9. காலஅதிக்கமனஸிக்கா²பத³வண்ணனா

நவமே து³ப்³ப³லசீவரபச்சாஸாயாதி து³ப்³ப³லாய சீவரபச்சாஸாய, ‘‘ஸசே ஸக்கோம த³ஸ்ஸாமா’’தி ஏத்தகமத்தம் ஸுத்வா உப்பாதி³தாய ஆஸாயாதி அத்தோ². சீவரகாலஸமயம் அதிக்காமேய்யாதி வஸ்ஸம்வுட்ட²பி⁴க்கு²னீஹி காலசீவரே பா⁴ஜியமானே ‘‘ஆக³மேய்யாத², அய்யே, அத்தி² ஸங்க⁴ஸ்ஸ சீவரபச்சாஸா’’தி வத்வா தம் சீவரவிப⁴ங்க³ம் சீவரகாலம் அதிக்காமேய்ய, தஸ்ஸா அனத்த²தே கதி²னே வஸ்ஸானஸ்ஸ பச்சி²மமாஸம், அத்த²தே கதி²னே கதி²னுப்³பா⁴ரதி³வஸம் அதிக்காமேந்தியா பாசித்தியம்.

ஸாவத்தி²யம் து²ல்லனந்த³ம் ஆரப்³ப⁴ து³ப்³ப³லசீவரபச்சாஸாய சீவரகாலஸமயம் அதிக்கமனவத்து²ஸ்மிம் பஞ்ஞத்தம், து³ப்³ப³லசீவரே வேமதிகாய, அது³ப்³ப³லசீவரே து³ப்³ப³லசீவரஸஞ்ஞாய சேவ வேமதிகாய ச து³க்கடம். உப⁴யத்த² அது³ப்³ப³லசீவரஸஞ்ஞாய, கிஞ்சாபி ‘ந ஸக்கோமா’தி வத³ந்தி, ‘‘இதா³னி பன தேஸம் கப்பாஸோ வா உப்பஜ்ஜிஸ்ஸதி, ஸத்³தோ⁴ வா புரிஸோ ஆக³மிஸ்ஸதி, தஸ்மிம் ஆக³தே அத்³தா⁴ த³ஸ்ஸந்தீ’’தி ஏவம் ஆனிஸம்ஸம் த³ஸ்ஸேத்வா நிவாரேந்தியா, உம்மத்திகாதீ³னஞ்ச அனாபத்தி. து³ப்³ப³லசீவரதா, து³ப்³ப³லஸஞ்ஞிதா, வினா ஆனிஸம்ஸேன நிவாரணந்தி இமானேத்த² தீணி அங்கா³னி. ஸமுட்டா²னாதீ³னி அதி³ன்னாதா³னஸதி³ஸானீதி.

காலஅதிக்கமனஸிக்கா²பத³வண்ணனா நிட்டி²தா.