21. ஏகவீஸதிமோ பரிச்சே²தோ³

படிபதா³ஞாணத³ஸ்ஸனவிஸுத்³தி⁴னித்³தே³ஸவண்ணனா

1298. அட்ட²ஞாணவஸேனேவாதி உத³யப்³ப³யஞாணாதீ³னம் அட்ட²ன்னம் ஞாணானம் வஸேன. விபஸ்ஸனாசாரஸ்ஸ மத்த²கப்பத்தியா ஸங்கா²ருபேக்கா²ஞாணம் ஸிகா²பத்தா விபஸ்ஸனா. ஸிகா²பத்தி பனஸ்ஸா உத³யப்³ப³யஞாணாதீ³னம் அட்ட²ஞாணானம் வஸேனாதி ஆஹ ‘‘அட்ட²ஞாணவஸேனா’’தி. நவமந்தி ஸச்சானுலோமிகஞாணம். இதி உத³யப்³ப³யாதீ³னி அட்ட², இத³ஞ்ச நவமஞாணம் படிபதா³ஞாணத³ஸ்ஸனந்தி பவுச்சதி. படிபஜ்ஜதி ஏதாய அரியமக்³கோ³தி படிபதா³, உத³யப்³ப³யாதீ³னம் ஜானனட்டே²ன, பச்சக்க²தோ த³ஸ்ஸனட்டே²ன ஞாணத³ஸ்ஸனஞ்சாதி கத்வா.

1299. தானி பன ஞாணானி ஸரூபதோ த³ஸ்ஸேதும் ‘‘அட்ட² ஞாணானீ’’திஆதி³ வுத்தம். தத்த² உத³யப்³ப³யானுபஸ்ஸனாஞாணம் கிஞ்சாபி தீரணபரிஞ்ஞாய பதிட்ட²ம், ததா²பி யதா²வுத்தட்டே²ன படிபதா³ஞாணத³ஸ்ஸனம்பி ஹோதியேவாதி தம்பி இத⁴ வுத்தம். இதரத்த² பன உப்பன்னமத்தம் அப்பகு³ணம் ஸந்தா⁴ய வுத்தம். அப்பகு³ணஞ்ஹி நிச்சஸஞ்ஞாதி³பஹானஸித்³தி⁴யா பஹானபரிஞ்ஞாய அதி⁴ட்டா²னபூ⁴தம். யதோ தத³தி⁴க³மேன அட்டா²ரஸஸு மஹாவிபஸ்ஸனாஸு ஏகச்சா அதி⁴க³தாவ ஹோந்தி. ந ஹி உத³யப்³ப³யானம் பச்சக்க²தோ படிவேதே⁴ன வினா ஸாமஞ்ஞாகாரானம் தீரணமத்தேன ஸாதிஸயம் படிபக்க²ப்பஹானம் ஸம்ப⁴வதி. அஸதி ச படிபக்க²ப்பஹானே குதோ ஞாணாதீ³னம் வஜிரமிவ அவிஹதவேக³தா திகி²ணவிஸதா³தி³தா வா, தஸ்மா பகு³ணபா⁴வப்பத்தம் உத³யப்³ப³யஞாணம் பஹானபரிஞ்ஞாபக்கி²யமேவ த³ட்ட²ப்³ப³ம்.

1300-2. ப⁴ங்கே³தி ஸங்கா²ரானம் ப⁴ங்கே³. யதா²பூ⁴தத³ஸ்ஸாவீ பா⁴யதி ஏதஸ்மாதி ப⁴யம், தேபூ⁴மகத⁴ம்மா, தேஸு ப⁴யதோ உபதிட்ட²ந்தேஸு பா⁴யிதப்³பா³காரக்³கா³ஹிஞாணம் ப⁴யேஞாணம். ததா² ஹேதம் ‘‘ப⁴யதுபட்டா²னஞாண’’ந்தி வுச்சதி. முச்சிதும் இச்ச²தீதி முச்சிதுகம்யம், சித்தம், புக்³க³லோ வா, தஸ்ஸ பா⁴வோ முச்சிதுகம்யதா, தம் பன ஞாணமேவாதி ஆஹ ‘‘ஞாணம் முச்சிதுகம்யதா’’தி. புன படிஸங்கா²னாகாரேன பவத்தம் ஞாணம் படிஸங்கா²னுபஸ்ஸனாஞாணம். நிரபேக்க²தாய ஸங்கா²ரானம் உபேக்க²னவஸேன பவத்தம் ஞாணம் ஸங்கா²ருபேக்கா²ஞாணம். கா³தா²ப³ந்த⁴த்த²ம் பன விஸந்தி⁴னித்³தே³ஸோ. ஓளாரிகோளாரிகஸ்ஸ ஸச்சபடிச்சா²த³கதமஸ்ஸ விக³மனேன ஸச்சபடிவேதா⁴னுகூலத்தா ஸச்சானுலோமிகம். தம் பன இத³ந்தி ஆஹ ‘‘ஸச்சானுலோமஞாணந்தி, அனுலோமம் பவுச்சதீ’’தி.

1303. நனு ச உத³யப்³ப³யஞாணஸ்ஸ பகே³வ ஸித்³த⁴த்தா கிமத்த²ம் புன தத்தா²பி அபி⁴யோகோ³தி சே? அனிச்சாதி³லக்க²ணஸல்லக்க²ணத்த²ம். உத³யப்³ப³யஞாணஞ்ஹி ஹேட்டா² த³ஸஹி உபக்கிலேஸேஹி உபக்கிலிட்ட²ம் ஹுத்வா யாதா²வஸரஸதோ திலக்க²ணம் ஸல்லக்கே²தும் நாஸக்கி², உபக்கிலேஸவினிமுத்தம் பன ஸக்கோதி, தஸ்மா லக்க²ணஸல்லக்க²ணத்த²ம் புன தத்தே²வ யோகோ³ காதப்³போ³. லக்க²ணானி சஸ்ஸ உத³யப்³ப³யாதீ³னம் அமனஸிகாரா, ஸந்ததிஇரியாபத²க⁴னச²ன்னதாய ச நோபட்ட²ஹந்தி, தஸ்மா உத³யப்³ப³யம் மனஸி கத்வா ஸந்ததிம் உக்³கா⁴டேத்வா அனிச்சலக்க²ணம், அபி⁴ண்ஹபீளனம் பரிக்³க³ஹேத்வா இரியாபத²ம் உக்³கா⁴டேத்வா து³க்க²லக்க²ணம், தா⁴துயோ வினிப்³பு⁴ஜித்வா க⁴னவினிப்³போ⁴க³ம் கத்வா அனத்தலக்க²ணஞ்ச ஸல்லக்கே²த்வா ‘‘அனிச்சா து³க்கா² அனத்தா’’தி ஸங்கா²ரா புனப்புனம் ஸம்மஸிதப்³பா³. தஸ்ஸேவம் துலயதோ தீரயதோ யதா³ ஸங்கா²ரக³தம் அத்தனோ லஹுஉபட்டா²னேன, ஞாணஸ்ஸ ச திக்க²தாய திரோஹிதுப்பாதா³தி³பே⁴த³ம் பி⁴ஜ்ஜமானமேவ உபட்டா²தி, ப⁴ங்கே³யேவ தஸ்ஸ ஞாணம் ஸந்திட்ட²தி, ததா³ ப⁴ங்கா³னுபஸ்ஸனா நாம விபஸ்ஸனாஞாணம் அதி⁴க³தம் ஹோதி. தஸ்ஸ ததே³வ ஸங்கா²ரனிரோதா⁴ரம்மணப⁴ங்கா³னுபஸ்ஸனம் ஆஸேவந்தஸ்ஸ யதா³ ஸப்³ப³ப⁴வயோனிக³திட்டி²தினிவாஸேஸு ஸங்கா²ரா பி⁴ஜ்ஜனஸபா⁴வதாய யக்க²ரக்க²ஸாத³யோ விய மஹாப⁴யம் ஹுத்வா உபட்ட²ஹந்தி, ததா³ஸ்ஸ ப⁴யதுபட்டா²னஞாணம் அதி⁴க³தம் ஹோதி. கிம் பனித³ம் ஞாணம் பா⁴யதீதி? ந பா⁴யதி. தஞ்ஹி ‘‘அதீதா ஸங்கா²ரா நிருத்³தா⁴, பச்சுப்பன்னா நிருஜ்ஜ²ந்தி, அனாக³தா நிருஜ்ஜி²ஸ்ஸந்தீ’’தி தீரணமத்தமேவ ஹோதி, ப்³யஸனாபன்னானம் பன ஸப்³ப³ஸங்கா²ரானம் ப⁴யதோ உபட்டி²தானம் க³ஹணேன ப⁴யதுபட்டா²னஞாணந்தி வுச்சதீதி.

தஸ்ஸ தம் ப⁴யதுபட்டா²னஞாணம் ஆஸேவந்தஸ்ஸ யதா³ ஸப்³ப³ப⁴வக³தேஸு ஸங்கா²ரேஸு தாணம் வா லேணம் வா பராயணம் வா ந பஞ்ஞாயதி, உக்கி²த்தாஸிகோ விய பச்சாமித்தோ ஸாதீ³னவா ஏவ ஸங்கா²ரா உபட்ட²ஹந்தி, தஸ்ஸ ஸங்கா²ரானம் ஆதீ³னவமேவ பஸ்ஸந்தஸ்ஸ ஆதீ³னவஞாணம் நாம உப்பன்னம் ஹோதி. தஸ்ஸேவம் ஸப்³ப³ஸங்கா²ரே ஆதீ³னவதோ பஸ்ஸந்தஸ்ஸ யதா³ திப⁴வபரியாபன்னேஸு நிப்³பே³தோ³ உப்பஜ்ஜதி, உக்கண்டா² ஸண்ட²ஹந்தி, ஸப்³ப³ஸங்கா²ரவிஸம்யுத்தே ஸந்திபதே³ அபி⁴ரதிம் படிலப⁴தி, ததா³ஸ்ஸ நிப்³பி³தா³னுபஸ்ஸனம் நாம ஞாணம் உப்பன்னம் ஹோதி. தஸ்ஸ யதா³ இமினா நிப்³பி³தா³ஞாணேன ஸப்³ப³ஸங்கா²ரேஸு நிப்³பி³ந்த³ந்தஸ்ஸ ஏகஸங்கா²ரேபி சித்தம் ந ஸஜ்ஜதி, ஸப்³ப³ஸ்மா ஸங்கா²ரதோ ஸப்பமுக²க³தஸ்ஸ விய மண்டூ³கஸ்ஸ முச்சிதுகாமதா உப்பஜ்ஜதி, ததா³ முச்சிதுகம்யதாஞாணம் நாம உப்பன்னம் ஹோதி. தஸ்ஸேவம் ஸப்³ப³ஸங்கா²ரேஹி முச்சிதுகாமஸ்ஸ நிச்சஸுக²ஸுப⁴அத்தாகாரேன பன உபட்டி²தும் அஸமத்த²தம் பாபேத்வா முச்சனஸ்ஸ உபாயஸம்பாத³னத்த²ம் அனிச்சந்திகதாதீ³ஹி அனிச்சலக்க²ணம், அபி⁴ண்ஹபடிபீளனதாதீ³ஹி து³க்க²லக்க²ணம், அஜஞ்ஞகதாதீ³ஹி படிக்கூலதம், துச்ச²தாதீ³ஹி அனத்தலக்க²ணஞ்ச ஆரோபேத்வா ஸப்³ப³ஸங்கா²ரக³தம் பரிக்³க³ண்ஹந்தஸ்ஸ படிஸங்கா²னுபஸ்ஸனாஞாணம் நாம உப்பன்னம் ஹோதி. தேன பனேவம் பரிக்³க³ஹிதஸங்கா²ரேன யா ஸா ‘‘ஸுஞ்ஞமித³ம் அத்தேன வா அத்தனியேன வா’’திஆதி³னா த்³விகோடிகாதி³பே⁴தா³ ஸுஞ்ஞதா வுத்தா, ஸா பரிக்³க³ஹேதப்³பா³. தஸ்ஸேவம் ஸுஞ்ஞதோ தி³ஸ்வா திலக்க²ணம் ஆரோபேத்வா ஸம்மஸந்தஸ்ஸ யதா³ ப⁴யஞ்ச நந்தி³ஞ்ச விப்பஹாய விஸ்ஸட்ட²ப⁴ரியஸ்ஸ விய ஸங்கா²ரக³தேஸு உபேக்கா² ஸந்திட்ட²தி, தீஸு ப⁴வேஸு சித்தம் ந ஸம்பஸாரியதி, ததா³ஸ்ஸ ஸங்கா²ருபேக்கா²ஞாணம் நாம உப்பன்னம் ஹோதி. தம் பனேதம் யாவ நிப்³பா³னம் ந பஸ்ஸதி, தாவ தி³ஸாகாகோ விய கூபகயட்டி²ம் புனப்புனம் ஸங்கா²ரமேவ அனபி⁴மதம்பி நிஸ்ஸாய ஸங்கா²ரவிசினனேபி மஜ்ஜ²த்தமேவ ஹுத்வா திட்ட²தி. தேன வுத்தம் ‘‘ஏதேஸு பன ஞாணேஸூ’’திஆதி³.

1306. விபஸ்ஸனா…பே… வுட்டா²னகா³மினீதி ஸிக²ம் உத்தமபா⁴வம் பத்தத்தா ஸிகா²பத்தா. வுட்டா²னம் க³ச்ச²தீதி வுட்டா²னகா³மினீ. ‘‘வுட்டா²ன’’ந்தி ஹி ப³ஹித்³தா⁴ நிமித்தபூ⁴தா அபி⁴னிவிட்ட²வத்து²தோ சேவ அஜ்ஜ²த்தப்பவத்ததோ ச வுட்ட²ஹனதோ மக்³கோ³ வுச்சதி, தம் க³ச்ச²தீதி வுட்டா²னகா³மினீ, மக்³கே³ன ஸத்³தி⁴ம் க⁴டீயதீதி அத்தோ².

1307. தந்தி யம் ஸிகா²பத்தா விபஸ்ஸனா ஸச்சானுலோமஞாணந்தி ச வுச்சதி, தம் ஸங்கா²ருபேக்கா²ஞாணம். ஆஸேவந்தஸ்ஸாதி புனப்புனம் ஸம்மஸனவஸேன ஸேவந்தஸ்ஸ பா⁴வேந்தஸ்ஸ ப³ஹுலீகரோந்தஸ்ஸ. தஸ்ஸ ஹி அதி⁴மோக்க²ஸத்³தா⁴ பா⁴வனாவஸேன ப³லவதரா நிப்³ப³த்திஸ்ஸதி, வீரியம் ஸுபக்³க³ஹிதம் படிபக்க²வித⁴மனஸமத்த²ம் ஹோதி, ஆரம்மணாபி⁴முக²பா⁴வேன ஸதி ஸுபதிட்டி²தா ஹோதி, பஸ்ஸத்³தி⁴ஸுகா²னம் ஸாதிஸயதாய சித்தம் ஸுஸமாஹிதம், ததோவ அனுலோமஞாணுப்பத்தியா பச்சயோ ப⁴விதும் ஸமத்தா² திக்க²தமா ஸங்கா²ருபேக்கா² உப்பஜ்ஜதி.

1308-12. அனிச்சா…பே… வோதரதேவ ஸாதி அனிச்சாதீ³ஸு ஏகேன ஆகாரேன ஸம்மஸந்தீ ஸத்தக்க²த்தும் பவத்தித்வா பி⁴ஜ்ஜந்தீ ப⁴வங்க³ம் ஓதிண்ணா நாம ஹோதி, ததோ பரம் ப⁴வங்க³வாரோதி கத்வா. ஸங்கா²ருபேக்கா²கதனயேனாதி அனிச்சாதி³னா ஆரம்மணகரணவஸேனேவ ஸங்கா²ருபேக்கா²ய கதனயேன, ந ஸம்மஸிதனயேன. தேனாஹ ‘‘அனிச்சாதி³…பே… குருமான’’ந்தி. ப⁴வங்கா³வட்டனம் கத்வாதி ப⁴வங்க³ஸ்ஸ நிவத்தனம் கத்வா சித்தஸ்ஸ ப⁴வங்க³வஸேன பவத்திதும் அத³த்வா. பரிகம்மந்தி மக்³க³ஸ்ஸ பரிகம்மத்தா படிஸங்கா²ரகத்தா. உபசாரந்தி மக்³க³ஸ்ஸ ஆஸன்னத்தா, ஸமீபசாரித்தா வா.

1313-6. அனுலோமத்தம் ஸயமேவ வத³தி ‘‘புரிமான’’ந்திஆதி³னா. இத³ஞ்ஹி அனிச்சலக்க²ணாதி³வஸேன ஸங்கா²ரே ஆரப்³ப⁴ பவத்தத்தா, ‘‘உத³யப்³ப³யவந்தானம்யேவ வத த⁴ம்மானம் உத³யப்³ப³யஞாணம் உப்பாத³வயே அத்³த³ஸா’’தி ச ‘‘ப⁴ங்க³வந்தானம்யேவ வத ப⁴ங்கா³னுபஸ்ஸனம் ப⁴ங்க³மத்³த³ஸா’’தி ச ‘‘ஸப⁴யம்யேவ வத ப⁴யதுபட்டா²னஸ்ஸ ப⁴யதோ உபட்டி²த’’ந்தி ச ‘‘ஸாதீ³னவேயேவ வத ஆதீ³னவானுபஸ்ஸனம் ஆதீ³னவமத்³த³ஸா’’தி ச ‘‘நிப்³பி³ந்தி³தப்³பே³யேவ வத நிப்³பி³தா³ஞாணம் நிப்³பி³ந்த³’’ந்தி ச ‘‘முச்சிதப்³ப³ம்ஹியேவ வத முச்சிதுகம்யதாஞாணம் முச்சிதுகாமம் ஜாத’’ந்தி ச ‘‘படிஸங்கா²தப்³ப³மேவ வத படிஸங்கா²ஞாணேன படிஸங்கா²த’’ந்தி ச ‘‘உபேக்கி²தப்³ப³ம்யேவ வத ஸங்கா²ருபேக்கா²ய உபேக்கி²த’’ந்தி ச அத்த²தோ வத³மானம் விய இமேஸஞ்ச அட்ட²ன்னம் ஞாணானம் கதகிச்சதாய அனுலோமேதி ஸப்³பா³ஸம்யேவ விபஸ்ஸனானம் லக்க²ணத்தயஸம்மஸனகிச்சத்தா, ததா² உபரி ச அரியமக்³கே³ ஸத்ததிம்ஸாய போ³தி⁴பக்கி²யத⁴ம்மானம் தாய படிபதா³ய பத்தப்³ப³தாய. ந ஹி அனுலோமஞாணே தூ²லதூ²லஸச்சபடிச்சா²த³கஸம்கிலேஸவிக்க²ம்ப⁴னவஸேன அப்பவத்தந்தே கோ³த்ரபு⁴ஞாணம் உப்பஜ்ஜதி, கோ³த்ரபு⁴ஞாணே ச அனுப்பன்னே மக்³க³ஞாணம் ந உப்பஜ்ஜதி, தஸ்மா புரிமபச்சி²மானம் பா⁴கா³னம் அனுலோமத்தா ‘‘அனுலோமந்தி ஸஞ்ஞித’’ந்தி. தேனேவாதி ஹேட்டி²மஞாணானம் அனுலோமமுகே²ன, உபரி போ³தி⁴பக்கி²யானம் அனுலோமனதோ ச. ஸச்சானுலோமஞாணந்தி பவுச்சதி மக்³க³ஸச்சஸ்ஸ அனுலோமிகத்தா. வுட்டா²னகா³மினியாதி ஸங்கா²ராரம்மணாய வுட்டா²னகா³மினியா விபஸ்ஸனாய. பரியோஸானந்தி புரிமா கோடி. ஸங்கா²ராரம்மணவிபஸ்ஸனாஸு ஹி அயம் விஸேஸதோ வுட்டா²னகா³மினிவிபஸ்ஸனாதி. அஸங்க²தாரம்மணம் பன ஸப்³பே³ன ஸப்³ப³ம் அரியமக்³க³ஸங்கா²தம் வுட்டா²னம் க³ச்ச²தி உபேதீதி. ததோபி ஹி விஸேஸதோ ‘‘வுட்டா²னகா³மினிவிபஸ்ஸனா’’தி வத்தப்³ப³தம் லப⁴தீதி ஆஹ ‘‘ஞேய்யம் ஸப்³ப³ப்பகாரேனா’’திஆதி³.

1317-8. கித்திதாதி தோ²மிதா, அரியமக்³கா³தி⁴ட்டா²னதாய மஹந்தானம் ஸீலக்க²ந்தா⁴தீ³னம் ஏஸனதோ க³வேஸனதோ மஹேஸினா ஸம்மாஸம்பு³த்³தே⁴ன. ஸந்தகிலேஸதாய ஸந்தா. யோக³ந்தி பா⁴வனம், பா⁴வனாபி⁴யோக³ம் வா.

இதி அபி⁴த⁴ம்மத்த²விகாஸினியா நாம

அபி⁴த⁴ம்மாவதாரஸம்வண்ணனாய

படிபதா³ஞாணத³ஸ்ஸனவிஸுத்³தி⁴னித்³தே³ஸவண்ணனா நிட்டி²தா.