1. ரத்தந்த⁴காரஸிக்கா²பத³வண்ணனா

அந்த⁴காரவக்³க³ஸ்ஸ பட²மே ரத்தந்த⁴காரேதி ரத்திஅந்த⁴காரே. அப்பதீ³பேதி பஜ்ஜோதசந்த³ஸூரியஅக்³கீ³ஸு ஏகேகேனாபி அனோபா⁴ஸிதே. புரிஸேனாதி ஸந்திட்டி²தும் ஸல்லபிதுஞ்ச விஞ்ஞுனா மனுஸ்ஸபுரிஸேன ஸத்³தி⁴ம். ஸந்திட்டே²ய்ய வாதி ஹத்த²பாஸே டி²தமத்தாய பாசித்தியம். ஸல்லபேய்யாதி தத்த² ட²த்வா கே³ஹஸிதகத²ம் கதே²ந்தியாபி பாசித்தியமேவ.

ஸாவத்தி²யம் அஞ்ஞதரம் பி⁴க்கு²னிம் ஆரப்³ப⁴ ஏவம் ஸந்திட்ட²னவத்து²ஸ்மிம் பஞ்ஞத்தம், புரிஸஸ்ஸ ஹத்த²பாஸம் விஜஹித்வா, யக்கா²தீ³னம் ஹத்த²பாஸம் அவிஜஹித்வாபி ஸந்திட்ட²ந்தியா, ஸல்லபேந்தியா வா து³க்கடம், யம்கிஞ்சி விஞ்ஞும் து³தியம் க³ஹேத்வா ஏவம் கரோந்தியா, அரஹோபேக்கா²ய, அஞ்ஞவிஹிதாய, உம்மத்திகாதீ³னஞ்ச அனாபத்தி. ரத்தந்த⁴காரதா, புரிஸஸ்ஸ ஹத்த²பாஸே டா²னம் வா ஸல்லபனம் வா, ஸஹாயாபா⁴வோ, ரஹோபேக்க²தாதி இமானேத்த² சத்தாரி அங்கா³னி. தே²ய்யஸத்த²ஸமுட்டா²னம், கிரியம், ஸஞ்ஞாவிமோக்க²ம், ஸசித்தகம், லோகவஜ்ஜம், காயகம்மம், வசீகம்மம், அகுஸலசித்தம், திவேத³னந்தி.

ரத்தந்த⁴காரஸிக்கா²பத³வண்ணனா நிட்டி²தா.