17. ஸத்தரஸமோ பரிச்சே²தோ³

அபி⁴ஞ்ஞாரம்மணனித்³தே³ஸோ

1104. அனாக³தம்ஸஞாணஞ்ச, யதா²கம்முபக³ம்பி ச;

பஞ்ச இத்³தி⁴விதா⁴தீ³னி, ஸத்தாபி⁴ஞ்ஞா இமா பன.

1105. ஏதாஸம் பன ஸத்தன்னம், அபி⁴ஞ்ஞானமிதோ பரம்;

பவக்கா²மி ஸமாஸேன, ஆரம்மணவினிச்ச²யம்.

1106. ஆரம்மணத்திகா வுத்தா, யே சத்தாரோ மஹேஸினா;

ஸத்தன்னமேத்த² ஞாணானம், ஸம்பவத்திம் ஸுணாத² மே.

1107. தத்த² இத்³தி⁴வித⁴ஞாணம், பரித்தாதீ³ஸு ஸத்தஸு;

ஆரம்மணவிபா⁴கே³ஸு, பவத்ததி கத²ம் பன.

1108. காயேனாதி³ஸ்ஸமானேன, க³ந்துகாமோ யதா³ப⁴வே;

சித்தஸன்னிஸ்ஸிதம் கத்வா, காயம் சித்தவஸேன தம்.

1109. மஹக்³க³தே ச சித்தஸ்மிம், ஸமாரோபேதி ஸோ ததா³;

காயாரம்மணதோ ஞாணம், பரித்தாரம்மணம் ஸியா.

1110. தி³ஸ்ஸமானேன காயேன, க³ந்துகாமோ யதா³ ப⁴வே;

காயஸன்னிஸ்ஸிதம் கத்வா, சித்தம் காயவஸேன தம்.

1111. பாத³கஜ்ஜா²னசித்தம் தம், காயே ரோபேதி ஸோ ததா³;

ஜா²னாரம்மணதோ ஞாணம், தம் மஹக்³க³தகோ³சரம்.

1112. அனாக³தமதீதஞ்ச, கரோதி விஸயம் யதா³;

அதீதாரம்மணம் ஹோதி, ததா³னாக³தகோ³சரம்.

1113. காயேன தி³ஸ்ஸமானேன, க³மனே பன பி⁴க்கு²னோ;

பச்சுப்பன்னோ ப⁴வே தஸ்ஸ, கோ³சரோதி வினித்³தி³ஸே.

1114. காயம் சித்தவஸேனாபி, சித்தம் காயவஸேன வா;

பரிணாமனகாலஸ்மிம், அஜ்ஜ²த்தாரம்மணம் ஸியா.

1115. ப³ஹித்³தா⁴ரம்மணம் ஹோதி, ப³ஹித்³தா⁴ரூபத³ஸ்ஸனே;

ஏவமித்³தி⁴வித⁴ம் ஞாணம், ஸம்பவத்ததி ஸத்தஸு.

1116. பச்சுப்பன்னே பரித்தே ச, ப³ஹித்³த⁴ஜ்ஜ²த்திகேஸுபி;

சதூஸ்வேதேஸு த⁴ம்மேஸு, தி³ப்³ப³ஸோதம் பவத்ததி.

1117. பச்சுப்பன்னோ பரித்தோ ச, ஸத்³தோ³ ஆரம்மணம் யதோ;

பரித்தாரம்மணம் பச்சு-ப்பன்னாரம்மணதம் க³தம்.

1118. அத்தனோ குச்சி²ஸத்³த³ஸ்ஸ, ஸவனேபி பரஸ்ஸ ச;

அஜ்ஜ²த்தாரம்மணஞ்சேவ, ப³ஹித்³தா⁴ரம்மணம்பி ச.

1119. சேதோபரியஞாணம்பி, பரித்தாதீ³ஸு அட்ட²ஸு;

ஆரம்மணவிபா⁴கே³ஸு, பவத்ததி கத²ம் பன.

1120. பரித்தாரம்மணம் ஹோதி, பரித்தானம் பஜானனே;

ஜானனே மஜ்ஜி²மானம் து, தம் மஹக்³க³தகோ³சரம்.

1121. ஜானனே பன மக்³க³ஸ்ஸ, ப²லஸ்ஸாபி பஜானனே;

ததா³ பனஸ்ஸ ஞாணஸ்ஸ, அப்பமாணோவ கோ³சரோ.

1122. தம் மக்³கா³ரம்மணம் ஹோதி, மக்³க³சித்தஸ்ஸ ஜானனே;

பரியாயேனேவேதஸ்ஸ, மக்³கா³ரம்மணதா மதா.

1123. அதீதே ஸத்ததி³வஸ-ப்³ப⁴ந்தரே ச யதா³ பன;

அனாக³தே ததா² ஸத்த-தி³வஸப்³ப⁴ந்தரேபி ச.

1124. பரேஸம் பன சித்தஸ்ஸ, ஜானனே ஸமுதீ³ரிதம்;

அதீதாரம்மணஞ்சேவ, ததா³னாக³தகோ³சரம்.

1125. கத²ஞ்ச பன தம் பச்சுப்பன்னகோ³சரதம் க³தம்;

பச்சுப்பன்னம் திதா⁴ வுத்தம், க²ணஸந்ததிஅத்³த⁴தோ.

1126. தத்த² திக்க²ணஸம்பத்தம், பச்சுப்பன்னக²ணாதி³கம்;

ஏகத்³வேஸந்ததிவாரபரியாபன்னமித³ம் பன.

1127. ஸந்ததிபச்சுப்பன்னந்தி, ஆஹு ஸந்ததிகோவிதா³;

ஏகப்³ப⁴வபரிச்சி²ன்னம், பச்சுப்பன்னந்தி பச்சி²மம்.

1128. க²ணாதி³கத்தயம் பச்சு-ப்பன்னம் தமாஹு கேசித⁴;

சேதோபரியஞாணஸ்ஸ, ஹோதி ஆரம்மணம் இதி.

1129. யதா² ச புப்ப²முட்டி²ம்ஹி, உக்கி²த்தே க³க³னே பன;

அவஸ்ஸம் ஏகமேகஸ்ஸ, வண்டம் வண்டேன விஜ்ஜ²தி.

1130. ஏவம் மஹாஜனஸ்ஸாபி, சித்தே ஆவஜ்ஜிதே பன;

ஏகஸ்ஸ சித்தமேகேன, அவஸ்ஸம் பன விஜ்ஜ²தி.

1131. யேனாவஜ்ஜதி சித்தேன, யேன ஜானாதி சேதஸா;

தேஸம் த்³வின்னம் ஸஹட்டா²னா-பா⁴வதோ தம் ந யுஜ்ஜதி.

1132. ஜவனாவஜ்ஜனானம் து, நானாரம்மணபத்திதோ;

அனிட்டே² பன ஹி டா²னே, அயுத்தந்தி பகாஸிதம்.

1133. தஸ்மா ஸந்ததிஅத்³தா⁴ன-பச்சுப்பன்னானமேவ து;

வஸேன பச்சுப்பன்னம் தம், ஹோதி ஆரம்மணம் இத³ம்.

1134. பச்சுப்பன்னம்பி அத்³தா⁴க்²யம், இத³ம் ஜவனவாரதோ;

தீ³பேதப்³ப³ந்தி நித்³தி³ட்ட²ம், தத்ராயம் தீ³பனானயோ.

1135. யதா³ பரஸ்ஸ சித்தஞ்ஹி, ஞாதுமாவஜ்ஜதித்³தி⁴மா;

ஆவஜ்ஜனமனோ தஸ்ஸ, பச்சுப்பன்னக²ணவ்ஹயம்.

1136. ஆரம்மணம் ததா³ கத்வா, தேன ஸத்³தி⁴ம் நிருஜ்ஜ²தி;

ஜவனானி ஹி ஜாயந்தே, தஸ்ஸ சத்தாரி பஞ்ச வா.

1137. ஏதேஸம் பச்சி²மம் சித்தம், இத்³தி⁴சித்தமுதீ³ரிதம்;

காமாவசரசித்தானி, ஸேஸானீதி வினித்³தி³ஸே.

1138. ஏதேஸம் பன ஸப்³பே³ஸம், நிருத்³த⁴ம் து ததே³வ ச;

சித்தம் ஆரம்மணம் ஹோதி, தஸ்மா ஸப்³பா³னி தானிபி.

1139. ஏகாரம்மணதம் யந்தி, ந நானாரம்மணானி ஹி;

அத்³தா⁴வஸா ப⁴வே பச்சு-ப்பன்னாரம்மணதோ பன.

1140. ஏகாரம்மணபா⁴வேபி, இத்³தி⁴மானஸமேவ ச;

பரஸ்ஸ சித்தம் ஜானாதி, நேதரானி யதா² பன.

1141. சக்கு²த்³வாரே து விஞ்ஞாணம், ரூபம் பஸ்ஸதி நேதரம்;

ஏவமேவ ச தம் இத்³தி⁴-சித்தமேவ ச ஜானாதி.

1142. பரசித்தாரம்மணத்தா, ப³ஹித்³தா⁴ரம்மணம் ஸியா;

சேதோபரியஞாணம்பி, அட்ட²ஸ்வேவ பவத்ததி.

1143. புப்³பே³னிவாஸஞாணம்பி, பரித்தாதீ³ஸு அட்ட²ஸு;

ஆரம்மணவிபா⁴கே³ஸு, பவத்ததி கத²ம் பன.

1144. காமாவசரக²ந்தா⁴னம், ஸமனுஸ்ஸரணே பன;

பரித்தாரம்மணம்யேவ, ஹோதீதி பரிதீ³பயே.

1145. ரூபாவசரிகாருப்பக²ந்தா⁴னுஸ்ஸரணே பன;

ப⁴வதீதி ஹி ஞாதப்³ப³ம், தம் மஹக்³க³தகோ³சரம்.

1146. அதீதே அத்தனா மக்³க³ம், பா⁴விதம் து ப²லம்பி வா;

ஸமனுஸ்ஸரதோ ஏவ-ப்பமாணாரம்மணம் ஸியா.

1147. ஸமனுஸ்ஸரதோ மக்³க³ம், மக்³கா³ரம்மணமேவ தம்;

அதீதாரம்மணம்யேவ, ஹோதி ஏகந்ததோ இத³ம்.

1148. சேதோபரியஞாணம்பி, யதா²கம்முபக³ம்பி ச;

அதீதாரம்மணா ஹோந்தி, கிஞ்சாபி அத² கோ² பன.

1149. சேதோபரியஞாணஸ்ஸ, ஸத்தத்³தி³வஸப்³ப⁴ந்தரம்;

அதீதம் சித்தமேவஸ்ஸ, ஆரம்மணமுதீ³ரிதம்.

1150. அதீதே சேதனாமத்தம், யதா²கம்முபக³ஸ்ஸபி;

புப்³பே³னிவாஸஞாணஸ்ஸ, நத்தி² கிஞ்சி அகோ³சரம்.

1151. அஜ்ஜ²த்தாரம்மணம் அத்த-க²ந்தா⁴னுஸ்ஸரணே ஸியா;

ப³ஹித்³தா⁴ரம்மணம் அஞ்ஞ-க²ந்தா⁴னுஸ்ஸரணே ப⁴வே.

1152. ஸரணே நாமகோ³த்தஸ்ஸ, தம் நவத்தப்³ப³கோ³சரம்;

புப்³பே³னிவாஸஞாணம்பி, அட்ட²ஸ்வேவ பவத்ததி.

1153. பச்சுப்பன்னே பரித்தே ச, ப³ஹித்³த⁴ஜ்ஜ²த்திகேஸுபி;

சதூஸ்வேதேஸு த⁴ம்மேஸு, தி³ப்³ப³சக்கு² பவத்ததி.

1154. தி³ப்³ப³ஸோதஸமம் தி³ப்³ப³-சக்கு²ஆரம்மணக்கமே;

ரூபம் ஸத்³தோ³தி த்³வின்னம் து, அயமேவ விஸேஸதா.

1155. அனாக³தம்ஸஞாணம்பி, பரித்தாதீ³ஸு அட்ட²ஸு;

ஆரம்மணவிபா⁴கே³ஸு, பவத்ததி கத²ம் பன.

1156. நிப்³ப³த்திஸ்ஸதி யம் காமா-வசரேதி பஜானதோ;

பரித்தாரம்மணம் ஹோதி, ரூபாரூபேஸ்வனாக³தே.

1157. நிப்³ப³த்திஸ்ஸதி யஞ்சாபி, ஸியா மஹக்³க³தகோ³சரம்;

பா⁴வேஸ்ஸதி அயம் மக்³க³ம், ப²லம் ஸச்சி²கரிஸ்ஸதி.

1158. ஏவம் பஜானனே அப்ப-மாணாரம்மணதம் ப⁴வே;

மக்³க³ம் பா⁴வேஸ்ஸதிச்சேவ, ஜானனே மக்³க³கோ³சரம்.

1159. ஏகந்தேன இத³ம் ஞாணம், ஹோதானாக³தகோ³சரம்;

சேதோபரியம் து கிஞ்சாபி, ஹோதானாக³தகோ³சரம்.

1160. அத² கோ² பன தம் ஸத்த-தி³வஸப்³ப⁴ந்தரம் பன;

சித்தமேவ ச ஜானாதி, ந ஹி தம் அஞ்ஞகோ³சரம்.

1161. அனாக³தம்ஸஞாணஸ்ஸ, அனாக³தம்ஸகோ³சரம்;

‘‘அஹம் தே³வோ ப⁴விஸ்ஸாமி’’-ச்சேவமஜ்ஜ²த்தகோ³சரம்.

1162. ‘‘திஸ்ஸோ பு²ஸ்ஸோ அமுத்ராயம்,

நிப்³ப³த்திஸ்ஸதினாக³தே’’;

இச்சேவம் ஜானனே தஸ்ஸ,

ப³ஹித்³தா⁴ரம்மணம் ஸியா.

1163. ஜானனே நாமகோ³த்தஸ்ஸ, யஸ்ஸ கஸ்ஸசினாக³தே;

புப்³பே³னிவாஸஞாணம்வ, தம் நவத்தப்³ப³கோ³சரம்.

1164. யதா²கம்முபக³ஞாணம், பரித்தாதீ³ஸு பஞ்சஸு;

ஆரம்மணவிபா⁴கே³ஸு, பவத்ததி கத²ம் பன.

1165. ஜானனே காமகம்மஸ்ஸ, பரித்தாரம்மணம் ஸியா;

ததா² மஹக்³க³தகம்மஸ்ஸ, தம் மஹக்³க³தகோ³சரம்.

1166. அதீதமேவ ஜானாதி, தஸ்மா சாதீதகோ³சரம்;

அஜ்ஜ²த்தாரம்மணம் ஹோதி, அத்தனோ கம்மஜானனே.

1167. ப³ஹித்³தா⁴ரம்மணம் ஹோதி, பரகம்மபஜானனே;

ஏவம் பவத்தி ஞாதப்³பா³, யதா²கம்முபக³ஸ்ஸபி.

1168. ஸத்தன்னம்பி அபி⁴ஞ்ஞானம், வுத்தோ ஆரம்மணக்கமோ;

ஏத்த² வுத்தனயேனேவ, வேதி³தப்³போ³ விபா⁴வினா.

1169. விவித⁴த்த²வண்ணபதே³ஹி ஸம்பன்னம்,

மது⁴ரத்த²மதினீஹரம் க³ந்த²ம்;

ஸோதுஜனஸ்ஸ ஹத³யபீதிகரம்,

ஸுணேய்ய கோசி மனுஜோ ஸசேதனோ.

இதி அபி⁴த⁴ம்மாவதாரே அபி⁴ஞ்ஞாரம்மணனித்³தே³ஸோ நாம

ஸத்தரஸமோ பரிச்சே²தோ³.