2. து³தியோ பரிச்சே²தோ³

லக்க²ணரஸுபட்டா²னவிபா⁴கோ³

67. ஸபா⁴வோ லக்க²ணம் நாம, கிச்சஸம்பஜ்ஜனா ரஸோ;

க³ய்ஹாகாரோ உபட்டா²னம், பத³ட்டா²னம் து பச்சயோ.

68. அத்துபலத்³தி⁴ஸங்கா²தா, ஸம்பத்தா ச பனத்த²தோ;

லக்க²ணரஸுபட்டா²னா, வோஹாராபோ⁴க³பே⁴தி³தா.

69. தேபஞ்ஞாஸஸபா⁴வேஸு, தஸ்மா பே⁴த³ம் யதா²ரஹம்;

லக்க²ணாதி³ப்பகாரேஹி, பவக்கா²மி இதோ பரம்.

70. சிந்தேதீதி ப⁴வே சித்தம், சிந்தனமத்தமேவ வா;

ஸம்பயுத்தாத² வா தேன, சிந்தேந்தீதி ச கோ³சரம்.

71. பு²ஸதீதி ப⁴வே ப²ஸ்ஸோ, பு²ஸனம் வாத² கேவலம்;

ஸம்பயுத்தாத² வா தேன, பு²ஸந்தீதி ச கோ³சரம்.

72. ஏவம் கத்தரி பா⁴வே ச, கரணே ச யதா²ரஹம்;

தேபஞ்ஞாஸஸபா⁴வேஸு, ஸத்³த³னிப்³ப³சனம் நயே.

73. ஆலம்ப³ணமனம் சித்தம், தம்விஜானனலக்க²ணம்;

ஸஹஜாதி⁴ட்டா²னரஸம், சிந்தாகப்போதி க³ய்ஹதி.

74. ஆலம்ப³ணஸமோதா⁴னோ,

ப²ஸ்ஸோ பு²ஸனலக்க²ணோ;

ஸங்க⁴ட்டனரஸோ தத்த²,

ஸன்னிபாதோதி க³ய்ஹதி.

75. வேத³னாலம்ப³ணரஸா, ஸா வேத³யிதலக்க²ணா;

கோ³சரானுப⁴வரஸா, அனுபு⁴த்தீதி க³ய்ஹதி.

76. ஆகாரக³ஹணம் ஸஞ்ஞா, ஸா ஸஞ்ஜானனலக்க²ணா;

நிமித்துப்பாத³னரஸா, உபலக்கா²தி க³ய்ஹதி.

77. சேதனா சித்தவிப்பா²ரா, ஸாயம் ப்³யாபாரலக்க²ணா;

கம்மந்தாயூஹனரஸா, ஸம்விதா⁴னந்தி க³ய்ஹதி.

78. ஏகக்³க³தா அவிக்கே²போ, ஸாவிஸாஹாரலக்க²ணா;

ஸம்பிண்ட³னரஸா சித்தம், ஸமோதா⁴னந்தி க³ய்ஹதி.

79. யாபனம் ஸஹஜாதான-மனுபாலனலக்க²ணம்;

ஜீவிதம் ஜீவனரஸம், ஆயுப³ந்தோ⁴தி க³ய்ஹதி.

80. ஸாரணா மனஸீகாரோ, ஸமன்னாஹாரலக்க²ணோ;

ஸம்யோஜனரஸோ சித்த-படிபத்தீதி க³ய்ஹதி.

81. ஸங்கப்பனலக்க²ணோ தக்கோ, ஸஹஜாபி⁴னிரோபனோ;

ஆலம்பா³ஹனனரஸோ, ஸன்னிருஜ்ஜோ²தி க³ய்ஹதி.

82. விசாரோ அனுஸந்தா⁴னோ, அனுமஜ்ஜனலக்க²ணோ;

சித்தானுயோஜனரஸோ, அனுபேக்கா²தி க³ய்ஹதி.

83. அதி⁴மோக்கோ² அஸம்ஸப்போ, ஸுஸன்னிட்டா²னலக்க²ணோ;

நிச்சலாபாத³னரஸோ, த³ள்ஹவுத்தீதி க³ய்ஹதி.

84. வீரியம் பன வாயாமோ, மஹுஸ்ஸாஹனலக்க²ணோ;

கிச்சாஸம்ஸீத³னரஸோ, உபத்த²ம்போ⁴தி க³ய்ஹதி.

85. ஆலம்ப³த்தி²கதா ச²ந்தோ³, கத்துகாமதலக்க²ணோ;

ஆலம்ப³ணேஸனரஸோ, ஹத்தா²தா³னந்தி க³ய்ஹதி.

86. ஸஹஜாதானுப²ரணா, ஸம்பியாயனலக்க²ணா;

ஸம்பீனனரஸா பீதி, பாமோஜ்ஜமிதி க³ய்ஹதி.

87. சேதோஸத்³த³ஹனம் ஸத்³தா⁴, பூ⁴தோகப்பனலக்க²ணா;

ஹிதபக்க²ந்த³னரஸா, அதி⁴முத்தீதி க³ய்ஹதி.

88. அஸம்மோஸா ஸபா⁴வேஸு, ஸதி தா⁴ரணலக்க²ணா;

த⁴ம்மாபிலாபனரஸா, அப்பமாதோ³தி க³ய்ஹதி.

89. ஹிரீ ஜேகு³ச்சா² பாபேஸு, ஸா ஹராயனலக்க²ணா;

ஹீளஸம்கோசனரஸா, பாபலஜ்ஜாதி க³ய்ஹதி.

90. பாபஸாரஜ்ஜமோத்தப்பம், உப்³பே³கு³த்தாஸலக்க²ணம்;

ப⁴யஸங்கோசனரஸம், அவிஸ்ஸாஸோதி க³ய்ஹதி.

91. அலோபோ⁴ அனபி⁴ஸங்கோ³, அபரிக்³க³ஹலக்க²ணோ;

முத்தப்பவத்தனரஸோ, அஸம்ஸக்³கோ³தி க³ய்ஹதி.

92. அதோ³ஸோ சித்தஸாக²ல்யம், அப்³யாபஜ்ஜனலக்க²ணோ;

ஸண்ஹப்பவத்தனரஸோ, ஸோம்மபா⁴வோதி க³ய்ஹதி.

93. அமோஹோ க²லிதாபா⁴வோ, படிவிஜ்ஜ²னலக்க²ணோ;

விஸயோபா⁴ஸனரஸோ, படிபோ³தோ⁴தி க³ய்ஹதி.

94. தத்ரமஜ்ஜ²த்ததோபேக்கா², ஸமீகரணலக்க²ணா;

அபக்க²பாதனரஸா, ஸமவாஹோதி க³ய்ஹதி.

95. பஸ்ஸத்³தி⁴ காயசித்தானம், த³ரதா²பா⁴வலக்க²ணா;

அபரிப்ப²ந்த³னரஸா, ஸீதிபா⁴வோதி க³ய்ஹதி.

96. லஹுதா காயசித்தானம், அத³ந்தா⁴காரலக்க²ணா;

அவித்தா²ரரஸா ஸல்லஹுகவுத்தீதி க³ய்ஹதி.

97. முது³தா காயசித்தானம், கக்க²ளாபா⁴வலக்க²ணா;

கிச்சாவிரோத⁴னரஸா, அனுகுல்யந்தி க³ய்ஹதி.

98. கம்மஞ்ஞதா உபி⁴ன்னம்பி, அலம்கிச்சஸ்ஸ லக்க²ணா;

பவத்திஸம்பத்திரஸா, யோக³பா⁴வோதி க³ய்ஹதி.

99. ததா² பாகு³ஞ்ஞதா த்³வின்னம், விஸதா³காரலக்க²ணா;

ஸுக²ப்பவத்தனரஸா, ஸேரிபா⁴வோதி க³ய்ஹதி.

100. உஜுதா காயசித்தானம், குடிலாபா⁴வலக்க²ணா;

ஜிம்ஹனிம்மத³னரஸா, உஜுவுத்தீதி க³ய்ஹதி.

101. ஸம்மாவாசா வசீஸுத்³தி⁴, வாசாஸம்யமலக்க²ணா;

மிச்சா²வாசோரமரஸா, வசீவேலாதி க³ய்ஹதி.

102. ஸம்மாகம்மம் க்ரியாஸுத்³த⁴ம், ஸம்மாகரணலக்க²ணம்;

மிச்சா²கம்மோரமரஸம், க்ரியாவேலாதி க³ய்ஹதி.

103. ஸம்மாஜீவோ விஸுத்³தே⁴ட்டி², அல்லிட்டா²ஜீவலக்க²ணோ;

மிச்சா²ஜீவோரமரஸோ, ஸம்மாவுத்தீதி க³ய்ஹதி.

104. கருணா தீ³னஸத்தேஸு, து³க்கா²பனயலக்க²ணா;

ஸோத்தி²தாபத்த²னரஸா, அனுகம்பாதி க³ய்ஹதி.

105. ஸுக²ட்டி²தேஸு முதி³தா, அனுமோத³னலக்க²ணா;

சேதோவிகாஸனரஸா, அவிரோதோ⁴தி க³ய்ஹதி.

106. சேதோஸாரஜ்ஜனா லோபோ⁴, அபரிச்சாக³லக்க²ணோ;

ஆலம்ப³கி³ஜ்ஜ²னரஸோ, அபி⁴லக்³கோ³தி க³ய்ஹதி.

107. சேதோப்³யாபஜ்ஜனம் தோ³ஸோ, ஸம்பது³ஸ்ஸனலக்க²ணோ;

ஆலம்ப³ணகா⁴தரஸோ, சண்டி³க்கமிதி க³ய்ஹதி.

108. சேதோஸம்முய்ஹனம் மோஹோ,

ஸோ ஸம்முய்ஹனலக்க²ணோ;

ஸபா⁴வச்சா²த³னரஸோ,

அந்த⁴பா⁴வோதி க³ய்ஹதி.

109. பாபாஜிகு³ச்சா²ஹிரிகம், நில்லஜ்ஜாகாரலக்க²ணம்;

பாபோபலாபனரஸம், மலக்³கா³ஹோதி க³ய்ஹதி.

110. அஸாரஜ்ஜனமனோத்தப்பமனுத்தாஸனலக்க²ணம்;

பாபபக்க²ந்த³னரஸம், பாக³ப்³ப⁴மிதி க³ய்ஹதி.

111. தி³ட்டி² த³ள்ஹவிபல்லாஸோ, ஸா பராமாஸலக்க²ணா;

துச்சா²பி⁴னிவேஸனரஸா, மிச்சா²கா³ஹோதி க³ய்ஹதி.

112. ‘‘அஹஸ்மீ’’தி மஞ்ஞமானோ, ஸோ ஸமுன்னதிலக்க²ணோ;

கேதுஸம்பக்³க³ஹரஸோ, அஹம்காரோதி க³ய்ஹதி.

113. பரஸம்பத்தீஸு இஸ்ஸா, அக்க²மாகாரலக்க²ணா;

சேதோவிகுசனரஸா, விமுக²த்தந்தி க³ய்ஹதி.

114. பரிக்³க³ஹேஸு மச்சே²ரம், ஸன்னிகூ³ஹனலக்க²ணம்;

ஸாமஞ்ஞாஸஹனரஸம், வேவிச்ச²மிதி க³ய்ஹதி.

115. சேதோபஹனனம் தீ²னம், தம் ஸம்ஸீத³னலக்க²ணம்;

உஸ்ஸாஹப⁴ஞ்ஜனரஸம், ஸம்கி²த்தத்தந்தி க³ய்ஹதி.

116. விகா⁴தோ ஸஹஜாதானம், மித்³த⁴ம் மோஹனலக்க²ணம்;

ஸத்திஸம்ப⁴ஞ்ஜனரஸம், ஆதுரத்தந்தி க³ய்ஹதி.

117. உத்³த⁴ச்சம் சித்தவிக்கே²போ, அவூபஸமலக்க²ணம்;

சேதோனவட்டா²னரஸம், ப⁴ந்தத்தமிதி க³ய்ஹதி.

118. விப்படிஸாரோ குக்குச்சமனுஸோசனலக்க²ணம்;

அத்தானுஸோசனரஸம், பச்சா²தாபோதி க³ய்ஹதி.

119. கங்கா²யனா விசிகிச்சா², அஸன்னிட்டா²னலக்க²ணா;

அனேககா³ஹனரஸா, அப்பதிட்டா²தி க³ய்ஹதி.

120. இச்சேவம் லக்க²ணாதீ³ஹி, விபா⁴வேய்ய விசக்க²ணோ;

தேபஞ்ஞாஸஸபா⁴வேஸு, ஸபா⁴வாகாரலக்க²ணம்.

121. லக்க²ணத்த²குஸலா ஸலக்க²ணே,

லக்க²ணத்த²பரமேபி கேவலம்;

லக்க²ணுக்³க³ஹஸுகா²ய வண்ணயும்,

லக்க²ணாதி³முக²தோ ஸலக்க²ணம்.

122. அத்த²ம் தமேவமனுக³ம்ம மயேத்த² வுத்த-

மத்தா²னமத்த²னயனத்த²மனேகதா⁴பி;

பத்தே²ய்ய மேத்த² வசனத்த²னயேஹி ஞாண-

மத்தே²ஸு பு³த்³த⁴வசனத்த²னயத்தி²கேஹி.

இதி நாமரூபபரிச்சே²தே³ லக்க²ணரஸுபட்டா²னவிபா⁴கோ³ நாம

து³தியோ பரிச்சே²தோ³.