1. புனப்³ப⁴வஸுத்தம்

491. ‘‘பஞ்சிமானி, பி⁴க்க²வே, இந்த்³ரியானி. கதமானி பஞ்ச? ஸத்³தி⁴ந்த்³ரியம்…பே… பஞ்ஞிந்த்³ரியம். யாவகீவஞ்சாஹம், பி⁴க்க²வே, இமேஸம் பஞ்சன்னம் இந்த்³ரியானம் ஸமுத³யஞ்ச அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தம் நாப்³ப⁴ஞ்ஞாஸிம், நேவ தாவாஹம், பி⁴க்க²வே, ஸதே³வகே லோகே ஸமாரகே ஸப்³ரஹ்மகே ஸஸ்ஸமணப்³ராஹ்மணியா பஜாய ஸதே³வமனுஸ்ஸாய ‘அனுத்தரம் ஸம்மாஸம்போ³தி⁴ம் அபி⁴ஸம்பு³த்³தோ⁴’தி பச்சஞ்ஞாஸிம் [அபி⁴ஸம்பு³த்³தோ⁴ பச்சஞ்ஞாஸிம் (ஸீ. ஸ்யா. கம்.)]. யதோ ச க்²வாஹம், பி⁴க்க²வே, இமேஸம் பஞ்சன்னம் இந்த்³ரியானம் ஸமுத³யஞ்ச அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தம் அப்³ப⁴ஞ்ஞாஸிம், அதா²ஹம், பி⁴க்க²வே, ஸதே³வகே லோகே ஸமாரகே ஸப்³ரஹ்மகே ஸஸ்ஸமணப்³ராஹ்மணியா பஜாய ஸதே³வமனுஸ்ஸாய ‘அனுத்தரம் ஸம்மாஸம்போ³தி⁴ம் அபி⁴ஸம்பு³த்³தோ⁴’தி பச்சஞ்ஞாஸிம். ஞாணஞ்ச பன மே த³ஸ்ஸனம் உத³பாதி³ – ‘அகுப்பா மே விமுத்தி [சேதோவிமுத்தி (ஸீ. பீ. க.)], அயமந்திமா ஜாதி, நத்தி²தா³னி புனப்³ப⁴வோ’’’தி. பட²மம்.