11. பாரிவாஸிகஸிக்கா²பத³வண்ணனா

ஏகாத³ஸமே பாரிவாஸிகச²ந்த³தா³னேனாதி பாரிவாஸியேன ச²ந்த³தா³னேன. தத்த² சதுப்³பி³த⁴ம் பாரிவாஸியம் பரிஸபாரிவாஸியம் ரத்திபாரிவாஸியம் ச²ந்த³பாரிவாஸியம் அஜ்ஜா²ஸயபாரிவாஸியந்தி.

தத்த² பரிஸபாரிவாஸியம் நாம பி⁴க்கூ² கேனசிதே³வ கரணீயேன ஸன்னிபதிதா ஹோந்தி, அத² மேகோ⁴ வா உட்ட²ஹதி, உஸ்ஸாரணா வா கரீயதி, மனுஸ்ஸா வா அஜ்ஜோ²த்த²ரந்தா ஆக³ச்ச²ந்தி, பி⁴க்கூ² ‘‘அனோகாஸா மயம், அஞ்ஞத்ர க³ச்சா²மா’’தி ச²ந்த³ம் அவிஸ்ஸஜ்ஜித்வாவ உட்ட²ஹந்தி, இத³ம் பரிஸபாரிவாஸியம் நாம, கிஞ்சாபி பரிஸபாரிவாஸியம், ச²ந்த³ஸ்ஸ பன அவிஸ்ஸட்ட²த்தா கம்மம் காதும் வட்டதி.

புன பி⁴க்கூ² ‘‘உபோஸதா²தீ³னி கரிஸ்ஸாமா’’தி ரத்திம் ஸன்னிபதித்வா ‘‘யாவ ஸப்³பே³ ஸன்னிபதந்தி, தாவ த⁴ம்மம் ஸுணிஸ்ஸாமா’’தி ஏகம் அஜ்ஜே²ஸந்தி, தஸ்மிம் த⁴ம்மகத²ம் கதே²ந்தேயேவ அருணோ உக்³க³ச்ச²தி. ஸசே ‘‘சாதுத்³த³ஸிகம் உபோஸத²ம் கரிஸ்ஸாமா’’தி நிஸின்னா, ‘‘பன்னரஸோ’’தி காதும் வட்டதி. ஸசே பன்னரஸிகம் காதும் நிஸின்னா, பாடிபதே³ அனுபோஸதே² உபோஸத²ம் காதும் ந வட்டதி. அஞ்ஞம் பன ஸங்க⁴கிச்சம் காதும் வட்டதி, இத³ம் ரத்திபாரிவாஸியம் நாம.

புன பி⁴க்கூ² ‘‘கிஞ்சிதே³வ அப்³பா⁴னாதி³ஸங்க⁴கம்மம் கரிஸ்ஸாமா’’தி ஸன்னிஸின்னா ஹோந்தி, தத்ரேகோ நக்க²த்தபாட²கோ பி⁴க்கு² ஏவம் வத³தி ‘‘அஜ்ஜ நக்க²த்தம் தா³ருணம், மா இத³ம் கம்மம் கரோதா²’’தி. தே தஸ்ஸ வசனேன ச²ந்த³ம் விஸ்ஸஜ்ஜேத்வா தத்தே²வ நிஸின்னா ஹோந்தி, அத²ஞ்ஞோ ஆக³ந்த்வா ‘‘நக்க²த்தம் பதிமானேந்தம், அத்தோ² பா³லம் உபஜ்ஜ²கா³ (ஜா. 1.1.49), கிம் நக்க²த்தேன கரோதா²’’தி வத³தி, இத³ம் ச²ந்த³பாரிவாஸியஞ்சேவ அஜ்ஜா²ஸயபாரிவாஸியஞ்ச. ஏதஸ்மிம் பாரிவாஸியே புன ச²ந்த³பாரிஸுத்³தி⁴ம் அனாஹரித்வா கம்மம் காதும் ந வட்டதி, இத³ம் ஸந்தா⁴ய வுத்தம் ‘‘பாரிவாஸிகச²ந்த³தா³னேனா’’தி. பாசித்தியந்தி ஏவம் வுட்டா²பேந்தியா வுத்தனயேனேவ கம்மவாசாபரியோஸானே பாசித்தியம்.

ராஜக³ஹே து²ல்லனந்த³ம் ஆரப்³ப⁴ ஏவம் வுட்டா²பனவத்து²ஸ்மிம் பஞ்ஞத்தம். ச²ந்த³ம் அவிஸ்ஸஜ்ஜேத்வாவ அவுட்டி²தாய பரிஸாய வுட்டா²பேந்தியா, உம்மத்திகாதீ³னஞ்ச அனாபத்தி. பாரிவாஸிகச²ந்த³தா³னதா, வுட்டா²பனந்தி இமானேத்த² த்³வே அங்கா³னி. ஸமுட்டா²னாதீ³னி க³ம்பி⁴னிஸிக்கா²பத³ஸதி³ஸானேவாதி.

பாரிவாஸிகஸிக்கா²பத³வண்ணனா நிட்டி²தா.