4. ஸுகி²ந்த்³ரியவக்³கோ³

1. ஸுத்³தி⁴கஸுத்தம்

501. ‘‘பஞ்சிமானி, பி⁴க்க²வே, இந்த்³ரியானி. கதமானி பஞ்ச? ஸுகி²ந்த்³ரியம், து³க்கி²ந்த்³ரியம், ஸோமனஸ்ஸிந்த்³ரியம், தோ³மனஸ்ஸிந்த்³ரியம், உபேக்கி²ந்த்³ரியம் – இமானி கோ², பி⁴க்க²வே, பஞ்சிந்த்³ரியானீ’’தி. பட²மம்.

2. ஸோதாபன்னஸுத்தம்

502. ‘‘பஞ்சிமானி, பி⁴க்க²வே, இந்த்³ரியானி. கதமானி பஞ்ச? ஸுகி²ந்த்³ரியம், து³க்கி²ந்த்³ரியம், ஸோமனஸ்ஸிந்த்³ரியம், தோ³மனஸ்ஸிந்த்³ரியம், உபேக்கி²ந்த்³ரியம். யதோ கோ², பி⁴க்க²வே, அரியஸாவகோ இமேஸம் பஞ்சன்னம் இந்த்³ரியானம் ஸமுத³யஞ்ச அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தம் பஜானாதி – அயம் வுச்சதி, பி⁴க்க²வே, அரியஸாவகோ ஸோதாபன்னோ அவினிபாதத⁴ம்மோ நியதோ ஸம்போ³தி⁴பராயணோ’’தி. து³தியம்.

3. அரஹந்தஸுத்தம்

503. ‘‘பஞ்சிமானி, பி⁴க்க²வே, இந்த்³ரியானி. கதமானி பஞ்ச? ஸுகி²ந்த்³ரியம், து³க்கி²ந்த்³ரியம், ஸோமனஸ்ஸிந்த்³ரியம், தோ³மனஸ்ஸிந்த்³ரியம், உபேக்கி²ந்த்³ரியம். யதோ கோ², பி⁴க்க²வே, பி⁴க்கு² இமேஸம் பஞ்சன்னம் இந்த்³ரியானம் ஸமுத³யஞ்ச அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தம் விதி³த்வா அனுபாதா³விமுத்தோ ஹோதி – அயம் வுச்சதி, பி⁴க்க²வே, பி⁴க்கு² அரஹம் கீ²ணாஸவோ வுஸிதவா கதகரணீயோ ஓஹிதபா⁴ரோ அனுப்பத்தஸத³த்தோ² பரிக்கீ²ணப⁴வஸம்யோஜனோ ஸம்மத³ஞ்ஞா விமுத்தோ’’தி. ததியம்.

4. பட²மஸமணப்³ராஹ்மணஸுத்தம்

504. ‘‘பஞ்சிமானி, பி⁴க்க²வே, இந்த்³ரியானி. கதமானி பஞ்ச? ஸுகி²ந்த்³ரியம், து³க்கி²ந்த்³ரியம், ஸோமனஸ்ஸிந்த்³ரியம், தோ³மனஸ்ஸிந்த்³ரியம், உபேக்கி²ந்த்³ரியம். யே ஹி கேசி, பி⁴க்க²வே, ஸமணா வா ப்³ராஹ்மணா வா இமேஸம் பஞ்சன்னம் இந்த்³ரியானம் ஸமுத³யஞ்ச அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தம் நப்பஜானந்தி, ந மே தே, பி⁴க்க²வே, ஸமணா வா ப்³ராஹ்மணா வா ஸமணேஸு வா ஸமணஸம்மதா ப்³ராஹ்மணேஸு வா ப்³ராஹ்மணஸம்மதா, ந ச பனேதே ஆயஸ்மந்தோ ஸாமஞ்ஞத்த²ம் வா ப்³ரஹ்மஞ்ஞத்த²ம் வா தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரந்தி.

‘‘யே ச கோ² கேசி, பி⁴க்க²வே, ஸமணா வா ப்³ராஹ்மணா வா இமேஸம் பஞ்சன்னம் இந்த்³ரியானம் ஸமுத³யஞ்ச அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தம் பஜானந்தி, தே கோ² மே, பி⁴க்க²வே, ஸமணா வா ப்³ராஹ்மணா வா ஸமணேஸு சேவ ஸமணஸம்மதா ப்³ராஹ்மணேஸு ச ப்³ராஹ்மணஸம்மதா, தே ச பனாயஸ்மந்தோ ஸாமஞ்ஞத்த²ஞ்ச ப்³ரஹ்மஞ்ஞத்த²ஞ்ச தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரந்தீ’’தி. சதுத்த²ம்.

5. து³தியஸமணப்³ராஹ்மணஸுத்தம்

505. ‘‘பஞ்சிமானி, பி⁴க்க²வே, இந்த்³ரியானி. கதமானி பஞ்ச? ஸுகி²ந்த்³ரியம், து³க்கி²ந்த்³ரியம், ஸோமனஸ்ஸிந்த்³ரியம், தோ³மனஸ்ஸிந்த்³ரியம், உபேக்கி²ந்த்³ரியம். யே ஹி கேசி, பி⁴க்க²வே, ஸமணா வா ப்³ராஹ்மணா வா ஸுகி²ந்த்³ரியம் நப்பஜானந்தி, ஸுகி²ந்த்³ரியஸமுத³யம் நப்பஜானந்தி, ஸுகி²ந்த்³ரியனிரோத⁴ம் நப்பஜானந்தி, ஸுகி²ந்த்³ரியனிரோத⁴கா³மினிம் படிபத³ம் நப்பஜானந்தி; து³க்கி²ந்த்³ரியம் நப்பஜானந்தி…பே… ஸோமனஸ்ஸிந்த்³ரியம் நப்பஜானந்தி…பே… தோ³மனஸ்ஸிந்த்³ரியம் நப்பஜானந்தி …பே… உபேக்கி²ந்த்³ரியம் நப்பஜானந்தி, உபேக்கி²ந்த்³ரியஸமுத³யம் நப்பஜானந்தி, உபேக்கி²ந்த்³ரியனிரோத⁴ம் நப்பஜானந்தி, உபேக்கி²ந்த்³ரியனிரோத⁴கா³மினிம் படிபத³ம் நப்பஜானந்தி; ந மே தே, பி⁴க்க²வே, ஸமணா வா ப்³ராஹ்மணா வா ஸமணேஸு வா ஸமணஸம்மதா ப்³ராஹ்மணேஸு வா ப்³ராஹ்மணஸம்மதா, ந ச பனேதே ஆயஸ்மந்தோ ஸாமஞ்ஞத்த²ம் வா ப்³ரஹ்மஞ்ஞத்த²ம் வா தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரந்தி.

‘‘யே ச கோ² கேசி, பி⁴க்க²வே, ஸமணா வா ப்³ராஹ்மணா வா ஸுகி²ந்த்³ரியம் பஜானந்தி, ஸுகி²ந்த்³ரியஸமுத³யம் பஜானந்தி, ஸுகி²ந்த்³ரியனிரோத⁴ம் பஜானந்தி, ஸுகி²ந்த்³ரியனிரோத⁴கா³மினிம் படிபத³ம் பஜானந்தி; து³க்கி²ந்த்³ரியம் பஜானந்தி…பே… ஸோமனஸ்ஸிந்த்³ரியம் பஜானந்தி… தோ³மனஸ்ஸிந்த்³ரியம் பஜானந்தி… உபேக்கி²ந்த்³ரியம் பஜானந்தி, உபேக்கி²ந்த்³ரியஸமுத³யம் பஜானந்தி, உபேக்கி²ந்த்³ரியனிரோத⁴ம் பஜானந்தி, உபேக்கி²ந்த்³ரியனிரோத⁴கா³மினிம் படிபத³ம் பஜானந்தி, தே ச கோ² மே, பி⁴க்க²வே, ஸமணா வா ப்³ராஹ்மணா வா ஸமணேஸு சேவ ஸமணஸம்மதா ப்³ராஹ்மணேஸு ச ப்³ராஹ்மணஸம்மதா, தே ச பனாயஸ்மந்தோ ஸாமஞ்ஞத்த²ஞ்ச ப்³ரஹ்மஞ்ஞத்த²ஞ்ச தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரந்தீ’’தி. பஞ்சமம்.

6. பட²மவிப⁴ங்க³ஸுத்தம்

506. ‘‘பஞ்சிமானி, பி⁴க்க²வே, இந்த்³ரியானி. கதமானி பஞ்ச? ஸுகி²ந்த்³ரியம், து³க்கி²ந்த்³ரியம், ஸோமனஸ்ஸிந்த்³ரியம், தோ³மனஸ்ஸிந்த்³ரியம், உபேக்கி²ந்த்³ரியம்.

‘‘கதமஞ்ச, பி⁴க்க²வே, ஸுகி²ந்த்³ரியம்? யம் கோ², பி⁴க்க²வே, காயிகம் ஸுக²ம், காயிகம் ஸாதம், காயஸம்ப²ஸ்ஸஜம் ஸுக²ம் ஸாதம் வேத³யிதம் – இத³ம் வுச்சதி, பி⁴க்க²வே, ஸுகி²ந்த்³ரியம்.

‘‘கதமஞ்ச, பி⁴க்க²வே, து³க்கி²ந்த்³ரியம்? யம் கோ², பி⁴க்க²வே, காயிகம் து³க்க²ம், காயிகம் அஸாதம், காயஸம்ப²ஸ்ஸஜம் து³க்க²ம் அஸாதம் வேத³யிதம் – இத³ம் வுச்சதி, பி⁴க்க²வே, து³க்கி²ந்த்³ரியம்.

‘‘கதமஞ்ச, பி⁴க்க²வே, ஸோமனஸ்ஸிந்த்³ரியம்? யம் கோ², பி⁴க்க²வே, சேதஸிகம் ஸுக²ம், சேதஸிகம் ஸாதம், மனோஸம்ப²ஸ்ஸஜம் ஸுக²ம் ஸாதம் வேத³யிதம் – இத³ம் வுச்சதி, பி⁴க்க²வே, ஸோமனஸ்ஸிந்த்³ரியம்.

‘‘கதமஞ்ச, பி⁴க்க²வே, தோ³மனஸ்ஸிந்த்³ரியம்? யம் கோ², பி⁴க்க²வே, சேதஸிகம் து³க்க²ம், சேதஸிகம் அஸாதம், மனோஸம்ப²ஸ்ஸஜம் து³க்க²ம் அஸாதம் வேத³யிதம் – இத³ம் வுச்சதி, பி⁴க்க²வே, தோ³மனஸ்ஸிந்த்³ரியம்.

‘‘கதமஞ்ச, பி⁴க்க²வே, உபேக்கி²ந்த்³ரியம்? யம் கோ², பி⁴க்க²வே, காயிகம் வா சேதஸிகம் வா நேவஸாதம் நாஸாதம் வேத³யிதம் – இத³ம் வுச்சதி, பி⁴க்க²வே, உபேக்கி²ந்த்³ரியம். இமானி கோ², பி⁴க்க²வே, பஞ்சிந்த்³ரியானீ’’தி. ச²ட்ட²ம்.

7. து³தியவிப⁴ங்க³ஸுத்தம்

507. ‘‘பஞ்சிமானி, பி⁴க்க²வே, இந்த்³ரியானி. கதமானி பஞ்ச? ஸுகி²ந்த்³ரியம், து³க்கி²ந்த்³ரியம், ஸோமனஸ்ஸிந்த்³ரியம், தோ³மனஸ்ஸிந்த்³ரியம், உபேக்கி²ந்த்³ரியம்.

‘‘கதமஞ்ச, பி⁴க்க²வே, உபேக்கி²ந்த்³ரியம்? யம் கோ², பி⁴க்க²வே, காயிகம் வா சேதஸிகம் வா நேவஸாதம் நாஸாதம் வேத³யிதம் – இத³ம் வுச்சதி, பி⁴க்க²வே, உபேக்கி²ந்த்³ரியம்.

‘‘தத்ர, பி⁴க்க²வே, யஞ்ச ஸுகி²ந்த்³ரியம் யஞ்ச ஸோமனஸ்ஸிந்த்³ரியம், ஸுகா² ஸா வேத³னா த³ட்ட²ப்³பா³. தத்ர, பி⁴க்க²வே, யஞ்ச து³க்கி²ந்த்³ரியம் யஞ்ச தோ³மனஸ்ஸிந்த்³ரியம், து³க்கா² ஸா வேத³னா த³ட்ட²ப்³பா³. தத்ர, பி⁴க்க²வே, யதி³த³ம் உபேக்கி²ந்த்³ரியம், அது³க்க²மஸுகா² ஸா வேத³னா த³ட்ட²ப்³பா³. இமானி கோ², பி⁴க்க²வே, பஞ்சிந்த்³ரியானீ’’தி. ஸத்தமம்.

8. ததியவிப⁴ங்க³ஸுத்தம்

508. ‘‘பஞ்சிமானி, பி⁴க்க²வே, இந்த்³ரியானி. கதமானி பஞ்ச? ஸுகி²ந்த்³ரியம், து³க்கி²ந்த்³ரியம், ஸோமனஸ்ஸிந்த்³ரியம், தோ³மனஸ்ஸிந்த்³ரியம், உபேக்கி²ந்த்³ரியம்.

‘‘கதமஞ்ச, பி⁴க்க²வே, உபேக்கி²ந்த்³ரியம்? யம் கோ², பி⁴க்க²வே, காயிகம் வா சேதஸிகம் வா நேவ ஸாதம் நாஸாதம் வேத³யிதம் – இத³ம் வுச்சதி, பி⁴க்க²வே, உபேக்கி²ந்த்³ரியம்.

‘‘தத்ர, பி⁴க்க²வே, யஞ்ச ஸுகி²ந்த்³ரியம் யஞ்ச ஸோமனஸ்ஸிந்த்³ரியம், ஸுகா² ஸா வேத³னா த³ட்ட²ப்³பா³. தத்ர, பி⁴க்க²வே, யஞ்ச து³க்கி²ந்த்³ரியம் யஞ்ச தோ³மனஸ்ஸிந்த்³ரியம், து³க்கா² ஸா வேத³னா த³ட்ட²ப்³பா³. தத்ர, பி⁴க்க²வே, யதி³த³ம் உபேக்கி²ந்த்³ரியம், அது³க்க²மஸுகா² ஸா வேத³னா த³ட்ட²ப்³பா³. இதி கோ², பி⁴க்க²வே, இமானி பஞ்சிந்த்³ரியானி பஞ்ச ஹுத்வா தீணி ஹோந்தி, தீணி ஹுத்வா பஞ்ச ஹோந்தி பரியாயேனா’’தி. அட்ட²மம்.

9. கட்டோ²பமஸுத்தம்

509. ‘‘பஞ்சிமானி, பி⁴க்க²வே, இந்த்³ரியானி. கதமானி பஞ்ச? ஸுகி²ந்த்³ரியம், து³க்கி²ந்த்³ரியம், ஸோமனஸ்ஸிந்த்³ரியம், தோ³மனஸ்ஸிந்த்³ரியம், உபேக்கி²ந்த்³ரியம். ஸுக²வேத³னியம், பி⁴க்க²வே, ப²ஸ்ஸம் படிச்ச உப்பஜ்ஜதி ஸுகி²ந்த்³ரியம். ஸோ ஸுகி²தோவ ஸமானோ ‘ஸுகி²தோஸ்மீ’தி பஜானாதி. தஸ்ஸேவ ஸுக²வேத³னியஸ்ஸ ப²ஸ்ஸஸ்ஸ நிரோதா⁴ ‘யம் தஜ்ஜம் வேத³யிதம் ஸுக²வேத³னியம் ப²ஸ்ஸம் படிச்ச உப்பன்னம் ஸுகி²ந்த்³ரியம் தம் நிருஜ்ஜ²தி, தம் வூபஸம்மதீ’தி பஜானாதி’’.

‘‘து³க்க²வேத³னியம், பி⁴க்க²வே, ப²ஸ்ஸம் படிச்ச உப்பஜ்ஜதி து³க்கி²ந்த்³ரியம். ஸோ து³க்கி²தோவ ஸமானோ ‘து³க்கி²தோஸ்மீ’தி பஜானாதி. தஸ்ஸேவ து³க்க²வேத³னியஸ்ஸ ப²ஸ்ஸஸ்ஸ நிரோதா⁴ ‘யம் தஜ்ஜம் வேத³யிதம் து³க்க²வேத³னியம் ப²ஸ்ஸம் படிச்ச உப்பன்னம் து³க்கி²ந்த்³ரியம் தம் நிருஜ்ஜ²தி, தம் வூபஸம்மதீ’தி பஜானாதி’’.

‘‘ஸோமனஸ்ஸவேத³னியம், பி⁴க்க²வே, ப²ஸ்ஸம் படிச்ச உப்பஜ்ஜதி ஸோமனஸ்ஸிந்த்³ரியம். ஸோ ஸுமனோவ ஸமானோ ‘ஸுமனோஸ்மீ’தி பஜானாதி. தஸ்ஸேவ ஸோமனஸ்ஸவேத³னியஸ்ஸ ப²ஸ்ஸஸ்ஸ நிரோதா⁴ ‘யம் தஜ்ஜம் வேத³யிதம் ஸோமனஸ்ஸவேத³னியம் ப²ஸ்ஸம் படிச்ச உப்பன்னம் ஸோமனஸ்ஸிந்த்³ரியம் தம் நிருஜ்ஜ²தி, தம் வூபஸம்மதீ’தி பஜானாதி’’.

‘‘தோ³மனஸ்ஸவேத³னியம், பி⁴க்க²வே, ப²ஸ்ஸம் படிச்ச உப்பஜ்ஜதி தோ³மனஸ்ஸிந்த்³ரியம். ஸோ து³ம்மனோவ ஸமானோ ‘து³ம்மனோஸ்மீ’தி பஜானாதி. தஸ்ஸேவ தோ³மனஸ்ஸவேத³னியஸ்ஸ ப²ஸ்ஸஸ்ஸ நிரோதா⁴ ‘யம் தஜ்ஜம் வேத³யிதம் தோ³மனஸ்ஸவேத³னியம் ப²ஸ்ஸம் படிச்ச உப்பன்னம் தோ³மனஸ்ஸிந்த்³ரியம் தம் நிருஜ்ஜ²தி, தம் வூபஸம்மதீ’தி பஜானாதி’’.

‘‘உபேக்கா²வேத³னியம், பி⁴க்க²வே, ப²ஸ்ஸம் படிச்ச உப்பஜ்ஜதி உபேக்கி²ந்த்³ரியம். ஸோ உபேக்க²கோவ ஸமானோ ‘உபேக்க²கோஸ்மீ’தி பஜானாதி. தஸ்ஸேவ உபேக்கா²வேத³னியஸ்ஸ ப²ஸ்ஸஸ்ஸ நிரோதா⁴ ‘யம் தஜ்ஜம் வேத³யிதம் உபேக்கா²வேத³னியம் ப²ஸ்ஸம் படிச்ச உப்பன்னம் உபேக்கி²ந்த்³ரியம் தம் நிருஜ்ஜ²தி, தம் வூபஸம்மதீ’தி பஜானாதி’’.

‘‘ஸேய்யதா²பி, பி⁴க்க²வே, த்³வின்னம் கட்டா²னம் ஸங்க⁴ட்டனஸமோதா⁴னா [ஸம்க⁴ட்டனாஸமோதா⁴னா (பீ. க.), ஸம்க⁴டனஸமோதா⁴னா (ஸ்யா. கம்.)] உஸ்மா ஜாயதி, தேஜோ அபி⁴னிப்³ப³த்ததி; தேஸம்யேவ கட்டா²னம் நானாபா⁴வாவினிக்கே²பா யா [நானாபா⁴வனிக்கே²பா (ஸ்யா. கம். பீ. க.)] தஜ்ஜா உஸ்மா ஸா நிருஜ்ஜ²தி ஸா வூபஸம்மதி; ஏவமேவ கோ², பி⁴க்க²வே, ஸுக²வேத³னியம் ப²ஸ்ஸம் படிச்ச உப்பஜ்ஜதி ஸுகி²ந்த்³ரியம். ஸோ ஸுகி²தோவ ஸமானோ ‘ஸுகி²தோஸ்மீ’தி பஜானாதி. தஸ்ஸேவ ஸுக²வேத³னியஸ்ஸ ப²ஸ்ஸஸ்ஸ நிரோதா⁴ ‘யம் தஜ்ஜம் வேத³யிதம் ஸுக²வேத³னியம் ப²ஸ்ஸம் படிச்ச உப்பஜ்ஜதி ஸுகி²ந்த்³ரியம் தம் நிருஜ்ஜ²தி, தம் வூபஸம்மதீ’தி பஜானாதி’’.

‘‘து³க்க²வேத³னியம், பி⁴க்க²வே, ப²ஸ்ஸம் படிச்ச…பே… ஸோமனஸ்ஸவேத³னியம், பி⁴க்க²வே, ப²ஸ்ஸம் படிச்ச…பே… தோ³மனஸ்ஸவேத³னியம், பி⁴க்க²வே, ப²ஸ்ஸம் படிச்ச…பே… உபேக்கா²வேத³னியம், பி⁴க்க²வே, ப²ஸ்ஸம் படிச்ச உப்பஜ்ஜதி உபேக்கி²ந்த்³ரியம். ஸோ உபேக்க²கோவ ஸமானோ ‘உபேக்க²கோஸ்மீ’தி பஜானாதி. தஸ்ஸேவ உபேக்கா²வேத³னியஸ்ஸ ப²ஸ்ஸஸ்ஸ நிரோதா⁴ ‘யம் தஜ்ஜம் வேத³யிதம் உபேக்கா²வேத³னியம் ப²ஸ்ஸம் படிச்ச உப்பஜ்ஜதி உபேக்கி²ந்த்³ரியம் தம் நிருஜ்ஜ²தி, தம் வூபஸம்மதீ’தி பஜானாதி’’. நவமம்.

10. உப்படிபாடிகஸுத்தம்

510. ‘‘பஞ்சிமானி, பி⁴க்க²வே, இந்த்³ரியானி. கதமானி பஞ்ச? து³க்கி²ந்த்³ரியம், தோ³மனஸ்ஸிந்த்³ரியம், ஸுகி²ந்த்³ரியம், ஸோமனஸ்ஸிந்த்³ரியம், உபேக்கி²ந்த்³ரியம். இத⁴, பி⁴க்க²வே, பி⁴க்கு²னோ அப்பமத்தஸ்ஸ ஆதாபினோ பஹிதத்தஸ்ஸ விஹரதோ உப்பஜ்ஜதி து³க்கி²ந்த்³ரியம். ஸோ ஏவம் பஜானாதி – ‘உப்பன்னம் கோ² மே இத³ம் து³க்கி²ந்த்³ரியம், தஞ்ச கோ² ஸனிமித்தம் ஸனிதா³னம் ஸஸங்கா²ரம் ஸப்பச்சயம். தஞ்ச அனிமித்தம் அனிதா³னம் அஸங்கா²ரம் அப்பச்சயம் து³க்கி²ந்த்³ரியம் உப்பஜ்ஜிஸ்ஸதீதி – நேதம் டா²னம் விஜ்ஜதி’. ஸோ து³க்கி²ந்த்³ரியஞ்ச பஜானாதி, து³க்கி²ந்த்³ரியஸமுத³யஞ்ச பஜானாதி, து³க்கி²ந்த்³ரியனிரோத⁴ஞ்ச பஜானாதி, யத்த² சுப்பன்னம் து³க்கி²ந்த்³ரியம் அபரிஸேஸம் நிருஜ்ஜ²தி தஞ்ச பஜானாதி. கத்த² சுப்பன்னம் து³க்கி²ந்த்³ரியம் அபரிஸேஸம் நிருஜ்ஜ²தி? இத⁴, பி⁴க்க²வே, பி⁴க்கு² விவிச்சேவ காமேஹி விவிச்ச அகுஸலேஹி த⁴ம்மேஹி ஸவிதக்கம் ஸவிசாரம் விவேகஜம் பீதிஸுக²ம் பட²மம் ஜா²னம் உபஸம்பஜ்ஜ விஹரதி, ஏத்த² சுப்பன்னம் து³க்கி²ந்த்³ரியம் அபரிஸேஸம் நிருஜ்ஜ²தி. அயம் வுச்சதி, பி⁴க்க²வே, ‘பி⁴க்கு² அஞ்ஞாஸி து³க்கி²ந்த்³ரியஸ்ஸ நிரோத⁴ம், தத³த்தா²ய சித்தம் உபஸம்ஹரதி’’’.

‘‘இத⁴ பன, பி⁴க்க²வே, பி⁴க்கு²னோ அப்பமத்தஸ்ஸ ஆதாபினோ பஹிதத்தஸ்ஸ விஹரதோ உப்பஜ்ஜதி தோ³மனஸ்ஸிந்த்³ரியம். ஸோ ஏவம் பஜானாதி – ‘உப்பன்னம் கோ² மே இத³ம் தோ³மனஸ்ஸிந்த்³ரியம், தஞ்ச கோ² ஸனிமித்தம் ஸனிதா³னம் ஸஸங்கா²ரம் ஸப்பச்சயம். தஞ்ச அனிமித்தம் அனிதா³னம் அஸங்கா²ரம் அப்பச்சயம் தோ³மனஸ்ஸிந்த்³ரியம் உப்பஜ்ஜிஸ்ஸதீதி – நேதம் டா²னம் விஜ்ஜதி’. ஸோ தோ³மனஸ்ஸிந்த்³ரியஞ்ச பஜானாதி, தோ³மனஸ்ஸிந்த்³ரியஸமுத³யஞ்ச பஜானாதி, தோ³மனஸ்ஸிந்த்³ரியனிரோத⁴ஞ்ச பஜானாதி, யத்த² சுப்பன்னம் தோ³மனஸ்ஸிந்த்³ரியம் அபரிஸேஸம் நிருஜ்ஜ²தி தஞ்ச பஜானாதி. கத்த² சுப்பன்னம் தோ³மனஸ்ஸிந்த்³ரியம் அபரிஸேஸம் நிருஜ்ஜ²தி? இத⁴, பி⁴க்க²வே, பி⁴க்கு² விதக்கவிசாரானம் வூபஸமா அஜ்ஜ²த்தம் ஸம்பஸாத³னம் சேதஸோ ஏகோதி³பா⁴வம் அவிதக்கம் அவிசாரம் ஸமாதி⁴ஜம் பீதிஸுக²ம் து³தியம் ஜா²னம் உபஸம்பஜ்ஜ விஹரதி, ஏத்த² சுப்பன்னம் தோ³மனஸ்ஸிந்த்³ரியம் அபரிஸேஸம் நிருஜ்ஜ²தி. அயம் வுச்சதி, பி⁴க்க²வே, ‘பி⁴க்கு² அஞ்ஞாஸி தோ³மனஸ்ஸிந்த்³ரியஸ்ஸ நிரோத⁴ம், தத³த்தா²ய சித்தம் உபஸம்ஹரதி’’’.

‘‘இத⁴ பன, பி⁴க்க²வே, பி⁴க்கு²னோ அப்பமத்தஸ்ஸ ஆதாபினோ பஹிதத்தஸ்ஸ விஹரதோ உப்பஜ்ஜதி ஸுகி²ந்த்³ரியம். ஸோ ஏவம் பஜானாதி – ‘உப்பன்னம் கோ² மே இத³ம் ஸுகி²ந்த்³ரியம், தஞ்ச கோ² ஸனிமித்தம் ஸனிதா³னம் ஸஸங்கா²ரம் ஸப்பச்சயம். தஞ்ச அனிமித்தம் அனிதா³னம் அஸங்கா²ரம் அப்பச்சயம் ஸுகி²ந்த்³ரியம் உப்பஜ்ஜிஸ்ஸதீதி – நேதம் டா²னம் விஜ்ஜதி’. ஸோ ஸுகி²ந்த்³ரியஞ்ச பஜானாதி, ஸுகி²ந்த்³ரியஸமுத³யஞ்ச பஜானாதி, ஸுகி²ந்த்³ரியனிரோத⁴ஞ்ச பஜானாதி, யத்த² சுப்பன்னம் ஸுகி²ந்த்³ரியம் அபரிஸேஸம் நிருஜ்ஜ²தி தஞ்ச பஜானாதி. கத்த² சுப்பன்னம் ஸுகி²ந்த்³ரியம் அபரிஸேஸம் நிருஜ்ஜ²தி? இத⁴, பி⁴க்க²வே, பி⁴க்கு² பீதியா ச விராகா³ உபேக்க²கோ ச விஹரதி ஸதோ ச ஸம்பஜானோ ஸுக²ஞ்ச காயேன படிஸம்வேதே³தி யம் தம் அரியா ஆசிக்க²ந்தி ‘உபேக்க²கோ ஸதிமா ஸுக²விஹாரீ’தி ததியம் ஜா²னம் உபஸம்பஜ்ஜ விஹரதி, ஏத்த² சுப்பன்னம் ஸுகி²ந்த்³ரியம் அபரிஸேஸம் நிருஜ்ஜ²தி. அயம் வுச்சதி, பி⁴க்க²வே, ‘பி⁴க்கு² அஞ்ஞாஸி ஸுகி²ந்த்³ரியஸ்ஸ நிரோத⁴ம், தத³த்தா²ய சித்தம் உபஸம்ஹரதி’’’.

‘‘இத⁴ பன, பி⁴க்க²வே, பி⁴க்கு²னோ அப்பமத்தஸ்ஸ ஆதாபினோ பஹிதத்தஸ்ஸ விஹரதோ உப்பஜ்ஜதி ஸோமனஸ்ஸிந்த்³ரியம். ஸோ ஏவம் பஜானாதி – ‘உப்பன்னம் கோ² மே இத³ம் ஸோமனஸ்ஸிந்த்³ரியம், தஞ்ச கோ² ஸனிமித்தம் ஸனிதா³னம் ஸஸங்கா²ரம் ஸப்பச்சயம். தஞ்ச அனிமித்தம் அனிதா³னம் அஸங்கா²ரம் அப்பச்சயம் ஸோமனஸ்ஸிந்த்³ரியம் உப்பஜ்ஜிஸ்ஸதீதி – நேதம் டா²னம் விஜ்ஜதி’. ஸோ ஸோமனஸ்ஸிந்த்³ரியஞ்ச பஜானாதி, ஸோமனஸ்ஸிந்த்³ரியஸமுத³யஞ்ச பஜானாதி, ஸோமனஸ்ஸிந்த்³ரியனிரோத⁴ஞ்ச பஜானாதி, யத்த² சுப்பன்னம் ஸோமனஸ்ஸிந்த்³ரியம் அபரிஸேஸம் நிருஜ்ஜ²தி தஞ்ச பஜானாதி. கத்த² சுப்பன்னம் ஸோமனஸ்ஸிந்த்³ரியம் அபரிஸேஸம் நிருஜ்ஜ²தி? இத⁴, பி⁴க்க²வே, பி⁴க்கு² ஸுக²ஸ்ஸ ச பஹானா து³க்க²ஸ்ஸ ச பஹானா புப்³பே³வ ஸோமனஸ்ஸதோ³மனஸ்ஸானம் அத்த²ங்க³மா அது³க்க²மஸுக²ம் உபேக்கா²ஸதிபாரிஸுத்³தி⁴ம் சதுத்த²ம் ஜா²னம் உபஸம்பஜ்ஜ விஹரதி, ஏத்த² சுப்பன்னம் ஸோமனஸ்ஸிந்த்³ரியம் அபரிஸேஸம் நிருஜ்ஜ²தி. அயம் வுச்சதி, பி⁴க்க²வே, ‘பி⁴க்கு² அஞ்ஞாஸி ஸோமனஸ்ஸிந்த்³ரியஸ்ஸ நிரோத⁴ம், தத³த்தா²ய சித்தம் உபஸம்ஹரதி’’’.

‘‘இத⁴ பன, பி⁴க்க²வே, பி⁴க்கு²னோ அப்பமத்தஸ்ஸ ஆதாபினோ பஹிதத்தஸ்ஸ விஹரதோ உப்பஜ்ஜதி உபேக்கி²ந்த்³ரியம். ஸோ ஏவம் பஜானாதி – ‘உப்பன்னம் கோ² மே இத³ம் உபேக்கி²ந்த்³ரியம், தஞ்ச கோ² ஸனிமித்தம் ஸனிதா³னம் ஸஸங்கா²ரம் ஸப்பச்சயம். தஞ்ச அனிமித்தம் அனிதா³னம் அஸங்கா²ரம் அப்பச்சயம் உபேக்கி²ந்த்³ரியம் உப்பஜ்ஜிஸ்ஸதீதி – நேதம் டா²னம் விஜ்ஜதி’. ஸோ உபேக்கி²ந்த்³ரியஞ்ச பஜானாதி, உபேக்கி²ந்த்³ரியஸமுத³யஞ்ச பஜானாதி, உபேக்கி²ந்த்³ரியனிரோத⁴ஞ்ச பஜானாதி, யத்த² சுப்பன்னம் உபேக்கி²ந்த்³ரியம் அபரிஸேஸம் நிருஜ்ஜ²தி தஞ்ச பஜானாதி. கத்த² சுப்பன்னம் உபேக்கி²ந்த்³ரியம் அபரிஸேஸம் நிருஜ்ஜ²தி? இத⁴, பி⁴க்க²வே, பி⁴க்கு² ஸப்³ப³ஸோ நேவஸஞ்ஞானாஸஞ்ஞாயதனம் ஸமதிக்கம்ம ஸஞ்ஞாவேத³யிதனிரோத⁴ம் உபஸம்பஜ்ஜ விஹரதி, ஏத்த² சுப்பன்னம் உபேக்கி²ந்த்³ரியம் அபரிஸேஸம் நிருஜ்ஜ²தி. அயம் வுச்சதி, பி⁴க்க²வே, ‘பி⁴க்கு² அஞ்ஞாஸி உபேக்கி²ந்த்³ரியஸ்ஸ நிரோத⁴ம், தத³த்தா²ய சித்தம் உபஸம்ஹரதீ’’’தி. த³ஸமம்.

ஸுகி²ந்த்³ரியவக்³கோ³ சதுத்தோ².

தஸ்ஸுத்³தா³னம் –

ஸுத்³தி⁴கஞ்ச ஸோதோ அரஹா, து³வே ஸமணப்³ராஹ்மணா;

விப⁴ங்கே³ன தயோ வுத்தா, கட்டோ² உப்படிபாடிகந்தி.