1. லஸுணவக்³கோ³

1. லஸுணஸிக்கா²பத³வண்ணனா

பாசித்தியேஸு லஸுணவக்³க³ஸ்ஸ தாவ பட²மே லஸுணந்தி மக³த⁴ரட்டே² ஜாதம் ஆமகம் ப⁴ண்டி³கலஸுணமேவ, ந ஏகத்³விதிமிஞ்ஜகம். தஞ்ஹி ‘‘கா²தி³ஸ்ஸாமீ’’தி படிக்³க³ண்ஹந்தியா து³க்கடம், அஜ்ஜோ²ஹாரே அஜ்ஜோ²ஹாரே பாசித்தியம்.

ஸாவத்தி²யம் து²ல்லனந்த³ம் ஆரப்³ப⁴ லஸுணம் ஹராபனவத்து²ஸ்மிம் பஞ்ஞத்தம், திகபாசித்தியம், அலஸுணே த்³விகது³க்கடம். தஸ்மிம் பன அலஸுணஸஞ்ஞாய, பலண்டு³கே, ப⁴ஞ்ஜனகே, ஹரிதகே, சாபலஸுணே, ஸூபஸம்பாகே, மம்ஸஸம்பாகே, தேலஸம்பாகே, ஸாளவே, உத்தரிப⁴ங்கே³, உம்மத்திகாதீ³னஞ்ச அனாபத்தி. ஆமகலஸுணஞ்சேவ, அஜ்ஜோ²ஹரணஞ்சாதி இமானேத்த² த்³வே அங்கா³னி. ஸமுட்டா²னாதீ³னி ஏளகலோமஸதி³ஸானீதி.

லஸுணஸிக்கா²பத³வண்ணனா நிட்டி²தா.

2. ஸம்பா³த⁴லோமஸிக்கா²பத³வண்ணனா

து³தியே ஸம்பா³தே⁴தி படிச்ச²ன்னோகாஸே, உபகச்ச²கேஸு ச முத்தகரணே சாதி அத்தோ². ஸம்ஹராபேய்யாதி ஏத்த² கு²ரஸண்டா³ஸகத்தரிஆதீ³ஸு யேன கேனசி ஸம்ஹராபேந்தியா பயோக³க³ணனாய பாசித்தியம், ந லோமக³ணனாய.

ஸாவத்தி²யம் ச²ப்³ப³க்³கி³யா பி⁴க்கு²னியோ ஆரப்³ப⁴ ஸம்பா³தே⁴ லோமம் ஸம்ஹராபனவத்து²ஸ்மிம் பஞ்ஞத்தம், அத்தனோ அத்தா²ய அஞ்ஞம் ஆணாபேந்தியா ஸாணத்திகம், ஆபத்திபே⁴தோ³னத்தி². ஆபா³த⁴பச்சயா, உம்மத்திகாதீ³னஞ்ச அனாபத்தி. ஆபா³தா⁴பா⁴வோ, ஸம்பா³தே⁴ லோமஸம்ஹரணந்தி இமானேத்த² த்³வே அங்கா³னி. ஸமுட்டா²னாதீ³னி பி⁴க்கு²னியா ஸத்³தி⁴ம் ஏகத்³தா⁴னமக்³க³க³மனஸிக்கா²பத³ஸதி³ஸானீதி.

ஸம்பா³த⁴லோமஸிக்கா²பத³வண்ணனா நிட்டி²தா.

3. தலகா⁴தகஸிக்கா²பத³வண்ணனா

ததியே தலகா⁴தகேதி அந்தமஸோ உப்பலகேஸரேனாபி முத்தகரணஸ்ஸ தலகா⁴தனே முத்தகரணம்ஹி பஹாரதா³னே பாசித்தியந்தி அத்தோ².

ஸாவத்தி²யம் த்³வே பி⁴க்கு²னியோ ஆரப்³ப⁴ தலகா⁴தகரணவத்து²ஸ்மிம் பஞ்ஞத்தம், புரிமனயேனேவ ஸாணத்திகம், ஆபத்திபே⁴தோ³ நத்தி². இதோ பரம் பன யத்த² நத்தி², தத்த² அவத்வாவ க³மிஸ்ஸாம. ஆபா³த⁴பச்சயா க³ண்ட³ம் வா வணம் வா பஹரந்தியா, உம்மத்திகாதீ³னஞ்ச அனாபத்தி. ஆபா³தா⁴பா⁴வோ, முத்தகரணே பஹாரதா³னம், ப²ஸ்ஸஸாதி³யனந்தி இமானேத்த² தீணி அங்கா³னி. ஸமுட்டா²னாதீ³னி பட²மபாராஜிகஸதி³ஸானீதி.

தலகா⁴தகஸிக்கா²பத³வண்ணனா நிட்டி²தா.

4. ஜதுமட்ட²கஸிக்கா²பத³வண்ணனா

சதுத்தே² ஜதுமட்ட²கேதி ஜதுனா கதே மட்ட²த³ண்ட³கே. வத்து²வஸேனேதம் வுத்தம், காமராகே³ன பன உப்பலகேஸரம்பி பவேஸேந்தியா ஆபத்தி.

ஸாவத்தி²யம் அஞ்ஞதரம் பி⁴க்கு²னிம் ஆரப்³ப⁴ ஜதுமட்ட²கஸாதி³யனவத்து²ஸ்மிம் பஞ்ஞத்தம், ஸேஸம் ததியஸதி³ஸமேவாதி.

ஜதுமட்ட²கஸிக்கா²பத³வண்ணனா நிட்டி²தா.

5. உத³கஸுத்³தி⁴கஸிக்கா²பத³வண்ணனா

பஞ்சமே உத³கஸுத்³தி⁴கந்தி முத்தகரணஸ்ஸ தோ⁴வனம். ஆதி³யமானாயாதி கரோந்தியா. த்³வங்கு³லபப்³ப³பரமம் ஆதா³தப்³ப³ந்தி த்³வீஸு அங்கு³லீஸு ஏகேகம் கத்வா த்³வங்கு³லபப்³ப³பரமம் ஆதா³தப்³ப³ம். தம் அதிக்காமேந்தியாதி ஸசே தோ⁴வனகாலே ராக³வஸேன வித்தா²ரதோ ததியாய அங்கு³லியா அக்³க³பப்³ப³ம், க³ம்பீ⁴ரதோ ஏகிஸ்ஸாவ அங்கு³லியா ததியபப்³ப³ம் பவேஸேதி பாசித்தியம்.

ஸக்கேஸு அஞ்ஞதரம் பி⁴க்கு²னிம் ஆரப்³ப⁴ அதிக³ம்பீ⁴ரம் உத³கஸுத்³தி⁴கம் ஆதி³யனவத்து²ஸ்மிம் பஞ்ஞத்தம், திகபாசித்தியம், ஊனகத்³வங்கு³லபப்³பே³ த்³விகது³க்கடம். தஸ்மிம் பன ஊனகஸஞ்ஞாய, த்³வங்கு³லபப்³ப³பரமம் ஆதி³யந்தியா, ஆபா³த⁴பச்சயா அதிரேகம்பி, உம்மத்திகாதீ³னஞ்ச அனாபத்தி, ஸேஸம் ததியஸதி³ஸமேவாதி.

உத³கஸுத்³தி⁴கஸிக்கா²பத³வண்ணனா நிட்டி²தா.

6. உபதிட்ட²னஸிக்கா²பத³வண்ணனா

ச²ட்டே² பு⁴ஞ்ஜந்தஸ்ஸாதி பஞ்சன்னம் போ⁴ஜனானம் அஞ்ஞதரம் பு⁴ஞ்ஜதோ. பானீயேனாதி ஸுத்³தே⁴ன வா உத³கேன, தக்காதீ³ஸு வா அஞ்ஞதரேன. விதூ⁴பனேனாதி யாய காயசி பீ³ஜனியா. உபதிட்டே²ய்யாதி யா ஏதேஸு த்³வீஸு அஞ்ஞதரம் க³ஹேத்வா ஹத்த²பாஸே திட்ட²தி, தஸ்ஸா பாசித்தியம்.

ஸாவத்தி²யம் அஞ்ஞதரம் பி⁴க்கு²னிம் ஆரப்³ப⁴ பு⁴ஞ்ஜந்தஸ்ஸ ஏவம் திட்ட²னவத்து²ஸ்மிம் பஞ்ஞத்தம், திகபாசித்தியம், ஹத்த²பாஸம் விஜஹித்வா கா²த³னீயம் கா²த³ந்தஸ்ஸ உபதிட்ட²ந்தியா து³க்கடம், அனுபஸம்பன்னே திகது³க்கடம். ‘‘இமம் பிவத², இமினா பீ³ஜதா²’’தி ஏவம் தே³ந்தியா வா, தா³பேந்தியா வா, அனுபஸம்பன்னம் வா உபதிட்டா²பனத்த²ம் ஆணாபேந்தியா, உம்மத்திகாதீ³னஞ்ச அனாபத்தி. பு⁴ஞ்ஜந்தஸ்ஸ பி⁴க்கு²னோ ஹத்த²பாஸே டா²னம், பானீயஸ்ஸ வா விதூ⁴பனஸ்ஸ வா க³ஹணந்தி இமானேத்த² த்³வே அங்கா³னி. ஸமுட்டா²னாதீ³னி ஏளகலோமஸதி³ஸானீதி.

உபதிட்ட²னஸிக்கா²பத³வண்ணனா நிட்டி²தா.

7. ஆமகத⁴ஞ்ஞஸிக்கா²பத³வண்ணனா

ஸத்தமே விஞ்ஞத்வாதி அந்தமஸோ மாதரம்பி யாசித்வா. பு⁴ஞ்ஜேய்யாதி அஜ்ஜோ²ஹரேய்ய. ஏத்த² ச விஞ்ஞத்தி சேவ போ⁴ஜனஞ்ச பமாணம், தஸ்மா ஸயம் விஞ்ஞத்வா அஞ்ஞாய ப⁴ஜ்ஜனாதீ³னி காராபேத்வா வா, அஞ்ஞாய விஞ்ஞாபேத்வா ஸயம் ப⁴ஜ்ஜனாதீ³னி கத்வா வா படிக்³க³ஹணதோ பட்டா²ய யாவ த³ந்தேஹி ஸம்கா²த³னம், தாவ புப்³ப³ப்பயோகே³ஸு து³க்கடானி, அஜ்ஜோ²ஹாரே அஜ்ஜோ²ஹாரே பாசித்தியம்.

ஸாவத்தி²யம் ஸம்ப³ஹுலா பி⁴க்கு²னியோ ஆரப்³ப⁴ ஆமகத⁴ஞ்ஞம் விஞ்ஞாபனவத்து²ஸ்மிம் பஞ்ஞத்தம், ஸயம் வா அஞ்ஞாய வா அவிஞ்ஞத்தியா லத்³த⁴ம் ப⁴ஜ்ஜனாதீ³னி கத்வா வா காரேத்வா வா பு⁴ஞ்ஜந்தியா து³க்கடம், அஞ்ஞாய விஞ்ஞத்தியா லத்³த⁴ம் பன ஸயம் ப⁴ஜ்ஜனாதீ³னி கத்வாபி காரேத்வாபி பு⁴ஞ்ஜந்தியா து³க்கடமேவ. ஆபா³தே⁴ ஸதி ஸேத³கம்மாதீ³னம் அத்தா²ய விஞ்ஞாபேந்தியா, அவிஞ்ஞத்தியா லப்³ப⁴மானம் நவகம்மத்தா²ய ஸம்படிச்ச²ந்தியா, ஞாதகப்பவாரிதட்டா²னே முக்³க³மாஸாதி³அபரண்ணம் விஞ்ஞாபேந்தியா, உம்மத்திகாதீ³னஞ்ச அனாபத்தி. ஸத்தன்னம் த⁴ஞ்ஞானம் அஞ்ஞதரஸ்ஸ விஞ்ஞாபனம் வா விஞ்ஞாபாபனம் வா, படிலாபோ⁴, ப⁴ஜ்ஜனாதீ³னி கத்வா வா காரேத்வா வா அஜ்ஜோ²ஹரணந்தி இமானேத்த² தீணி அங்கா³னி. ஸமுட்டா²னாதீ³னி அத்³தா⁴னமக்³க³ஸிக்கா²பத³ஸதி³ஸானீதி.

ஆமகத⁴ஞ்ஞஸிக்கா²பத³வண்ணனா நிட்டி²தா.

8. பட²மஉச்சாரச²ட்³ட³னஸிக்கா²பத³வண்ணனா

அட்ட²மே ஸங்காரந்தி கசவரம். விகா⁴ஸந்தி யம்கிஞ்சி பரிபு⁴த்தாவஸேஸம் உச்சி²ட்டோ²த³கம்பி த³ந்தகட்ட²ம்பி, அட்டி²கசலகேஸு பன வத்தப்³ப³மேவ நத்தி². திரோகுட்டே வா திரோபாகாரே வாதி யஸ்ஸகஸ்ஸசி குட்டஸ்ஸ வா பாகாரஸ்ஸ வா பரதோ. ச²ட்³டே³ய்ய வா ச²ட்³டா³பேய்ய வாதி ஸப்³பா³னிபேதானி ஏகதோ ச²ட்³டே³ந்தியா ஏகப்பயோகே³ ஏகாபத்தி, ஸகிம் ஆணத்தியா ப³ஹுகேபி ச²ட்³டி³தே ஏகாவ.

ஸாவத்தி²யம் அஞ்ஞதரம் பி⁴க்கு²னிம் ஆரப்³ப⁴ உச்சாரம் திரோகுட்டே ச²ட்³ட³னவத்து²ஸ்மிம் பஞ்ஞத்தம், ஸாணத்திகம், பி⁴க்கு²ஸ்ஸ து³க்கடம், ஓலோகேத்வா வா அவலஞ்ஜே வா ச²ட்³டே³ந்தியா, உம்மத்திகாதீ³னஞ்ச அனாபத்தி. உச்சாராதி³பா⁴வோ, அனோலோகனம், வலஞ்ஜனட்டா²னம், திரோகுட்டதிரோபாகாரதா, ச²ட்³ட³னம் வா ச²ட்³டா³பனம் வாதி இமானேத்த² பஞ்ச அங்கா³னி. ஸமுட்டா²னாதீ³னி ஸஞ்சரித்தஸதி³ஸானி, இத³ம் பன கிரியாகிரியந்தி.

பட²மஉச்சாரச²ட்³ட³னஸிக்கா²பத³வண்ணனா நிட்டி²தா.

9. து³தியஉச்சாரச²ட்³ட³னஸிக்கா²பத³வண்ணனா

நவமே ஹரிதேதி கே²த்தே வா நாளிகேராதி³ஆராமே வா யத்த²கத்த²சி ரோபிமஹரிதட்டா²னே. தானி வத்தூ²னி ச²ட்³டே³ந்தியா வா ச²ட்³டா³பேந்தியா வா புரிமனயேனேவ ஆபத்தி, தாதி³ஸே டா²னே நிஸீதி³த்வா அந்தமஸோ உத³கம் பிவித்வா மத்த²கச்சி²ன்னம் நாளிகேரம்பி ச²ட்³டே³ந்தியா ஆபத்தியேவ.

ஸாவத்தி²யம் ஸம்ப³ஹுலா பி⁴க்கு²னியோ ஆரப்³ப⁴ உச்சாராதீ³னி ஹரிதே ச²ட்³ட³னவத்து²ஸ்மிம் பஞ்ஞத்தம், ஸாணத்திகம், திகபாசித்தியம், பி⁴க்கு²னோ து³க்கடம், பி⁴க்கு²னியாபி நிக்கி²த்தபீ³ஜே கே²த்தே யாவ அங்குரோ ந உட்ட²ஹதி, தாவ து³க்கடம், அஹரிதே த்³விகது³க்கடம். தஸ்மிம் பன அஹரிதஸஞ்ஞாய ச²ட்³டி³தகே²த்தே வா, ஸாமிகே அபலோகேத்வா வா ச²ட்³டே³ந்தியா, உம்மத்திகாதீ³னஞ்ச அனாபத்தி. ஸேஸம் அட்ட²மஸதி³ஸமேவாதி.

து³தியஉச்சாரச²ட்³ட³னஸிக்கா²பத³வண்ணனா நிட்டி²தா.

10. நச்சகீ³தஸிக்கா²பத³வண்ணனா

த³ஸமே நச்சந்தி அந்தமஸோ மோரனச்சம்பி. கீ³தந்தி அந்தமஸோ த⁴ம்மபா⁴ணககீ³தம்பி. வாதி³தந்தி அந்தமஸோ உத³கபே⁴ரிவாதி³தம்பி. த³ஸ்ஸனாயாதி ஏதேஸு யம்கிஞ்சி த³ஸ்ஸனாய க³ச்ச²ந்தியா பதே³ பதே³ து³க்கடம், யத்த² டி²தா பஸ்ஸதி வா ஸுணாதி வா, ஏகப்பயோகே³ ஏகாபத்தி, தம் தம் தி³ஸம் ஓலோகேந்தியா பயோகே³ பயோகே³ ஆபத்தி.

ராஜக³ஹே ச²ப்³ப³க்³கி³யா பி⁴க்கு²னியோ ஆரப்³ப⁴ நச்சாதீ³னி த³ஸ்ஸனாய க³மனவத்து²ஸ்மிம் பஞ்ஞத்தம், ஸயம் தானி வத்தூ²னி கரோந்தியா, அஞ்ஞம் வா ஆணாபேந்தியா, ‘‘சேதியஸ்ஸ உபஹாரம் தே³தா²’’தி ஈதி³ஸேன பரியாயேன வா ப⁴ணந்தியா, ‘‘சேதியஸ்ஸ உபஹாரம் கரோமா’’தி வா வுத்தே ‘‘ஸாதூ⁴’’தி ஸம்படிச்ச²ந்தியா ச பாசித்தியமேவாதி ஸப்³ப³அட்ட²கதா²ஸு (பாசி. அட்ட². 835-837) வுத்தம், பி⁴க்கு²னோ ஸப்³ப³த்த² து³க்கடம். ‘‘தும்ஹாகம் சேதியஸ்ஸ உபட்டா²னம் கரோமா’’தி வுத்தே பன ‘‘உபட்டா²னகரணம் நாம ஸுந்த³ர’’ந்தி ஈதி³ஸம் பரியாயம் ப⁴ணந்தியா, ஆராமே ட²த்வா பஸ்ஸந்தியா வா ஸுணந்தியா வா, ததா² அத்தனோ டி²தோகாஸம் ஆக³ந்த்வா பயோஜிதம் படிபத²ம் க³ச்ச²ந்தியா ஸம்முகீ²பூ⁴தம் ஸலாகப⁴த்தாதி³கே ஸதி கரணீயே க³ந்த்வா, ஆபதா³ஸு வா ஸமஜ்ஜட்டா²னம் பவிஸித்வாபி பஸ்ஸந்தியா வா ஸுணந்தியா வா, உம்மத்திகாதீ³னஞ்ச அனாபத்தி. நச்சாதீ³னம் அஞ்ஞதரதா, அஞ்ஞத்ர அனுஞ்ஞாதகாரணா க³மனம், த³ஸ்ஸனம் வா ஸவனம் வாதி இமானேத்த² தீணி அங்கா³னி. ஸமுட்டா²னாதீ³னி ஏளகலோமஸதி³ஸானி, இத³ம் பன லோகவஜ்ஜம், அகுஸலசித்தம், திவேத³னந்தி.

நச்சகீ³தஸிக்கா²பத³வண்ணனா நிட்டி²தா.

லஸுணவக்³கோ³ பட²மோ.