5. பூ⁴மிபுக்³க³லகதா²

180. இதோ பரம் பவக்கா²மி, பூ⁴மிபுக்³க³லபே⁴த³தோ;

சித்தானம் பன ஸப்³பே³ஸம், கமதோ ஸங்க³ஹம் கத²ம்.

181. நிரயஞ்ச திரச்சா²னயோனி பேதாஸுரா ததா²;

சதுராபாயபூ⁴மீதி, காமே து³க்³க³தியோ மதா.

182. சாதுமஹாராஜிகா ச, தாவதிம்ஸா ச யாமகா;

துஸிதா சேவ நிம்மானரதினோ வஸவத்தினோ.

183. ச²ளேதே தே³வலோகா ச, மானவாதி ச ஸத்ததா⁴;

காமஸுக³தியோ சேகாத³ஸதா⁴ காமபூ⁴மியோ.

184. ப்³ரஹ்மானம் பாரிஸஜ்ஜா ச, ததா² ப்³ரஹ்மபுரோஹிதா;

மஹாப்³ரஹ்மா ச திவிதா⁴, பட²மஜ்ஜா²னபூ⁴மியோ.

185. பரித்தாபா⁴ப்பமாணாபா⁴, ததே²வாப⁴ஸ்ஸராதி ச;

து³தியஜ்ஜா²னபூ⁴மி ச, திவிதா⁴வ பகாஸிதா.

186. பரித்தஸுபா⁴ப்பமாணாஸுபா⁴ ச ஸுப⁴கிண்ஹகா;

திவிதா⁴பி பவுச்சந்தி, ததியஜ்ஜா²னபூ⁴மியோ.

187. வேஹப்ப²லா அஸஞ்ஞீ ச, ஸுத்³தா⁴வாஸா ச பஞ்சதா⁴;

இச்சேதா பன ஸத்தாபி, சதுத்த²ஜ்ஜா²னபூ⁴மியோ.

188. அவிஹா ச அதப்பா ச, ஸுத³ஸ்ஸா ச ஸுத³ஸ்ஸினோ;

அகனிட்டா²தி பஞ்சேதே, ஸுத்³தா⁴வாஸா பகாஸிதா.

189. இதி ஸோளஸதா⁴ பி⁴ன்னா, ப்³ரஹ்மலோகா பவுச்சரே;

ரூபிப்³ரஹ்மானமாவாஸா, ரூபாவசரபூ⁴மியோ.

190. ஆகாஸானஞ்சாயதனனாமாதீ³ஹி பகாஸிதா;

அரூபிப்³ரஹ்மலோகா ச, சதுதா⁴ரூபபூ⁴மியோ.

191. ஸோதாபன்னாதி³பே⁴தே³ன, சதுதா⁴நுத்தரா மதா;

பஞ்சதிம்ஸ பனிச்சேவம், ஸப்³ப³தா²பி ச பூ⁴மியோ.

192. ஜாயந்தி சதுராபாயே, பாபபாகாய ஸந்தி⁴யா;

காமாவசரதே³வேஸு, மஹாபாகேஹி ஜாயரே.

193. அஹேதுகா புஞ்ஞபாகாஹேதுகேன து ஜாயரே;

பு⁴ம்மதே³வமனுஸ்ஸேஸு, மஹாபாகேஹி சேதரே.

194. விபாகம் பட²மஜ்ஜா²னம், பட²மஜ்ஜா²னபூ⁴மியம்;

து³தியம் ததியஞ்சேவ, து³தியஜ்ஜா²னபூ⁴மியம்.

195. ததியம்ஹி சதுத்த²ம் து, சதுத்த²ம்ஹி ச பஞ்சமம்;

ஆருப்பா ச கமேனேவ, ஆருப்பே ஹோந்தி ஸந்தி⁴யோ.

196. காயவாசாமனோத்³வாரே, கம்மம் பாணவதா⁴தி³கம்;

கத்வா பாபகசித்தேஹி, ஜாயந்தாபாயபூ⁴மியம்.

197. காயவாசாமனோத்³வாரே, தா³னம் ஸீலஞ்ச பா⁴வனம்;

காமபுஞ்ஞேஹி கத்வான, காமஸுக³தியம் ஸியும்.

198. பரித்தம் மஜ்ஜி²மம் ஜா²னம், பணீதஞ்ச யதா²க்கமம்;

பா⁴வேத்வா திவிதா⁴ ஹோந்தி, தீஸு பூ⁴மீஸு யோகி³னோ.

199. வேஹப்ப²லேஸு ஜாயந்தி, பா⁴வேத்வா பஞ்சமம் ததா²;

ஸஞ்ஞாவிராக³தஞ்சேவ, பா⁴வேத்வாஸஞ்ஞிபூ⁴மியம்.

200. ஸுத்³தா⁴வாஸேஸு ஜாயந்தி, அனாகா³மிகபுக்³க³லா;

ஆருப்பானி ச பா⁴வேத்வா, அரூபேஸு யதா²க்கமம்.

201. லோகுத்தரம் து பா⁴வேத்வா, யதா²ஸகமனந்தரம்;

ஸமாபத்திக்க²ணே சேவ, அப்பேதி ப²லமானஸம்.

202. அபாயம்ஹா சுதா ஸத்தா, காமதா⁴தும்ஹி ஜாயரே;

ஸப்³ப³ட்டா²னேஸு ஜாயந்தி, காமஸுக³திதோ சுதா.

203. சுதா ஜாயந்தி ரூபம்ஹா, ஸப்³ப³த்தா²பாயவஜ்ஜிதே;

காமஸுக³தியம் ஹோந்தி, அரூபாஸஞ்ஞதோ சுதா.

204. ததா²ரூபசுதா ஹோந்தி, தத்தே²வோபரிமேவ ச;

வட்டமூலஸமுச்சே²தா³, நிப்³பா³யந்தி அனாஸவா.

205. ஸுத்³தா⁴வாஸேஸ்வனாகா³மி-புக்³க³லாவோபபஜ்ஜரே;

காமதா⁴தும்ஹி ஜாயந்தி, அனாகா³மிவிவஜ்ஜிதா.

206. ஹேட்டு²பபத்திப்³ரஹ்மானம், அரியானம் ந கத்த²சி;

அஸஞ்ஞஸத்தாபாயேஸு, நத்தே²வாரியபுக்³க³லா.

207. வேஹப்ப²லே அகனிட்டே², ப⁴வக்³கே³ ச பதிட்டி²தா;

ந புனாஞ்ஞத்த² ஜாயந்தி, ஸப்³பே³ அரியபுக்³க³லா.

208. ச²ஸு தே³வேஸ்வனாகா³மீ, வீதராகா³ ந திட்ட²ரே;

ந சிரட்டா²யினோ தத்த², லோகியாபி ச யோகி³னோ.

209. கி³ஹிலிங்கே³ ந திட்ட²ந்தி, மனுஸ்ஸேஸு அனாஸவா;

பப்³ப³ஜ்ஜாயஞ்ச பு⁴ம்மே ச, ப்³ரஹ்மத்தேபி ச திட்ட²ரே.

210. யானி பஞ்ஞாஸ வஸ்ஸானி,

மனுஸ்ஸானம் ஸ பிண்டி³தோ;

ஏகோ ரத்திதி³வோ தேன,

மாஸேகோ திம்ஸ ரத்தியோ.

211. த்³வாத³ஸமாஸியோ வஸ்ஸோ, தேன பஞ்சஸதம் ப⁴வே;

சாதுமஹாராஜிகானம், பமாணமித³மாயுனோ.

212. தம் நவுதிவஸ்ஸஸத-ஸஹஸ்ஸம் பன பிண்டி³தம்;

க³ணனாய மனுஸ்ஸானம், சதுபா⁴கூ³பரூபரி.

213. யம் மனுஸ்ஸவஸ்ஸஸதம், ததே³கோ தி³வஸோ கதோ;

தேன வஸ்ஸஸஹஸ்ஸாயு, தாவதிம்ஸேஸு தே³ஸிதோ.

214. கோடித்தயம் ஸட்டி²ஸதஸஹஸ்ஸஞ்சாதி⁴கம் ப⁴வே;

க³ணனாய மனுஸ்ஸானம், தாவதிம்ஸேஸு பிண்டி³தம்.

215. ஆயுப்பமாணமிச்சேவம், தே³வானமுபரூபரி;

த்³விக்க²த்தும் த்³விகு³ணம் கத்வா, சதுபா⁴க³முதா³ஹடம்.

216. க³ணனாய மனுஸ்ஸானம், தத்த² சுத்³த³ஸ கோடியோ;

சத்தாலீஸஸதஸஹஸ்ஸாதி⁴கா யாமபூ⁴மியம்.

217. துஸிதானம் பகாஸேந்தி, ஸத்தபஞ்ஞாஸ கோடியோ;

ஸட்டி²ஸதஸஹஸ்ஸானி, வஸ்ஸானி அதி⁴கானி ச.

218. நிம்மானரதிதே³வானம், த்³விஸதம் திம்ஸ கோடியோ;

சத்தாலீஸவஸ்ஸஸதஸஹஸ்ஸானி ச ஸப்³ப³தா².

219. நவகோடிஸதஞ்சேகவீஸதிவஸ்ஸகோடியோ;

ஸட்டி²வஸ்ஸஸதஸஹஸ்ஸாதி⁴கா வஸவத்திஸு.

220. கப்பஸ்ஸ ததியோ பா⁴கோ³, உபட்³ட⁴ஞ்ச யதா²க்கமம்;

கப்பேகோ த்³வே ச சத்தாரோ, அட்ட² கப்பா ச ஸோளஸ.

221. த்³வத்திம்ஸ சதுஸட்டீ² ச, நவஸு ப்³ரஹ்மபூ⁴மிஸு;

வேஹப்ப²லா அஸஞ்ஞீ ச, பஞ்சகப்பஸதாயுகா.

222. கப்பஸஹஸ்ஸம் த்³வே சத்தாரி, அட்ட² ஸோளஸ சக்கமா;

ஸஹஸ்ஸானி ச கப்பானம், ஸுத்³தா⁴வாஸானமுத்³தி³ஸே.

223. வீஸகப்பஸஹஸ்ஸானி, சத்தாலீஸஞ்ச ஸட்டி² ச;

சதுராஸீதிஸஹஸ்ஸா, கப்பா சாருப்பகே கமா.

224. ஆயுப்பமாணனியமோ, நத்தி² பு⁴ம்மே ச மானவே;

வஸ்ஸானம் க³ணனா நத்தி², சதுராபாயபூ⁴மியம்.

225. புது²ஜ்ஜனாரியா சேதி, து³விதா⁴ ஹோந்தி புக்³க³லா;

திஹேதுகாதி³பே⁴தே³ன, திவிதா⁴ ச புது²ஜ்ஜனா.

226. மக்³க³ட்டா² ச ப²லட்டா² ச,

அட்டே²வாரியபுக்³க³லா;

ஆதி³தோ ஸத்த ஸேக்கா² ச,

அஸேக்கோ² சாரஹாபரோ.

227. அஹேதுகாவ லப்³ப⁴ந்தி, ஸத்தா து³க்³க³தியம் பன;

திஹேதுகாவ லப்³ப⁴ந்தி, ரூபாரூபே ஸசித்தகா.

228. காமாவசரதே³வேஸு, அஹேதுகவிவஜ்ஜிதா;

வினிபாதாஸுரே சேவ, மானவே ச தயோபி ச.

229. அரியா நாம லப்³ப⁴ந்தி, அஸஞ்ஞாபாயவஜ்ஜிதே;

புது²ஜ்ஜனா து லப்³ப⁴ந்தி, ஸுத்³தா⁴வாஸவிவஜ்ஜிதே.

230. ஸுத்³தா⁴வாஸமபாயஞ்ச, ஹித்வாஸஞ்ஞிப⁴வம் திதா⁴;

ஸோதாபன்னாத³யோ த்³வேபி, ஸேஸட்டா²னேஸு லப்³ப⁴ரே.

231. இதி ஸப்³ப³ப்பபே⁴தே³ன, பூ⁴மிபுக்³க³லஸங்க³ஹம்;

ஞத்வா விஞ்ஞூ விபா⁴வேய்ய, தத்த² சித்தானி ஸம்ப⁴வாதி.

இதி சித்தவிபா⁴கே³ பூ⁴மிபுக்³க³லகதா² நிட்டி²தா.

பஞ்சமோ பரிச்சே²தோ³.