2. பகிண்ணககதா²

46. குஸலானேகவீஸேவ, த்³வாத³ஸாகுஸலானி ச;

ச²த்திம்ஸதி விபாகானி, க்ரியாசித்தானி வீஸதி.

47. காமேஸு சதுபஞ்ஞாஸ, ரூபேஸு த³ஸ பஞ்ச ச;

த்³வாத³ஸாருப்பசித்தானி, அட்டா²னுத்தரமானஸா.

48. காமே தேவீஸ பாகானி, புஞ்ஞாபுஞ்ஞானி வீஸதி;

ஏகாத³ஸ க்ரியா சேதி, சதுபஞ்ஞாஸ ஸப்³ப³தா².

49. புஞ்ஞபாகக்ரியாபே⁴தா³, தயோ ரூபேஸு பஞ்சகா;

ஆருப்பேதி சதுக்கானி, ஸத்தவீஸ மஹக்³க³தா.

50. சதுமக்³க³ப²லானம் து, வஸேனட்ட²பி ஜா²னதோ;

த³ஸோப⁴யம்பி மிஸ்ஸேத்வா, தாலீஸானுத்தரா ஸியும்.

51. புஞ்ஞபாகக்ரியாபாபா, ஸந்தி காமே மஹக்³க³தே;

பாபம் நத்தி² க்ரியாபாபா, ந விஜ்ஜந்தி அனுத்தரே.

52. பாபாஹேதுகமுத்தானி, அனவஜ்ஜானி ஸப்³ப³தா²;

ஏகூனஸட்டி² சித்தானி, புஞ்ஞபாகக்ரியாவஸா.

53. கம்மசித்தானி தேத்திம்ஸ, புஞ்ஞாபுஞ்ஞானி ஸப்³ப³தா²;

ச²த்திம்ஸ தேஸம் பாகானி, க்ரியா வீஸ ந சோப⁴யம்.

54. சக்கு²விஞ்ஞாணதா⁴தாதி³, பஞ்சவிஞ்ஞாணனாமகா;

பஞ்சத்³வாராவஜ்ஜனஞ்ச, து³வித⁴ம் ஸம்படிச்ச²னம்.

55. மனோதா⁴துத்தயம் நாம, ச²ஸத்ததி ததோ பரே;

மனோவிஞ்ஞாணதா⁴தூதி, ஸத்ததா⁴ தா⁴துபே⁴த³தோ.

56. மனோவிஞ்ஞாணதா⁴துஞ்ச, மனோதா⁴துத்தயம் ததா²;

கத்வா மனோவிஞ்ஞாணந்தி, ச² விஞ்ஞாணா பகித்திதா.

57. ஆவஜ்ஜனம் த³ஸ்ஸனஞ்ச, ஸவனம் கா⁴யனம் ததா²;

ஸாயனம் பு²ஸனஞ்சேவ, ஸம்படிச்ச²னதீரணம்.

58. வோட்ட²ப்³ப³னஞ்ச ஜவனம், ததா³ரம்மணனாமகம்;

ப⁴வங்க³ம் சுதி ஸந்தீ⁴தி, சித்தம் சுத்³த³ஸதா⁴ டி²தம்.

59. ஆவஜ்ஜனாத³யோ த்³வே த்³வே, யுகா³ ஸத்த யதா²க்கமம்;

தீணி தீரணசித்தானி, ஏகம் வோட்ட²ப்³ப³னம் மதம்.

60. குஸலாகுஸலா ஸப்³பே³, ப²லா சாவஜ்ஜனம் வினா;

க்ரியா ச பஞ்சபஞ்ஞாஸ, ஜவனந்தி பவுச்சரே.

61. ஸந்தீரணமஹாபாகா, ததா³ரம்மணனாமகா;

ஏகாத³ஸ பவத்தந்தி, ஜவனாரம்மணே யதோ.

62. மஹக்³க³தமஹாபாகா, உபேக்கா²தீரணத்³வயம்;

சுதிஸந்தி⁴ப⁴வங்கா³னி, சித்தானேகூனவீஸதி.

63. ஜவனாவஜ்ஜனாதீ³னி, வோட்ட²ப்³ப³ஸுக²தீரணா;

மஹக்³க³தமஹாபாகா, உபேக்கா²தீரணாதி ச.

64. அட்ட²ஸட்டி² ததா² த்³வே ச, நவட்ட² த்³வே யதா²க்கமம்;

ஏகத்³விதிசதுப்பஞ்சகிச்சட்டா²னானி நித்³தி³ஸே.

65. ரூபபாகா மஹாபாகா, மனோதா⁴து ச தீரணம்;

ரூபம் ஜனேந்தி ஏகூனவீஸதி நேதரத்³வயம்.

66. அபி⁴ஞ்ஞாவஜ்ஜிதா ஸப்³பே³, அப்பனாஜவனா பன;

ரூபம் ஜனேந்தி ச²ப்³பீ³ஸ, பணாமேந்திரியாபத²ம்.

67. அபி⁴ஞ்ஞாத்³வயவோட்ட²ப்³ப³பரித்தஜவனா பன;

த்³வத்திம்ஸ ரூபவிஞ்ஞத்திஇரியாபத²ஸாத⁴கா.

68. பஞ்சவிஞ்ஞாணமாருப்ப-விபாகா ஸப்³ப³ஸந்தி⁴யோ;

சுதி கீ²ணாஸவஸ்ஸேதி, ஸோளஸேதே ந கிஞ்சிபி.

69. ரூபம் ஜனேந்தி சித்தானி, ஸத்தஸத்ததி ஸப்³ப³தா²;

அட்ட²பஞ்ஞாஸ சித்தானி, பணாமேந்திரியாபத²ம்.

70. த்³வத்திம்ஸ சதுவிஞ்ஞத்திம், ஸமுட்டா²பேந்தி மானஸா;

ந ஜனேந்தி தஸ்ஸம்பேகம், யதா²வுத்தானி ஸோளஸ.

71. ஸோமனஸ்ஸஸஹக³தா, பரித்தஜவனா பன;

ஹஸனம்பி ஜனேந்தீதி, சதுகிச்சானி தேரஸ.

72. ஸப்³ப³ம்பி பஞ்சவோகாரே, கிச்சமேதம் பகாஸிதம்;

ஆருப்பே பன ஸப்³ப³ம்பி, ரூபாயத்தம் ந விஜ்ஜதி.

73. அஸஞ்ஞீனம் து ஸப்³பா³னி, சித்தானேவ ந லப்³ப⁴ரே;

ரூபக்க²ந்தோ⁴வ தேஸம் து, அத்தபா⁴வோதி வுச்சதி.

74. பாணாதிபாததே²ய்யாதி³வஸேனோபசிதம் பன;

உத்³த⁴ச்சரஹிதாபுஞ்ஞம், சதுராபாயபூ⁴மியம்.

75. த³த்வா ஸந்தி⁴ம் பவத்தே து, பஞ்சவோகாரபூ⁴மியம்;

உத்³த⁴ச்சஸஹிதஞ்சாபி, ஸத்த பாகானி பச்சதி.

76. தா³னஸீலாதி³பே⁴தே³ன, பவத்தம் குஸலம் பன;

காமே மானஸமுக்கட்ட²ம், சதுக்கம் து திஹேதுகம்.

77. த³த்வா திஹேதுகம் ஸந்தி⁴ம், காமே ஸுக³தியம் பன;

ஸோளஸ புஞ்ஞபாகானி, பவத்தே து விபச்சதி.

78. திஹேதுகோமகம் புஞ்ஞம், உக்கட்ட²ஞ்ச த்³விஹேதுகம்;

த³த்வா த்³விஹேதுகம் ஸந்தி⁴ம், காமே ஸுக³தியம் ததா².

79. பவத்தே பன ஞாணேன, ஸம்பயுத்தம் விவஜ்ஜிய;

த்³வாத³ஸ புஞ்ஞபாகானி, விபச்சதி யதா²ரஹம்.

80. த்³விஹேதுகோமகம் புஞ்ஞம், படிஸந்தி⁴மஹேதுகம்;

தே³தி மானுஸகே சேவ, வினிபாதாஸுரே ததா².

81. அட்டா²ஹேதுகபாகானி, பவத்தே து விபச்சரே;

சத்தாரிபி சதுக்கானி, பஞ்சவோகாரபூ⁴மியம்.

82. பா⁴வனாமயபுஞ்ஞம் து, மஹக்³க³தமனுத்தரம்;

யதா²பூ⁴மினியாமேன, தே³தி பாகம் யதா²ஸகம்.

83. கடத்தாரூபபாகானி, பஞ்சவோகாரபூ⁴மியம்;

ஆருப்பானுத்தரே பாகம், ததா² ரூபமஸஞ்ஞிஸு.

84. புஞ்ஞாபுஞ்ஞானி கம்மானி, தேத்திம்ஸாபி ச யப்³ப³தா²;

ஸஞ்ஜனேந்தி யதா²யோக³ம், படிஸந்தி⁴பவத்தியம்.

இதி சித்தவிபா⁴கே³ பகிண்ணககதா² நிட்டி²தா.

து³தியோ பரிச்சே²தோ³.