1-8. ஸம்கி²த்தூபோஸத²ஸுத்தாதி³வண்ணனா

41-48. பஞ்சமஸ்ஸ பட²மாதீ³ஸு நத்தி² வத்தப்³ப³ம். ச²ட்டே² (ஸம். நி. டீ. 1.1.165) பஞ்ச அங்கா³னி ஏதஸ்ஸாதி பஞ்சங்க³ம், பஞ்சங்க³மேவ பஞ்சங்கி³கம், தஸ்ஸ பஞ்சங்கி³கஸ்ஸ. மஹதீ த³த்³த³ரீ வீணாவிஸேஸோபி ஆததமேவாதி ‘‘சம்மபரியோனத்³தே⁴ஸூ’’தி விஸேஸனம் கதம். ஏகதலதூரியம் கும்ப⁴து²னத³த்³த³ரிகாதி³. உப⁴யதலம் பே⁴ரிமுதி³ங்கா³தி³. சம்மபரியோனத்³த⁴ம் ஹுத்வா வினிப³த்³த⁴ம் ஆததவிததம். ஸப்³ப³ஸோ பரியோனத்³த⁴ம் நாம சதுரஸ்ஸஅம்ப³ணம் பணவாதி³ ச. கோ³முகீ²ஆதீ³னம்பி ஏத்தே²வ ஸங்க³ஹோ த³ட்ட²ப்³போ³. வம்ஸாதீ³தி ஆதி³-ஸத்³தே³ன ஸங்கா²தீ³னம் ஸங்க³ஹோ. ஸம்மாதீ³தி ஸம்மதாளகம்ஸதாளஸிலாஸலாகதாளாதி³. தத்த² ஸம்மதாளம் நாம த³ந்தமயதாளம். கம்ஸதாளம் லோஹமயம். ஸிலாமயம் அயோபத்தேன ச வாத³னதாளம் ஸிலாஸலாகதாளம். ஸுமுச்சி²தஸ்ஸாதி ஸுட்டு² படியத்தஸ்ஸ. பமாணேதி நாதித³ள்ஹனாதிஸிதி²லஸங்கா²தே மஜ்ஜி²மே முச்ச²னாபமாணே. சே²கோதி படு பட்டோ². ஸோ சஸ்ஸ படுபா⁴வோ மனோஹரோதி ஆஹ ‘‘ஸுந்த³ரோ’’தி. ரஞ்ஜேதுந்தி ராக³ம் உப்பாதே³தும். க²மதேவாதி ரோசதேவ. ந நிப்³பி³ந்த³தீதி ந தஜ்ஜேதி, ஸோதஸுக²பா⁴வதோ பியாயிதப்³போ³வ ஹோதி.

ப⁴த்தாரம் நாதிமஞ்ஞதீதி ஸாமிகம் முஞ்சித்வா அஞ்ஞம் மனஸாபி ந பத்தே²தி. உட்டா²ஹிகாதி உட்டா²னவீரியஸம்பன்னா. அனலஸாதி நிக்கோஸஜ்ஜா. ஸங்க³ஹிதபரிஜ்ஜனாதி ஸம்மானனாதீ³ஹி சேவ ச²ணாதீ³ஸு பேஸேதப்³ப³-பியப⁴ண்டா³தி³பண்ணாகாரபேஸனாதீ³ஹி ச ஸங்க³ஹிதபரிஜனா. இத⁴ பரிஜனோ நாம ஸாமிகஸ்ஸ சேவ அத்தனோ ச ஞாதிஜனோ. ஸம்ப⁴தந்தி கஸிவணிஜ்ஜாதீ³னி கத்வா ஆப⁴தத⁴னம். ஸத்தமட்ட²மானி உத்தானத்தா²னி.

ஸம்கி²த்தூபோஸத²ஸுத்தாதி³வண்ணனா நிட்டி²தா.