9. நவமோ பரிச்சே²தோ³

புஞ்ஞவிபாகபச்சயனித்³தே³ஸோ

560. பா³த்திம்ஸ பாகசித்தானி, லோகிகானேவ யானி ஹி;

ஏதேஸம் பாகசித்தானம், படிஸந்தி⁴பவத்திஸு.

561. புஞ்ஞாபுஞ்ஞாதி³ஸங்கா²ரா, யதா² யேஸஞ்ச பச்சயா;

ப⁴வாதீ³ஸு ததா² தேபி, விஞ்ஞாதப்³பா³ விபா⁴வினா.

562. தயோ ப⁴வா சதஸ்ஸோ ச, யோனியோ க³திபஞ்சகம்;

விஞ்ஞாணட்டி²தியோ ஸத்த, ஸத்தாவாஸா நவேரிதா.

563. காமே புஞ்ஞாபி⁴ஸங்கா²ர-ஸஞ்ஞிதா அட்ட² சேதனா;

நவன்னம் பாகசித்தானம், காமே ஸுக³தியம் பன.

564. நானாக்க²ணிககம்மூப-நிஸ்ஸயபச்சயேஹி ச;

த்³வேதா⁴ ஹி பச்சயா தேஸம், ப⁴வந்தி படிஸந்தி⁴யம்.

565. உபேக்கா²ஸஹிதாஹேது-மனோவிஞ்ஞாணதா⁴துயா;

வினா பரித்தபாகானம், ஹோந்தி த்³வேதா⁴ பவத்தியம்.

566. தாயேவ சேதனா ரூப-ப⁴வே த்³வேதா⁴வ பச்சயா;

பஞ்சன்னம் பாகசித்தானம், ப⁴வந்தி ஹி பவத்தியம்.

567. அட்ட²ன்னம் து பரித்தானம், காமே து³க்³க³தியம் ததா²;

பவத்தே பச்சயா ஹோந்தி, ந ஹோந்தி படிஸந்தி⁴யம்.

568. ஹோந்தி வுத்தப்பகாராவ, காமே ஸுக³தியம் ததா²;

ஸோளஸன்னம் விபாகானம், பவத்தே படிஸந்தி⁴யம்.

569. ரூபே புஞ்ஞாபி⁴ஸங்கா²ரா, ரூபாவசரபூ⁴மியம்;

பஞ்சன்னம் பாகசித்தானம், பச்சயா படிஸந்தி⁴யம்.

570. ஹோந்திமாபுஞ்ஞஸங்கா²ரா, காமே து³க்³க³தியம் த்³விதா⁴;

விஞ்ஞாணஸ்ஸ பனேகஸ்ஸ, பச்சயா படிஸந்தி⁴யம்.

571. ச²ன்னம் பன பவத்தேவ, ஹோந்தி நோ படிஸந்தி⁴யம்;

ஸத்தன்னம்பி ப⁴வந்தேவ, பவத்தே படிஸந்தி⁴யம்.

572. காமே ஸுக³தியம் தேஸம், ஸத்தன்னம்பி ததே²வ ச;

பவத்தே பச்சயா ஹோந்தி, ந ஹோந்தி படிஸந்தி⁴யம்.

573. விஞ்ஞாணானம் சதுன்னம்பி, தேஸம் ரூபப⁴வே ததா²;

பவத்தே பச்சயா ஹோந்தி, ந ஹோந்தி படிஸந்தி⁴யம்.

574. ஸோ ச காமப⁴வேனிட்ட²-ரூபாதி³உபலத்³தி⁴யம்;

அனிட்ட²ரூபாத³யோ பன, ப்³ரஹ்மலோகே ந விஜ்ஜரே.

575. ததே²வானேஞ்ஜஸங்கா²ரோ, அரூபாவசரபூ⁴மியம்;

சதுன்னம் பாகசித்தானம், பவத்தே படிஸந்தி⁴யம்.

576. ஏவம் தாவ ப⁴வேஸ்வேதே, படிஸந்தி⁴பவத்திஸு;

யதா² ச பச்சயா ஹோந்தி, ததா² ஞேய்யா விபா⁴வினா.

577. ஏஸேவ ச நயோ ஞேய்யோ, யோனிஆதீ³ஸு தத்ரித³ம்;

ஆதி³தோ பன பட்டா²ய, முக²மத்தனித³ஸ்ஸனம்.

578. அவிஸேஸேன புஞ்ஞாபி⁴-ஸங்கா²ரோ த்³விப⁴வேஸுபி;

த³த்வான படிஸந்தி⁴ம் து, ஸப்³ப³பாகம் ஜனேதி ஸோ.

579. ததா² சதூஸு விஞ்ஞேய்யோ, அண்ட³ஜாதீ³ஸு யோனிஸு;

ப³ஹுதே³வமனுஸ்ஸானம், க³தீஸு த்³வீஸு ஏவ ச.

580. ததா² நானத்தகாயாதி³-விஞ்ஞாணானம் டி²தீஸுபி;

ததா² வுத்தப்பகாரஸ்மிம், ஸத்தாவாஸே சதுப்³பி³தே⁴.

581. ஏவம் புஞ்ஞாபி⁴ஸங்கா²ரோ, ப⁴வாதீ³ஸு யதா²ரஹம்;

ஏகவீஸதிபாகானம், பச்சயோ ஹோதி ச த்³விதா⁴.

582. காமே அபுஞ்ஞஸங்கா²ரோ, ப⁴வே சதூஸு யோனிஸு;

தீஸு க³தீஸு ஏகிஸ்ஸா, விஞ்ஞாணட்டி²தியாபி ச.

583. ஸத்தாவாஸே பனேகஸ்மிம்,

உஹோதி ஸோ பச்சயோ த்³விதா⁴;

ஸத்தன்னம் பாகசித்தானம்,

பவத்தே படிஸந்தி⁴யம்.

584. ததே²வானேஞ்ஜஸங்கா²ரோ, ஏகாரூபப⁴வே புன;

ஏகிஸ்ஸா யோனியா சேவ, ஏகிஸ்ஸா க³தியாபி ச.

585. தீஸு சித்தட்டி²தீஸ்வேவ, ஸத்தாவாஸே சதுப்³பி³தே⁴;

சதுன்னம் பாகசித்தானம், த்³வேதா⁴ ஸோ ஹோதி பச்சயோ.

586. படிஸந்தி⁴பவத்தீனம், வஸேனேவ ப⁴வாதி³ஸு;

விஜானிதப்³பா³ ஸங்கா²ரா, யதா² யேஸஞ்ச பச்சயா.

587. ந ரூபாரூபத⁴ம்மானம், ஸங்கந்தி பன விஜ்ஜதி;

ஸங்கந்திபா⁴வே அஸதி, படிஸந்தி⁴ கத²ம் ஸியா.

588. நத்தி² சித்தஸ்ஸ ஸங்கந்தி, அதீதப⁴வதோ இத⁴;

ததோ ஹேதும் வினா தஸ்ஸ, பாதுபா⁴வோ ந விஜ்ஜதி.

589. ஸுலத்³த⁴பச்சயம் ரூபா-ரூபமத்தம் து ஜாயதி;

உப்பஜ்ஜமானமேவம் து, லபி⁴த்வா பச்சயம் பன.

590. ப⁴வந்தரமுபேதீதி, ஸமஞ்ஞாய பவுச்சதி;

ந ச ஸத்தோ ந ச ஜீவோ, ந அத்தா வாபி விஜ்ஜதி.

591. தயித³ம் பாகடம் கத்வா, படிஸந்தி⁴க்கமம் பன;

த³ஸ்ஸயிஸ்ஸாமஹம் ஸாது⁴, நிபோ³த⁴த² ஸுது³ப்³பு³த⁴ம்.

592. அதீதஸ்மிம் ப⁴வே தஸ்ஸ, ஆஸன்னமரணஸ்ஸ ஹி;

ஹரிதம் தாலபண்ணம்வ, பக்கி²த்தம் ஆதபே பன.

593. ஸுஸ்ஸமானே ஸரீரஸ்மிம், நட்டே² சக்கு²ந்த்³ரியாதி³கே;

ஹத³யவத்து²மத்தஸ்மிம், டி²தே காயப்பஸாதி³கே.

594. வத்து²ஸன்னிஸ்ஸிதம் சித்தம், ஹோதி தஸ்மிம் க²ணேபி ச;

புப்³பா³னுஸேவிதம் கம்மம், புஞ்ஞம் வாபுஞ்ஞமேவ வா.

595. கம்மம் கம்மனிமித்தம் வா, ஆலம்பி³த்வா பவத்ததி;

ஏவம் பவத்தமானம் தம், விஞ்ஞாணம் லத்³த⁴பச்சயம்.

596. அவிஜ்ஜாய படிச்ச²ன்னா-தீ³னவே விஸயே பன;

தண்ஹா நமேதி ஸங்கா²ரா, கி²பந்தி ஸஹஜா பன.

597. ந மீயமானம் தண்ஹாய, தம் ஸந்ததிவஸா பன;

ஓரிமா பன தீரம்ஹா, ஆலம்பி³த்வான ரஜ்ஜுகம்.

598. மாதிகாதிக்கமோவேதம், புரிமம் ஜஹதி நிஸ்ஸயம்;

அபரம் கம்மஸம்பூ⁴தம், லம்பி³த்வா வாபி நிஸ்ஸயம்.

599. தம் பனாரம்மணாதீ³ஹி, பச்சயேஹி பவத்ததி;

புரிமம் சவனம் ஏத்த², பச்சி²மம் படிஸந்தி⁴ து.

600. ததே³தம் நாபி புரிமா, ப⁴வதோபி இதா⁴க³தம்;

கம்மாதி³ஞ்ச வினா ஹேதும், பாதுபூ⁴தம் ந சேவ தம்.

601. ஏத்த² சேதஸ்ஸ சித்தஸ்ஸ, புரிமா ப⁴வதோ பன;

இதா⁴னாக³மனேதீத-ப⁴வஹேதூஹி ஸம்ப⁴வே.

602. படிகோ⁴ஸதீ³பமுத்³தா³தீ³, ப⁴வந்தேத்த² நித³ஸ்ஸனா;

யதா² ஆக³ந்த்வா அஞ்ஞத்ர, ஹோந்தி ஸத்³தா³தி³ஹேதுகா.

603. ஏவமேவ ச விஞ்ஞாணம், வேதி³தப்³ப³ம் விபா⁴வினா;

ஸந்தானப³ந்த⁴தோ நத்தி², ஏகதா வாபி நானதா.

604. ஸதி ஸந்தானப³ந்தே⁴ து, ஏகந்தேனேகதா ஸியா;

கீ²ரதோ த³தி⁴ஸம்பூ⁴தம், ந ப⁴வேய்ய கதா³சிபி.

605. அதா²பி பன ஏகந்த-நானதா ஸா ப⁴வேய்ய சே;

கீ²ரஸாமீ நரோ நேவ, த³தி⁴ஸாமீ ப⁴வேய்ய ஸோ.

606. தஸ்மா ஏத்த² பனேகந்த-ஏகதானானதாபி வா;

ந சேவ உபக³ந்தப்³பா³, விஞ்ஞுனா ஸமயஞ்ஞுனா.

607. நனு ஏவமஸங்கந்தி-பாதுபா⁴வே தஸ்ஸ ஸதி;

யே இமஸ்மிம் மனுஸ்ஸத்த-பா⁴வே க²ந்தா⁴பி⁴ஸம்ப⁴வா.

608. தேஸம் இத⁴ நிருத்³த⁴த்தா, கம்மஸ்ஸ ப²லஹேதுனோ;

பரத்தா²க³மதோ சேவ, இத⁴ தஸ்ஸ கதஸ்ஸ ஹி.

609. அஞ்ஞஸ்ஸ அஞ்ஞதோ சேவ, கம்மதோ தம் ப²லம் ஸியா;

தஸ்மா ந ஸுந்த³ரம் ஏதம், விதா⁴னம் ஸப்³ப³மேவ ச.

ஏத்தா²ஹ –

610. ஸந்தானே யம் ப²லம் ஏதம், நாஞ்ஞஸ்ஸ ந ச அஞ்ஞதோ;

பீ³ஜானம் அபி⁴ஸங்கா²ரோ, ஏதஸ்ஸத்த²ஸ்ஸ ஸாத⁴கோ.

611. ஏகஸ்மிம் பன ஸந்தானே, வத்தமானம் ப²லம் பன;

அஞ்ஞஸ்ஸாதிபி வா நேவ, அஞ்ஞதோ வா ந ஹோதி தம்.

612. பீ³ஜானம் அபி⁴ஸங்கா²ரா, ஏதஸ்ஸத்த²ஸ்ஸ ஸாத⁴கோ;

பீ³ஜானம் அபி⁴ஸங்கா²ரே, கதே து மது⁴ஆதி³னா.

613. தஸ்ஸ பீ³ஜஸ்ஸ ஸந்தானே, பட²மம் லத்³த⁴பச்சயோ;

மது⁴ரோ ப²லஸோ தஸ்ஸ, ஹோதி காலந்தரே பன.

614. ந ஹி தானி ஹி பீ³ஜானி, அபி⁴ஸங்க²ரணம்பி வா;

பாபுணந்தி ப²லட்டா²னம், ஏவம் ஞேய்யமித³ம்பி ச.

615. பா³லகாலே பயுத்தேன, விஜ்ஜாஸிப்போஸதா⁴தி³னா;

தீ³பேதப்³போ³ அயம் வுத்³த⁴-காலஸ்மிம் ப²லதா³யினா.

616. ஏவம் ஸந்தேபி தம் கம்மம், விஜ்ஜமானம்பி வா பன;

ப²லஸ்ஸ பச்சயோ ஹோதி, அத² வாவிஜ்ஜமானகம்.

617. விஜ்ஜமானம் ஸசே ஹோதி, தப்பவத்திக்க²ணே பன;

ப⁴விதப்³ப³ம் விபாகேன, ஸத்³தி⁴மேவ ச ஹேதுனா.

618. அத² வாவிஜ்ஜமானம் தம், நிருத்³த⁴ம் பச்சயோ ப⁴வே;

பவத்திக்க²ணதோ புப்³பே³, பச்சா² நிச்சப²லம் ஸியா.

வுச்சதே –

619. கடத்தா பச்சயோ கம்மம், தஸ்மா நிச்சப²லம் ந ச;

பாடிபோ⁴கா³தி³கம் கம்மம், வேதி³தப்³ப³ம் நித³ஸ்ஸனம்.

620. கடத்தாயேவ தம் கம்மம், ப²லஸ்ஸ பன பச்சயோ;

ந சஸ்ஸ விஜ்ஜமானத்தம், தஸ்ஸ வாவிஜ்ஜமானதா.

621. அபி⁴த⁴ம்மாவதாரோயம், பரமத்த²பகாஸனோ;

ஸோதப்³போ³ பன ஸோதூனம், பீதிபு³த்³தி⁴விவட்³ட⁴னோ.

இதி அபி⁴த⁴ம்மாவதாரே புஞ்ஞவிபாகபச்சயனித்³தே³ஸோ நாம

நவமோ பரிச்சே²தோ³.