5. போ⁴ஜனப்படிக்³க³ஹணபட²மஸிக்கா²பத³வண்ணனா

பஞ்சமே அவஸ்ஸுதாதி ச²ந்த³ராகே³ன திந்தா. அவஸ்ஸுதஸ்ஸாதி தாதி³ஸஸ்ஸேவ. கா²தே³ய்ய வா பு⁴ஞ்ஜேய்ய வாதி ஏத்த² படிக்³க³ஹணே து²ல்லச்சயம், அஜ்ஜோ²ஹாரே அஜ்ஜோ²ஹாரே ஸங்கா⁴தி³ஸேஸோ.

ஸாவத்தி²யம் ஸுந்த³ரீனந்த³ம் ஆரப்³ப⁴ அவஸ்ஸுதாய அவஸ்ஸுதஸ்ஸ ஹத்த²தோ ஆமிஸப்படிக்³க³ஹணவத்து²ஸ்மிம் பஞ்ஞத்தம், ஏகதோஅவஸ்ஸுதே படிக்³க³ஹணே து³க்கடம், அஜ்ஜோ²ஹாரே அஜ்ஜோ²ஹாரே து²ல்லச்சயம், யக்க²பேதபண்ட³கதிரச்சா²னக³தமனுஸ்ஸவிக்³க³ஹானம் ஹத்த²தோ உப⁴தோஅவஸ்ஸுதேபி ஸதி ஏஸேவ நயோ. தத்த² பன ஏகதோஅவஸ்ஸுதே ஸதி து³க்கடம், ஸப்³ப³த்த² உத³கத³ந்தபோனக்³க³ஹணேபி பரிபோ⁴கே³பி து³க்கடமேவ. உபோ⁴ஸு அனவஸ்ஸுதேஸு, ‘‘அனவஸ்ஸுதோ’’தி வா ஞத்வா க³ண்ஹந்தியா, உம்மத்திகாதீ³னஞ்ச அனாபத்தி. உத³கத³ந்தபோனதோ அஞ்ஞம் அஜ்ஜோ²ஹரணீயம், உப⁴தோஅவஸ்ஸுததா, ஸஹத்தா² க³ஹணம், அஜ்ஜோ²ஹரணந்தி இமானேத்த² சத்தாரி அங்கா³னி. ஸமுட்டா²னாதீ³னி பட²மபாராஜிகஸதி³ஸானீதி.

போ⁴ஜனப்படிக்³க³ஹணபட²மஸிக்கா²பத³வண்ணனா நிட்டி²தா.