பட²மோ பரிச்சே²தோ³

1. சித்தவிபா⁴கோ³

1. ஸரூபஸங்க³ஹகதா²

2. சித்தம் சேதஸிகம் ரூபம், நிப்³பா³னந்தி நிருத்தரோ;

சதுதா⁴ தே³ஸயீ த⁴ம்மே, சதுஸச்சப்பகாஸனோ.

3. சித்தமேகூனனவுதிவித⁴ம் தத்த² விபா⁴வயே;

ஏகனவுதிவித⁴ம் வா, ஏகவீஸஸதம்பி வா.

4. த்³வேபஞ்ஞாஸ ஸரூபேன, த⁴ம்மா சேதஸிகா மதா;

சித்துப்பாத³வஸா பி⁴ன்னா, ஸம்பயோகா³னுஸாரதோ.

5. அட்ட²வீஸவித⁴ம் ரூபம், பூ⁴தோபாதா³யபே⁴த³தோ;

து³வித⁴ம் ரூபரூபம் து, அட்டா²ரஸவித⁴ம் ப⁴வே.

6. நிப்³பா³னம் பன தீ³பேந்தி, அஸங்க²தமனுத்தரம்;

அத்த²னாமவஸா த்³வேதா⁴, பஞ்ஞத்தீதி பவுச்சதி.

7. தேஸம் தா³னி பவக்கா²மி, விபா⁴க³ம் து யதா²க்கமம்;

சதுதா⁴ பரமத்தா²னம், த்³விதா⁴ பஞ்ஞத்தியா கத²ம்.

8. குஸலாதி³விபா⁴கே³ன, தத்த² சித்தம் சதுப்³பி³த⁴ம்;

ததா² பூ⁴மிவிபா⁴கே³ன, காமபூ⁴மாதி³தோ கத²ம்.

9. ஸோமனஸ்ஸஸஹக³தம், உபேக்கா²ஸஹிதம் ததா²;

ஞாணேன ஸம்பயுத்தஞ்ச, விப்பயுத்தந்தி பே⁴தி³தம்.

10. அஸங்கா²ரம் ஸஸங்கா²ரமிதி பி⁴ன்னம் புனட்ட²தா⁴;

காமாவசரகுஸலம், காமே ஸுக³திஸாத⁴கம்.

11. தக்கசாரபீதிஸுக²-சித்தஸ்ஸேகக்³க³தாயுதம்;

பட²மஜ்ஜா²னகுஸலம், பஞ்சங்கி³கமுதா³ஹடம்.

12. விதக்கஹீனம் து³தியம், ஜா²னம் து சதுரங்கி³கம்;

விசாரஹீனம் ததியம், ஜா²னம் பன திவங்கி³கம்.

13. பீதிஹீனம் சதுத்த²ஞ்ச, உபேக்கே²கக்³க³தாயுதம்;

பஞ்சமஞ்ச பகாஸேந்தி, உப⁴யம்பி து³வங்கி³கம்.

14. ஏவம் ஜா²னங்க³பே⁴தே³ன, சித்தம் பஞ்சவித⁴ம் ப⁴வே;

ரூபாவசரகுஸலம், ரூபபூ⁴மிபவத்தகம்.

15. ஆகாஸானஞ்சாயதனம், குஸலம் பட²மம் ப⁴வே;

விஞ்ஞாணஞ்சாயதனந்தி, து³தியம் ததியம் ததா².

16. ஆகிஞ்சஞ்ஞாயதனம் து, சதுத்த²ம் பன மானஸம்;

நேவஸஞ்ஞானாஸஞ்ஞாய-தனஞ்சேதி சதுப்³பி³த⁴ம்.

17. ஆருப்பகுஸலம் நாம, உபேக்கே²கக்³க³தாயுதம்;

து³வங்கி³கமித³ம் ஸப்³ப³ம், ஆருப்பப⁴வஸாத⁴கம்.

18. ஸோதாபத்திமக்³க³சித்தம், பட²மானுத்தரம் ததா²;

ஸகதா³கா³மி அனாகா³மி, அரஹத்தந்தி ஸப்³ப³தா².

19. சதுதா⁴ மக்³க³பே⁴தே³ன, ஜா²னபே⁴தே³ன பஞ்சதா⁴;

வீஸதாபரியாபன்னகுஸலம் த்³வயமிஸ்ஸிதம்.

20. இத்த²ம் பூ⁴மிவிபா⁴கே³ன, குஸலம் து சதுப்³பி³த⁴ம்;

ஏகவீஸாபி பா³வீஸம், ஸத்ததிம்ஸவித⁴ம்பி வா.

21. ஸோமனஸ்ஸஸஹக³தம், உபேக்கா²ஸஹிதம் ததா²;

தி³ட்டி²க³தஸம்பயுத்தம், விப்பயுத்தந்தி பே⁴தி³தம்.

22. அஸங்கா²ரம் ஸஸங்கா²ரமிதி பி⁴ன்னம் புனட்ட²தா⁴;

லோப⁴மூலம் பகாஸேந்தி, லோப⁴மோஹத்³விஹேதுகம்.

23. தோ³மனஸ்ஸஸஹக³தம், படிகே⁴ன ஸமாயுதம்;

அஸங்கா²ரம் ஸஸங்கா²ரமிதி பி⁴ன்னம் த்³விதா⁴ பன.

24. தோ³ஸமூலம் பகாஸேந்தி, தோ³ஸமோஹத்³விஹேதுகம்;

விசிகிச்சா²ஸஹக³தம், உத்³த⁴ச்சஸஹிதந்தி ச.

25. உபேக்கா²வேத³னாயுத்தம், மோமூஹம் து³வித⁴ம் பன;

மோஹமூலம் பகாஸேந்தி, மோஹேனேவேகஹேதுகம்.

26. த்³வாத³ஸாகுஸலா நாம, சதுராபாயஸாத⁴கா;

ஏதே ஸுக³தியஞ்சாபி, விபத்திப²லதா³யகா.

27. சக்கு²ஸோதகா⁴னஜிவ்ஹா-காயவிஞ்ஞாணனாமகா;

பஞ்சவிஞ்ஞாணயுக³ளா, யுக³ளம் ஸம்படிச்ச²னம்.

28. ஸந்தீரணத்³வயஞ்சேவ, உபேக்கா²ஸஹிதம் ததா²;

புஞ்ஞாபுஞ்ஞவஸேனேவ, விபாகா து³விதா⁴ டி²தா.

29. உபேக்கா²ஸஹிதா தத்த², மானஸா த்³வாத³ஸேரிதா;

காயவிஞ்ஞாணயுக³ளம், ஸுக²து³க்க²யுதம் கமா.

30. ஸோமனஸ்ஸஸஹக³தம், யம் ஸந்தீரணமானஸம்;

தம் புஞ்ஞபாகமேவாஹு, பாபபாகம் ந விஜ்ஜதி.

31. பஞ்சத்³வாரமனோத்³வார-வஸேன து³வித⁴ம் பன;

உபேக்கா²வேத³னாயுத்தம், க்ரியாவஜ்ஜனனாமகம்.

32. ஸோமனஸ்ஸஸஹக³தம், ஹஸிதுப்பாத³மானஸம்;

க்ரியாஜவனமிச்சேவம், திவிதா⁴ஹேதுகக்ரியா.

33. அட்டே²வ புஞ்ஞபாகானி, பாபபாகானி ஸத்ததா⁴;

க்ரியசித்தானி தீணீதி, அட்டா²ரஸ அஹேதுகா.

34. ஸபுஞ்ஞேஹி ஸமானா ச, மஹாபாகமஹாக்ரியா;

மஹக்³க³தக்ரியா பாகா, ப²லசித்தானி ச கமா.

35. இத்த²மேகூனனவுதி-வித⁴ம் சித்தம் ப⁴வே ததா²;

ஏகனவுதிவித⁴ம் வா, ஏகவீஸஸதம்பி வா.

36. தக்கசாரபீதிஸுக²சித்தஸ்ஸேகக்³க³தாயுதம்;

ஸோதாபத்திமக்³க³சித்தம், பட²மஜ்ஜா²னிகம் மதம்.

37. து³தியம் தக்கதோ ஹீனம், ததியம் து விசாரதோ;

சதுத்த²ம் பீதிதோ ஹீனம், உபேக்கே²கக்³க³தாயுதம்.

38. பஞ்சமந்தி ச பஞ்சேதே, பட²மானுத்தரா மதா;

தி³ட்டி²கங்கா²ஸீலப்³ப³தபராமாஸப்பஹாயினோ.

39. ததே²வ ஸகதா³கா³மிமக்³க³சித்தஞ்ச பஞ்சதா⁴;

ராக³தோ³ஸமோஹத்தயதனுத்தகரமீரிதம்.

40. காமதோ³ஸஸமுக்³கா⁴தகரம் நிரவஸேஸதோ;

ததியானுத்தரஞ்சாபி, குஸலம் பஞ்சதா⁴ ததா².

41. ரூபராகா³ரூபராக³மானுத்³த⁴ச்சாபி சாபரா;

அவிஜ்ஜா சேதி பஞ்சுத்³த⁴ம்பா⁴கி³யானமஸேஸதோ.

42. ஸம்யோஜனானம் ஸேஸானம், ஸமுக்³கா⁴தகரம் பரம்;

சதுத்தா²னுத்தரம் மக்³க³சித்தம் பஞ்சவித⁴ந்தி ச.

43. சத்தாரி பஞ்சகானேவ, மக்³கே³ஸு ச ப²லேஸு ச;

ஸேஸானி சேகாஸீதீதி, ஏகவீஸஸதம் ப⁴வே.

44. லோகுத்தரானம் அட்ட²ன்னம், இச்சேவம் பஞ்சதா⁴ புன;

ஜா²னங்க³மக்³க³போ³ஜ்ஜ²ங்க³-விபா⁴கா³ய யதா²ரஹம்.

45. பாத³கஜ்ஜா²னமாமட்ட²ஜா²னம் அஜ்ஜா²ஸயோ ததா²;

வுட்டா²னகா³மினீ சேவ, நியாமேதி விபஸ்ஸனாதி.

இதி சித்தவிபா⁴கே³ ஸரூபஸங்க³ஹகதா² நிட்டி²தா.

பட²மோ பரிச்சே²தோ³.