(6) 1. கோ³தமீவக்³கோ³

1-3. கோ³தமீஸுத்தாதி³வண்ணனா

51-53. ச²ட்ட²ஸ்ஸ பட²மே (ஸாரத்த². டீ. சூளவக்³க³ 3.402) கோ³தமீதி கோ³த்தம். நாமகரணதி³வஸே பனஸ்ஸா லத்³த⁴ஸக்காரா ப்³ராஹ்மணா லக்க²ணஸம்பத்திம் தி³ஸ்வா ‘‘ஸசே அயம் தீ⁴தரம் லபி⁴ஸ்ஸதி, சக்கவத்திரஞ்ஞோ மஹேஸீ ப⁴விஸ்ஸதி. ஸசே புத்தம் லபி⁴ஸ்ஸதி, சக்கவத்திராஜா ப⁴விஸ்ஸதீதி உப⁴யதா²பி மஹதீயேவஸ்ஸா பஜா ப⁴விஸ்ஸதீ’’தி ப்³யாகரிம்ஸு. அத²ஸ்ஸா ‘‘மஹாபஜாபதீ’’தி நாமம் அகம்ஸு. தேனாஹ ‘‘புத்தபஜாய சேவ தீ⁴துபஜாய ச மஹந்தத்தா ஏவம்லத்³த⁴னாமா’’தி.

‘‘அத்தத³ண்டா³ ப⁴யம் ஜாதம், ஜனம் பஸ்ஸத² மேத⁴க³ம்;

ஸம்வேக³ம் கித்தயிஸ்ஸாமி, யதா² ஸம்விஜிதம் மயா’’தி. (ஸு. நி. 941; மஹானி. 170) –

ஆதி³னா அத்தத³ண்ட³ஸுத்தம் கதே²ஸி. தம்தம்பலோப⁴னகிரியா காயவாசாஹி பரக்கமந்தியோ உக்கண்ட²ந்தூதி ஸாஸனம் பேஸேந்தி நாமாதி கத்வா வுத்தம் ‘‘ஸாஸனம் பேஸேத்வா’’தி. குணாலத³ஹந்தி குணாலத³ஹதீரம். அனபி⁴ரதிம் வினோதே³த்வாதி இத்தீ²னம் தோ³ஸத³ஸ்ஸனமுகே²ன காமானம் வோகாரஸம்கிலேஸவிபா⁴வனேன அனபி⁴ரதிம் வினோதே³த்வா.

ஆபாதி³காதி ஸம்வத்³த⁴கா, தும்ஹாகம் ஹத்த²பாதே³ஸு கிச்சம் அஸாதே⁴ந்தேஸு ஹத்தே² ச பாதே³ ச வட்³டே⁴த்வா படிஜக்³கி³தாதி அத்தோ². போஸிகாதி தி³வஸஸ்ஸ த்³வே தயோ வாரே நஹாபேத்வா போ⁴ஜேத்வா பாயேத்வா தும்ஹே போஸேஸி. த²ஞ்ஞம் பாயேஸீதி நந்த³குமாரோ கிர போ³தி⁴ஸத்ததோ கதிபாஹேனேவ த³ஹரோ, தஸ்மிம் ஜாதே மஹாபஜாபதீ அத்தனோ புத்தம் தா⁴தீனம் த³த்வா ஸயம் போ³தி⁴ஸத்தஸ்ஸ தா⁴திகிச்சம் ஸாத⁴யமானா அத்தனோ த²ஞ்ஞம் பாயேஸி. தம் ஸந்தா⁴ய தே²ரோ ஏவமாஹ. த³ஹரோதி தருணோ. யுவாதி யோப்³ப³ஞ்ஞே டி²தோ. மண்ட³னகஜாதிகோதி அலங்காரஸபா⁴வோ. தத்த² கோசி தருணோபி யுவா ந ஹோதி யதா² அதிதருணோ. கோசி யுவாபி மண்ட³னகஜாதிகோ ந ஹோதி யதா² உபஸந்தஸபா⁴வோ, ஆலஸியப்³யஸனாதீ³ஹி வா அபி⁴பூ⁴தோ. இத⁴ பன த³ஹரோ சேவ யுவா ச மண்ட³னகஜாதிகோ ச அதி⁴ப்பேதோ, தஸ்மா ஏவமாஹ. உப்பலாதீ³னி மண்ட³னகஜாதிகோ ச லோகஸம்மதத்தா வுத்தானி.

மாதுகா³மஸ்ஸ பப்³ப³ஜிதத்தாதி இத³ம் பஞ்சவஸ்ஸஸததோ உத்³த⁴ம் அட்ட²த்வா பஞ்சஸுயேவ வஸ்ஸஸதேஸு ஸத்³த⁴ம்மட்டி²தியா காரணனித³ஸ்ஸனம். படிஸம்பி⁴தா³பபே⁴த³ப்பத்தகீ²ணாஸவவஸேனேவ வுத்தந்தி ஏத்த² படிஸம்பி⁴தா³ப்பத்தகீ²ணாஸவக்³க³ஹணேன ஜா²னானிபி க³ஹிதானேவ ஹோந்தி. ந ஹி நிஜ்ஜா²னகானம் ஸப்³ப³ப்பகாரஸம்பத்தி இஜ்ஜ²தீதி வத³ந்தி. ஸுக்க²விபஸ்ஸககீ²ணாஸவவஸேன வஸ்ஸஸஹஸ்ஸந்திஆதி³னா ச யம் வுத்தம், தம் க²ந்த⁴கபா⁴ணகானம் மதேன வுத்தந்தி வேதி³தப்³ப³ம். வினயட்ட²கதா²யம்பி (சூளவ. அட்ட². 403) இமினாவ நயேன வுத்தம்.

தீ³க⁴னிகாயட்ட²கதா²யம் (தீ³. நி. அட்ட². 3.161) பன ‘‘படிஸம்பி⁴தா³ப்பத்தேஹி வஸ்ஸஸஹஸ்ஸம் அட்டா²ஸி, ச²ளபி⁴ஞ்ஞேஹி வஸ்ஸஸஹஸ்ஸம், தேவிஜ்ஜேஹி வஸ்ஸஸஹஸ்ஸம், ஸுக்க²விபஸ்ஸகேஹி வஸ்ஸஸஹஸ்ஸம், பாதிமோக்கே²ன வஸ்ஸஸஹஸ்ஸம் அட்டா²ஸீ’’தி வுத்தம். இதா⁴பி ஸாஸனந்தரதா⁴னகதா²யம் (அ. நி. அட்ட². 1.1.130) ‘‘பு³த்³தா⁴னஞ்ஹி பரினிப்³பா³னதோ வஸ்ஸஸஹஸ்ஸமேவ படிஸம்பி⁴தா³ நிப்³ப³த்தேதும் ஸக்கோந்தி, ததோ பரம் ச² அபி⁴ஞ்ஞா, ததோ தாபி நிப்³ப³த்தேதும் அஸக்கோந்தா திஸ்ஸோ விஜ்ஜா நிப்³ப³த்தேந்தி, க³ச்ச²ந்தே க³ச்ச²ந்தே காலே தாபி நிப்³ப³த்தேதும் அஸக்கோந்தா ஸுக்க²விபஸ்ஸகா ஹோந்தி. ஏதேனேவ உபாயேன அனாகா³மினோ, ஸகதா³கா³மினோ, ஸோதாபன்னா’’தி வுத்தம்.

ஸம்யுத்தனிகாயட்ட²கதா²யம் (ஸம். நி. அட்ட². 2.2.156) பன ‘‘பட²மபோ³தி⁴யஞ்ஹி பி⁴க்கூ² படிஸம்பி⁴தா³ப்பத்தா அஹேஸும். அத² காலே க³ச்ச²ந்தே படிஸம்பி⁴தா³ பாபுணிதும் ந ஸக்கி²ம்ஸு, ச²ளபி⁴ஞ்ஞா அஹேஸும். ததோ ச² அபி⁴ஞ்ஞா பத்தும் அஸக்கோந்தா திஸ்ஸோ விஜ்ஜா பாபுணிம்ஸு. இதா³னி காலே க³ச்ச²ந்தே திஸ்ஸோ விஜ்ஜா பாபுணிதும் அஸக்கோந்தா ஆஸவக்க²யமத்தம் பாபுணிஸ்ஸந்தி, தம்பி அஸக்கோந்தா அனாகா³மிப²லம், தம்பி அஸக்கோந்தா ஸகதா³கா³மிப²லம், தம்பி அஸக்கோந்தா ஸோதாபத்திப²லம், க³ச்ச²ந்தே காலே ஸோதாபத்திப²லம்பி பத்தும் ந ஸக்கி²ஸ்ஸந்தீ’’தி வுத்தம். யஸ்மா சேதம் ஸப்³ப³ம் அஞ்ஞமஞ்ஞப்படிவிருத்³த⁴ம், தஸ்மா தேஸம் தேஸம் பா⁴ணகானம் மதமேவ ஆசரியேன தத்த² தத்த² த³ஸ்ஸிதந்தி க³ஹேதப்³ப³ம். அஞ்ஞதா² ஹி ஆசரியஸ்ஸேவ புப்³பா³பரவிரோத⁴ப்பஸங்கோ³ ஸியாதி.

தானியேவாதி தானியேவ பஞ்சவஸ்ஸஸஹஸ்ஸானி. பரியத்திமூலகம் ஸாஸனந்தி ஆஹ ‘‘ந ஹி பரியத்தியா அஸதி படிவேதோ⁴ அத்தீ²’’திஆதி³. பரியத்தியா ஹி அந்தரஹிதாய படிபத்திஅந்தரதா⁴யதி, படிபத்தியா அந்தரஹிதாய அதி⁴க³மோ அந்தரதா⁴யதி. கிம்காரணா? அயஞ்ஹி பரியத்தி படிபத்தியா பச்சயோ ஹோதி, படிபத்தி அதி⁴க³மஸ்ஸ. இதி படிபத்திதோபி பரியத்தியேவ பமாணம். து³தியததியேஸு நத்தி² வத்தப்³ப³ம்.

கோ³தமீஸுத்தாதி³வண்ணனா நிட்டி²தா.

4-5. தீ³க⁴ஜாணுஸுத்தாதி³வண்ணனா

54-55. சதுத்தே² (தீ³. நி. அட்ட². 3.265) ஏகேன போ⁴கே³ பு⁴ஞ்ஜேய்யாதி ஏகேன கோட்டா²ஸேன போ⁴கே³ பு⁴ஞ்ஜேய்ய, வினிபு⁴ஞ்ஜேய்ய வாதி அத்தோ². த்³வீஹி கம்மந்தி த்³வீஹி கோட்டா²ஸேஹி கஸிவணிஜ்ஜாதி³கம்மம் பயோஜேய்ய. நிதா⁴பேய்யாதி சதுத்த²கோட்டா²ஸம் நிதே⁴த்வா ட²பேய்ய, நித³ஹித்வா பூ⁴மிக³தம் கத்வா ட²பேய்யாதி அத்தோ². ஆபதா³ஸு ப⁴விஸ்ஸதீதி குலானஞ்ஹி ந ஸப்³ப³காலம் ஏகஸதி³ஸம் வத்ததி, கதா³சி ராஜஅக்³கி³சோரது³ப்³பி⁴க்கா²தி³வஸேன ஆபதா³ உப்பஜ்ஜந்தி, தஸ்மா ஏவம் ஆபதா³ஸு உப்பன்னாஸு ப⁴விஸ்ஸதீதி ஏகம் கோட்டா²ஸம் நிதா⁴பேய்யாதி வுத்தம். இமேஸு பன சதூஸு கோட்டா²ஸேஸு கதரம் கோட்டா²ஸம் க³ஹேத்வா குஸலம் காதப்³ப³ந்தி? ‘‘போ⁴கே³ பு⁴ஞ்ஜேய்யா’’தி வுத்தகோட்டா²ஸம். ததோ க³ண்ஹித்வா ஹி பி⁴க்கூ²னம்பி கபணத்³தி⁴கானம்பி தா³னம் தா³தப்³ப³ம், பேஸகாரன்ஹாபிதாதீ³னம்பி வேதனம் தா³தப்³ப³ம். ஸமணப்³ராஹ்மணகபணத்³தி⁴காதீ³னம் தா³னவஸேன சேவ, அதி⁴வத்த²தே³வதாதீ³னம் பேதப³லிவஸேன, ந்ஹாபிதாதீ³னம் வேதனவஸேன ச வினியோகோ³பி உபயோகோ³ ஏவ.

அபேந்தி க³ச்ச²ந்தி, அபேந்தா வா ஏதேஹீதி அபாயா, அபாயா ஏவ முகா²னி த்³வாரானீதி அபாயமுகா²னி. வினாஸத்³வாரானீதி ஏத்தா²பி ஏஸேவ நயோ. பஞ்சமே நத்தி² வத்தப்³ப³ம்.

தீ³க⁴ஜாணுஸுத்தாதி³வண்ணனா நிட்டி²தா.

6-8. ப⁴யஸுத்தாதி³வண்ணனா

56-58. ச²ட்டே² க³ப்³ப⁴வாஸோ இத⁴ உத்தரபத³லோபேன க³ப்³போ⁴ வுத்தோதி ஆஹ ‘‘க³ப்³போ⁴தி க³ப்³ப⁴வாஸோ’’தி. ஸத்தமட்ட²மானி உத்தானத்தா²னி.

ப⁴யஸுத்தாதி³வண்ணனா நிட்டி²தா.

6-10. புக்³க³லஸுத்தாதி³வண்ணனா

59-60. நவமே தா³னம் த³த³ந்தானந்தி த³க்கி²ணேய்யம் உத்³தி³ஸ்ஸ தா³னம் தே³ந்தானம். உபதீ⁴ விபச்சந்தி ஏதேன, உபதீ⁴ஸு வா விபச்சதி, உபத⁴யோ வா விபாகா ஏதஸ்ஸாதி உபதி⁴விபாகம். ஸங்கே⁴ தி³ன்னம் மஹப்ப²லந்தி அரியஸங்கே⁴ தி³ன்னம் விப்பா²ரட்டா²னம் ஹோதி, விபுலப²லந்தி அத்தோ². த³ஸமே நத்தி² வத்தப்³ப³ம்.

புக்³க³லஸுத்தாதி³வண்ணனா நிட்டி²தா.

கோ³தமீவக்³க³வண்ணனா நிட்டி²தா.