1-2-3. பட²மகுமாரிபூ⁴தாதி³ஸிக்கா²பத³வண்ணனா

குமாரிபூ⁴தவக்³க³ஸ்ஸ பட²மது³தியததியானி தீஹி கி³ஹிக³தஸிக்கா²பதே³ஹி ஸதி³ஸானேவ. யா பன தா ஸப்³ப³பட²மா த்³வே மஹாஸிக்க²மானா, தா அதிக்கந்தவீஸதிவஸ்ஸாதி வேதி³தப்³பா³. தா ஹி கி³ஹிக³தா வா ஹோந்து, அகி³ஹிக³தா வா, ஸம்முதிகம்மாதீ³ஸு ‘‘ஸிக்க²மானா’’இச்சேவ வத்தப்³பா³, ‘‘கி³ஹிக³தா’’தி வா ‘‘குமாரிபூ⁴தா’’தி வா ந வத்தப்³பா³. கி³ஹிக³தாய த³ஸவஸ்ஸகாலே ஸிக்கா²ஸம்முதிம் த³த்வா த்³வாத³ஸவஸ்ஸகாலே உபஸம்பதா³ காதப்³பா³, ஏகாத³ஸவஸ்ஸகாலே த³த்வா தேரஸவஸ்ஸகாலே காதப்³பா³, த்³வாத³ஸதேரஸசுத்³த³ஸபன்னரஸஸோளஸஸத்தரஸஅட்டா²ரஸவஸ்ஸகாலே ஸிக்கா²ஸம்முதிம் த³த்வா வீஸதிவஸ்ஸகாலே உபஸம்பதா³ காதப்³பா³. அட்டா²ரஸவஸ்ஸகாலதோ பட்டா²ய ச பனாயம் ‘‘கி³ஹிக³தா’’திபி ‘‘குமாரிபூ⁴தா’’திபி வத்தும் வட்டதி. யா பனாயம் ‘‘குமாரிபூ⁴தா’’தி வுத்தா ஸாமணேரீ, ஸா ‘‘கி³ஹிக³தா’’தி ந வத்தப்³பா³, ‘‘குமாரிபூ⁴தா’’இச்சேவ வத்தப்³பா³. ஸிக்கா²ஸம்முதிதா³னவஸேன பன ஸப்³பா³பி ‘‘ஸிக்க²மானா’’தி வத்தும் வட்டதீதி.

பட²மகுமாரிபூ⁴தாதி³ஸிக்கா²பத³வண்ணனா நிட்டி²தா.