20. வீஸதிமோ பரிச்சே²தோ³

மக்³கா³மக்³க³ஞாணத³ஸ்ஸனவிஸுத்³தி⁴னித்³தே³ஸவண்ணனா

1264. பச்சுப்பன்னஸ்ஸ த⁴ம்மஸ்ஸாதி பச்சுப்பன்னஸ்ஸ நாமரூபத⁴ம்மஸ்ஸ.

1266-8. உப்பஜ்ஜதோ உப்பஜ்ஜந்தஸ்ஸ நாமரூபத⁴ம்மஸ்ஸ ராஸிதோ நிசயதோ ஆக³மனஞ்ச நத்தி². தி³ஸாக³மனந்தி தி³ஸாய க³மனம். நிருத்³த⁴ஸ்ஸாபி நாமரூபத⁴ம்மஸ்ஸ ஏகஸ்மிம் டா²னே நிசயோதி ச நத்தி².

1270-1. அவிஜ்ஜாஸமுத³யா ரூபஸமுத³யோ, அவிஜ்ஜானிரோதா⁴ ரூபனிரோதோ⁴. தண்ஹாஸமுத³யா ரூபஸமுத³யோ, தண்ஹானிரோதா⁴ ரூபனிரோதோ⁴. கம்மஸமுத³யா ரூபஸமுத³யோ, கம்மனிரோதா⁴ ரூபனிரோதோ⁴. ஆஹாரனிரோதா⁴ ரூபனிரோதோ⁴. த⁴ம்மேதி ஸங்கா²ரத⁴ம்மே.

1280. ஸம்பத்தபடிவேத⁴ஸ்ஸாதி ஸம்பத்தலோகுத்தரஸங்கா²தமக்³க³ப²லஸ்ஸ ஸோதாபன்னாதி³புக்³க³லஸ்ஸ. விப்படிபன்னஸ்ஸாதி படிபத்தியம் அப்படிபன்னஸ்ஸ, விருத்³த⁴வஸேன படிபன்னஸ்ஸ வா.

1286. காயசித்தானீதி காயாதி வேத³னாஸஞ்ஞாஸங்கா²ரா. சித்தந்தி விஞ்ஞாணம்.

1290. யதோ யதோ பச்சயாதி³தோ. யம் அமதம் நிப்³பா³னம் விஜானதம் விஜானந்தானம் பீதிபாமோஜ்ஜம், தேஹி லபி⁴தப்³ப³ம் அமதம், அமதம் விய பீதிபாமோஜ்ஜம் வா.

1293. அப்பத்தேதி அத்தனி மக்³க³ப²லஸ்மிம் அப்பத்தே. பத்தஸஞ்ஞீதி மக்³க³ப²லே அஹம் பத்தோ அஸ்மி இதி ஸஞ்ஞிதோ ஹோதி.

1297. ஸாரவேதி³னோதி ஸாரஜானனஸீலா. தந்தி தம் மக்³கா³மக்³க³ஞாணத³ஸ்ஸனம். இத³ம் ஞாணம் மக்³கா³மக்³க³ஞாணத³ஸ்ஸனந்தி மக்³கா³மக்³க³ஞாணத³ஸ்ஸனம் நாம.

இதி அபி⁴த⁴ம்மாவதாரடீகாய

மக்³கா³மக்³க³ஞாணத³ஸ்ஸனவிஸுத்³தி⁴னித்³தே³ஸவண்ணனா நிட்டி²தா.

வீஸதிமோ பரிச்சே²தோ³.