அதிரேகசீவரதா, த³ஸாஹாதிக்கமோதி இமானேத்த² பஞ்ச அங்கா³னி. கதி²னஸமுட்டா²னம், அகிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மம், வசீகம்மம், திசித்தம், திவேத³னந்தி.

கதி²னஸிக்கா²பத³வண்ணனா நிட்டி²தா.

2. உதோ³ஸிதஸிக்கா²பத³வண்ணனா

து³தியே நிட்டி²தசீவரஸ்மிம் பி⁴க்கு²னாதிஏத்த² புரிமஸிக்கா²பதே³ விய அத்த²ம் அக்³க³ஹேத்வா நிட்டி²தே சீவரஸ்மிம் பி⁴க்கு²னோதி ஏவம் ஸாமிவஸேன கரணவசனஸ்ஸ அத்தோ² வேதி³தப்³போ³. கரணவஸேன ஹி பி⁴க்கு²னா இத³ம் நாம கம்மம் காதப்³ப³ம், தம் நத்தி², ஸாமிவஸேன பன பி⁴க்கு²னோ சீவரஸ்மிம் நிட்டி²தே கதி²னே ச உப்³ப⁴தே ஏவம் இமேஹி சீவரனிட்டா²னகதி²னுப்³பா⁴ரேஹி சி²ன்னபலிபோ³தோ⁴ ஏகரத்தம்பி சே பி⁴க்கு² திசீவரேன விப்பவஸேய்யாதி ஏவம் அத்தோ² யுஜ்ஜதி. தத்த² திசீவரேனாதி திசீவராதி⁴ட்டா²னனயேன அதி⁴ட்டி²தேஸு ஸங்கா⁴டிஆதீ³ஸு யேனகேனசி. விப்பவஸேய்யாதி வியுத்தோ வஸேய்ய, ‘‘கா³மோ ஏகூபசாரோ நானூபசாரோ’’திஆதி³னா (பாரா. 477) நயேன பாளியம் வுத்தானம் கா³மனிக³மனனிவேஸனஉதோ³ஸிதஅட்டமாளபாஸாத³ஹம்மியனாவாஸத்த²கே²த்தத⁴ஞ்ஞகரணஆராமவிஹாரருக்க²மூலஅஜ்ஜோ²காஸப்பபே⁴தா³னம் பன்னரஸானம் நிக்கே²பட்டா²னானம் யத்த²கத்த²சி நிக்கி²பித்வா தேஸம் கா³மாதீ³னம் ப³ஹி ஹத்த²பாஸாதிக்கமேன அருணம் உட்டா²பேய்யாதி அயமேத்த² ஸங்கே²போ, வித்தா²ரோ பன ஸமந்தபாஸாதி³காயம் (பாரா. அட்ட². 2.473-477-8) வுத்தோ. அஞ்ஞத்ர பி⁴க்கு²ஸம்முதியாதி யம் ஸங்கோ⁴ கி³லானஸ்ஸ பி⁴க்கு²னோ திசீவரேன அவிப்பவாஸஸம்முதிம் தே³தி, தம் ட²பேத்வா அலத்³த⁴ஸம்முதிகஸ்ஸ பி⁴க்கு²னோ ஏகரத்தம்பி விப்பவாஸதோ வுத்தனயேனேவ நிஸ்ஸக்³கி³யம் பாசித்தியந்தி வேதி³தப்³ப³ம், கேவலம் இத⁴ ‘‘இத³ம் மே, ப⁴ந்தே, சீவரம் ரத்திவிப்பவுத்த²ம் அஞ்ஞத்ர பி⁴க்கு²ஸம்முதியா நிஸ்ஸக்³கி³ய’’ந்திஆதி³னா நயேன வசனபே⁴தோ³ ஹோதி, அயம் பன விஸேஸோ.

ஸாவத்தி²யம் ஸம்ப³ஹுலே பி⁴க்கூ² ஆரப்³ப⁴ ஸந்தருத்தரேன ஜனபத³சாரிகம் பக்கமனவத்து²ஸ்மிம்

பஞ்ஞத்தம், ‘‘அஞ்ஞத்ர பி⁴க்கு²ஸம்முதியா’’தி அயமேத்த² அனுபஞ்ஞத்தி, ஸாதா⁴ரணபஞ்ஞத்தி, அனாணத்திகம், அவிப்பவுத்தே² விப்பவுத்த²ஸஞ்ஞினோ சேவ வேமதிகஸ்ஸ ச து³க்கடம். விப்பவுத்தே² விப்பவுத்த²ஸஞ்ஞினோபி அவிப்பவுத்த²ஸஞ்ஞினோபி வேமதிகஸ்ஸாபி நிஸ்ஸக்³கி³யம் பாசித்தியம், ததா² அபச்சுத்³த⁴டஅவிஸ்ஸஜ்ஜிதாதீ³ஸு ச பச்சுத்³த⁴டவிஸ்ஸஜ்ஜிதாதி³ஸஞ்ஞினோ. அந்தோஅருணே பச்சுத்³த⁴டே பன பட²மகதி²னே வுத்தவிஸ்ஸஜ்ஜிதாதி³பே⁴தே³ ச அனாபத்தி, ததா² லத்³த⁴ஸம்முதிகஸ்ஸ விப்பவாஸே. ஆபா³தே⁴ பன வூபஸந்தே பச்சாக³ந்தப்³ப³ம், தத்தே²வ வா டி²தேன பச்சுத்³த⁴ரிதப்³ப³ம், அதா²பிஸ்ஸ புன ஸோ வா அஞ்ஞோ வா ஆபா³தோ⁴ குப்பதி, லத்³த⁴கப்பியமேவ. அதி⁴ட்டி²தசீவரதா, அனத்த²தகதி²னதா, அலத்³த⁴ஸம்முதிகதா, ரத்திவிப்பவாஸோதி இமானேத்த² சத்தாரி அங்கா³னி. ஸமுட்டா²னாதீ³னி பட²மகதி²னே வுத்தப்பகாரானேவ. கேவலஞ்ஹி தத்த² அனதி⁴ட்டா²னம் அவிகப்பனஞ்ச அகிரியா, இத⁴ அப்பச்சுத்³த⁴ரணம், அயம் விஸேஸோதி.

உதோ³ஸிதஸிக்கா²பத³வண்ணனா நிட்டி²தா.

3. அகாலசீவரஸிக்கா²பத³வண்ணனா

ததியே நிட்டி²தசீவரஸ்மிம் பி⁴க்கு²னாதி ஸாமிவஸேனேவ கரணத்தோ² வேதி³தப்³போ³. அகாலசீவரம் நாம ய்வாயம் ‘‘அனத்த²தே கதி²னே வஸ்ஸானஸ்ஸ பச்சி²மோ மாஸோ, அத்த²தே கதி²னே பஞ்சமாஸா’’தி (பாரா. 649) சீவரகாலோ வுத்தோ, தம் ட²பேத்வா அஞ்ஞதா³ உப்பன்னம், யஞ்ச காலேபி ஸங்க⁴ஸ்ஸ வா ‘‘இத³ம் அகாலசீவர’’ந்தி, புக்³க³லஸ்ஸ வா ‘‘இத³ம் துய்ஹம் த³ம்மீ’’திஆதி³னா நயேன தி³ன்னம், ஏதம் அகாலசீவரம் நாம. உப்பஜ்ஜேய்யாதி ஏவரூபம் சீவரம் அத்தனோ பா⁴க³படிலாப⁴வஸேன ஸங்க⁴தோ வா ஸுத்தந்திகாதி³க³ணதோ வா ஞாதிதோ வா மித்ததோ வா பம்ஸுகூலம் வா அத்தனோ வா த⁴னேன (பாரா. 500), அத² வா பன ‘‘அட்டி²மா, பி⁴க்க²வே, மாதிகா சீவரஸ்ஸ உப்பாதா³ய ஸீமாய தே³தி, கதிகாய தே³தி, பி⁴க்கா²பஞ்ஞத்திகாய தே³தி, ஸங்க⁴ஸ்ஸ தே³தி, உப⁴தோஸங்க⁴ஸ்ஸ தே³தி, வஸ்ஸம்வுட்ட²ஸங்க⁴ஸ்ஸ தே³தி, ஆதி³ஸ்ஸ தே³தி, புக்³க³லஸ்ஸ தே³தீ’’தி (மஹாவ. 379) இமாஸம் அட்ட²ன்னம் மாதிகானம் அஞ்ஞதரதோ உப்பஜ்ஜேய்ய. ஏத்த² ச ‘‘ஸீமாய த³ம்மீ’’தி ஏவம் ஸீமம் பராமஸித்வா தே³ந்தோ ஸீமாய தே³தி நாம, ஏஸ நயோ ஸப்³ப³த்த². ஏத்த² ச ஸீமாதி க²ண்ட³ஸீமா உபசாரஸீமா ஸமானஸம்வாஸஸீமா அவிப்பவாஸஸீமா லாப⁴ஸீமா கா³மஸீமா நிக³மஸீமா நக³ரஸீமா அப்³ப⁴ந்தரஸீமா உத³குக்கே²பஸீமா ஜனபத³ஸீமா ரட்ட²ஸீமா ரஜ்ஜஸீமா தீ³பஸீமா சக்கவாளஸீமாதி பன்னரஸவிதா⁴. தத்த² உபசாரஸீமா நாம பரிக்கி²த்தஸ்ஸ விஹாரஸ்ஸ பரிக்கே²பேன, அபரிக்கி²த்தஸ்ஸ பரிக்கே²பாரஹட்டா²னேன பரிச்சி²ன்னா. அபி ச பி⁴க்கூ²னம் து⁴வஸன்னிபாதட்டா²னதோ வா பரியந்தே டி²தபோ⁴ஜனஸாலதோ வா நிப³த்³த⁴வஸனகஆவாஸதோ வா தா²மமஜ்ஜி²மஸ்ஸ புரிஸஸ்ஸ த்³வின்னம் லேட்³டு³பாதானம் அந்தோ ‘‘உபசாரஸீமா’’தி வேதி³தப்³பா³. ஸா பன ஆவாஸே வட்³ட⁴ந்தே வட்³ட⁴தி, ஹாயந்தே ஹாயதி, யோஜனஸதம்பி உபசாரஸீமாவ ஹோதி. தத்த² தி³ன்னலாபோ⁴ ஸப்³பே³ஸம் அந்தோஸீமக³தானம் பாபுணாதி, பி⁴க்கு²னீனம் ஆராமபவேஸனஸேனாஸனாபுச்ச²னானி பரிவாஸமானத்தாரோசனம் வஸ்ஸச்சே²த³னிஸ்ஸயஸேனாஸனக்³கா³ஹாதி³விதா⁴னந்தி இத³ம்பி ஸப்³ப³ம் இமிஸ்ஸாவ ஸீமாய வஸேன வேதி³தப்³ப³ம். லாப⁴ஸீமாதி யம் ராஜராஜமஹாமத்தாத³யோ விஹாரம் காராபேத்வா கா³வுதம் வா அத்³த⁴யோஜனம் வா யோஜனம் வா ஸமந்தா பரிச்சி²ந்தி³த்வா ‘‘அயம் அம்ஹாகம் விஹாரஸ்ஸ லாப⁴ஸீமா, யம் ஏத்த²ந்தரே உப்பஜ்ஜதி, தம் ஸப்³ப³ம் அம்ஹாகம் விஹாரஸ்ஸ தே³மா’’தி ட²பேந்தி, அயம் லாப⁴ஸீமா நாம. காஸிகோஸலாதீ³னம் பன ரட்டா²னம் அந்தோ ப³ஹூ ஜனபதா³ ஹோந்தி, தத்த² ஏகோ ஜனபத³பரிச்சே²தோ³ ஜனபத³ஸீமா, காஸிகோஸலாதி³ரட்ட²பரிச்சே²தோ³ ரட்ட²ஸீமா, ஏகஸ்ஸ ரஞ்ஞோ ஆணாபவத்திட்டா²னம் ரஜ்ஜஸீமா, ஸமுத்³த³ந்தேன பரிச்சி²ன்னோ மஹாதீ³போ வா அந்தரதீ³போ வா தீ³பஸீமா, ஏகசக்கவாளபப்³ப³தபரிக்கே²பப்³ப⁴ந்தரம் சக்கவாளஸீமா, ஸேஸா நிதா³னகதா²யம் வுத்தனயா ஏவ. தத்த² ‘‘க²ண்ட³ஸீமாய தே³மா’’தி தி³ன்னம் க²ண்ட³ஸீமட்டா²னம்யேவ பாபுணாதி, ததோ ப³ஹிஸீமாய ஸீமந்தரிகட்டா²னம்பி ந பாபுணாதி. ‘‘உபசாரஸீமாய தே³மா’’தி தி³ன்னம் பன அந்தோபரிச்சே²தே³ க²ண்ட³ஸீமாஸீமந்தரிகாஸு டி²தானம்பி பாபுணாதி, ஸமானஸம்வாஸஸீமாய தி³ன்னம் க²ண்ட³ஸீமாஸீமந்தரிகட்டா²னம் ந பாபுணாதி, அவிப்பவாஸஸீமாலாப⁴ஸீமாஸு தி³ன்னம் தாஸம் அந்தோக³தா⁴னம்யேவ பாபுணாதி, கா³மஸீமாதீ³ஸு தி³ன்னம் தாஸம் ஸீமானம் அப்³ப⁴ந்தரே ப³த்³த⁴ஸீமட்டா²னம்பி பாபுணாதி, அப்³ப⁴ந்தரஸீமாஉத³குக்கே²பஸீமாஸு தி³ன்னம் தத்த² அந்தோக³தா⁴னம்யேவ பாபுணாதி, ஜனபத³ஸீமாதீ³ஸு தி³ன்னம்பி தாஸம் அப்³ப⁴ந்தரே ப³த்³த⁴ஸீமட்டா²னம்பி பாபுணாதி, தஸ்மா யம் ஜம்பு³தீ³பே ட²த்வா ‘‘தம்ப³பண்ணிதீ³பே ஸங்க⁴ஸ்ஸ தே³மா’’தி தீ³யதி, தம் தம்ப³பண்ணிதீ³பதோ ஏகோபி க³ந்த்வா ஸப்³பே³ஸம் ஸங்க³ண்ஹிதும் லப⁴தி. ஸசேபி தத்தே²வ ஏகோ ஸபா⁴கோ³ பி⁴க்கு² ஸபா⁴கா³னம் பா⁴க³ம் க³ண்ஹாதி, ந வாரேதப்³போ³. யோ பன விஹாரம் பவிஸித்வா ‘‘அஸுகஸீமாயா’’தி அவத்வாவ கேவலம் ‘‘ஸீமாய த³ம்மீ’’தி வத³தி, ஸோ புச்சி²தப்³போ³ ‘‘ஸீமா நாம ப³ஹுவிதா⁴, கதரம் ஸந்தா⁴ய வத³ஸீ’’தி, ஸசே வத³தி ‘‘அஹமேதம் பே⁴த³ம் ந ஜானாமி, ஸீமட்ட²கஸங்கோ⁴ க³ண்ஹதூ’’தி, உபசாரஸீமட்டே²ஹி பா⁴ஜேதப்³ப³ம்.

கதிகாயாதிஏத்த² கதிகா நாம ஸமானலாப⁴கதிகா. ஸா பன ஏவம் காதப்³பா³, ஏகஸ்மிம் விஹாரே ஸன்னிபதிதேஹி பி⁴க்கூ²ஹி யம் விஹாரம் ஸங்க³ண்ஹிதுகாமா ஸமானலாப⁴ம் காதும் இச்ச²ந்தி, தஸ்ஸ நாமம் க³ஹேத்வா ‘‘அஸுகோ நாம விஹாரோ போராணகோ அப்பலாபோ⁴’’தி யம் கிஞ்சி காரணம் வத்வா ‘‘தம் விஹாரம் இமினா விஹாரேன ஸத்³தி⁴ம் ஏகலாப⁴ம் காதும் ஸங்க⁴ஸ்ஸ ருச்சதீ’’தி திக்க²த்தும் ஸாவேதப்³ப³ம், ஏத்தாவதா தஸ்மிம் விஹாரே நிஸின்னோபி இத⁴ நிஸின்னோவ ஹோதி, தஸ்மிம் விஹாரேபி ஏவமேவ காதப்³ப³ம், ஏத்தாவதா இத⁴ நிஸின்னோபி தஸ்மிம் நிஸின்னோவ ஹோதி. ஏகஸ்மிம் விஹாரே லாபே⁴ பா⁴ஜியமானே இதரஸ்மிம் டி²தஸ்ஸ பா⁴க³ம் க³ஹேதும் வட்டதி.

பி⁴க்கா²பஞ்ஞத்தியாதி ஏத்த² பி⁴க்கா²பஞ்ஞத்தி நாம தா³யகஸ்ஸ பரிச்சாக³பஞ்ஞத்திட்டா²னம், தஸ்மா ‘‘யத்த² மய்ஹம் து⁴வகாரா கரீயந்தி, தத்த² த³ம்மீ’’தி வா ‘‘தத்த² தே³தா²’’தி வா வுத்தே யத்த² தஸ்ஸ பாகவத்தம் வா வத்ததி, யதோ வா பி⁴க்கூ² நிச்சம் போ⁴ஜேதி, யத்த² வா தேன கிஞ்சி ஸேனாஸனம் கதம், ஸப்³ப³த்த² தி³ன்னமேவ ஹோதி. ஸசே பன ஏகஸ்மிம் து⁴வகாரட்டா²னே தோ²கதரா பி⁴க்கூ² ஹோந்தி, ஏகமேவ வா வத்த²ம் ஹோதி, மாதிகம் ஆரோபேத்வா யதா² ஸோ வத³தி, ததா² க³ஹேதப்³ப³ம்.

ஸங்க⁴ஸ்ஸ தே³தீதி ஏத்த² விஹாரம் பவிஸித்வா ‘‘ஸங்க⁴ஸ்ஸ த³ம்மீ’’தி தி³ன்னம் உபசாரஸீமாக³தானஞ்ச ததோ ப³ஹித்³தா⁴பி தேஹி ஸத்³தி⁴ம் ஏகாப³த்³தா⁴னஞ்ச பாபுணாதி, தஸ்மா தேஸம் கா³ஹகே ஸதி அஸம்பத்தானம்பி பா⁴கோ³ தா³தப்³போ³. யம் பன ப³ஹி உபசாரஸீமாய பி⁴க்கூ² தி³ஸ்வா ‘‘ஸங்க⁴ஸ்ஸா’’தி தீ³யதி, தம் ஏகாப³த்³த⁴பரிஸாய பாபுணாதி. யே பன த்³வாத³ஸஹி ஹத்தே²ஹி பரிஸம் அஸம்பத்தா, தேஸம் ந பாபுணாதி.

உப⁴தோஸங்க⁴ஸ்ஸாதி ஏத்த² பன யம் உப⁴தோஸங்க⁴ஸ்ஸ தி³ன்னம், ததோ உபட்³ட⁴ம் பி⁴க்கூ²னம், உபட்³ட⁴ம் பி⁴க்கு²னீனம் தா³தப்³ப³ம். ஸசேபி ஏகோ பி⁴க்கு² ஹோதி, ஏகா வா பி⁴க்கு²னீ, அந்தமஸோ அனுபஸம்பன்னஸ்ஸாபி உபட்³ட⁴மேவ தா³தப்³ப³ம். ‘‘உப⁴தோஸங்க⁴ஸ்ஸ ச துய்ஹஞ்சா’’தி வுத்தே பன ஸசே த³ஸ பி⁴க்கூ² ச த³ஸ பி⁴க்கு²னியோ ச ஹோந்தி, ஏகவீஸதி படிவீஸே கத்வா ஏகோ புக்³க³லஸ்ஸ தா³தப்³போ³, த³ஸ பி⁴க்கு²ஸங்க⁴ஸ்ஸ, த³ஸ பி⁴க்கு²னிஸங்க⁴ஸ்ஸ ச, யேன புக்³க³லிகோ லத்³தோ⁴, ஸோ ஸங்க⁴தோபி அத்தனோ வஸ்ஸக்³கே³ன க³ஹேதும் லப⁴தி, கஸ்மா? உப⁴தோஸங்க⁴க்³க³ஹணேன க³ஹிதத்தா, ‘‘உப⁴தோஸங்க⁴ஸ்ஸ ச சேதியஸ்ஸ சா’’தி வுத்தேபி ஏஸேவ நயோ. இத⁴ பன சேதியஸ்ஸ ஸங்க⁴தோ பாபுணகோட்டா²ஸோ நாம நத்தி², ஏகபுக்³க³லஸ்ஸ பத்தகோட்டா²ஸஸமோ ஏகோ கோட்டா²ஸோ ஹோதி. ‘‘பி⁴க்கு²ஸங்க⁴ஸ்ஸ ச பி⁴க்கு²னீனஞ்சா’’தி வுத்தே பன ந மஜ்ஜே² பி⁴ந்தி³த்வா தா³தப்³ப³ம், பி⁴க்கூ² ச பி⁴க்கு²னியோ ச க³ணேத்வா தா³தப்³ப³ம். ‘‘பி⁴க்கு²ஸங்க⁴ஸ்ஸ ச பி⁴க்கு²னீனஞ்ச துய்ஹஞ்சா’’தி வுத்தே புக்³க³லோ விஸும் ந லப⁴தி, பாபுணகோட்டா²ஸதோ ஏகமேவ லப⁴தி. ‘‘சேதியஸ்ஸ சா’’தி வுத்தே பன சேதியஸ்ஸ ஏகோ புக்³க³லபடிவீஸோ லப்³ப⁴தி. ‘‘பி⁴க்கூ²னஞ்ச பி⁴க்கு²னீனஞ்சா’’தி வுத்தேபி ந மஜ்ஜே² பி⁴ந்தி³த்வா தா³தப்³ப³ம், புக்³க³லக³ணனாய ஏவ விப⁴ஜிதப்³ப³ம், தேஹி ஸத்³தி⁴ம் புக்³க³லசேதியபராமஸனம் அனந்தரனயஸதி³ஸமேவ, யதா² ச பி⁴க்கு²ஸங்க⁴ம் ஆதி³ம் கத்வா நயோ நீதோ, ஏவம் பி⁴க்கு²னிஸங்க⁴ம் ஆதி³ம் கத்வாபி நேதப்³போ³. ‘‘பி⁴க்கு²ஸங்க⁴ஸ்ஸ ச துய்ஹஞ்சா’’தி வுத்தேபி புக்³க³லஸ்ஸ விஸும் ந லப்³ப⁴தி, சேதியஸ்ஸ பன லப்³ப⁴தி. ‘‘பி⁴க்கூ²னஞ்ச துய்ஹஞ்சா’’தி வுத்தேபி விஸும் ந லப்³ப⁴தி, சேதியஸ்ஸ பன லப்³ப⁴தியேவ.

வஸ்ஸம்வுட்ட²ஸங்க⁴ஸ்ஸாதி ஏத்த² ஸசே விஹாரம் பவிஸித்வா ‘‘வஸ்ஸம்வுட்ட²ஸங்க⁴ஸ்ஸ த³ம்மீ’’தி வத³தி, யே தத்த² வஸ்ஸச்சே²த³ம் அகத்வா புரிமவஸ்ஸம்வுட்டா², தேஸம் ப³ஹி ஸீமட்டா²னம்பி பாபுணாதி, ந அஞ்ஞேஸம். ஸசே பன ப³ஹிஉபசாரஸீமாயம் டி²தோ ‘‘வஸ்ஸம்வுட்ட²ஸங்க⁴ஸ்ஸா’’தி வத³தி, யத்த²கத்த²சி வுட்ட²வஸ்ஸானம் ஸப்³பே³ஸம் ஸம்பத்தானம் பாபுணாதி. அத² ‘‘அஸுகவிஹாரே வஸ்ஸம்வுட்ட²ஸ்ஸா’’தி வத³தி, தத்த² வஸ்ஸம்வுட்டா²னம்யேவ யாவ கதி²னஸ்ஸுப்³பா⁴ரா பாபுணாதி. கி³ம்ஹானம் பட²மதி³வஸதோ பட்டா²ய ஏவம் வத³தி, தத்ர ஸம்முகீ²பூ⁴தானம் ஸப்³பே³ஸம் பாபுணாதி, ந அஞ்ஞேஸம்.

ஆதி³ஸ்ஸ தே³தீதி ஆதி³ஸித்வா பரிச்சி²ந்தி³த்வா தே³தி, கத²ம்? பி⁴க்கூ² அஜ்ஜதனாய வா ஸ்வாதனாய வா யாகு³யா நிமந்தேத்வா தே க⁴ரே யாகு³ம் பாயேத்வா ‘‘இமானி சீவரானி யேஹி மய்ஹம் யாகு³ பீதா, தேஸம் த³ம்மீ’’தி வத³தி, யேஹி நிமந்திதேஹி யாகு³ பீதா, தேஸம்யேவ பாபுணாதி, ப⁴த்தக²ஜ்ஜகாதீ³ஹி நிமந்திதேஸுபி ஏஸேவ நயோ.

புக்³க³லஸ்ஸ தே³தீதி ‘‘இத³ம் சீவரம் இத்த²ன்னாமஸ்ஸ த³ம்மீ’’தி ஏவம் பரம்முகா² வா, பாத³மூலே ட²பேத்வா ‘‘இத³ம் தும்ஹாக’’ந்தி ஏவம் ஸம்முகா² வா தே³தீதி அயமேத்த² ஸங்கே²பகதா², வித்தா²ரோ பன ஸமந்தபாஸாதி³காயம் வுத்தோ. இதி இமாஸம் அட்ட²ன்னம் மாதிகாபதா³னம் வஸேன யம் அகாலசீவரலக்க²ணேன படிலத்³த⁴ம், தம் ஸந்தா⁴ய ‘‘அகாலசீவரம் உப்பஜ்ஜேய்யா’’தி வுத்தம்.

ஆகங்க²மானேனாதி இச்ச²மானேன. கி²ப்பமேவ காரேதப்³ப³ந்தி ஸீக⁴ம் அந்தோத³ஸாஹேயேவ காரேதப்³ப³ம். நோ சஸ்ஸ பாரிபூரீதி நோ சே பாரிபூரீ ப⁴வேய்ய, யத்தகேன கரியமானம் அதி⁴ட்டா²னசீவரம் பஹோதி, தம் சீவரம் தத்தகம் ந ப⁴வேய்ய, ஊனகம் ப⁴வேய்யாதி அத்தோ². ஸதியா பச்சாஸாயாதி ‘‘அஸுகதி³வஸம் நாம ஸங்கோ⁴ சீவரானி லபி⁴ஸ்ஸதி, ததோ மே சீவரம் உப்பஜ்ஜிஸ்ஸதீ’’திஇமினா நயேன ஸங்க⁴க³ணஞாதிமித்தேஸு வா அஞ்ஞதரட்டா²னதோ, ‘‘பம்ஸுகூலம் வா லச்சா²மீ’’தி, ‘‘இமினா வா கப்பியப⁴ண்டே³ன சீவரம் க³ண்ஹிஸ்ஸாமீ’’தி ஏவம் விஜ்ஜமானாய சீவராஸாய. ததோ சே உத்தரீதி மாஸபரமதோ சே உத்தரி நிக்கி²பேய்ய, நிஸ்ஸக்³கி³யந்தி அத்தோ². யதி³ பனஸ்ஸ மூலசீவரம் ஸண்ஹம் ஹோதி, பச்சாஸாசீவரம் தூ²லம் ஹோதி, ந ஸக்கா யோஜேதும், ரத்தியோ ச ஸேஸா ஹோந்தி, ந தாவ மாஸோ பூரதி, ந அகாமா சீவரம் காரேதப்³ப³ம், அஞ்ஞம் பச்சாஸாசீவரம் லபி⁴த்வா ஏவ காலப்³ப⁴ந்தரே காரேதப்³ப³ம். ஸசே ந லப⁴தி, பச்சாஸாசீவரம்பி பரிக்கா²ரசோளம் அதி⁴ட்டா²தப்³ப³ம். அத² மூலசீவரம் தூ²லம் ஹோதி, பச்சாஸாசீவரம் ஸண்ஹம், மூலசீவரம் பரிக்கா²ரசோளம் அதி⁴ட்ட²ஹித்வா பச்சாஸாசீவரமேவ மூலசீவரம் கத்வா ட²பேதப்³ப³ம், தம் புன மாஸபரிஹாரம் லப⁴தி, ஏதேனுபாயேன யாவ ந லச்ச²தி, தாவ அஞ்ஞம் மூலசீவரம் கத்வா ட²பேதும் லப்³ப⁴தி. இமஸ்ஸ ‘‘இத³ம் மே, ப⁴ந்தே, அகாலசீவரம் மாஸாதிக்கந்தம் நிஸ்ஸக்³கி³ய’’ந்தி (பாரா. 500) இமினா நயேன நிஸ்ஸஜ்ஜனவிதா⁴னம் வேதி³தப்³ப³ம்.

ஸாவத்தி²யம் ஸம்ப³ஹுலே பி⁴க்கூ² ஆரப்³ப⁴ அகாலசீவரம் படிக்³க³ஹேத்வா மாஸம் அதிக்கமனவத்து²ஸ்மிம்

பஞ்ஞத்தம், ஸாதா⁴ரணபஞ்ஞத்தி, அனாணத்திகம், இதோ பரம் ஸப்³ப³ம் பட²மகதி²னே வுத்தஸதி³ஸமேவ. கேவலஞ்ஹி தத்த² த³ஸாஹாதிக்கமோ, இத⁴ மாஸாதிக்கமோதி அயம் விஸேஸோ. ஸேஸம் தாதி³ஸமேவாதி.

அகாலசீவரஸிக்கா²பத³வண்ணனா நிட்டி²தா.

4. புராணசீவரஸிக்கா²பத³வண்ணனா

சதுத்தே² அஞ்ஞாதிகாயாதி ந ஞாதிகாய, மாதிதோ வா பிதிதோ வா யாவ ஸத்தமம் யுக³ம், தாவ கேனசி ஆகாரேன அஸம்ப³த்³தா⁴யாதி அத்தோ². பி⁴க்கு²னியாதி ஸாகியானியோ விய ஸுத்³த⁴பி⁴க்கு²ஸங்கே⁴ வா உப⁴தோஸங்கே⁴ வா உபஸம்பன்னாய. புராணசீவரந்தி ரஜித்வா கப்பம் கத்வா ஏகவாரம்பி நிவத்த²ம் வா பாருதம் வா, யம் அந்தமஸோ பரிபோ⁴க³ஸீஸேன அம்ஸே வா மத்த²கே வா கத்வா மக்³க³ம் க³தோ ஹோதி, உஸ்ஸீஸகம் வா கத்வா நிபன்னோ, ஏதம்பி புராணசீவரமேவ. தோ⁴வாபேய்ய வாதி ஸசே ‘‘தோ⁴வா’’திவாசாய வத³தி, காயவிகாரம் வா கரோதி, ஹத்தே²ன வா ஹத்தே² தே³தி, பாத³மூலே வா ட²பேதி, அந்தோத்³வாத³ஸஹத்தே² ஓகாஸே ட²த்வா உபரி வா கி²பதி, அஞ்ஞஸ்ஸ வா ஹத்தே² பேஸேதி, தாய தோ⁴தம், தோ⁴வாபிதமேவ ஹோதி, ரஜாபனாகோடாபனேஸுபி ஏஸேவ நயோ. ஸிக்க²மானாய வா ஸாமணேரியா வா உபாஸிகாய வா ஹத்தே² தோ⁴வனத்தா²ய தே³தி, ஸா ஸசே உபஸம்பஜ்ஜித்வா தோ⁴வதி, ஏவம்பி நிஸ்ஸக்³கி³யம் பாசித்தியம். உபாஸகஸ்ஸ வா ஸாமணேரஸ்ஸ வா ஹத்தே² தி³ன்னம் ஹோதி, ஸோ சே லிங்கே³ பரிவத்தே உபஸம்பஜ்ஜித்வா தோ⁴வதி, த³ஹரஸ்ஸ பி⁴க்கு²ஸ்ஸ வா தி³ன்னம் ஹோதி, ஸோபி லிங்கே³ பரிவத்தே தோ⁴வதி, நிஸ்ஸக்³கி³யம் பாசித்தியமேவ, ரஜாபனாகோடாபனேஸுபி ஏஸேவ நயோ. ‘‘இத³ம் மே, ப⁴ந்தே, புராணசீவரம் அஞ்ஞாதிகாய பி⁴க்கு²னியா தோ⁴வாபிதம் நிஸ்ஸக்³கி³ய’’ந்தி (பாரா. 505) இமினா பனேத்த² நயேன நிஸ்ஸஜ்ஜனவிதா⁴னம் வேதி³தப்³ப³ம்.

ஸாவத்தி²யம் உதா³யித்தே²ரம் ஆரப்³ப⁴ புராணசீவரதோ⁴வாபனவத்து²ஸ்மிம் பஞ்ஞத்தம், அஸாதா⁴ரணபஞ்ஞத்தி, ஸாணத்திகம் ‘‘தோ⁴வா’’திஆதி³காய ஆணத்தியா, ஏவம் ஆணத்தாய ச பி⁴க்கு²னியா உத்³த⁴னஸஜ்ஜனாதீ³ஸு ஸப்³ப³ப்பயோகே³ஸு பி⁴க்கு²னோ து³க்கடம். தோ⁴வித்வா உக்கி²த்தமத்தம் பன ரத்தமத்தம் ஆகோடிதமத்தஞ்ச நிஸ்ஸக்³கி³யம் ஹோதி, தோ⁴வனாதீ³னி தீணிபி த்³வே வா காராபேந்தஸ்ஸ ஏகேன வத்து²னா நிஸ்ஸக்³கி³யம், இதரேஹி து³க்கடம். ஸசே பன ‘‘தோ⁴வா’’தி வுத்தா ஸப்³பா³னிபி கரோதி, தோ⁴வனபச்சயாவ ஆபத்தி. ‘‘இமஸ்மிம் சீவரே யம் கத்தப்³ப³ம், தம் கரோஹீ’’தி வத³தோ பன ஏகவாசாய பாசித்தியேன ஸத்³தி⁴ம் த்³வே து³க்கடானி, பி⁴க்கு²னிஸங்க⁴வஸேன ஏகதோஉபஸம்பன்னாய தோ⁴வாபேந்தஸ்ஸ அனிஸ்ஸஜ்ஜித்வா பரிபு⁴ஞ்ஜந்தஸ்ஸ, அஞ்ஞஸ்ஸ வா ஸந்தகம் நிஸீத³னபச்சத்த²ரணம் வா தோ⁴வாபேந்தஸ்ஸ, ஞாதிகாய அஞ்ஞாதிகஸஞ்ஞினோ சேவ, வேமதிகஸ்ஸ ச து³க்கடம், அஞ்ஞாதிகாய ஞாதிகஸஞ்ஞினோபி வேமதிகஸ்ஸாபி நிஸ்ஸக்³கி³யம் பாசித்தியமேவ. இதோ பரம் பன ஏவரூபேஸு டா²னேஸு ‘‘திகபாசித்திய’’ந்தி வக்கா²ம, ஸசே ஞாதிகாய ஸஹாயா அஞ்ஞாதிகா ‘‘தோ⁴வா’’தி அவுத்தா வா தோ⁴வதி, அபரிபு⁴த்தம் வா அஞ்ஞம் வா பரிக்கா²ரம் தோ⁴வதி, ஸிக்க²மானஸாமணேரியோ வா தோ⁴வந்தி, அனாபத்தி, உம்மத்தகாதீ³னம் அனாபத்தியேவ. புராணசீவரதா, உபசாரே ட²த்வா அஞ்ஞாதிகாய பி⁴க்கு²னியா ஆணாபனம், தஸ்ஸா தோ⁴வனாதீ³னி சாதி இமானேத்த² தீணி அங்கா³னி. ஸஞ்சரித்தஸமுட்டா²னம், கிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மம், வசீகம்மம், திசித்தம், திவேத³னந்தி.

புராணசீவரஸிக்கா²பத³வண்ணனா நிட்டி²தா.

5. சீவரப்படிக்³க³ஹணஸிக்கா²பத³வண்ணனா

பஞ்சமே அஞ்ஞாதிகாயாதிஇத³ம் வுத்தனயமேவ, தஸ்மா இதோ பரம் கத்த²சி ந விசாரயிஸ்ஸாம. சீவரந்தி ச²ன்னம் அஞ்ஞதரம் விகப்பனுபக³ம், ஏஸ நயோ ஸப்³பே³ஸு சீவரப்படிஸம்யுத்தஸிக்கா²பதே³ஸு. யத்த² பன விஸேஸோ ப⁴விஸ்ஸதி, தத்த² வக்கா²ம. படிக்³க³ண்ஹேய்யாதிஏத்த² ஹத்தே²ன வா ஹத்தே² தே³து, பாத³மூலே வா ட²பேது, த⁴ம்மகத²ம் கதே²ந்தஸ்ஸ வத்தே²ஸு கி²பியமானேஸு உபசாரம் முஞ்சித்வாபி உபரி வா கி²பது, ஸசே ஸாதி³யதி, படிக்³க³ஹிதமேவ ஹோதி. யஸ்ஸ கஸ்ஸசி பன அனுபஸம்பன்னஸ்ஸ ஹத்தே² பேஸிதம் க³ண்ஹிதும் வட்டதி, ‘‘பம்ஸுகூலம் க³ண்ஹிஸ்ஸதீ’’தி ஸங்காரகூடாதீ³ஸு ட²பிதம்பி பம்ஸுகூலம் அதி⁴ட்ட²ஹித்வா க³ஹேதும் வட்டதியேவ. அஞ்ஞத்ர பாரிவத்தகாதி யம் ‘‘அந்தமஸோ ஹரீடகக்க²ண்ட³ம்பி த³த்வா வா த³ஸ்ஸாமீ’’தி ஆபோ⁴க³ம் கத்வா வா பாரிவத்தகம் க³ண்ஹாதி, தம் ட²பேத்வா அஞ்ஞம் அந்தமஸோ விகப்பனுபக³ம் படபரிஸ்ஸாவனம்பி க³ண்ஹந்தஸ்ஸ நிஸ்ஸக்³கி³யம் ஹோதி. தத்ர ‘‘இத³ம் மே, ப⁴ந்தே, சீவரம் அஞ்ஞாதிகாய பி⁴க்கு²னியா ஹத்த²தோ படிக்³க³ஹிதம் அஞ்ஞத்ர பாரிவத்தகா நிஸ்ஸக்³கி³ய’’ந்தி (பாரா. 512) இமினா நயேன நிஸ்ஸஜ்ஜனவிதா⁴னம் வேதி³தப்³ப³ம்.

ராஜக³ஹே உதா³யித்தே²ரம் ஆரப்³ப⁴ சீவரப்படிக்³க³ஹணவத்து²ஸ்மிம் பஞ்ஞத்தம், ‘‘அஞ்ஞத்ர பாரிவத்தகா’’தி அயமேத்த² அனுபஞ்ஞத்தி, அஸாதா⁴ரணபஞ்ஞத்தி, அனாணத்திகம், க³ஹணத்தா²ய ஹத்த²ப்பஸாரணாதி³ப்பயோகே³ து³க்கடம், படிலாபே⁴ன நிஸ்ஸக்³கி³யம் ஹோதி, நிஸ்ஸஜ்ஜிதப்³ப³ம், திகபாசித்தியம், ஏகதோஉபஸம்பன்னாய ஞாதிகாய ச அஞ்ஞாதிகஸஞ்ஞிஸ்ஸ வேமதிகஸ்ஸ வா து³க்கடம். விஸ்ஸாஸக்³கா³ஹே, தாவகாலிகே, பத்தத்த²விகாதி³ம்ஹி ச அனதி⁴ட்டா²தப்³ப³பரிக்கா²ரே, ஸிக்க²மானஸாமணேரீனம் ஹத்த²தோ க³ஹணே, உம்மத்தகாதீ³னஞ்ச அனாபத்தி. விகப்பனுபக³சீவரதா, பாரிவத்தகாபா⁴வோ, அஞ்ஞாதிகாய ஹத்த²தோ க³ஹணந்தி இமானேத்த² தீணி அங்கா³னி. ஸஞ்சரித்தஸமுட்டா²னம், கிரியாகிரியம், ஸேஸம் சதுத்த²ஸதி³ஸமேவாதி.

சீவரப்படிக்³க³ஹணஸிக்கா²பத³வண்ணனா நிட்டி²தா.

6. அஞ்ஞாதகவிஞ்ஞத்திஸிக்கா²பத³வண்ணனா

ச²ட்டே² க³ஹபதிந்தி பி⁴க்கூ²ஸு அபப்³ப³ஜிதமனுஸ்ஸம். க³ஹபதானிந்தி பி⁴க்கு²னீஸு அபப்³ப³ஜிதித்தி²ம், ஏஸ நயோ ஸப்³பே³ஸு க³ஹபதிப்படிஸம்யுத்தேஸு ஸிக்கா²பதே³ஸு. விஞ்ஞாபேய்யாதி யாசேய்ய வா யாசாபேய்ய வா. அஞ்ஞத்ர ஸமயாதி யோ அச்சி²ன்னசீவரோ வா ஹோதி நட்ட²சீவரோ வா, தஸ்ஸ தம் ஸமயம் ட²பேத்வா அஞ்ஞஸ்மிம் விஞ்ஞாபனப்பயோகே³ து³க்கடம், படிலாபே⁴ன நிஸ்ஸக்³கி³யம் ஹோதி. தத்த² ‘‘இத³ம் மே, ப⁴ந்தே, சீவரம் அஞ்ஞாதகம் க³ஹபதிகம் அஞ்ஞத்ர ஸமயா விஞ்ஞாபிதம் நிஸ்ஸக்³கி³ய’’ந்தி (பாரா. 524) இமினா நயேன நிஸ்ஸஜ்ஜனவிதா⁴னம் வேதி³தப்³ப³ம்.

ஸாவத்தி²யம் உபனந்த³ம் ஆரப்³ப⁴ சீவரவிஞ்ஞாபனவத்து²ஸ்மிம் பஞ்ஞத்தம். ‘‘அஞ்ஞத்ர ஸமயா’’தி அயமேத்த² அனுபஞ்ஞத்தி, ஸாதா⁴ரணபஞ்ஞத்தி, அனாணத்திகம், திகபாசித்தியம், ஞாதகே அஞ்ஞாதகஸஞ்ஞினோ வேமதிகஸ்ஸ ச து³க்கடம். ஸமயே வா ஞாதகப்பவாரிதே வா விஞ்ஞாபேந்தஸ்ஸ, அஞ்ஞஸ்ஸ வா ஞாதகப்பவாரிதே தஸ்ஸேவத்தா²ய விஞ்ஞாபேந்தஸ்ஸ, அத்தனோ த⁴னேன க³ண்ஹந்தஸ்ஸ, உம்மத்தகாதீ³னஞ்ச அனாபத்தி. விகப்பனுபக³சீவரதா, ஸமயாபா⁴வோ, அஞ்ஞாதகவிஞ்ஞத்தி, தாய ச படிலாபோ⁴தி இமானேத்த² சத்தாரி அங்கா³னி. ஸமுட்டா²னாதீ³னி சதுத்த²ஸதி³ஸானேவாதி.

அஞ்ஞாதகவிஞ்ஞத்திஸிக்கா²பத³வண்ணனா நிட்டி²தா.

7. ததுத்தரிஸிக்கா²பத³வண்ணனா

ஸத்தமே தஞ்சேதி தம் அச்சி²ன்னசீவரம் வா நட்ட²சீவரம் வா. அபி⁴ஹட்டு²ந்தி அபீ⁴தி உபஸக்³கோ³, ஹரிதுந்தி அத்தோ², க³ண்ஹிதுந்தி வுத்தம் ஹோதி. பவாரேய்யாதி இச்சா²பேய்ய, இச்ச²ம் ருசிம் உப்பாதே³ய்ய, ‘‘யாவத்தகம் இச்ச²ஸி, தாவத்தகம் க³ண்ஹாஹீ’’தி ஏவம் நிமந்தேய்யாதி அத்தோ², யதா² வா ‘‘நேக்க²ம்மம் த³ட்டு² கே²மதோ’’தி (ஸு. நி. 426, 1104; சூளனி. ஜதுகண்ணீமாணவபுச்சா²னித்³தே³ஸ 67) ஏத்த² தி³ஸ்வாதி அத்தோ², ஏவமிதா⁴பி ‘‘அபி⁴ஹட்டு²ம் பவாரேய்யா’’தி உபனேத்வா புரதோ ட²பேந்தோ காயேன வா, ‘‘அம்ஹாகம் து³ஸ்ஸகோட்டா²கா³ரதோ யத்தகம் இச்ச²த², தத்தகம் க³ண்ஹதா²’’தி வத³ந்தோ வாசாய வா அபி⁴ஹரித்வா நிமந்தேய்யாதி அத்தோ². ஸந்தருத்தரபரமந்தி ஸஅந்தரம் உத்தரம் பரமம் அஸ்ஸ சீவரஸ்ஸாதி ஸந்தருத்தரபரமம், நிவாஸனேன ஸத்³தி⁴ம் பாருபனம் உக்கட்ட²பரிச்சே²தோ³ அஸ்ஸாதி வுத்தம் ஹோதி. ததோ சீவரம் ஸாதி³தப்³ப³ந்தி ததோ அபி⁴ஹடசீவரதோ ஏத்தகம் சீவரம் க³ஹேதப்³ப³ம், ந ததோ பரம்.

தத்ராயம் வினிச்ச²யோ – யஸ்ஸ அதி⁴ட்டி²தசீவரஸ்ஸ தீணி நட்டா²னி, தேன த்³வே ஸாதி³தப்³பா³னி, ஏகம் நிவாஸேத்வா ஏகம் பாருபித்வா அஞ்ஞம் ஸபா⁴க³ட்டா²னதோ பரியேஸிதப்³ப³ம். யஸ்ஸ த்³வே நட்டா²னி, தேன ஏகம் ஸாதி³தப்³ப³ம். ஸசே பன பகதியாவ ஸந்தருத்தரேன சரதி, த்³வே ஸாதி³தப்³பா³னி, ஏவம் ஏகம் ஸாதி³யந்தேனேவ ஸமோ ப⁴விஸ்ஸதி. யஸ்ஸ தீஸு ஏகம் நட்ட²ம், கிஞ்சி ந ஸாதி³தப்³ப³ம். யஸ்ஸ பன த்³வீஸு ஏகம் நட்ட²ம், ஏகம் ஸாதி³தப்³ப³ம். யஸ்ஸ ஏகம்யேவ ஹோதி, தஞ்ச நட்ட²ம், த்³வே ஸாதி³தப்³பா³னி. பி⁴க்கு²னியா பன பஞ்சஸு நட்டே²ஸு த்³வே ஸாதி³தப்³பா³னி, சதூஸு நட்டே²ஸு ஏகம் ஸாதி³தப்³ப³ம், தீஸு நட்டே²ஸு ந கிஞ்சி ஸாதி³தப்³ப³ம், கோ பன வாதோ³ த்³வீஸு வா ஏகஸ்மிம் வா. யேன கேனசி ஹி ஸந்தருத்தரபரமதாய டா²தப்³ப³ம், ததோ உத்தரி விஞ்ஞாபனப்பயோகே³ து³க்கடம், படிலாபே⁴ன நிஸ்ஸக்³கி³யம் ஹோதி. தத்த² ‘‘இத³ம் மே, ப⁴ந்தே, சீவரம் அஞ்ஞாதகம் க³ஹபதிகம் ததுத்தரி விஞ்ஞாபிதம் நிஸ்ஸக்³கி³ய’’ந்தி (பாரா. 524) இமினா நயேன நிஸ்ஸஜ்ஜனவிதா⁴னம் வேதி³தப்³ப³ம்.

ஸாவத்தி²யம் ச²ப்³ப³க்³கி³யே பி⁴க்கூ² ஆரப்³ப⁴ ப³ஹுசீவரவிஞ்ஞாபனவத்து²ஸ்மிம் பஞ்ஞத்தம், ஸாதா⁴ரணபஞ்ஞத்தி, அனாணத்திகம், திகபாசித்தியம், ஞாதகே அஞ்ஞாதகஸஞ்ஞினோ வேமதிகஸ்ஸ வா து³க்கடம். த்³வே சீவரானி கத்வா ‘‘ஸேஸகம் ஆஹரிஸ்ஸாமீ’’தி வத்வா க³ண்ஹந்தஸ்ஸ, ‘‘ஸேஸகம் துய்ஹம்யேவ ஹோதூ’’தி வுத்தஸ்ஸ, ந அச்சி²ன்னனட்ட²காரணா தி³ன்னம் க³ண்ஹந்தஸ்ஸ, வுத்தனயேன ஞாதகப்பவாரிதே விஞ்ஞாபேந்தஸ்ஸ, அத்தனோ த⁴னேன க³ண்ஹந்தஸ்ஸ, உம்மத்தகாதீ³னஞ்ச அனாபத்தி. ததுத்தரிதா, அச்சி²ன்னாதி³காரணதா, அஞ்ஞாதகவிஞ்ஞத்தி, தாய ச படிலாபோ⁴தி இமானேத்த² சத்தாரி அங்கா³னி. ஸமுட்டா²னாதீ³னி சதுத்த²ஸதி³ஸானேவாதி.

ததுத்தரிஸிக்கா²பத³வண்ணனா நிட்டி²தா.

8. உபக்க²டஸிக்கா²பத³வண்ணனா

அட்ட²மே பி⁴க்கு²ம் பனேவ உத்³தி³ஸ்ஸாதி ‘‘இத்த²ன்னாமஸ்ஸ பி⁴க்கு²னோ த³ஸ்ஸாமீ’’தி ஏவம் அபதி³ஸித்வா. சீவரசேதாபன்னந்தி ஹிரஞ்ஞாதி³கம் சீவரமூலம். உபக்க²டம் ஹோதீதி ஸஜ்ஜிதம் ஹோதி, ஸம்ஹரித்வா ட²பிதம். சேதாபேத்வாதி பரிவத்தேத்வா, காரேத்வா வா கிணித்வா வாதி அத்தோ². சீவரேன அச்சா²தே³ஸ்ஸாமீதி வோஹாரவசனமேதம், இத்த²ன்னாமஸ்ஸ பி⁴க்கு²னோ த³ஸ்ஸாமீதி அயம் பனேத்த² அத்தோ². தத்ர சே ஸோதி யத்ர ஸோ க³ஹபதி வா க³ஹபதானீ வா, தத்ர ஸோ பி⁴க்கு² புப்³பே³ அப்பவாரிதோ உபஸங்கமித்வா சீவரே விகப்பம் ஆபஜ்ஜேய்ய சேதி அயமேத்த² பத³ஸம்ப³ந்தோ⁴. விகப்பம் ஆபஜ்ஜேய்யாதி விஸிட்ட²கப்பம் அதி⁴கவிதா⁴னம் ஆபஜ்ஜேய்ய. யதா² பன தமாபஜ்ஜதி, தம் த³ஸ்ஸேதும் ஸாது⁴ வதாதிஆதி³மாஹ. தத்த² ஸாதூ⁴தி ஆயாசனே நிபாதோ. வதாதி பரிவிதக்கே. மந்தி அத்தானம் நித்³தி³ஸதி. ஆயஸ்மாதி பரம் ஆலபதி. ஏவரூபம் வா ஏவரூபம் வாதி ஆயதாதீ³ஸு அஞ்ஞதரம். கல்யாணகம்யதம் உபாதா³யாதி ஸுந்த³ரகாமதம் விஸிட்ட²காமதம் சித்தேன க³ஹேத்வா, தஸ்ஸ ‘‘ஆபஜ்ஜேய்ய சே’’திஇமினா ஸம்ப³ந்தோ⁴, ஸசே பன ஏவரூபம் ஆபஜ்ஜந்தஸ்ஸ தஸ்ஸ வசனேன யோ பட²மம் அதி⁴ப்பேததோ மூலம் வட்³டே⁴த்வா ஸுந்த³ரதரம் சேதாபேதி, தஸ்ஸ பயோகே³ பி⁴க்கு²னோ து³க்கடம், படிலாபே⁴ன நிஸ்ஸக்³கி³யம் ஹோதி. தத்த² ‘‘இத³ம் மே, ப⁴ந்தே, சீவரம் புப்³பே³ அப்பவாரிதம் அஞ்ஞாதகம் க³ஹபதிகம் உபஸங்கமித்வா விகப்பம் ஆபன்னம் நிஸ்ஸக்³கி³ய’’ந்தி (பாரா. 529) இமினா நயேன நிஸ்ஸஜ்ஜனவிதா⁴னம் வேதி³தப்³ப³ம்.

ஸாவத்தி²யம் உபனந்த³ம் ஆரப்³ப⁴ சீவரே விகப்பம் ஆபஜ்ஜனவத்து²ஸ்மிம் பஞ்ஞத்தம், ஸாதா⁴ரணபஞ்ஞத்தி, அனாணத்திகம், திகபாசித்தியம், ஞாதகே அஞ்ஞாதகஸஞ்ஞினோ வேமதிகஸ்ஸ வா து³க்கடம். மஹக்³க⁴ம் சேதாபேதுகாமம் அப்பக்³க⁴ம் வா, ஏதேனேவ மூலேன ‘‘அஞ்ஞம் ஏவரூபம் வா தே³ஹீ’’தி வத³ந்தஸ்ஸ, வுத்தனயேன ஞாதகப்பவாரிதே விஞ்ஞாபேந்தஸ்ஸ, அத்தனோ த⁴னேன க³ண்ஹந்தஸ்ஸ, உம்மத்தகாதீ³னஞ்ச அனாபத்தி. சீவரே பி⁴ய்யோகம்யதா, அஞ்ஞாதகவிஞ்ஞத்தி, தாய ச படிலாபோ⁴தி இமானேத்த² தீணி அங்கா³னி. ஸமுட்டா²னாதீ³னி சதுத்த²ஸதி³ஸானேவாதி.

உபக்க²டஸிக்கா²பத³வண்ணனா நிட்டி²தா.

9. து³தியஉபக்க²டஸிக்கா²பத³வண்ணனா

நவமே இமினாவ நயேன அத்தோ² வேதி³தப்³போ³. இத³ஞ்ஹி புரிமஸ்ஸ அனுபஞ்ஞத்திஸதி³ஸம், கேவலம் தத்த² ஏகஸ்ஸ பீளா கதா, இத⁴ த்³வின்னம், அயமேத்த² விஸேஸோ, ஸேஸம் ஸப்³ப³ம் புரிமஸதி³ஸமேவ. யதா² ச த்³வின்னம், ஏவம் ப³ஹூனம் பீளம் கத்வா க³ண்ஹதோபி ஆபத்தி வேதி³தப்³பா³. நிஸ்ஸஜ்ஜனவிதா⁴னே ச ‘‘இத³ம் மே, ப⁴ந்தே, சீவரம் புப்³பே³ அப்பவாரிதே அஞ்ஞாதகே க³ஹபதிகே உபஸங்கமித்வா விகப்பம் ஆபன்னம் நிஸ்ஸக்³கி³ய’’ந்தி (பாரா. 534) இமினா நயேன வசனபே⁴தோ³ ஞாதப்³போ³தி.

து³தியஉபக்க²டஸிக்கா²பத³வண்ணனா நிட்டி²தா.

10. ராஜஸிக்கா²பத³வண்ணனா

த³ஸமே ராஜபோ⁴க்³கோ³தி ராஜதோ போ⁴க்³க³ம் பு⁴ஞ்ஜிதப்³ப³ம் அஸ்ஸ அத்தீ²தி ராஜபோ⁴க்³கோ³, ‘‘ராஜபோ⁴கோ³’’திபி பாடோ², ராஜதோ போ⁴கோ³ அஸ்ஸ அத்தீ²தி அத்தோ². சீவரசேதாபன்னந்தி ஹிரஞ்ஞாதி³கம் அகப்பியம். பஹிணேய்யாதி பேஸேய்ய. இமினாதிஆதி³ ஆக³மனஸுத்³தி⁴ம் த³ஸ்ஸேதும் வுத்தம். ஸசே ஹி ‘‘இத³ம் இத்த²ன்னாமஸ்ஸ பி⁴க்கு²னோ தே³ஹீ’’தி பேஸேய்ய, ஆக³மனஸ்ஸ அஸுத்³த⁴த்தா அகப்பியவத்து²ம் ஆரப்³ப⁴ பி⁴க்கு²னா கப்பியகாரகோபி நித்³தி³ஸிதப்³போ³ ந ப⁴வேய்ய. ஆப⁴தந்தி ஆனீதம். ந கோ² மயந்திஆதி³ இத³ம் கப்பியவஸேன ஆப⁴தம்பி சீவரமூலம் ஈதி³ஸேன தூ³தவசனேன அகப்பியம் ஹோதி, தஸ்மா தம் படிக்கி²பிதப்³ப³ந்தி த³ஸ்ஸேதும் வுத்தம். ஸுவண்ணம் ரஜதம் கஹாபணோ மாஸகோதி இமானி ஹி சத்தாரி நிஸ்ஸக்³கி³யவத்தூ²னி, முத்தா மணி வேளுரியோ ஸங்கோ² ஸிலா பவாளம் லோஹிதங்கோ மஸாரக³ல்லம் ஸத்த த⁴ஞ்ஞானி தா³ஸிதா³ஸகே²த்தவத்து²புப்பா²ராமப²லாராமாத³யோதி இமானி து³க்கடவத்தூ²னி ச அத்தனோ வா சேதியஸங்க⁴க³ணபுக்³க³லானம் வா அத்தா²ய ஸம்படிச்சி²தும் ந வட்டந்தி, தஸ்மா தம் ஸாதி³தும் ந வட்டதீதி த³ஸ்ஸனத்த²ம் ‘‘ந கோ² மய’’ந்திஆதி³ வுத்தம்.

சீவரஞ்ச கோ² மயம் படிக்³க³ண்ஹாமாதி இத³ம் பன அத்தானம் உத்³தி³ஸ்ஸ ஆப⁴தத்தா வத்தும் வட்டதி, தஸ்மா வுத்தம். காலேனாதி யுத்தபத்தகாலேன, யதா³ நோ அத்தோ² ஹோதி, ததா³ கப்பியம் சீவரம் படிக்³க³ண்ஹாமாதி அத்தோ². வேய்யாவச்சகரோதி கப்பியகாரகோ. நித்³தி³ஸிதப்³போ³திஇத³ம் ‘‘அத்தி² பனாயஸ்மதோ கோசி வேய்யாவச்சகரோ’’தி கப்பியவசனேன வுத்தத்தா அனுஞ்ஞாதம். ஸசே பன தூ³தோ ‘‘கோ இமம் க³ண்ஹாதீ’’தி வா ‘‘கஸ்ஸ தே³மீ’’தி வா வத³தி, ந நித்³தி³ஸிதப்³போ³. ஆராமிகோ வா உபாஸகோ வாதிஇத³ம் ஸாருப்பதாய வுத்தம், ட²பேத்வா பன பஞ்ச ஸஹத⁴ம்மிகே யோ கோசி கப்பியகாரகோ வட்டதி. ஏஸோ கோ², ஆவுஸோதிஇத³ம் பி⁴க்கு²ஸ்ஸ கப்பியவசனத³ஸ்ஸனத்த²ம் வுத்தம், ஏவமேவ ஹி வத்தப்³ப³ம், ‘‘ஏதஸ்ஸ தே³ஹீ’’திஆதி³ ந வத்தப்³ப³ம். ஸஞ்ஞத்தோ ஸோ மயாதி ஆணத்தோ ஸோ மயா, யதா² தும்ஹாகம் சீவரேன அத்தே² ஸதி சீவரம் த³ஸ்ஸதி, ஏவம் வுத்தோதி அத்தோ². தூ³தேன ஹி ஏவம் ஆரோசிதேயேவ தம் சோதே³தும் வட்டதி, நேவ தஸ்ஸ ஹத்தே² த³த்வா க³தமத்தகாரணேன. ஸசே பன ‘‘அயம் வேய்யாவச்சகரோ’’தி ஸம்முகா² நித்³தி³ட்டோ² ஹோதி, தூ³தோ ச ஸம்முகா² ஏவ தஸ்ஸ ஹத்தே² சேதாபன்னம் த³த்வா ‘‘தே²ரஸ்ஸ சீவரம் கிணித்வா தே³ஹீ’’தி க³ச்ச²தி, ஏவம் ‘‘ஸஞ்ஞத்தோ ஸோ மயா’’தி அவுத்தேபி சோதே³தும் வட்டதி. ஸசே பன தூ³தோ க³ச்ச²ந்தோவ ‘‘அஹம் தஸ்ஸ ஹத்தே² த³ஸ்ஸாமி, தும்ஹே சீவரம் க³ண்ஹேய்யாதா²’’தி பி⁴க்கு²னோ வத்வா வா க³ச்ச²தி, அஞ்ஞம் வா பேஸேத்வா ஆரோசாபேதி, ஏவம் ஸதி இதரம்பி சோதே³தும் வட்டதியேவ. தே³ஸனாமத்தமேவ சேதம் ‘‘தூ³தேனா’’தி. யோபி அத்தனா ஆஹரித்வா ஏவம் படிபஜ்ஜதி, தஸ்மிம்பி இத³மேவ லக்க²ணம். அத்தோ² மே, ஆவுஸோ, சீவரேனாதி சோத³னாலக்க²ணனித³ஸ்ஸனமேதம். ஸசே ஹி வாசாய சோதே³தி, இத³ம் வா வசனம் யாய காயசி பா⁴ஸாய ஏதஸ்ஸ அத்தோ² வா வத்தப்³போ³, ‘‘தே³ஹி மே, ஆஹர மே’’திஆதி³னா நயேன பன வத்தும் ந வட்டதி. அபி⁴னிப்பா²தே³ய்யாதி ஏவம் வசீபே⁴த³ம் கத்வா திக்க²த்தும் சோத³யமானோ படிலாப⁴வஸேன ஸாதே⁴ய்ய. இச்சேதம் குஸலந்தி ஏதம் ஸுந்த³ரம்.

ச²க்க²த்துபரமந்தி பா⁴வனபும்ஸகவசனமேதம். ச²க்க²த்துபரமஞ்ஹி தேன சீவரம் உத்³தி³ஸ்ஸ துண்ஹீபூ⁴தேன டா²தப்³ப³ம், ந நிஸீதி³தப்³ப³ம், ந ஆமிஸம் படிக்³க³ஹேதப்³ப³ம், ந த⁴ம்மோ பா⁴ஸிதப்³போ³. ‘‘கிம்காரணா ஆக³தோஸீ’’தி வுத்தே பன ‘‘ஜானாஹி, ஆவுஸோ’’தி ஏத்தகமேவ வத்தப்³ப³ம். ஸசே நிஸஜ்ஜாதீ³னி கரோதி, டா²னம் ப⁴ஞ்ஜதி, ஆக³தகாரணம் வினாஸேதி, இத³ம் காயேன சோத³னாய லக்க²ணத³ஸ்ஸனத்த²ம் வுத்தம். ஏத்த² ச உக்கட்ட²பரிச்சே²தே³ன திஸ்ஸன்னம் சோத³னானம் ச²ன்னஞ்ச டா²னானம் அனுஞ்ஞாதத்தா சோத³னாய தி³கு³ணம் டா²னம் அனுஞ்ஞாதம் ஹோதி, தஸ்மா ஸசே சோதே³தியேவ, ந திட்ட²தி, ச² சோத³னாயோ லப்³ப⁴ந்தி. ஸசே திட்ட²தியேவ, ந சோதே³தி, த்³வாத³ஸ டா²னானி லப்³ப⁴ந்தி. ஸசே உப⁴யம் கரோதி, ஏகாய சோத³னாய த்³வே டா²னானி ஹாபேதப்³பா³னி. தத்த² யோ ஏகதி³வஸமேவ புனப்புனம் க³ந்த்வா ச²க்க²த்தும் சோதே³தி, ஸகிம்யேவ வா க³ந்த்வா ‘‘அத்தோ² மே, ஆவுஸோ, சீவரேனா’’தி ச²க்க²த்தும் வத³தி, ததா² ஏகதி³வஸமேவ புனப்புனம் க³ந்த்வா த்³வாத³ஸக்க²த்தும் திட்ட²தி, ஸகிம்யேவ வா க³ந்த்வா தத்ர தத்ர டா²னே திட்ட²தி, ஸோபி ஸப்³ப³சோத³னாயோ ஸப்³ப³ட்டா²னானி ச ப⁴ஞ்ஜதி, கோ பன வாதோ³ நானாதி³வஸேஸு ஏவம் கரோந்தஸ்ஸாதி அயமேத்த² வினிச்ச²யோ. யே பன கப்பியகாரகே தா³யகோ ஸயமேவ க³ந்த்வா நிஸீத³தி தே ஸதக்க²த்தும்பி சோதே³தும் வட்டதி. யோ பன உபோ⁴ஹி பி அனித்³தி³ட்டோ² முக²வேவடிககப்பியகாரகோ ச பரம்முக²கப்பியகாரகோ ச, ஸோ ந கிஞ்சி வத்தப்³போ³, ஏவம் இத⁴ த³ஸபி கப்பியகாரகா த³ஸ்ஸிதா ஹோந்தி.

ததோ சே உத்தரீதி வுத்தசோத³னாடா²னபரிமாணதோ உத்தரி. நிஸ்ஸக்³கி³யந்தி உத்தரி வாயாமமானஸ்ஸ ஸப்³ப³ப்பயோகே³ஸு து³க்கடம், படிலாபே⁴ன நிஸ்ஸக்³கி³யம் ஹோதி. ஏத்த² ச ‘‘இத³ம் மே, ப⁴ந்தே, சீவரம் அதிரேகதிக்க²த்தும் சோத³னாய அதிரேகச²க்க²த்தும் டா²னேன அபி⁴னிப்பா²தி³தம் நிஸ்ஸக்³கி³ய’’ந்தி (பாரா. 539) இமினா நயேன நிஸ்ஸஜ்ஜனவிதா⁴னம் வேதி³தப்³ப³ம். யதஸ்ஸ சீவரசேதாபன்னம் ஆப⁴தந்தி யதோ ராஜதோ வா ராஜபோ⁴க்³க³தோ வா அஸ்ஸ பி⁴க்கு²னோ சீவரசேதாபன்னம் ஆனீதம், ‘‘யத்வஸ்ஸா’’திபி பாடோ², அயமேவ அத்தோ². தத்தா²தி தஸ்ஸ ரஞ்ஞோ வா ராஜபோ⁴க்³க³ஸ்ஸ வா ஸந்திகம், ஸமீபத்தே² ஹி இத³ம் பு⁴ம்மவசனம். ந தம் தஸ்ஸ பி⁴க்கு²னோ கிஞ்சி அத்த²ம் அனுபோ⁴தீதி தம் சேதாபன்னம் தஸ்ஸ பி⁴க்கு²னோ அப்பமத்தகம்பி கம்மம் ந நிப்பா²தே³தி. யுஞ்ஜந்தாயஸ்மந்தோ ஸகந்தி ஆயஸ்மந்தோ அத்தனோ ஸந்தகம் த⁴னம் பாபுணந்து. மா வோ ஸகம் வினஸ்ஸாதி தும்ஹாகம் ஸந்தகம் மா வினஸ்ஸது. அயம் தத்த² ஸாமீசீதி அயம் தத்த² அனுத⁴ம்மதா லோகுத்தரத⁴ம்மம் அனுக³தா, வத்தத⁴ம்மதாதி அத்தோ², தஸ்மா ஏவம் அகரோந்தோ வத்தபே⁴தே³ து³க்கடம் ஆபஜ்ஜதி.

ஸாவத்தி²யம் உபனந்த³ம் ஆரப்³ப⁴ ‘‘அஜ்ஜுண்ஹோ, ப⁴ந்தே, ஆக³மேஹீ’’தி (பாரா. 537) வுச்சமானோ நாக³மேஸி, தஸ்மிம் வத்து²ஸ்மிம் பஞ்ஞத்தம், ஸாதா⁴ரணபஞ்ஞத்தி, அனாணத்திகம், திகபாசித்தியம், ஊனகேஸு சோத³னாடா²னேஸு அதிரேகஸஞ்ஞினோ வேமதிகஸ்ஸ வா து³க்கடம். அசோத³னாய லத்³தே⁴, ஸாமிகேஹி சோதே³த்வா தி³ன்னே, உம்மத்தகாதீ³னஞ்ச அனாபத்தி. கப்பியகாரகஸ்ஸ பி⁴க்கு²னோ நித்³தி³ட்ட²பா⁴வோ, தூ³தேன அப்பிததா, ததுத்தரிவாயாமோ, தேன வாயாமேன படிலாபோ⁴தி இமானேத்த² சத்தாரி அங்கா³னி. ஸமுட்டா²னாதீ³னி சதுத்த²ஸதி³ஸானேவாதி.

ராஜஸிக்கா²பத³வண்ணனா நிட்டி²தா.

சீவரவக்³கோ³ பட²மோ.