ஏகூனதிம்ஸதிமோ பரிச்சே²தோ³

29. நாமபஞ்ஞத்திகதா²

1114. நாமவோஹாரஸங்கேதகாரணோபனிப³ந்த⁴னா;

யதா²வுத்தத்த²ஸத்³தா³னம், அந்தரா சிந்தனா க³தா.

1115. நாமபஞ்ஞத்தி நாமாயம், அத்த²ஸத்³த³வினிஸ்ஸடா;

தம்த்³வயாப³த்³த⁴ஸங்கேதஞேய்யாகாரோபலக்கி²தா.

1116. யா க³ய்ஹதி நாமகோ⁴ஸகோ³சருப்பன்னவீதி²யா;

பவத்தானந்தருப்பன்ன-மனோத்³வாரிகவீதி²யா.

1117. மஞ்சபீடா²தி³ஸத்³த³ம் ஹி, ஸோதவிஞ்ஞாணவீதி²யா;

ஸுத்வா தமேவ சிந்தேத்வா, மனோத்³வாரிகவீதி²யா.

1118. ததோ ஸங்கேதனிப்ப²ன்னம், நாமம் சிந்தாய க³ய்ஹதி;

நாமபஞ்ஞத்திஅத்தா² து, ததோ க³ய்ஹந்தி ஸம்ப⁴வா.

1119. ஸத்³த³னாமத்த²பஞ்ஞத்திபரமத்த²வஸேன ஹி;

சதுதா⁴ திவிதா⁴ வாத², சிந்தனா தத்த² இச்சி²தா.

1120. இத்த²மட்ட²கதா²மக்³க³ம், வண்ணேந்தேன ஹி த³ஸ்ஸிதோ;

நயோ ஆசரியேனேதி, விபா⁴கோ³யம் பகாஸிதோ.

1121. நத்த²ஞ்ஞா காசி விஞ்ஞத்தி, விகாரஸஹிதோ பன;

ஸத்³தோ³வ நாமபஞ்ஞத்தி, இச்சேகச்சேஹி வண்ணிதம்.

1122. ததே³தம் நாமபஞ்ஞத்திபா⁴வேனேகவித⁴ம்பி ச;

நேருத்திகயாதி³ச்ச²கவஸா நாமம் த்³விதா⁴ ப⁴வே.

1123. ஸஞ்ஞாஸு தா⁴துரூபானி, பச்சயஞ்ச ததோ பரம்;

கத்வா வண்ணாக³மாதி³ஞ்ச, ஸத்³த³லக்க²ணஸாதி⁴தம்.

1124. நேருத்திகமுதீ³ரேந்தி, நாமம் யாதி³ச்ச²கம் பத³ம்;

யதி³ச்சா²ய கதமத்தம், ப்³யஞ்ஜனத்த²விவஜ்ஜிதம்.

1125. திவித⁴ம்பி தத³ன்வத்த²காதி³மஞ்சோபசாரிமம்;

நிப்³ப³சனத்த²ஸாபேக்க²ம், தத்தா²ன்வத்த²முதீ³ரிதம்.

1126. யதி³ச்சா²கதஸங்கேதம், காதி³மஞ்சோபசாரிமம்;

அதம்பூ⁴தஸ்ஸ தப்³பா⁴வவோஹாரோதி பவுச்சதி.

1127. ததா² ஸாமஞ்ஞனாமஞ்ச, கு³ணனாமஞ்ச கித்திமம்;

ஓபபாதிகமிச்சேவம், நாமம் ஹோதி சதுப்³பி³த⁴ம்.

1128. மஹாஜனஸம்மதஞ்ச, அன்வத்த²ஞ்சேவ தாதி³ஸம்;

தீணி நாமானி சந்தா³தி³னாமம் தத்தோ²பபாதிகம்.

1129. யாதி³ச்ச²கமாவத்தி²கம், நேமித்தகமதா²பரம்;

லிங்கி³கம் ருள்ஹிகஞ்சேதி, நாமம் பஞ்சவித⁴ம் ப⁴வே.

1130. யாதி³ச்ச²கம் யதா²வுட்³ட⁴ம், வச்ச²த³ம்மாதி³கம் பன;

ஆவத்தி²கம் நேமித்தகம், ஸீலவாபஞ்ஞவாதி³கம்.

1131. லிங்கி³கம் தி³ட்ட²லிங்க³ம் து, த³ண்டீ³ச²த்தீதிஆதி³கம்;

ருள்ஹிகம் லேஸமத்தேன, ருள்ஹம் கோ³மஹிம்ஸாதி³கம்.

1132. விஜ்ஜமானாவிஜ்ஜமான-பஞ்ஞத்தோப⁴யமிஸ்ஸிதா;

விப⁴த்தா நாமபஞ்ஞத்தி, ச²ப்³பி³தா⁴ ஹோதி தத்த² ஹி.

1133. விஜ்ஜமானபஞ்ஞத்தீதி, விஜ்ஜமானத்த²தீ³பிதா;

வுச்சதி க²ந்தா⁴யதன-தா⁴துபஞ்சிந்த்³ரியாதி³கா.

1134. அவிஜ்ஜமானபஞ்ஞத்தி-நாமிகா பரமத்த²தோ;

அவிஜ்ஜமானமஞ்சாதி³, அத்த²பஞ்ஞத்திதீ³பிதா.

1135. விஜ்ஜமானேன அவிஜ்ஜ-மானபஞ்ஞத்தினாமிகா;

தேவிஜ்ஜோ ச²ளபி⁴ஞ்ஞோ ச, ஸீலவா பஞ்ஞவாபி ச.

1136. அவிஜ்ஜமானேன விஜ்ஜ-மானபஞ்ஞத்தினாமிகா;

இத்தி²ரூபம் இத்தி²ஸத்³தோ³, இத்தி²சித்தந்திஆதி³கா.

1137. விஜ்ஜமானேன து விஜ்ஜ-மானபஞ்ஞத்தினாமிகா;

சக்கு²விஞ்ஞாணம் ச சக்கு²-ஸம்ப²ஸ்ஸோ சேவமாதி³கா.

1138. அவிஜ்ஜமானேனாவிஜ்ஜ-மானபஞ்ஞத்தினாமிகா;

க²த்தியபுத்தோ ப்³ராஹ்மண-புத்தோ இச்சேவமாதி³கா.

1139. இதி வுத்தானுஸாரேன, நாமபஞ்ஞத்தியா பு³தோ⁴;

ஸரூபம் விஸயஞ்சேவ, விபா⁴க³ஞ்ச விபா⁴வயே.

1140. இச்சேவம் பரமத்தா² ச, யதா²வுத்தா சதுப்³பி³தா⁴;

பஞ்ஞத்தி து³விதா⁴ சேதி, ஞேய்யத்தா² ச²ப்³பி³தா⁴ மதாதி.

இதி பஞ்ஞத்திவிபா⁴கே³ நாமபஞ்ஞத்திகதா² நிட்டி²தா.

ஏகூனதிம்ஸதிமோ பரிச்சே²தோ³.

நிட்டி²தோ ச ஸப்³ப³தா²பி பஞ்ஞத்திவிபா⁴கோ³.

நிக³மனகதா²

1141. ஸேட்டே² கஞ்சிவரே ரட்டே², காவேரிநக³ரே வரே;

குலே ஸஞ்ஜாதபூ⁴தேன, ப³ஹுஸ்ஸுதேன ஞாணினா.

1142. அனுருத்³தே⁴ன தே²ரேன, அனிருத்³த⁴யஸஸ்ஸினா;

தம்ப³ரட்டே² வஸந்தேன, நக³ரே தஞ்ஜநாமகே.

1143. தத்த² ஸங்க⁴விஸிட்டே²ன, யாசிதேன அனாகுலம்;

மஹாவிஹாரவாஸீனம், வாசனாமக்³க³னிஸ்ஸிதம்.

1144. பரமத்த²ம் பகாஸேந்தம், பரமத்த²வினிச்ச²யம்;

பகரணம் கதம் தேன, பரமத்த²த்த²வேதி³னாதி.

இதி அனுருத்³தா⁴சரியேன ரசிதோ

பரமத்த²வினிச்ச²யோ நிட்டி²தோ.

நமோ தஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ