3. வீதி²ஸங்க³ஹகதா²

85. சக்கு²ஸோதகா⁴னஜிவ்ஹா-காயாயதன பஞ்சதா⁴;

பஸாதா³ ஹத³யஞ்சேதி, ச² வத்தூ²னி வினித்³தி³ஸே.

86. சக்கு²ஸோதகா⁴னஜிவ்ஹா-காயத்³வாரா ச பஞ்சதா⁴;

மனோத்³வாரம் ப⁴வங்க³ந்தி, ச² த்³வாரா சித்தவீதி²யா.

87. ரூபஸத்³த³க³ந்த⁴ரஸ-போ²ட்ட²ப்³பா³ பஞ்ச கோ³சரா;

த⁴ம்மாரம்மணபஞ்ஞத்தி, ச² த்³வாராரம்மணக்கமா.

88. நிமித்தக³திகம்மானி, கம்மமேவாத² கோ³சரா;

படிஸந்தி⁴ப⁴வங்கா³னம், சுதியா ச யதா²ரஹம்.

89. மரணாஸன்னஸத்தஸ்ஸ, யதோ²பட்டி²தகோ³சரம்;

ச²த்³வாரேஸு தமாரப்³ப⁴, படிஸந்தி⁴ ப⁴வந்தரே.

90. ஏகசித்தக்க²ணா ஹோதி, யாவஜீவம் ததோ பரம்;

ப⁴வங்க³ம் பரியோஸானே, சுதி சேகக்க²ணா ப⁴வே.

91. து³ஹேதாஹேதுசுதியா, காமாவசரஸந்தி⁴யோ;

திஹேதுகாமசுதியா, ஸப்³பா³பி படிஸந்தி⁴யோ.

92. ரூபாவசரசுதியா, ஸஹேதுபடிஸந்தி⁴யோ;

ஆருப்பதோபரி காமே, தத்த² வாபி திஹேதுகா.

93. படிஸந்தி⁴ ப⁴வங்க³ஞ்ச, ஏகமேவேகஜாதியம்;

சுதி சாரம்மணஞ்சஸ்ஸ, ஏவமேவ யதா²ரஹம்.

94. ரூபாதா³ரம்மணே சக்கு²-ப்பஸாதா³தி³ம்ஹி க⁴ட்டிதே;

மஜ்ஜே² ப⁴வங்க³ம் சி²ந்தி³த்வா, வீதி² நாம பவத்ததி.

95. ஆவஜ்ஜபஞ்சவிஞ்ஞாணஸம்படிச்ச²னதீரணா;

வோட்ட²ப்³ப³காமஜவனததா³ரம்மணனாமகா.

96. ஸத்தேவ டா²னஸங்கே²பா, பஞ்சத்³வாரிகமானஸா;

சதுபஞ்ஞாஸ ஸப்³பே³பி, வித்தா²ரேன ஸரூபதோ.

97. ஆவஜ்ஜஸப்³ப³ஜவனததா³ரம்மணனாமகா;

ஸத்தஸட்டி² ஸரூபேன, மனோத்³வாரிகமானஸா.

98. இட்டே² ஆரம்மணே ஹோந்தி, புஞ்ஞபாகானி ஸப்³ப³தா²;

அனிட்டே² பாபபாகானி, நியமோயம் பகாஸிதோ.

99. தத்தா²பி அதிஇட்ட²ம்ஹி, ததா³ரம்மணதீரணம்;

ஸோமனஸ்ஸயுதம் இட்ட²மஜ்ஜ²த்தம்ஹி உபேக்கி²தம்.

100. கோ³சரேதிபரித்தம்ஹி, அதிஅப்பாயுகே பன;

ப⁴வங்க³மேவ சலதி, மோக⁴வாரோதி ஸோ கதோ.

101. வோட்ட²ப்³ப³னம் பரித்தம்ஹி, த்³வத்திக்க²த்தும் பவத்ததி;

ததோ ப⁴வங்க³பாதோவ, ஸோபி மோகோ⁴தி வுச்சதி.

102. ஜவனஞ்ச மஹந்தம்ஹி, ஜவித்வான ததோ பரம்;

ந ஸம்போ⁴தி ததா³லம்ப³ம், ஸோபி மோகோ⁴தி வுச்சதி.

103. கோ³சரேதிமஹந்தம்ஹி, அதிதீ³கா⁴யுகே பன;

ஸம்போ⁴தி ச ததா³லம்ப³ம், ஸம்புண்ணோதி பவுச்சதி.

104. கோ³சரேதிமஹந்தம்ஹி, ததா³ரம்மணஸம்ப⁴வோ;

பஞ்சத்³வாரே மனோத்³வாரே, விபூ⁴தே பன கோ³சரே.

105. காமாவசரஸத்தானம், காமாவசரகோ³சரே;

பரித்தஜவனேஸ்வேவ, ததா³ரம்மணமுத்³தி³ஸே.

106. நாதிதிக்கே² நாதிஸீகே⁴, நாதிதேஜுஸ்ஸதே³ ஜவே;

ஸமமந்த³ப்பவத்தம்ஹி, ததா³ரம்மணமிச்சி²தம்.

107. ஸுகோ²பேதம் ததா³லம்ப³ம், உபேக்கா²க்ரியதோ பரம்;

ந ஹோதுபேக்கா²ஸஹிதம், ஸுகி²தக்ரியதோ ததா².

108. ந ஹோதி தோ³மனஸ்ஸம்ஹா, ஸோமனஸ்ஸிகமானஸம்;

ததா³ரம்மணமஞ்ஞஞ்ச, ப⁴வங்க³ம் சுதி வா ததா².

109. ரஜ்ஜனாதி³வஸேனேத்த², ஜவனாகுஸலம் ப⁴வே;

குஸலம் பன ஸம்போ⁴தி, ஸத்³தா⁴பஞ்ஞாதி³ஸம்ப⁴வே.

110. ததே³வ வீதராகா³னம், க்ரியா நாம பவுச்சதி;

அவிபாகதமாபன்னம், வட்டமூலபரிக்க²யா.

111. அப்பனாஜவனம் ஸேஸம், மஹக்³க³தமனுத்தரம்;

ச²ப்³பீ³ஸதி யதா²யோக³ம், அப்பனாவீதி²யம் ப⁴வே.

112. பரிகம்மம் கரோந்தஸ்ஸ, கஸிணாதி³ககோ³சரே;

ஸுஸமாஹிதசித்தஸ்ஸ, உபசாரஸமாதி⁴னா.

113. பரிகம்மோபசாரானுலோமகோ³த்ரபு⁴தோ பரம்;

பஞ்சமம் வா சதுத்த²ம் வா, ஜவனம் ஹோதி அப்பனா.

114. புது²ஜ்ஜனான ஸேக்கா²னம், காமபுஞ்ஞதிஹேதுதோ;

திஹேதுகாமக்ரியதோ, வீதராகா³னமப்பனா.

115. தத்ராபி ஸுகி²தஜவம், ஸுகி²தத்³வயதோ பரம்;

உபேக்கி²தம்ஹா ஸம்போ⁴தி, உபேக்கே²கக்³க³தாயுதம்.

116. பஞ்ச வாரே ச² வா ஸத்த, பரித்தஜவனம் ப⁴வே;

ஸகிம் த்³வே வா ததா³லம்ப³ம், ஸகிமாவஜ்ஜனாத³யோ.

117. அப்பனாஜவனஞ்சேகம், பட²முப்பத்தியம் பன;

ததோ பரம் வஸீபூ⁴தம், அஹோரத்தம் பவத்ததி.

118. ஸகிம் த்³வே வா நிரோத⁴ஸ்ஸ, ஸமாபத்திக்க²ணே பன;

சதுத்தா²ருப்பஜவனம், ததோ சித்தம் நிருஜ்ஜ²தி.

119. நிரோதா⁴ வுட்ட²ஹந்தஸ்ஸ, உபரிட்ட²ப²லத்³வயம்;

பஞ்சாபி⁴ஞ்ஞா ததா² மக்³கா³, ஏகசித்தக்க²ணா மதா.

120. ப²லமேகத்³வயம் ததா², திஸ்ஸோ வா மக்³க³வீதி²யம்;

ஸமாபத்திக்க²ணே தம்பி, அஹோரத்தம் பவத்ததி.

121. பஞ்சத்³வாரே ந லப்³ப⁴ந்தி, லோகுத்தரமஹக்³க³தா;

வீதி²முத்தமனோதா⁴து, பஞ்ச சித்தானி அந்திமே.

122. பரித்தானேவ ஸப்³பா³னி, பஞ்சத்³வாரேஸு ஸம்ப⁴வா;

மனோத்³வாரம்ஹி வோட்ட²ப்³ப³-ததா³லம்ப³ஜவா ஸியும்.

123. கா⁴னஜிவ்ஹாகாயவீதி², ததா³ரம்மணமேவ ச;

ரூபே நத்தி² ததா²ரூபே, சக்கு²ஸோதாபி வீதி²யோ.

124. ஸப்³பா³பி வீதி²யோ காமே,

ரூபே திஸ்ஸோ பகாஸிதா;

ஏகா வீதி² பனாரூபே,

நத்தா²ஸஞ்ஞீஸு காசிபி.

125. ஸத்தாபி வீதி²சித்தானி, காமே ரூபே ச² ஸம்ப⁴வா;

அரூபே த்³வே மனோத்³வாரா-வஜ்ஜனம் ஜவனந்தி சாதி.

இதி சித்தவிபா⁴கே³ வீதி²ஸங்க³ஹகதா² நிட்டி²தா.

ததியோ பரிச்சே²தோ³.