21. ஏகவீஸதிமோ பரிச்சே²தோ³
படிபதா³ஞாணத³ஸ்ஸனவிஸுத்³தி⁴னித்³தே³ஸோ
1298. அட்ட²ஞாணவஸேனேவ, ஸிகா²பக்கா விபஸ்ஸனா;
நவமம் படிபதா³ஞாண-த³ஸ்ஸனந்தி பவுச்சதி.
1299. அட்ட² ஞாணானி நாமேத்த², வேதி³தப்³பா³னி விஞ்ஞுனா;
உபக்லேஸவினிமுத்தம், ஞாணம் ஸுவிஸத³ம் பன.
1300. உத³யப்³ப³யே ச ப⁴ங்கே³ ச, ப⁴யே ஆதீ³னவே ததா²;
நிப்³பி³தா³பஸ்ஸனாஞாணம், ஞாணம் முச்சிதுகம்யதா.
1301. படிஸங்கா² ச ஸங்கா²ரே, உபேக்கா²ஞாணமட்ட²மம்;
இமானி அட்ட² ஞாணானி, நவமம் ஸச்சானுலோமகம்.
1302. ஸச்சானுலோமஞாணந்தி, அனுலோமம் பவுச்சதி;
தம் ஸம்பாதே³துகாமேன, யோகா³வசரபி⁴க்கு²னா.
1303. உத³யப்³ப³யஞாணம் தம், ஆதி³ம் கத்வா பனட்ட²ஸு;
ஏதேஸு பன ஞாணேஸு, யோகோ³ கரணியோ பன.
1304. யதா²னுக்கமதோ தஸ்ஸ, தேஸு ஞாணேஸு அட்ட²ஸு;
அனிச்சாதி³வஸேனேவ, யோக³ம் கத்வா டி²தஸ்ஸ ஹி.
1305. அனிச்சம் து³க்க²மனத்தாதி, ஸங்கா²ரே அனுபஸ்ஸதோ;
அட்ட²ன்னம் பன ஞாணானம், வஸேன பன யோகி³னோ.
1306. விபஸ்ஸனா ஸிகா²பத்தா, ஹோதி வுட்டா²னகா³மினீ;
ஸச்சானுலோமஞாணந்தி, அயமேவ பவுச்சதி.
1307. ஸங்கா²ருபேக்கா²ஞாணம் தம், ஆஸேவந்தஸ்ஸ யோகி³னோ;
இதா³னி தஸ்ஸ மக்³கோ³ ச, ஸமுப்பஜ்ஜிஸ்ஸதீதி ஹி.
1308. ஸங்கா²ருபேக்கா² ஸங்கா²ரே, அனிச்சா து³க்கா²தி வா ததா²;
ஸம்மஸித்வா ப⁴வங்க³ம் து, புன வோதரதேவ ஸா.
1309. ப⁴வங்கா³னந்தரம் ஸங்கா²ரு-பேக்கா²க³தனயேன து;
அனிச்சாதி³வஸேனேவ, ஸங்கா²ரே பன கோ³சரம்.
1310. குருமானம் மனோத்³வாரே, ஜாயதாவஜ்ஜனம் ததோ;
ப⁴வங்கா³வட்டனம் கத்வா, ஜாதஸ்ஸானந்தரம் பன.
1311. ஸங்கா²ரே கோ³சரம் கத்வா, பட²மம் ஜவனமானஸம்;
உப்பஜ்ஜதீதி தம் சித்தம், பரிகம்மந்தி வுச்சதி.
1312. தத³னந்தரமேவஞ்ஞம், ஸங்கா²ராரம்மணம் புன;
து³தியம் ஜவனம் ஹோதி, உபசாரந்தி தம் மதம்.
1313. தத³னந்தரம் தம் ஹோதி, ததா² ஸங்கா²ரகோ³சரம்;
ததியம் ஜவனசித்தம், அனுலோமந்தி ஸஞ்ஞிதம்.
1314. புரிமானம் பனட்ட²ன்னம், ஞாணானம் அனுலோமதோ;
போ³தி⁴பக்கி²யத⁴ம்மானம், உத்³த⁴ஞ்ச அனுலோமதோ.
1315. தேனேவ தம் ஹி ஸச்சானுலோமஞாணம் பவுச்சதி;
இத³ம் ஹி பன ஸச்சானு-லோமஞாணம் மஹேஸினா.
1316. ‘‘வுட்டா²னகா³மினீயா ஹி, பரியோஸான’’ந்தி பா⁴ஸிதம்;
ஞேய்யம் ஸப்³ப³பகாரேன, பரியோஸானந்தி கோ³த்ரபு⁴.
1317. இதினேகேஹி நாமேஹி, கித்திதாயா மஹேஸினா;
வுட்டா²னகா³மினீ ஸந்தா, பரிஸுத்³தா⁴ விபஸ்ஸனா.
1318. வுட்டா²துகாமோ ஸம்ஸாரது³க்க²பங்கா மஹப்³ப⁴யா;
கரேய்ய ஸததம் தத்த², யோக³ம் பண்டி³தஜாதிகோ.
இதி அபி⁴த⁴ம்மாவதாரே படிபதா³ஞாணத³ஸ்ஸனவிஸுத்³தி⁴னித்³தே³ஸோ நாம
ஏகவீஸதிமோ பரிச்சே²தோ³.