3. ஸேக²ஸுத்தம்

523. ஏவம் மே ஸுதம் – ஏகம் ஸமயம் ப⁴க³வா கோஸம்பி³யம் விஹரதி கோ⁴ஸிதாராமே. தத்ர கோ² ப⁴க³வா பி⁴க்கூ² ஆமந்தேஸி – ‘‘அத்தி² நு கோ², பி⁴க்க²வே, பரியாயோ யம் பரியாயம் ஆக³ம்ம ஸேகோ² பி⁴க்கு² ஸேக²பூ⁴மியம் டி²தோ ‘ஸேகோ²ஸ்மீ’தி பஜானேய்ய, அஸேகோ² பி⁴க்கு² அஸேக²பூ⁴மியம் டி²தோ ‘அஸேகோ²ஸ்மீ’தி பஜானேய்யா’’தி?

ப⁴க³வம்மூலகா நோ, ப⁴ந்தே, த⁴ம்மா…பே… ‘‘அத்தி², பி⁴க்க²வே, பரியாயோ யம் பரியாயம் ஆக³ம்ம ஸேகோ² பி⁴க்கு² ஸேக²பூ⁴மியம் டி²தோ ‘ஸேகோ²ஸ்மீ’தி பஜானேய்ய, அஸேகோ² பி⁴க்கு² அஸேக²பூ⁴மியம் டி²தோ ‘அஸேகோ²ஸ்மீ’தி பஜானேய்ய’’.

‘‘கதமோ ச, பி⁴க்க²வே, பரியாயோ யம் பரியாயம் ஆக³ம்ம ஸேகோ² பி⁴க்கு² ஸேக²பூ⁴மியம் டி²தோ ‘ஸேகோ²ஸ்மீ’தி பஜானாதி? இத⁴, பி⁴க்க²வே, ஸேகோ² பி⁴க்கு² ‘இத³ம் து³க்க²’ந்தி யதா²பூ⁴தம் பஜானாதி, ‘அயம் து³க்க²ஸமுத³யோ’தி யதா²பூ⁴தம் பஜானாதி, ‘அயம் து³க்க²னிரோதோ⁴’தி யதா²பூ⁴தம் பஜானாதி, ‘அயம் து³க்க²னிரோத⁴கா³மினீ படிபதா³’தி யதா²பூ⁴தம் பஜானாதி – அயம்பி கோ², பி⁴க்க²வே, பரியாயோ யம் பரியாயம் ஆக³ம்ம ஸேகோ² பி⁴க்கு² ஸேக²பூ⁴மியம் டி²தோ ‘ஸேகோ²ஸ்மீ’தி பஜானாதி’’.

‘‘புன சபரம், பி⁴க்க²வே, ஸேகோ² பி⁴க்கு² இதி படிஸஞ்சிக்க²தி – ‘அத்தி² நு கோ² இதோ ப³ஹித்³தா⁴ அஞ்ஞோ ஸமணோ வா ப்³ராஹ்மணோ வா யோ ஏவம் பூ⁴தம் தச்ச²ம் தத²ம் த⁴ம்மம் தே³ஸேதி யதா² ப⁴க³வா’தி? ஸோ ஏவம் பஜானாதி – ‘நத்தி² கோ² இதோ ப³ஹித்³தா⁴ அஞ்ஞோ ஸமணோ வா ப்³ராஹ்மணோ வா யோ ஏவம் பூ⁴தம் தச்ச²ம் தத²ம் த⁴ம்மம் தே³ஸேதி யதா² ப⁴க³வா’தி. அயம்பி கோ², பி⁴க்க²வே, பரியாயோ யம் பரியாயம் ஆக³ம்ம ஸேகோ² பி⁴க்கு² ஸேக²பூ⁴மியம் டி²தோ ‘ஸேகோ²ஸ்மீ’தி பஜானாதி’’.

‘‘புன சபரம், பி⁴க்க²வே, ஸேகோ² பி⁴க்கு² பஞ்சிந்த்³ரியானி பஜானாதி – ஸத்³தி⁴ந்த்³ரியம், வீரியிந்த்³ரியம், ஸதிந்த்³ரியம், ஸமாதி⁴ந்த்³ரியம், பஞ்ஞிந்த்³ரியம் – யம்க³திகானி யம்பரமானி யம்ப²லானி யம்பரியோஸானானி. ந ஹேவ கோ² காயேன பு²ஸித்வா விஹரதி; பஞ்ஞாய ச அதிவிஜ்ஜ² பஸ்ஸதி. அயம்பி கோ², பி⁴க்க²வே, பரியாயோ யம் பரியாயம் ஆக³ம்ம ஸேகோ² பி⁴க்கு² ஸேக²பூ⁴மியம் டி²தோ ‘ஸேகோ²ஸ்மீ’தி பஜானாதி’’.

‘‘கதமோ ச, பி⁴க்க²வே, பரியாயோ யம் பரியாயம் ஆக³ம்ம அஸேகோ² பி⁴க்கு² அஸேக²பூ⁴மியம் டி²தோ ‘அஸேகோ²ஸ்மீ’தி பஜானாதி? இத⁴, பி⁴க்க²வே, அஸேகோ² பி⁴க்கு² பஞ்சிந்த்³ரியானி பஜானாதி – ஸத்³தி⁴ந்த்³ரியம், வீரியிந்த்³ரியம், ஸதிந்த்³ரியம், ஸமாதி⁴ந்த்³ரியம், பஞ்ஞிந்த்³ரியம் – யம்க³திகானி யம்பரமானி யம்ப²லானி யம்பரியோஸானானி. காயேன ச பு²ஸித்வா விஹரதி; பஞ்ஞாய ச அதிவிஜ்ஜ² பஸ்ஸதி. அயம்பி கோ², பி⁴க்க²வே, பரியாயோ யம் பரியாயம் ஆக³ம்ம அஸேகோ² பி⁴க்கு² அஸேக²பூ⁴மியம் டி²தோ ‘அஸேகோ²ஸ்மீ’தி பஜானாதி’’.

‘‘புன சபரம், பி⁴க்க²வே, அஸேகோ² பி⁴க்கு² ச² இந்த்³ரியானி பஜானாதி. ‘சக்கு²ந்த்³ரியம், ஸோதிந்த்³ரியம், கா⁴னிந்த்³ரியம், ஜிவ்ஹிந்த்³ரியம், காயிந்த்³ரியம், மனிந்த்³ரியம் – இமானி கோ² ச² இந்த்³ரியானி ஸப்³பே³ன ஸப்³ப³ம் ஸப்³ப³தா² ஸப்³ப³ம் அபரிஸேஸம் நிருஜ்ஜி²ஸ்ஸந்தி, அஞ்ஞானி ச ச² இந்த்³ரியானி ந குஹிஞ்சி கிஸ்மிஞ்சி உப்பஜ்ஜிஸ்ஸந்தீ’தி பஜானாதி. அயம்பி கோ², பி⁴க்க²வே, பரியாயோ யம் பரியாயம் ஆக³ம்ம அஸேகோ² பி⁴க்கு² அஸேக²பூ⁴மியம் டி²தோ ‘அஸேகோ²ஸ்மீ’தி பஜானாதீ’’தி. ததியம்.