6. பூ⁴மிபுக்³க³லசித்தப்பவத்திகதா²

232. காமஸுக³தியம் ஹோந்தி, மஹாபாகா யதா²ரஹம்;

மஹக்³க³தவிபாகா ச, யதா²ஸந்தி⁴வவத்தி²தா.

233. வோட்ட²ப்³ப³காமபுஞ்ஞானி, வியுத்தானி ச தி³ட்டி²யா;

உத்³த⁴ச்சஸஹிதஞ்சேதி, ஹோந்தி ஸப்³ப³த்த² சுத்³த³ஸ.

234. ஸந்தீரணமனோதா⁴து-சக்கு²ஸோதமனா பன;

த³ஸ சித்தானி ஜாயந்தி, ஸப்³ப³த்தா²ரூபவஜ்ஜிதே.

235. தி³ட்டி²க³தஸம்பயுத்தா, விசிகிச்சா²யுதா ததா²;

பஞ்ச ஸப்³ப³த்த² ஜாயந்தி, ஸுத்³தா⁴வாஸவிவஜ்ஜிதே.

236. தோ³ஸமூலத்³வயஞ்சேவ, கா⁴னாதி³த்தயமானஸா;

அட்ட² ஸப்³ப³த்த² ஜாயந்தி, மஹக்³க³தவிவஜ்ஜிதே.

237. சதுத்தா²ருப்பஜவனம், அனாகா³மிப²லாத³யோ;

மஹாக்ரியா ச ஜாயந்தி, தேரஸாபாயவஜ்ஜிதே.

238. ஹேட்டா²ருப்பஜவா த்³வே த்³வே, சா²பாயுபரிவஜ்ஜிதே;

ஸிதரூபஜவா ஹோந்தி, அரூபாபாயவஜ்ஜிதே.

239. ஸோதாபத்திப²லாதீ³னி, ஸுத்³தா⁴பாயவிவஜ்ஜிதே;

பட²மானுத்தரம் ஸுத்³தா⁴-பாயாரூபவிவஜ்ஜிதே.

240. அவத்தா²பூ⁴மிபூ⁴தத்தா, ந க³ய்ஹந்தி அனுத்தரா;

ஏகவோகாரபூ⁴மி ச, ரூபமத்தா ந க³ய்ஹதி.

241. ஸபு⁴ம்மா ஸப்³ப³பு⁴ம்மா ச, ஏகத்³வித்தயவஜ்ஜிதா;

ததா²ரூபஸுத்³தா⁴வாஸ-ப்³ரஹ்மாபாயவஸாதி ச.

242. மானஸா பஞ்ச கோட்டா²ஸா, ஸத்தரஸ சதுத்³த³ஸ;

ச²த்திம்ஸதேகவீஸா ச, ஏகஞ்சேவ யதா²க்கமம்.

243. அட்டா²ரஸாபி ஹோந்தேதே, நவதா⁴பி புனேகதா⁴;

சதுதா⁴ திவிதா⁴ சேவ, ஏகதா⁴தி ச பே⁴த³தோ.

244. தேரஸாபி ச கோட்டா²ஸா, ப⁴வந்தேகதிபூ⁴மகா;

ச²ஸத்தேகாத³ஸஸத்த-ரஸபூ⁴மகமானஸா.

245. ஏகத்³வயதிசதுக்கபஞ்சகாதி⁴கவீஸஜா;

ச²ப்³பீ³ஸதிம்ஸஜா சேதி, யதா²னுக்கமதோ ப⁴வே.

246. சத்தாரி புன சத்தாரி, ஏகமட்ட²ட்ட² சேககம்;

சத்தாரேகாத³ஸ த்³வே த்³வே, ஸத்த தேவீஸ சுத்³த³ஸ.

247. க்ரியாஜவமஹாபாகா, லோகுத்தரமஹக்³க³தா;

த்³வேபஞ்ஞாஸ ந லப்³ப⁴ந்தி, சதுராபாயபூ⁴மியம்.

248. காமாவசரதே³வேஸு, ச²ஸு பு⁴ம்மே ச மானவே;

காமஸுக³தியம் நத்தி², நவ பாகா மஹக்³க³தா.

249. தோ³ஸமூலமஹாபாகா, கா⁴னாதி³த்தயமானஸா;

நத்தா²ரூபவிபாகா ச, வீஸதீ ரூபபூ⁴மியம்.

250. கங்கா²தி³ட்டி²யுதா பஞ்சாரூபபாகா சதுப்³பி³தா⁴;

பஞ்சாதோ³னுத்தரா சேவ, ஸுத்³தா⁴வாஸே ந லப்³ப⁴ரே.

251. ஆதா³வஜ்ஜனமக்³கா³ ச, படிகா⁴ரூபமானஸா;

காமபாகா ஸிதாரூபே, தேசத்தாலீஸ நத்தி² தே.

252. ஸத்ததிம்ஸ பரித்தா ச, லப்³ப⁴ந்தாபாயபூ⁴மியம்;

மானஸாஸீதி லப்³ப⁴ந்தி, காமஸுக³தியம் பன.

253. ஏகூனஸத்ததி ரூபே, ஸுத்³தே⁴ பஞ்ஞாஸ பஞ்ச ச;

ச²சத்தாலீஸ ஆருப்பே, நத்தா²ஸஞ்ஞீஸு கிஞ்சிபி.

254. இத்த²மேகத்³விதிசதுபஞ்சபு⁴ம்மானி ஸோளஸ;

த³ஸ பஞ்சத³ஸேவாத², சதுத்திம்ஸ சதுத்³த³ஸ.

255. அபாயாஹேதுகானம் து, மஹாபாகக்ரியாஜவே;

ஹித்வா ஸேஸபரித்தானி, சித்தானி பன லப்³ப⁴ரே.

256. த்³விஹேதுகாஹேதுகானம், ஸேஸானம் காமமானஸா;

லப்³ப⁴ந்தி பன ஹித்வான, ஞாணபாகக்ரியாஜவே.

257. திஹேதுகானம் ஸத்தானம், தத்த² தத்தூ²பபத்தியம்;

தத்த² தத்தூ²பபன்னானம், லப்³ப⁴மானானி லப்³ப⁴ரே.

258. திஹேதுகானம் ஸப்³பே³பி, மானஸாபாயபாணினம்;

ஸத்ததிம்ஸாவஸேஸானம், ஏகதாலீஸ நித்³தி³ஸே.

259. புது²ஜ்ஜனான ஸேக்கா²னம், ந ஸந்தி ஜவனக்ரியா;

ந ஸந்தி வீதராகா³னம், புஞ்ஞாபுஞ்ஞானி ஸப்³ப³தா².

260. கங்கா²தி³ட்டி²யுதா பஞ்ச, ஸேக்கா²னம் நத்தி² மானஸா;

தோ³ஸமூலத்³வயஞ்சாபி, நத்தா²னாகா³மினோ பன.

261. வவத்தி²தாரியேஸ்வேவ, யதா²ஸகமனுத்தரா;

மக்³க³ட்டா²னம் ஸகோ மக்³கோ³, நத்த²ஞ்ஞம் கிஞ்சி ஸப்³ப³தா².

262. புது²ஜ்ஜனானம் த்³வின்னம்பி, ப²லட்டா²னம் யதா²க்கமம்;

ததியஸ்ஸ ப²லட்ட²ஸ்ஸ, சதுத்த²ஸ்ஸ ச ஸம்ப⁴வா.

263. தேஸட்டி² சேவ சித்தானி, லப்³ப⁴ந்தேகூனஸட்டி² ச;

ஸத்தபஞ்ஞாஸ சித்தானி, தேபஞ்ஞாஸ ச ஸப்³ப³தா².

264. சதுபஞ்ஞாஸ பஞ்ஞாஸ, பஞ்ஞாஸத்³வயஹீனகா;

காமேஸு தேஸம் ஸம்போ⁴ந்தி, சதுதாலீஸ சக்கமா.

265. தேசத்தாலீஸ சேகூனசத்தாலீஸ யதா²க்கமம்;

ப⁴வந்தேகூனதாலீஸ, பஞ்சத்திம்ஸ ச ரூபிஸு.

266. ஸத்தவீஸ ச தேவீஸ, தேவீஸ ச யதா²க்கமம்;

ஆருப்பேஸுபி லப்³ப⁴ந்தி, தேஸமட்டா²ரஸேவ ச.

267. புது²ஜ்ஜனா ச சத்தாரோ, அபாயாஹேதுகாத³யோ;

அரியா சேவ அட்டா²தி, த்³வாத³ஸன்னம் வஸா ஸியும்.

268. ச²ப்³பி³தா⁴ சித்தகோட்டா²ஸா, ஏகபுக்³க³லிகா ததா²;

சதுபஞ்சச²ஸத்தட்ட²-புக்³க³லட்டா²தி சக்கமா.

269. ச²ப்³பீ³ஸ சுத்³த³ஸேவாத², தேரஸ த்³வே ச மானஸா;

த³ஸ ஸத்தாதி⁴கா சேவ, புன ஸத்தாதி⁴கா த³ஸாதி.

இதி சித்தவிபா⁴கே³ பூ⁴மிபுக்³க³லசித்தப்பவத்திகதா² நிட்டி²தா.

ச²ட்டோ² பரிச்சே²தோ³.