4. பவாரிதஸிக்கா²பத³வண்ணனா

சதுத்தே² க³ணபோ⁴ஜனே வுத்தனயேன நிமந்திதா, பவாரணாஸிக்கா²பதே³ வுத்தனயேன பவாரிதா வேதி³தப்³பா³. பாசித்தியந்தி தஸ்ஸா புரேப⁴த்தம் ட²பேத்வா யாகு³ஞ்சேவ ஸேஸானி ச தீணி காலிகானி அஞ்ஞம் யம்கிஞ்சி ஆமிஸம் அஜ்ஜோ²ஹரணத்தா²ய படிக்³க³ண்ஹந்தியா க³ஹணே து³க்கடம், அஜ்ஜோ²ஹாரே அஜ்ஜோ²ஹாரே பாசித்தியம்.

ஸாவத்தி²யம் ஸம்ப³ஹுலா பி⁴க்கு²னியோ ஆரப்³ப⁴ அஞ்ஞத்ர பு⁴ஞ்ஜனவத்து²ஸ்மிம் பஞ்ஞத்தம், தீணி காலிகானி ஆஹாரத்தா²ய படிக்³க³ண்ஹந்தியாபி அஜ்ஜோ²ஹரந்தியாபி து³க்கடம். யா பன நிமந்திதா அப்பவாரிதா யாகு³ம் பிவதி, ஸாமிகே அபலோகேத்வா பு⁴ஞ்ஜதி, தீணி காலிகானி ஸதி பச்சயே பரிபு⁴ஞ்ஜதி, தஸ்ஸா, உம்மத்திகாதீ³னஞ்ச அனாபத்தி. நிமந்திதா வா பவாரிதா வா தம் உப⁴யம் வா, புரேப⁴த்தம் வுத்தலக்க²ணஸ்ஸ ஆமிஸஸ்ஸ அஜ்ஜோ²ஹாரோ, ஸாமிகானம் அனாபுச்ச²னந்தி இமானேத்த² தீணி அங்கா³னி. அத்³தா⁴னஸமுட்டா²னம், நிமந்திதாய அனாபுச்சா² பு⁴ஞ்ஜந்தியா ஆபத்திஸம்ப⁴வதோ ஸியா கிரியாகிரியம், பவாரிதாய கப்பியம் காரேத்வாபி அகாரேத்வாபி பரிபு⁴ஞ்ஜந்தியா ஆபத்திஸம்ப⁴வதோ ஸியா கிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம் காயகம்மம், வசீகம்மம், திசித்தம், திவேத³னந்தி.

பவாரிதஸிக்கா²பத³வண்ணனா நிட்டி²தா.