9. நவமோ பரிச்சே²தோ³

புஞ்ஞவிபாகபச்சயனித்³தே³ஸவண்ணனா

560-2. பா³த்திம்ஸபாகசித்தானி, லோகிகானேவ யானி ஹி;

ஏதேஸம் பாகசித்தானம், படிஸந்தி⁴பவத்திஸு.

யானி லோகிகானி ஏவ பா³த்திம்ஸ பாகசித்தானி ஹோந்தி, ஏதேஸம் பாகசித்தானம் புஞ்ஞாபுஞ்ஞாதி³ஸங்கா²ரா ப⁴வாதீ³ஸு யோனிக³திவிஞ்ஞாணட்டி²திஸத்தாவாஸேஸு படிஸந்தி⁴பவத்தீஸு யதா² யேன பகாரேன பச்சயா ஹோந்தி ஏவ, இமேஸம் விபாகசித்தானம் தேபி ஸங்கா²ரா ப⁴வாதீ³ஸு யோனிக³திவிஞ்ஞாணட்டி²திஸத்தாவாஸேஸு படிஸந்தி⁴பவத்தீஸு ததா² தேன பகாரேன விபா⁴வினா பண்டி³தேன விஞ்ஞாதப்³பா³. தயோ ப⁴வா சதஸ்ஸோ ச யோனியோ காமப⁴வரூபப⁴வஅரூபப⁴வவஸேன தயோ ப⁴வா, அண்ட³ஜஜலாபு³ஜஸம்ஸேத³ஜஓபபாதிகயோனிவஸேன சதஸ்ஸோ ச யோனியோ, நிரயக³திதிரச்சா²னக³திபேதக³திமனுஸ்ஸக³திதே³வக³திவஸேன க³திபஞ்சகம், ஸந்தி⁴ஸஞ்ஞாய படிஸந்தி⁴ஸஞ்ஞாய நானத்தா நானாபா⁴வதோ, காயஸ்ஸாபி ச ரூபகாயஸ்ஸாபி ச நானத்தா நானாபா⁴வதோ காமஸுக³தியோ, நானா அத்தா ஸபா⁴வோ ஏதஸ்ஸாதி நானத்தா, நானத்தோ ரூபகாயோ ஏதேஸந்தி நானத்தகாயா, நானா ஸபா⁴வோ ஏதஸ்ஸாதி நானத்தா, நானத்தாயேவ ஸஞ்ஞா நானத்தஸஞ்ஞா, ஸா ஏதேஸம் அத்தீ²தி நானத்தஸஞ்ஞீ நாம, பட²மஜ்ஜா²னபூ⁴மி ச சதுராபாயபூ⁴மியோ ச நானத்தகாயஏகத்தஸஞ்ஞீ நாம, து³தியஜ்ஜா²னபூ⁴மி ஏகத்தகாயனானத்தஸஞ்ஞீ நாம, ததியஜ்ஜா²னபூ⁴மிவேஹப்ப²லபூ⁴மிஸுத்³தா⁴வாஸபூ⁴மியோ ஏகத்தகாயஏகத்தஸஞ்ஞீ நாம, ஹேட்டா² டி²தா ரூபேஹி ஸத்³தி⁴ம் ஸத்தவிஞ்ஞாணட்டி²தியோ, திட்ட²ந்தி விஞ்ஞாணானி ஏத்தா²தி டி²தியோ, விஞ்ஞாணானம் டி²தியோ விஞ்ஞாணட்டி²தியோ, விஞ்ஞாணஸ்ஸ அபா⁴வதோ அஸஞ்ஞீபூ⁴மி ந க³ய்ஹதே, சதுத்தா²ருப்பபூ⁴மி ச படுவிஞ்ஞாணாபா⁴வதோ ந க³ய்ஹதே. ஸத்தாவாஸவஸேன அஸஞ்ஞீபூ⁴மிம், சதுத்தா²ருப்பபூ⁴மிஞ்ச பன க³ஹேத்வா தே ஸத்தாவாஸா நவ ஏவ ஹோந்தி.

563-8. காமே புஞ்ஞாபி⁴ஸங்கா²ரஸஞ்ஞிதா அட்ட² சேதனா பூரேந்தி அத்தனோ காரகம் பூரேந்தி ச, அஜ்ஜா²ஸயம் புஜ்ஜஞ்ச ப⁴வம் நிப்³ப³த்தேந்தீதி புஞ்ஞானி, அபி⁴ஸங்க²ரோந்தி விபாகம், கம்மஜரூபஞ்சாதி அபி⁴ஸங்கா²ரா, புஞ்ஞானி ஏவ அபி⁴ஸங்கா²ரா புஞ்ஞாபி⁴ஸங்கா²ரா, தேயேவ ஸஞ்ஞிதா புஞ்ஞாபி⁴ஸங்கா²ரஸஞ்ஞிதா, காமே புஞ்ஞாபி⁴ஸங்கா²ரஸஞ்ஞிதா அட்ட² சேதனா. நவன்னம் பாகசித்தானம் உபேக்கா²யுத்தாஹேதுகமஹாவிபாகவஸேன நவன்னம் பாகசித்தானம் காமஸுக³தியம் பன நானா வத்தமானசேதனாக²ணதோ பரம் க²ணம் ஏதஸ்ஸாதி நானாக²ணம், தம் ஏவ நானக்க²ணிகம், தமேவ கம்மம் நானக்க²ணிககம்மம், வத்தமானசேதனாதோ பரா அதீதசேதனாதி அத்தோ². ப³லவா நிஸ்ஸயபச்சயோ உபனிஸ்ஸயபச்சயோ, ப³லவத்தோ² சேத்த² உப-ஸத்³தோ³, ப³லவபச்சயோதி அத்தோ², நானக்க²ணிககம்மபச்சயவஸேன ப³லவபச்சயவஸேன சாதி அத்தோ². த்³வேதா⁴ த்³வீஹி பகாரேஹி தேஸம் படிஸந்தி⁴யம் பச்சயா ப⁴வந்தி, தா அட்ட² காமாவசரமஹாகுஸலசேதனா உபேக்கா²ஸஹிதாஹேதுமனோவிஞ்ஞாணதா⁴துயா வினா உபேக்கா²ஸஹக³தாஹேதுமனோவிஞ்ஞாணதா⁴தும் வஜ்ஜேத்வா பரித்தபாகானம் சக்கு²ஸோதகா⁴னஜிவ்ஹாகாயஸம்படிச்ச²னஸோமனஸ்ஸயுத்தாஹேதுககுஸலவிபாகானம் த்³வேதா⁴ நானக்க²ணிககம்மூபனிஸ்ஸயபச்சயேஹி பவத்தியம் பச்சயா ஹோந்தி. தாயேவ சேதனா தா ஏவ அட்ட² காமாவசரமஹாகுஸலசேதனா ரூபப⁴வே பஞ்சன்னம் பாகசித்தானம் குஸலவிபாகசித்தானம் சக்கு²ஸோதஸம்படிச்ச²னஸோமனஸ்ஸயுத்தஉபேக்கா²யுத்தஸந்தீரணானம் த்³வேதா⁴ நானக்க²ணிககம்மூபனிஸ்ஸயபச்சயேஹி பவத்தியம் பச்சயா ஹோந்தி. அட்ட²ன்னம் து பரித்தானம், காமே து³க்³க³தியம் ததா² அட்ட²ன்னம் பரித்தானம் குஸலவிபாகானம் சக்கு²ஸோதகா⁴னஜிவ்ஹாகாயஸம்படிச்ச²னானம், த்³வின்னம் ஸந்தீரணானஞ்ச பவத்தே பவத்திக்க²ணே பச்சயா ஹோந்தி, படிஸந்தி⁴யம் படிஸந்தி⁴க்க²ணே பன பச்சயா ந ஹோந்தி. வுத்தப்பகாராவ காமே ஸுக³தியம் யதா²வுத்தப்பகாராவ அட்ட² காமாவசரமஹாகுஸலசேதனா காமஸுக³தியம் ததா² ஸோளஸன்னம் குஸலவிபாகானம் பவத்தே பவத்திக்க²ணே த்³வேதா⁴ நானக்க²ணிககம்மூபனிஸ்ஸயபச்சயேஹி பச்சயா ஹோந்தி, பவத்தே பவத்திக்க²ணே ஸத்தன்னம் குஸலவிபாகானம் பச்சயா ஹோந்தி. படிஸந்தி⁴யம் படிஸந்தி⁴க்க²ணே நவன்னம் குஸலவிபாகசித்தானம் பச்சயா ஹோந்தி.

569-74. ரூபே புஞ்ஞாபி⁴ஸங்கா²ரா, ரூபாவசரபூ⁴மியம் பஞ்சன்னம் பாகசித்தானம் படிஸந்தி⁴யம் படிஸந்தி⁴க்க²ணே பச்சயா ஹோந்திமாபுஞ்ஞஸங்கா²ரா, காமே து³க்³க³தியம் த்³விதா⁴ இமே அபுஞ்ஞாபி⁴ஸங்கா²ரா, இமா குஸலபடிபக்கா² உத்³த⁴ச்சவஜ்ஜா ஏகாத³ஸ சேதனா காமது³க்³க³தியம் ஏகஸ்ஸ படிஸந்தி⁴விஞ்ஞாணஸ்ஸ படிஸந்தி⁴யம் படிஸந்தி⁴க்க²ணே த்³விதா⁴ நானக்க²ணிககம்மூபனிஸ்ஸயபச்சயேஹி பச்சயா ஹோந்தி. த்³வாத³ஸ அகுஸலசேதனா பவத்தே பவத்திக்க²ணே ஏவ ச²ன்னம் சக்கு²ஸோதகா⁴னஜிவ்ஹாகாயஸம்படிச்ச²னானம் அகுஸலவிபாகானம் பச்சயா ஹோந்தி, படிஸந்தி⁴யம் படிஸந்தி⁴க்க²ணே பச்சயா நோ ஹோந்தி. ஸத்தன்னம்பி ப⁴வந்தேவ பவத்தே பவத்திக்க²ணே படிஸந்தி⁴யம் படிஸந்தி⁴க்க²ணே அகுஸலவிபாகானி ஸத்தன்னம் சக்கு²ஸோதகா⁴னஜிவ்ஹாகாயஸம்படிச்ச²னஸந்தீரணானம் பச்சயா ப⁴வந்தி. காமே ஸுக³தியம் தேஸம், ஸத்தன்னம்பி ததே²வ ச த்³வாத³ஸாகுஸலசேதனா காமே ஸுக³தியம் ததே²வ ச தேஸம் ஸத்தன்னம் அகுஸலவிபாகானம் பவத்தே பவத்திக்க²ணே பச்சயா ஹோந்தி, படிஸந்தி⁴யம் படிஸந்தி⁴க்க²ணே பச்சயா ந ஹோந்தி. விஞ்ஞாணானம் சதுன்னம்பி, தேஸம் ரூபப⁴வே ததா² தாயேவ த்³வாத³ஸாகுஸலசேதனா ரூபப⁴வே தேஸம் சதுன்னம் அகுஸலவிபாகானம் சக்கு²ஸோதஸம்படிச்ச²னஸந்தீரணஸங்கா²தானம் விஞ்ஞாணானம் ததா² பவத்தே பவத்திக்க²ணே பச்சயா ஹோந்தி, படிஸந்தி⁴யம் படிஸந்தி⁴க்க²ணே பச்சயா ந ஹோந்தி. ஸோ ச காமப⁴வேனிட்ட²ரூபாதி³உபலத்³தி⁴யம் ஸோ ச அபுஞ்ஞாபி⁴ஸங்கா²ரோ காமப⁴வே அனிட்ட²ரூபாதி³உபலத்³தி⁴யம் அமனாபரூபாதீ³னி ஆரம்மணானி உபலத்³தி⁴யம் தேஸம் சதுன்னம் அபுஞ்ஞஜானம் விஞ்ஞாணானம் பச்சயோ ஹோதி. ஹி ஸச்சம் ‘‘ஸோ ச காமப⁴வேனிட்ட²-ரூபாதி³உபலத்³தி⁴ய’’ந்திஆதி³கம் வசனம். அனிட்ட²ரூபாத³யோ நாம விஸயா ப்³ரஹ்மலோகே ந விஜ்ஜரே ந விஜ்ஜந்தி.

575-6. ததே²வானேஞ்ஜஸங்கா²ரோ ந இஞ்ஜதி ந ப²ந்த³தி ந சலதீதி ஆனேஞ்ஜம், ஆனேஞ்ஜஞ்ச தம் ஸங்கா²ரோ சாதி ஆனேஞ்ஜஸங்கா²ரோ, ததா² ஏவ ஆனேஞ்ஜஸங்கா²ரோ அரூபாவசரபூ⁴மியம் சதுன்னம் பாகசித்தானம் பவத்தே பவத்திக்க²ணே படிஸந்தி⁴யம் படிஸந்தி⁴க்க²ணே பச்சயோ ஹோதி. ப⁴வேஸ்வேதே ப⁴வேஸு ஏதே வுத்தப்பகாரா பச்சயா வுத்தப்பகாரேன படிஸந்தி⁴பவத்தீஸு யதா² ச யேன யேன ச பகாரேன நானக்க²ணிககம்மூபனிஸ்ஸயபச்சயேஹி பச்சயா ஹோந்தி, தேன பச்சயா ததா² தேன தேன பகாரேன விபா⁴வினா விஜானந்தேன பண்டி³தேன ஞேய்யா.

577. ஏஸேவ ச நயோ ஞேய்யோ, யோனிஆதீ³ஸு யோனிக³திவிஞ்ஞாணட்டி²திஸத்தாவாஸேஸு ஏஸேவ ச நயோ ப⁴வேஸு மயா வுத்தோ ஏவ நயோ பண்டி³தேன ஞேய்யோ. தத்ரித³ம் தத்ர ப⁴வேஸு ஆதி³தோ பட்டா²ய வுத்தம் இத³ம் வசனம் முக²மத்தனித³ஸ்ஸனம் உபாயமத்ததீ³பனம் ஹோதி.

578-81. அவிஸேஸேன புஞ்ஞாபி⁴-ஸங்கா²ரோ த்³விப⁴வேஸுபி காமபுஞ்ஞாபி⁴ஸங்கா²ரவஸேன, ரூபபுஞ்ஞாபி⁴ஸங்கா²ரவஸேன ச புஞ்ஞாபி⁴ஸங்கா²ரோ அவிஸேஸேன ஸமானபா⁴வேன த்³வீஸு ப⁴வேஸு காமரூபப⁴வேஸு படிஸந்தி⁴ம் த³த்வா ஸோ ஸங்கா²ரோ ஸப்³ப³பாகம் ஜனேதி நிப்³ப³த்தேதி. ததா² சதூஸு விஞ்ஞேய்யோ, அண்ட³ஜாதீ³ஸு யோனிஸு த்³விப⁴வேஸு புஞ்ஞாபி⁴ஸங்கா²ரோ விய ததா² சதூஸு அண்ட³ஜாதீ³ஸு ஸோ புஞ்ஞாபி⁴ஸங்கா²ரோ பண்டி³தேன ஞேய்யோ. ‘‘அண்ட³ஜாதீ³ஸூ’’தி வசனம் பது³மபச்சேகபு³த்³தா⁴னம் மனுஸ்ஸத்தம் ஸந்தா⁴ய வுத்தம். ப³ஹுதே³வமனுஸ்ஸானம் வஸேன த்³வீஸு க³தீஸு ஏவ ச ததா² ஸோ புஞ்ஞாபி⁴ஸங்கா²ரோ பண்டி³தேன ஞேய்யோ. ததா² நானத்தகாயாதி³-விஞ்ஞாணானம் டி²தீஸுபி நானத்தகாயனானத்தஸஞ்ஞீனானத்தகஆயஏகத்தஸஞ்ஞீ ஏகத்தகாயனானத்தஸஞ்ஞீ ஏகத்தகாயஏகத்தஸஞ்ஞீனம் வஸேன சதூஸு விஞ்ஞாணட்டி²தீஸு ஸோ புஞ்ஞாபி⁴ஸங்கா²ரோ பண்டி³தேன ஞேய்யோ. நானத்தகாயனானத்தஸஞ்ஞீனானத்தகாயஏகத்தஸஞ்ஞீஏகத்தகாயனானத்தஸஞ்ஞீஏகத்தகாயஏகத்தஸஞ்ஞீனம் வஸேன வுத்தப்பகாரஸ்மிம் சதுப்³பி³தே⁴ ஸத்தாவாஸே ததா² ஸோ புஞ்ஞாபி⁴ஸங்கா²ரோ பண்டி³தேன ஞேய்யோ. ஏவம் இமினா மயா வுத்தப்பகாரேன புஞ்ஞாபி⁴ஸங்கா²ரோ ப⁴வாதீ³ஸு ப⁴வயோனிக³திவிஞ்ஞாணட்டி²திஸத்தாவாஸேஸு யதா²ரஹம் ஸோளஸன்னம் காமகுஸலபாகானம், பஞ்சன்னம் ரூபபாகானஞ்சாதி ஏகவீஸதிபாகானம் த்³விதா⁴ நானக்க²ணிககம்மூபனிஸ்ஸயபச்சயேன பச்சயோ ஹோதி.

582-3. காமே அபுஞ்ஞஸங்கா²ரோ காமப⁴வே அண்ட³ஜஜலாபு³ஜஸம்ஸேத³ஜஓபபாதிகயோனிவஸேன அண்ட³ஜாதீ³ஸு யோனீஸு நிரயக³திபேதக³திதிரச்சா²னக³திவஸேன தீஸு க³தீஸு நானத்தகாயஏகத்தஸஞ்ஞீவஸேன ஏகிஸ்ஸா விஞ்ஞாணட்டி²தியா நானத்தகாயஏகத்தஸஞ்ஞீவஸேன ச ஏகஸ்மிம் பன ஸத்தாவாஸே த்³விதா⁴ நானக்க²ணிககம்மூபனிஸ்ஸயபச்சயேஹி பவத்தே பவத்திக்க²ணே படிஸந்தி⁴யம் படிஸந்தி⁴க்க²ணே ஸோ அபுஞ்ஞாபி⁴ஸங்கா²ரோ பச்சயோ ஹோதி.

584-6. ததே²வானேஞ்ஜஸங்கா²ரோ ததா² ஏவ ஆனேஞ்ஜஸங்கா²ரோ, ஏகாரூபப⁴வே ஏகஸ்மிம் அரூபப⁴வே ஏகிஸ்ஸா ஓபபாதிகயோனியா சேவ ஏகிஸ்ஸா தே³வக³தியாபி ச ஆகாஸானஞ்சாயதனபூ⁴மி விஞ்ஞாணஞ்சாயதனபூ⁴மி ஆகிஞ்சஞ்ஞாயதனபூ⁴மிவஸேன தீஸு ஏவ சித்தட்டி²தீஸு சதுன்னம் அரூபபூ⁴மீனம் வஸேன சதுப்³பி³தே⁴ ஸத்தாவாஸே சதுன்னம் அரூபபாகசித்தானம் த்³வேதா⁴ நானக்க²ணிககம்மோபனிஸ்ஸயபச்சயேஹி ஸோ ஆனேஞ்ஜாபி⁴ஸங்கா²ரோ பச்சயோ ஹோதி. படிஸந்தி⁴பவத்தீனம், வஸேனேவம் ப⁴வாதீ³ஸு ஏவம் இமினா மயா வுத்தப்பகாரேன படிஸந்தி⁴பவத்தீனம் வஸேன ப⁴வாதீ³ஸு யதா² யே ஸங்கா²ரா ஏஸம் பாகசித்தானம் பச்சயா ஹோந்தி, ததா² தே ஸங்கா²ரா ஏவம் இமினா மயா வுத்தப்பகாரேன பண்டி³தேன விஜானிதப்³பா³.

587-90. ந ரூபாரூபத⁴ம்மானம், ஸங்கந்தி பன விஜ்ஜதி ரூபத⁴ம்மானம், சித்தசேதஸிகஸங்கா²தானம் நாமத⁴ம்மானஞ்ச ஸங்கந்தி பன ஸங்கமனம் பன ந விஜ்ஜதி. ஸங்கந்திபா⁴வே அஸதி அதீதப⁴வதோ இத⁴ இமஸ்மிம் ப⁴வே ரூபத⁴ம்மானம் ஸங்கமனபா⁴வே அஸதி படிஸந்தி⁴சித்தம் கத²ம் கேன பகாரேன ஸியா ப⁴வேய்ய? நத்தி² சித்தஸ்ஸ ஸங்கந்தி, அதீதப⁴வதோ இத⁴ இமஸ்மிம் ப⁴வே சித்தஸ்ஸ ஸங்கந்தி ஸங்கமனம் நத்தி², ததோ அதீதப⁴வதோ அதீதம் ஹேதும் வினா வஜ்ஜேத்வா இத⁴ இமஸ்மிம் ப⁴வே சித்தஸ்ஸ பாதுபா⁴வோ ந விஜ்ஜதி. ஸுலத்³த⁴பச்சயம் ரூபாரூபமத்தம் ஸுட்டு² லத்³த⁴பச்சயம் ரூபனாமமத்தம் ஜாயதி. ஏவம் இமினா மயா வுத்தப்பகாரேன பச்சயம் லபி⁴த்வா உப்பஜ்ஜமானம் ரூபாரூபமத்தம் ரூபனாமமத்தம் ஜாயதி. ஏவம் இமினா மயா வுத்தப்பகாரேன பச்சயம் லபி⁴த்வா உப்பஜ்ஜமானம் ரூபாரூபமத்தம் ப⁴வந்தரம் அஞ்ஞப⁴வம் படிஸந்தி⁴ம் உபேதி உபக³ச்ச²தி. இதி வசனம் ஸமஞ்ஞாய லோகியவோஹாரேன பவுச்சதே, ஸத்தோ வா நத்தி², ஸத்தோ ஜீவோதி வேவசனம், அத்தா வாபி ந விஜ்ஜதி.

591-9. தஸ்ஸித³ம் பாகடம் கத்வா, படிஸந்தி⁴க்கமம் பன தஸ்ஸ ஸத்தஸ்ஸ இத³ம் படிஸந்தி⁴க்கமம் ஸுது³ப்³பு³த⁴ம் அதிது³ப்³பி³ஜானம் பாகடம் கத்வா அஹம் த³ஸ்ஸயிஸ்ஸாமி, தமேதம் படிஸந்தி⁴க்கமம் ஸாது⁴ ஸாது⁴கம் நிபோ³த⁴த², ஸாது⁴ ஸாது⁴கம் மனஸி கரோத², விவிதே⁴ஸு ஆரம்மணேஸு லோப⁴வஸேன சித்தம் அனாமேத்வா வஜிரமஞ்ஜூஸாய அனக்³க⁴மணிரதனம் பக்கி²பந்தோ விய சித்தே ட²பேத்வாதி அத்தோ². அதீதஸ்மிம் ப⁴வே தஸ்ஸ, ஆஸன்னமரணஸ்ஸ ஹிஇதோ ப⁴வதோ அதீதஸ்மிம் ப⁴வே ஆஸன்னமரணஸ்ஸ தஸ்ஸ ஸரீரஸ்மிம் ஆதபே பக்கி²த்தம் ஹரிதம் தாலபண்ணம் விய ஸுஸ்ஸமானே ஸதி சக்கு²ந்த்³ரியாதி³கே இந்த்³ரியே நட்டே² ஹத³யவத்து²மத்தஸ்மிம் டி²தே காயப்பஸாதி³கே விஞ்ஞாணே தஸ்மிம் க²ணே வத்து²ஸன்னிஸ்ஸிதம் ஹத³யவத்து²னிஸ்ஸிதம். ‘‘சித்த’’ந்தி வசனம் ப⁴வங்க³மனோத்³வாராவஜ்ஜனஜவனம் ஸந்தா⁴ய வுத்தந்தி வேதி³தப்³ப³ம். புப்³பா³னுஸேவிதந்தி இதோ காலா புப்³ப³காலே தேன பன அனுஸேவிதம் அனுசிண்ணம் புஞ்ஞம் கம்மம் வா அபுஞ்ஞம் ஏவ வா கம்மம் கம்மனிமித்தம் க³தினிமித்தம் வா கம்மப²லேன த்³வாரேஸு பச்சுபட்டி²தம் ஆலம்பி³த்வா மனோத்³வாராவஜ்ஜனஜவனவஸேன ஸேவிதசித்தம் பவத்ததி. ஏவம் இமினா மயா வுத்தப்பகாரேன பவத்தமானம் தம் விஞ்ஞாணம் தம் ஜவனசித்தம் லத்³த⁴பச்சயம் லத்³தா⁴ரம்மணபச்சயம். அவிஜ்ஜாய படிச்ச²ன்னாதீ³னவே விஸயேதி அகுஸலஜவனே ஜவிதே தஸ்ஸ ஜவனஸ்ஸ அவிஜ்ஜாய அப்படிச்ச²ன்னதோ³ஸே தஸ்மிம் கம்மாதி³கே ஆரம்மணே குஸலஜவனே ஜவிதே ததோ சித்தவீதி²தோ புப்³ப³பா⁴கே³ பவத்தாய அவிஜ்ஜாய படிச்ச²ன்னதோ³ஸே தஸ்மிம் கம்மாதி³கே ஆரம்மணே. தண்ஹாதி அகுஸலஜவனேன ஸஹஜோ லோபோ⁴, அகுஸலஜவனே வா ஜவிதே ததோ வீதி²சித்ததோ புப்³ப³பா⁴கே³ பவத்தோ லோபோ⁴ தண்ஹா. நமேதீதி அஞ்ஞம் ஆரம்மணம் அக்³கா³ஹாபேத்வா த³ள்ஹக்³கா³ஹவஸேன தம் ஏவ கம்மனிமித்தக³தினிமித்தஸங்கா²தம் ஆரம்மணம் க³ண்ஹாபேதீதி அத்தோ². ஸஹஜா ஸங்கா²ரா பன தஸ்ஸ சித்தஸ்ஸ ஸஹஜா ஏகதோ ஜாதா சேதனா பன தஸ்மிம் யேவாரம்மணே கி²பந்தி பவத்தந்தி. இமஸ்மிம் பச்சுப்பன்னப⁴வே ஏகஸந்ததிவஸா பவத்தாய தண்ஹாய நமீயமானம் தம் விஞ்ஞாணம் ஓரிமா தீரம்ஹா ரஜ்ஜுகம் ஆலம்பி³த்வா மாதிகாதிக்கமோ புரிஸோ விய ஏதம் புரிமம் நிஸ்ஸயபூ⁴தம் ஹத³யவத்து²ம் ஜஹதி ச²ட்³டே³தி, சுதிசித்தம் உப்பஜ்ஜித்வா நிருஜ்ஜ²தீதி அத்தோ². அபரம் கம்மஸம்பூ⁴தம் நிஸ்ஸயம் அபரம் அஞ்ஞகம்மதோ ஸம்பூ⁴தம் நிஸ்ஸயபூ⁴தம் ஹத³யவத்து²ம் லபி⁴த்வா வா அலபி⁴த்வாபி வா ஆரம்மணாதீ³ஹி பச்சயேஹி தம் படிஸந்தி⁴ஸங்கா²தம் மானஸம் பவத்ததி. ‘‘லபி⁴த்வா’’தி வசனம் காமரூபப⁴வம் ஸந்தா⁴ய வுத்தம். ‘‘அலபி⁴த்வா’’தி வசனம் அரூபப⁴வம் ஸந்தா⁴ய வுத்தம். ஏத்த² ஏதேஸு சித்தேஸு புரிமம் ‘‘ஜஹதீ’’தி வசனேன வுத்தஞ்சேவ சித்தம், சுதிசித்தம் பச்சி²மம் ‘‘ஆரம்மணாதீ³ஹி பச்சயேஹி பவத்ததீ’’தி வசனேன வுத்தஞ்சேவ சித்தம் படிஸந்தி⁴சித்தம் பண்டி³தேன வேதி³தப்³ப³ம்.

600-6. ததே³தம் தம் ஏதம் படிஸந்தி⁴சித்தம் புரிமா ப⁴வதோ இத⁴ இமஸ்மிம் பச்சி²மப⁴வே நாபி ஆக³தம், கம்மாதி³ஞ்ச ஹேதும் வினா வஜ்ஜேத்வா படிஸந்தி⁴சித்தம் பாதுபூ⁴தம் ந சேவ தம் ஏத்த² ஏதஸ்மிம் வசனே ஏதஸ்ஸ படிஸந்தி⁴சித்தஸ்ஸ புரிமா ப⁴வதோ இத⁴ இமஸ்மிம் பச்சுப்பன்னப⁴வே அனாக³மனே அதீதப⁴வஹேதூஹி அதீதப⁴வே கம்மாதி³பச்சயேஹி ஏதஸ்ஸ படிஸந்தி⁴சித்தஸ்ஸ ஸம்ப⁴வே. படிகோ⁴ஸதீ³பமுத்³தா³தீ³, ப⁴வந்தேத்த² நித³ஸ்ஸனா ஏத்த² ஏதஸ்மிம் தஸ்ஸ படிஸந்தி⁴சித்தஸ்ஸ அதீதப⁴வதோ அனாக³மனே அதீதப⁴வே ஹேதூஹி ஸம்ப⁴வே படிகோ⁴ஸதீ³பமுத்³தா³தி³அத்த²னித³ஸ்ஸனா உபமா ப⁴வந்தி. அஞ்ஞத்ர அஞ்ஞஸ்மிம் படிகோ⁴ஸாதீ³னம் அத்தா²னம் பவத்திட்டா²னே ஆக³ந்த்வா ஸத்³தா³தி³ஹேதுகா ஸத்³தா³த³யோ பச்சயா ஹோந்தி யதா². இத³ம் வுத்தம் ஹோதி – இமஸ்மிம் டா²னே ஜனேஹி பவத்தாபிதா ஸத்³த³தீ³பமுத்³தா³த³யோ அத்தா² பப்³ப³தந்தராதீ³ஸு அஞ்ஞேஸு டா²னேஸு பவத்தானம் படிகோ⁴ஸதீ³பமுத்³தா³தீ³னம் அத்தா²னம் ஹேதுகா ஹோந்தி. தேஸு ஸத்³தா³தீ³ஸு பச்சயேஸு ஸந்தேஸு யே தே படிகோ⁴ஸாத³யோ ஹோந்தி, அஸந்தேஸு ந ஹோந்தி யதா², ஏவமேவ ச விஞ்ஞாணம் அதீதப⁴வதோ பச்சுப்பன்னப⁴வவிஞ்ஞாணவஸேன பவத்தம் விஞ்ஞாணம் விபா⁴வினா வேதி³தப்³ப³ம். ஸந்தானப³ந்த⁴தோ ஸந்தானப³ந்த⁴வஸேன ஏகதா அதீதப⁴வபச்சுப்பன்னப⁴வவிஞ்ஞாணவஸேன பவத்தஸ்ஸ விஞ்ஞாணஸ்ஸ ஏகீபா⁴வோ நத்தி², நானதாபி தஸ்ஸ விஞ்ஞாணஸ்ஸ நானாபா⁴வோபி பச்சேகபா⁴வோ அபி. ஸதி ஸந்தானப³ந்தே⁴ து, ஏகந்தேனேகதா ஸியா ஸந்தானப³ந்தே⁴ ஸதி ஏகந்தேன தஸ்ஸ விஞ்ஞாணஸ்ஸ ஏகதா ஏகீபா⁴வோ ஸியா ப⁴வேய்ய, கீ²ரஸபா⁴வதோ பக்³க⁴ரணஸபா⁴வதோ கீ²ரதோ ஸம்பூ⁴தம் க⁴னஸபா⁴வம் கதா³சிபி கிஸ்மிஞ்சிபி காலே ந ப⁴வேய்ய, ஸப்³ப³தா³ பக்³க⁴ரணஸபா⁴வகீ²ரமேவ ப⁴வேய்யாதி அத்தோ². அதா²பி அபரோ நயோபி ஸா ஏகந்தனானதா தஸ்ஸ விஞ்ஞாணஸ்ஸ ஸோ ஏகந்தனானாபா⁴வோ யதி³ ப⁴வேய்ய, கீ²ரஸாமிகோ ஸோ புக்³க³லோ த³தி⁴ஸாமி ந ப⁴வேய்ய. கீ²ரகாலே கீ²ரஸ்ஸ இஸ்ஸரபூ⁴தோ ஸாமிகோ பக்³க⁴ரணஸபா⁴வம் ஜஹித்வா த³தி⁴ஸ்ஸ உப்பஜ்ஜமானகாலே தஸ்ஸ த³தி⁴ஸ்ஸ இஸ்ஸரோ ந ப⁴வேய்ய, ததோ கீ²ரஸாமிகோ அஞ்ஞோ புக்³க³லோ தஸ்ஸ த³தி⁴ஸ்ஸ அனிஸ்ஸரோ அஸாமிகோ ப⁴வேய்யாதி அத்தோ². யஸ்மா காரணா ஏத்த² ஏதஸ்மிம் படிஸந்தி⁴க்கமவினிச்ச²யே ஏகந்தஏகதாபி வா ஏகந்தனானதாபி வா ஸமயஞ்ஞுனா விஞ்ஞுனா ந சேவ உபக³ந்தப்³பா³.

607-10. ஏவம் இமினா மயா வுத்தப்பகாரேன அஸங்கந்திபாதுபா⁴வே ஸங்கந்திபாதுபா⁴வரஹிதே ப⁴வே ஸதி இமஸ்மிம் மனுஸ்ஸத்தபா⁴வே க²ந்தா⁴தி³ஸமதா அபி⁴ஸம்பூ⁴தா யே க²ந்தா⁴ ஹோந்தி, ஏதேஸம் இத⁴ இமஸ்மிம் மனுஸ்ஸத்தபா⁴வே நிருத்³த⁴த்தா இத⁴ இமஸ்மிம் மனுஸ்ஸத்தபா⁴வே ஜனேஹி கதஸ்ஸ தஸ்ஸ கம்மஸ்ஸ ப²லஹேதுனோ ப²லஸ்ஸ பச்சயபூ⁴தஸ்ஸ பரத்த² பரஸ்மிம் லோகே ஆக³மதோ சேவ ஏவம் அஞ்ஞஸ்ஸ ஸத்தஸ்ஸ அஞ்ஞதோ கம்மதோ ஹி ததோ ஸத்ததோ அஞ்ஞேன ஸத்தேன கததோ அஞ்ஞதோ சேவ கம்மதோ தம் ப²லம் ஸியா ப⁴வேய்ய, ‘‘அஞ்ஞஸ்ஸ ஸத்தஸ்ஸா’’தி வசனேன தித்தி²யஸத்தஸ்ஸபி கம்மம் அஞ்ஞஸ்ஸ ச ப²லம் த³தே³ய்யாதி அத்தோ², தஸ்மா காரணா ஏதம் ஸப்³ப³ம் ஏவ ச தும்ஹேஹி வுத்தவிதா⁴னம் ந ஸுந்த³ரம். ஏத்தா²ஹாதி ஏதஸ்மிம் டா²னே ட²த்வா சோத³கோ ஆஹ – நனு ஏவம் ‘‘அஸங்கந்திபாதுபா⁴வே ப⁴வே ஸதீ’’திஆதி³கம் வசனம் நியதீதி? வுச்சதே – ஸந்தானே யம் ப²லம் ஏதம் ஏகஸ்மிம் ஸந்தானே பவத்தமானம் யம் ஏதம் ப²லம் அஞ்ஞஸ்ஸ ஸத்தஸ்ஸ ந ஹோதி, அஞ்ஞதோ கம்மதோ ந ச ஹோதி, பீ³ஜானம் அபி⁴ஸங்கா²ரோ ஏதஸ்ஸத்த²ஸ்ஸ ‘‘ஏகஸ்மிம் ஸந்தானே’’திஆதி³கஸ்ஸ ஏதஸ்ஸ அத்த²ஸ்ஸ ஸாத⁴கோ நிப்பா²த³கோ ஹோதி.

611-5. ஏகஸ்மிம் பன ஸந்தானே, வத்தமானம் ப²லம் பன அஞ்ஞஸ்ஸ ஸத்தஸ்ஸாபி வா ந ஹோதி, தம் ப²லம் அஞ்ஞதோ கம்மதோ ந ஹோதி. பீ³ஜானம் அபி⁴ஸங்கா²ரோ ஏதஸ்ஸத்த²ஸ்ஸ ‘‘ஏகஸ்மிம் பன ஸந்தானே’’திஆதி³கஸ்ஸ ஏதஸ்ஸ அத்த²ஸ்ஸ ஸாத⁴கோ நிப்பா²த³கோ ஹோதி, பீ³ஜானம் அபி⁴ஸங்கா²ரே மது⁴ஆதி³னா வத்து²னா ஜனேஹி கதே தஸ்ஸ பீ³ஜஸ்ஸ ஸந்தானே பட²மம் லத்³த⁴பச்சயோ பட²மம் லத்³த⁴மது⁴ஆதி³பச்சயோ தஸ்ஸ பீ³ஜஸ்ஸ ப²லம் காலந்தரே மது⁴ஆதி³னா பீ³ஜாபி⁴ஸங்க²ரணதோ அஞ்ஞஸ்மிம் காலே மது⁴ரோ ஹோதி. ஹி ஸச்சம் ‘‘பீ³ஜானம் அபி⁴ஸங்கா²ரே’’திஆதி³கம் வசனம். தானி ஹி தானி ஏவ பட²மம் மது⁴ஆதி³னா ஜனேஹி ரோபிதானி பீ³ஜானி அபி⁴ஸங்க²ரணதோ காலந்தரே மது⁴ரபா⁴வம் ப²லம்பி வா ப²லட்ட²ம் வா ந பாபுணந்தி. ஏவம் இமினா பகாரேன இத³ம் மயா வுத்தம் ‘‘ஏகஸ்மிம் பன ஸந்தானே’’திஆதி³கம் வசனம் பண்டி³தேன ஞேய்யம். அபி ச அபரோ நயோ. பா³லகாலே தருணகாலே தேன தருணேன பயுத்தேன விஜ்ஜாஸிப்போஸதா⁴தி³னா கம்மேனாபி தஸ்ஸ வுத்³த⁴காலஸ்மிம் ப²லதா³னஸீலேன அயம் ‘‘ஏகஸ்மிம் பன ஸந்தானே’’திஆதி³கோ அத்தோ² பண்டி³தேன தீ³பேதப்³போ³.

616-20. சோத³கோ புனாஹ – ஏவம் ஸந்தேபி தம் கம்மம் ஏவம் இமினா மயா வுத்தப்பகாரேன கம்மே ஸந்தேபி ஸம்விஜ்ஜமானேபி தம் கம்மம் ஏதஸ்மிம்யேவ க²ணே விஜ்ஜமானம்பி வா ப²லஸ்ஸ பச்சயோ ஹோதி. அத² வாவிஜ்ஜமானகம் பச்சயோ ந ப⁴வேய்ய. ஏதஸ்மிம்யேவ க²ணே அவிஜ்ஜமானகம் கம்மம் வா ப²லஸ்ஸ பச்சயோ ஹோதி. ஸசே யதி³ விஜ்ஜமானம் ப²லஸ்ஸ பச்சயோ ஹோதி, தப்பவத்திக்க²ணேபன தஸ்ஸ கம்மஸ்ஸ பவத்திக்க²ணே தஸ்ஸ கம்மஸ்ஸ விஜ்ஜமானகாலே பன ஹேதுனா கம்மேனேவ ஸத்³தி⁴ம் பாகேன ப⁴விதப்³ப³ம். அத² வா அபரோ நயோ. விஜ்ஜமானம் நிருத்³த⁴ம் கம்மம் விபாகஸ்ஸ பச்சயோ யதி³ ப⁴வேய்ய, பவத்திக்க²ணதோ தஸ்ஸ கம்மஸ்ஸ பவத்திக்க²ணதோ புப்³பே³ வா காலே, தஸ்ஸ கம்மஸ்ஸ பவத்திக்க²ணதோ பச்சா² வா அவிஜ்ஜமானகாலேதி அத்தோ². நிச்சப²லம் ஸியாதி ஸப்³ப³தா³ கம்மபச்சயவிரஹிதம் ப²லம் ஸியாதி அத்தோ². ஆசரியேன வுச்சதே – ‘‘லோப⁴ம், பி⁴க்க²வே, பஜஹத², ஸோதாபத்திபடிலாபா⁴ய அஹமேவ பாடிபோ⁴கோ³’’திஆதீ³ஸு பாடே²ஸு பாடிபோ⁴கோ³ விய கம்மம் த³ட்ட²ப்³ப³ம். ஸோதாபத்திப²லம் விய கம்மதோ ஸம்பூ⁴தம் ப²லம் த³ட்ட²ப்³ப³ம். கடத்தாயேவ ஜனேஹி கடத்தாயேவ தம் கம்மம் ப²லஸ்ஸ பச்சயோ ஹோதி, அஸ்ஸ விஜ்ஜமானத்தம் ந ச ஹோதி, தஸ்ஸ அவிஜ்ஜமானஸ்ஸ கம்மஸ்ஸ விஜ்ஜமானதா வா ந ச நேவ ஹோதி.

621. அபி⁴த⁴ம்மாவதாரோயம் அபி⁴த⁴ம்மாவதாரோ அயம் பரமத்த²ப்பகாஸனோ பூ⁴தத்த²தீ³பனோ ஸோதூனம் புக்³க³லானம் பீதிபு³த்³தி⁴விவட்³ட⁴னோ பண்டி³தேஹி விவிதே⁴ஸு ஆரம்மணேஸு சித்தம் அனாமேத்வா ஸக்கச்சேன மனஸிகாரேன ஸோதப்³போ³.

இதி அபி⁴த⁴ம்மாவதாரடீகாய

புஞ்ஞவிபாகபச்சயனித்³தே³ஸவண்ணனா நிட்டி²தா.

நவமோ பரிச்சே²தோ³.