1. பட²மோ பரிச்சே²தோ³

ரூபஸங்கே²போ

3. ஸச்சானி பரமத்த²ஞ்ச, ஸம்முதிஞ்சாதி த்³வே தஹிம்;

த²த்³த⁴பா⁴வாதி³னா ஞேய்யம், ஸச்சம் தம் பரமத்த²கம்.

4. ஸன்னிவேஸவிஸேஸாதி³ஞேய்யம் ஸம்முதி தம் த்³வயம்;

பா⁴வஸங்கேதஸித்³தீ⁴னம், தத²த்தா ஸச்சமீரிதம்.

5. பரமத்தோ² ஸனிப்³பா³னபஞ்சக்க²ந்தே⁴த்த² ராஸிதோ;

க²ந்த⁴த்தோ² ச ஸமாஸேத்வா, வுத்தோதீதாதி³பே⁴த³னம்.

6. வேத³னாதீ³ஸுபேகஸ்மிம், க²ந்த⁴ஸத்³தோ³ து ருள்ஹியா;

ஸமுத்³தா³தே³கதே³ஸே து, ஸமுத்³தா³தி³ரவோ யதா².

7. தத்த² ஸீதாதி³ருப்பத்தா, ரூபம் ப்⁴வாபானலானிலம்;

பூ⁴தம் கதி²னத³வதாபசனீரணபா⁴வகம்.

8. சக்கு² ஸோதஞ்ச கா⁴னஞ்ச, ஜிவ்ஹா காயோ பபா⁴ ரவோ;

க³ந்தோ⁴ ரஸோஜா இத்தீ² ச, புமா வத்து² ச ஜீவிதம்.

9. க²ம் ஜாதி ஜரதா ப⁴ங்கோ³, ரூபஸ்ஸ லஹுதா ததா²;

முது³கம்மஞ்ஞதா காயவசீவிஞ்ஞத்தி பூ⁴திகம்.

10. சக்கா²தீ³ த³ட்டு²காமாதி³ஹேதுகம்மஜபூ⁴திகா;

பஸாதா³ ரூபஸத்³தா³தீ³, சக்கு²ஞாணாதி³கோ³சரா.

11. ஓஜா ஹி யாபனா இத்தி²புமலிங்கா³தி³ஹேதுகம்;

பா⁴வத்³வயம் து காயம்வ, ப்³யாபி நோ ஸஹவுத்திகம்.

12. நிஸ்ஸயம் வத்து² தா⁴தூனம், த்³வின்னம் கம்மஜபாலனம்;

ஜீவிதம் உப்பலாதீ³னம், உத³கம்வ டி²திக்க²ணே.

13. க²ம் ரூபானம் பரிச்சே²தோ³, ஜாதிஆதி³த்தயம் பன;

ரூபனிப்³ப³த்தி பாகோ ச, பே⁴தோ³ சேவ யதா²க்கமம்.

14. லஹுதாதி³த்தயம் தம் ஹி, ரூபானம் கமதோ ஸியா;

அத³ந்த⁴த²த்³த⁴தா சாபி, காயகம்மானுகூலதா.

15. அபி⁴க்கமாதி³ஜனகசித்தஜஸ்ஸானிலஸ்ஸ ஹி;

விகாரோ காயவிஞ்ஞத்தி, ரூபத்த²ம்பா⁴தி³காரணம்.

16. வசீபே⁴த³கசித்தேன, பூ⁴தபூ⁴மிவிகாரதா;

வசீவிஞ்ஞத்துபாதி³ன்னக⁴ட்டனஸ்ஸேவ காரணம்.

17. ரூபமப்³யாகதம் ஸப்³ப³ம், விப்பயுத்தமஹேதுகம்;

அனாலம்ப³ம் பரித்தாதி³, இதி ஏகவித⁴ம் நயே.

18. அஜ்ஜ²த்திகானி சக்கா²தீ³, பஞ்சேதேவ பஸாத³கா;

வத்து²னா வத்து² தானேவ, த்³வாரா விஞ்ஞத்திபீ⁴ ஸஹ.

19. ஸேஸம் பா³வீஸதி சேகவீஸ வீஸதி பா³ஹிரம்;

அப்பஸாத³மவத்து²ம் ச, அத்³வாரஞ்ச யதா²க்கமம்.

20. பஸாதா³ பஞ்ச பா⁴வாயு, இந்த்³ரியனிந்த்³ரியேதரம்;

வினாபம் ஆதி³தோ யாவ, ரஸா தூ²லம் ந சேதரம்.

21. அட்ட²கம் அவினிப்³போ⁴க³ம், வண்ணக³ந்த⁴ரஸோஜகம்;

பூ⁴தம் தம் து வினிப்³போ⁴க³மிதரந்தி வினித்³தி³ஸே.

22. அட்டா²ரஸாதி³தோ ரூபா, நிப்ப²ன்னம் து ந சேதரம்;

போ²ட்ட²ப்³ப³மாபவஜ்ஜம் து, பூ⁴தம் காமே ந சேதரம்.

23. ஸேக்க²ஸப்படிகா⁴ஸேக்க²படிக⁴ம் த்³வயவஜ்ஜிதம்;

வண்ணம் ததி³தரம் தூ²லம், ஸுகு²மஞ்சேதி தம் திதா⁴.

24. கம்மஜாகம்மஜம்னேவகம்மாகம்மஜதோ திதா⁴;

சித்தோஜஉதுஜாதீ³னம், வஸேனாபி திதா⁴ ததா².

25. தி³ட்ட²ம் ஸுதம் முதஞ்சாபி, விஞ்ஞாதம் வத சேதஸா;

ஏகமேகஞ்ச பஞ்சாபி, வீஸதி ச கமா ஸியும்.

26. ஹத³யம் வத்து² விஞ்ஞத்தி, த்³வாரம் சக்கா²தி³பஞ்சகம்;

வத்து² த்³வாரஞ்ச ஸேஸானி, வத்து² த்³வாரஞ்ச நோ ஸியா.

27. நிப்ப²ன்னம் ரூபரூபம் க²ம், பரிச்சே²தோ³த² லக்க²ணம்;

ஜாதிஆதி³த்தயம் ரூபம், விகாரோ லஹுதாதி³கம்.

28. யதா² ஸங்க²தத⁴ம்மானம், லக்க²ணம் ஸங்க²தம் ததா²;

பரிச்சே²தா³தி³கம் ரூபம், தஜ்ஜாதிமனதிக்கமா.

29. கம்மசித்தானலாஹாரபச்சயானம் வஸேனித⁴;

ஞேய்யா பவத்தி ரூபஸ்ஸ, பிண்டா³னஞ்ச வஸா கத²ம்.

30. கம்மஜம் ஸேந்த்³ரியம் வத்து², விஞ்ஞத்தி சித்தஜா ரவோ;

சித்தக்³கி³ஜோ லஹுதாதி³த்தயம் சித்தானலன்னஜம்.

31. அட்ட²கம் ஜாதி சாகாஸோ, சதுஜா ஜரதா க²யம்;

குதோசி நேவ ஜாதம் தப்பாகபே⁴த³ம் ஹி தம் த்³வயம்.

32. ஜாதியாபி ந ஜாதத்தம், குதோசிட்ட²கதா²னயா;

லக்க²ணாபா⁴வதோ தஸ்ஸா, ஸதி தஸ்மிம் ந நிட்டி²தி.

33. கம்மசித்தானலன்னேஹி, பிண்டா³ நவ ச ஸத்த ச;

சத்தாரோ த்³வே ச விஞ்ஞேய்யா, ஸஜீவே த்³வே அஜீவகே.

34. அட்ட²கம் ஜீவிதேனாயுனவகம் பா⁴வவத்து²னா;

சக்கா²தீ³ பஞ்ச த³ஸகா, கலாபா நவ கம்மஜா.

35. ஸுத்³த⁴ட்ட²விஞ்ஞத்தியுத்தனவகோபி ச த³ஸகோ;

ஸுத்³த⁴ஸத்³தே³ன நவகோ, லஹுதாதி³த³ஸேககோ.

36. விஞ்ஞத்திலஹுதாதீ³ஹி, புன த்³வாத³ஸ தேரஸ;

சித்தஜா இதி விஞ்ஞேய்யா, கலாபா ஸத்த வா ச² வா.

37. ஸுத்³த⁴ட்ட²ம் ஸத்³த³னவகம், லஹுதாதி³த³ஸேககம்;

ஸத்³தே³னலஹுதாதீ³ஹி, சதுரோதுஜகண்ணிகா.

38. ஸுத்³த⁴ட்ட²லஹுதாதீ³ஹி, அன்னஜா த்³வேதிமே நவ;

ஸத்த சத்தாரி த்³வே சேதி, கலாபா வீஸதீ த்³விபி⁴.

39. தயட்ட²கா ச சத்தாரோ, நவகா த³ஸகா நவ;

தயோ த்³வேகோ ச ஏகேன, த³ஸ த்³வீஹி ச தீஹி ச.

40. சதுன்னம்பி ச தா⁴தூனம், அதி⁴கம்ஸவஸேனித⁴;

ரூபபே⁴தோ³த² விஞ்ஞேய்யோ, கம்மசித்தானலன்னஜோ.

41. கேஸாதி³மத்த²லுங்க³ந்தா, பத²வம்ஸாதி வீஸதி;

பித்தாதி³முத்தகந்தா தே, ஜலம்ஸா த்³வாத³ஸீரிதா.

42. யேன ஸந்தப்பனம் யேன, ஜீரணம் த³ஹனம் ததா²;

யேனஸிதாதி³பாகோதி, சதுரம்ஸானலாதி⁴கா.

43. உத்³தா⁴தோ⁴க³மகுச்சி²ட்டா², கோட்டா²ஸேய்யங்க³ஸாரி ச;

அஸ்ஸாஸோதி ச விஞ்ஞேய்யா, ச²ளம்ஸா வாயுனிஸ்ஸிதா.

44. புப்³ப³முத்தகரீஸஞ்சுத³ரியம் சதுரோதுஜா;

கம்மா பாசக்³கி³ சித்தம்ஹா-ஸ்ஸாஸோதி ச²பி ஏகஜா.

45. ஸேத³ஸிங்கா⁴னிகஸ்ஸு ச, கே²ளோ சித்தோதுஸம்ப⁴வா;

த்³விஜா த்³வத்திம்ஸ கோட்டா²ஸா, ஸேஸா ஏவ சதுப்³ப⁴வா.

46. ஏகஜேஸ்வாதி³சதூஸு, உதுஜா சதுரட்ட²கா;

ஜீவீதனவகோ பாசேஸ்ஸாஸே சித்தப⁴வட்ட²கோ.

47. த்³விஜேஸு மனதேஜேஹி, த்³வே த்³வே ஹோந்தி பனட்ட²கா;

ஸேஸதேஜானிலம்ஸேஸு, ஏகேகம்ஹி தயோ தயோ.

48. அட்ட²கோஜமனக்³கீ³ஹி, ஹோந்தி அட்ட²ஸு கம்மதோ;

அட்டா²யுனவகா ஏவம், இமே அட்ட² சதுப்³ப⁴வா.

49. சதுவீஸேஸு ஸேஸேஸு, சதுஜேஸுட்ட²கா தயோ;

ஏகேகம்ஹி ச விஞ்ஞேய்யா, பிண்டா³ சித்தானலன்னஜா.

50. கம்மஜா காயபா⁴வவ்ஹா, த³ஸகாபி ஸியும் தஹிம்;

சதுவீஸேஸு அம்ஸேஸு, ஏகேகம்ஹி து³வே து³வே.

51. பஞ்சாபி சக்கு²ஸோதாதீ³, பதே³ஸத³ஸகா புன;

நவகா ஸத்³த³ஸங்கா²தா, த்³வேதிச்சேவம் கலாபதோ.

52. தேபஞ்ஞாஸ த³ஸேகஞ்ச, நவுத்தரஸதானி ச;

த³ஸகா நவகா சேவ, அட்ட²கா ச ஸியும் கமா.

53. ஸேகபஞ்சஸதம் காயே, ஸஹஸ்ஸம் தம் பவத்ததி;

பரிபுண்ணிந்த்³ரியே ரூபம், நிப்ப²ன்னம் தா⁴துபே⁴த³தோ.

54. சித்துப்பாதே³ ஸியும் ரூப-ஹேதூ கம்மாத³யோ பன;

டி²தி ந பாடே² சித்தஸ்ஸ, ந ப⁴ங்கே³ ரூபஸம்ப⁴வோ.

55. ‘‘அஞ்ஞத²த்தம் டி²தஸ்ஸா’’தி, வுத்தத்தாவ டி²திக்க²ணம்;

அத்தீ²தி சே பப³ந்தே⁴ன, டி²தி தத்த² பவுச்சதி.

56. அத² வா திக்க²ணே கம்மம், சித்தமத்துத³யக்க²ணே;

உதுஓஜாத்தனோ டா²னே, ரூபஹேதூ ப⁴வந்தி ஹி.

57. ஸேய்யஸ்ஸாதி³க்க²ணே காய-

பா⁴வவத்து²வஸா தயோ;

த³ஸகா ஹோந்திபா⁴விஸ்ஸ,

வினா பா⁴வம் து³வே ஸியும்.

58. ததோ பரஞ்ச கம்மக்³கி³சித்தஜா தே ச பிண்டி³கா;

அட்ட²கா ச து³வே புப்³பே³, வுத்தவுத்தக்க²ணே வதே³.

59. காலேனாஹாரஜம் ஹோதி, சக்கா²தி³த³ஸகானி ச;

சதுபச்சயதோ ரூபம், ஸம்பிண்டே³வம் பவத்ததி.

60. தம் ஸத்தரஸசித்தாயு, வினா விஞ்ஞத்திலக்க²ணம்;

ஸந்ததாமரணா ரூபம், ஜராதி³ப²லமாவஹம்.

61. ப⁴ங்கா³ ஸத்தரஸுப்பாதே³, ஜாயதே கம்மஜம் ந தம்;

தது³த்³த⁴ம் ஜாயதே தஸ்மா, தக்க²யா மரணம் ப⁴வே.

62. ஆயுகம்முப⁴யேஸம் வா, க²யேன மரணம் ப⁴வே;

உபக்கமேன வா கேஸஞ்சுபச்சே²த³ககம்முனா.

63. ஓபபாதிகபா⁴விஸ்ஸ, த³ஸகா ஸத்த கம்மஜா;

காமே ஆதோ³ ப⁴வந்தக்³கி³ஜாஹி புப்³பே³வ பூ⁴யதே.

64. ஆதி³கப்பனரானஞ்ச, அபாயே அந்த⁴கஸ்ஸ ச;

ப³தி⁴ரஸ்ஸாபி ஆதோ³ ச², புப்³பே³வேதரஜா ஸியும்.

65. தத்தே²வந்த⁴ப³தி⁴ரஸ்ஸ, பஞ்ச ஹோந்தி அபா⁴வினோ;

யுத்தியா இத⁴ விஞ்ஞேய்யா, பஞ்ச வா சதுரோபி வா.

66. சக்கா²தி³த்தயஹீனஸ்ஸ, சதுரோவ ப⁴வந்திதி;

வுத்தம் உபபரிக்கி²த்வா, க³ஹேதப்³ப³ம் விஜானதா.

67. ரூபே ஜீவிதச²க்கஞ்ச, சக்கா²தி³ஸத்தகத்தயம்;

பஞ்ச ச² உதுசித்தேஹி, பஞ்ச சா²ஸஞ்ஞினம் ப⁴வே.

68. பஞ்சதா⁴த்வாதி³னியமா, பாடே² க³ந்த⁴ரஸோஜனம்;

நுப்பத்தி தத்த² பூ⁴தானம், அபோ²ட்ட²ப்³ப³பவத்தினம்.

69. த²த்³து⁴ண்ஹீரணபா⁴வோவ, நத்தி² தா⁴த்வாதி³கிச்சதோ;

அஞ்ஞம் க³ந்தா⁴தீ³னம் தேஸம், தக்கிச்சேனோபலத்³தி⁴தோ.

70. ரூபே ஸப்படிக⁴த்தாதி³, தத்த² ருப்பனதா விய;

க⁴ட்டனஞ்ச ரவுப்பாத³ஸ்ஸஞ்ஞத்த²ஸ்ஸேவ ஹேதுதா.

71. இச்சி²தப்³ப³மிமேகந்தமேவம் பாடா²விரோத⁴தோ;

அத² வா தேஹி விஞ்ஞேய்யம், த³ஸகம் நவகட்ட²கம்.

72. ஸப்³ப³ம் காமப⁴வே ரூபம், ரூபே ஏகூனவீஸதி;

அஸஞ்ஞீனம் த³ஸ க³ந்த⁴ரஸோஜாஹி ச ப்³ரஹ்முனம்.

இதி ஸச்சஸங்கே²பே ரூபஸங்கே²போ நாம

பட²மோ பரிச்சே²தோ³.