24. சதுவீஸதிமோ பரிச்சே²தோ³

பச்சயனித்³தே³ஸோ

1395. யேஸம் பச்சயத⁴ம்மானம், வஸா ஸப்பச்சயா இமே;

த⁴ம்மா தே பச்சயே சாஹம், த³ஸ்ஸயிஸ்ஸாமிதோ பரம்.

கதமே பச்சயாதி? வுச்சதே – ஹேதாரம்மணாதி⁴பதிஅனந்தரஸமனந்தரஸஹஜாத- அஞ்ஞமஞ்ஞனிஸ்ஸயூபனிஸ்ஸயபுரேஜாதபச்சா²ஜாதாஸேவனகம்மவிபாகாஹாரிந்த்³ரிய- ஜா²னமக்³க³ஸம்பயுத்தவிப்பயுத்தஅத்தி²னத்தி²விக³தாவிக³தவஸேன சதுவீஸதிவிதா⁴ ஹோந்தி.

தத்த² ஹேதுபச்சயோதி லோபோ⁴ தோ³ஸோ மோஹோ அலோபோ⁴ அதோ³ஸோ அமோஹோதி இமே ச² த⁴ம்மா ஹேதுபச்சயா. ஆரம்மணபச்சயோதி ஸப்³ப³லோகியலோகுத்தரம் யம் யம் த⁴ம்மம் ஆரப்³ப⁴ யே யே த⁴ம்மா உப்பஜ்ஜந்தி சித்தசேதஸிகா த⁴ம்மா, தே தே த⁴ம்மா தேஸம் தேஸம் த⁴ம்மானம் ஆரம்மணபச்சயேன பச்சயோ.

அதி⁴பதிபச்சயோதி ஏத்த² ஸஹஜாதாதி⁴பதிஆரம்மணாதி⁴பதிவஸேன து³விதோ⁴. தத்த² ஸஹஜாதாதி⁴பதி ச²ந்த³சித்தவீரியவீமம்ஸாவஸேன சதுப்³பி³தோ⁴, ஆரம்மணாதி⁴பதி பன தோ³மனஸ்ஸவிசிகிச்சு²த்³த⁴ச்சகிரியாப்³யாகதாகுஸலவிபாகே ச அனிட்ட²ஸம்மதஞ்ச ரூபம் ட²பேத்வா அவஸேஸம். அனந்தரபச்சயோதி அனந்தரனிருத்³தா⁴ சித்தசேதஸிகா த⁴ம்மா. ததா² ஸமனந்தரபச்சயோபி.

ஸஹஜாதபச்சயோதி சித்தசேதஸிகா, மஹாபூ⁴தா சேவ ஹத³யவத்து² ச. ததா² அஞ்ஞமஞ்ஞபச்சயோபி. நிஸ்ஸயபச்சயோதி வத்து²ரூபானி சேவ மஹாபூ⁴தா, சித்தசேதஸிகா ச. உபனிஸ்ஸயபச்சயோதி ஆரம்மணானந்தரபகதூபனிஸ்ஸயவஸேன திவிதோ⁴. தத்த² ஆரம்மணூபனிஸ்ஸயோ ஆரம்மணாதி⁴பதியேவ, அனந்தரூபனிஸ்ஸயோ பன அனந்தரபச்சயோவ, பகதூபனிஸ்ஸயோ பன காயிகஸுக²து³க்க²உதுபோ⁴ஜனஸேனாஸனபுக்³க³லா ஸத்³தா⁴ஸீலஸுதசாக³பஞ்ஞாராக³தோ³ஸமோஹாத³யோ ச.

புரேஜாதபச்சயோதி வத்தா²ரம்மணவஸேன து³விதோ⁴. தத்த² வத்து²புரேஜாதோ நாம வத்து²ரூபானி, ஆரம்மணபுரேஜாதோ நாம பச்சுப்பன்னரூபாதீ³னேவ. பச்சா²ஜாதபச்சயோதி சித்தசேதஸிகா ச. ஆஸேவனபச்சயோதி ட²பேத்வா ஆவஜ்ஜனத்³வயம் லோகியகுஸலாகுஸலகிரியாப்³யாகதா த⁴ம்மாவ.

கம்மபச்சயோதி ஸஹஜாதனானக்க²ணிகவஸேன து³விதோ⁴. தத்த² ஸஹஜாதா லோகியலோகுத்தரா ஏவ, நானக்க²ணிகா பன ஸாஸவகுஸலாகுஸலசேதனா, அனாஸவகுஸலசேதனா அனந்தரமேவ அத்தனோ விபாகஸ்ஸ பச்சயோ ஹோதி. விபாகபச்சயோதி விபாகசித்தசேதஸிகா. ஆஹாரபச்சயோதி கப³ளீகாராஹாரப²ஸ்ஸசேதனாவிஞ்ஞாணவஸேன சதுப்³பி³தோ⁴.

இந்த்³ரியபச்சயோதி ரூபஸத்தகமனஜீவிதஸுக²து³க்க²ஸோமனஸ்ஸதோ³மனஸ்ஸஉபேக்கா²ஸத்³தா⁴வீரிய- ஸதிஸமாதி⁴பஞ்ஞாஅனஞ்ஞாதஞ்ஞஸ்ஸாமீதிந்த்³ரியஅஞ்ஞிந்த்³ரியஅஞ்ஞதாவிந்த்³ரியானீதி வீஸதிந்த்³ரியானி, தேஸு இத்தி²ந்த்³ரியபுரிஸிந்த்³ரியானி வஜ்ஜேத்வா வீஸதிந்த்³ரியானி ஹோந்தி. ஜா²னபச்சயோதி விதக்கவிசாரபீதிஸுக²சித்தேகக்³க³தாவஸேன பஞ்சவிதோ⁴. மக்³க³பச்சயோதி தி³ட்டி²ஸங்கப்பவாயாமஸதிஸமாதி⁴வாசாகம்மந்தாஜீவமிச்சா²தி³ட்டி²வஸேன நவவிதோ⁴.

ஸம்பயுத்தபச்சயோதி சித்தசேதஸிகாவ. விப்பயுத்தபச்சயோதி வத்து²புரேஜாதானி சேவ பச்சா²ஜாதா சித்தசேதஸிகா ச. அத்தி²பச்சயோதி ஜீவிதிந்த்³ரியகப³ளீகாரஆஹாரஆரம்மணபுரேஜாதானி சேவ நிஸ்ஸயபச்சயே வுத்தத⁴ம்மாபி ச. நத்தி²பச்சயோதி அனந்தரபச்சயோவ. ததா² விக³தபச்சயோ ச. அவிக³தபச்சயோதி அத்தி²பச்சயோவ. ஏவமிமே சதுவீஸதி பச்சயா நாம.

ஏத்த² பன கதிஹாகாரேஹி ரூபம் ரூபஸ்ஸ பச்சயோ ஹோதீதி? யதா²ரஹம் ஸஹஜாதஅஞ்ஞமஞ்ஞனிஸ்ஸயாஹாரிந்த்³ரியஅத்தி²அவிக³தவஸேன ஸத்ததா⁴ பச்சயோ ஹோதி.

ரூபம் அரூபஸ்ஸ யதா²ரஹம் ஆரம்மணாதி⁴பதிஸஹஜாதஅஞ்ஞமஞ்ஞனிஸ்ஸயூபனிஸ்ஸயபுரேஜாதிந்த்³ரியவிப்ப- யுத்தஅத்தி²அவிக³தவஸேன ஏகாத³ஸஹி ஆகாரேஹி பச்சயோ ஹோதி.

ரூபம் ரூபாரூபஸ்ஸாதி நத்தி².

1396. ஸத்ததா⁴ ரூபம் ரூபஸ்ஸ, ப⁴வதேகாத³ஸேஹி தம்;

பச்சயோ நாமத⁴ம்மஸ்ஸ, மிஸ்ஸகஸ்ஸ ந கிஞ்சி து.

அரூபம் அரூபஸ்ஸ யதா²ரஹம் ஹேதாரம்மணாதி⁴பதிஅனந்தரஸமனந்தரஸஹஜாதஅஞ்ஞமஞ்ஞனிஸ்ஸயூபனிஸ்ஸயா- ஸேவனகம்மவிபாகாஹாரிந்த்³ரியஜா²னமக்³க³ஸம்பயுத்தஅத்தி²னத்தி²விக³தாவிக³த- வஸேன ஏகவீஸதிதா⁴ பச்சயோ ஹோதி.

அரூபம் ரூபஸ்ஸ யதா²ரஹம் ஹேதாதி⁴பதிஸஹஜாதஅஞ்ஞமஞ்ஞனிஸ்ஸயபச்சா²ஜாதகம்மவிபாகாஹாரிந்த்³ரிய- ஜா²னமக்³க³விப்பயுத்தஅத்தி²அவிக³தவஸேன பன்னரஸதா⁴ பச்சயோ ஹோதி.

அரூபம் ரூபாரூபஸ்ஸ யதா²ரஹம் ஹேதாதி⁴பதிஸஹஜாதஅஞ்ஞமஞ்ஞனிஸ்ஸயகம்மவிபாகாஹாரிந்த்³ரியஜா²னமக்³க³- அத்தி²அவிக³தவஸேன தேரஸதா⁴ பச்சயோ ஹோதி.

1397. ஏகவீஸதிதா⁴ நாமம், பச்சயோ ப⁴வதத்தனோ;

திபஞ்சஹி தம் ரூபஸ்ஸ, உபி⁴ன்னம் தேரஸதா⁴ பன.

ரூபாரூபம் ரூபஸ்ஸ யதா²ரஹம் ஸஹஜாதனிஸ்ஸயஅத்தி²அவிக³தவஸேன சதுதா⁴ பச்சயோ ஹோதி.

ரூபாரூபம் அரூபஸ்ஸ யதா²ரஹம் ஸஹஜாதஅஞ்ஞமஞ்ஞனிஸ்ஸயிந்த்³ரியஅத்தி²அவிக³தவஸேன ச²தா⁴ பச்சயோ ஹோதி.

ரூபாரூபம் ரூபஸ்ஸாதி நத்தி².

1398. உபோ⁴பி ரூபத⁴ம்மஸ்ஸ, சதுதா⁴ ஹோந்தி பச்சயா;

ச²ப்³பி³தா⁴ நாமத⁴ம்மஸ்ஸ, மிஸ்ஸகஸ்ஸ ந கிஞ்சி து.

ஏதேஸு பன பச்சயேஸு கதி ரூபா, கதி அரூபா, கதிமிஸ்ஸகாதி? புரேஜாதபச்சயோ ஏகோ ரூபத⁴ம்மோவ, ஹேதுஅனந்தரஸமனந்தரபச்சா²ஜாதாஸேவனகம்மவிபாகஜா²னமக்³க³ஸம்பயுத்தனத்தி²- விக³தானம் வஸேன த்³வாத³ஸ பச்சயா அரூபத⁴ம்மாவ, ஸேஸா பன ஏகாத³ஸ பச்சயா ரூபாரூபமிஸ்ஸகாதி வேதி³தப்³பா³.

புன காலவஸேன ஹேதுஸஹஜாதஅஞ்ஞமஞ்ஞனிஸ்ஸயபுரேஜாதபச்சா²ஜாதவிபாகாஹாரிந்த்³ரியஜா²னமக்³க³- ஸம்பயுத்தவிப்பயுத்தஅத்தி²அவிக³தானம் வஸேன பன்னரஸ பச்சயா பச்சுப்பன்னாவ ஹோந்தி. அனந்தரஸமனந்தராஸேவனனத்தி²விக³தபச்சயா அதீதாவ, கம்மபச்சயோ அதீதோ வா ஹோதி பச்சுப்பன்னோ வா, ஆரம்மணாதி⁴பதிஉபனிஸ்ஸயபச்சயா பன திகாலிகா ஹோந்தி காலவினிமுத்தா ச.

1399. பச்சுப்பன்னாவ ஹோந்தேத்த²,

பச்சயா த³ஸ பஞ்ச ச;

அதீதா ஏவ பஞ்சேகோ,

த்³வேகாலிகோவ த³ஸ்ஸிதோ;

தயோ திகாலிகா சேவ,

வினிமுத்தாபி காலதோ.

ஸப்³பே³ பனிமே சதுவீஸதி பச்சயா யதா²ரஹம் ஆரம்மணூபனிஸ்ஸயகம்மஅத்தி²பச்சயானம் வஸேன சதூஸு பச்சயேஸு ஸங்க³ஹம் க³ச்ச²ந்தீதி வேதி³தப்³பா³.

இதி அபி⁴த⁴ம்மாவதாரே பச்சயனித்³தே³ஸோ நாம

சதுவீஸதிமோ பரிச்சே²தோ³.

நிக³மனகதா²

1400. அபி⁴த⁴ம்மாவதாரோயம், வரோ பரமக³ம்பீ⁴ரோ;

இச்ச²தா நிபுணம் பு³த்³தி⁴ம், பி⁴க்கு²னா பன ஸோதப்³போ³.

1401. ஸுமதிமதிவிசாரபோ³த⁴னோ,

விமதிவிமோஹவினாஸனோ அயம்;

குமதிமதிமஹாதமோனாஸோ,

படுமதிபா⁴ஸகரோ மதோ மயா.

1402. யதோ ஸுமதிநா மதோ நாமதோ,

ஆயாசிதஸம்மானதோ மானதோ;

ததோ ஹி ரசிதோ ஸதா³ தோஸதா³,

மயா ஹிதவிபா⁴வனா பா⁴வனா.

1403. அத்த²தோ க³ந்த²தோ சாபி, யுத்திதோ சாபி ஏத்த² ச;

அயுத்தம் வா விருத்³த⁴ம் வா, யதி³ தி³ஸ்ஸதி கிஞ்சிபி.

1404. புப்³பா³பரம் விலோகேத்வா, விசாரேத்வா புனப்புனம்;

தீ⁴மதா ஸங்க³ஹேதப்³ப³ம், க³ஹேதப்³ப³ம் ந தோ³ஸதோ.

1405. திவிதா⁴ ப்³யப்பதா²னஞ்ஹி, க³தியோ து³ப்³பி³தா⁴பி சே;

தஸ்மா உபபரிக்கி²த்வா, வேதி³தப்³ப³ம் விபா⁴வினா.

1406. நிகாயந்தரலத்³தீ⁴ஹி, அஸம்மிஸ்ஸோ அனாகுலோ;

மஹாவிஹாரவாஸீனம், வாசனாமக்³க³னிஸ்ஸிதோ.

1407. மது⁴ரக்க²ரஸம்யுத்தோ, அத்தோ² யஸ்மா பகாஸிதோ;

தஸ்மா ஹிதத்த²காமேன, காதப்³போ³ ஏத்த² ஆத³ரோ.

1408. ஸத்³த⁴ம்மட்டி²திகாமேன, கரோந்தேன ச யம் மயா;

புஞ்ஞமதி⁴க³தம் தேன, ஸுக²ம் பப்போந்து பாணினோ.

1409. அந்தராயம் வினா சாயம், யதா²ஸித்³தி⁴முபாக³தோ;

ததா² கல்யாணஸங்கப்பா, ஸித்³தி⁴ம் க³ச்ச²ந்து பாணினம்.

1410. நரனாரிக³ணாகிண்ணே, அஸம்கிண்ணகுலாகுலே;

பீ²தே ஸப்³ப³ங்க³ஸம்பன்னே, ஸுபஸன்னஸிதோத³கே.

1411. நானாரதனஸம்புண்ணே, விவிதா⁴பணஸங்கடே;

காவேரபட்டனே ரம்மே, நானாராமோபஸோபி⁴தே.

1412. கேலாஸஸிக²ராகாரபாஸாத³படிமண்டி³தே;

காரிதே கண்ஹதா³ஸேன, த³ஸ்ஸனீயே மனோரமே.

1413. விஹாரே விவிதா⁴காரசாருபாகாரகோ³புரே;

தத்த² பாசீனபாஸாதே³, மயா நிவஸதா ஸதா³.

1414. அஸல்லேக²மஸாக²ல்யே, ஸீலாதி³கு³ணஸோபி⁴னா;

அயம் ஸுமதிநா ஸாது⁴, யாசிதேன கதோ ஸதா.

1415. தே³வா காலேன வஸ்ஸந்து, வஸ்ஸம் வஸ்ஸவலாஹகா;

பாலயந்து மஹீபாலா, த⁴ம்மதோ ஸகலம் மஹிம்.

1416. யாவ திட்ட²தி லோகஸ்மிம், ஹிமவா பப்³ப³துத்தமோ;

தாவ திட்ட²து ஸத்³த⁴ம்மோ, த⁴ம்மராஜஸ்ஸ ஸத்து²னோதி.

உரக³புரநிவஸனேன ஆசரியேன ப⁴த³ந்தபு³த்³த⁴த³த்தேன ஸீலாசாரஸம்பன்னேன கதோ அபி⁴த⁴ம்மாவதாரோ நாமாயம்.

அபி⁴த⁴ம்மாவதாரோ நிட்டி²தோ.

நமோ தஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ

நாமரூபபரிச்சே²தோ³

க³ந்தா²ரம்ப⁴கதா²

1. ஸம்மா ஸம்மாபி⁴ஸம்பு³த்³த⁴ம், த⁴ம்மம் த⁴ம்மப்பகாஸனம்;

ஸம்க⁴ம் ஸம்கு⁴த்தமம் லோகே, வந்தி³த்வா வந்த³னாரஹம்.

2. நாமரூபபரிச்சே²த³ம், பவக்கா²மி ஸமாஸதோ;

மஹாவிஹாரவாஸீனம், வண்ணனானயனிஸ்ஸிதம்.