10. த³ஸமோ பரிச்சே²தோ³

ரூபவிபா⁴க³வண்ணனா

622. ஆதி³ம்ஹீதி உத்³தே³ஸகா³தா²யம். இதா³னீதி சித்தசேதஸிகவிபா⁴வனானந்தரம். விபா⁴வனந்தி நித்³தே³ஸபடினித்³தே³ஸவஸேன ஸரூபதோ பகாஸனம்.

623. ருப்பதீதி ஸீதுண்ஹாதீ³ஹி விகாரமாபஜ்ஜதி, ஆபாதீ³யதீதி வா அத்தோ². விகாராபத்தி ச ஸீதாதி³விரோதி⁴பச்சயஸன்னிதா⁴னே விஸதி³ஸுப்பத்தியேவ. ந ஹி யதா²ஸகம் பச்சயேஹி உப்பஜ்ஜித்வா டி²தத⁴ம்மானம் அஞ்ஞேன கேனசி விகாராபாத³னம் ஸக்கா காதும், தஸ்மா புரிமுப்பன்னரூபஸந்ததி விய அஹுத்வா பச்சா² உப்பஜ்ஜமானானம் விஸபா⁴க³பச்சயஸமவாயேன விஸதி³ஸுப்பத்தியேவ இத⁴ ‘‘ருப்பன’’ந்தி த³ட்ட²ப்³ப³ம். ஏவஞ்ச கத்வா ஸங்கி⁴யானம் விபரிணாமவாதோ³ பச்சக்க²தோ ஹோதி. நனு ச அரூபத⁴ம்மானம்பி விரோதி⁴பச்சயஸமவாயே விஸதி³ஸுப்பத்தி லப்³ப⁴தீதி? ஸச்சம் லப்³ப⁴தி, ந பன விபூ⁴ததரா. விபூ⁴ததரா ஹேத்த² விஸதி³ஸுப்பத்தி அதி⁴ப்பேதா உக்கட்ட²க³திவஸேன யதா² ‘‘அபி⁴ரூபஸ்ஸ கஞ்ஞா தா³தப்³பா³’’தி (ஸம். நி. 3.78).

குதோ ஏதம் விஞ்ஞாயதீதி சே? ஸீதாதி³க்³க³ஹணதோ. ததா² ஹி வுத்தம் –

‘‘கிஞ்ச, பி⁴க்க²வே, ரூபம் வதே³த², ருப்பதீதி கோ², பி⁴க்க²வே, தஸ்மா ரூபந்தி வுச்சதி. கேன ருப்பதி? ஸீதேனபி ருப்பதி, உண்ஹேனபி ருப்பதி, ஜிக⁴ச்சா²யபி ருப்பதி, பிபாஸாயபி ருப்பதி, ட³ம்ஸமகஸவாதாதபஸரீஸபஸம்ப²ஸ்ஸேனபி ருப்பதி, ருப்பதீதி கோ², பி⁴க்க²வே, தஸ்மா ரூபந்தி வுச்சதீ’’தி (ஸம். நி. 3.79).

ஏத்த² ஹி ஸீதாதி³க்³க³ஹணம் ஸீதாதி³னா பு²ட்ட²ஸ்ஸ ருப்பனம் விபூ⁴ததரம், தஸ்மா ததே³வேத்த² க³ஹிதந்தி ஞாபனத்த²ம். இதரதா² ருப்பதீதி ஸாமஞ்ஞவசனேனேவ ஸித்³தே⁴ ஸீதாதி³க்³க³ஹணம் நிரத்த²கம் ஸியாதி.

யதி³ ஏவம், கத²ம் ப்³ரஹ்மலோகே ரூபஸமஞ்ஞா? ந ஹி தத்த² உபகா⁴தகோ ஸீதாதி³ப²ஸ்ஸவிஸேஸோ லப்³ப⁴தீதி? ஸச்சம், தத்தா²பி தம்ஸபா⁴வானதிவத்தனதோ. அருப்பனஸ்ஸாபி ஹி ருப்பனஸபா⁴வானதிவத்தனதோ ரூபஸமஞ்ஞா ஹோதி. யதா² அது³த்³த⁴ம்பி கீ²ரம் தம்ஸபா⁴வானதிவத்தனதோ ‘‘து³த்³த⁴’’ந்தி வுச்சதீதி. அத² வா கிஞ்சாபி தத்த² உபகா⁴தகோ ஸீதாதி³ப²ஸ்ஸவிஸேஸோ நத்தி², அனுக்³கா³ஹகோ பன அத்தி². ததா² ஹி ப்³ரஹ்மானம் உதுஜரூபம் அத்தி², தஸ்மா அத்தே²வ தத்த² ருப்பனந்தி ந கோசி தத்த² ரூபஸமஞ்ஞாய விப³ந்தோ⁴தி.

ரூபயதீதி வாதி ஸயம் விஜ்ஜமானமேவ அத்தனோ ஸந்தானம் விகாரமாபாத³யதீதி அத்தோ². இதி புரிமவிக்³க³ஹேன விகாருப்பத்தி ‘‘ருப்பன’’ந்தி தீ³பிதம். இமினா பன விரோதி⁴பச்சயஸன்னிபாதே விஜ்ஜமானஸ்ஸேவ யோ அத்தனோ ஸந்தானே விஸதி³ஸுப்பத்திஹேதுபா⁴வோ, தம் ருப்பனந்தி தீ³பிதம் ஹோதி. இமஸ்மிம் பக்கே² அரூபஸ்ஸ ரூபஸமஞ்ஞாபஸங்கோ³ ஏவ நத்தி². நிருத்³த⁴மேவ ஹி தம் அனந்தராதி³பச்சயேஹி அரூபம் உப்பாதே³தி, ந விஜ்ஜமானந்தி. க⁴ட்டனே விகாராபத்தியம் ரூப-ஸத்³த³ஸ்ஸ ருள்ஹீ, தஸ்மா அரூபத⁴ம்மானம் க⁴ட்டனாபா⁴வதோ ந தேஸு ரூபஸமஞ்ஞாதி கேசி. படிகா⁴தோ ருப்பனந்தி அபரே, தேஸம் மதேன கிஞ்சாபி ஸப்படிக⁴ரூபானமேவ ரூபஸமஞ்ஞாபஸங்கோ³, அத² கோ² அவயவவோஹாரேன ஸமுதா³யோபி வோஹரீயதீதி ஸப்³ப³மேவ ரூபம் ரூபஸமஞ்ஞம் லப⁴தி. கேசி பனேத்த² ‘‘ரூபயதீதி வண்ணாயதனவஸேன வுத்த’’ந்தி வத³ந்தி. தஞ்ஹி வண்ணவிகாரம் ஆபஜ்ஜமானம் ரூபயதி, ஹத³யங்க³தபா⁴வம் பகாஸேதீதி. தயித³ம் உபரி வண்ணாயதனனித்³தே³ஸே விஸும்யேவ வுச்சதீதி ந தஸ்ஸ இத⁴ ஸம்வண்ணனே பயோஜனம் அத்தி². ஸுரூபோதி த்³வத்திம்ஸமஹாபுரிஸலக்க²ணஅஸீதிஅனுப்³யஞ்ஜனப்³யாமப்பபா⁴கேதுமாலாதீ³ஹி அலங்கதத்தா ஸோப⁴னரூபகாயோ, ஸபா⁴வத்தோ² வா ரூப-ஸத்³தோ³ ‘‘யம் லோகே பியரூபம் ஸாதரூப’’ந்திஆதீ³ஸு (படி. ம. 1.114) விய, தஸ்மா ஸுரூபோதி ஸோப⁴னஸபா⁴வோ, தேன த³ஸப³லசதுவேஸாரஜ்ஜாதி³அஸாதா⁴ரணகு³ணவிஸேஸஸமாயோக³தீ³பனதோ ஸத்து² த⁴ம்மகாயஸம்பத்தியாபி ஸோப⁴னதா த³ஸ்ஸிதா ஹோதி.

624. பூ⁴தோபாதா³யபே⁴த³தோதி ஏத்த² தத³தீ⁴னவுத்திதாய ப⁴வதி ஏத்த² உபாதா³ரூபந்தி பூ⁴தம். அத² வா மஹாபூ⁴தாயேவ இத⁴ புரிமபத³லோபவஸேன பூ⁴த-ஸத்³தே³ன வுத்தா. தேனாஹ ‘‘சதுப்³பி³தா⁴ மஹாபூ⁴தா’’தி. பூ⁴தானி உபாதி³யதேவ, ந பன ஸயம் தேஹி அஞ்ஞேஹி வா உபாதி³யதீதி உபாதா³யம். ஏவஞ்ச கத்வா சதுன்னம் மஹாபூ⁴தானம் அஞ்ஞமஞ்ஞம் நிஸ்ஸாய பவத்தமானானம்பி உபாதா³யரூபதாபஸங்கோ³ நத்தி². ந ஹி தே கேவலம் அஞ்ஞமஞ்ஞம் உபாதி³யந்தேவ, அத² கோ² ஸயம் உபாதா³யரூபேஹி உபாதி³யந்தி, தஸ்மா உபாதா³ய-ஸத்³த³க்³க³ஹணஸாமத்தி²யதோ ந மஹாபூ⁴தானம் உபாதா³யரூபதாபஸங்கோ³தி. அத² வா ‘‘சதுன்னம் மஹாபூ⁴தானம் உபாதா³யரூப’’ந்தி (த⁴. ஸ. 584) வசனதோ சதுமஹாபூ⁴தஸன்னிஸ்ஸிததாவ உபாதா³யரூபலக்க²ணம், ந பூ⁴தத்தயாதி³ஸன்னிஸ்ஸிததாபீதி ந தேஸம் உபாதா³யரூபதாதி. பூ⁴தஞ்ச உபாதா³யஞ்ச பூ⁴தோபாதா³யம், தேஸம் வஸேன பே⁴த³தோதி பூ⁴தோபாதா³யபே⁴த³தோ. பூ⁴தஸத்³த³ஸ்ஸ உப⁴யலிங்க³த்தா ஆஹ ‘‘மஹாபூ⁴தா’’தி. உபாதா³தி உபாதா³யரூபானி ‘‘படிஸங்கா² யோனிஸோ’’திஆதீ³ஸு விய ஏத்த² ய-காரலோபோ த³ட்ட²ப்³போ³.

625. கதமே பன சத்தாரோ மஹாபூ⁴தா, கத²ஞ்ச தே மஹாபூ⁴தஸஞ்ஞிதா, கானி ச உபாதா³யரூபானி, கத²ஞ்ச தானி ‘‘உபாதா³யரூபானீ’’தி வுச்சந்தீதி இத³ம் சோத³னம் ஹத³யே கத்வா கமேன ஸோதே⁴ந்தோ ஆஹ ‘‘பத²வீதா⁴தூ’’திஆதி³. சத்தாரோமேதி சத்தாரோ இமே. மஹா ச ஸோ பூ⁴தோ சாதி மஹாபூ⁴தோ, தேன மஹாபூ⁴தேன ஸதே³வகே லோகே மஹந்தபா⁴வேன பாதுபூ⁴தேன ஸம்மாஸம்பு³த்³தே⁴னாதி அத்தோ². அத² வா –

‘‘காலோ க⁴ஸதி பூ⁴தானி,

ஸப்³பா³னேவ ஸஹத்தனா;

யோ ச காலக⁴ஸோ பூ⁴தோ,

ஸ பூ⁴தபசனிம் பசீ’’தி. (ஜா. 1.2.190) –

ஆதீ³ஸு விய பூ⁴த-ஸத்³த³ஸ்ஸ ஸத்தேஸு, கீ²ணாஸவேஸு ச பவத்தனதோ மஹாபூ⁴தேனாதி மஹதா ஸத்தேன, மஹாகீ²ணாஸவேனாதி வா அத்தோ². கீ²ணாஸவோபி ஹி பரிக்கீ²ணபடிஸந்தி⁴கத்தா பூ⁴தோயேவ ந ப⁴வதி, ந ச ப⁴விஸ்ஸதீதி பூ⁴தோதி வுச்சதி.

626. மஹந்தா பாதுபூ⁴தாதி உபாதி³ன்னகஸந்தானேபி அனுபாதி³ன்னகஸந்தானேபி ஸஸம்பா⁴ரதா⁴துவஸேன மஹந்தா ஹுத்வா பூ⁴தா ஜாதா நிப்³ப³த்தாதி அத்தோ². தேஸம் அனுபாதி³ன்னகஸந்தானே –

‘‘து³வே ஸதஸஹஸ்ஸானி, சத்தாரி நஹுதானி ச;

ஏத்தகம் ப³ஹலத்தேன, ஸங்கா²தாயம் வஸுந்த⁴ரா’’தி. (த⁴. ஸ. அட்ட². 584) –

ஆதி³னா நயேன மஹந்தபாதுபூ⁴ததா வுத்தா. உபாதி³ன்னகஸந்தானேபி அனேகயோஜனஸதிகமச்ச²கச்ச²பதிகா³வுதப்பமாணதே³வதா³னவாதி³ஸரீரவஸேன த³ட்ட²ப்³பா³. வுத்தம்பி ஹேதம் ‘‘ஸந்தி, பி⁴க்க²வே, மஹாஸமுத்³தே³ யோஜனஸதிகாபி அத்தபா⁴வா’’திஆதி³ (அ. நி. 8.20; சூளவ. 385; உதா³. 45).

மஹாபூ⁴தஸமாதி அனேகப்³பு⁴தவிஸேஸத³ஸ்ஸனேன, அனேகபூ⁴தத³ஸ்ஸனேன ச மஹந்தா பூ⁴தா, மஹந்தானி அப்³பு⁴தானி வா ஏதேஸூதி மஹாபூ⁴தா, மாயாகாரா, யக்கா²த³யோ வா ஜாதிவஸேனேவ மஹந்தா பூ⁴தாதி மஹாபூ⁴தா, தேஹி ஏதே ஸமாதி மஹாபூ⁴தஸமா. ஏதே ஹி யதா² மாயாகாரா அமணிம் ஏவ உத³கம் மணிம் கத்வா த³ஸ்ஸேந்தி, அஸுவண்ணம்யேவ லேட்³டு³ஆதி³கம் ஸுவண்ணம் கத்வா த³ஸ்ஸேந்தி, யதா² ச ஸயம் நேவ யக்கா² ந பக்கி²னோ ஸமானா யக்கா²தி³பா⁴வம்பி த³ஸ்ஸேந்தி, ஏவமேவம் ஸயம் அனீலானேவ ஹுத்வா நீலம் உபாதா³யரூபம் த³ஸ்ஸேந்தி, ஸயம் அபீதாயேவ…பே… ஸயம் அனோதா³தாயேவ ஹுத்வா ஓதா³தம் உபாதா³யரூபம் த³ஸ்ஸேந்தீதி மாயாகாரமஹாபூ⁴தஸாமஞ்ஞதோ மஹாபூ⁴தா.

யதா² ச யக்கா² மஹாபூ⁴தா யம் க³ண்ஹந்தி, நேவஸ்ஸ அந்தோஸரீரே டா²னம் உபலப்³ப⁴தி, ந ஸரீரதோ ப³ஹி, ந ச தஸ்ஸ அங்க³மங்க³ம் நிஸ்ஸாய ந திட்ட²ந்தி. யதி³ ஹி ஸரீரஸ்ஸ அந்தோ டி²தா, ஸகலஸரீரே ப்³யாபனம் ந ஸியா. அத² ப³ஹி டி²தா, யக்க²க்³க³ஹிதகேன கதகுஸலாகுஸலம் யக்க²ஸ்ஸ ந ஸியா. யதி³ சஸ்ஸ அங்க³மங்க³ம் நிஸ்ஸாய ந டி²தா, யக்க²க்³க³ஹிதகே பஹடே யக்க²ஸ்ஸ து³க்க²வேத³னுப்பத்தி ந ஸியா, ந ச ஸரீரே ராஜிஉட்டா²னம் ப⁴வேய்ய. யஸ்மா பனேதம் ஸப்³ப³ம் அத்தி², தஸ்மா தே அனித்³தி³ஸிதப்³ப³ட்டா²னா, ஏவமேதேபி ந அஞ்ஞமஞ்ஞஸ்ஸ அந்தோ ந ப³ஹி டி²தா உபலப்³ப⁴ந்தி, ந ச அஞ்ஞமஞ்ஞம் நிஸ்ஸாய ந திட்ட²ந்தி. யதி³ ஹி தே அஞ்ஞமஞ்ஞஸ்ஸ அந்தோ டி²தா, ந ஸகஸககிச்சகரா ஸியும் அஞ்ஞமஞ்ஞம் அனுபவேஸனதோ. அத² அஞ்ஞமஞ்ஞதோ ப³ஹி டி²தா, வினிப்³பு⁴த்தா ஸியும், ததா² ச ஸதி அவினிப்³பு⁴த்தவாதோ³ பரிஹாயேய்ய, தஸ்மா அனித்³தி³ஸிதப்³ப³ட்டா²னாதி. யக்க²மஹாபூ⁴தஸமானதாய மஹாபூ⁴தஸமா. அனித்³தி³ஸிதப்³ப³ட்டா²னாபி சேதே பதிட்டா²னாதி³னா யதா²ஸககிச்சவிஸேஸேன ஸேஸானம் திண்ணம் உபகாரகா ஹோந்தா ஸஹஜாதாதி³னா பச்சயேன பச்சயோ ஹுத்வா அஞ்ஞமஞ்ஞம் நிஸ்ஸாயேவ திட்ட²ந்தி.

வஞ்சகத்தா அபூ⁴தேனாதி யக்கி²னீஆத³யோ விய அபூ⁴தேன அதச்சே²ன மனாபவண்ணஸண்டா²னாதி³னா ஸத்தானம் வஞ்சகத்தா மஹந்தானி அபூ⁴தானி ஏதேஸூதி மஹாபூ⁴தாதி ஸம்மதா. யதா² ஹி யக்கி²னீஆத³யோ மனாபேஹி காளஸாமாதி³வண்ணேஹி, புது²லபீவரகிஸாதி³ஸண்டா²னேஹி, ஹத்த²ப⁴முஆதி³விக்கே²பேஹி ச அத்தனோ ப⁴யானகபா⁴வம் படிச்சா²தே³த்வா ஸத்தே வஞ்சேந்தி, அத்தனோ வஸம் நேந்தி, ஏவமேதேபி இத்தி²புரிஸாதீ³ஸு மனாபேன ச²விவண்ணேன, மனாபேன அங்க³பச்சங்க³ஸண்டா²னேன, மனாபேன ச ஹத்த²பாத³அங்கு³லிப⁴முகவிக்கே²பேன அத்தனோ கக்க²ளத்தாதி³ஸரீரலக்க²ணம் படிச்சா²தே³த்வா பா³லஜனம் வஞ்சேந்தி, அத்தனோ ஸபா⁴வம் த³ட்டு²ம் ந தே³ந்தா தம் அத்தனோ வஸம் நேந்தி.

627-30. சக்கு²ஸோதந்திஆதீ³ஸு ரூபமேவ ரூபதா. ஹத³யஞ்ச தம் வத்து² ச மனோதா⁴துமனோவிஞ்ஞாணதா⁴தூனந்தி ஹத³யவத்து², ஹத³யஸ்ஸ வா விஞ்ஞாணஸ்ஸ வத்தூ²தி ஹத³யவத்து², புரிமபத³லோபேன பன ‘‘வத்து²’’ந்தி வுத்தம். கப³ளீகாரோ ஆஹாரோயேவ ஆஹாரதா. கிஞ்சாபி த⁴ம்மஸங்க³ணியம் ரூபனித்³தே³ஸே கப³ளீகாரோ ஆஹாரோ ஓஸானே உத்³தி³ட்டோ², இத⁴ பன நிப்ப²ன்னரூபானம் ஏகட்டா²னே த³ஸ்ஸனத்த²ம் ஹத³யவத்து²அனந்தரம் உத்³தி³ட்டோ²தி. லஹுதா ஆதி³ யாஸம் முது³தாகம்மஞ்ஞதானந்தி லஹுதாத³யோ, தாஸம் தயம் லஹுதாதி³த்தயம், தத்த² லஹுபா⁴வோ லஹுதா, ததா² முது³தாபி. கம்மனி ஸாது⁴ கம்மஞ்ஞம், தஸ்ஸ பா⁴வோ கம்மஞ்ஞதா. லஹுதாதீ³னம் ஸயம் அனிப்ப²ன்னத்தா நிப்ப²ன்னரூபவிகாரபா⁴வம் த³ஸ்ஸேதும் ‘‘ரூபஸ்ஸா’’தி விஸேஸனம் கதம். சதுவீஸதீதி க³ணனபரிச்சே²தோ³, ப³லவரூபாதீ³னம் நிஸேத⁴னத்தோ². தத்த² யம் வத்தப்³ப³ம், தம் பரதோ ஆவி ப⁴விஸ்ஸதி. நிஸ்ஸாயாதி நிஸ்ஸாய ஏவ, ந பன நிஸ்ஸயவஸேனபி. சதூஹி உபாதா³னேஹி நிமுத்ததாய நிக்க²ந்தம் உபாதா³னதோ மானஸம் ஏதஸ்ஸாதி நிருபாதா³னமானஸோ.

631-2. பத்த²டத்தாதி புது²த்தா, தேன புது²பா⁴வதோ புத²வீ, புத²வீ ஏவ பத²வீதி நிருத்தினயேன ஸத்³த³ஸித்³தி⁴ தீ³பிதா ஹோதி. அயம் பன ஸம்பா⁴ரபத²வியா வஸேன யுஜ்ஜதி. ஸா ஹி புது²பூ⁴தா பத்த²டாதி. லக்க²ணபத²வியா வஸேன பன பத²னட்டே²ன பத²வீ, ஸஹஜரூபானம் பதிட்டா²பா⁴வேன பக்கா²யதி உபட்டா²தீதி அத்தோ². புரிமோபி வா அத்தோ² லக்க²ணபத²வியா வஸேன லப்³ப⁴தி. வாயனதோதி ஸமுதீ³ரணதோ, தே³ஸந்தருப்பத்திஹேதுபா⁴வேன பூ⁴தஸங்கா⁴டஸ்ஸ பாபனதோதி அத்தோ². தேஜேதி பரிபாசேதி, நிஸேதி வா, திக்க²பா⁴வேன ஸேஸபூ⁴தத்தயம் உஸ்மாபேதீதி அத்தோ². கா³தா²ப³ந்த⁴வஸேன சேத்த² இதி-ஸத்³த³லோபதோ ‘‘தேஜேதி’’ச்சேவ வுத்தம். ஏவம் ‘‘ஆபேதீ’’தி ஏத்தா²பி. தஸ்மா தேஜேதீதி தேஜோ, ஆபேதீதி ஆபோதி வுத்தம் ஹோதி. ஆபேதி பாலனாதி அனுபாலேதப்³ப³ரூபபரியோஸானம் ஆபேதி பத்த²ரதி. ததா² ஹேதம் ‘‘ஆப³ந்த⁴னகிச்ச’’ந்தி வுச்சதி. ஆபீயதீதி ஆபோ. ஸோஸீயதி பிவீயதீதி அத்தோ²தி கேசி. அயம் பனத்தோ² ஸஸம்பா⁴ராபே யுஜ்ஜதீதி வத³ந்தி, லக்க²ணாபேபி யுஜ்ஜதேவ. ஸோபி ஹி ப²ருஸபாசனவிஸோஸனாகாரேன ஸேஸபூ⁴தத்தயேன பீயமானோ விய பவத்ததீதி. ஆபாயதீதி வா ஆபோ, ப்³ரூஹேதி வட்³டே⁴தீதி அத்தோ². ததா² ஹேஸ பரிப்³ரூஹனரஸோ. தேஸந்தி யதா²வுத்தானம் பூ⁴தோபாதா³யபே⁴தா³னம் ரூபானம். வக்கா²மீதி கதே²ஸ்ஸாமி. கிம் காரணாதி ஆஹ ‘‘லக்க²ணாதீ³ஸூ’’திஆதி³. ஹி-ஸத்³தோ³ ஹேதுஅத்தோ². யஸ்மா லக்க²ணாதீ³ஸு ஞாதேஸு த⁴ம்மா ஆவி ப⁴விஸ்ஸந்தி, தஸ்மா தேஸம் பரதோ ஆவிபா⁴வஹேதூதி அத்தோ².

633-4. கானி பன தானி லக்க²ணரஸபச்சுபட்டா²னபத³ட்டா²னானி நாம, யேஸு ஞாதேஸு த⁴ம்மா ஆவி ப⁴விஸ்ஸந்தீதி இமம் சோத³னம் ஸோதே⁴தும் லக்க²ணரஸபச்சுபட்டா²னபத³ட்டா²னானி ஸரூபதோ கதே²ந்தோ ஆஹ ‘‘ஸாமஞ்ஞம் வா’’திஆதி³. ஸாமஞ்ஞம் ஸாதா⁴ரணோ அனிச்சாதி³கோ. ஸபா⁴வோ கக்க²ளாதி³பு²ஸனாதி³கோ அஸாதா⁴ரணபா⁴வோ. கிச்சந்தி ஸந்தா⁴ரணாதி³கிச்சம். ஸம்பத்தீதி ஸம்பன்னபா⁴வோ. ‘‘ஸுரஸோ க³ந்த⁴ப்³போ³’’திஆதீ³ஸு ஹி க³ந்த⁴ப்³ப³ஸம்பத்தியா ரஸ-ஸத்³தே³ன வுச்சமானத்தா ஸம்பத்தி ரஸோதி. ப²லந்தி ஸஹஜாதனானக்க²ணிகவஸேன டி²தம் ப²லம். உபட்டா²னனயோதி க³ஹேதப்³ப³பா⁴வேன ஞாணஸ்ஸ உபட்டா²னாகாரோ. ஆஸன்னகாரணந்தி பதா⁴னகாரணம்.

லக்கீ²யதி ஏதேனாதி லக்க²ணம், கக்க²ளத்தம் லக்க²ணமேதிஸ்ஸாதி கக்க²ளத்தலக்க²ணா. நனு ச கக்க²ளத்தமேவ பத²வீதா⁴தூதி? ஸச்சமேதம். ததா² ஹி விஞ்ஞாதாவிஞ்ஞாதஸத்³த³த்த²தாவஸேன அஸம்பி⁴ன்னேபி த⁴ம்மே கப்பனாஸித்³தே⁴ன பே⁴தே³ன ஏவம் நித்³தே³ஸோ கதோ. ஏவஞ்ஹி அத்த²விஸேஸாவபோ³தோ⁴ ஹோதீதி. அத² வா லக்கீ²யதீதி லக்க²ணம், கக்க²ளா ஹுத்வா லக்கி²யமானா தா⁴து கக்க²ளத்தலக்க²ணாதி ஏவமேத்த² அத்தோ² த³ட்ட²ப்³போ³. ஸேஸாஸுபி ஏஸேவ நயோ. பதிட்டா²னரஸாதி ஸஹஜாதத⁴ம்மானம் பதிட்டா²னபா⁴வகிச்சா. அஸஹஜாதானம்பி ஸந்ததிவஸேன பதிட்டா²னபா⁴வோ ஹோதேவ. ததோ ஏவ நேஸம் ஸம்படிச்ச²னாகாரேன ஞாணஸ்ஸ பச்சுபட்டா²தீதி ஸம்படிச்ச²னபச்சுபட்டா²னா. இமினா கிச்சவஸேனேவேத்த² ‘‘பச்சுபட்டா²ன’’ந்தி த³ஸ்ஸேதி. பத³ட்டா²னம் பனேத்த² சதுன்னம்பி ஏகதோ கத்வா வக்க²தி.

பக்³க⁴ரணலக்க²ணாதி த்³ரவதாபா⁴வதோ விஸ்ஸந்த³னலக்க²ணா. ப்³ரூஹனரஸாதி ஸஹஜாதத⁴ம்மானம் மிலாதபா⁴வூபக³மனம் அத³த்வா வட்³ட⁴னகிச்சா. ததா² ஹி ஸா தேஸம் பீணிதபா⁴வம் த³ஸ்ஸேதீதி வுச்சதி. ஸங்க³ஹபச்சுபட்டா²னாதி பா³ஹிரகஉத³கம் விய நஹானியசுண்ணஸ்ஸ ஸஹஜாதத⁴ம்மானம் விப்பகிரிதும் அத³த்வா ஸம்பிண்ட³னவஸேன ஸங்க³ண்ஹனபச்சுபட்டா²னா. பரிபாசனரஸாதி பரிணதபா⁴வகரணரஸா. மத்³த³வானுப்பதா³னபச்சுபட்டா²னாதி பா³ஹிரக்³கி³ விய ஜதுலோஹாதீ³னம் ஸஹஜாதத⁴ம்மானம் முது³பா⁴வானுப்பதா³னபச்சுபட்டா²னா. வித்த²ம்ப⁴னலக்க²ணாதி பூரணலக்க²ணா. ஸமுதீ³ரணரஸாதி கம்பனரஸா. அபி⁴னீஹாரோ பூ⁴தத்தயஸ்ஸ தே³ஸந்தருப்பத்திஹேதுபா⁴வோ, நீஹரணம் வா பீ³ஜதோ அங்குராதி³கஸ்ஸ விய. ஏகேகா…பே… தப்³பா³தி பத²வீதா⁴து ஆபாதி³பூ⁴தத்தயபத³ட்டா²னா, ஆபோதா⁴து பத²வீதேஜாதி³பூ⁴தத்தயபத³ட்டா²னாதி ஏவம் ஏகேகா தா⁴து அவஸிட்ட²பூ⁴தத்தயபத³ட்டா²னா.

ஆரோஹபரிணாஹவஸேன ஹி மஜ்ஜி²மே இமஸ்மிம் ஸரீரே பரிக்³க³ய்ஹமானா பரமாணுபே⁴த³ஸஞ்சுண்ணா ஸுகு²மரஜபூ⁴தா பத²வீதா⁴து தோ³ணமத்தா ஸியா. ஸா ச ததோ உபட்³ட⁴ப்பமாணாய ஆபோதா⁴துயா யதா² ந விகிரதி, ஏவம் ஆப³ந்த⁴னவஸேன ஸங்க³ஹிதா. யதா² பன பக்³க⁴ரணஸபா⁴வாய ஆபோதா⁴துயா வஸேன கிலின்னபா⁴வம் பிச்ச²லபா⁴வம் நாபஜ்ஜதி, ஏவம் தேஜோதா⁴துயா அனுபாலிதா. யதா² பன தஸ்ஸா வஸேன ந விகிரீயதி, ஏவம் வாயோதா⁴துயா வித்த²ம்பி⁴தா ஸங்கா⁴தபா⁴வம் பாபிதா. ஏவம் ஸுகு²மரஜபூ⁴தாபி ஆப³ந்த⁴னபரிபாசனஸமுதீ³ரணகிச்சாஹி ஆபோதேஜோவாயோதா⁴தூஹி லத்³த⁴பச்சயா ஸினேஹேன தேமிதா, தேஜஸா பரிபக்கா, வாயுனா வித்த²ம்பி⁴தா பிட்ட²சுண்ணானி விய ந இதோ சிதோ ச விகிரீயதி வித்³த⁴ம்ஸீயதி, அவிகிரியமானா அவித்³த⁴ம்ஸியமானா நானப்பகாரகம் இத்தி²புரிஸலிங்கா³தி³பா⁴வவிபா⁴க³ம் உபக³ச்ச²தி, அணுதூ²லதீ³க⁴ரஸ்ஸதி²ரகதி²னாதி³பா⁴வஞ்ச பகாஸேதி.

யூஸக³தா ஆப³ந்த⁴னாகாரபூ⁴தா பனேத்த² ஆபோதா⁴து பத²வீபதிட்டி²தா தேஜானுபாலிதா வாயோவித்த²ம்பி⁴தா ந க³ளதி, ந பக்³க⁴ரதி, ந பரிஸ்ஸவதி. ஏவம் தீஹி தா⁴தூஹி அனுபாலிதா அபக்³க⁴ரமானா அபரிஸ்ஸவமானா பிண்டி³தபா⁴வம் த³ஸ்ஸேதி. ஏஸா ஹி அனுப்³ரூஹனரஸா.

அஸிதபீதாதி³பரிபாசிதா சேத்த² உஸுமாகாரபூ⁴தா உண்ஹத்தலக்க²ணா தேஜோதா⁴து பத²வீபதிட்டி²தா ஆபோஸங்க³ஹிதா வாயோவித்த²ம்பி⁴தா இமம் காயம் பரிபாசேதி, வண்ணஸம்பத்திஞ்சஸ்ஸ ஆவஹதி. ஸா ஹி யதா²னுபு⁴த்தஸ்ஸ ஆஹாரஸ்ஸ ஸம்மா பரிணாமனேன ரஸாதி³ஸம்பத்தியா ஹேதுபா⁴வம் க³ச்ச²ந்தீ இமம் காயம் பரிபாசேதி, வண்ணஸம்பத்திஞ்ச ஆவஹதி. கம்மூபனிஸ்ஸயாய ஹி சித்தபஸாத³ஹேதுகாய ச ஸரீரே வண்ணஸம்பதா³ய தேஜோதா⁴து விஸேஸபச்சயோ, பகே³வ உதுஆஹாரஸமுட்டா²னாய ரூபஸம்பத்தியாதி. தாய ச பன பரிபாசிதோ அயம் காயோ ந பூதிபா⁴வம் க³ச்ச²தி.

அங்க³மங்கா³னுஸடா சேத்த² ஸமுதீ³ரணவித்த²ம்ப⁴னலக்க²ணா வாயோதா⁴து பத²வீதா⁴துயா அத்தனி பதிட்டா²பீயதி. யதா² ஸஹஜாதத⁴ம்மேஹி விஸும் ந ஹோதி, ஏவம் ஆபோதா⁴துயா ஸங்க³ய்ஹதி. யதா² ஸஹஜாதத⁴ம்மா ந பரிஸ்ஸவந்தி, ஏவம் தேஜோதா⁴துயா அனுபாலீயதி. ஸா ஏவம் தீஹி தா⁴தூஹி யதா²ரஹம் அனுபாலியமானா இமம் காயம் வித்த²ம்பே⁴தி. தாய பன வித்த²ம்பி⁴தோ அயம் காயோ ந பரிபததி, உஜுகம் திட்ட²தி, இச்சேவம் ஏகேகாய தா⁴துயா திஸ்ஸன்னம் தா⁴தூனம் வஸேனேவ பவத்தனதோ வுத்தம் ‘‘ஏகேகா சேத்த² ஸேஸபூ⁴தத்தயபத³ட்டா²னாதி வேதி³தப்³பா³’’தி.

ஏவம் பூ⁴தரூபானம் ஸத்³தி⁴ம் வசனத்தே²ஹி லக்க²ணாத³யோ த³ஸ்ஸேத்வா இதா³னி உபாதா³யரூபானி த³ஸ்ஸேந்தோ ஆஹ ‘‘சக்க²தீ’’திஆதி³. அனேகத்த²த்தா தா⁴தூனம் சக்க²தி-ஸத்³த³ஸ்ஸ விபா⁴வனத்த²தாபி ஸம்ப⁴வதீதி கத்வா வுத்தம் ‘‘விபா⁴வேதீதி அத்தோ²’’தி. சக்க²தீதி பன விஞ்ஞாணாதி⁴ட்டி²தம் ஸமவிஸமம் ஆசிக்க²ந்தம் விய, அபி⁴ப்³யத்தம் வத³ந்தம் விய ஹோதீதி அத்தோ². அத² வா சக்க²தீதி விஞ்ஞாணாதி⁴ட்டி²தம் ரூபம் அஸ்ஸாதே³ந்தம் விய ஹோதீதி அத்தோ². சக்க²தீதி ஹி அயம் ஸத்³தோ³ ‘‘மது⁴ம் சக்க²தி, ப்³யஞ்ஜனம் சக்க²தீ’’திஆதீ³ஸு விய அஸ்ஸாத³த்தோ². வுத்தஞ்ஹேதம் – ‘‘சக்கு²ம் கோ², மாக³ண்டி³ய, ரூபாராமம் ரூபரதம் ரூபஸமுதி³த’’ந்தி (ம. நி. 2.209). வக்க²தி ச ‘‘ரூபேஸு ஆவிஞ்ச²னரஸ’’ந்தி. யதி³ ஏவம் ‘‘ஸோதம் கோ², மாக³ண்டி³ய, ஸத்³தா³ராம’’ந்திஆதி³வசனதோ (ம. நி. 2.209) ஸோதாதீ³னம்பி ஸத்³தா³தி³அஸ்ஸாத³கபா⁴வோ அத்தீ²தி தேஸம்பி சக்கு²ஸத்³தா³பி⁴தே⁴ய்யதா ஆபஜ்ஜதீதி? நாபஜ்ஜதி நிருள்ஹத்தா. நிருள்ஹோ ஹி ஏஸ சக்கு²-ஸத்³தோ³ லோசனேயேவ பது³மாதீ³ஸு பங்கஜாதி³ஸத்³தா³ வியாதி.

635-6. சக்கு²ரூபஸ்ஸ நித்³தே³ஸப்பகரணேபி சக்கு²-ஸத்³த³ஸாமஞ்ஞதோ ஆக³தம் ஸப்³ப³ம்பி சக்கு²ம் பபே⁴த³தோ த³ஸ்ஸேதும் ‘‘தத்த² சக்கூ²’’திஆதி³ வுத்தம். தத்தா²தி தஸ்மிம் சக்கு²னித்³தே³ஸே. பஞ்ஞாமம்ஸப்பபே⁴த³தோதி பஞ்ஞாசக்கு² மம்ஸசக்கூ²தி ஏவம் பஞ்ஞாமம்ஸானம் வஸேன பபே⁴த³தோ. தத்தா²தி தஸ்மிம் து³விதே⁴ சக்கு²ம்ஹி. பஞ்ஞாயேவ பஞ்ஞாமயம். நாமதோதி நாமேஹி பஞ்சவித⁴ந்தி ஸம்ப³ந்தோ⁴. கதமேஹி நாமேஹீதி ஆஹ ‘‘பு³த்³த⁴த⁴ம்மா’’திஆதி³. தத்த² பு³த்³த⁴த⁴ம்மஸமந்தேஹீதி பு³த்³த⁴சக்கு² த⁴ம்மசக்கு² ஸமந்தசக்கூ²தி இமேஹி நாமேஹி. ஞாணதி³ப்³பே³ஹீதி ஞாணசக்கு² தி³ப்³ப³சக்கூ²தி ச நாமேஹி. யதா²னுக்கமதோதி யதா²வுத்தஅனுக்கமதோ. நானத்தந்தி பே⁴த³ம். மேதி மய்ஹம் ஸந்திகா, மய்ஹம் வசனதோதி வா அத்தோ². நிபோ³த⁴த² ஜானாத².

637. தத்த² ‘‘அத்³த³ஸம் கோ² அஹம், பி⁴க்க²வே, பு³த்³த⁴சக்கு²னா லோகம் வோலோகேந்தோ ஸத்தே அப்பரஜக்கே² மஹாரஜக்கே² திக்கி²ந்த்³ரியே’’திஆதி³னா (ம. நி. 1.283) ஆக³தம் பு³த்³த⁴சக்கு² நாமாதி த³ஸ்ஸேந்தோ ஆஹ ‘‘ஆஸயானுஸயே’’திஆதி³. தத்த² ஆஸயானுஸயேதி ஸத்தானம் ஆஸயே சேவ அனுஸயே ச, தஸ்மிம் பவத்தந்தி அத்தோ². தத்த² ஆக³ந்த்வா ஸேதி சித்தம் ஏத்தா²தி ஆஸயோ. ப்³யக்³கா⁴ஸயோ விய. யதா² ஹி ப்³யக்³கோ⁴ கோ³சரத்தா²ய பக்கந்தோபி புன ஆக³ந்த்வா வனக³ஹனேயேவ ஸயதி, தேனேவ ச தம் தஸ்ஸ ஆஸயோதி வுச்சதி, ஏவம் அஞ்ஞத்தா²பி பவத்தம் சித்தம் ஆக³ந்த்வா யத்த² ஸயதி, தம் தஸ்ஸ ஆஸயோதி வேதி³தப்³ப³ம். ஸோ பன ஸஸ்ஸதத³ஸ்ஸனாதி³வஸேன சதுப்³பி³தோ⁴ ஹோதி. வுத்தஞ்ஹேதம் –

‘‘ஸஸ்ஸதுச்சே²த³தி³ட்டீ² ச, க²ந்தி சேவானுலோமிகா;

யதா²பூ⁴தஞ்ச யம் ஞாணம், ஏதம் ஆஸயஸஞ்ஞித’’ந்தி. (விஸுத்³தி⁴. மஹா. 1.136; தீ³. நி. டீ. 1.பட²மமஹாஸங்கீ³திகதா²வண்ணனா; ஸாரத்த². டீ. 1. பட²மமஹாஸங்கீ³திவண்ணனா; வி. வி. டீ. 1.வேரஞ்ஜகண்ட³வண்ணனா)

அனுஸயகதா² உபரி ஆக³மிஸ்ஸதி. இந்த்³ரியானம் பரோபரேதி ஸத்³தா⁴பஞ்சமகானம் இந்த்³ரியானம் திக்க²முது³பா⁴வே. திக்க²ஞ்ஹி இந்த்³ரியம் உக்கட்ட²க³தத்தா பரம், முது³ அபரம் அனுக்கட்ட²க³தத்தா. இத³ம் பன பு³த்³த⁴சக்கு² ச²ஸு அஸாதா⁴ரணஞாணேஸு புரிமத்³வயந்தி த³ட்ட²ப்³ப³ம்.

638. ஹேட்டா²…பே… ஸஞ்ஞிதந்தி ‘‘தஸ்மிம்யேவ ஆஸனே விரஜம் வீதமலம் த⁴ம்மசக்கு²ம் உத³பாதீ³’’தி ஏவம் வுத்தம் ஹேட்டா² தீஸு மக்³கே³ஸு ஞாணம் த⁴ம்மசக்கு²ந்தி ஸஞ்ஞிதம். ஞாணம் ஸப்³ப³ஞ்ஞுதா பனாதி ஸப்³ப³ஞ்ஞுபா⁴வஸங்கா²தம் ஞாணம். தஞ்ஹி ஸப்³ப³ஞ்ஞூதி அபி⁴தா⁴னஸ்ஸ, பு³த்³தி⁴யா ச பவத்தினிமித்ததாய ஸப்³ப³ஞ்ஞுபா⁴வோ நாம ஹோதி. ஞேய்யம் ஸமந்தசக்கு²ந்தி க²ந்தா⁴தி³வஸேன ஸமந்ததோ ஸப்³ப³ஸோ த³ஸ்ஸனட்டே²ன ஸமந்தசக்கு²ந்தி ஞேய்யம். தேனேவாஹ –

‘‘ந தஸ்ஸ அத்³தி³ட்ட²மித⁴த்தி² கிஞ்சி,

அதோ² அவிஞ்ஞாதமஜானிதப்³ப³ம்;

ஸப்³ப³ம் அபி⁴ஞ்ஞாஸி யத³த்தி² ஞேய்யம்,

ததா²க³தோ தேன ஸமந்தசக்கூ²’’தி. (சூளனி. மோக⁴ராஜமாணவபுச்சா²னித்³தே³ஸ 85);

639. யம் சக்கு²ம் உத³பாதீ³தி ஆக³தந்தி யம் ஞாணம் ‘‘இத³ம் து³க்க²ந்தி, பி⁴க்க²வே, புப்³பே³ அனனுஸ்ஸுதேஸு த⁴ம்மேஸு சக்கு²ம் உத³பாதி³, ஞாணம் உத³பாதீ³’’தி (மஹாவ. 15) ஏவம் தத்த² தத்த² ஸுத்தேஸு ஆக³தம், சதூஸு ஸச்சேஸு தேபரிவட்டவஸேன ‘‘து³க்க²ம் பரிஞ்ஞேய்யம் பரிஞ்ஞாத’’ந்தி ஏவமாதி³னா த்³வாத³ஸவிதே⁴ன ஆகாரேன பவத்தம், இத³ம் ஞாணசக்கு². யா பன ‘‘அத்³த³ஸம் கோ² அஹம், பி⁴க்க²வே, தி³ப்³பே³ன சக்கு²னா விஸுத்³தே⁴னா’’திஆதி³னா (ம. நி. 1.284) ஆக³தா பஞ்சமஜ்ஜா²னஸங்கா²தஅபி⁴ஞ்ஞாசித்தஸம்பயுத்தா பஞ்ஞா, அயம் தி³ப்³ப³சக்கூ²தி த³ஸ்ஸேதும் ‘‘அபி⁴ஞ்ஞாசித்தஜா’’திஆதி³ வுத்தம். ஏத்த² ச பட²மததியஞாணானி காமாவசரானியேவ. சதுத்த²ம்பி பன புரிமத்³வயமிவ காமாவசரந்தி ஆனந்தா³சரியேன வுத்தம். ஞாணசக்கு²ம் ஸஹஅரியமக்³க³விபஸ்ஸனாஞாணந்திபி யுஜ்ஜதீதி அபரே. அக்³க³மக்³கே³ன ஸஹ விபஸ்ஸனாபச்சவேக்க²ணஞாணந்தி பன யுத்தம் விய தி³ஸ்ஸதி.

640-4. ஏவம் பஞ்ஞாசக்கு²ஸ்ஸ பபே⁴த³ம் த³ஸ்ஸேத்வா புன மம்ஸசக்கு²ஸ்ஸாபி பபே⁴த³ம் த³ஸ்ஸேதும் ‘‘மம்ஸசக்கு²பீ’’திஆதி³ வுத்தம். ஸஸம்பா⁴ரபஸாத³தோதி ஸஸம்பா⁴ரசக்கு² பஸாத³சக்கூ²தி இமேஸம் த்³வின்னம் வஸேன ஸம்ப⁴ரீயதி ஏதேஹீதி ஸம்பா⁴ரா, அவயவா. தே பன உபத்த²ம்ப⁴கபூ⁴தா சதுஸமுட்டா²னிகரூபஸந்ததியோ த³ட்ட²ப்³பா³. ஸஹ ஸம்பா⁴ரேஹீதி ஸஸம்பா⁴ரம். ஸஸம்பா⁴ரஞ்ச நாம மம்ஸபிண்டோ³ பவுச்சதீதி ஸம்ப³ந்தோ⁴. அக்கி²கூபட்டி²னா ஹேட்டா²தி ஹேட்டா²க³தஅக்கி²கூபஸ்ஸ அட்டி²னா பரிச்சி²ன்னோதி ஸம்ப³ந்தோ⁴. உத்³த⁴ந்தி அக்கி²கூபதோ உத்³த⁴ம். உப⁴தோ அக்கி²கோடீஹீதி அக்கி²கூபஸ்ஸ உப⁴யபா⁴கே³ அக்கி²கோடீஹி. மத்த²லுங்கே³ன அந்ததோதி அக்கி²கூபஸ்ஸ அப்³ப⁴ந்தரே டி²தேன மத்த²லுங்கே³ன. ந்ஹாருஸுத்தேன ஆப³ந்தோ⁴தி நஹாருரஜ்ஜூஹி அந்தோ மத்த²லுங்கே³ன ஸஹ ஆப³ந்தோ⁴. ஸகலோபி ச லோகோதி ஸகலோபி பா³லபுது²ஜ்ஜனலோகோ. யந்தி யம் மம்ஸபிண்ட³ம். கமலஸ்ஸ த³லம் வியாதி புது²லவிபுலனீலதாய நீலுப்பலத³லம் விய. ஜானாதீதி க³ண்ஹாதி. சக்கு² நாம ந தம் ஹோதீதி ததா² க³ய்ஹமானம் தம் சக்கு² நாம ந ஹோதி. கிஞ்சரஹி தந்தி ஆஹ ‘‘வத்து² தஸ்ஸாதி வுச்சதீ’’தி. தஸ்ஸாதி தஸ்ஸ யதா²தி⁴ப்பேதஸ்ஸ பரமத்த²சக்கு²னோ. இத³ம் பனாதி நிக³மனம்.

645-7. தம் பன ஸஸம்பா⁴ரசக்கு² யேஹி ஸம்பா⁴ரேஹி ஸம்ப⁴ரீயதி, தே ஸரூபதோ, க³ணனதோ ச த³ஸ்ஸேதும் ‘‘வண்ணோ க³ந்தோ⁴’’திஆதி³ வுத்தம். பா⁴வோதி இத்தி²யா இத்தி²பா⁴வோ, புரிஸஸ்ஸ பும்பா⁴வோதி லப்³ப⁴மானகபா⁴வோ. ஸம்ப⁴வோதி ஆபோதா⁴துமேவ ஸம்ப⁴வபூ⁴தமாஹ. ஸண்டா²னந்தி ச தேன தேனாகாரேன ஸன்னிவிட்டே²ஸு மஹாபூ⁴தேஸு தம்தம்ஸண்டா²னவஸேன விஞ்ஞாயமானம் வண்ணாயதனமாஹ. ஆபோதா⁴துவண்ணாயதனேஹி ச அனத்த²ந்தரபூ⁴தானம்பி ஸம்ப⁴வஸண்டா²னானம் விஸும் வசனம் ததா²பூ⁴தானம், அததா²பூ⁴தானஞ்ச ஆபாதீ³னம் யதா²வுத்தமம்ஸபிண்டே³ விஜ்ஜமானத்தா. ஆபோதா⁴துவண்ணாயதனானஞ்ஹி ஸந்தானவஸேன பவத்தமானானம் அவத்தா²விஸேஸோ ஸம்ப⁴வோ ஸண்டா²னஞ்சாதி. த³ஸேதேதி சதஸ்ஸோ தா⁴துயோ, தன்னிஸ்ஸிதா வண்ணாத³யோ சாதி இமே த³ஸ. சதுஸமுட்டா²னாதி அந்தோக³தஹேத்வத்த²மித³ம் விஸேஸனம், சதுஸமுட்டா²னிகத்தாதி வுத்தம் ஹோதி.

648. சக்கு²…பே… ஜீவிதமேவ சாதி இமானி ஏகந்தகம்மஸமுட்டா²னானி, புரிமானி ச சதுஸமுட்டா²னானீதி சத்தாலீஸஞ்ச சத்தாரி ச ரூபானி ப⁴வந்தி, சதுசத்தாலீஸ ரூபானி ஹோந்தீதி அத்தோ².

649-52. இமேஸம் பன ரூபானம் வஸேனாதி யதா²வுத்தானம் ஸங்கே²பதோ சுத்³த³ஸன்னம், வித்தா²ரதோ சதுசத்தாலீஸானஞ்ச ரூபானம் வஸேன. பரிபிண்டி³தந்தி ஸமந்ததோ பிண்டி³தம். யத்த² ஸேதம்பி அத்தி², கண்ஹம்பி லோஹிதம்பி பத²வீபி ஆபோபி தேஜோபி வாயோபி, இத³ம் பன ஸேம்ஹுஸ்ஸத³த்தா ஸேதம் ஹோதி, பித்துஸ்ஸத³த்தா கண்ஹம், ருஹிருஸ்ஸத³த்தா லோஹிதகம், பத²வுஸ்ஸத³த்தா பத்தி²னம் ஹோதி, ஆபுஸ்ஸத³த்தா பக்³க⁴ரதி, தேஜுஸ்ஸத³த்தா பரிட³ய்ஹதி, வாயுஸ்ஸத³த்தா ஸம்ப⁴மதி. இத³ம் ஸம்பா⁴ரவந்ததாய ஸம்பா⁴ரசக்கூ²தி பண்டி³தேஹி பு³த்³தா⁴தீ³ஹி பகாஸிதம் பரிதீ³பிதம். ஏத்த² ஸிதோதி ஏதம் ஸஸம்பா⁴ரசக்கு²ம் நிஸ்ஸிதோ ததா³யத்தபூ⁴தோ. தேனாஹ ‘‘ஏத்த² படிப³த்³தோ⁴’’தி. சதுன்னம் பன பூ⁴தானம் பஸாதோ³தி சதுன்னம் பூ⁴தானம் பஸன்னதாஸபா⁴வோ பஸாதோ³, ‘‘ஸேதேன மண்ட³லேனஸ்ஸா’’தி பாடோ² யுஜ்ஜதி. போத்த²கேஸு பன ‘‘ஸேதே து மண்ட³லே தஸ்ஸா’’தி லிக²ந்தி. கண்ஹமண்ட³லமஜ்ஜே²தி இதா⁴பி ‘‘கண்ஹமண்ட³லஸ்ஸ மஜ்ஜே²’’தி வத்தப்³பே³ ‘‘சதுத்த²தூ³’’திஆதீ³ஸு விய ச²ந்தா³னுரக்க²ணத்த²ம் விப⁴த்திலோபம் கத்வா ‘‘கண்ஹமண்ட³லமஜ்ஜே²’’தி வுத்தம். ஏவஞ்ஹி அத்தோ² ச யோஜனா ச ஸுட்டு² உபபன்னா ஹோந்தி. அட்ட²கதா²யம்பி ஹி ‘‘ஸேதமண்ட³லபரிக்கி²த்தஸ்ஸ கண்ஹமண்ட³லஸ்ஸ மஜ்ஜே²’’தி (த⁴. ஸ. அட்ட². 596) வுத்தம். அபரே பன யதா²டி²தவஸேனேவ பாட²ம் க³ஹேத்வா ‘‘ஸப்³ப³ஸோ பரிக்கி²த்தஸ்ஸ தஸ்ஸ ஸஸம்பா⁴ரஸ்ஸ சக்கு²னோ மஜ்ஜே² ஸேதமண்ட³லே கண்ஹமண்ட³லே மஜ்ஜே²’’தி யோஜேந்தி. தி³ட்ட²மண்ட³லேதி அபி⁴முகே² டி²தானம் ஸரீரஸண்டா²னுப்பத்திதே³ஸபூ⁴தே தி³ட்ட²மண்ட³லே.

653-5. ஸந்தா⁴ரணா…பே… ஹுத்வானாதி ஸந்தா⁴ரணனஹாபனமண்ட³னபீ³ஜனகிச்சாஹி சதூஹி தா⁴தீஹி க²த்தியகுமாரோ விய ஸந்தா⁴ரணாப³ந்த⁴னபரிபாசனஸமுதீ³ரணகிச்சாஹி அத்தனிஸ்ஸயபூ⁴தாஹி சதூஹி தா⁴தூஹி கதூபகாரம் ஹுத்வா. உதுசித்தாதி³னாதி தீஹி ஸந்ததிஸமுட்டா²பகேஹி உதுசித்தாஹாரேஹி. ஏத்த² ச கலாபந்தரக³தா உதுஆஹாரா அதி⁴ப்பேதாதி வத³ந்தி. ஆயுனா கதபாலனந்தி சதுதா⁴துனிஸ்ஸிதேனேவ ஜீவிதிந்த்³ரியேன ரக்கி²யமானம். ததா² ஹேதம் கம்மஜரூபபரிபாலனலக்க²ணம். வண்ணக³ந்த⁴ரஸாதீ³ஹீதி ஆதி³-க்³க³ஹணேன ஓஜம் ஸங்க³ண்ஹாதி, ‘‘வண்ணக³ந்த⁴ரஸோஜாஹீ’’தி வா பாடோ². வத்து²த்³வாரஞ்ச ஸாத⁴யந்தி யதா²யோக³ம் வத்து²த்³வாரபா⁴வம் ஸாத⁴யமானம். சக்கு²விஞ்ஞாணஸ்ஸ ஹி நிஸ்ஸயபா⁴வதோ வத்து²பா⁴வம், பவத்திமுக²பா⁴வதோ த்³வாரபா⁴வஞ்ச ஸாதே⁴தி. ஸம்படிச்ச²னாதீ³னம் பன ததா³ரம்மணாவஸானானம் அஞ்ஞனிஸ்ஸிதத்தா த்³வாரபா⁴வமேவ ஸாதே⁴தி, ந வத்து²பா⁴வம். ஊகாஸிரஸமானேன பமாணேனாதி ஊகாஸிரஸமானேன பதே³ஸப்பமாணேன லக்கி²தம் ஹுத்வா ஊகாஸிரஸமானப்பமாணே டா²னேதி வா அத்தோ². திட்ட²தீதி ஸத்த அக்கி²படலானி ப்³யாபேத்வா ஸத்தஸு பிசுபடலேஸு ஆஸித்ததேலம் விய திட்ட²தி. ஏவஞ்ச கத்வா சக்கு²ஸ்ஸ அனேககலாபக³ததா ஸித்³தா⁴ ஹோதி. உபத்³த³வானம் படலனிராகரணேபி ஹி சக்கு² விஜ்ஜதேவாதி. யதா² ச சக்கு², ஏவமிமஸ்ஸ நிஸ்ஸயபூ⁴தா சதஸ்ஸோ தா⁴துயோ, ஆயுவண்ணாதீ³னி ச ஸத்த அக்கி²படலானி ப்³யாபேத்வா டி²தானேவ அவினிப்³போ⁴க³வுத்தித்தாதி க³ஹேதப்³ப³ம்.

656. வுத்தந்தி த⁴ம்மஸேனாபதினா வுத்தம். ரூபானி மனுபஸ்ஸதீதி ம-காரோ பத³ஸந்தி⁴கரோ ‘‘அஞ்ஞமஞ்ஞம் ஸமணமசலோ’’திஆதீ³ஸு விய. அத² வா மனூதி மச்சோதி அத்தோ². கிஞ்சாபி சக்கு² ரூபம் ந பஸ்ஸதி, கிஞ்சரஹி தன்னிஸ்ஸிதம் விஞ்ஞாணமேவ. ததா² ஹி ‘‘மஞ்சா உக்குட்டி²ம் கரோந்தீ’’திஆதீ³ஸு விய நிஸ்ஸிதகிரியம் நிஸ்ஸயே விய கத்வா வோஹாரஸம்ப⁴வதோ ‘‘சக்கு²பஸாதே³ன பஸ்ஸதீ’’தி வுத்தம். ஆசரியஜோதிபாலத்தே²ரேனாபி ஹி இமினாவ அதி⁴ப்பாயேன இத³ம் வுத்தம். இத³மேத்த² ஸன்னிட்டா²னம், கிம் சக்கு² ரூபம் பஸ்ஸதி, உதா³ஹு விஞ்ஞாணந்தி, கிஞ்சேத்த² – யதி³ சக்கு² பஸ்ஸேய்ய, அஞ்ஞவிஞ்ஞாணஸமங்கி³னோபி சக்கு² பஸ்ஸேய்ய. அத² விஞ்ஞாணம், குட்டாதி³அந்தரிதம்பி பஸ்ஸேய்ய தஸ்ஸ அப்படிகா⁴தத்தா? நாயம் தோ³ஸோ. யஸ்ஸ ‘‘சக்கு² பஸ்ஸதீ’’தி மதம், தஸ்ஸாபி ந ஸப்³ப³ம் சக்கு² பஸ்ஸதி, அத² கோ² விஞ்ஞாணாதி⁴ட்டி²தமேவ. யஸ்ஸ பன விஞ்ஞாணம் பஸ்ஸதீதி மதம், தஸ்ஸாபி ந ஸப்³ப³ம் விஞ்ஞாணம் பஸ்ஸதி, அத² கோ² சக்கு²னிஸ்ஸிதமேவ, தஞ்ச அந்தரிதே நுப்பஜ்ஜதி. யத்த² ஆலோகஸ்ஸ குட்டாதீ³ஹி வினிப³ந்தோ⁴, யத்த² பன ஸோ நத்தி² ப²லிகஅப்³ப⁴படலாதி³ம்ஹி, தத்த² அந்தரிதேபி உப்பஜ்ஜதி ஏவ, தஸ்மா தம் அனுப்பன்னத்தா அந்தரிதம் ந பஸ்ஸதி. இத³மேவ ச ஸன்னிட்டா²னம், யம் கோ² சக்கு²விஞ்ஞாணம் பஸ்ஸதீதி. தஞ்ஹி த³ஸ்ஸனகிச்சம். யதி³ ஏவம் கத²ம் சக்கு²னா ரூபம் தி³ஸ்வாதி. தேன த்³வாரேன கரணபூ⁴தேனாதி அயமேத்த² அபி⁴ஸந்தி⁴. அத² வா நிஸ்ஸிதகிரியா நிஸ்ஸயஸ்ஸ பவுச்சதி யதா² ‘‘மஞ்சா உக்குட்டி²ம் கரோந்தீ’’தி. ஊகாஸிரஸமூபமந்தி ஊகாஸிரஸமானூபமம், ஊகாஸிரப்பமாணந்தி வுத்தம் ஹோதி. இத³ஞ்சஸ்ஸ பதிட்டா²னோகாஸவஸேன வுத்தம், ந பன அத்தனோ பமாணவஸேன. தஞ்ஹி பரமாணுபரியந்தேன பமாணேன அதிஸுகு²மமேவாதி. ஊகாஸிரப்பமாணே பன பதே³ஸே இத³ம் பவத்ததி. ந கேவலஞ்ச இத³மேவ, ஸப்³பா³னிபி ஸப்³ப³ட்டா²னிகரூபானி தத்த² பவத்தந்தேவ. இத³ஞ்ச தத்த² நிப்³ப³த்தந்தம் தம் பதே³ஸம் பூரேத்வா ஏவ நிப்³ப³த்ததி. ஏகூனபண்ணாஸகலாபவஸேன ச ஸஹேவ பவத்ததி, ஸத்தரஸசித்தக்க²ணாயுகத்தா ரூபானம், ஏகேகஸ்ஸ ச சித்தஸ்ஸ தீஸு தீஸு க²ணேஸு கம்மஜரூபானம் உப்பஜ்ஜமானத்தா.

657. ஸுணாதீதி ஸோதந்தி ஏத்த² கிம் ஸோதம் ஸுணாதி, உதா³ஹு விஞ்ஞாணந்திஆதி³னா ஹேட்டா² வுத்தனயேன யதா²ஸம்ப⁴வம் யோஜேதப்³ப³ம். தனுதம்ப³லோமாசிதேதி ஸஸம்பா⁴ரஸோதபி³லஸ்ஸ அந்தோ ஸுகு²மேஹி தம்ப³வண்ணலோமேஹி ஸஞ்சிதே. அங்கு³லிவேத⁴கஸண்டா²னே பதே³ஸேதி அங்கு³லிமுத்³தி³காஸண்டா²னமம்ஸயுத்தே பதே³ஸே. வுத்தப்பகாராஹீதி ஸந்தா⁴ரணாதி³கிச்சாஹி. ஆயுனா பரிபாலியமானந்தி ஏத்த² வண்ணாதீ³ஹி பரிவாரிதந்தி ஸம்ப³ந்தி⁴தப்³ப³ம். திட்ட²தீதி புப்³பே³ வுத்தனயேன தம் பதே³ஸம் பூரேத்வா திட்ட²தி. ஸேஸம் வுத்தனயேன வேதி³தப்³ப³ம். கா⁴யதீதி க³ந்தோ⁴பாதா³னம் கரோதி. ஸாயதீதி ரஸம் விந்த³தி. ஜீவிதமவ்ஹாயதீதி ஏத்த² ரஸக்³க³ஹணமூலகத்தா அஜ்ஜோ²ஹரணஸ்ஸ ஜீவிதனிமித்தம் அஜ்ஜோ²ஹரணரஸோ ஜீவிதம், தம் அவ்ஹாயதி தஸ்மிம் நின்னதாய அவ்ஹாயந்தமிவ ஹோதி. உப்பலத³லக்³க³ஸண்டா²னே பதே³ஸேதி மஜ்ஜே² சி²ன்னஸ்ஸ உப்பலத³லஸ்ஸ அக்³க³பா⁴க³ஸண்டா²னே பதே³ஸே. மலானந்தி கிலேஸாதி³மலானஞ்சேவ மலவிஸயானஞ்ச ஸாஸவத⁴ம்மானம் அனுத்தரியபா⁴வம் க³ச்ச²ந்தேஸு காமராக³னிதா³னகம்மஜனிதேஸு காமராக³ஸ்ஸ ச விஸேஸபச்சயேஸு கா⁴னஜிவ்ஹாகாயேஸு காயஸ்ஸ விஸேஸதோ ஸாஸவபச்சயத்தா ஸோயேவ தேஸம் ஆயோதி வுச்சதி. தேன ஹி போ²ட்ட²ப்³ப³ஸுக²ம் அஸ்ஸாதே³ந்தா ஸத்தா மேது²னம்பி ஸேவந்தி. அத² வா காயிந்த்³ரியவத்து²கா சத்தாரோ க²ந்தா⁴ ப³லவகாமராகா³தி³ஹேதுபா⁴வதோ விஸேஸதோ மலா, தேஸமயம் ஆயோ ஹேதூதி காயோதி வுத்தோ. இமஸ்மிம் காயேதி இமஸ்மிம் ஸஸம்பா⁴ரகாயே. ஸோபி ஹி குச்சி²தானம் கேஸாதி³மலானம் ஆயபா⁴வதோ காயோதி வுச்சதி. யாவதா உபாதி³ன்னகம் அத்தீ²தி இமினா கேஸக்³க³னக²க்³கா³தீ³ஸு காயபஸாத³ஸ்ஸ அபா⁴வமாஹ. கப்பாஸபடலே ஸ்னேஹோ வியாதி இமினாஸ்ஸ நிரந்தரபா⁴வம். இமே ச பன சக்கா²த³யோ ரூபாதி³கோ³சரனின்னதாய வம்மிகஉத³கஆகாஸகா³மஸிவதி²காஸங்கா²தகோ³சரனின்னதாய அஹிஸும்ஸுமாரபக்கி²குக்குரஸிகா³லா விய த³ட்ட²ப்³பா³. விஸமஜ்ஜா²ஸயதாய ஹி சக்கு² வம்மிகச்சி²த்³தா³பி⁴ரதஸப்போ விய, பி³லஜ்ஜா²ஸயதாய ஸோதம் உத³கபி³லாபி⁴ரதஸும்ஸுமாரோ விய, ஆகாஸஜ்ஜா²ஸயதாய கா⁴னம் அஜடாகாஸாபி⁴ரதபக்கி² விய, கா³மஜ்ஜா²ஸயதாய ஜிவ்ஹா கா³மாபி⁴ரதகுக்குரோ விய, உபாதி³ன்னகஜ்ஜா²ஸயதாய காயோ ஆமகஸுஸானாபி⁴ரதஸிகா³லோ வியாதி. விஸமஜ்ஜா²ஸயதாயாதி சக்கு²ஸ்ஸ விஸமஜ்ஜா²ஸயம் விய ஹோதீதி கத்வா வுத்தா. சக்கு²மதோ வா புக்³க³லஸ்ஸ அஜ்ஜா²ஸயவஸேன சக்கு² விஸமஜ்ஜா²ஸயம். ஏஸ நயோ ஸேஸேஸுபி.

த³ட்டு²…பே… லக்க²ணந்தி ஏத்த² த³ட்டு²ம் காமேதீதி த³ட்டு²காமோ தஸ்ஸ பா⁴வோ த³ட்டு²காமதா, ரூபதண்ஹாயேதம் அதி⁴வசனம். ஸா பன அனாக³தே சக்கா²தீ³ஸு ஆதீ³னவபடிச்சா²தி³காவிஜ்ஜாமூலபத்த²னாஸபா⁴வா பாகடா அபாகடாதி து³விதா⁴. தத்த² யா அயம் ‘‘ஈதி³ஸம் ஈதி³ஸஞ்ச ஸுகு²மதமவிஸயக்³க³ஹணஸமத்த²ம் சக்கு² ஹோதூ’’தி ஏவம் கம்மாயூஹனதோ புப்³பே³, பச்சா² வா உப்பன்னா பாகடா. இந்த்³ரியவிஸேஸம் பன அனாமஸித்வா அவிஸேஸேன பரிபுண்ணாயதனப⁴வஸம்பத்திம் பத்தே²த்வா, அபத்தே²த்வா வா தத்த² அவிக³ததண்ஹாவஸேன கம்மம் கரோந்தஸ்ஸ அப்பஹீனபா⁴வேன அனுஸயிதா அபி கம்மஸாமத்தி²யவிசித்தஹேதுபூ⁴தா அபாகடா. ஸா து³விதா⁴பி நிதா³னம் உபனிஸ்ஸயோ யஸ்ஸ தம் த³ட்டு²காமதானிதா³னம், ததே³வ கம்மம், தம் ஸமுட்டா²னமேதேஸந்தி த³ட்டு²காமதானிதா³னகம்மஸமுட்டா²னானி, ஏவம்விதா⁴னம் பூ⁴தானம் பஸாதோ³ த³ட்டு²காமதா…பே… பஸாதோ³, தம் லக்க²ணமஸ்ஸ, ததா² ஹுத்வா லக்கீ²யதீதி வா த³ட்டு²காமதானிதா³னகம்மஸமுட்டா²னபூ⁴தபஸாத³லக்க²ணம்.

ஏத்த² ச க³ப்³ப⁴ஸேய்யகானம் தி³ன்னபடிஸந்தி⁴கம், அஞ்ஞம் வா கம்மம் சக்கா²தீ³னி நிப்³ப³த்தேதி. ஓபபாதிகானம் பன படிஸந்தி⁴க்க²ணேவ பரிபுண்ணாயதனானம் நிப்³ப³த்தமானானம் படிஸந்தி⁴ஜனகமேவ கம்மம் பரிபுண்ணஸகலமத்தபா⁴வம் நிப்³ப³த்தேதீதி க³ஹேதப்³ப³ம். கத²ம் பன ஏககம்முனா நிப்³ப³த்தமானானம் சக்கா²தீ³னம் விஸேஸோதி? காரணஸ்ஸ பி⁴ன்னத்தா. தம்தம்ப⁴வபத்த²னாபூ⁴தா ஹி தண்ஹா தம்தம்ப⁴வபரியாபன்னாயதனாபி⁴லாஸதாய ஸயம் விசித்தரூபா உபனிஸ்ஸயபா⁴வேன தம்தம்ப⁴வனிப்³ப³த்தககம்மஸ்ஸபி விசித்தபே⁴த³தம் வித³ஹதி. யதோ ததா³ஹிதவிஸேஸம் ததா²வித⁴ஸமத்த²தாயோகே³ன அனேகரூபாபன்னம் விய அனேகவிஸிட்ட²ஸபா⁴வம் ப²லம் நிப்³ப³த்தேதி, ந சேத்த² ஸமத்த²தாஸமத்த²தாஸபா⁴வதோ அஞ்ஞா வேதி³தப்³பா³. காரணவிஸேஸேன ஆஹிதவிஸேஸஸ்ஸ விஸிட்ட²ப²லனிப்பா²த³னஸமத்த²தாபா⁴வதோ ஏகஸ்ஸேவ கம்மஸ்ஸ ஸோளஸாதி³விபாகனிப்³ப³த்தனஹேதுபா⁴வேன ச அயமத்தோ² ஸம்படிச்சி²தப்³போ³. லோகேபி ஏகஸ்ஸேவ ஸாலிபீ³ஜஸ்ஸ பரிபுண்ணாபரிபுண்ணதண்டு³லப²லனிப்³ப³த்திஹேதுதா தி³ஸ்ஸதேவ. கிம் வா ஏதாய யுத்திசிந்தாய, ந சிந்திதப்³ப³மேவேதம். யதோ கம்மப²லம் சக்கா²தீ³னி, கம்மவிபாகோ ச ஸப்³ப³ஸோ பு³த்³தா⁴னம்யேவ ஞாணஸ்ஸ விஸயோ, ந அஞ்ஞேஸம் அதக்காவசரத்தா. தேனேவ ப⁴க³வதா ‘‘கம்மவிபாகோ அசிந்தேய்யோ, ந சிந்தேதப்³போ³, யோ சிந்தேய்ய, உம்மாத³ஸ்ஸ விகா⁴தஸ்ஸ பா⁴கீ³ அஸ்ஸா’’திஆதீ³னவம் (அ. நி. 4.77) த³ஸ்ஸேத்வா படிக்கி²த்தம்.

ரூபேஸு ஆவிஞ்ச²னரஸந்தி ஆவிஞ்ச²னம் புக்³க³லஸ்ஸ, ஆவஜ்ஜனாதி³விஞ்ஞாணஸ்ஸ வா தன்னின்னபா⁴வப்பத்தியா ஹேதுபா⁴வோ. ஆதா⁴ரபா⁴வபச்சுபட்டா²னந்தி நிஸ்ஸயபச்சயபா⁴வதோ. ஆலோகாதி³ஸன்னிஸ்ஸயேன கதா³சி உப்பஜ்ஜமானானம்பி ஹி சக்கு²விஞ்ஞாணம் உப்பஜ்ஜனகாலே சக்கு²ம் நிஸ்ஸாய ஏவ உப்பஜ்ஜதீதி. ஏத்தா²ஹ – சக்கு²விஞ்ஞாணுப்பத்திஸமயே ஸம்ப⁴வந்தேஸு மந்தா³மந்த³மஜ்ஜி²மாயுகேஸு ஏகூனபண்ணாஸசக்கூ²ஸு கதமம் சக்கு²விஞ்ஞாணஸ்ஸ ஆதா⁴ரபா⁴வம் பச்சனுபோ⁴தீதி? வுச்சதே –

‘‘படிஸந்தி⁴சித்தஸ்ஸ உப்பாத³க்க²ணே உப்பன்னம் டா²னப்பத்தம் புரேஜாதம் வத்து²ம் நிஸ்ஸாய து³தியப⁴வங்க³ம் உப்பஜ்ஜதி, தேன ஸத்³தி⁴ம் உப்பன்னம் டா²னப்பத்தம் புரேஜாதம் வத்து²ம் நிஸ்ஸாய ததியப⁴வங்க³ம் உப்பஜ்ஜதி, இமினா நயேன யாவதாயுகம் சித்தப்பவத்தி வேதி³தப்³பா³’’தி (விஸுத்³தி⁴. 2.700) –

மக்³கா³மக்³க³ஞாணனித்³தே³ஸே வுத்தனயேன ஏகசித்தக்க²ணாதீதம் சக்கு² ரூபே க⁴ட்டித்வா விஞ்ஞாணஸ்ஸ நிஸ்ஸயோ ஹோதி, தஸ்மா த்³வீஸு ப⁴வங்க³சலனேஸு புரிமஸ்ஸ அனந்தரபச்சயபூ⁴தேன ப⁴வங்க³சித்தேன ஸஹ உப்பன்னந்தி அயமத்தோ² இத⁴ ஸீஹளஸம்வண்ணனாயம், விஸுத்³தி⁴மக்³க³ஸ்ஸ ஸீஹளஸம்வண்ணனாயஞ்ச வுத்தோ.

தளாககா³மமூலவாஸிதா³டா²னாக³த்தே²ரேன பன ‘‘ஆவஜ்ஜனேன, தஸ்ஸ அனந்தரபச்சயபூ⁴தேன ப⁴வங்கே³ன வா ஸஹ உப்பன்னம் சக்கு²’’ந்தி வுத்தம், தம் து³வுத்தம். ஏவஞ்ஹி ஸதி அஞ்ஞஸ்மிம் க⁴ட்டிதே அஞ்ஞம் சக்கு²விஞ்ஞாணஸ்ஸ நிஸ்ஸயோ ஹோதீதி வுத்தம் ஹோதி, ஏவஞ்ச ப⁴வங்க³சலனதோ ஹேட்டா² ததியசதுத்தே²ஹி யாவ தேரஸமசித்தேன ஸஹ உப்பன்னம்பி நிஸ்ஸயோ ஹோதீதி ஆபஜ்ஜேய்ய, ந சேதம் வத்தப்³ப³ம், ததியசதுத்த²சித்ததோ பட்டா²ய உப்பன்னம் கேஸஞ்சி வீதி²சித்தானம் த்³வாரபா⁴வம் ந க³ச்ச²தி நிருத்³த⁴த்தா, மனோத்³வாரஸ்ஸ நிருத்³த⁴ஸ்ஸேவ த்³வாரபா⁴வஸ்ஸ த³ஸ்ஸனதோ. யதி³ ஸியா ‘‘படிஸந்தி⁴சித்தஸ்ஸ உப்பாத³க்க²ணே உப்பன்னம் வத்து²ம் நிஸ்ஸாய து³தியப⁴வங்க³ம் உப்பஜ்ஜதீ’’திஆதி³வசனதோ ‘‘ஏகசித்தக்க²ணாதீதமேவ நிஸ்ஸயோதி அதி⁴ப்பேத’’ந்தி இத³ம்பி ஏகசித்தக்க²ணாதீதம் நிஸ்ஸயோதி யுஜ்ஜதீதி, ஏவம் ஸதி ‘‘தஸ்ஸ அனந்தரபச்சயபூ⁴தேன ப⁴வங்கே³ன வா’’தி வசனம் யுஜ்ஜேய்ய, தேன ஹி ‘‘சித்தக்க²ணத்³வயாதீதம்பி நிஸ்ஸயோ’’தி படிஞ்ஞாதம் ஸியா, தஸ்மா நாயம் தே²ரஸ்ஸ அதி⁴ப்பாயோதி தி³ஸ்ஸதி. ‘‘ஏகசித்தக்க²ணாதிக்கமோ’’தி ச அனதீதேகசித்தக்க²ணஸ்ஸ து³ப்³ப³லதாய ஏகசித்தக்க²ணாதிக்கமேன தஸ்ஸ ப³லவபா⁴வதீ³பனத்த²ம் வுச்சதி, ந பன த்³விதிசதுசித்தக்க²ணாதீதானம் நிஸ்ஸயபா⁴வாபா⁴வதோ. ஏவஞ்ச கத்வா வுத்தம் ஆசரியத⁴ம்மபாலத்தே²ரேன ‘‘ஸம்படிச்ச²னாதீ³னி சுதிஆஸன்னானி தது³த்³த⁴ம் கம்மஜரூபஸ்ஸ அனுப்பத்திதோ ஏகஸ்மிம்யேவ ஹத³யவத்து²ஸ்மிம் வத்தந்தீ’’தி, தஸ்மா தம் தே²ரஸ்ஸ மனோரத²மேவாதி ந ஸாரதோ பச்சேதப்³ப³ம்.

ஸஹஜாதேஸு ப³ஹூஸு பஸாதே³ஸு கிம் ஏகோ நிஸ்ஸயோ ஹோதி, உதா³ஹு ஸப்³பே³யேவாதி? நனு வுத்தம் ‘‘புப்³பே³ ஏகம்பி சக்கு² விஞ்ஞாணஸ்ஸ பச்சயோ ஹோதீ’’தி, கதமம் பன தந்தி? யம் தத்த² விஸத³ம் ஹுத்வா ரூபாபி⁴க⁴ட்டனாரஹம். விஸுத்³தி⁴மக்³க³ஸீஹளஸம்வண்ணனாயம் பன ‘‘ஸப்³பே³யேவ நிஸ்ஸயா ஹோந்தீ’’தி வத்வா ‘‘யதி³ ஏவம் ‘சக்கு²ஞ்ச படிச்ச ரூபே ச உப்பஜ்ஜதி சக்கு²விஞ்ஞாண’ந்தி ஏத்த² ‘ரூபே சா’தி வசனம் விய ‘சக்கூ²னீ’திபி ப³ஹுவசனம் கத்தப்³ப³ந்தி அனுயோக³ம் கத்வா தம்விஸோத⁴னத்த²ம் ‘ஸஸம்பா⁴ரசக்கு²த்³வயனிஸ்ஸிதம் பஸாத³த்³வயம் நிஸ்ஸாய ஏகமேவ விஞ்ஞாணம் உப்பஜ்ஜதீதி க³ண்ஹேய்யு’ந்தி இமம் விப்படிபத்திம் நிராகரோந்தேன ப⁴க³வதா ப³ஹுவசனமகத்வா ‘ரூபாயதனம் சக்கு²விஞ்ஞாணதா⁴துயா தம்ஸம்பயுத்தகானஞ்ச த⁴ம்மானம் ஆரம்மணபச்சயேன பச்சயோ’திஆதீ³ஸு (பட்டா². 1.1.2) விய ஸாமஞ்ஞவஸேன ஏகவசனம் கத’’ந்தி வுத்தம். ஆசரியத⁴ம்மபாலத்தே²ரேன பன ததே³வ ஸீஹளஸம்வண்ணனாவசனம் அனிச்ச²ந்தேன ‘‘ஏகம்பி சக்கு² விஞ்ஞாணஸ்ஸ பச்சயோ ஹோதி, ரூபம் பன அனேகமேவ பச்சயபா⁴வவிஸேஸதோ’’தி வுத்தம். ததா² சேவ அம்ஹேஹிபி ஹேட்டா² விபா⁴விதந்தி. யேஸம் பூ⁴தானமயம் பஸாதோ³, தேயேவ இமஸ்ஸ ஆஸன்னகாரணந்தி வுத்தம் ‘‘த³ட்டு²…பே… பத³ட்டா²ன’’ந்தி. ஸோதபஸாதா³தீ³னம்பி லக்க²ணாதி³னித்³தே³ஸே வுத்தனயானுஸாரேன அத்தோ² யோஜேதப்³போ³.

658. கேசீதி மஹாஸங்கி⁴யேஸு ஏகச்சே. சக்கா²தீ³ஸு தேஜாதி³அதி⁴கதா நாம தன்னிஸ்ஸயபூ⁴தானம் தத³தி⁴கதாயாதி த³ஸ்ஸேந்தோ ‘‘தேஜாதி⁴கான’’ந்திஆதி³மாஹ. தத்த² தேஜாதி⁴கானந்தி பமாணவஸேன சதுன்னம் தா⁴தூனம் ஸமானபா⁴வேபி கிச்சவஸேன தேஜோதா⁴துஅதி⁴கானம். ஏவம் ஸேஸேஸுபி. ஆகாஸ …பே… ஸேஸகாதி ஆகாஸாதி⁴கானம் பூ⁴தானம் பஸாதோ³ ஸோதம், வாயுஅதி⁴கானம் கா⁴னம், தோயாதி⁴கானம் ஜிவ்ஹா, போ²ட்ட²ப்³ப³ஸங்கா²தபத²வாதி⁴கானம் காயோதி அத்தோ².

659. ஏவம் பன வத³ந்தானம் கிம் உத்தரந்தி ஆஹ ‘‘தே பனா’’திஆதி³. ஸுத்தம் ஆஹரதா²தி ந தும்ஹாகம் வசனமத்தேனேவ அயமத்தோ² ஸக்கா ஸத்³தா⁴தும், தஸ்ஸ பன பரிதீ³பகம் ஸுத்தமாஹரத². ஸுத்தே ஹி ஆஹடே தஸ்ஸ நேய்யத்த²தம் நீதத்த²தம் விசாரேத்வா யதி³ தஸ்ஸ வஸேன அயமத்தோ² பஞ்ஞாயேத², க³ண்ஹேய்யாம நந்தி அதி⁴ப்பாயோ. ஸுத்தமேவ…பே… கிஞ்சிபீதி இதோ சிதோ ச ஸுத்தம் க³வேஸமானாபி அத்³தா⁴ ஏகந்தேன கிஞ்சிபி ஏககா³தா²பத³மத்தம்பி தத³த்த²பரிதீ³பகம் ஸுத்தம் ந த³க்கி²ஸ்ஸந்தேவ தேபிடகே பு³த்³த⁴வசனே தாதி³ஸஸ்ஸேவ ஸுத்தந்தஸ்ஸ அபா⁴வதோ.

660. கிஞ்சாபி ஸுத்தந்தவஸேன அயமத்தோ² ந தி³ஸ்ஸதி, யுத்திதோ பன தி³ஸ்ஸதீதி சே, தம்பி நத்தீ²தி த³ஸ்ஸேந்தோ ஆஹ ‘‘விஸேஸே ஸதீ’’திஆதி³. பூ⁴தானஞ்ஹி விஸேஸே ஸதி பஸாதோ³ கத²ம் ப⁴வே, நேவ ப⁴வேய்ய, ந ச ப⁴வேய்ய, கிம் காரணந்தி ஆஹ ‘‘ஸமானானஞ்ஹி பூ⁴தானம், பஸாதோ³ பரிதீ³பிதோ’’தி. யஸ்மா ஸமானானமேவ பூ⁴தானம் பஸாதோ³ போராணேஹி பரிதீ³பிதோ, ந விஸமானானம். பத²வீதா⁴துஅதி⁴ககலாபஸ்ஸ ஹி கக்க²ளத்தா, ஆபோதா⁴துஅதி⁴ககலாபஸ்ஸ விஸ்ஸந்த³னதோ, தேஜோதா⁴துஅதி⁴ககலாபஸ்ஸ பரிக்³க³ய்ஹமானத்தா, வாயோதா⁴துஅதி⁴ககலாபஸ்ஸ ச விஸ்ஸரணதோ ந தேஸு பஸாதோ³ பதிட்டா²தும் ஸக்கோதி, தஸ்மா தேஸம் கிச்சதோ ஸமானானம்யேவ பஸாதோ³ உப்பஜ்ஜேய்ய, ந விஸமானானந்தி.

661-2. யதி³ ஏவம் கத²ம் பஸாதா³னம் விஸேஸதாதி ஆஹ ‘‘தஸ்மா’’திஆதி³. யஸ்மா வுத்தப்பகாரேன பஸாத³வத்து²கானம் பூ⁴தானம் விஸேஸேன ந ப⁴விதப்³ப³ம், தஸ்மா ஏதேஸம் பஸாத³னிஸ்ஸயபூ⁴தானம் இத³மூனம், இத³மதி⁴கந்தி ஏதம் விஸேஸபரிகப்பனம் ஸப்³ப³ஸோ ஸப்³பா³காரேன பஹாய ஞேய்யா கம்மவிஸேஸேன பஸாதா³னம் விஸேஸதா. யதா² அவிஸேஸேபி பூ⁴தானம் ரூபானம் ரஸாத³யோ அஞ்ஞமஞ்ஞவிஸதி³ஸா ஹோந்தி, ஏவம் சக்கா²த³யோபி பூ⁴தவிஸேஸாபா⁴வேபி அஞ்ஞமஞ்ஞவிஸதி³ஸா ஹோந்தி. ஸோ பனாயம் விஸிட்ட²பா⁴வோ கம்மவிஸேஸேன விஞ்ஞாதப்³போ³. ஏகம்பி ஹி கம்மம் பஞ்சாயதனிகத்தபா⁴வபத்த²னானிப்ப²ன்னம் சக்கா²தி³விஸேஸஹேதுதாய அஞ்ஞமஞ்ஞஸ்ஸ அஸாதா⁴ரணவிஸிட்ட²ம் ஸாமத்தி²யவிஸேஸதோ. ந ஹி யேன விஸேஸேன சக்கு²ஸ்ஸ பச்சயோ, தேனேவ ஸோதஸ்ஸ ஹோதி இந்த்³ரியந்தரபா⁴வப்பத்திதோ. ‘‘படிஸந்தி⁴க்க²ணே மஹக்³க³தா சேதனா கடத்தாரூபானம் கம்மபச்சயேன பச்சயோ’’தி வசனதோ படிஸந்தி⁴க்க²ணே விஜ்ஜமானானம் ஸப்³பே³ஸம்யேவ கடத்தாரூபானம் ஏகா சேதனா கம்மபச்சயோ ஹோதீதி விஞ்ஞாயதி. நானாசேதனாய ஹி ததா³ இந்த்³ரியுப்பத்தியம் ஸதி பரித்தேன ச மஹக்³க³தேன ச கம்மேன கடத்தாரூபம் ஆபஜ்ஜேய்ய, ந சேகா படிஸந்தி⁴ அனேககம்மனிப்³ப³த்தா ஹோதீதி ஸித்³த⁴மேகேன கம்மேன அனேகிந்த்³ரியுப்பத்தி ஹோதீதி. ‘‘ந ஹி பூ⁴தவிஸேஸேன, ஹோதி தேஸம் விஸேஸதா’’தி இத³ம் நிக³மனவஸேன வுத்தம்.

663. ஏவம் கம்மவிஸேஸதோ விஸிட்டே²ஸு ச ஏதேஸு ஆரம்மணக்³க³ஹணேபி அயம் விஸேஸோதி த³ஸ்ஸேதும் ‘‘ஏவமேதேஸூ’’திஆதி³ வுத்தம். அப்பத்தகா³ஹகந்தி அஸம்பத்தக்³கா³ஹகம் அத்தனோ நிஸ்ஸயேன ஸஹ அனல்லீயனனிஸ்ஸயே ஏவ ரூபாதி³விஸயே விஞ்ஞாணுப்பத்திஹேதுபா⁴வதோ. கேசி பன தம்பி ‘‘ஸம்பத்தக்³கா³ஹகமேவா’’தி வத³ந்தி, தம் ந ஸுந்த³ரம் ஸாந்தரே அதி⁴கே ச விஸயே விஞ்ஞாணுப்பத்திஹேதுபா⁴வதோ. யதி³ ஹி சக்கு²ஸோதானி ஸம்பத்தவிஸயமேவ க³ண்ஹந்தி, சக்கு²பஸாத³தோ விச்சி²ன்னதே³ஸே டி²தேஸு தாரகாதீ³ஸு நிஸ்ஸயவஸேன ச பமாணதோ அதி⁴கேஸு சந்த³மண்ட³லாதீ³ஸு ரூபாயதனேஸு ஸோதபஸாத³தோ ச விச்சி²ன்னதே³ஸஸம்பூ⁴தேஸு உத³ரசம்மஸந்தி⁴சம்மாதி³அந்தரிதேஸு குச்சி²ஸத்³த³ஸந்தி⁴ஸத்³தா³தீ³ஸு புது²லேஸு ச ஸமுத்³த³ஸத்³தா³தீ³ஸு ஸத்³தா³யதனேஸு விஞ்ஞாணுப்பத்தி ந ஸியா ஸம்பத்தக்³கா³ஹகானம் காயிந்த்³ரியாதீ³னம் ததா² அத³ஸ்ஸனதோ.

ஏத்த² ச வதே³ய்ய – அதி⁴ட்டா²னதோ ப³ஹிந்த்³ரியஸ்ஸ பவத்தி ஹோதீதி ஸம்பத்தவிஸயமேவ யத்தகம் விஸயம், தத்தகம் விஸயம் க³ஹணாகாரம் ப²ரித்வா க³ண்ஹாதி, தஸ்மா அஸித்³த⁴மேதம் ‘‘ஸாந்தரே அதி⁴கே ச விஸயே விஞ்ஞாணுப்பத்திஹேதுபா⁴வதோ’’தி? தம் ந, அதி⁴ட்டா²னதோ ப³ஹி இந்த்³ரியுப்பத்தியா ஏவ அபா⁴வா. அதி⁴ட்டா²னதே³ஸே ஏவ ஹி இந்த்³ரியம் பவத்ததி தத்த² கிச்சாதி³ப்பயோக³த³ஸ்ஸனதோ. ஸதி ச ஏதஸ்ஸ ப³ஹி பவத்தியம் அதி⁴ட்டா²னே பிஹிதேபி விஸயக்³க³ஹணம் ஸியா, தஸ்மா அதி⁴ட்டா²னதே³ஸே டி²தானம்யேவ சக்கு²ஸோதானம் அஸம்பத்தவிஸயஸ்ஸேவ க³ஹணதோ நாஸித்³த⁴மேதம் ‘‘ஸாந்தரே அதி⁴கே ச விஞ்ஞாணுப்பத்திஹேதுபா⁴வதோ’’தி. தேனாஹு போராணா –

‘‘ஸப்³ப³கோ³சரயோகே³பி, தி³ட்ட²ம் ரூபரவேஸு யம்;

விச்சி²ன்னபுது²விஞ்ஞாணம், ஸம்பத்தக்³கா³ஹபா³த⁴க’’ந்தி.

தஸ்ஸத்தோ² – ஸப்³பே³ஸம் சக்கா²தீ³னம் கோ³சரேன ரூபாதி³னா யோகே³ ஏககாரியஸாத⁴கத்தா ஸம்ப³ந்தே⁴ க⁴ட்டனே வா ஸமானே ஸதி ரூபரவேஸு ரூபஸத்³தா³யதனேஸு விஸயபூ⁴தேஸு சக்கா²தி³தோ தூ³ரபா⁴வேன சேவ கேனசி அனந்தரிதபா⁴வேன ச விச்சி²ன்னேஸு பமாணதோ புது²லேஸு ச விஸயேஸு உப்பஜ்ஜமானம் யம் விஞ்ஞாணம், தம் சக்கு²ஸோதானம் ஸம்பத்தக்³கா³ஹஸ்ஸ ஸம்பத்தக்³க³ஹணஸ்ஸ பா³த⁴கந்தி.

அபிச யதி³ சக்கு² ஸம்பத்தக்³கா³ஹகம் ஸியா, அத்தனோ மண்ட³லே டி²தம் வண்ணம்பி பஸ்ஸேய்ய. ததா² அக்கி²புடே அஞ்ஜனம் பகு²மமூலே அக்கி²வண்ணம் பகு²மமூலே க⁴ட்டியமானம் அஞ்ஜனஸலாகம்பி பஸ்ஸேய்ய, ந ச பனேதம் தி³ஸ்ஸதி, தஸ்மா தன்னிஸ்ஸயே தே³ஸே டி²தமேவ விஸயம் க³ண்ஹாதி. ஸோதாயதனம்பி யதி³ ஸம்பத்தக்³கா³ஹகம் அப⁴விஸ்ஸ, சித்தஸமுட்டா²னம் ஸத்³தா³யதனம் ஸோதவிஞ்ஞாணஸ்ஸ கதா³சிபி ஆரம்மணபச்சயோ ந ஸியா. ந ஹி ப³ஹித்³தா⁴ சித்தஸமுட்டா²னானம் உப்பத்தி அத்தி². பட்டா²னே ச ‘‘ஸத்³தா³யதனம் ஸோதவிஞ்ஞாணதா⁴துயா ஆரம்மணபச்சயேன பச்சயோ’’தி (பட்டா². 1.1.2) அவிஸேஸேனேவ ஸத்³த³ஸ்ஸ ஸோதவிஞ்ஞாணாரம்மணபா⁴வோ வுத்தோ. கிஞ்ச யதி³ ஸோதம் ஸம்பத்தக்³கா³ஹகம் ஸியா, அத்தனோ விஸயபதே³ஸேயேவ க³ஹேதப்³ப³தோ க³ந்த⁴ஸ்ஸ விய ஸத்³த³ஸ்ஸாபி தி³ஸாதே³ஸவவத்தா²னம் ந ஸியா. ஏவஞ்ச ஸத்³தா³னுஸாரேன கண்ட³ம் பாதேந்தஸ்ஸ ஸத்³த³வேதி⁴னோ அத்தனோ கண்ணபி³லேயேவ ஸரபாதனம் ஸியா, தஸ்மா யத்த² உப்பன்னோ ஸத்³தோ³, தத்தே²வ டி²தோ ஸோதபதே² ஆபாத²மாக³ச்ச²தி.

யதி³ ஏவம் கத²ம் தூ³ரே டி²தேஹி ரஜகாதி³ஸத்³தா³ சிரேன ஸுய்யந்தி. அஸம்பத்தக்³கா³ஹகத்தே ஹி தூ³ராஸன்னதே³ஸவத்தீனம் ஸமகமேவ ஸவனேன ப⁴விதப்³ப³ந்தி? நயித³மேவம் தூ³ராஸன்னானம் யதா²பாகடே ஸத்³தே³ க³ஹணவிஸேஸதோ. யதா² ஹி தூ³ராஸன்னானம் வசனஸத்³தே³ யதா²பாகடேவ க³ஹணவிஸேஸதோ அக்க²ரவிஸேஸனம் க³ஹணம், அக்³க³ஹணஞ்ச ஹோதி, ஏவம் ரஜகாதி³ஸத்³தே³பி ஆஸன்னஸ்ஸ ஆதி³தோ பபு⁴தி யாவ அவஸானா கமேன பாகடீபூ⁴தே, தூ³ரஸ்ஸ ச அவஸானே, மஜ்ஜே² வா பிண்ட³வஸேன பவத்திபாகடீபூ⁴தே யதா²பாகடம் நிச்ச²யக்³கா³ஹகானம் ஸோதவிஞ்ஞாணவீதி²யா பரதோ பவத்தானம் மனோத்³வாரிகஜவனானம் க³ஹணவிஸேஸதோ லஹுகம் ஸுதோ, சிரேன ஸுதோதி அபி⁴மானோ ஹோதி. ஸோதவிஞ்ஞாணப்பவத்தி பன உப⁴யத்த² ஸமானா ஸத்³த³ஸ்ஸ உப்பன்னதே³ஸே டி²தஸ்ஸ அத்தனோ விஜ்ஜமானக்க²ணேயேவ ஸோதாபாத²க³மனதோ. யதி³ ஸத்³த³ஸ்ஸ பூ⁴தபரம்பராய ஸமந்ததோ பவத்தி நத்தி², கத²ம் படிகோ⁴ஸுப்பத்தீதி? தூ³ரே டி²தோபி ஸத்³தோ³ அஞ்ஞத்த² படிகோ⁴ஸுப்பத்தியா, பா⁴ஜனாதி³சலனஸ்ஸ ச பச்சயோ ஹோதி அயோகந்தோ விய அயோசலனஸ்ஸாதி த³ட்ட²ப்³ப³ம்.

ஸேஸம்…பே… கா³ஹகந்தி யம் பன அவஸேஸம் கா⁴னஜிவ்ஹாகாயஸங்கா²தம் பஸாத³த்தயம், தம் ஸம்பத்தக்³கா³ஹகம் ஹோதி நிஸ்ஸயவஸேன சேவ ஸயஞ்ச அத்தனோ நிஸ்ஸயே அல்லீனேயேவ விஸயே விஞ்ஞாணுப்பத்திஹேதுபா⁴வதோ. க³ந்த⁴ரஸானம் நிஸ்ஸயேஸு கா⁴னஜிவ்ஹானிஸ்ஸயேஹி ஸஹ அல்லீனாயேவ க³ந்த⁴ரஸா விஞ்ஞாயந்தி. போ²ட்ட²ப்³ப³ஞ்ச பூ⁴தத்தயரூபம் காயனிஸ்ஸயேன அல்லீனமேவ விஞ்ஞாயதீதி.

வண்ணவிகாரமாபஜ்ஜமானந்தி தோ³ஸாதீ³ஹி காரணேஹி அமனாபவண்ணஸ்ஸ உப்பத்திவஸேன வண்ணவிகாரம் ஆபஜ்ஜமானம். ஹத³யங்க³தபா⁴வந்தி சித்தக³தம் அஜ்ஜா²ஸயம். பகாஸேதீதி ரூபமிவ பகாஸம் கரோதி, ஸவிக்³க³ஹமிவ த³ஸ்ஸேதீதி அத்தோ². அனேகத்த²த்தா ஹி தா⁴தூனம் பகாஸனத்தோ² ஏவ ரூப-ஸத்³தோ³ த³ட்ட²ப்³போ³. தம் பன ரூபந்தி ஸம்ப³ந்தோ⁴. சக்கு²ம்ஹி, சக்கு²ஸ்ஸ வா படிஹனனம் லக்க²ணமேதஸ்ஸாதி சக்கு²படிஹனனலக்க²ணம். ஏவம் ஸோதபடிஹனனலக்க²ணந்திஆதீ³ஸுபி. படிஹனனஞ்சேத்த² விஸயவிஸயீனம் அஞ்ஞமஞ்ஞாபி⁴முக²பா⁴வோ யோக்³யதே³ஸாவட்டா²னம் படிகா⁴தோ வியாதி கத்வா. யதா² படிகா⁴தே ஸதி து³ப்³ப³லஸ்ஸ சலனம் ஹோதி, ஏவம் விஸயாபி⁴முக²பா⁴வே ஸதி விஸயினோ தம்ஸம்ப³ந்த⁴ஸ்ஸ ச வத்து²ரூபஸ்ஸ, தன்னிஸ்ஸிதஸ்ஸ ச ப⁴வங்க³ஸ்ஸ சலனம் ஹோதி. ஸோ ரூபஸ்ஸ சக்கு²ம்ஹி, சக்கு²ஸ்ஸ வா ரூபே ஹோதி. தேனாஹ ‘‘யம்ஹி சக்கு²ம்ஹி அனித³ஸ்ஸனம்ஹி ஸப்படிக⁴ம்ஹி ரூபம் ஸனித³ஸ்ஸனம் ஸப்படிக⁴ம் படிஹஞ்ஞி வா, யம் சக்கு² அனித³ஸ்ஸனம் ஸப்படிக⁴ம் ரூபம்ஹி ஸனித³ஸ்ஸனம்ஹி ஸப்படிக⁴ம்ஹி படிஹஞ்ஞி வா’’தி (த⁴. ஸ. 597) ச ஆதி³. விஸயபா⁴வோ ஆரம்மணபச்சயதா. கோ³சரபா⁴வபச்சுபட்டா²னந்தி ஏத்த² அனஞ்ஞதா²பா⁴வோ விஸயதா, தப்³ப³ஹுலதா கோ³சரபா⁴வோதி அயம் விஸயகோ³சரானம் விஸேஸோ. ஸத்³தா³யதீதி உதா³ஹரீயதி, ஸகேஹி வா பச்சயேஹி ஸோதவிஞ்ஞேய்யபா⁴வம் உபனீயதீதி அத்தோ². அத்தானம் க³ந்த⁴யதீதி ஸுக³ந்த⁴ம், து³க்³க³ந்த⁴ந்தி வா அத்தானம் பகாஸேதி. தேனாஹ ‘‘ஸூசயதீ’’தி.

664. இத்தி²யா ஏவ இந்த்³ரியம் இத்தி²ந்த்³ரியம். யதா² சக்கா²தீ³னி இந்த்³ரியானி புரிஸஸ்ஸபி ஹோந்தி, நயித³ம் ததா². இத³ம் பன நியமேன இத்தி²யா ஏவ ஹோதி, தஸ்மா ‘‘இத்தி²ந்த்³ரிய’’ந்தி வுச்சதி. ஏவம் புரிஸிந்த்³ரியேபி. இத்தி²யா பா⁴வோ, இத்தீ²தி ப⁴வதி ஏதேன சித்தம், அபி⁴தா⁴னம் வாதி இத்தி²பா⁴வோ. படிஸந்தி⁴ஸமுட்டி²தோதி படிஸந்தி⁴யம்யேவ ஸமுட்டி²தோ, படிஸந்தி⁴சித்தேன ஸஹ ஏகக்க²ணே ஸமுட்டி²தோ. ஏதேன ட²பேத்வா லிங்க³பரிவத்தனம் சக்கு²ந்த்³ரியாதீ³னி விய இமஸ்ஸ அபாதுபா⁴வமாஹ. யஞ்சேதம் இத்தி²லிங்கா³தீ³தி யம் பனேதம் இந்த்³ரியப²லபூ⁴தம் இத்தி²லிங்கா³தி³. ஆதி³-க்³க³ஹணேன இத்தி²னிமித்தஇத்தி²குத்தஇத்தா²கப்பானம் ஸங்க³ஹோ. தத்த² விஸத³அவிஸத³ஹத்த²பாதா³தி³தா ஸண்டா²னம் இத்தி²லிங்க³ம். இத்தீ²னஞ்ஹி ஹத்த²பாத³கீ³வாஉரஆதி³ஸண்டா²னம் ந புரிஸானம் விய ஹோதி. ததா² ஹி தாஸம் ஹேட்டி²மகாயோ விஸதோ³, உபரிமகாயோ அவிஸதோ³, ஹத்த²பாதா³ கு²த்³த³கா, முக²ம் கு²த்³த³கம், த²னமம்ஸா அவிஸதா³, தா நிம்மஸ்ஸுதா³டி²கா. கேஸப³ந்த⁴வத்த²க்³க³ஹணஞ்ச இத்தி²னிமித்தம். த³ஹரகாலேபி ஸுப்பகமுஸலகாதீ³ஹி கீளா மகசிவாகேன ஸுத்தகந்தனந்தி ச ஏவமாதி³ இத்தி²குத்தம், இத்தி²கிரியாதி அத்தோ². அவிஸத³ட்டா²னக³மனாதி³ஆகாரோ இத்தா²கப்போ. புரிஸம்பி ஹி அவிஸத³ம் தி³ஸ்வா மாதுகா³மோ விய திட்ட²தி நிபஜ்ஜதி நிஸீத³தி கா²த³தி பு⁴ஞ்ஜதீதி வத³ந்தி. இத³ம் பன இத்தி²லிங்கா³தி³பரிதீ³பனம் அகுஸலந்தி வத்வா அஞ்ஞதா²பி வண்ணேந்தி ஆசரியா. கத²ம்? யோனிபதே³ஸோ இத்தி²லிங்க³ம், ஸராதி⁴ப்பாயா இத்தி²னிமித்தம், அவிஸத³ட்டா²னக³மனாத³யோ இத்தி²குத்தம், இத்தி²ஸண்டா²னம் இத்தா²கப்போதி. ஏத்த² ச அதி⁴ப்பாயோ நாம புரிஸஸ்மிம் மேது²னதண்ஹா. ஸா ஹி தாஸம் நிச்சம் ப³லவதரா பவத்ததி, அதோ ஸாபி இத்தீ²தி ஸஞ்ஜானனஸ்ஸ நிமித்ததாய ‘‘இத்தி²னிமித்த’’ந்தி வுச்சதி. கிஞ்சாபி இத்தீ²தி ஸஞ்ஞாணஸ்ஸ நிமித்ததாய குத்தாகப்பானம்பி நிமித்தேயேவ அந்தோக³த⁴தா, ததா²பி தேஸம் விஸும் க³ஹணதோ ஸராதி⁴ப்பாயா ஏவ நிமித்தபா⁴வேன அதி⁴ப்பேதா.

665. கிம் பனேதம் இத்தி²லிங்கா³தி³ இத்தி²ந்த்³ரியம் விய படிஸந்தி⁴ஸமுட்டி²தம் ஹோதீதி ஆஹ ‘‘இத்தி²ந்த்³ரியம் படிச்சேவா’’திஆதி³. கிஞ்சாபி ஹி இத்தி²லிங்கா³தீ³னி யதா²ஸகம் கம்மாதி³னா பச்சயேன ஸமுட்ட²ஹந்தி, யேபு⁴ய்யேன பன இத்தி²ந்த்³ரியஸஹிதேயேவ ஸந்தானே தம்ததா³காரா ஹுத்வா ஸம்ப⁴வந்தி, இதரத்த² ச ந ப⁴வந்தீதி தேஸம் தப்³பா⁴வபா⁴விதம் உபாதா³ய ‘‘இத்தி²ந்த்³ரியம் படிச்சேவ ஜாயந்தீ’’தி வுத்தானி. ஏவஞ்ச கத்வா வக்க²தி ‘‘இத்தி²…பே… காரணபா⁴வபச்சுபட்டா²ன’’ந்தி. ஈதி³ஸேனேவ காரணபா⁴வஸங்கா²தேன அதி⁴பதிபா⁴வேன தஸ்ஸ இந்த்³ரியதா வுத்தா இந்த்³ரியஸஹிதே ஸந்தானே இத்தி²லிங்கா³தி³ஆகாரரூபபச்சயானம் அஞ்ஞதா² அனுப்பாத³னதோ, ந பன இந்த்³ரியாதி³பச்சயஸம்ப⁴வதோ. ததா² ஹேதம் ஜீவிதிந்த்³ரியம் விய ஏககலாபக³தானம் ஆஹாரோ விய கலாபந்தரரூபானம் உபத்த²ம்ப⁴கமனுபாலகம் வா ந ஹோதி. ஏவஞ்ச கத்வா ஜீவிதிந்த்³ரியஆஹாரானம் விய இமஸ்ஸ இந்த்³ரியபச்சயதா, அத்தி²அவிக³தபச்சயதா ச பாளியம் ந வுத்தா. யஸ்மா பச்சயந்தராதீ⁴னானி இத்தி²லிங்கா³தீ³னி, தஸ்மா யத்த²ஸ்ஸ ஆதி⁴பச்சம், தம்ஸதி³ஸேஸு மதசித்தகதரூபேஸுபி தம்ஸண்டா²னதா தி³ஸ்ஸதி. யஸ்மா பனேதே இத்தி²ந்த்³ரியம் படிச்ச ஜாயந்தாபி க³ப்³ப⁴ஸேய்யகானம் படிஸந்தி⁴யம் ந ஸமுட்ட²ஹந்தி, பவத்தேயேவ ஸமுட்ட²ஹந்தி, தஸ்மா ஆஹ ‘‘பவத்தே…பே… படிஸந்தி⁴ய’’ந்தி.

666-7. ஸம்ஸேத³ஜஓபபாதிகானம் பன கிஞ்சி இத்தி²ந்த்³ரியேன ஸஹ படிஸந்தி⁴யமேவ நிப்³ப³த்ததி. ந சாதி ச-காரோ வசனீயந்தரஸமுச்சயே. ‘‘கிஞ்சா’’தி இமஸ்ஸ அத்தே² த³ட்ட²ப்³போ³. யஸ்மா லிங்கா³தி³ஆகாரேஸு ரூபேஸு ரூபாயதனம் சக்கு²விஞ்ஞேய்யம், தஸ்மா ஆஹ ‘‘இத்தி²லிங்கா³த³யோ சக்கு²விஞ்ஞேய்யா ஹோந்தீ’’தி. யஸ்மா பன ததோ அஞ்ஞானி யதா²யோக³ம் ஸோதவிஞ்ஞேய்யானி சேவ மனோவிஞ்ஞேய்யானி ச, தஸ்மா வுத்தம் ‘‘ந வா’’தி. யதா²வுத்தோ பபஞ்சோ புரிஸிந்த்³ரியேபி யதா²ஸம்ப⁴வம் யோஜேதப்³போ³தி அதிதே³ஸம் கரோந்தோ ஆஹ ‘‘ஏஸேவா’’திஆதி³. ஸேஸேபீதி ஏத்தகேயேவ வுத்தே இதோ ஸேஸேஸு ஸப்³பே³ஸுபீதி கதா³சி கோசி சிந்தேய்யாதி ஆஹ ‘‘புரிஸிந்த்³ரியே’’தி. பட²மகப்பானந்தி பட²மகப்பிகனரானம். தேஸஞ்ஹி ஆப⁴ஸ்ஸரலோகதோ சவித்வா இதூ⁴பபன்னானம் தீ³க⁴ஸ்ஸ காலஸ்ஸ அச்சயேன ஓளாரிகம் ஆஹாரம் ஆஹரதம் முத்தகரீஸேஸு ஸஞ்ஜாதேஸு தேஸம் நிக்க²மனத்தா²ய வணமுகா²னி பி⁴ஜ்ஜந்தி, புரிஸஸ்ஸ புரிஸபா⁴வோ, இத்தி²யா ச இத்தி²பா⁴வோ பாதுரஹோஸி. ததா² ஹி புரிமத்தபா⁴வேஸு பவத்தஉபசாரஜா²னானுபா⁴வேன யாவ ஸத்தஸந்தானே காமராக³விக்க²ம்ப⁴னவேகோ³ ந படிபஸ்ஸம்ப⁴தி, ந தாவ ப³லவகாமராகூ³பனிஸ்ஸயானி இத்தி²புரிஸிந்த்³ரியானி பாதுரஹேஸும். யதா³ பனஸ்ஸ விச்சி²ன்னதாய ப³லவகாமராகோ³ லத்³தா⁴வஸரோ அஹோஸி, ததா³ ததூ³பனிஸ்ஸயானி தானி ஸத்தானம் ஸந்தானே ஸஞ்ஜாயந்தி.

668. பரதோதி பட²மகப்பதோ அபரபா⁴கே³. பவத்தே…பே… பரிவத்ததீதி யதா² தம் ஸோரேய்யகஸேட்டி²புத்தஸ்ஸ வியாதி அதி⁴ப்பாயோ. அபி-ஸத்³தே³ன பட²மபாராஜிகாயம் வினீதவத்து²பாளியம் ஆக³தபி⁴க்கு²ஸ்ஸ, பி⁴க்கு²னியா விய ச படிஸந்தி⁴யம் ஸமுட்டி²தஸ்ஸபி பவத்தே பரிவத்தனம் தீ³பேதி. யதா²ஹ –

‘‘தேன கோ² பன ஸமயேன அஞ்ஞதரஸ்ஸ பி⁴க்கு²னோ இத்தி²லிங்க³ம் பாதுபூ⁴தம் ஹோதி. தேன கோ² பன ஸமயேன அஞ்ஞதரிஸ்ஸா பி⁴க்கு²னியா புரிஸலிங்க³ம் பாதுபூ⁴தம் ஹோதீ’’தி (பாரா. 69).

யஸ்ஸ பன படிஸந்தி⁴யம் த்³வீஸு ஏகம்பி ந ஸமுட்டி²தம், ஸோ அபா⁴வகோ நாம, தஸ்ஸ பவத்தியம்பி இந்த்³ரியுப்பத்தி ந ஹோதீதி த³ட்ட²ப்³ப³ம்.

669. கிம் பனேதஸ்ஸ உப⁴யஸ்ஸபி நிப்³ப³த்தியா, வினாஸனஸ்ஸ ச காரணம், யதோ இத³ம் ஸமுட்டா²தி, பரிவத்ததீதி ச வுச்சதீதி இமம் அனுயோக³ம் மனஸி கத்வா ஆஹ ‘‘மஹதா பாபகம்மேனா’’திஆதி³. தத்த² மஹதாதி பரதா³ரிககம்மாதி³னா மஹாப³லேன. பாபகம்மேன உபனிஸ்ஸயபூ⁴தேன. மஹதா குஸலேனேவாதி இத³ம் ஸுக³திம் ஸந்தா⁴ய வுத்தம். து³க்³க³தியம் பன உப⁴யம்பி அகுஸலகம்மேனேவ ஜாயதி.

670. இந்த்³ரியே வினட்டே² ஏகந்தேனேவ லிங்க³ம்பி வினஸ்ஸதேவாதி ஆஹ ‘‘இத்தி²லிங்க³ம் வினஸ்ஸதீ’’தி. அயம் பனேத்த² அதி⁴ப்பாயோ த³ட்ட²ப்³போ³ – இமேஸு த்³வீஸு புரிஸிந்த்³ரியம் உத்தமம், இத்தி²ந்த்³ரியம் ஹீனம், புரிஸிந்த்³ரியஸ்ஸ அந்தரதா⁴னம் மஹந்தேன அகுஸலேன கம்மேன ஹோதி, ஸமுட்டா²னம் மஹந்தேன குஸலகம்மேன, இத்தி²ந்த்³ரியஸ்ஸ அந்தரதா⁴னம் து³ப்³ப³லாகுஸலேன, ஸமுட்டா²னம்பி து³ப்³ப³லகுஸலேன, து³க்³க³தியம் பன உப⁴யஸ்ஸாபி அந்தரதா⁴னம், ஸமுட்டா²னஞ்ச அகுஸலேனேவ ஹோதீதி. யதி³ ஸுக³தியம் இத்தி²ந்த்³ரியம்பி குஸலேனேவ நிப்³ப³த்ததி, கத²ஞ்சரஹி ‘‘பரதா³ரிககம்மம் கத்வா நிரயே பச்சித்வா தேனேவ பாபகம்மேன பஞ்சஸதக்க²த்தும் மனுஸ்ஸலோகே இத்தீ² ஹுத்வா நிப்³ப³த்ததீ’’திஆதி³வசனந்தி? நாயம் விரோதோ⁴ நிஸ்ஸந்த³ப²லவஸேன வுத்தத்தா. ததா² ஹி படிஸந்தி⁴யம் தாவ புரிஸிந்த்³ரியனிப்³ப³த்தனாரஹம்பி கம்மம் கதா³சி பரதா³ரிகாதி³னா ப³லவபாபகம்மேன படிபா³ஹிதஸாமத்தி²யம் அஸ்ஸ, ததா³ அத்தனோ புரிஸிந்த்³ரியனிப்³ப³த்தனே அஸமத்த²தாய இத்தி²ந்த்³ரியமேவ நிப்³ப³த்தேதி. பவத்தியம் பன அத்தனோ ப³லவபா⁴வேன இத்தி²ந்த்³ரியூபனிஸ்ஸயம் பரதா³ரிகமகுஸலகம்மம் படிபா³ஹித்வா படிஸந்தி⁴தோ பட்டா²ய புரிஸிந்த்³ரியம் ஸமுட்டா²பேந்தம் கதா³சி லத்³த⁴ஸாமக்³கி³தாஸஞ்ஜாதப³லவிஸேஸேன பரதா³ரிகாதி³னா கம்மேன படிபா³ஹிதஸாமத்தி²யம் ப⁴வேய்ய, ததா³ அத்தனோ து³ப்³ப³லதாய புரிஸிந்த்³ரியம் ந நிப்³ப³த்தேதி, இத்தி²ந்த்³ரியமேவ நிப்³ப³த்தேதி. ஏவம் பரதா³ரிகாதி³கம்மூபனிஸ்ஸயேன இத்தி²ந்த்³ரியஸ்ஸ நிப்³ப³த்தனதோ தம் தேன நிப்³ப³த்திதம் கத்வா வுச்சதி.

671-2. யதா³ பன தம் கம்மம் புன ஸாமக்³கி³படிலாப⁴தோ, பரிக்கீ²ணபாபகம்மதாய வா ப³லவப்பத்தம் அப⁴விஸ்ஸ, ததா³ தி³ன்னவேத⁴ம் விய ருக்க²ம் தத³பக³மே அத்தனோ ப³லானுரூபம் புரிஸிந்த்³ரியம் நிப்³ப³த்தேதி, இத்தி²ந்த்³ரியம் பன அத்தனோ காரணாபா⁴வதோ நுப்பஜ்ஜதி. உப⁴யஸ்ஸ பன நிப்³ப³த்தியம்பி விஸதி³ஸிந்த்³ரியனிப்³ப³த்தனதோ புரே ஸத்தரஸமசித்தஸ்ஸ டி²திகாலமுபாதா³ய தம்தம்ஸமுட்டா²பககம்மம் தம் தம் இந்த்³ரியம் ந ஜனேதி. ஸத்தரஸமசித்தேன ஸஹ உப்பன்னம் விஸதி³ஸிந்த்³ரியுப்பத்திதோ புரிமசித்தேன ஸஹ நிருஜ்ஜ²தி. யதி³ ஹி ஸத்தரஸமசித்துப்பாத³தோ பரம்பி உப்பஜ்ஜேய்ய, இதரம் நுப்பஜ்ஜதி ஏகஸ்மிம் ஸந்தானே த்³வின்னம் ஸஹுப்பத்தியா அனிச்சி²தத்தா. தேனேவ ஹி ‘‘யஸ்ஸ வா பன புரிஸிந்த்³ரியம் உப்பஜ்ஜதி, தஸ்ஸ இத்தி²ந்த்³ரியம் உப்பஜ்ஜதீ’’தி (யம. 3.இந்த்³ரியயமக.188) இமஸ்மிம் பஞ்ஹே ‘‘நோ’’தி (யம. 3.இந்த்³ரியயமக.188) படிக்கே²போ கதோதி. ஏவஞ்ச கத்வா வக்க²தி ‘‘உப⁴தோப்³யஞ்ஜனஸ்ஸாபீ’’திஆதி³. ஏகஸ்மிஞ்ச நிருத்³தே⁴ தப்படிப³த்³தா⁴னி லிங்கா³தீ³னி கதிபயதி³வஸேஹி நிருஜ்ஜ²ந்தி, தேஸு நிருத்³தே⁴ஸு இதரானி அனுக்கமேன ஜாயந்தீதி ஆசரியா. இத்தி²னிமித்துப்பாத³ககம்மதோ, புரிஸனிமித்துப்பாத³ககம்மதோ வாதி உப⁴தோ து³வித⁴ம் ப்³யஞ்ஜனமஸ்ஸாதி உப⁴தோப்³யஞ்ஜனோ. தஸ்ஸாபீதி யஸ்ஸ து³வித⁴ம் ப்³யஞ்ஜனமத்தி², தஸ்ஸாபி ஏகமேவ இந்த்³ரியம் ஸியா, கிம் பன இதரஸ்ஸாதி த³ஸ்ஸேதி.

நனு ச து³விதே⁴ ப்³யஞ்ஜனே ஸதி இந்த்³ரியத்³வயேனாபி ப⁴விதப்³ப³ம், ப்³யஞ்ஜனஞ்ஹி தம் தம் இந்த்³ரியம் படிச்ச ஜாயதீதி? ஸச்சம் ஜாயதி, ஏத்தா²பி இத்தி²உப⁴தோப்³யஞ்ஜனஸ்ஸ இத்தி²ந்த்³ரியம் படிச்ச இத்தி²னிமித்தமேவ யாவஜீவம் பவத்ததி, புரிஸஉப⁴தோப்³யஞ்ஜனஸ்ஸ புரிஸிந்த்³ரியம் படிச்ச புரிஸனிமித்தமேவ, இதரம் பன ந தஸ்ஸ இத்தி²ந்த்³ரியபுரிஸிந்த்³ரியஹேதுதோ ஜாயதி. தம் பன யேன காரணேன ஹோதி, தம் த³ஸ்ஸேதும் ‘‘ஏவம் ஸந்தே’’தி அனுயோக³ம் கத்வா ‘‘ந சாபா⁴வோ’’திஆதி³னா ஸோத⁴னம் து வுத்தம். ஏவம் ஸந்தேதி ஏகஸ்மிம்யேவ இந்த்³ரியே ஸதி. அபா⁴வோ சாதி யம் படிச்ச ஜாயதி, தஸ்ஸ அபா⁴வதோ புரிஸஉப⁴தோப்³யஞ்ஜனஸ்ஸ இத்தி²ப்³யஞ்ஜனாபா⁴வோ, இத்தி²உப⁴தோப்³யஞ்ஜனஸ்ஸ புரிஸப்³யஞ்ஜனாபா⁴வோதி அத்தோ². ந சாபா⁴வோ ஸியாதி நேவ து³தியப்³யஞ்ஜனஸ்ஸ அபா⁴வோ ஸியா. ந தம் ப்³யஞ்ஜனகாரணந்தி தம் இந்த்³ரியம் து³தியப்³யஞ்ஜனகாரணம் ந ஹோதி. கஸ்மா? ஸதா³ அபா⁴வதோ. இத்தி²உப⁴தோப்³யஞ்ஜனஸ்ஸ ஹி யதா³ இத்தி²யா ராக³சித்தம் உப்பஜ்ஜதி, ததா³ புரிஸப்³யஞ்ஜனம் பாகடம் ஹோதி, இத்தி²ப்³யஞ்ஜனம் படிச்ச²ன்னம் கு³ள்ஹம் ஹோதி, ததா² இதரஸ்ஸ இதரம். யதி³ ச தேஸம் இந்த்³ரியம் து³தியப்³யஞ்ஜனகாரணம் ப⁴வேய்ய, ஸதா³பி ப்³யஞ்ஜனத்³வயம் திட்டே²ய்ய, ந பன திட்ட²தி, தஸ்மா வேதி³தப்³ப³மேதம் ‘‘ந தஸ்ஸ தம் ப்³யஞ்ஜனகாரண’’ந்தி. கிஞ்சரஹி காரணந்தி சே? ஆஹ ‘‘தஸ்ஸா…பே… காரண’’ந்தி. தத்த² கம்மஸஹாயந்தி புரிமப⁴வஸித்³த⁴ஸ்ஸ இந்த்³ரியனிப்³ப³த்தககம்மஸ்ஸ ஸஹாயம். ராக³சித்தந்தி இத்தி²யா புரிஸஸ்மிம், புரிஸஸ்ஸ இத்தி²யம் வா உப்பன்னம் மேது²னராக³சித்தம். தஸ்மிஞ்ஹி உப்பன்னே தம் பாகடம் ஹோதி, தஸ்மிம் படிப்பஸ்ஸத்³தே⁴ படிச்ச²ன்னம் ஹோதி. யஸ்மா பனிமஸ்ஸ ஏகமேவ இந்த்³ரியம் ஹோதி, தஸ்மா இத்தி²உப⁴தோப்³யஞ்ஜனகோ ஸயம்பி பரம் உத்³தி³ஸ்ஸ க³ப்³ப⁴ம் க³ண்ஹாதி, அத்தானம் உத்³தி³ஸ்ஸ பரம்பி க³ண்ஹாபேதி. ஸோ ஹி இத்தி²ந்த்³ரியவந்ததாய ஸயம் க³ண்ஹாதி, பரேஸு உபக்கமகரணதோ பரம் க³ண்ஹாபேதி. புரிஸஉப⁴தோப்³யஞ்ஜனகோ பரேஸு உபக்கமகரணதோ பரம் க³ப்³ப⁴ம் க³ண்ஹாபேதி, ஸயம் பன புரிஸிந்த்³ரியவந்ததாய க³ப்³ப⁴ம் ந க³ண்ஹாதி.

யஸ்மா இத்தி²ந்த்³ரியே ஸதி இத்தி²லிங்கா³த³யோ ஹோந்தி, தேஸு ச ஸந்தேஸு இத்தீ²தி பகாஸோ ஹோதி, தஸ்மா தம் தஸ்ஸ பகாஸனகாரணந்தி ஆஹ ‘‘இத்தீ²தி பகாஸனரஸ’’ந்தி. து³வித⁴ம்பி பனேதம் இந்த்³ரியம் காயபஸாதோ³ விய ஸகலஸரீரப்³யாபகமேவ, ந சஸ்ஸ காயபஸாதே³ன ஸங்கரோ லக்க²ணபே⁴த³தோ, நிஸ்ஸயபே⁴த³தோ ச.

673. ஸஹஜரூபபரிபாலனலக்க²ணந்தி யதா² அத்தனா ஸஹஜாதரூபானி தீஸு க²ணேஸு பவத்தந்தி, ஏவம் அனுபாலனலக்க²ணம். ஜீவிதிந்த்³ரியஸ்ஸ ஏகந்தகம்மஜத்தா ஸஹஜக்³க³ஹணேனேவ அனுபாலேதப்³பா³னம்பி கம்மஜபா⁴வோவ ஸித்³தோ⁴தி கம்மஜக்³க³ஹணம் ந கதம். யதா²ஸகம் க²ணத்தயமத்தட்டா²யீனம்பி கம்மஜரூபானம் பவத்திஹேதுபா⁴வேனேவ தம் அனுபாலகம். தேனாஹ ‘‘தேஸம் பவத்தனரஸ’’ந்தி. பவத்தனஞ்சேத்த² வுத்தனயேன தேஸம் யாபனம் ட²பனம் டி²திஹேதுகதா. ந ஹி கம்மஜானம் கம்மமேவ டி²திஹேது ப⁴விதும் ஸக்கோதி ஆஹாரஜாதீ³னம் ஆஹாராதி³ விய. கிம் காரணம்? தங்க²ணாபா⁴வதோ. கம்மஞ்ஹி நிருத்³த⁴ம் ரூபஸ்ஸ பச்சயோ ஹோதி, ததோ தம்ஸமுட்டா²னரூபானி மதபிதிகா விய புத்தா சூளபிதுஆதி³னிஸ்ஸயேன அஞ்ஞனிஸ்ஸயேனேவ பவத்தந்தி, அஞ்ஞஞ்ச தேஸம் யாபனஸமத்த²ம் நத்தி² அஞ்ஞத்ர ஜீவிதிந்த்³ரியேனாதி ததே³வ தேஸம் பவத்தனரஸம். ஆஹாரஜாத³யோ பன த⁴ரமானகபிதிகா விய புத்தா அஞ்ஞனிரபேக்கா² ஸகஸகபச்சயவஸேனேவ பவத்தந்தி. ஆஹாராத³யோ ஹி அத்தனோ அத்தி²க்க²ணேயேவ ரூபானி ஸமுட்டா²பேத்வா தேஸம் டி²திபவத்தியாவ திட்ட²ந்தி, ததோ தம்ஸமுட்டா²னானி ஜீவிதிந்த்³ரியனிரபேக்கா²னி. ஸேஸானிபி தம்தம்பச்சயவஸேனேவ திட்ட²ந்தீதி ந அஞ்ஞம் ட²பனகாரணம் பச்சாஸீஸந்தி. கம்மஸமுட்டா²னம்பி சேதம் உப்பாத³தோ பட்டா²யேவ அனுபாலகம். யாபேதப்³பா³னி பவத்தேதப்³பா³னி ஸஹஜாதபூ⁴தானி பத³ட்டா²னமேதஸ்ஸாதி யாபேதப்³ப³பூ⁴தபத³ட்டா²னம்.

674. மனோவிஞ்ஞாணதா⁴தூதி ட²பேத்வா அரூபாவசரவிபாகமனோவிஞ்ஞாணதா⁴தும் அவஸேஸா மனோவிஞ்ஞாணதா⁴து. தேனாஹ ‘‘பஞ்சவோகாரே’’தி. பஞ்சவோகாரே மனோதா⁴து, மனோவிஞ்ஞாணதா⁴துயோ ச யம் ரூபம் நிஸ்ஸாய பவத்தந்தி, தம் ‘‘வத்தூ²’’தி பவுச்சதீதி ஸம்ப³ந்தோ⁴. பஞ்சவோகாரேதி ச விஸேஸனம் மனோவிஞ்ஞாணதா⁴துவஸேன கதம், மனோதா⁴து பன சதுவோகாரப⁴வே நத்தே²வ. பாளியம் அனாக³தஸ்ஸாபி ஹத³யவத்து²னோ ஆக³மதோ, யுத்திதோ ச அத்தி²பா⁴வோ விஞ்ஞாதப்³போ³. தத்த² ஆக³மோ தாவ –

‘‘யம் ரூபம் நிஸ்ஸாய மனோதா⁴து ச மனோவிஞ்ஞாணதா⁴து ச பவத்தந்தி, தம் ரூபம் மனோதா⁴துயா ச மனோவிஞ்ஞாணதா⁴துயா ச தம்ஸம்பயுத்தகானஞ்ச த⁴ம்மானம் நிஸ்ஸயபச்சயேன பச்சயோ’’தி (பட்டா². 1.1.8) –

ஏவமாதி³ பட்டா²னவசனம். யுத்தி பன ஏவம் வேதி³தப்³பா³ – நிப்ப²ன்னஉபாதா³யரூபனிஸ்ஸயம் தா⁴துத்³வயம் பஞ்சவோகாரப⁴வே ரூபபடிப³த்³த⁴வுத்தித்தா. யம் யஞ்ஹி ரூபபடிப³த்³த⁴வுத்தி, தம் தம் நிப்ப²ன்னஉபாதா³யரூபனிஸ்ஸயம் தி³ஸ்ஸதி யதா² சக்கு²விஞ்ஞாணதா⁴து. தத்த² ந தாவ ரூபாயதனாதீ³னம், ஓஜாய ச தன்னிஸ்ஸயதா யுஜ்ஜதி இந்த்³ரியபடிப³த்³த⁴தோ ப³ஹிபி தேஸம் பவத்தித³ஸ்ஸனதோ, நாபி இத்தி²ந்த்³ரியபுரிஸிந்த்³ரியானம் தது³ப⁴யவிரஹிதே அபா⁴வகஸந்தானேபி தா⁴துத்³வயத³ஸ்ஸனதோ. ஜீவிதிந்த்³ரியஸ்ஸாபி ஸஹஜபரிபாலனலக்க²ணகிச்சந்தரம் விஜ்ஜதீதி ந தன்னிஸ்ஸயதா யுஜ்ஜதி. தஞ்ஹி கிச்சந்தரே பஸுதம் ந இமாஸம் நிஸ்ஸயோ ப⁴விதும் ஸக்கோதி, தஸ்மா பாரிஸேஸதோ தேஸம் நிஸ்ஸயோ ஹத³யவத்து² நாம அத்தீ²தி விஞ்ஞாதப்³ப³ம். ஹோது தாவ தா⁴துத்³வயனிஸ்ஸயோ வத்து², உபாதா³யரூபஞ்ச, தம் பனேதம் கம்மஸமுட்டா²னம் படினியதகிச்சம் ஹத³யப்பதே³ஸே டி²தமேகந்தி த³ட்ட²ப்³ப³ம். கத²மேதம் விஞ்ஞாயதீதி? வுச்சதே – வத்து²ரூபபா⁴வதோ கம்மஸமுட்டா²னம் சக்கு² விய. யஞ்ஹி விஞ்ஞாணஸ்ஸ வத்து²பூ⁴தம் ரூபம், தம் கம்மஸமுட்டா²னம் யதா² சக்கு²பஸாதோ³, ததோ ஏவ படினியதகிச்சம் அட்டி²ம் கத்வா மனஸி கத்வா ஸப்³ப³ம் சேதஸா ஸமன்னாஹரித்வா கிஞ்சி சிந்தேந்தஸ்ஸ ஹத³யப்பதே³ஸஸ்ஸ கி²ஜ்ஜனதோ தத்தே²த³ம் திட்ட²தீதி விஞ்ஞாயதி. யதா²ஹு ஆசரியா –

‘‘கம்மஜம் வத்து²பா⁴வா தம், சக்கு²ம்வ நியதக்ரியம்;

சிந்தாய ச உரோகே²தா³, தத்ர திட்ட²ந்தி விஜானிய’’ந்தி.

யதி³ மனோதா⁴துமனோவிஞ்ஞாணதா⁴தூனம் நிஸ்ஸயபூ⁴தம் ஹத³யவத்து² நாம அத்தி², கஸ்மா பனேதம் ரூபகண்டே³ ந வுத்தம். ந ஹி லப்³ப⁴மானஸ்ஸ அவசனே காரணம் அத்தீ²தி? நோ நத்தி² காரணந்தரஸம்ப⁴வதோ. கிம் பன தம் காரணம்? தே³ஸனாபே⁴தோ³. யதா² ஹி சக்கு²விஞ்ஞாணாதீ³னி ஏகந்ததோ சக்கா²தி³னிஸ்ஸயானி, ந ஏவம் மனோவிஞ்ஞாணம் ஏகந்தேன ஹத³யவத்து²னிஸ்ஸிதம் பஞ்சவோகாரப⁴வேயேவ தன்னிஸ்ஸயத்தா, ஏகந்தேன நிஸ்ஸிதவஸேனேவ ச வத்து²தே³ஸனா பவத்தா. ‘‘அத்தி² ரூபம் சக்கு²விஞ்ஞாணஸ்ஸ வத்து², அத்தி² ரூபம் சக்கு²விஞ்ஞாணஸ்ஸ ந வத்தூ²’’திஆதி³னா (த⁴. ஸ. 584) சக்கு²விஞ்ஞாணாதீ³ஹி நிஸ்ஸிதேஹி விஸேஸிதத்தா. யம்பி ஏகந்தேன ஹத³யவத்து²னிஸ்ஸயம் தஸ்ஸ வஸேன ‘‘அத்தி² ரூபம் மனோவிஞ்ஞாணஸ்ஸ வத்தூ²’’திஆதி³னா து³காதீ³ஸு வுச்சமானேஸு ந தத³னுகு³ணா ஆரம்மணது³காத³யோ ஸம்ப⁴வந்தி. ந ஹி ‘‘அத்தி² ரூபம் மனோவிஞ்ஞாணஸ்ஸ ஆரம்மணம், அத்தி² ரூபம் ந மனோவிஞ்ஞாணஸ்ஸ ஆரம்மண’’ந்தி ஸக்கா வத்துந்தி வத்தா²ரம்மணது³கா பி⁴ன்னக³திகா ஸியும், ந ஏகரஸா தே³ஸனா ப⁴வேய்ய, ஏகரஸஞ்ச தே³ஸனம் தே³ஸேதும் தத்த² ப⁴க³வதோ அஜ்ஜா²ஸயோ, தஸ்மா தத்த² ஹத³யவத்து² ந வுத்தம், ந அலப்³ப⁴மானத்தா. ஏஸா ஹி ப⁴க³வதோ பகதி, யம் ஏகரஸேனேவ தே³ஸனம் தே³ஸேதும் லப்³ப⁴மானஸ்ஸாபி கஸ்ஸசி அக்³க³ஹணம். ததா² ஹி நிக்கே²பகண்டே³பி சித்துப்பாத³விபா⁴கே³ன அவுச்சமானத்தா அவிதக்காவிசாரபத³விஸஜ்ஜனே விதக்கோ விசாரோ சாதி வத்தும் ந ஸக்காதி அவிதக்கவிசாரமத்தபத³விஸஜ்ஜனே லப்³ப⁴மானோபி விதக்கோ ந உத்³த⁴டோ, அஞ்ஞதா² ‘‘விதக்கோ சா’’தி வத்தப்³ப³ம் ஸியாதி. நிஸ்ஸயபா⁴வதோ உபரி ஆரோபேத்வா வஹந்தம் விய பச்சுபட்டா²தீதி உப்³பா³ஹனபச்சுபட்டா²னம்.

675. சதூஸு ஆஹாரேஸு இத⁴ ரூபாதி⁴காரதோ கப³ளீகாரோ ஆஹாரோ க³ஹேதப்³போ³தி ஆஹ ‘‘ஆஹாரதாதி கப³ளீகாரோ ஆஹாரோ’’தி. தத்த² கப³ளம் கரீயதீதி கப³ளீகாரோ. ஆஹரீயதீதி ஆஹாரோ, கப³ளம் கத்வா அஜ்ஜோ²ஹரீயதீதி அத்தோ². இத³ஞ்ச ஸவத்து²கம் கத்வா ஆஹாரம் த³ஸ்ஸேதும் வுத்தம். கப³ளீகாராஹாரஸ்ஸ பன ஓஜா இத⁴ ஆஹாரோ நாம. தேனாஹ ‘‘யாய ஓஜாயா’’திஆதி³. ஸோ ச ரூபாஹரணஸபா⁴வோ உபத்த²ம்ப⁴னப³லகரோ அங்க³மங்கா³னுஸாரீரஸாஹரணபூ⁴தோ பூ⁴தனிஸ்ஸிதோ ஏகோ விஸேஸோ. பா³ஹிராஹாரபச்சயம் படிலபி⁴த்வா ஏவ அஜ்ஜ²த்திகாஹாரோ ரூபம் உப்பாதே³தீதி அயம் அஜ்ஜ²த்திகாஹாரஸ்ஸ உபனிஸ்ஸயபா⁴வேனாபி ரூபம் ஆஹரதீதி ஆஹ ‘‘ஓஜட்ட²மகம் ரூபம் ஆஹரதீ’’தி. ஓஜா அட்ட²மீ யஸ்ஸ தம் ஓஜட்ட²மகம். யாய ஓஜாயாதி அத்தனோ உத³யானந்தரம் ரூபஜனனதோ ஓஜாஸங்கா²தாய ஓத³னகும்மாஸாதி³வத்து²க³தாய யாய ப²ரணஓஜாய. யத்த² யத்தா²தி யம்ஹி யம்ஹி ஜனபதே³, நக³ராதீ³ஸு ச. ‘‘கப³ளீகாரோ ஆஹாரோ’’தி பவுச்சதி தப்³ப³த்து²கத்தாதி அதி⁴ப்பாயோ.

676. கிம் பன வத்து²னோ கிச்சம், கிம் ஓஜாயாதி சே? பரிஸ்ஸயஹரணம் வத்து²ஸ்ஸ கிச்சம், பாலனம் ஓஜாயாதி த³ஸ்ஸேந்தோ ஆஹ ‘‘அன்னபானாதி³க’’ந்திஆதி³. அக்³கி³ம் ஹரதி கம்மஜந்தி கம்மஜதேஜம் க³ண்ஹாதி. அந்தோகுச்சி²யஞ்ஹி ஓத³னாதி³வத்து²ஸ்மிம் அஸதி கம்மஜதேஜோ உட்ட²ஹித்வா உத³ரபடலஸங்கா²தமுபாதி³ன்னரூபம் க³ண்ஹாதி, ‘‘சா²தோம்ஹி, ஆஹாரம் மே தே³தா²’’தி வதா³பேதி, பு⁴த்தகாலே உத³ரபடலம் முஞ்சித்வா அனுபாதி³ன்னகவத்து²ம் க³ண்ஹாதி, அத² ஸத்தோ ஏகக்³கோ³ ஹோதி. யதா² ஹி சா²யாரக்க²ஸோ சா²யாபவிட்ட²ம் தி³ஸ்வா க³ஹேத்வா தே³வஸங்க²லிகாய ப³ந்தி⁴த்வா அத்தனோ ப⁴வனே மோத³ந்தோ சா²தகாலே ஆக³ந்த்வா ஸீஸே த³ம்ஸதி, ஸோ த³ட்ட²த்தா விரவதி, தம் விரவம் ஸுத்வா ஸசே அஞ்ஞேபி மனுஸ்ஸா ஆக³ச்ச²ந்தி, ஸோ ஆக³தாக³தே க³ஹேத்வா கா²தி³த்வா ஸகப⁴வனே மோத³தி, ஏவம் யம் யம் அன்னபானாதி³கம் வத்து², தம் தம் கம்மஜதேஜோ க³ஹேத்வா ஜீராபேத்வா புன உத³ரபடலம் க³ண்ஹாதி, தஸ்மா அன்னபானாதி³கம் வத்து² அத்தனோ உத³ரபடலம் பவிட்ட²காலே உபாதி³ன்னகாயம் க³ஹேத்வா டி²தம் ததோ மோசேத்வா அத்தானம் க³ண்ஹாபனவஸேன தம் அத்தனோ ஸந்திகம் ஹரதி. கேவலந்தி ஓஜாவியுத்தம் வத்து² ஜீவிதம் கம்மஜபூ⁴தம் தம் பாலேதும் ந ஸக்கோதி.

677. ஓஜா…பே… பாசகந்தி ஓஜா ஜீவிதம் பாலேதும் ஸக்கோதி, கம்மஜம் தேஜம் ஹரிதும் ந ஸக்கோதி ஆமாஸயஸ்ஸ அபுண்ணதோதி அதி⁴ப்பாயோ. உபத்த²ம்ப⁴னபச்சுபட்டா²னோதி ஓஜட்ட²மகரூபஹரணவஸேனேவ இமஸ்ஸ காயஸ்ஸ உபத்த²ம்ப⁴னவஸேன பச்சுபட்டா²தி. காயேனாதி ரூபகாயேன. அத்தனோ பா⁴வந்தி அத்தனோ அதி⁴ப்பாயம். விஞ்ஞாபேந்தானந்தி பரேஸம் ஸஞ்ஞாபேந்தானம். காயக்³க³ஹணானுஸாரேனாதி ப²ந்த³மானகாயக³தவண்ணஸ்ஸ க³ஹணபூ⁴தானம் சக்கு²த்³வாரிகஜவனானந்தரப்பவத்தானம் நிச்ச²யக்³க³ஹணஸங்கா²தானம் மனோத்³வாரிகஜவனானம் அனுஸ்ஸரணேன தேஸம் அனந்தரந்தி அத்தோ². பஞ்சத்³வாரே ஹி ரூபாதி³ஆரம்மணே ஆபாத²க³தே யதா²பச்சயம் குஸலாகுஸலஜவனே உப்பஜ்ஜித்வா ப⁴வங்க³ம் ஓதிண்ணே மனோத்³வாரிகஜவனம் ததே³வாரம்மணம் கத்வா ப⁴வங்க³ம் ஓதரதி, புன தஸ்மிம்யேவ த்³வாரே விஸயம் வவத்தா²பேத்வா ஜவனம் ப⁴வங்க³ம் ஓதரதி, தஸ்மா சக்கு²த்³வாரிகஜவனானந்தரப்பவத்தானம் த்³வின்னம் ஜவனவாரானமனந்தரம் ததியவாரே பவத்தாய மனோத்³வாரஜவனவீதி²யா ஏவ க³ஹிதாய ஏதாய கரணபூ⁴தாய சதுத்த²வாரே மனோத்³வாரே ஜவனேனேவ பா⁴வோ விஞ்ஞாயதி. ஏதேன விஞ்ஞத்தி-ஸத்³த³ஸ்ஸ கரணஸாத⁴னதா வுத்தா. ஸயம் வாதிஆதி³னா பன கம்மஸாத⁴னத்தமாஹ.

ஏவம் விஞ்ஞத்தி-ஸத்³த³ஸ்ஸ காரகத்³வயே ஸம்ப⁴வம் த³ஸ்ஸேத்வா இதா³னி காய-ஸத்³தே³ன ஸஹ கம்மதா⁴ரயஸமாஸம் த³ஸ்ஸேதும், ‘‘காயோ’’தி வோஹாரஸ்ஸ விஞ்ஞத்தியம்பி ச பவத்திம் த³ஸ்ஸேந்தோ ‘‘காயேன ஸம்வரோ’’திஆதி³ஸுத்தமாஹ. காயவிப்ப²ந்த³னேன அதி⁴ப்பாயவிஞ்ஞாபனஹேதுத்தாதி விப்ப²ந்த³மானகாயேன கரணபூ⁴தேன அதி⁴ப்பாயவிஞ்ஞாபனஹேதுபா⁴வதோ காயேன விஞ்ஞத்தீதிபி காயவிஞ்ஞத்தீதி ஸம்ப³ந்தோ⁴. அயம் பனேத்த² அத்தோ² – விஞ்ஞத்தியா காயவிப்ப²ந்த³னஸ்ஸ ஹேதுபா⁴வதோ தம்ஹேதுகம் காயவிப்ப²ந்த³னஸங்கா²தம் காயம் க³ஹேத்வா அதி⁴ப்பாயஜானனதோ விஞ்ஞத்தி அதி⁴ப்பாயவிஞ்ஞாபனஸ்ஸ காரணபா⁴வேன க³ய்ஹதீதி காயேன அதி⁴ப்பாயம் விஞ்ஞாபேதீதி. ததா² காயவிப்ப²ந்த³னம் க³ஹேத்வா தஸ்ஸ காரணமேத்த² அத்தீ²தி விஞ்ஞத்தியா க³ய்ஹமானத்தா ஸயஞ்ச காயேன விஞ்ஞாயதி, தஸ்மா காயேன விஞ்ஞத்தீதிபி காயவிஞ்ஞத்தீதி.

678. சித்தஜானிலதா⁴துயாதி அபி⁴க்கமாதி³பவத்தகசித்தஸமுட்டா²னவாயோதா⁴துயா. ஆகாரவிகாரதாதி ஆகாரபூ⁴தோ விகாரோ. கஸ்ஸ பன ஸா ஆகாரவிகாரதாதி? ஸாமத்தி²யதோ வாயோதா⁴துஅதி⁴கானம் சித்தஜமஹாபூ⁴தானம். கிம் தம் ஸாமத்தி²யம்? சலனஹேதுதா, சித்தஜதா, உபாதா³யரூபதா ச. அத² வா சித்தஜானிலதா⁴துயா ஏகா ஆகாரவிகாரதாதி ஸம்ப³ந்தோ⁴. ந கேவலஞ்ஹி ஸாமிவசனம் சலனஸம்ப³ந்தா⁴பேக்கா²ய ஏவ, அத² கோ² ஆகாரவிகாரஸம்ப³ந்தா⁴பேக்கா²யபீதி.

யதி³ ஏவம், கத²ம் விஞ்ஞத்தியா உபாதா³யரூபத்தம். ‘‘சித்தஜானிலதா⁴துயா’’தி ஹி வசனேன வாயோதா⁴துயாவ ஆகாரவிகாரதா விஞ்ஞத்தி ஆபஜ்ஜதி, ந ச ஏகபூ⁴தனிஸ்ஸிதம் உபாதா³யரூபம் நாம அத்தி² ‘‘சதுன்னம் மஹாபூ⁴தானம் உபாதா³யரூப’’ந்தி (த⁴. ஸ. 584) வசனதோதி? நாயம் தோ³ஸோ, சதுன்னம் விகாரதா சதூஸு ஏகஸ்ஸபி ஹோதி சதுஸாதா⁴ரணத⁴னம் விய. அனிலதா⁴துஅதி⁴ககலாபோ வா இத⁴ ‘‘அனிலதா⁴தூ’’தி வுச்சதி, தத³தி⁴கே தம்வோஹாரதோ யதா² ஸம்பா⁴ரதா⁴துயா அதி⁴கபா⁴வேன பத²வீவோஹாரோ, தஸ்மா வாயோதா⁴துஅதி⁴கானம் சித்தஜமஹாபூ⁴தானம் ஏகா ஆகாரவிகாரதா காயவிஞ்ஞத்தீதி ந கோசி விரோதோ⁴. அதி⁴கதா சஸ்ஸா ஸாமத்தி²யதோ த³ட்ட²ப்³பா³, ந பமாணதோ. இதரதா² ஹி தேஸம் அவினிப்³போ⁴க³வுத்திதா ந யுஜ்ஜேய்ய. அதி⁴கதா ஹி அத்தனோ அதி⁴கவஸேன இதரேஹி வினிப்³போ⁴க³ப்பவத்திதோ ஹோதி. ஸாமத்தி²யாதி⁴கஞ்ச காரணானுகாரிதாய. காரணஞ்ஹி அபி⁴க்கமாதி³பவத்தகம் சித்தம், தம் சலனாதி⁴ப்பாயஸபா⁴வம் ததோ ஸமுட்டி²தே கலாபே அனுகரோந்தே வாயோதா⁴துயா ஏவ அதி⁴கத்தம் யுத்தந்தி. கேசி பன ‘‘வாயோதா⁴துயா ஏவ ஆகாரவிகாரதா’’தி க³ண்ஹந்தி, தேஸம் மதேன உபாதா³ரூபத்தம் து³ரூபபன்னம். ந ஹி ஏகஸ்ஸ விகாரோ சதுன்னம் உபாதா³ரூபந்தி ஸக்கா வத்தும்.

கீதி³ஸீ பனாயம் விகாரதாதி ஆஹ ‘‘ஸஹஜாதஸ்ஸ ரூபஸ்ஸ சலனே ஹேதூ’’தி. தத்த² ஸஹஜாதஸ்ஸாதி அத்தனா ஸஹஜாதஸ்ஸ. யஸ்மா உதுசித்தாஹாரஜானம் சலனம் சித்தஜரூபஸம்ப³ந்தே⁴னேவ ஹோதி, நதீ³ஸோதசலனேன தத்த² பக்கி²த்தஸுக்க²கோ³மயபிண்டா³தீ³னம் விய. விஞ்ஞத்திவஸேன பன சித்தஜானமேவ சலனம், தஸ்மா வுத்தம் ‘‘ஸஹஜாதஸ்ஸா’’தி. ரூபஸ்ஸாதி ரூபகாயஸ்ஸ. சலனேதி ஸந்த²ம்ப⁴னஸந்தா⁴ரணசலனஸங்கா²தே சலிதபா⁴வே. ஸந்த²ம்ப⁴னாதி³கம்பி ஹி சலனாபி⁴முக²தாய சலனந்தி யுஜ்ஜதி. ஹேதூதி ஹேதுபூ⁴தா ஸஹகாரீகாரணபூ⁴தா. ஏத்தாவதா ச கிம் வுத்தம் ஹோதி? காயவிஞ்ஞத்தி நாம நேவ ப²ந்த³மானரூபகாயோ, ந ச ப²ந்த³மானா வாயோதா⁴து, அத² கோ² மஹந்தம் பாஸாணம் உக்கி²பந்தஸ்ஸ ஸப்³ப³தா²மேன க³ஹணகாலே ஸரீரஸ்ஸ உஸ்ஸாஹனவிகாரோ விய ரூபகாயஸ்ஸ பரிப்ப²ந்த³னபச்சயபா⁴வேன லப்³ப⁴மானோ ஏகோ ஆகாரவிகாரோ காயவிஞ்ஞத்தி நாமாதி வுத்தம் ஹோதி.

நனு ச ப²ந்த³மானவண்ணாதி³வினிமுத்தோ கோசி விகாரோ அத்தி², தஸ்ஸ வண்ணக்³க³ஹணானந்தரம் க³ஹணம் ஹோதீதி கத²மேதம் விஞ்ஞாயதீதி? அதி⁴ப்பாயக்³க³ஹணதோ. ந ஹி விஞ்ஞத்திவிகாரரஹிதேஸு ருக்க²சலனாதீ³ஸு அதி⁴ப்பாயக்³க³ஹணம் தி³ட்ட²ம், ஹத்த²சலனாதீ³ஸு பன தி³ட்ட²ம், தஸ்மா ப²ந்த³மானவண்ணாதி³வினிமுத்தோ கோசி விகாரோ அத்தி² அதி⁴ப்பாயஸ்ஸ விஞ்ஞாபகோதி ஸம்படிச்சி²தப்³ப³மேதம் ஏகந்தேன. ஞாபகோ ச ஹேது ஸயம் க³ஹிதோயேவ அத்தனோ ஞாபேதப்³ப³மத்த²ம் ஞாபேதி, ந விஜ்ஜமானமத்தேனாதி. ஞாபேதப்³ப³வண்ணக்³க³ஹணானந்தரம் விகாரக்³க³ஹணம்பி அனுமானதோ ஸித்³த⁴ம். ததா² ஹி வத³ந்தி –

‘‘விஸயத்தமனாபன்னா,

ஸத்³தா³ நேவத்த²போ³த⁴கா;

ந ஸத்தாமத்ததோ அத்தே²,

தே அஞ்ஞாதா பகாஸகா’’தி.

யதி³ விகாரக்³க³ஹணமேவ காரணமதி⁴ப்பாயக்³க³ஹணஸ்ஸ, கஸ்மா அக்³க³ஹிதஸங்கேதானம் அதி⁴ப்பாயக்³க³ஹணம் ந ஹோதீதி? ந கேவலம் விகாரக்³க³ஹணமேவ அதி⁴ப்பாயஸ்ஸ க³ஹணஸ்ஸ காரணம், அத² கோ² புரிமஸித்³த⁴ஸம்ப³ந்த⁴க்³க³ஹணஞ்ச இமஸ்ஸ உபனிஸ்ஸயோதி த³ட்ட²ப்³ப³ம். யதா² ஹி அரஞ்ஞே உத³கதித்தே² உஸ்ஸாபேத்வா ட²பிதகோ³ஸீஸாதீ³னி உத³கனிமித்தானி தி³ஸ்வா தத³னந்தரப்பவத்தாய அவிஞ்ஞாயமானந்தராய மனோத்³வாரஜவனவீதி²யா கோ³ஸீஸாதீ³னம் உத³கஸஹசாரீபகாரஸஞ்ஞாணாகாரம் க³ஹேத்வா ‘‘உத³கமேத்த² அத்தீ²’’தி ஜானனம், ஏவம் ப²ந்த³மானவண்ணம் க³ஹேத்வா தத³னந்தப்பவத்தாய அவிஞ்ஞாயமானந்தராய மனோத்³வாரவீதி²யா புரிமக்³க³ஹிதஸம்ப³ந்தூ⁴பனிஸ்ஸயஸஹிதாய ஸாதி⁴ப்பாயவிகாரக்³க³ஹணம் ஹோதீதி.

681-2. ஸஹஜரூபசலனஸ்ஸ விஞ்ஞத்திவிகாரஸஹிதாய வாயோதா⁴துயா ஹேதுபா⁴வோ யுத்தோ, கிம் ஸப்³பா³ ஏவ வாயோதா⁴து ஸஹஜரூபம் சாலேதீதி இமம் சோத³னம் ஸோதே⁴தும் ‘‘லபி⁴த்வா பனுபத்த²ம்ப⁴’’ந்திஆதி³ வுத்தம். உபத்த²ம்பே⁴தீதி உபத்த²ம்ப⁴ம், உபத்த²ம்ப⁴கபச்சயந்தி அத்தோ². ஏகாவஜ்ஜனவீதி²யந்தி மனோத்³வாரிகஜவனவீதி²ம் ஸந்தா⁴யாஹ பஞ்சத்³வாரிகவீதி²யா விஞ்ஞத்திஸமுட்டா²பகத்தாபா⁴வதோ. ஹேட்டா²ஹி ச²ஹி ச சித்தேஹீதி ஸத்தஸு ஜவனேஸு ஹேட்டி²மேஹி ச²ஹி ஜவனேஹி ஸமுட்டி²தம் வாயோதா⁴தும் உபத்த²ம்ப⁴ம் லபி⁴த்வாதி ஸம்ப³ந்தோ⁴. கேசி பன போத்த²கேஸு ‘‘வாயோதா⁴துஸமுட்டி²த’’ந்தி பாட²ம் தி³ஸ்வா உபத்த²ம்ப⁴ந்தி பா⁴வஸாத⁴னவஸேன க³ஹேத்வா ஹேட்டா² ச²ஹி சித்தேஹி உப்பன்னவாயோதா⁴துஸமுட்டி²தம் உபத்த²ம்ப⁴ம் லபி⁴த்வாதி யோஜேந்தி. விஞ்ஞத்திஸஹிதத்தனாதி ஸயம் விஞ்ஞத்திஸஹிதா அத்தனா ஸஹஜாதம் சித்தஜரூபம் தே³ஸந்தருப்பத்திஹேதுபா⁴வேன சலயதி, ந இதராதி அத்தோ².

அயம் பனேத்தா²தி⁴ப்பாயோ – யதா² நாம ஸத்தஹி யுகே³ஹி ஆகட்³டி⁴தப்³ப³ஸகடே ஸத்தமயுக³யுத்தா ஏவ கோ³ணா ஹேட்டா² ச²ஸு யுகே³ஸு யுத்தகோ³ணேஹி லத்³து⁴பத்த²ம்பா⁴ ஸகடம் சாலேந்தி, பட²மயுகா³தி³யுத்தா பன ஸந்த²ம்ப⁴னஸந்தா⁴ரணமத்தமேவ ஸாதே⁴ந்தா தேஸம் உபத்த²ம்ப⁴கா ஹோந்தி, ஏவமேவம் ஸத்தமஜவனஸமுட்டி²தா வாயோதா⁴து ஹேட்டா² ச²ஹி ஜவனேஹி ஸமுட்டி²தவாயோதா⁴துதோ லத்³து⁴பத்த²ம்பா⁴ சித்தஜரூபம் சாலேதி. பட²மஜவனாதி³ஸமுட்டி²தா பன ஸந்த²ம்ப⁴னஸந்தா⁴ரணமத்தம் ஸாதே⁴ந்தா தஸ்ஸ உபத்த²ம்ப⁴கா ஹோந்தி, தே³ஸந்தருப்பத்தியேவ சேத்த² சலனம் உப்பன்னதே³ஸதோ கேஸக்³க³மத்தம்பி த⁴ம்மானம் சலனாபா⁴வதோ, இதரதா² த⁴ம்மானம் அப்³யாபாரதா, க²ணிகதா ச ந ஸியா. கத²ம் பனஸ்ஸ ஸஹஜரூபானம் தே³ஸந்தருப்பத்தியா ஹேதுபா⁴வோதி? யதா² அத்தனா ஸஹஜரூபானி ஹேட்டி²மஜவனாதி³ஸமுட்டி²தரூபேஹி பதிட்டி²தட்டா²னதோ அஞ்ஞத்த² உப்பஜ்ஜந்தி, ஏவம் தேஹி ஸஹ தத்த² உப்பத்தியேவஸ்ஸ தே³ஸந்தருப்பத்திஹேதுபா⁴வோதி த³ட்ட²ப்³ப³ம்.

அத² ப²ந்த³மானவண்ணக்³க³ஹணானந்தரம் விஞ்ஞத்திக்³க³ஹணஸ்ஸ வுத்தத்தா விஞ்ஞத்திஸஹிதாதி ஸத்தமஜவனஸமுட்டி²தாய ஏவ ச விஸேஸிதத்தா சலனாகாரஸஹிதாயேவ வாயோதா⁴து விகாரஸஹிதாதி? நயித³மேவம் தே³ஸந்தருப்பத்திஹேதுபா⁴வேன சலயிதுமஸக்கோந்தியோபி ஸந்த²ம்ப⁴னஸந்தா⁴ரணமத்தகரணேன பட²மஜவனாதி³ஸமுட்டா²னவாயோதா⁴துயோபி விஞ்ஞத்திவிகாரஸஹிதா ஏவ. யேன தி³ஸாபா⁴கே³ன க³ந்த்வா அபி⁴க்கமாதீ³னி பவத்தேதுகாமோ தத³பி⁴முக²பா⁴வவிகாரஸம்ப⁴வதோ. அதி⁴ப்பாயஸஹபா⁴வினஞ்ஹி விகாரம் விஞ்ஞத்திமாசிக்க²ந்தி. தேனேவ ஹி ப⁴க³வதா ‘‘கதமம் தம் ரூபம் காயவிஞ்ஞத்தி? யா குஸலசித்தஸ்ஸ வா…பே… அப்³யாகதசித்தஸ்ஸ வா அபி⁴க்கமந்தஸ்ஸ வா…பே… பஸாரேந்தஸ்ஸ வா காயஸ்ஸ த²ம்ப⁴னா ஸந்த²ம்ப⁴னா ஸந்த²ம்பி⁴தத்தம் விஞ்ஞத்தி விஞ்ஞாபனா விஞ்ஞாபிதத்தம். இத³ம் தம் ரூபம் காயவிஞ்ஞத்தீ’’தி (த⁴. ஸ. 720) ஸந்த²ம்ப⁴னஸந்தா⁴ரணானம்பி பச்சயபா⁴வாகாரோ காயவிஞ்ஞத்தீதி வுத்தோ. ஏவஞ்ச கத்வா மனோத்³வாராவஜ்ஜனஸ்ஸாபி விஞ்ஞத்திஸமுட்டா²பகதாவசனம் ஸுட்டு² உபபன்னம் ஹோதி.

683-4. சித்தஜாதாய பத²வீதா⁴துயா உபாதி³ன்னகக⁴ட்டனே பச்சயோ யோ ஆகாரவிகாரோ, அயம் வசீவிஞ்ஞத்தி விஞ்ஞேய்யாதி ஸம்ப³ந்தோ⁴. தத்த² சித்தஜாதாயாதி வசீபே⁴த³ப்பவத்தகசித்தஸமுட்டா²னாய. உபாதி³ன்னகக⁴ட்டனேதி உபாதி³ன்னககலாபஸங்கா²தஸ்ஸ அக்க²ருப்பத்திட்டா²னஸ்ஸ க⁴ட்டனஸஞ்ஞிதே கிச்சே க⁴ட்டனஸ்ஸாதி அத்தோ². பச்சயோதி தஸ்ஸ ஸஹகாரீகாரணபூ⁴தோ. ஏகோ ஆகாரவிகாரோதி க⁴ட்டியமானஉபாதி³ன்னரூபதோ, க⁴ட்டந்தி யா பத²வீதா⁴துதோ ச வினிவட்டோ பத²வீதா⁴துயா உபாதி³ன்னக⁴ட்டனபச்சயஸபா⁴வரூபோ ஏகோ ஆகாரவிகாரவிஸேஸோதி அத்தோ². பத²விதா⁴துயாதி ஸாமிவசனம் ‘‘உப⁴யஸம்ப³ந்தா⁴பேக்க²’’ந்திஆதி³ காயவிஞ்ஞத்தியம் வுத்தனயேன வேதி³தப்³ப³ம். அயம் பன விஸேஸோ – யதா² தத்த² ப²ந்த³மானவண்ணக்³க³ஹணானந்தரம் க³ய்ஹதி, ஏவமித⁴ ஸுய்யமானஸத்³த³ஸவனானந்தரந்தி த³ட்ட²ப்³ப³ம். இத³ஞ்ச ஸந்த²ம்ப⁴னாதீ³னம் அபா⁴வேன க⁴ட்டனேன ஸத்³தி⁴ம்யேவ ஸத்³த³ஸ்ஸ உப்பஜ்ஜனதோ ‘‘லபி⁴த்வா பனுபத்த²ம்ப⁴’’ந்திஆதி³னயோ ந லப்³ப⁴தி. க⁴ட்டனஞ்ஹி பட²மஜவனாதீ³ஸுபி லப்³ப⁴தேவ. தேனாஹ ‘‘ஸத்³த³வஸா’’தி. அத² க⁴ட்டனசலனானம் கோ விஸேஸோதி? க⁴ட்டனம் பச்சயவிஸேஸேன பூ⁴தகலாபானம் அஞ்ஞமஞ்ஞம் ஆஸன்னதருப்பாத³தா, சலனம் ஏகஸ்ஸாபி தே³ஸந்தருப்பாத³னபரம்பரதாதி அயமேதேஸம் விஸேஸோ. கோ³ஸீஸாதி³உபமாபேத்த² யதா²ஸம்ப⁴வம் யோஜேதப்³பா³. ஸாவாதி ஸா ஏவ ஸஹஸத்³தா³ விஞ்ஞத்தி. ஸக்யகுலிந்து³னாதி ஸுபரிஸுத்³த⁴க³க³னதலஸ்ஸ ஸக்கராஜகுலஸ்ஸ அவபா⁴ஸகட்டே²ன தஸ்ஸ நிஸாகரபூ⁴தேன. அத² வா இந்த³தி பரமிஸ்ஸரியம் கரோதீதி இந்து³. இந்து³-ஸத்³த³ஸ்ஸ உத்தமவாசகத்தா ஸக்ககுலுத்தமேனாதி அத்தோ².

685. அத² விஞ்ஞத்தி தாவ ஸஹஸத்³தா³வ, ஸத்³தோ³ பன சித்தஜோ அவிஞ்ஞத்திகோ அத்தீ²தி சே? நத்தீ²தி த³ஸ்ஸேந்தோ ஆஹ ‘‘ஸத்³தோ³ ந சித்தஜோ’’திஆதி³. விஞ்ஞத்திக⁴ட்டனந்தி விஞ்ஞத்திபச்சயம் பத²வீதா⁴துயா க⁴ட்டனம். தா⁴துஸங்க⁴ட்டனேனேவாதிஆதி³னா வுத்தமேவத்த²ம் ஸமத்தே²தி. யஸ்மா தா⁴துஸங்க⁴ட்டனேனேவ ஸத்³தோ³ ஜாயதி, ந தேன வினா, தஸ்மாதி அத்தோ². அனேன ச யே வத³ந்தி ‘‘விதக்கவிப்பா²ரஸத்³தோ³ ந ஸோதவிஞ்ஞேய்யோதி மஹாஅட்ட²கதா²யம் வுத்தத்தா சித்தஸமுட்டா²னோ விதக்கவிப்பா²ரஸத்³தோ³ விஞ்ஞத்தியா வினாபி உப்பஜ்ஜதி. ‘யா தாய வாசாய விஞ்ஞத்தி விஞ்ஞாபனா’தி (த⁴. ஸ. 636) ஹி வசனதோ அஸோதவிஞ்ஞேய்யேன ஸத்³தே³ன ஸஹ விஞ்ஞத்தி ந உப்பஜ்ஜதி, ததோவ சித்தஜோபி ஸத்³த³னவகோ அத்தீ²’’தி, தேஸம் வாத³ம் படிக்கி²பதி. மஹாஅட்ட²கதா²வாதோ³பி ஹி ஸத்³தோ³வ ஹோதி, ந ஸோதவிஞ்ஞேய்யோதி விருத்³த⁴மேதந்தி மஞ்ஞமானேஹி ஸங்க³ஹகாரேஹி படிக்கி²த்தோவ. ஆனந்தா³சரியோ பன மஹாஅட்ட²கதா²வாத³ம் அப்படிக்கி²பித்வாவ தத்த² அதி⁴ப்பாயம் வண்ணேதி. கத²ம்? ‘‘ஜிவ்ஹாதாலுசலனாதி³கரவிதக்கஸமுட்டி²தம் விஞ்ஞத்திஸஹஜமேவ ஸுகு²மஸத்³த³ம் தி³ப்³ப³ஸோதேன ஸுத்வா ஆதி³ஸதீ’’தி ஸுத்தே, பட்டா²னே ச ஓளாரிகம் ஸத்³த³ம் ஸந்தா⁴ய ஸோதவிஞ்ஞாணஸ்ஸ ஆரம்மணபச்சயபா⁴வோ வுத்தோதி இமினா அதி⁴ப்பாயேன விதக்கவிப்பா²ரஸத்³த³ஸ்ஸ அஸோதவிஞ்ஞேய்யதா வுத்தாதி.

686-7. விஞ்ஞாபனதோதி வசீகோ⁴ஸேன அதி⁴ப்பாயவிஞ்ஞாபனஹேதுத்தா. ஸயம் விஞ்ஞேய்யதோதி க³ஹணானுஸாரேன வசீகோ⁴ஸேன வா ஹேதுனா ஸயம் விஞ்ஞேய்யத்தா. தஸ்ஸாதி விஞ்ஞத்திஸத்³த³ஸ்ஸ. ஸம்ப⁴வோ காரகத்³வயேதி விஞ்ஞாபயதீதி விஞ்ஞத்தி, விஞ்ஞாயதீதி விஞ்ஞத்தீதி ஏவம் ஹேதும்ஹி, கம்மனி வா தஸ்ஸ ஸம்ப⁴வோ நிப்³ப³த்தி ஹோதீதி அத்தோ². கிம் பனேதம் விஞ்ஞத்தித்³வயம் சித்தஸமுட்டா²னம், உதா³ஹு கம்மாதி³ஸமுட்டா²னந்தி ஆஹ ‘‘ந விஞ்ஞத்தித்³வய’’ந்திஆதி³. அட்ட² ரூபானி வியாதி ஸகஸககலாபக³தஅட்ட²ரூபானி விய, விஞ்ஞத்தித்³வயஸ்ஸ ஏகதோ வுச்சமானத்தா காயவிஞ்ஞத்திஸஹஜகலாபே ஸத்³தோ³ ந லப்³ப⁴தீதி வசீவிஞ்ஞத்திகலாபே லப்³ப⁴மானம்பி தம் ஹித்வா ‘‘அட்ட²’’இச்சேவ வுத்தம்.

யதா²வுத்தவிகாரக்³க³ஹணமுகே²ன ‘‘அயம் இத³ம் நாம காதுகாமோ’’தி தம்ஸமங்கி³னோ அதி⁴ப்பாயோ விஞ்ஞாயதீதி ஆஹ ‘‘அதி⁴ப்பாயப்பகாஸனரஸா’’தி. காயவிப்ப²ந்த³னஹேதுபூ⁴தாய வாயோதா⁴துயா விகாரத்தா தஸ்ஸா காயவிப்ப²ந்த³னஸ்ஸ ஹேதுபா⁴வாகாரேன பச்சுபட்டா²னந்தி வுத்தம் ‘‘காய…பே… பச்சுபட்டா²னா’’தி. வாயோதா⁴துயா கிச்சாதி⁴கதாய ஆஹ ‘‘சித்தஸமுட்டா²னவாயோதா⁴துபத³ட்டா²னா’’தி. வசீகோ⁴ஸஸ்ஸ ஹேதுபா⁴வபச்சுபட்டா²னாதி வுத்தனயேனேவ வசீகோ⁴ஸஸங்கா²தஸ்ஸ சித்தஜஸத்³த³ஸ்ஸ ஹேதுபா⁴வபச்சுபட்டா²னா.

கேசி பனேத்த² ‘‘க⁴ட்டனே பச்சயோதி வுத்தத்தா க⁴ட்டனானந்தரம் ஸத்³த³ஸ்ஸ உப்பத்தி ஹோதீதி க³ஹேத்வா சித்தஸமுட்டா²னபத²வீதா⁴து உபாதி³ன்னக⁴ட்டனமத்தம் கரோதி, க⁴ட்டிதக்க²ணே உதுஸமுட்டா²னோவ ஸத்³தோ³ உப்பஜ்ஜதி, ஸோ பன சித்தபச்சயத்தா பரியாயேன சித்தஸமுட்டா²னோதி வுச்சதீ’’தி வத³ந்தி. தேஸம் மதேன சித்தஜஸத்³தோ³யேவ ந லப்³ப⁴தி, தஸ்மா ஏவம் அக்³க³ஹேத்வா உத³கதாபனகாலே அந்தோஉத³கேயேவ உப்பஜ்ஜனகஸத்³தோ³ விய உபாதி³ன்னே க⁴ட்டேத்வா உப்பஜ்ஜமானசித்தஸமுட்டா²னபத²வீதா⁴துயா உப்பத்திஸமகாலமேவ தஸ்மிம் கலாபே நவமம் ஹுத்வா அந்தோயேவ பூ⁴திகஸத்³தோ³ உப்பஜ்ஜதீதி க³ஹேதப்³ப³ம், தஸ்மா சித்தஸமுட்டா²னஸத்³தோ³பி வசீவிஞ்ஞத்திவஸேனேவ உப்பஜ்ஜதி, அச்ச²ராபஹரணாதி³ஸத்³தோ³ பன வசீவிஞ்ஞத்தியா அபா⁴வதோ சித்தபச்சயஉதுஸமுட்டா²னோயேவாதி.

688. விக்³க³ஹாபா⁴வதோ ந கஸ்ஸதி, கஸிதும் சி²ந்தி³தும் ந ஸக்கோதீதி அகாஸோ, ஸோயேவ ஆகாஸோதி ஆஹ ‘‘ந கஸ்ஸதீதி ஆகாஸோ’’தி, கோ பனேஸோதி ஆஹ ‘‘ரூபானம் விவரோ’’தி, கண்ணச்சி²த்³தா³தி³ரூபானம் அந்தரந்தி அத்தோ². அனேன அஜடாகாஸமாஹ. யோ…பே… பரிச்சே²தோ³தி பன இமினா இதா⁴தி⁴ப்பேதமாகாஸம், ஸோ பன ருள்ஹீவஸேன ஆகாஸோதி பவுச்சதி.

ரூபானி பரிச்சி²ந்த³தி, ஸயம் வா தேஹி பரிச்சி²ஜ்ஜதி, தேஸம் வா பரிச்சே²த³மத்தந்தி ரூபபரிச்சே²தோ³, தம் லக்க²ணமேதஸ்ஸாதி ரூபபரிச்சே²த³லக்க²ணோ. அயஞ்ஹி தம் தம் ரூபகலாபம் பரிச்சி²ந்த³ந்தோ விய ஹோதி. தேனாஹ ‘‘ரூபபரியந்தப்பகாஸனரஸோ’’தி. ‘‘அயம் ரூபானம் ஹேட்டி²மோ பரியந்தோ, அயம் உபரிமோ’’தி ஏவம் விபா⁴வனகிச்சோதி அத்தோ². அத்த²தோ பன யஸ்மா ரூபானம் பரிச்சே²த³மத்தம் ஹுத்வா க³ய்ஹதி, தஸ்மா வுத்தம் ‘‘ரூபமரியாத³பச்சுபட்டா²னோ’’தி. ஏத்தா²ஹ – கிம் பனேஸ ரூபே பரிச்சி²ந்த³ந்தோ சதுஸமுட்டா²னகலாபதோ பரிச்சி²ந்த³தி, அத² ஏகஸமுட்டா²னப³ஹுகலாபதோ, உதா³ஹு ஏகேகஸமுட்டா²னஏகேககலாபதோ, ஏகேகரூபதோ வாதி? ஏகேகஸமுட்டா²னஏகேககலாபதோதி த³ட்ட²ப்³ப³ம்.

யதி³ ஹி சதுஸமுட்டா²னகலாபதோ, ஏகஸமுட்டா²னப³ஹுகலாபதோ வா பரிச்சி²ந்த³தி, ஏவம் ஸதி ஸம்பு²ட்ட²பா⁴வபச்சுபட்டா²னோ வா பரிச்சி²ந்தே³ய்ய, ஏககலாபக³தரூபானம் விய நானாகலாபக³தரூபானம்பி அவினிப்³போ⁴க³வுத்திதா வா ஆபஜ்ஜேய்ய. அத² வா ஏகேகரூபதோ பரிச்சி²ந்த³தி, ஏவம் ஸதி ஏகேககலாபக³தரூபானம்பி நானாகலாபக³தரூபானம் விய அஞ்ஞமஞ்ஞவினிப்³போ⁴க³வுத்திதாபஸங்கோ³ ஸியா, உப⁴யம்பி பனேதம் அனிட்ட²ம், தஸ்மா ஏகேகஸமுட்டா²னஏகேககலாபதோ பரிச்சி²ந்த³தீதி த³ட்ட²ப்³ப³ம்.

அஸம்பு²ட்ட²பா⁴வசி²த்³த³விவரபா⁴வபச்சுபட்டா²னோ வாதி அஸம்பு²ட்ட²பா⁴வபச்சுபட்டா²னோ வா சி²த்³த³விவரபா⁴வபச்சுபட்டா²னோ வாதி வுத்தம் ஹோதி. தத்த² யஸ்மிம் கலாபே பூ⁴தானம் பரிச்சே²தோ³, தேஹேவ அஸம்பு²ட்ட²பா⁴வேன பச்சுபட்டா²னதோ அஸம்பு²ட்ட²பா⁴வபச்சுபட்டா²னோ. கிஞ்சாபி ஹி கலாபந்தரபூ⁴தா கலாபந்தரபூ⁴தேஹி ஸம்பு²ட்டா²வ ஏகக⁴னபிண்ட³பா⁴வேன பவத்தத்தா, ததா²பி த⁴ம்மதோ அஞ்ஞமஞ்ஞம் விவித்தத்தா அஸம்கிண்ணா ஏவ. தேஸம் யா விவித்ததா அஞ்ஞமஞ்ஞம் அஸம்கிண்ணதா, அயம் பரிச்சே²தோ³. பூ⁴தந்தரேஹி விய தேஹி ஸோ அஸம்பு²ட்டோ²வ, இதரதா² பரிச்சி²ன்னதா ந ஸியா தேஸம் பூ⁴தானம் ப்³யாபிபா⁴வாபத்திதோ. அப்³யாபிபா⁴வோ ஹி அஸம்பு²ட்ட²தா. தேனாஹ ப⁴க³வா இமஸ்ஸ நித்³தே³ஸே ‘‘அஸம்பு²ட்ட²ம் சதூஹி மஹாபூ⁴தேஹீ’’தி (த⁴. ஸ. 637).

அத² வா கலாபந்தரபூ⁴தானம் அஞ்ஞமஞ்ஞம் அஸம்கிண்ணபா⁴வேன பச்சுபட்டா²னதோ அஸம்பு²ட்ட²தாபச்சுபட்டா²னபா⁴வோ வுத்தோ, கண்ணச்சி²த்³த³முக²விவராதி³வஸேன சி²த்³த³விவரபா⁴வஸ்ஸ பச்சுபட்டா²னதோ சி²த்³த³விவரபா⁴வபச்சுபட்டா²னதா வுத்தா. ரூபபரிச்சே²தே³ ஹி ஸதி சி²த்³த³விவரபா⁴வோ ஹோதி. யேஸம் ரூபானம் பரிச்சே²தோ³, தத்தே²வ தேஸம் பரிச்சே²த³பா⁴வேன லப்³ப⁴தீதி வுத்தம் ‘‘பரிச்சி²ன்னரூபபத³ட்டா²னோ’’தி.

689-91. ரூபஸ்ஸலஹுதாதி³த்தயனித்³தே³ஸேதி ரூபஸ்ஸலஹுதா ரூபஸ்ஸமுது³தா ரூபஸ்ஸகம்மஞ்ஞதாதி இமஸ்ஸ ரூபலஹுதாதி³த்தயஸ்ஸ நித்³தே³ஸே ஸம்பத்தே இத³ம் வுச்சதீதி அதி⁴ப்பாயோ. ஹேட்டா² வுத்தனயேனேவாதி அரூபஸ்ஸ லஹுதாதீ³ஸு ‘‘காயலஹுபா⁴வோ காயலஹுதா’’திஆதி³னா வுத்தனயானுஸாரேனேவ ‘‘ரூபஸ்ஸ லஹுபா⁴வோ லஹுதா’’திஆதி³னா ரூபஸம்ப³ந்தீ⁴பா⁴வேன ரூபவிகாராபி விஞ்ஞாதப்³பா³. ரூபஸ்ஸ லஹுபா⁴வோ லஹுதா, ஸா ரூபஸ்ஸ க³ருபா⁴வவூபஸமலக்க²ணா, க³ருபா⁴வனிம்மத்³த³னரஸா, அத³ந்த⁴தாபச்சுபட்டா²னா, லஹுரூபபத³ட்டா²னா. ரூபஸ்ஸ முது³பா⁴வோ முது³தா, ஸா ரூபஸ்ஸ த²த்³த⁴பா⁴வவூபஸமலக்க²ணா, த²த்³த⁴பா⁴வனிம்மத்³த³னரஸா, ஸப்³ப³கிரியாஸு அவிரோதி⁴தாபச்சுபட்டா²னா, முது³ரூபபத³ட்டா²னா. ரூபஸ்ஸ கம்மஞ்ஞபா⁴வோ கம்மஞ்ஞதா, ஸா ரூபஸ்ஸ அகம்மஞ்ஞபா⁴வவூபஸமலக்க²ணா, அகம்மஞ்ஞபா⁴வனிம்மத்³த³னரஸா, ஸரீரகிரியாஸு அனுகூலபா⁴வபச்சுபட்டா²னா, கம்மஞ்ஞரூபபத³ட்டா²னாதி. அத்தோ² பனேத்த² தத்த² தத்த² அம்ஹேஹி வுத்தானுஸாரேன வேதி³தப்³போ³. இமா பன திஸ்ஸோ ரூபானம் விகாரபா⁴வதோ ‘‘ரூபவிகாரா’’தி வுச்சந்தீதி த³ஸ்ஸேதும் ‘‘திஸ்ஸோ…பே… விபா⁴வினா’’தி வுத்தம்.

யதா²க்கமம் பனேதா ரூபஸ்ஸ த³ந்த⁴த்தகரதா⁴துக்கோ²ப⁴படிபக்க²பச்சயஸமுட்டா²னா, த²த்³த⁴த்தகரதா⁴துக்கோ²ப⁴படிபக்க²பச்சயஸமுட்டா²னா, ரூபானம் ஸரீரகிரியாஸு அனனுகூலபா⁴வகரதா⁴துக்கோ²ப⁴படிபக்க²பச்சயஸமுட்டா²னாதி வேதி³தப்³ப³ம். தத்த² தா⁴துக்கோ²போ⁴தி வாதபித்தஸேம்ஹபகோபோ, ரஸாதி³தா⁴தூனம் வா விகாராவத்தா², த்³விதா⁴ வுத்தாபி அத்த²தோ பத²வீதா⁴துஆதீ³னம்யேவ விகாரோதி த³ட்ட²ப்³ப³ம். படிபக்க²பச்சயா ஸப்பாயஉதுஆஹாராவிக்கி²த்தசித்ததா, ஸா ச தம்தம்விகாரஸ்ஸ விஸேஸபச்சயபா⁴வதோ வுத்தா, அவிஸேஸேன பன ஸப்³பே³ஸம் பச்சயா, ததா² ஹி தே கதா³சிபி அஞ்ஞமஞ்ஞம் ந விஜஹந்தி. ததா² அவிஜஹந்தானம் பன து³ப்³பி³ஜானீயம் நானத்தந்தி தம்பகாஸனத்த²ம் ‘‘ஏதாஸ’’ந்திஆதி³ வுத்தம். கமதோவ நித³ஸ்ஸனந்தி ஸம்ப³ந்தோ⁴. லஹுதாய ஹி அரோகீ³ நித³ஸ்ஸனம், முது³தாய மத்³தி³தசம்மம், கம்மஞ்ஞதாய ஸுத⁴ந்தஸுவண்ணம்.

நனு சேத்த² அரோகி³னோ தாவ நித³ஸ்ஸனம் யுத்தம் தஸ்ஸ இந்த்³ரியப³த்³த⁴ஸந்தானத்தா, ஸுபரிமத்³தி³தசம்மஸுத⁴ந்தஸுவண்ணானம் பன கத²ம். ந ஹி அனிந்த்³ரியப³த்³த⁴ரூபஸந்தானே லஹுதாதீ³னி ஸம்ப⁴வந்தி ததா² தா⁴துக்கோ²ப⁴படிபக்க²பச்சயாபா⁴வதோ? ஸச்சம், முது³கம்மஞ்ஞஸதி³ஸரூபனித³ஸ்ஸனமத்தமேதம், ந பன தத்த² இதா⁴தி⁴ப்பேதமுது³தாகம்மஞ்ஞதாஸபா⁴வதோ. யதி³ ஏவம், கத²ம் தூலபிசுஆதீ³ஸு லஹுபா⁴வாதி³கந்தி? ந தத்த² பரமத்த²தோ லஹுபா⁴வாதி³கம் அத்தி², க³ருபா⁴வாதி³ஹேதூனம் பன அபா⁴வதோ தத்த² லஹுபா⁴வாதி³வோஹாரோ.

கம்மம் காதும் ந ஸக்கோதி ஏகந்தேன தாஸம் பச்சுப்பன்னபச்சயாபேக்க²த்தா, இதரதா² ஸப்³ப³தா³பா⁴வினீஹி லஹுதாதீ³ஹி ப⁴விதப்³ப³ம் ஸியாதி. அத³ந்த⁴தாலக்க²ணாதி அக³ருபா⁴வலக்க²ணா. க³ருபா⁴வஸ்ஸ வினோத³னம் கி²பனம் அபனயனம் கிச்சமேதிஸ்ஸாதி க³ருபா⁴வவினோத³னரஸா. கிஞ்சாபி ஹி அயம் ரூபானம் க³ருபா⁴வம் வினோதே³தும் ந ஸக்கோதி, க³ருரூபபடிபக்கா²னம் பன அத³ந்த⁴ரூபானம் விகாரத்தா ‘‘ஜாதி நம் உப்பாதே³தீ’’திஆதீ³ஸு விய பரியாயேன க³ருபா⁴வம் வினோதே³தி நாம. தஸ்ஸஞ்ஹி விஜ்ஜமானாயம் உப்பன்னரூபானம் அக³ருபா⁴வோயேவாதி. ஏஸ நயோ முது³தாகம்மஞ்ஞதாஸு. சேதஸிகலஹுதாத³யோ பன அத்தனோ அத்தனோ பச்சனீகானம் தம்தம்அகுஸலத⁴ம்மானம் வித்³த⁴ம்ஸகபா⁴வேன பவத்தந்தீதி விகாரமத்தபா⁴வதோ நிப்பரியாயேனேவ தாஸம் தம்கிச்சதா லப்³ப⁴தீதி த³ட்ட²ப்³ப³ம். லஹுபரிவத்திதபச்சுபட்டா²னாதி அத³ந்த⁴ஸ்ஸ அரோகீ³புரிஸஸ்ஸ அபராபரம் ஸங்கந்தி பரிவத்தனம் விய அத³ந்த⁴பரிவத்தனம் ஹுத்வா பச்சுபட்டா²னாதி அத்தோ². யஸ்ஸ ரூபஸ்ஸ லஹுதா, தத்தே²வ விகாரபா⁴வேன உபலப்³ப⁴னதோ லஹுரூபபத³ட்டா²னா. ஏவமிதராஸுபி. அத²த்³த⁴தாதி அகதி²னதா. அத்தனோ முது³பா⁴வேனேவ ஸப்³ப³கிரியாஸு அவிருத்³தா⁴ ஹுத்வா பச்சுபட்டா²தீதி அவிரோதி⁴தாபச்சுபட்டா²னா. முது³ ஹி கத்த²சி ந விருஜ்ஜ²தி. தீஸுபி டா²னேஸு படிபக்க²த்தே² அ-காரோ. த³ந்த⁴தாதி³ஹேதூனம் படிபக்க²ஸமுட்டா²னத்தா லஹுதாதீ³னந்தி கேசி. அபரே பன ஸத்தாபடிஸேதே⁴தி வத³ந்தி. ஸரீரேன கத்தப்³ப³கிரியானம் அனுகூலதாஸங்கா²தோ கம்மஞ்ஞபா⁴வோ லக்க²ணமேதிஸ்ஸாதி ஸரீரகிரியானுகூலகம்மஞ்ஞபா⁴வலக்க²ணா. அகம்மஞ்ஞம் து³ப்³ப³லம் நாம ஹோதீதி கம்மஞ்ஞதா அது³ப்³ப³லபா⁴வபச்சுபட்டா²னா வுத்தா.

692. ரூபானமாசயோ யோதிஆதீ³ஸு யோ நிப்ப²ன்னரூபானம் ஆதி³தோ சயோ, யதா²பச்சயம் ததோ ததோ ஆக³தஸ்ஸ விய சயோதி வா ஆசயஸங்கா²தோ ரூபானம் பட²முப்பாதோ³ வட்³டி⁴ ச, ஸோ உபசயோதி உத்³தே³ஸே வுத்தோ ‘‘உபஞ்ஞத்தம் உபஸித்த’’ந்திஆதீ³ஸு விய உப-ஸத்³த³ஸ்ஸ பட²மூபரிஅத்த²த³ஸ்ஸனதோ. யா பன தேஸம்யேவ ரூபானம் அனுப்பப³ந்த⁴தா அனுப்பப³ந்த⁴வஸேன பவத்தி, ஸா ஸந்ததீதி பவுச்சதி. படிஸந்தி⁴க்க²ணே ஹி ரூபுப்பத்திஆதி³சயபா⁴வதோ ஆசயோ நாம, ததோ பரம் யாவ ஸத்தரஸமசித்துப்பாதா³ வட்³டி⁴பா⁴வதோ உபசயோ நாம. ததா³ ஹி ரூபஸ்ஸ கம்மசித்தஉதூஹி சயோயேவ, ந ஹானி. அத² வா யாவ ஆஹாரஸமுட்டா²ன ரூபுப்பாதோ³, சக்கா²தி³உப்பாதோ³ வா, தாவ உபசயோ நாம, ததோ பரம் பன சுதிபரியோஸானம் ஸந்ததி நாம. ஏவஞ்ச கத்வா –

‘‘யோ ஆயதனானம் ஆசயோ, ஸோ ரூபஸ்ஸ உபசயோ. யோ ரூபஸ்ஸ உபசயோ, ஸா ரூபஸ்ஸ ஸந்ததீ’’தி (த⁴. ஸ. 641-642) –

ஏவம் உபசயஸந்ததீனம் அத்த²தோ நானத்தாபா⁴வதீ³பனத்த²ம் வுத்தாய பாளியா அட்ட²கதா²யம் –

‘‘ஆசயோ நாம நிப்³ப³த்தி, உபசயோ நாம வட்³டி⁴, ஸந்ததி நாம பவத்தீ’’தி வத்வா ‘‘நதீ³தீரே க²தகூபஸ்மிஞ்ஹி உத³குக்³க³மனகாலோ விய ஆசயோ நிப்³ப³த்தி, பரிபுண்ணகாலோ விய உபசயோ வட்³டி⁴, அஜ்ஜோ²த்த²ரித்வா க³மனகாலோ விய ஸந்ததி பவத்தீ’’தி (த⁴. ஸ. அட்ட². 641; விஸுத்³தி⁴. 2.444) –

உபமா வுத்தா. ‘‘ரூபானமாசயோ’’தி சேத்த² ப³ஹுவசனனித்³தே³ஸேன உப்பாதோ³ நாம உப்பஜ்ஜமானானம் விகாரோ. விகாரத்தே ச ஸதி அத்தனோ விகாரவந்தத⁴ம்மபே⁴த³பி⁴ன்னத்தா ஏகக்க²ணேபி உப்பஜ்ஜமானானம் ப³ஹூனம்பி ரூபானம் விஸும் விஸும்யேவ உப்பாத³விகாரபா⁴வோ, ந பிண்ட³ஸ்ஸேவாதி தீ³பிதம் ஹோதி. ந கேவலஞ்ச ரூபானமேவ உப்பத்தி ஈதி³ஸீ, அத² கோ² அரூபத⁴ம்மானம்பி உப்பாதோ³ ரூபாரூபத⁴ம்மானம் ஜரதா, அனிச்சதா, ரூபஸ்ஸ லஹுமுது³கம்மஞ்ஞதா சாதி த³ட்ட²ப்³ப³ம்.

693. ஜாதிரூபந்தி தீ³பிதம் அட்ட²கதா²ஸு உப⁴யஸ்ஸபி ரூபுப்பாத³ஸபா⁴வத்தாதி அதி⁴ப்பாயோ. யதி³ ஏவம், கஸ்மா விப⁴ஜ்ஜ வுத்தம்? ப⁴க³வதா ததே²வ தே³ஸிதத்தா. ப⁴க³வதாபி கஸ்மா ததா² தே³ஸிதந்தி ஆஹ ‘‘வுத்தமாகாரனானத்தா’’திஆதி³. ஆகாரனானத்தம் ஹேட்டா² விபா⁴விதமேவ. அக்க²ரஸ்ஸ பட²முப்பத்தி உபசயோ, புனப்புனம் உப்பத்தி ஸந்ததி. ஏவம் திஸமுட்டா²னரூபானம்பி த³ட்ட²ப்³ப³ந்தி ஏவம் தேஸம் ஆகாரனானத்தம் வண்ணேந்தி. வேனேய்யானம் வஸேன வாதி ததா³ கிர ஸோதூனம் ஏவம் சித்தம் உப்பன்னம், அயம் ஜாதி ஸப்³பே³ஸம் த⁴ம்மானம் பப⁴வோ, ஸயம் பன ந குதோசி ஜாயதி, யதா² தம் ‘‘பகதிவாதீ³னம் பகதீ’’தி. தேஸம் மிச்சா²கா³ஹம் வித⁴மேந்தோ ‘‘ஜாதி நாம ந அஞ்ஞா, உபசயஸந்ததிவஸேன டி²தா ரூபுப்பத்தியேவ பன ததா² வுச்சதி, ஸா ச யஸ்ஸ உப்பாதோ³, தஸ்ஸ பச்சயேஹேவ ஜாதபரியாயம் லப்³ப⁴தீ’’தி த³ஸ்ஸனத்த²ம் உபசயோ ஸந்ததீதி த்³விதா⁴ பி⁴ந்தி³த்வா தே³ஸேதீதி ஆசரியா.

புப்³ப³ந்ததோ புப்³ப³கோட்டா²ஸதோ, அனாக³தபா⁴வதோதி அத்தோ². உப்பஜ்ஜமானே ரூபத⁴ம்மே உப்பாதோ³ அனாக³தக்க²ணதோ உம்முஜ்ஜாபேந்தோ விய ஹோதீதி வுத்தம் ‘‘உம்முஜ்ஜாபனரஸோ’’தி. ‘‘இமே ரூபத⁴ம்மா ஸம்படிச்ச²த² நே’’தி நிய்யாதேந்தோ விய க³ய்ஹதீதி வுத்தம் ‘‘நிய்யாதனபச்சுபட்டா²னோ’’தி. பரிபுண்ணபா⁴வபச்சுபட்டா²னதா உபரி சயோ உபசயோதி இமஸ்ஸ அத்த²ஸ்ஸ வஸேன வேதி³தப்³பா³. யதா² உப்பாத³க்க²ணப்பத்தம் உப்பன்னம் நாம ஹோதி ஆதி³கம்மே தப்பச்சயவஸேன, ஏவம் உப்பாத³க்க²ணக³தம் உபசிதம் நாம ஹோதீதி வுத்தம் ‘‘உபசிதரூபபத³ட்டா²னோ’’தி.

பவத்திலக்க²ணாதி அனுப்பப³ந்த⁴தோ உப்பத்திவஸேன பவத்தமானரூபானம் பவத்தனந்தி லக்கி²தப்³பா³. அனுப்பப³ந்த⁴னரஸாதி புப்³பா³பரவஸேன அனுப்பப³ந்த⁴னகிச்சா. அஸதி ஹி உப்பாதே³ புப்³பா³பரவஸேன அனுப்பப³ந்தோ⁴ ந ஸியா. அனுப்பப³ந்த⁴ரஸத்தாயேவ அனுபச்சே²த³வஸேன க³ஹேதப்³ப³தோ ஆஹ ‘‘அனுபச்சே²த³பச்சுபட்டா²னா’’தி. புப்³பா³பரவஸேன க⁴டிதரூபேஸு உபலப்³ப⁴னதோ வுத்தம் ‘‘அனுப்பப³ந்த⁴ரூபபத³ட்டா²னா’’தி.

694. ஜீரணந்தி ஜிண்ணபா⁴வோ, அபி⁴னவபா⁴வஹானீதி அத்தோ².

பாகடா ரூபத⁴ம்மேஸு க²ண்டி³ச்சாதி³பா⁴வேன த³ந்தாதீ³ஸு விகாரத³ஸ்ஸனதோ, இதரா தத³பா⁴வதோ அபாகடா. காமம் ரூபத⁴ம்மானம்பி க²ணிகஜரா படிச்ச²ன்னா ஏவ, யா ‘‘அவீசிஜரா’’தி வா வுச்சதி. அரூபத⁴ம்மானம் பன ஜராய ஸுட்டு² படிச்ச²ன்னபா⁴வத³ஸ்ஸனத்த²ம் ‘‘பாகடா ரூபத⁴ம்மேஸூ’’தி அவிஸேஸேன வுத்தம். க²ண்டி³ச்சாதி³விகாரோ பன க²ணிகஜராய நத்தி². ரூபபரிபாகோ ரூபத⁴ம்மானம் ஜிண்ணதா, ஜரம் பத்தஸ்ஸ ப⁴ங்கோ³ அவஸ்ஸம்பா⁴வீதி வுத்தம் ‘‘உபனயனரஸா’’தி, ப⁴ங்கூ³பனயனகிச்சாதி அத்தோ². ஸபா⁴வானபக³மேபீதிகக்க²ளத்தாதி³ஸபா⁴வானபக³மேபி, டி²திக்க²ணே ஹி ஜரா நாம, ந ச ததா³ த⁴ம்மஸபா⁴வம் விஜஹதி. நவபா⁴வோ உப்பாதா³வத்தா², தஸ்ஸா அபக³மபா⁴வேன க³ய்ஹதீதி ஆஹ ‘‘நவபா⁴வாபக³மபச்சுபட்டா²னா’’தி. வீஹிபுராணபா⁴வோ வியாதி வீஹிபா⁴வானபக³மேபி அபி⁴னவபா⁴வாபக³மனகரோ வீஹிபுராணபா⁴வோ விய. வீஹிபுராணபா⁴வோ ஸப்³பா³வத்தா²னி அபனேதி, அயம் பன கேவலம் உப்பாதா³வத்த²மேவ அபனேதி. பரிதோ ஸப்³ப³தோ பி⁴ஜ்ஜனந்தி லக்கி²தப்³பா³தி பரிபே⁴த³லக்க²ணா. நிச்சம் நாம து⁴வம், ரூபம் பன க²ணப⁴ங்கி³தாய ந நிச்சந்தி அனிச்சம், தஸ்ஸ பா⁴வோ அனிச்சதா. ஸா பன டி²திப்பத்தரூபம் டி²தியமேவ வினாஸனபா⁴வேன ஸம்ஸீதே³ந்தீ விய ஹோதீதி ஸம்ஸீத³னரஸா. யஸ்மா ச ஸா ப⁴ங்க³பா⁴வதோ க²யவயாகாரேனேவ க³ய்ஹதி, தஸ்மா வுத்தம் ‘‘க²யவயபா⁴வபச்சுபட்டா²னா’’தி. அனுக்கமேன வினாஸோ க²யோ நாம, தீ³பவட்டிகாய ஸஹ தேலஸ்ஸ விய ஸஹ நிரோதோ⁴ வயோதி வத³ந்தி.

696-7. ஸமோதா⁴னதோதி ராஸிதோ. கேசீதி அப⁴யகி³ரிவாஸினோ. மித்³த⁴ரூபஸ்ஸ வத³னஸீலா, மித்³த⁴வாதோ³ வா ஏதேஸந்தி மித்³த⁴வாதி³னோ. மித்³த⁴ரூபம் நாமாதி உதுசித்தாஹாரவஸேன திஸமுட்டா²னம் மித்³த⁴ம் நாம ரூபம். தே படிக்கி²பிதப்³பா³தி ஸம்ப³ந்தோ⁴. கத²ம் படிக்கி²பிதப்³பா³தி ஆஹ ‘‘முனீஸீ’’திஆதி³. நத்தி² நீவரணாதி ஸோதாபத்திமக்³கே³ன விசிகிச்சா²னீவரணஸ்ஸ, அனாகா³மிமக்³கே³ன காமச்ச²ந்த³ப்³யாபாத³குக்குச்சனீவரணானம், அரஹத்தமக்³கே³ன தி²னமித்³த⁴னீவரணானஞ்ச பஹீனத்தா. அயஞ்ஹேத்த² அதி⁴ப்பாயோ – யதி³ மித்³த⁴ம் ரூபம் ஸியா, அப்பஹாதப்³ப³ம் ப⁴வேய்ய. ரூபக்க²ந்தோ⁴ அபி⁴ஞ்ஞேய்யோ பரிஞ்ஞேய்யோ ந பஹாதப்³போ³ ந பா⁴வேதப்³போ³ ந ஸச்சி²காதப்³போ³. ‘‘கதமே த⁴ம்மா நேவத³ஸ்ஸனேனனபா⁴வனாயபஹாதப்³பா³. சதூஸு பூ⁴மீஸு குஸலம், சதூஸு பூ⁴மீஸு விபாகோ, தீஸு பூ⁴மீஸு கிரியாப்³யாகதம், ரூபஞ்ச நிப்³பா³னஞ்ச, இமே த⁴ம்மா நேவத³ஸ்ஸனேனனபா⁴வனாயபஹாதப்³பா³’’தி (த⁴. ஸ. 1407) வசனேன ரூபத⁴ம்மானம் பஹானாபா⁴வதோ. ஏவஞ்ச ஸதி தஸ்ஸ நீவரணபா⁴வோ விருஜ்ஜே²ய்ய நீவரணானம் பஹாதப்³ப³த்தா. ந ஹி நீவரணானம் அப்பஹாதப்³ப³த்தே –

‘‘யா மே கங்கா² புரே ஆஸி, தம் மே அக்கா²ஸி சக்கு²மா;

அத்³தா⁴ முனீஸி ஸம்பு³த்³தோ⁴, நத்தி² நீவரணா தவா’’தி. (ஸு. நி. 546) –

நீவரணப்பஹானேன ப⁴க³வதோ தோ²மனம் யுஜ்ஜேய்ய. யதி³ ஸியா, ‘‘ரூபம், பி⁴க்க²வே, ந தும்ஹாகம், தம் பஜஹதா²திஆதி³வசனதோ (ம. நி. 1.247; ஸம். நி. 3.33-34) ரூபஸ்ஸ பஹாதப்³ப³தாபி பஞ்ஞாயதீதி? தம் ந, தப்³பி³ஸயச²ந்த³ராக³ப்பஹானஸ்ஸ தத்த² அதி⁴ப்பேதத்தா. தேனாஹ ப⁴க³வா ‘‘யோ, பி⁴க்க²வே, ரூபே ச²ந்த³ராக³வினயோ, தம் தத்த² பஹான’’ந்தி. ந ச பனேதம் ந ஸக்கா வத்தும் ஏத்தா²பி ‘‘தப்³பி³ஸயச²ந்த³ராக³ப்பஹானவஸேனேவ வுத்த’’ந்தி ஸாத⁴கவசனபா⁴வதோ, காமச்ச²ந்தா³தீ³னம் தத்த² பஹானஸ்ஸ அனதி⁴ப்பேதத்தா ச, தஸ்மா ‘‘நத்தி² நீவரணா தவா’’திஆதி³வசனேஹி விருஜ்ஜ²னதோ ந மித்³த⁴ம் ரூபந்தி.

யதி³ பன பரோ த³ள்ஹமூள்ஹக்³கா³ஹிதாய தம்விஸயச²ந்த³ராக³ப்பஹானவஸேனேவ நீவரணப்பஹானம் அதி⁴ப்பேதந்தி ஸகவாத³ம் ஓட்³டே³ய்ய, தஸ்ஸ தன்னிஸேத⁴னத்த²ம் புன தி²னமித்³த⁴னீவரணஸ்ஸ அவிஜ்ஜானீவரணேன ஸஹ ஸம்பயோக³வசனஞ்ச ஆஹரந்தோ ஆஹ ‘‘தி²னமித்³த⁴னீவரண’’ந்திஆதி³. தி²னமித்³த⁴னீவரணஞ்சேவ அவிஜ்ஜானீவரணஞ்ச நீவரணேன ஸம்பயுத்தந்தி ஸம்ப³ந்தோ⁴. இத³ம் வுத்தம் ஹோதி – ‘‘சதூஹி ஸம்பயோகோ³’’தி (தா⁴து. 3) வசனதோ அரூபத⁴ம்மானமேவ அஞ்ஞமஞ்ஞஸ்ஸ ஸம்பயோகோ³ லப்³ப⁴தி, ந ரூபத⁴ம்மானம் அஞ்ஞமஞ்ஞம் அரூபேன வா, தஸ்மா யதி³ மித்³த⁴ம் ரூபம் ஸியா, ந தம் ஸம்பயோக³வசனமரஹதீதி. அத² ஸியா – யதா²லாப⁴வசனமேத்த² ஸக்கா விஞ்ஞாதும், ‘‘ஸக்க²ரகத²லம்பி மச்ச²கு³ம்ப³ம்பி சரந்தம்பி திட்ட²ந்தம்பீ’’திஆதீ³ஸு (தீ³. நி. 1.249) விய. யதா² ஹி ‘‘ஸக்க²ரகத²லிகம் மச்ச²கு³ம்ப³ம்பி சரந்தம்பி திட்ட²ந்தம்பீ’’திஆதீ³ஸு ஸக்க²ரகத²லிகஸ்ஸ சரணாயோக³தோ மச்ச²கு³ம்பா³பேக்கா²ய சரணம், உப⁴யாபேக்கா²ய டா²னந்தி ஏவம் யதா²லாபோ⁴ யோஜீயதி, ஏவமிதா⁴பி தி²னாபேக்கா²ய ஸம்பயோக³வசனம், உப⁴யாபேக்கா²ய நீவரணவசனந்தி? தம்பி ந, ரூபபா⁴வஸ்ஸேவ அஸித்³த⁴த்தா. ஸித்³தே⁴ ஹி ரூபபா⁴வே அஸம்ப⁴வதோ யதா²லாப⁴யோஜனா யுஜ்ஜேய்யாதி. ஏத்தகேனேவ மித்³த⁴ஸ்ஸ அரூபபா⁴வே ஸித்³தே⁴பி யதா² த்³விக்க²த்தும் ப³ந்த⁴ம் ஸுப³ந்த⁴ம் ஹோதி, ஏவமனேகஸுத்தஸாதி⁴தம் அப்பத⁴ம்ஸியம் ஹோதீதி பட்டா²னப்பகரணே ‘‘நீவரணம் த⁴ம்மம் படிச்ச…பே… பச்சயா’’தி (பட்டா². 3.8.8) இமஸ்ஸ விப⁴ங்கே³ ‘‘அரூபே…பே… உப்பஜ்ஜதீ’’தி (பட்டா². 3.8.8) வுத்தம் அரூபப⁴வுப்பத்திம்பி ஆஹரந்தோ ஆஹ ‘‘மஹாபகரணபட்டா²னே’’திஆதி³. ஜா²னனிகந்திஆதீ³னம்பி த⁴ம்மதோ லோபா⁴தி³பா⁴வதோ காமச்ச²ந்த³னீவரணாதீ³ஹி அபி⁴ன்னத்தா வுத்தம் ‘‘காமச்ச²ந்த³னீவரண’’ந்திஆதி³.

ஏத்த² ஸியா – ‘‘பஞ்சிமே, பி⁴க்க²வே, ஆவரணா நீவரணா’’திஆதீ³ஸு (அ. நி. 5.51) தி²னமித்³த⁴ஸ்ஸ நீவரணபா⁴வேன ஏகதோ ஆக³தத்தா இதா⁴பி ‘‘தி²னமித்³த⁴னீவரண’’ந்தி ஏகதோ வுத்தம், தி²னமேவ ச பன அரூபப⁴வே உப்பஜ்ஜதி தி²னமித்³த⁴ந்தி? தயித³மஸாரம், குக்குச்சஸ்ஸ ந க³ஹிதத்தா. யதி³ ஹி ஏகதோ க³ஹிதமத்தேனேவ இதா⁴பி ஏகதோ க³ஹணம் ஸியா, குக்குச்சஸ்ஸபி தத்த² ஏகதோ வுத்தஸ்ஸ இத⁴ க³ஹணம் ஸம்ப⁴வேய்ய, ந ச பனேவம் அத்தி² உத்³த⁴ச்சனீவரணந்த்வேவ வுத்தத்தா, தஸ்மா ந தஸ்ஸ அரூபப⁴வுப்பத்திம் ஸக்கா படிபா³ஹிதுந்தி. ஆதி³-ஸத்³தே³ன ‘‘கேவலோ ஹாயம், பி⁴க்க²வே, அகுஸலராஸி, யதி³த³ம் பஞ்ச நீவரணா (அ. நி. 5.52), இமே பஞ்ச நீவரணே பஹாய, விக³ததி²னமித்³தோ⁴தி தஸ்ஸ தி²னமித்³த⁴ஸ்ஸ சத்தத்தா வந்தத்தா முத்தத்தா பஹீனத்தா படினிஸ்ஸட்ட²த்தா, தேன வுச்சதி விக³ததி²னமித்³தோ⁴தி, இத³ம் சித்தம் இமம்ஹா தி²னமித்³த⁴ம்ஹா ஸோதே⁴தி விஸோதே⁴தி பரிஸோதே⁴தி மோசேதி விமோசேதி பரிமோசேதி வா’’தி (விப⁴. 551) ஏவமாதி³ம் பாளிம் ஸங்க³ண்ஹாதி.

யதி³பி ஸியா து³வித⁴ம் மித்³த⁴ம் ரூபம், அரூபஞ்ச. தத்த² யம் அரூபம், தம் நீவரணேஸு தே³ஸிதம், ந ரூபந்தி? தம்பி ந, விஸேஸவசனாபா⁴வதோ. ந ஹி விஸேஸேத்வா மித்³த⁴ம் நீவரணேஸு தே³ஸிதம் ‘‘யத³பி, பி⁴க்க²வே, தி²னம், தத³பி நீவரணம், யத³பி மித்³த⁴ம், தத³பி நீவரணம், தி²னமித்³த⁴ம் நீவரணந்தி இதி ஹித³ம் உத்³தே³ஸம் ஆக³ச்ச²தீ’’தி அவிஸேஸேன வுத்தத்தா, தஸ்மா மித்³த⁴ஸ்ஸ து³வித⁴தம் பரிகப்பேத்வாபி ந ஸக்கா நீவரணபா⁴வம் நிவத்தேதும். ஸக்கா ஹி வத்தும் யம் தம் அரூபதோ அஞ்ஞம் மித்³த⁴ம் பரிகப்பிதம், தம்பி நீவரணம் மித்³த⁴ஸபா⁴வத்தா இதரம் நீவரணம் வியாதி. யதி³ மித்³த⁴ஸ்ஸ ரூபபா⁴வம் ந ஸம்படிச்ச²த², கத²ம் ப⁴க³வதோ நித்³தா³ ஹோதி, நனு மித்³த⁴ஸ்ஸ ‘‘நித்³தா³ பசலாயிகா’’திஆதி³னா விப⁴ங்கே³ வுத்தத்தா நித்³தா³பா⁴வோ ஸித்³தோ⁴தி? நயித³மேவம், இத்தி²லிங்கா³தீ³ஸு விய நித்³தா³ஹேதுனோ மித்³த⁴ஸ்ஸ நித்³தா³பா⁴வேன விப⁴த்தத்தா. ஏவம்பி நித்³தா³ஹேதுனோ மித்³த⁴ஸ்ஸ அபா⁴வதோ கத²ம் ப⁴க³வதோ நித்³தா³தி சே? ஸா ப⁴க³வதோ நத்தீ²தி ந ஸக்கா வத்தும் ‘‘அபி⁴ஜானாமி கோ² பனாஹம் அக்³கி³வேஸ்ஸன…பே… தி³வா ஸுபிதா’’திஆதி³வசனதோ (ம. நி. 1.387) ந நித்³தா³ ப⁴க³வதோ மித்³தே⁴ன, அத² கோ² ஸரீரகே³லஞ்ஞேன, தஞ்ச ப⁴க³வதோ நத்தீ²தி ந ஸக்கா வத்தும் ‘‘பிட்டி² மே ஆகி³லாயதி, தமஹம் ஆயமிஸ்ஸாமீ’’தி (ம. நி. 2.22; ஸம். நி. 4.243) வசனதோ. ந சேத்த² ஏவமவதா⁴ரணம் த³ட்ட²ப்³ப³ம் ‘‘மித்³த⁴மேவ நித்³தா³ஹேதூ’’தி, தஸ்மா அஞ்ஞோபி அத்தி² நித்³தா³ஹேது. கோ பன ஸோதி? ஸரீரகே³லஞ்ஞம், தஸ்மா ந ப⁴க³வதோ நித்³தா³ மித்³த⁴ஹேதுகாதி த³ட்ட²ப்³ப³ம்.

698. விஸும் விஸும் அபா⁴வம் த³ஸ்ஸேத்வாதி வாயோதா⁴துஆதி³தோ விஸும் விஸும் நத்தி²பா⁴வம் த³ஸ்ஸேத்வா. கத²ம் பன ஸோ த³ஸ்ஸிதப்³போ³தி ஆஹ ‘‘வாயோதா⁴துயா’’திஆதி³. தத்த² காயப³லம் நாம அத்த²தோ வாயோதா⁴துயா பவத்திஆகாரவிஸேஸோ தஸ்ஸா விப்பா²ரபா⁴வதோ. யதோ பா³லானம் ப³லந்தி வத³ந்தீதி வுத்தம் ‘‘வாயோதா⁴துயா க³ஹிதாய ப³லரூபம் க³ஹிதமேவா’’தி. ஸம்ப⁴வோ காமதா⁴துயம் ஏகச்சஸத்தானம் இந்த்³ரியபரிபாகபச்சயோ ஆபோதா⁴துயா பவத்திஆகாரவிஸேஸோதி ஆஹ ‘‘ஆபோதா⁴துயா ஸம்ப⁴வரூப’’ந்தி. க³ஹிதாய க³ஹிதமேவாதி ஸம்ப³ந்தோ⁴. உபசயஸந்ததிவினிமுத்தோ ரூபுப்பாதோ³ நத்தி², உப்பாதா³வத்தா²ய ச அஞ்ஞா ஜாதி நாம நத்தே²வாதி வுத்தம் ‘‘உபசயஸந்ததீஹி ஜாதிரூப’’ந்தி. கம்மஸமுட்டா²னஸ்ஸபி ரோக³ஸ்ஸ விஸபா⁴க³பச்சயஸமுப்பன்னோ தா⁴துக்கோ²போ⁴ ஆஸன்னகாரணம், பகே³வ இதரஸ்ஸ. ஸோ அத்த²தோ ரூபத⁴ம்மானம் பாகாவத்தா² டி²திப⁴ங்க³க்க²ணேஸு ஏவ ஸியாதி வுத்தம் ‘‘ஜரதாஅனிச்சதாதீ³ஹி ரோக³ரூபம் க³ஹித’’ந்தி.

699-704. ரூபானி ஸமுட்ட²ஹந்தி ஜாயந்தி ஏதேஹீதி ரூபஸமுட்டா²னானி. கானி பன தானீதி ஆஹ ‘‘உதுசித்தாஹாரகம்மானீ’’தி.

ஆஹாரோ ரூபஹேதுயோதி ஏத்த² இதி-ஸத்³தோ³ பக்கி²பிதப்³போ³, கம்மம், உது ச சித்தஞ்ச ஆஹாரோதி இமே ரூபஹேதுயோதி. ரூபஹேதுயோதி ச ரூபஸ்ஸ ஜனகபச்சயாதி அத்தோ². தேனாஹ ‘‘ஏதேஹேவா’’திஆதி³. ஏகமேகம்யேவ ஸமுட்டா²னம் ஏதேஸந்தி ஏகஸமுட்டா²னா. நனு ஏகதோ ஏவ பச்சயதோ பச்சயுப்பன்னஸ்ஸ உப்பத்தி நத்தீ²தி? ஸச்சம் நத்தி², ரூபஜனகபச்சயேஸு ஏகதோதி அயமேத்த² அபி⁴ஸந்தி⁴. அட்டி²ந்த்³ரியானீதி சக்கா²தீ³னி பஞ்ச, இத்தி²புரிஸிந்த்³ரியத்³வயம், ஜீவிதஞ்சாதி அட்டி²ந்த்³ரியானி. காயவசீவிஞ்ஞத்திவஸேன விஞ்ஞத்தித்³வயம்.

த்³வீஹீதி கோசி சித்தேன, கோசி உதுனா சாதி ஏவம் த்³வீஹி. ந ஹி ஏகஸ்ஸேவ த்³வே ஏகக்க²ணே பச்சயா ஹோந்தி. ஏவம் ஸேஸேஸுபி. உதுஆஹார…பே… கதந்தி ஏகேகம் உதுனா, ஆஹாரேன, சித்தேன சாதி தீஹி கதம். சதஸ்ஸோ சாபி தா⁴துயோதி சத்தாரி மஹாபூ⁴தானி. தானி ஹி நிஸ்ஸத்தனிஜ்ஜீவட்டே²ன தா⁴தூதி வுச்சந்தி. கம்மாதீ³ஹி சதூஹி ப⁴வந்தீதி சதுப்³ப⁴வா. த்³வேதி ஜரதா அனிச்சதா.

705-6. இதா³னி மிஸ்ஸகஸமுட்டா²னானிபி க³ஹேத்வா தம்தம்பச்சயஜாதானம் க³ணனபரிச்சே²த³ம் த³ஸ்ஸேதும் ‘‘கம்மேனா’’திஆதி³ வுத்தம். தத்த² அட்டி²ந்த்³ரியானி வத்து² ஸுத்³த⁴ட்ட²கம் ஸந்தத்யூபசயாகாஸாதி வீஸதி கம்மஜா. விஞ்ஞத்தித்³வயம் ஸத்³தோ³ லஹுதாதி³த்தயம் ஸுத்³த⁴ட்ட²காத³யோ ஏகாத³ஸாதி ஸத்தரஸ சேதஸா ஜாயரே, சித்தஜாதி அத்தோ². ஸத்³தோ³ லஹுதாதி³த்தயம் ஸுத்³த⁴ட்ட²காத³யோ ஏகாத³ஸாதி த³ஸபஞ்சேவ பன்னரஸ உதுனா ஜாயரே. லஹுதாதி³த்தயம் ஸுத்³த⁴ட்ட²காத³யோ ஏகாத³ஸாதி சுத்³த³ஸ ஆஹாரதோ. ஜரதாஅனிச்சதாஹி தே அட்ட²ஸட்டி² ச ஹோந்தேவாதி ஸம்ப³ந்தோ⁴.

707-8. ‘‘ஜரதா…பே… ஸமுட்டி²தா’’தி வத்வா புன தத்த² காரணம் த³ஸ்ஸேதும் ‘‘ஜாதஸ்ஸா’’திஆதி³ வுத்தம். தத்த² ஜாதஸ்ஸ பாகபே⁴த³த்தாதி ஜரதாய ஜாதத⁴ம்மஸ்ஸ பாகத்தா, அனிச்சதாய ச பே⁴த³த்தாதி அத்தோ². இத³ம் வுத்தம் ஹோதி – ஜரதாஅனிச்சதா நாம உப்பன்னத⁴ம்மஸ்ஸ ஹோந்தி, நோ உப்பஜ்ஜமானஸ்ஸ. யதி³ ஹி உப்பஜ்ஜமானஸ்ஸ ஸியும், ததா³ தாஸம்பி ஜாயமானத்தபரியாயோ யுஜ்ஜேய்ய. உப்பன்னத⁴ம்மஸ்ஸ பன ஜாதிதோ பரம் இமாஸம் ஸம்ப⁴வதோ ந ஜாயந்தீதி வத்தும் வட்டதீதி. யதி³ பன கோசி தேஸம்பி ஜாதபா⁴வே கோ விரோதோ⁴தி படிபஜ்ஜேய்ய, தஸ்ஸ தம் து³க்³கா³ஹம் வித⁴மேந்தோ ஆஹ ‘‘ஜாயேய்யு’’ந்திஆதி³. ஹோந்து நாம தேஸம்பி பாகபே⁴தா³, ததா³பி கோ விரோதோ⁴தி ஆஹ ‘‘ந ஹீ’’திஆதி³. பாகோ ந பரிபச்சதீதி ஸம்ப³ந்தோ⁴, ஏதேன ந பி⁴ஜ்ஜதீதி தீ³பிதம் ஹோதி. பக்கஸ்ஸ ஹி ப⁴ங்கோ³ நியதோ. பே⁴தோ³ வா ந ச பி⁴ஜ்ஜதீதி ஏத்தா²பி பாகபா⁴வோபி வுத்தோவ. ந ஹி அபக்கம் பி⁴ஜ்ஜதீதி, அஞ்ஞதா² உப்பாத³ப⁴ங்கா³னம் அனஞ்ஞத்தப்பஸங்க³தோ. நத்தி² தந்தி பாகபே⁴தா³னம் பச்சனம் பி⁴ஜ்ஜனம் நத்தீ²தி வுத்தமேவத்த²ம் ஸங்கி²பித்வா ஆஹ.

ஏத்தாவதா ச கிம் வுத்தம் ஹோதி? யதி³ ஜரதாஅனிச்சதா கேனசி பச்சயேன ஜாயேய்யும், ததா³ உப்பன்னஸ்ஸ நாம ஜராய, ப⁴ங்கே³ன ச ப⁴விதப்³ப³ந்தி தேஸம் ஜரதாஅனிச்சதாபி ஸியும், ந ச பனேதா உபலப்³ப⁴ந்தி. கஸ்மா? யஸ்மா ந ஜரதா அஞ்ஞஜராய ஜீரதி, பி⁴ஜ்ஜதி வா, ந ச ப⁴ங்கோ³ அஞ்ஞேன ப⁴ங்கே³ன பி⁴ஜ்ஜதி, ஜீரதி வா, இதரதா² ஸாபி ஜரா அபராய ஜராய, ப⁴ங்கே³ன ச ஜீரதி, பி⁴ஜ்ஜதி, ஸோ ச ப⁴ங்கோ³ அஞ்ஞாய ஜராய, அஞ்ஞேன ப⁴ங்கே³ன ஜீரதி, பி⁴ஜ்ஜதீதி அனவட்டா²னப்பஸங்க³தோதி வுத்தம் ஹோதி.

709-10. ‘‘ஜாதஸ்ஸா’’திஆதி³ நிக³மனம். அத² வா உத்தரி வத்தப்³ப³சோத³னாய ப²லட²பனம். ‘‘ஸியா கத்த²சீ’’திஆதி³ பரமதாஸங்கனம். ஏத்தா²தி ஏதஸ்மிம் ‘‘ஜரதாஅனிச்சதாத்³வயம் ந பச்சதி, ந பி⁴ஜ்ஜதி வா’’தி அதி⁴காரே. ரூபஸ்ஸூபசயோதீதி இதி-ஸத்³தோ³ ஆதி³அத்தோ², தேன ‘‘ரூபஸ்ஸ உபசயோ ஸந்ததீ’’தி வசனேனாதி அத்தோ². ஏவம் பாகோபி பச்சது, பே⁴தோ³பி பரிபி⁴ஜ்ஜதூதி ஸம்ப³ந்தோ⁴. அயம் பனேத்த² அதி⁴ப்பாயோ – யதா² கம்மாதீ³ஹி உப்பஜ்ஜனகரூபனித்³தே³ஸே ‘‘கதமம் தம் ரூபம் உபாதி³ன்னம்? சக்கா²யதனம்…பே… காயாயதனம் இத்தி²ந்த்³ரியம் புரிஸிந்த்³ரியம் ஜீவிதிந்த்³ரியம், யம் வா பனஞ்ஞம்பி அத்தி² ரூபம் கம்மஸ்ஸ கதத்தா ரூபாயதனம்…பே… போ²ட்ட²ப்³பா³யதனம் ஆகாஸதா⁴து ரூபஸ்ஸ உபசயோ ரூபஸ்ஸ ஸந்ததி கப³ளீகாரோ ஆஹாரோ’’திஆதி³னா (த⁴. ஸ. 652) உபசயஸந்ததீனம் நித்³தி³ட்ட²த்தா ஜாதி ஜாயதீதி தீ³பிதம் ஹோதி தஸ்ஸா அபரஜாதியா அபா⁴வேபி. ஏவம் ஜராப⁴ங்கா³னம் அபரஜராப⁴ங்கா³பா⁴வேபி ஜீரணம், பி⁴ஜ்ஜனஞ்ச ஸம்படிச்சி²தப்³ப³ம், இதரதா² ஜாதியாபி பே⁴த³னா தத³வத்தா²யேவாதி.

711. ‘‘ந சேவா’’திஆதி³ யதா²ஸங்கிதபரமதஸ்ஸ படிக்கி²பனம். யதி³ ஜாயதீதி ந விஞ்ஞாதப்³ப³ம், ஏவஞ்ச ஸதி நித்³தே³ஸே கஸ்மா வுத்தந்தி ஆஹ ‘‘ஜாயமானஸ்ஸா’’திஆதி³. இத³ம் வுத்தம் ஹோதி – அஸதிபி ஜாதியா ஜாயமானத்தே ஜாயமானானம் த⁴ம்மானம் அபி⁴னிப்³ப³த்திபா⁴வதோ தஸ்ஸா தப்பச்சயபா⁴வவோஹாரோ அனுமதோதி தத்த² வுத்தா, ந பன பரமத்த²தோ ஜாயமானத்தா. ஜாயமானஸ்ஸ ஹி அபி⁴னிப்³ப³த்திமத்தம் ஜாதி, தஸ்மா அஸித்³தே⁴ன அஸித்³த⁴ஸாத⁴னமேதந்தி.

712-7. ‘‘தத்தா²’’திஆதி³னா புனபி பரமதாஸங்கம் கத்வா படிக்கி²பதி. தத்த² யேஸம் த⁴ம்மானம் யா ஜாதி, ஸா தப்பச்சயத்தவோஹாரம், அபி⁴னிப்³ப³த்திஸம்முதிஞ்ச லப⁴தேவாதி ஸம்ப³ந்தோ⁴. ததா²தி யதா² லப⁴தேவ, ததா². யம்தம்-ஸத்³தா³ ஹி அப்³யபி⁴சாரிதஸம்ப³ந்தா⁴. தேஸம் த⁴ம்மானம் பச்சயா ஏதிஸ்ஸாதி தப்பச்சயா, தஸ்ஸா பா⁴வோ தப்பச்சயத்தம், தப்பச்சயத்தேன பவத்தோ வோஹாரோ தப்பச்சயத்தவோஹாரோ, தம் கம்மபச்சயபா⁴வாதி³வோஹாரந்தி அத்தோ². அபி⁴னிப்³ப³த்திஸம்முதிந்தி அபி⁴னிப்³ப³த்ததி ஜாயதீதி ஏவம் அபி⁴னிப்³ப³த்திவஸேன பவத்தஸம்முதிம். கம்மாதி³ஸம்ப⁴வந்தி கம்மாதி³சதுபச்சயஸமுட்டா²னம். ஜனகானம் பச்சயானம் ஆனுபா⁴வக்க²ணுப்பாதே³ அபா⁴வதோதி ஸம்ப³ந்தோ⁴. அயம் பனேத்த² அத்தோ² – யே தே ரூபானம் ஜனகபச்சயா, தேஸம் தது³ப்பாத³னம் பதி அனுபரதப்³யாபாரானம் யோ ஸோ பச்சயூபலக்க²ணியோ கிச்சானுபா⁴வக்க²ணோ, ததா³ ஜாயமானானம் த⁴ம்மானம் விகாரபா⁴வேன லப்³ப⁴மானதம் ஸந்தா⁴ய வினேய்யபுக்³க³லவஸேன ஜாதியா பச்சயதோ ஜாதத்தம் அனுஞ்ஞாதம் ததோ புரே, பச்சா² ச அனுபலப்³ப⁴மானத்தா, ஏவஞ்ச கத்வா வுத்தம் ‘‘ஜாதியா பன லப்³ப⁴தீ’’தி. ஜராப⁴ங்கா³னம் பன பச்சயானுபா⁴வக்க²ணதோ உத்தரி டி²திப⁴ங்க³க்க²ணேஸு லப்³ப⁴மானத்தா ந ஏவம் அனுஞ்ஞாதும் ஸக்காதி, ஜாதியா பன லப்³ப⁴தி ஸோ வோஹாரோதி அதி⁴ப்பாயோ. தப்பச்சயத்தவோஹாரந்திஆதி³கா³தா²த்³வயம் நிக³மனவஸேன வுத்தம்.

718-9. அத² கிம் இமாய கீ³வாகண்டூ³யாய, நனு வுத்தம் ப⁴க³வதா ஸுத்தந்தே ‘‘ஜராமரணம், பி⁴க்க²வே, அனிச்சம் ஸங்க²தம் படிச்சஸமுப்பன்ன’’ந்தி (ஸம். நி. 2.20), தஸ்மா கத²மேதம் வுச்சதி, ஜரதா அனிச்சதா சேவ ந கேஹிசி ஸமுட்டி²தாதி யோ வதே³ய்ய, தஸ்ஸ விதக்கம் த³ஸ்ஸேத்வா படிக்கி²பிதும் ‘‘அனிச்ச’’ந்திஆதி³ வுத்தம். கஸ்மா ந வத்தப்³ப³ந்தி ஆஹ ‘‘ஸா ஹி பரியாயதே³ஸனா’’தி. பரியாயதே³ஸனத்தமேவ விபா⁴வேதும் ‘‘அனிச்சான’’ந்திஆதி³ வுத்தம். ததா²-ஸத்³தே³ன ‘‘ஸங்க²தான’’ந்தி ஸங்க³ண்ஹாதி.

720-3. அனிச்சம் ஸங்க²தஞ்சாதி ச-ஸத்³தே³ன ‘‘படிச்சஸமுப்பன்ன’’ந்தி ஸங்க³ண்ஹாதி. அயஞ்ஹேத்த² அதி⁴ப்பாயோ – அனிச்சஸங்க²தத⁴ம்மானம் ஜராமரணத்தா தேஸு ஸந்தேஸு ஹோதி, அஸந்தேஸு ந ஹோதி. ந ஹி அஜாதம் பரிபச்சதி, பி⁴ஜ்ஜதி வா, தஸ்மா தம் ஜாதிபச்சயதம் ஸந்தா⁴ய ‘‘ஜராமரணம் ஸங்க²தம் படிச்சஸமுப்பன்னம், ததோயேவ ச அனிச்ச’’ந்தி பரியாயேன ஸுத்தே ஆக³தம். யதா² விஞ்ஞத்திஆதீ³னம் நிப்பரியாயதோ சித்தஸமுட்டா²னதாபா⁴வேபி சித்தஜானம் விகாரத்தா சித்தஸமுட்டா²னபா⁴வோதி. விஞ்ஞத்தியோ வியாதி ச நித³ஸ்ஸனமத்தம் த³ட்ட²ப்³ப³ம் லஹுதாதீ³னம்பி சித்தஜாதி³பா⁴வஸ்ஸ பரியாயேனேவ இச்சி²தத்தா. நிப்பரியாயேன அட்டா²ரஸேவ நிப்ப²ன்னரூபானி கம்மாதி³ஸமுட்டா²னானீதி. தயந்தி ஜாதிஜராப⁴ங்க³ஸங்கா²தானம் லக்க²ணரூபத்தயம்.

க²ம்புப்ப²ம்வாதி ஆகாஸகுஸுமம் விய. யதா² ஆகாஸகுஸுமம் ஸப்³ப³ஸோ அஜாதத்தா நத்தி², ஏவமித³ம்பி நத்தீ²தி அத்தோ². நிச்சம் வாஸங்க²தம் வியாதி யதா² அஸங்க²தம் நிப்³பா³னம் கேனசி அஸங்க²தத்தா நிச்சம் து⁴வம், ஏவமித³ம்பி கேனசி அஸங்க²தத்தா நிச்சம் ஸஸ்ஸதம் வாதி அத்தோ². நோப⁴யம் பனித³ந்தி இத³ம் பன உப⁴யம்பி க²ம்புப்ப²ம் விய நோ நத்தி², ந ச நிப்³பா³னம் விய அஸங்க²தம் வாதி அத்தோ². நிஸ்ஸயாயத்தவுத்திதோதி ஜாயமானபரிபச்சமானபி⁴ஜ்ஜமானானம் ஜாதிஆதி³மத்தபா⁴வேன ஜாயமானாதி³னிஸ்ஸயபடிப³த்³த⁴வுத்தித்தா. தமேவ நிஸ்ஸயாயத்தவுத்திதம் ஸமத்தே²தும் ‘‘பா⁴வே பத²வியாதீ³ன’’ந்திஆதி³ வுத்தம். அயம் பனேத்த² ஸங்கே²பத்தோ² – பத²வீஆதீ³னம் நிஸ்ஸயானம் பா⁴வே ஜாதிஆதி³த்தயம் பஞ்ஞாயதி, தஸ்மா நோ நத்தி², யஸ்மா ச தேஸம் அபா⁴வே ந பஞ்ஞாயதி, தஸ்மா ந நிச்சந்தி இமமேவ ச அபி⁴னிவேஸம் நிஸேதே⁴தும் ப⁴க³வதா ஜாதியா சதுஜத்தம், ஜராமரணஸ்ஸ ச அனிச்சாதி³பரியாயோ வுத்தோதி த³ட்ட²ப்³ப³ம்.

724-5. நிப்ப²ன்னானி நாமாதி ‘‘ரூபஸ்ஸ பரிச்சே²தோ³, ரூபஸ்ஸ விகாரோ, ரூபஸ்ஸ லக்க²ண’’ந்திஆதி³னா பரிச்சே²தா³தி³பா⁴வம் அதிக்கமித்வா அத்தனோ கக்க²ளத்தாதி³னா ஸபா⁴வேன பரிச்சி²ஜ்ஜ க³ஹேதப்³ப³த்தா, அபரியாயேனேவ கம்மாதி³பச்சயேஹி நிப்ப²ன்னத்தா வா நிப்ப²ன்னானி நாம. தப்³பி³பரீததோ அனிப்ப²ன்னா.