1. க³ங்கா³பேய்யாலவக்³கோ³

1-12. ஜா²னாதி³ஸுத்தத்³வாத³ஸகம்

923-934. ஸாவத்தி²னிதா³னம் ‘‘சத்தாரோ மே, பி⁴க்க²வே, ஜா²னா. கதமே சத்தாரோ? இத⁴, பி⁴க்க²வே, பி⁴க்கு² விவிச்சேவ காமேஹி விவிச்ச அகுஸலேஹி த⁴ம்மேஹி ஸவிதக்கம் ஸவிசாரம் விவேகஜம் பீதிஸுக²ம் பட²மம் ஜா²னம் உபஸம்பஜ்ஜ விஹரதி. விதக்கவிசாரானம் வூபஸமா அஜ்ஜ²த்தம் ஸம்பஸாத³னம் சேதஸோ ஏகோதி³பா⁴வம் அவிதக்கம் அவிசாரம் ஸமாதி⁴ஜம் பீதிஸுக²ம் து³தியம் ஜா²னம் உபஸம்பஜ்ஜ விஹரதி. பீதியா ச விராகா³ உபேக்க²கோ ச விஹரதி ஸதோ ச ஸம்பஜானோ ஸுக²ஞ்ச காயேன படிஸம்வேதே³தி, யம் தம் அரியா ஆசிக்க²ந்தி – ‘உபேக்க²கோ ஸதிமா ஸுக²விஹாரீ’தி ததியம் ஜா²னம் உபஸம்பஜ்ஜ விஹரதி. ஸுக²ஸ்ஸ ச பஹானா து³க்க²ஸ்ஸ ச பஹானா புப்³பே³வ ஸோமனஸ்ஸதோ³மனஸ்ஸானம் அத்த²ங்க³மா அது³க்க²மஸுக²ம் உபேக்கா²ஸதிபாரிஸுத்³தி⁴ம் சதுத்த²ம் ஜா²னம் உபஸம்பஜ்ஜ விஹரதி. இமே கோ², பி⁴க்க²வே, சத்தாரோ ஜா²னா’’தி.

‘‘ஸேய்யதா²பி, பி⁴க்க²வே, க³ங்கா³ நதீ³ பாசீனனின்னா பாசீனபோணா பாசீனபப்³பா⁴ரா; ஏவமேவ கோ², பி⁴க்க²வே, பி⁴க்கு² சத்தாரோ ஜா²னே பா⁴வேந்தோ சத்தாரோ ஜா²னே ப³ஹுலீகரோந்தோ நிப்³பா³னனின்னோ ஹோதி நிப்³பா³னபோணோ நிப்³பா³னபப்³பா⁴ரோ. கத²ஞ்ச, பி⁴க்க²வே, பி⁴க்கு² சத்தாரோ ஜா²னே பா⁴வேந்தோ சத்தாரோ ஜா²னே ப³ஹுலீகரோந்தோ நிப்³பா³னனின்னோ ஹோதி நிப்³பா³னபோணோ நிப்³பா³னபப்³பா⁴ரோ? இத⁴, பி⁴க்க²வே, பி⁴க்கு² விவிச்சேவ காமேஹி விவிச்ச அகுஸலேஹி த⁴ம்மேஹி ஸவிதக்கம் ஸவிசாரம் விவேகஜம் பீதிஸுக²ம் பட²மம் ஜா²னம் உபஸம்பஜ்ஜ விஹரதி. விதக்கவிசாரானம் வூபஸமா…பே… து³தியம் ஜா²னம்…பே… ததியம் ஜா²னம்…பே… சதுத்த²ம் ஜா²னம் உபஸம்பஜ்ஜ விஹரதி. ஏவம் கோ², பி⁴க்க²வே, பி⁴க்கு² சத்தாரோ ஜா²னே பா⁴வேந்தோ சத்தாரோ ஜா²னே ப³ஹுலீகரோந்தோ நிப்³பா³னனின்னோ ஹோதி நிப்³பா³னபோணோ நிப்³பா³னபப்³பா⁴ரோ’’தி. த்³வாத³ஸமம்.

க³ங்கா³பேய்யாலவக்³கோ³ பட²மோ.

தஸ்ஸுத்³தா³னம் –

ச² பாசீனதோ நின்னா, ச² நின்னா ச ஸமுத்³த³தோ;

த்³வேதே ச² த்³வாத³ஸ ஹோந்தி, வக்³கோ³ தேன பவுச்சதீதி.

அப்பமாத³வக்³கோ³ வித்தா²ரேதப்³போ³.

தஸ்ஸுத்³தா³னம் –

ததா²க³தம் பத³ம் கூடம், மூலம் ஸாரோ ச வஸ்ஸிகம்;

ராஜா சந்தி³மஸூரியா, வத்தே²ன த³ஸமம் பத³ந்தி.

ப³லகரணீயவக்³கோ³ வித்தா²ரேதப்³போ³.

தஸ்ஸுத்³தா³னம் –

ப³லம் பீ³ஜஞ்ச நாகோ³ ச, ருக்கோ² கும்பே⁴ன ஸூகியா;

ஆகாஸேன ச த்³வே மேகா⁴, நாவா ஆக³ந்துகா நதீ³தி.

ஏஸனாவக்³கோ³ வித்தா²ரேதப்³போ³.

தஸ்ஸுத்³தா³னம் –

ஏஸனா விதா⁴ ஆஸவோ, ப⁴வோ ச து³க்க²தா திஸ்ஸோ;

கி²லம் மலஞ்ச நீகோ⁴ ச, வேத³னா தண்ஹா தஸினா சாதி.