1. பட²மபாராஜிகவண்ணனா

யோ பனாதி ரஸ்ஸதீ³கா⁴தி³னா லிங்கா³தி³பே⁴தே³ன யோ கோசி. பி⁴க்கூ²தி ஏஹிபி⁴க்கு²உபஸம்பதா³, ஸரணக³மனூபஸம்பதா³, ஓவாத³ப்படிக்³க³ஹணூபஸம்பதா³, பஞ்ஹாப்³யாகரணூபஸம்பதா³, அட்ட²க³ருத⁴ம்மப்படிக்³க³ஹணூபஸம்பதா³, தூ³தேனூபஸம்பதா³, அட்ட²வாசிகூபஸம்பதா³, ஞத்திசதுத்த²கம்மூபஸம்பதா³தி இமாஸு அட்ட²ஸு உபஸம்பதா³ஸு ஞத்திசதுத்தே²ன உபஸம்பதா³கம்மேன அகுப்பேன டா²னாரஹேன உபஸம்பன்னோ. தஸ்ஸ பன கம்மஸ்ஸ வத்து²ஞத்திஅனுஸ்ஸாவன ஸீமா பரிஸாஸம்பத்திவஸேன அகுப்பதா வேதி³தப்³பா³.

தத்த² வத்தூ²தி உபஸம்பதா³பேக்கோ² புக்³க³லோ, ஸோ ட²பேத்வா ஊனவீஸதிவஸ்ஸம் அந்திமவத்து²அஜ்ஜா²பன்னபுப்³ப³ம், பண்ட³காத³யோ ச ஏகாத³ஸ அப⁴ப்³ப³புக்³க³லே வேதி³தப்³போ³. தத்த² ஊனவீஸதிவஸ்ஸோ நாம படிஸந்தி⁴க்³க³ஹணதோ பட்டா²ய அபரிபுண்ணவீஸதிவஸ்ஸோ. அந்திமவத்து²அஜ்ஜா²பன்னபுப்³போ³ நாம சதுன்னம் பாராஜிகானம் அஞ்ஞதரம் அஜ்ஜா²பன்னபுப்³போ³. பண்ட³காத³யோ வஜ்ஜனீயபுக்³க³லகதா²யம் வுத்தா. தேஸு ஆஸித்தபண்ட³கஞ்ச உஸூயபண்ட³கஞ்ச ட²பேத்வா ஓபக்கமிகபண்ட³கோ நபும்ஸகபண்ட³கோ பண்ட³கபா⁴வபக்கே² டி²தோ பக்க²பண்ட³கோ ச இத⁴ அதி⁴ப்பேதோ.

தே²ய்யஸம்வாஸகோ பன திவிதோ⁴ லிங்க³த்தே²னகோ ஸம்வாஸத்தே²னகோ உப⁴யத்தே²னகோதி. தத்த² யோ ஸயம் பப்³ப³ஜித்வா ந பி⁴க்கு²வஸ்ஸானி க³ணேதி, ந யதா²வுட்³ட⁴ம் பி⁴க்கூ²னம் வா ஸாமணேரானம் வா வந்த³னம் ஸாதி³யதி, ந ஆஸனேன படிபா³ஹதி, ந உபோஸதா²தீ³ஸு ஸந்தி³ஸ்ஸதி, அயம் அஸுத்³த⁴சித்ததாய லிங்க³மத்தஸ்ஸேவ தே²னிதத்தா லிங்க³த்தே²னகோ நாம. யோ பன பி⁴க்கூ²ஹி பப்³ப³ஜிதோ ஸாமணேரோ ஸமானோ காஸாயானி அபனேத்வா தேஸு ஸஉஸ்ஸாஹோவ மேது²னம் த⁴ம்மம் படிஸேவித்வா புன நிவாஸேத்வா ஸாமணேரபா⁴வம் படிஜானாதி, அயம் பி⁴க்கூ²ஹி தி³ன்னலிங்க³ஸ்ஸ அபரிச்சத்தத்தா ந லிங்க³த்தே²னகோ, ந லிங்கா³னுரூபஸ்ஸ ஸம்வாஸஸ்ஸ ஸாதி³தத்தா நாபி ஸம்வாஸத்தே²னகோ. அந்திமவத்து²அஜ்ஜா²பன்னகேபி ஏஸேவ நயோ. யோ ச கோ² ஸாமணேரோ ஸமானோ விதே³ஸம் க³ந்த்வா பி⁴க்கு²வஸ்ஸானி க³ணேதி, யதா²வுட்³ட⁴ம் வந்த³னம் ஸாதி³யதி, ஆஸனேன படிபா³ஹதி, உபோஸதா²தீ³ஸு ஸந்தி³ஸ்ஸதி, அயம் ஸம்வாஸமத்தஸ்ஸேவ தே²னிதத்தா ஸம்வாஸத்தே²னகோ நாம. பி⁴க்கு²வஸ்ஸக³ணனாதி³கோ ஹி ஸப்³போ³பி கிரியபே⁴தோ³ இமஸ்மிம் அத்தே² ‘‘ஸம்வாஸோ’’தி வேதி³தப்³போ³. ஸிக்க²ம் பச்சக்கா²ய ‘‘ந மம் கோசி ஜானாதீ’’தி புன ஏவம் படிபஜ்ஜந்தேபி ஏஸேவ நயோ. யோ பன ஸயம் பப்³ப³ஜித்வா விஹாரம் க³ந்த்வா யதா²வுட்³ட⁴ம் வந்த³னம் ஸாதி³யதி, ஆஸனேன படிபா³ஹதி, பி⁴க்கு²வஸ்ஸானி க³ணேதி, உபோஸதா²தீ³ஸு ஸந்தி³ஸ்ஸதி, அயம் லிங்க³ஸ்ஸ சேவ ஸம்வாஸஸ்ஸ ச தே²னிதத்தா உப⁴யத்தே²னகோ நாம. து⁴ரனிக்கே²பவஸேன காஸாயானி அபனேத்வா அந்திமவத்து²ம் அஜ்ஜா²பஜ்ஜித்வா புன தானி அச்சா²தே³த்வா ஏவம் படிபஜ்ஜந்தேபி ஏஸேவ நயோ, அயம் திவிதோ⁴பி தே²ய்யஸம்வாஸகோ இத⁴ அதி⁴ப்பேதோ. ட²பேத்வா பன இமம் திவித⁴ம்.

‘‘ராஜ து³ப்³பி⁴க்க² கந்தார-ரோக³ வேரீ ப⁴யேன வா;

சீவராஹரணத்த²ம் வா, லிங்க³ம் ஆதி³யதீத⁴ யோ.

‘‘ஸம்வாஸம் நாதி⁴வாஸேதி, யாவ ஸோ ஸுத்³த⁴மானஸோ;

தே²ய்யஸம்வாஸகோ நாம, தாவ ஏஸ ந வுச்சதீ’’தி. (மஹாவ. அட்ட². 110);

யோ பன உபஸம்பன்னோ தித்தி²யபா⁴வம் பத்த²யமானோ ஸயம் வா குஸசீராதி³கம் தித்தி²யலிங்க³ம் ஆதி³யதி, தேஸம் வா ஸந்திகே பப்³ப³ஜதி, நக்³கோ³ வா ஹுத்வா ஆஜீவகானம் ஸந்திகம் க³ந்த்வா தேஸம் வதானி ஆதி³யதி, அயம் தித்தி²யபக்கந்தகோ நாம. ட²பேத்வா பன மனுஸ்ஸஜாதிகம் அவஸேஸோ ஸப்³போ³பி திரச்சா²னக³தோ நாம. யேன மனுஸ்ஸஜாதிகா ஜனேத்தி ஸயம்பி மனுஸ்ஸபூ⁴தேனேவ ஸஞ்சிச்ச ஜீவிதா வோரோபிதா, அயம் மாதுகா⁴தகோ நாம. பிதுகா⁴தகேபி ஏஸேவ நயோ. யேன அந்தமஸோ கி³ஹிலிங்கே³ டி²தோபி மனுஸ்ஸஜாதிகோ கீ²ணாஸவோ ஸஞ்சிச்ச ஜீவிதா வோரோபிதோ, அயம் அரஹந்தகா⁴தகோ நாம. யோ பன பகதத்தம் பி⁴க்கு²னிம் திண்ணம் மக்³கா³னம் அஞ்ஞதரஸ்மிம் மக்³கே³ தூ³ஸேதி, அயம் பி⁴க்கு²னிதூ³ஸகோ நாம. யோ தே³வத³த்தோ விய ஸாஸனம் உத்³த⁴ம்மம் உப்³பி³னயம் கத்வா சதுன்னம் கம்மானம் அஞ்ஞதரவஸேன ஸங்க⁴ம் பி⁴ந்த³தி, அயம் ஸங்க⁴பே⁴த³கோ நாம. யோ தே³வத³த்தோ விய து³ட்ட²சித்தேன வத⁴கசித்தேன ததா²க³தஸ்ஸ ஜீவமானகஸரீரே கு²த்³த³கமக்கி²காய பிவனமத்தம்பி லோஹிதம் உப்பாதே³தி, அயம் லோஹிதுப்பாத³கோ நாம. யஸ்ஸ இத்தி²னிமித்துப்பாத³னகம்மதோ ச புரிஸனிமித்துப்பாத³னகம்மதோ ச உப⁴தோ து³வித⁴ம்பி ப்³யஞ்ஜனம் அத்தி², அயம் உப⁴தோப்³யஞ்ஜனகோ நாம. இதி இமே தேரஸ புக்³க³லா உபஸம்பதா³ய அவத்தூ², இமே பன ட²பேத்வா அஞ்ஞஸ்மிம் உபஸம்பதா³பேக்கே² ஸதி உபஸம்பதா³கம்மம் வத்து²ஸம்பத்திவஸேன அகுப்பம் ஹோதி.

கத²ம் ஞத்திஸம்பத்திவஸேன அகுப்பம் ஹோதி? வத்து²ஸங்க⁴புக்³க³லஞத்தீனம் அபராமஸனானி, பச்சா² ஞத்திட்ட²பனஞ்சாதி இமே தாவ பஞ்ச ஞத்திதோ³ஸா. தத்த² ‘‘அயம் இத்த²ன்னாமோ’’தி உபஸம்பதா³பேக்க²ஸ்ஸ அகித்தனம் வத்து²அபராமஸனம் நாம. ‘‘ஸுணாது மே, ப⁴ந்தே, ஸங்கோ⁴’’திஏத்த² ‘‘ஸுணாது மே, ப⁴ந்தே’’தி வத்வா ‘‘ஸங்கோ⁴’’தி அப⁴ணனம் ஸங்க⁴அபராமஸனம் நாம. ‘‘இத்த²ன்னாமஸ்ஸ உபஸம்பதா³பேக்கோ²’’தி உபஜ்ஜா²யஸ்ஸ அகித்தனம் புக்³க³லஅபராமஸனம் நாம. ஸப்³பே³ன ஸப்³ப³ம் ஞத்தியா அனுச்சாரணம் ஞத்திஅபராமஸனம் நாம. பட²மம் கம்மவாசம் நிட்டா²பேத்வா ‘‘ஏஸா ஞத்தீ’’தி வத்வா ‘‘க²மதி ஸங்க⁴ஸ்ஸா’’தி ஏவம் ஞத்திகித்தனம் பச்சா² ஞத்திட்ட²பனம் நாம. இதி இமேஹி தோ³ஸேஹி விமுத்தாய ஞத்தியா ஸம்பன்னம் ஞத்திஸம்பத்திவஸேன அகுப்பம் ஹோதி.

அனுஸ்ஸாவனவஸேன அகுப்பதாயபி வத்து²ஸங்க⁴புக்³க³லானம் அபராமஸனானி, ஸாவனாய ஹாபனம், அகாலே ஸாவனந்தி இமே பஞ்ச அனுஸ்ஸாவனதோ³ஸா. தத்த² வத்தா²தீ³னம் அபராமஸனானி ஞத்தியம் வுத்தஸதி³ஸானேவ. தீஸு பன அனுஸ்ஸாவனாஸு யத்த² கத்த²சி ஏதேஸம் அபராமஸனம் அபராமஸனமேவ. ஸப்³பே³ன ஸப்³ப³ம் பன கம்மவாசம் அவத்வா சதுக்க²த்தும் ஞத்திகித்தனமேவ, அத² வா பன கம்மவாசாப்³ப⁴ந்தரே அக்க²ரஸ்ஸ வா பத³ஸ்ஸ வா அனுச்சாரணம் வா து³ருச்சாரணம் வா ஸாவனாய ஹாபனம் நாம. ஸாவனாய அனோகாஸே பட²மம் ஞத்திம் அட்ட²பேத்வா அனுஸ்ஸாவனகரணம் அகாலே ஸாவனம் நாம. இதி இமேஹி தோ³ஸேஹி விமுத்தாய அனுஸ்ஸாவனாய ஸம்பன்னம் அனுஸ்ஸாவனஸம்பத்திவஸேன அகுப்பம் ஹோதி.

புப்³பே³ வுத்தம் விபத்திஸீமாலக்க²ணம் ஸமதிக்கந்தாய பன ஸீமாய கதம் ஸீமாஸம்பத்திவஸேன அகுப்பம் ஹோதி. யாவதிகா பி⁴க்கூ² கம்மப்பத்தா, தேஸம் அனாக³மனம், ச²ந்தா³ரஹானம் ச²ந்த³ஸ்ஸ அனாஹரணம், ஸம்முகீ²பூ⁴தானம் படிக்கோஸனந்தி இமே பன தயோ பரிஸாதோ³ஸா, தேஹி விமுத்தாய பரிஸாய கதம் பரிஸாஸம்பத்திவஸேன அகுப்பம் ஹோதி. காரணாரஹத்தா பன ஸத்து² ஸாஸனாரஹத்தா டா²னாரஹம் நாம ஹோதி. இதி யோ இமினா ஏவம் அகுப்பேன டா²னாரஹேன ஞத்திசதுத்தே²ன உபஸம்பதா³கம்மேன உபஸம்பன்னோ, அயம் இத⁴ ‘‘பி⁴க்கூ²’’தி அதி⁴ப்பேதோ. பண்ணத்திவஜ்ஜேஸு பன அஞ்ஞேபி ஸங்க³ஹம் க³ச்ச²ந்தி.

பி⁴க்கூ²னம் ஸிக்கா²ஸாஜீவஸமாபன்னோதி யா பி⁴க்கூ²னம் அதி⁴ஸீலஸங்கா²தா ஸிக்கா², தஞ்ச, யத்த² சேதே ஸஹ ஜீவந்தி, ஏகஜீவிகா ஸபா⁴க³வுத்தினோ ஹோந்தி, தம் ப⁴க³வதா பஞ்ஞத்தம் ஸிக்கா²பத³ஸங்கா²தம் ஸாஜீவஞ்ச, தத்த² ஸிக்க²னபா⁴வேன ஸமாபன்னோதி பி⁴க்கூ²னம் ஸிக்கா²ஸாஜீவஸமஆபன்னோ. ஸமாபன்னோதி ஸிக்க²ஞ்ச பரிபூரேந்தோ ஸாஜீவஞ்ச அவீதிக்கமந்தோ ஹுத்வா தது³ப⁴யம் உபக³தோதி அத்தோ². ஸிக்க²ம் அபச்சக்கா²ய து³ப்³ப³ல்யம் அனாவிகத்வாதி யம் ஸிக்க²ம் ஸமாபன்னோ, தம் அபடிக்கி²பித்வா, யஞ்ச ஸாஜீவம் ஸமாபன்னோ, தஸ்மிம் து³ப்³ப³லபா⁴வம் அப்பகாஸேத்வா. தத்த² சித்தகே²த்தகாலபயோக³புக்³க³லவிஜானனவஸேன ஸிக்கா²ய பச்சக்கா²னம் ஞத்வா தத³பா⁴வேன அபச்சக்கா²னம் வேதி³தப்³ப³ம். கத²ம்? உபஸம்பன்னபா⁴வதோ சவிதுகாமதாசித்தேனேவ ஹி ஸிக்கா²பச்சக்கா²னம் ஹோதி, ந த³வா வா ரவா வா ப⁴ணந்தஸ்ஸ. ஏவம் சித்தவஸேன ஸிக்கா²பச்சக்கா²னம் ஹோதி, ந தத³பா⁴வேன. ததா² ‘‘பு³த்³த⁴ம் பச்சக்கா²மி, த⁴ம்மம் பச்சக்கா²மி, ஸங்க⁴ம் பச்சக்கா²மி, ஸிக்க²ம், வினயம், பாதிமோக்க²ம், உத்³தே³ஸம், உபஜ்ஜா²யம், ஆசரியம், ஸத்³தி⁴விஹாரிகம், அந்தேவாஸிகம், ஸமானுபஜ்ஜா²யகம், ஸமானாசரியகம், ஸப்³ரஹ்மசாரிம் பச்சக்கா²மீ’’தி ஏவம் வுத்தானம் பு³த்³தா⁴தீ³னம் சுத்³த³ஸன்னம், ‘‘கி³ஹீதி மம் தா⁴ரேஹி, உபாஸகோ, ஆராமிகோ, ஸாமணேரோ, தித்தி²யோ, தித்தி²யஸாவகோ, அஸமணோ, ‘அஸக்யபுத்தியோ’தி மம் தா⁴ரேஹீ’’தி ஏவம் வுத்தானம் கி³ஹிஆதீ³னம் அட்ட²ன்னஞ்சாதி இமேஸம் த்³வாவீஸதியா கே²த்தபதா³னம் யஸ்ஸ கஸ்ஸசி ஸவேவசனஸ்ஸ வஸேன தேஸு யம்கிஞ்சி வத்துகாமஸ்ஸ யம்கிஞ்சி வத³தோ ஸிக்கா²பச்சக்கா²னம் ஹோதி, ந ருக்கா²தீ³னம் அஞ்ஞதரஸ்ஸ நாமம் க³ஹேத்வா பச்சாசிக்க²ந்தஸ்ஸ. ஏவம் கே²த்தவஸேன பச்சக்கா²னம் ஹோதி, ந தத³பா⁴வேன.

தத்த² யதே³தம் ‘‘பச்சக்கா²மீ’’தி ச, ‘‘மம் தா⁴ரேஹீ’’தி (பாரா. 51) ச வுத்தம் வத்தமானகாலவசனம், யானி ச ‘‘அலம் மே பு³த்³தே⁴ன, கிம் நு மே பு³த்³தே⁴ன, ந மமத்தோ² பு³த்³தே⁴ன, ஸுமுத்தாஹம் பு³த்³தே⁴னா’’திஆதி³னா (பாரா. 52) நயேன ஆக்²யாதவஸேன காலம் அனாமஸித்வா புரிமேஹி சுத்³த³ஸஹி பதே³ஹி ஸத்³தி⁴ம் யோஜேத்வா வுத்தானி ‘‘அலம் மே’’திஆதீ³னி சத்தாரி பதா³னி, தேஸம்யேவ ச ஸவேவசனானம் வஸேன பச்சக்கா²னம் ஹோதி, ந ‘‘பச்சக்கா²ஸி’’ந்தி வா ‘‘பச்சக்கி²ஸ்ஸ’’ந்தி வா ‘‘மம் தா⁴ரேஸீ’’தி வா ‘‘மம் தா⁴ரேஸ்ஸதீ’’தி வா ‘‘யம்னூனாஹம் பச்சக்கே²ய்ய’’ந்தி (பாரா. 45) வாதிஆதீ³னி அதீதானாக³தபரிகப்பவசனானி ப⁴ணந்தஸ்ஸ. ஏவம் வத்தமான காலவஸேன சேவ அனாமட்ட²காலவஸேன ச பச்சக்கா²னம் ஹோதி, ந தத³பா⁴வேன.

பயோகோ³ பன து³விதோ⁴ காயிகோ ச வாசஸிகோ ச. தத்த² ‘‘பு³த்³த⁴ம் பச்சக்கா²மீ’’திஆதி³னா (பாரா. 51) நயேன யாய காயசி பா⁴ஸாய வசீபே⁴த³ம் கத்வா வாசஸிகப்பயோகே³னேவ பச்சக்கா²னம் ஹோதி, ந அக்க²ரலிக²னம் வா ஹத்த²முத்³தா³தி³த³ஸ்ஸனம் வா காயப்பயோக³ம் கரோந்தஸ்ஸ. ஏவம் வாசஸிகப்பயோகே³னேவ பச்சக்கா²னம் ஹோதி, ந தத³பா⁴வேன.

புக்³க³லோ பன து³விதோ⁴ – யோ ச பச்சக்கா²தி, யஸ்ஸ ச பச்சக்கா²தி. தத்த² யோ பச்சக்கா²தி, ஸோ ஸசே உம்மத்தககி²த்தசித்தவேத³னாட்டானம் அஞ்ஞதரோ ந ஹோதி. யஸ்ஸ பன பச்சக்கா²தி, ஸோ ஸசே மனுஸ்ஸஜாதிகோ ஹோதி, ந ச உம்மத்தகாதீ³னம் அஞ்ஞதரோ, ஸம்முகீ²பூ⁴தோ ச ஸிக்கா²பச்சக்கா²னம் ஹோதி. ந ஹி அஸம்முகீ²பூ⁴தஸ்ஸ தூ³தேன வா பண்ணேன வா ஆரோசனம் ருஹதி. ஏவம் யதா²வுத்தபுக்³க³லவஸேன பச்சக்கா²னம் ஹோதி, ந தத³பா⁴வேன.

விஜானனம்பி நியமிதானியமிதவஸேன து³வித⁴ம். தத்த² யஸ்ஸ யேஸம் வா நியமேத்வா ‘‘இமஸ்ஸ, இமேஸம் வா ஆரோசேமீ’’தி வத³தி, ஸசே தே யதா² பகதியா லோகே மனுஸ்ஸா வசனம் ஸுத்வா ஆவஜ்ஜனஸமயே ஜானந்தி, ஏவம் தஸ்ஸ வசனானந்தரமேவ தஸ்ஸ ‘‘அயம் உக்கண்டி²தோ’’தி வா ‘‘கி³ஹிபா⁴வம் பத்த²யதீ’’தி வா யேன கேனசி ஆகாரேன ஸிக்கா²பச்சக்கா²னபா⁴வம் ஜானந்தி, பச்சக்கா²தாவ ஹோதி ஸிக்கா². அத² அபரபா⁴கே³ ‘‘கிம் இமினா வுத்த’’ந்தி சிந்தேத்வா ஜானந்தி, அஞ்ஞே வா ஜானந்தி, அபச்சக்கா²தாவ ஹோதி ஸிக்கா². அனியமேத்வா ஆரோசேந்தஸ்ஸ பன ஸசே வுத்தனயேன யோ கோசி மனுஸ்ஸஜாதிகோ வசனத்த²ம் ஜானாதி, பச்சக்கா²தாவ ஹோதி ஸிக்கா². ஏவம் விஜானனவஸேன பச்சக்கா²னம் ஹோதி, ந தத³பா⁴வேன. யோ பன அந்தமஸோ த³வாயபி பச்சக்கா²தி, தேன அபச்சக்கா²தாவ ஹோதி ஸிக்கா². இதி இமேஸம் வுத்தப்பகாரானம் சித்தாதீ³னம் வா வஸேன, ஸப்³ப³ஸோ வா பன அபச்சக்கா²னேன ஸிக்க²ம் அபச்சக்கா²ய ஸிக்கா²பச்சக்கா²னஸ்ஸேவ ச அத்த²பூ⁴தம் ஏகச்சம் து³ப்³ப³ல்யம் அனாவிகத்வா.

மேது²னம் த⁴ம்மம் படிஸேவேய்யாதி ஏத்த² மேது²னம் த⁴ம்மந்தி ராக³பரியுட்டா²னேன ஸதி³ஸானம் உபி⁴ன்னம் த⁴ம்மம். படிஸேவேய்யாதி படிஸேவேய்ய அஜ்ஜா²பஜ்ஜேய்ய. அந்தமஸோதி ஸப்³ப³ந்திமேன பரிச்சே²தே³ன. திரச்சா²னக³தாயபீதி படிஸந்தி⁴வஸேன திரச்சா²னேஸு க³தாயபி, அயமேத்த² அனுபஞ்ஞத்தி. பாராஜிகோ ஹோதீதி பராஜிதோ ஹோதி, பராஜயம் ஆபன்னோ. அஸம்வாஸோதி பகதத்தா பி⁴க்கூ² ஸஹ வஸந்தி ஏத்தா²தி ஏககம்மாதி³கோவ திவிதோ⁴பி விதி⁴ ஸம்வாஸோ நாம, ஸோ தேன ஸத்³தி⁴ம் நத்தீ²தி அஸம்வாஸோ. ஸங்க⁴கம்மேஸு ஹி ஏஸ க³ணபூரகோபி ந ஹோதி, அயம் தாவ பத³வண்ணனா.

அயம் பனேத்த² வினிச்ச²யோ – மனுஸ்ஸாமனுஸ்ஸதிரச்சா²னக³தவஸேன ஹி திஸ்ஸோ இத்தி²யோ, தாஸம் வச்சமக்³க³பஸ்ஸாவமக்³க³முக²மக்³க³வஸேன தயோ தயோ கத்வா நவ மக்³கா³, ததா² உப⁴தோப்³யஞ்ஜனகானம். புரிஸானம் பன வச்சமக்³க³முக²மக்³க³வஸேன த்³வே த்³வே கத்வா ச² மக்³கா³, ததா² பண்ட³கானந்தி ஏவம் திம்ஸ மக்³கா³. தேஸு அத்தனோ வா பரேஸம் வா யஸ்ஸ கஸ்ஸசி மக்³க³ஸ்ஸ ஸந்த²தஸ்ஸ வா அஸந்த²தஸ்ஸ வா, பரேஸம் பன மதானம்பி அக்கா²யிதஸ்ஸ வா யேபு⁴ய்யேன அக்கா²யிதஸ்ஸ வா பகதிவாதேன அஸம்பு²ட்டே² அல்லோகாஸே யோ பி⁴க்கு² ஏகதிலபீ³ஜமத்தம்பி அத்தனோ அங்க³ஜாதம் ஸந்த²தம் வா அஸந்த²தம் வா ஸேவனசித்தேன பவேஸேதி, பரேன வா பவேஸியமானே பவேஸனபவிட்ட²ட்டி²தஉத்³த⁴ரணேஸு யம்கிஞ்சி ஸாதி³யதி, அயம் பாராஜிகாபத்திம் ஆபன்னோ நாம ஹோதி, அயம் தாவேத்த² அஸாதா⁴ரணவினிச்ச²யோ. ஸப்³ப³ஸிக்கா²பதா³னம் பன ஸாதா⁴ரணவினிச்ச²யத்த²ம் அயம் மாதிகா –

நிதா³னம் புக்³க³லம் வத்து²ம், பஞ்ஞத்திவிதி⁴மேவ ச;

ஆணத்தாபத்தினாபத்தி-விபத்திம் அங்க³மேவ ச.

ஸமுட்டா²னவிதி⁴ம் கிரியா-ஸஞ்ஞாசித்தேஹி நானத்தம்;

வஜ்ஜகம்மப்பபே⁴த³ஞ்ச, திகத்³வயவிதி⁴ம் ததா².

லக்க²ணம் ஸத்தரஸதா⁴, டி²தம் ஸாதா⁴ரணம் இத³ம்;

ஞத்வா யோஜேய்ய மேதா⁴வீ, தத்த² தத்த² யதா²ரஹந்தி.

தத்த² நிதா³னம் நாம வேஸாலி-ராஜக³ஹ-ஸாவத்தி²-ஆளவி-கோஸம்பி³-ஸக்³க³-ப⁴க்³கா³னம் வஸேன ஸத்தவித⁴ம் பஞ்ஞத்திட்டா²னம், இத³ஞ்ஹி ஸப்³ப³ஸிக்கா²பதா³னம் நிதா³னம். புக்³க³லோ நாம யம் யம் ஆரப்³ப⁴ தம் தம் ஸிக்கா²பத³ம் பஞ்ஞத்தம். வத்து² நாம தஸ்ஸ தஸ்ஸ புக்³க³லஸ்ஸ அஜ்ஜா²சாரோ வுச்சதி. பஞ்ஞத்திவிதி⁴ந்தி பஞ்ஞத்திஅனுபஞ்ஞத்திஅனுப்பன்னபஞ்ஞத்திஸப்³ப³த்த²பஞ்ஞத்திபதே³ஸபஞ்ஞத்திஸாதா⁴ரணபஞ்ஞத்தி அஸாதா⁴ரணபஞ்ஞத்திஏகதோபஞ்ஞத்திஉப⁴தோபஞ்ஞத்திவஸேன நவவிதா⁴ பஞ்ஞத்தி. தத்த² அனுப்பன்னபஞ்ஞத்தி நாம அனுப்பன்னே தோ³ஸே பஞ்ஞத்தா, ஸா அட்ட²க³ருத⁴ம்மப்படிக்³க³ஹணவஸேன (சூளவ. 403) பி⁴க்கு²னீனம்யேவ ஆக³தா, அஞ்ஞத்ர நத்தி². வினயத⁴ரபஞ்சமேன (மஹாவ. 259) க³ணேன உபஸம்பதா³, க³ணங்க³ணூபாஹனா (மஹாவ. 259) து⁴வன்ஹானம் சம்மத்த²ரணந்தி ஏதேஸம் வஸேன சதுப்³பி³தா⁴ பதே³ஸபஞ்ஞத்தி நாம. மஜ்ஜி²மதே³ஸேயேவ ஹி ஏதேஹி ஆபத்தி ஹோதி, தேஸுபி து⁴வன்ஹானம் படிக்கே²பமத்தமேவ பாதிமோக்கே² ஆக³தம், ததோ அஞ்ஞா பதே³ஸபஞ்ஞத்தி நாம நத்தி². ஸப்³பா³னி ஸப்³ப³த்த²பஞ்ஞத்தியேவ ஹோந்தி, ஸாதா⁴ரணபஞ்ஞத்திது³கஞ்ச ஏகதோபஞ்ஞத்திது³கஞ்ச அத்த²தோ ஏகம், தஸ்மா அனுப்பன்னபஞ்ஞத்திஞ்ச ஸப்³ப³த்த²பஞ்ஞத்திது³கஞ்ச ஏகதோபஞ்ஞத்திது³கஞ்ச ட²பேத்வா ஸேஸானம் சதஸ்ஸன்னம் பஞ்ஞத்தீனம் வஸேன ஸப்³ப³த்த² வினிச்ச²யோ வேதி³தப்³போ³. ஆணத்தாபத்தினாபத்திவிபத்திந்திஏத்த² ஆணத்தீதிஆணாபனா வுச்சதி. ஆபத்தீதி புப்³ப³ப்பயோகா³தி³வஸேன ஆபத்திபே⁴தோ³. அனாபத்தீதி அஜானனாதி³வஸேன அனாபத்தி. விபத்தீதி ஸீலஆசாரதி³ட்டி²ஆஜீவவிபத்தீனம் அஞ்ஞதரா. இதி இமாஸம் ஆணத்தாதீ³னம்பி வஸேன ஸப்³ப³த்த² வினிச்ச²யோ வேதி³தப்³போ³. அங்க³ந்தி ஸப்³ப³ஸிக்கா²பதே³ஸு ஆபத்தீனம் அங்க³ம் வேதி³தப்³ப³ம்.

ஸமுட்டா²னவிதி⁴ந்தி ஸப்³பா³பத்தீனம் காயோ வாசா காயவாசா காயசித்தம் வாசாசித்தம் காயவாசாசித்தந்தி இமானி ஏகங்கி³கத்³வங்கி³கதிவங்கி³கானி. ச² ஸமுட்டா²னானி நாம யானி ‘‘ஸிக்கா²பத³ஸமஉட்டா²னானீ’’திபி வுச்சந்தி. தத்த² புரிமானி தீணி அசித்தகானி, பச்சி²மானி ஸசித்தகானி. தேஸு ஏகேன வா த்³வீஹி வா தீஹி வா சதூஹி வா ச²ஹி வா ஸமுட்டா²னேஹி ஆபத்தியோ ஸமுட்ட²ஹந்தி, பஞ்சஸமுட்டா²னா நாம நத்தி². தத்த² ஏகஸமுட்டா²னா நாம சதுத்தே²ன ச பஞ்சமேன ச ச²ட்டே²ன ச ஸமுட்டா²னேன ஸமுட்டா²தி, ந அஞ்ஞேன. த்³விஸமுட்டா²னா நாம பட²மசதுத்தே²ஹி ச து³தியபஞ்சமேஹி ச ததியச²ட்டே²ஹி ச சதுத்த²ச²ட்டே²ஹி ச பஞ்சமச²ட்டே²ஹி ச ஸமுட்டா²னேஹி, ஸமுட்டா²தி, ந அஞ்ஞேஹி. திஸமுட்டா²னா நாம பட²மேஹி ச தீஹி, பச்சி²மேஹி ச தீஹி ஸமுட்டா²னேஹி ஸமுட்டா²தி, ந அஞ்ஞேஹி. சதுஸமுட்டா²னா நாம பட²மததியசதுத்த²ச²ட்டே²ஹி ச து³தியததியபஞ்சமச²ட்டே²ஹி ச ஸமுட்டா²னேஹி ஸமுட்டா²தி, ந அஞ்ஞேஹி. ச² ஸமுட்டா²னா நாம ச²ஹிபி ஸமுட்டா²தி.

ஏவம் –

திதா⁴ ஏகஸமுட்டா²னா, பஞ்சதா⁴ த்³விஸமுட்டி²தா;

த்³விதா⁴ திசதுரோ டா²னா, ஏகதா⁴ ச²ஸமுட்டி²தாதி.

ஸமுட்டா²னவஸேன ஸப்³பா³வ தேரஸ ஆபத்தியோ ஹோந்தி (சூளவ. 165 ஆத³யோ), தா பட²மபஞ்ஞத்திஸிக்கா²பத³வஸேன ஸமுட்டா²னதோ தேரஸ நாமானி லப⁴ந்தி பட²மபாராஜிகஸமுட்டா²னா, அதி³ன்னாதா³ன-ஸஞ்சரித்த-ஸமனுபா⁴ஸன-கதி²ன-ஏளகலோம-பத³ஸோத⁴ம்ம-அத்³தா⁴ன-தே²ய்யஸத்த²-த⁴ம்மதே³ஸனாபூ⁴தாரோசன-சோரிவுட்டா²பன-அனனுஞ்ஞாதஸமுட்டா²னாதி. தத்த² யா காயசித்ததோ ஸமுட்டா²தி, அயம் பட²மபாராஜிகஸமுட்டா²னா நாம. யா ஸசித்தகேஹி தீஹி ஸமுட்டா²னேஹி ஸமுட்டா²தி, அயம் அதி³ன்னாதா³னஸமுட்டா²னா நாம. யா ச²ஹிபி ஸமுட்டா²தி, அயம் ஸஞ்சரித்தஸமுட்டா²னா நாம. யா ச²ட்டே²னேவ ஸமுட்டா²தி, அயம் ஸமனுபா⁴ஸனஸமுட்டா²னா நாம. யா ததியச²ட்டே²ஹி ஸமுட்டா²தி, அயம் கதி²னஸமுட்டா²னா நாம. யா பட²மசதுத்தே²ஹி ஸமுட்டா²தி, அயம் ஏளகலோமஸமுட்டா²னா நாம. யா து³தியபஞ்சமேஹி ஸமுட்டா²தி, அயம் பத³ஸோத⁴ம்மஸமுட்டா²னா நாம. யா பட²மததியசதுத்த²ச²ட்டே²ஹி ஸமுட்டா²தி, அயம் அத்³தா⁴னஸமுட்டா²னா நாம. யா சதுத்த²ச²ட்டே²ஹி ஸமுட்டா²தி, அயம் தே²ய்யஸத்த²ஸமுட்டா²னா நாம. யா பஞ்சமேனேவ ஸமுட்டா²தி, அயம் த⁴ம்மதே³ஸனாஸமுட்டா²னா நாம. யா அசித்தகேஹி தீஹி ஸமுட்டா²னேஹி ஸமுட்டா²தி, அயம் பூ⁴தாரோசனஸமுட்டா²னா நாம. யா பஞ்சமச²ட்டே²ஹி ஸமுட்டா²தி, அயம் சோரிவுட்டா²பனஸமுட்டா²னா நாம. யா து³தியததியபஞ்சமச²ட்டே²ஹி ஸமுட்டா²தி, அயம் அனனுஞ்ஞாதஸமுட்டா²னா நாமாதி. இதி இமஸ்ஸ ஸமுட்டா²னவிதி⁴னோபி வஸேன ஸப்³ப³த்த² வினிச்ச²யோ வேதி³தப்³போ³.

கிரியாஸஞ்ஞாசித்தேஹி நானத்தந்தி ஏதேஹி கிரியாதீ³ஹி ஸப்³பா³பத்தீனம் நானாபா⁴வம் ஞத்வா ஸப்³ப³த்த² வினிச்ச²யோ வேதி³தப்³போ³. ஸப்³பா³பத்தியோ ஹி கிரியாவஸேன பஞ்சவிதா⁴ ஹோந்தி, ஸேய்யதி²த³ம் – அத்தா²பத்தி கிரியதோ ஸமுட்டா²தி, அத்தி² அகிரியதோ, அத்தி² கிரியாகிரியதோ, அத்தி² ஸியா கிரியதோ ஸியா அகிரியதோ, அத்தி² ஸியா கிரியதோ ஸியா கிரியாகிரியதோதி. தத்த² யா காயேன வா வாசாய வா பத²விக²ணனாதீ³ஸு (பசி. 84) விய வீதிக்கமம் கரோந்தஸ்ஸ ஹோதி, அயம் கிரியதோ ஸமுட்டா²தி நாம. யா காயவாசாஹி கத்தப்³ப³ம் அகரோந்தஸ்ஸ ஹோதி பட²மகதி²னாபத்தி (பாரா. 459 ஆத³யோ) விய, அயம் அகிரியதோ ஸமுட்டா²தி நாம. யா கரோந்தஸ்ஸ ச அகரோந்தஸ்ஸ ச ஹோதி அஞ்ஞாதிகாய பி⁴க்கு²னியா ஹத்த²தோ சீவரப்படிக்³க³ஹணாபத்தி (பாரா. 508-511) விய, அயம் கிரியாகிரியதோ ஸமுட்டா²தி நாம. யா ஸியா கரோந்தஸ்ஸ ச, ஸியா அகரோந்தஸ்ஸ ச ஹோதி ரூபியப்படிக்³க³ஹணாபத்தி (பாரா. 582) விய, அயம் ஸியா கிரியதோ ஸியா அகிரியதோ ஸமுட்டா²தி நாம. யா ஸியா கரோந்தஸ்ஸ ச ஸியா கரோந்தாகரோந்தஸ்ஸ ச ஹோதி குடிகாராபத்தி (பாரா. 342 ஆத³யோ) விய, அயம் ஸியா கிரியதோ ஸியா கிரியாகிரியதோ ஸமுட்டா²தி நாம.

ஸப்³பா³பத்தியோ ச ஸஞ்ஞாவஸேன து³விதா⁴ ஹோந்தி ஸஞ்ஞாவிமோக்கா² நோஸஞ்ஞாவிமோக்கா²தி. தத்த² யதோ வீதிக்கமஸஞ்ஞாய அபா⁴வேன முச்சதி, அயம் ஸஞ்ஞாவிமோக்கா², இதரா நோஸஞ்ஞாவிமோக்கா². புன ச ஸப்³பா³பி சித்தவஸேன து³விதா⁴ ஹோந்தி ஸசித்தகா அசித்தகா சாதி. தத்த² யா ஸசித்தகஸமுட்டா²னவஸேனேவ ஸமுட்டா²தி அயம் ஸசித்தகா. யா அசித்தகேன வா ஸசித்தகமிஸ்ஸகேன வா ஸமுட்டா²தி அயம் அசித்தகா.

வஜ்ஜகம்மப்பபே⁴த³ந்தி ஏத்த² ஸப்³பா³பத்தியோ வஜ்ஜவஸேன து³விதா⁴ ஹோந்தி லோகவஜ்ஜா பண்ணத்திவஜ்ஜா சாதி. தத்த² யஸ்ஸா ஸசித்தகபக்கே² சித்தம் அகுஸலமேவ ஹோதி, அயம் லோகவஜ்ஜா, ஸேஸா பண்ணத்திவஜ்ஜா. ஸப்³பா³ ச காயகம்மவசீகம்மதது³ப⁴யவஸேன திவிதா⁴ ஹோந்தி. தத்த² காயத்³வாரே ஆபஜ்ஜிதப்³பா³ காயகம்மந்தி வுச்சதி, வசீத்³வாரே ஆபஜ்ஜிதப்³பா³ வசீகம்மந்தி வுச்சதி, உப⁴யத்த² ஆபஜ்ஜிதப்³பா³ காயகம்மம் வசீகம்மஞ்சாதி, மனோத்³வாரே ஆபத்தி நாம நத்தி². இதி இமினா வஜ்ஜகம்மப்பபே⁴தே³னாபி ஸப்³ப³த்த² வினிச்ச²யோ வேதி³தப்³போ³.

திகத்³வயவிதி⁴ந்தி குஸலத்திகவேத³னாத்திகவிதி⁴ம். ஆபத்திம் ஆபஜ்ஜமானோ ஹி அகுஸலசித்தோ வா ஆபஜ்ஜதி குஸலாப்³யாகதசித்தோ வா, ததா² து³க்க²வேத³னாஸமங்கீ³ வா இதரவேத³னாத்³வயஸமங்கீ³ வா. ஏவம் ஸந்தேபி ஸப்³ப³ஸிக்கா²பதே³ஸு அகுஸலசித்தவஸேன ஏகம் சித்தம், குஸலாப்³யாகதசித்தவஸேன த்³வே சித்தானி, ஸப்³பே³ஸம் வஸேன தீணி சித்தானி. து³க்க²வேத³னாவஸேன ஏகா வேத³னா, ஸுக²உபேக்கா²வஸேன த்³வே, ஸப்³பா³ஸம் வஸேன திஸ்ஸோ வேத³னாதி. அயமேவ பபே⁴தோ³ லப்³ப⁴தி, ந அஞ்ஞோ.

லக்க²ணம் ஸத்தரஸதா⁴, டி²தம் ஸாதா⁴ரணம் இத³ம், ஞத்வாதி இத³ம் நிதா³னாதி³வேத³னாத்திகபரியோஸானம் ஸத்தரஸப்பகாரம் லக்க²ணம் ஜானித்வா யோஜேய்ய மேதா⁴வீ. தத்த² தத்த² யதா²ரஹந்தி பண்டி³தோ பி⁴க்கு² தஸ்மிம் தஸ்மிம் ஸிக்கா²பதே³ இத³ம் லக்க²ணம் யதா²னுரூபம் யோஜேய்யாதி அத்தோ². தம் பன அயோஜிதம் து³ப்³பி³ஜானம் ஹோதி, தஸ்மா நம் ஸப்³ப³ஸிக்கா²பதா³னம் அஸாதா⁴ரணவினிச்ச²யபரியோஸானே இமம் மாதிகம் அனுத்³த⁴ரித்வாவ யோஜேத்வா த³ஸ்ஸயிஸ்ஸாம.

இத⁴ பனஸ்ஸ அயம் யோஜனா – இத³ம் வேஸாலியம் ஸுதி³ன்னத்தே²ரம் ஆரப்³ப⁴ மேது²னவீதிக்கமவத்து²ஸ்மிம் பஞ்ஞத்தம். ‘‘மேது²னம் த⁴ம்மம் படிஸேவேய்யா’’தி அயமேத்த² பஞ்ஞத்தி, ‘‘ஸிக்க²ம் அபச்சக்கா²யா’’தி ச ‘‘அந்தமஸோ திரச்சா²னக³தாயபீ’’தி ச த்³வே அனுபஞ்ஞத்தியோ. அனுபஞ்ஞத்தி ச நாமேஸா ஆபத்திகரா ச ஹோதி அஞ்ஞவாத³கஸிக்கா²பதா³தீ³ஸு (பாசி. 95 ஆத³யோ) விய, அனாபத்திகரா ச அஞ்ஞத்ர ஸுபினந்தாதிஆதீ³ஸு (பாரா. 236-237) விய, ஆபத்திஉபத்த²ம்ப⁴கரா ச அதி³ன்னாதா³னாதீ³ஸு (பாரா. 91) விய, இத⁴ பன உபத்த²ம்ப⁴கராதி வேதி³தப்³பா³. இதோ பரம் பன யத்த² அனுபஞ்ஞத்தி அத்தி², தத்த² ‘‘அயம் அனுபஞ்ஞத்தீ’’தி ஏத்தகமேவ த³ஸ்ஸயிஸ்ஸாம. ட²பேத்வா பன அனுபஞ்ஞத்திம் அவஸேஸா பஞ்ஞத்தியேவாதி ஸப்³ப³த்த² வினிச்ச²யோ வேதி³தப்³போ³. பி⁴க்கு²ம் ஆரப்³ப⁴ உப்பன்னவத்து²ஸ்மிம்யேவ ‘‘யா பன பி⁴க்கு²னீ ச²ந்த³ஸோ மேது²னம் த⁴ம்மம் படிஸேவேய்யா’’தி ஏவம் பி⁴க்கு²னீனம்பி பஞ்ஞத்திதோ ஸாதா⁴ரணபஞ்ஞத்தி. ஆணத்தியா அனாபஜ்ஜனதோ அனாணத்திகம். பி⁴க்கு²ம் பன ஆணாபேந்தோ அகப்பியஸமாதா³னாபத்திதோ ந முச்சதி, மேது²னராகே³ன காயஸம்ஸக்³கே³ து³க்கடம், ஜீவமானகஸரீரஸ்ஸ வுத்தப்பகாரே மக்³கே³ ஸசேபி தசாதீ³னி அனவஸேஸேத்வா ஸப்³ப³ஸோ சி²ன்னே நிமித்தஸண்டா²னமத்தம் பஞ்ஞாயதி, தத்த² அந்தமஸோ அங்க³ஜாதே உட்டி²தம் அனட்ட²காயப்பஸாத³ம் பீளகம் வா சம்மகி²லம் வா பவேஸேந்தஸ்ஸாபி ஸேவனசித்தே ஸதி பாராஜிகம், நட்ட²காயப்பஸாத³ம் ஸுக்க²பீளகம் வா மதசம்மம் வா லோமம் வா பவேஸேந்தஸ்ஸ து³க்கடம், ஸசே நிமித்தஸண்டா²னமத்தம்பி அனவஸேஸேத்வா ஸப்³ப³ஸோ மக்³கோ³ உப்பாடிதோ, தத்த² உபக்கமதோ வணஸங்கே²பவஸேன து²ல்லச்சயம், ததா² மனுஸ்ஸானம் அக்கி²னாஸாகண்ணச்சி²த்³த³வத்தி²கோஸேஸு ஸத்த²கேன கதவணே வா, ஹத்தி²அஸ்ஸாதீ³னஞ்ச திரச்சா²னானம் வத்தி²கோஸனாஸாபுடேஸு து²ல்லச்சயம். திரச்சா²னானம் பன அக்கி²கண்ணனாஸாவணேஸு அஹிமச்சா²தீ³னம் பவேஸனப்பமாணவிரஹிதே அணுனிமித்தே ஸப்³பே³ஸஞ்ச உபகச்ச²காதீ³ஸு ஸேஸஸரீரேஸு து³க்கடம். மதஸரீரே நிமித்தே உபட்³ட⁴க்கா²யிததோ பட்டா²ய யாவ ந குதி²தம் ஹோதி, தாவ து²ல்லச்சயம். குதி²தே து³க்கடம், ததா² வட்டகதே முகே² அச்சு²பந்தம் அங்க³ஜாதம் பவேஸேந்தஸ்ஸ து³க்கடம். ஓட்ட²தோ ப³ஹி நிக்க²ந்தஜிவ்ஹாய வா த³ந்தேஸு வா து²ல்லச்சயம். நிமித்ததோ ப³ஹி பதிதமம்ஸபேஸியம் து³க்கடந்தி அயமேத்த² ஆபத்திபே⁴தோ³.

அஜானந்தஸ்ஸ அஸாதி³யந்தஸ்ஸ உம்மத்தகஸ்ஸ கி²த்தசித்தஸ்ஸ வேத³னாட்டஸ்ஸ ஆதி³கம்மிகானஞ்ச அனாபத்தி. ஏத்த² பன யோ நித்³த³ம் ஓக்கந்தத்தா பரேன கதம்பி உபக்கமம் ந ஜானாதி, ஸோ அஜானந்தோ. யோ ஜானித்வாபி ந ஸாதி³யதி, ஸோ அஸாதி³யந்தோ. யோ பித்தவஸேன அதேகிச்ச²ம் உம்மாத³ம் பத்தோ, ஸோ உம்மத்தகோ. யக்கே²ஹி கதசித்தவிக்கே²போ கி²த்தசித்தோ. த்³வின்னம்பி ச ஏதேஸம் அக்³கி³ஸுவண்ணகூ³த²சந்த³னாதீ³ஸு ஸமப்பவத்திபா⁴வேன அஜானனபா⁴வோவ பமாணம். யோ அதி⁴மத்தவேத³னாய ஆதுரத்தா கிஞ்சி ந ஜானாதி, ஸோ வேத³னாட்டோ. யோ தஸ்மிம் தஸ்மிம் வத்து²ஸ்மிம் ஆதி³பூ⁴தோ, ஸோ ஆதி³கம்மிகோ. அயம் பன அனாபத்தி. சதூஸு விபத்தீஸு ஸீலவிபத்தி. தஸ்ஸா த்³வே அங்கா³னி ஸேவனசித்தஞ்ச மக்³கே³ன மக்³க³படிபாத³னஞ்சாதி. ஸமுட்டா²னாதி³தோ இத³ம் ஸிக்கா²பத³ம் பட²மபாராஜிகஸமுட்டா²னம், கிரியம், ஸஞ்ஞாவிமோக்க²ம், ஸசித்தகம், லோகவஜ்ஜம், காயகம்மம், அகுஸலசித்தம், த்³விவேத³னந்தி, இமானி ச ஸமுட்டா²னாதீ³னி நாம ஆபத்தியா ஹோந்தி, ந ஸிக்கா²பத³ஸ்ஸ. வோஹாரஸுக²த்த²ம் பன ஸப்³ப³ட்ட²கதா²ஸு ஸிக்கா²பத³ஸீஸேன தே³ஸனா ஆக³தா, தஸ்மா அஞ்ஞேஸுபி ஏவரூபேஸு டா²னேஸு ப்³யஞ்ஜனே ஆத³ரம் அகத்வா அதி⁴ப்பேதமேவ க³ஹேதப்³ப³ம்.

அத்த²ஞ்ஹி நாதோ² ஸரணம் அவோச;

ந ப்³யஞ்ஜனம் லோகஹிதோ மஹேஸீ.

தஸ்மா அகத்வா ரதிமக்க²ரேஸு;

அத்தே² நிவேஸேய்ய மதிம் முதீமாதி.

பட²மபாராஜிகவண்ணனா நிட்டி²தா.