அனியதகண்டோ³

1. பட²மானியதஸிக்கா²பத³வண்ணனா

அனியதுத்³தே³ஸே இமே கோ² பனாதிஆதி³ வுத்தனயமேவ. மாதுகா³மேனாதி தத³ஹுஜாதாயபி ஜீவமானகமனுஸ்ஸித்தி²யா. ஏகோ ஏகாயாதி ஏகோ பி⁴க்கு² மாதுகா³மஸங்கா²தாய ஏகாய இத்தி²யா ஸத்³தி⁴ம். ரஹோதி சக்கு²ஸ்ஸ ரஹோ. கிஞ்சாபி பாளியம் (பாரா. 445) ஸோதஸ்ஸ ரஹோ ஆக³தோ, சக்கு²ஸ்ஸேவ பன ரஹோ ‘‘ரஹோ’’தி இத⁴ அதி⁴ப்பேதோ. ஸசேபி ஹி பிஹிதகவாடஸ்ஸ க³ப்³ப⁴ஸ்ஸ த்³வாரே நிஸின்னோ விஞ்ஞூ புரிஸோ ஹோதி, நேவ அனாபத்திம் கரோதி. யத்த² பன ஸக்கா த³ட்டு²ம், தாதி³ஸே அந்தோத்³வாத³ஸஹத்தே²பி ஓகாஸே நிஸின்னோ ஸசக்கு²கோ விக்கி²த்தசித்தோபி நித்³தா³யந்தோபி அனாபத்திம் கரோதி, ஸமீபே டி²தோபி அந்தோ⁴ ந கரோதி, சக்கு²மாபி நிபஜ்ஜித்வா நித்³தா³யந்தோபி ந கரோதி, இத்தீ²னம் பன ஸதம்பி ந கரோதியேவ, தேன வுத்தம் ‘‘ரஹோதி சக்கு²ஸ்ஸ ரஹோ’’தி. படிச்ச²ன்னே ஆஸனேதி குட்டாதீ³ஹி படிச்ச²ன்னோகாஸே. அலம்கம்மனியேதி கம்மக்க²மம் கம்மயோக்³க³ந்தி கம்மனியம், அலம் பரியத்தம் கம்மனியபா⁴வாயாதி அலம்கம்மனியம், தஸ்மிம் அலம்கம்மனியே. யத்த² அஜ்ஜா²சாரம் கரோந்தா ஸக்கோந்தி தம் கம்மம் காதும், தாதி³ஸேதி அத்தோ². நிஸஜ்ஜம் கப்பேய்யாதி நிஸஜ்ஜம் கரேய்ய, நிஸீதே³ய்யாதி அத்தோ². ஏத்த² ச ஸயனம்பி நிஸஜ்ஜாய ஏவ ஸங்க³ஹிதம். ஸத்³தே⁴ய்யவசஸாதி ஸத்³தா⁴தப்³ப³வசனா, அரியஸாவிகாதி அத்தோ². நிஸஜ்ஜம் பி⁴க்கு² படிஜானமானோதி கிஞ்சாபி ஏவரூபா உபாஸிகா தி³ஸ்வா வத³தி, அத² கோ² பி⁴க்கு² நிஸஜ்ஜம் படிஜானமானோவ திண்ணம் த⁴ம்மானம் அஞ்ஞதரேன காரேதப்³போ³, ந அப்படிஜானமானோதி அத்தோ². யேன வா ஸாதி நிஸஜ்ஜாதீ³ஸு ஆகாரேஸு யேன வா ஆகாரேன ஸத்³தி⁴ம் மேது²னாதீ³னி ஆரோபேத்வா ஸா உபாஸிகா வதே³ய்ய, படிஜானமானோவ தேன ஸோ பி⁴க்கு² காரேதப்³போ³, ஏவரூபாயபி ஹி உபாஸிகாய வசனமத்தேன ஆகாரேன ந காரேதப்³போ³தி அத்தோ². கஸ்மா? யஸ்மா தி³ட்ட²ம் நாம ததா²பி ஹோதி, அஞ்ஞதா²பீதி. அயம் த⁴ம்மோ அனியதோதி திண்ணம் ஆபத்தீனம் யம் ஆபத்திம் வா வத்து²ம் வா படிஜானாதி, தஸ்ஸ வஸேன காரேதப்³ப³தாய அனியதோ.

ஸாவத்தி²யம் உதா³யித்தே²ரம் ஆரப்³ப⁴ மாதுகா³மேன ஸத்³தி⁴ம் வுத்தப்பகாரே ஆஸனே நிஸஜ்ஜகப்பனவத்து²ஸ்மிம் பஞ்ஞத்தம், அஸாதா⁴ரணபஞ்ஞத்தி, அனாணத்திகம், மேது²னத⁴ம்மஸன்னிஸ்ஸிதகிலேஸஸங்கா²தேன ரஹஸ்ஸாதே³ன மாதுகா³மஸ்ஸ ஸந்திகம் க³ந்துகாமதாய அக்கி²அஞ்ஜனாதி³தோ பட்டா²ய ஸப்³ப³பயோகே³ஸு து³க்கடம். க³ந்த்வா தஸ்மிம் வா நிஸின்னே இத்தீ² நிஸீத³து, தஸ்ஸா வா நிஸின்னாய ஸோ நிஸீத³து, அபச்சா² அபுரிமம்யேவ உபோ⁴ வா நிஸீத³ந்து, உபி⁴ன்னம் நிஸஜ்ஜாய பாசித்தியம். ஸசே பன காயஸம்ஸக்³க³ம் வா மேது²னம் வா ஸமாபஜ்ஜதி, தேஸம் வஸேன காரேதப்³போ³. நிபஜ்ஜனேபி ஏஸேவ நயோ. வுத்தப்பகாரே புரிஸே நிபஜ்ஜித்வா அனித்³தா³யந்தே அனந்தே⁴ விஞ்ஞுபுரிஸே உபசாரக³தே ஸதி, டி²தஸ்ஸ, அரஹோபேக்க²ஸ்ஸ, அஞ்ஞவிஹிதஸ்ஸ ச நிஸஜ்ஜனபச்சயா அனாபத்தி. உம்மத்தகாதீ³னம் பன தீஹிபி ஆபத்தீஹி அனாபத்தி. ஸியா ஸீலவிபத்தி, ஸியா ஆசாரவிபத்தி. யம் பன ஆபத்திம் படிஜானாதி, தஸ்ஸா வஸேன அங்க³பே⁴தோ³ ஞாதப்³போ³. ஸமுட்டா²னாதீ³னி பட²மபாராஜிகஸதி³ஸானேவாதி.

பட²மானியதஸிக்கா²பத³வண்ணனா நிட்டி²தா.

2. து³தியானியதஸிக்கா²பத³வண்ணனா

து³தியே இத்தீ²பி புரிஸோபி யோ கோசி விஞ்ஞூ அனந்தோ⁴ அப³தி⁴ரோ அந்தோத்³வாத³ஸஹத்தே² ஓகாஸே டி²தோ வா நிஸின்னோ வா விக்கி²த்தோபி நித்³தா³யந்தோபி அனாபத்திம் கரோதி. ப³தி⁴ரோ பன சக்கு²மாபி, அந்தோ⁴ வா அப³தி⁴ரோபி ந கரோதி. பாராஜிகாபத்திஞ்ச பரிஹாபேத்வா து³ட்டு²ல்லவாசாபத்தி வுத்தாதி அயம் விஸேஸோ. ஸேஸம் புரிமனயேனேவ வேதி³தப்³ப³ம். ஸமுட்டா²னாதீ³னி பனேத்த² அதி³ன்னாதா³னஸதி³ஸானேவாதி.

து³தியானியதஸிக்கா²பத³வண்ணனா நிட்டி²தா.

உத்³தி³ட்டா² கோ²திஆதி³ ஸப்³ப³த்த² வுத்தனயேனேவ வேதி³தப்³ப³ம்.

கங்கா²விதரணியா பாதிமோக்க²வண்ணனாய

அனியதவண்ணனா நிட்டி²தா.