2. முது³தரவக்³கோ³

1. படிலாப⁴ஸுத்தம்

481. ‘‘பஞ்சிமானி, பி⁴க்க²வே, இந்த்³ரியானி. கதமானி பஞ்ச? ஸத்³தி⁴ந்த்³ரியம்…பே… பஞ்ஞிந்த்³ரியம்…பே…. கதமஞ்ச, பி⁴க்க²வே, ஸத்³தி⁴ந்த்³ரியம்? இத⁴, பி⁴க்க²வே, அரியஸாவகோ ஸத்³தோ⁴ ஹோதி, ஸத்³த³ஹதி ததா²க³தஸ்ஸ போ³தி⁴ம் – ‘இதிபி ஸோ ப⁴க³வா அரஹம் ஸம்மாஸம்பு³த்³தோ⁴ விஜ்ஜாசரணஸம்பன்னோ ஸுக³தோ லோகவிதூ³ அனுத்தரோ புரிஸத³ம்மஸாரதி² ஸத்தா² தே³வமனுஸ்ஸானம் பு³த்³தோ⁴ ப⁴க³வா’தி – இத³ம் வுச்சதி, பி⁴க்க²வே, ஸத்³தி⁴ந்த்³ரியம்.

‘‘கதமஞ்ச, பி⁴க்க²வே, வீரியிந்த்³ரியம்? யம் கோ², பி⁴க்க²வே, சத்தாரோ ஸம்மப்பதா⁴னே ஆரப்³ப⁴ வீரியம் படிலப⁴தி – இத³ம் வுச்சதி, பி⁴க்க²வே, வீரியிந்த்³ரியம்.

‘‘கதமஞ்ச, பி⁴க்க²வே, ஸதிந்த்³ரியம்? யம் கோ², பி⁴க்க²வே, சத்தாரோ ஸதிபட்டா²னே ஆரப்³ப⁴ ஸதிம் படிலப⁴தி – இத³ம் வுச்சதி, பி⁴க்க²வே, ஸதிந்த்³ரியம்.

‘‘கதமஞ்ச, பி⁴க்க²வே, ஸமாதி⁴ந்த்³ரியம்? இத⁴, பி⁴க்க²வே, அரியஸாவகோ வோஸ்ஸக்³கா³ரம்மணம் கரித்வா லப⁴தி ஸமாதி⁴ம், லப⁴தி சித்தஸ்ஸ ஏகக்³க³தம் – இத³ம் வுச்சதி, பி⁴க்க²வே, ஸமாதி⁴ந்த்³ரியம்.

‘‘கதமஞ்ச, பி⁴க்க²வே, பஞ்ஞிந்த்³ரியம்? இத⁴, பி⁴க்க²வே, அரியஸாவகோ பஞ்ஞவா ஹோதி உத³யத்த²கா³மினியா பஞ்ஞாய ஸமன்னாக³தோ அரியாய நிப்³பே³தி⁴காய ஸம்மா து³க்க²க்க²யகா³மினியா – இத³ம் வுச்சதி, பி⁴க்க²வே, பஞ்ஞிந்த்³ரியம். இமானி கோ², பி⁴க்க²வே, பஞ்சிந்த்³ரியானீ’’தி. பட²மம்.

2. பட²மஸம்கி²த்தஸுத்தம்

482. ‘‘பஞ்சிமானி, பி⁴க்க²வே, இந்த்³ரியானி. கதமானி பஞ்ச? ஸத்³தி⁴ந்த்³ரியம்…பே… பஞ்ஞிந்த்³ரியம் – இமானி கோ², பி⁴க்க²வே, பஞ்சிந்த்³ரியானி. இமேஸம் கோ², பி⁴க்க²வே, பஞ்சன்னம் இந்த்³ரியானம் ஸமத்தா பரிபூரத்தா அரஹம் ஹோதி, ததோ முது³தரேஹி அனாகா³மீ ஹோதி, ததோ முது³தரேஹி ஸகதா³கா³மீ ஹோதி, ததோ முது³தரேஹி ஸோதாபன்னோ ஹோதி, ததோ முது³தரேஹி த⁴ம்மானுஸாரீ ஹோதி, ததோ முது³தரேஹி ஸத்³தா⁴னுஸாரீ ஹோதீ’’தி. து³தியம்.

3. து³தியஸம்கி²த்தஸுத்தம்

483. ‘‘பஞ்சிமானி, பி⁴க்க²வே, இந்த்³ரியானி. கதமானி பஞ்ச? ஸத்³தி⁴ந்த்³ரியம்…பே… பஞ்ஞிந்த்³ரியம் – இமானி கோ², பி⁴க்க²வே, பஞ்சிந்த்³ரியானி. இமேஸம் கோ², பி⁴க்க²வே, பஞ்சன்னம் இந்த்³ரியானம் ஸமத்தா பரிபூரத்தா அரஹம் ஹோதி, ததோ முது³தரேஹி அனாகா³மீ ஹோதி, ததோ முது³தரேஹி ஸகதா³கா³மீ ஹோதி, ததோ முது³தரேஹி ஸோதாபன்னோ ஹோதி, ததோ முது³தரேஹி த⁴ம்மானுஸாரீ ஹோதி, ததோ முது³தரேஹி ஸத்³தா⁴னுஸாரீ ஹோதி. இதி கோ², பி⁴க்க²வே, இந்த்³ரியவேமத்ததா ப²லவேமத்ததா ஹோதி, ப²லவேமத்ததா புக்³க³லவேமத்ததா’’தி. ததியம்.

4. ததியஸம்கி²த்தஸுத்தம்

484. ‘‘பஞ்சிமானி, பி⁴க்க²வே, இந்த்³ரியானி. கதமானி பஞ்ச? ஸத்³தி⁴ந்த்³ரியம்…பே… பஞ்ஞிந்த்³ரியம் – இமானி கோ², பி⁴க்க²வே, பஞ்சிந்த்³ரியானி. இமேஸம் கோ², பி⁴க்க²வே, பஞ்சன்னம் இந்த்³ரியானம் ஸமத்தா பரிபூரத்தா அரஹம் ஹோதி, ததோ முது³தரேஹி அனாகா³மீ ஹோதி, ததோ முது³தரேஹி ஸகதா³கா³மீ ஹோதி, ததோ முது³தரேஹி ஸோதாபன்னோ ஹோதி, ததோ முது³தரேஹி த⁴ம்மானுஸாரீ ஹோதி, ததோ முது³தரேஹி ஸத்³தா⁴னுஸாரீ ஹோதி. இதி கோ², பி⁴க்க²வே, பரிபூரம் பரிபூரகாரீ ஆராதே⁴தி, பதே³ஸம் பதே³ஸகாரீ ஆராதே⁴தி. ‘அவஞ்ஜா²னி த்வேவாஹம், பி⁴க்க²வே, பஞ்சிந்த்³ரியானீ’தி வதா³மீ’’தி. சதுத்த²ம்.

5. பட²மவித்தா²ரஸுத்தம்

485. ‘‘பஞ்சிமானி, பி⁴க்க²வே, இந்த்³ரியானி. கதமானி பஞ்ச? ஸத்³தி⁴ந்த்³ரியம்…பே… பஞ்ஞிந்த்³ரியம் – இமானி கோ², பி⁴க்க²வே, பஞ்சிந்த்³ரியானி. இமேஸம் கோ², பி⁴க்க²வே, பஞ்சன்னம் இந்த்³ரியானம் ஸமத்தா பரிபூரத்தா அரஹம் ஹோதி, ததோ முது³தரேஹி அந்தராபரினிப்³பா³யீ ஹோதி, ததோ முது³தரேஹி உபஹச்சபரினிப்³பா³யீ ஹோதி, ததோ முது³தரேஹி அஸங்கா²ரபரினிப்³பா³யீ ஹோதி, ததோ முது³தரேஹி ஸஸங்கா²ரபரினிப்³பா³யீ ஹோதி, ததோ முது³தரேஹி உத்³த⁴ம்ஸோதோ ஹோதி அகனிட்ட²கா³மீ, ததோ முது³தரேஹி ஸகதா³கா³மீ ஹோதி, ததோ முது³தரேஹி ஸோதாபன்னோ ஹோதி, ததோ முது³தரேஹி த⁴ம்மானுஸாரீ ஹோதி, ததோ முது³தரேஹி ஸத்³தா⁴னுஸாரீ ஹோதீ’’தி. பஞ்சமம்.

6. து³தியவித்தா²ரஸுத்தம்

486. ‘‘பஞ்சிமானி, பி⁴க்க²வே, இந்த்³ரியானி. கதமானி பஞ்ச? ஸத்³தி⁴ந்த்³ரியம்…பே… பஞ்ஞிந்த்³ரியம் – இமானி கோ², பி⁴க்க²வே, பஞ்சிந்த்³ரியானி. இமேஸம் கோ², பி⁴க்க²வே, பஞ்சன்னம் இந்த்³ரியானம் ஸமத்தா பரிபூரத்தா அரஹம் ஹோதி, ததோ முது³தரேஹி அந்தராபரினிப்³பா³யீ ஹோதி, ததோ முது³தரேஹி உபஹச்சபரினிப்³பா³யீ ஹோதி, ததோ முது³தரேஹி அஸங்கா²ரபரினிப்³பா³யீ ஹோதி, ததோ முது³தரேஹி ஸஸங்கா²ரபரினிப்³பா³யீ ஹோதி, ததோ முது³தரேஹி உத்³த⁴ம்ஸோதோ ஹோதி அகனிட்ட²கா³மீ, ததோ முது³தரேஹி ஸகதா³கா³மீ ஹோதி, ததோ முது³தரேஹி ஸோதாபன்னோ ஹோதி, ததோ முது³தரேஹி த⁴ம்மானுஸாரீ ஹோதி, ததோ முது³தரேஹி ஸத்³தா⁴னுஸாரீ ஹோதி. இதி கோ², பி⁴க்க²வே, இந்த்³ரியவேமத்ததா ப²லவேமத்ததா ஹோதி, ப²லவேமத்ததா புக்³க³லவேமத்ததா ஹோதீ’’தி. ச²ட்ட²ம்.

7. ததியவித்தா²ரஸுத்தம்

487. ‘‘பஞ்சிமானி, பி⁴க்க²வே, இந்த்³ரியானி. கதமானி பஞ்ச? ஸத்³தி⁴ந்த்³ரியம்…பே… பஞ்ஞிந்த்³ரியம் – இமானி கோ², பி⁴க்க²வே, பஞ்சிந்த்³ரியானி. இமேஸம் கோ², பி⁴க்க²வே, பஞ்சன்னம் இந்த்³ரியானம் ஸமத்தா பரிபூரத்தா அரஹம் ஹோதி, ததோ முது³தரேஹி அந்தராபரினிப்³பா³யீ ஹோதி, ததோ முது³தரேஹி உபஹச்சபரினிப்³பா³யீ ஹோதி, ததோ முது³தரேஹி அஸங்கா²ரபரினிப்³பா³யீ ஹோதி, ததோ முது³தரேஹி ஸஸங்கா²ரபரினிப்³பா³யீ ஹோதி, ததோ முது³தரேஹி உத்³த⁴ம்ஸோதோ ஹோதி அகனிட்ட²கா³மீ, ததோ முது³தரேஹி ஸகதா³கா³மீ ஹோதி, ததோ முது³தரேஹி ஸோதாபன்னோ ஹோதி, ததோ முது³தரேஹி த⁴ம்மானுஸாரீ ஹோதி, ததோ முது³தரேஹி ஸத்³தா⁴னுஸாரீ ஹோதி. இதி கோ², பி⁴க்க²வே, பரிபூரம் பரிபூரகாரீ ஆராதே⁴தி, பதே³ஸம் பதே³ஸகாரீ ஆராதே⁴தி. ‘அவஞ்ஜா²னி த்வேவாஹம், பி⁴க்க²வே, பஞ்சிந்த்³ரியானீ’தி வதா³மீ’’தி. ஸத்தமம்.

8. படிபன்னஸுத்தம்

488. ‘‘பஞ்சிமானி, பி⁴க்க²வே, இந்த்³ரியானி. கதமானி பஞ்ச? ஸத்³தி⁴ந்த்³ரியம்…பே… பஞ்ஞிந்த்³ரியம் – இமானி கோ², பி⁴க்க²வே, பஞ்சிந்த்³ரியானி. இமேஸம் கோ², பி⁴க்க²வே, பஞ்சன்னம் இந்த்³ரியானம் ஸமத்தா பரிபூரத்தா அரஹம் ஹோதி, ததோ முது³தரேஹி அரஹத்தப²லஸச்சி²கிரியாய படிபன்னோ ஹோதி, ததோ முது³தரேஹி அனாகா³மீ ஹோதி, ததோ முது³தரேஹி அனாகா³மிப²லஸச்சி²கிரியாய படிபன்னோ ஹோதி, ததோ முது³தரேஹி ஸகதா³கா³மீ ஹோதி, ததோ முது³தரேஹி ஸகதா³கா³மிப²லஸச்சி²கிரியாய படிபன்னோ ஹோதி, ததோ முது³தரேஹி ஸோதாபன்னோ ஹோதி, ததோ முது³தரேஹி ஸோதாபத்திப²லஸச்சி²கிரியாய படிபன்னோ ஹோதி. யஸ்ஸ கோ², பி⁴க்க²வே, இமானி பஞ்சிந்த்³ரியானி ஸப்³பே³ன ஸப்³ப³ம் ஸப்³ப³தா² ஸப்³ப³ம் நத்தி², தமஹம் ‘பா³ஹிரோ புது²ஜ்ஜனபக்கே² டி²தோ’தி வதா³மீ’’தி. அட்ட²மம்.

9. ஸம்பன்னஸுத்தம்

489. அத² கோ² அஞ்ஞதரோ பி⁴க்கு² யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² ஸோ பி⁴க்கு² ப⁴க³வந்தம் ஏதத³வோச –

‘‘‘இந்த்³ரியஸம்பன்னோ, இந்த்³ரியஸம்பன்னோ’தி, ப⁴ந்தே, வுச்சதி. கித்தாவதா நு கோ², ப⁴ந்தே, இந்த்³ரியஸம்பன்னோ ஹோதீ’’தி? ‘‘இத⁴, பி⁴க்கு², பி⁴க்கு² ஸத்³தி⁴ந்த்³ரியம் பா⁴வேதி உபஸமகா³மிம் ஸம்போ³த⁴கா³மிம், வீரியிந்த்³ரியம் பா⁴வேதி உபஸமகா³மிம் ஸம்போ³த⁴கா³மிம், ஸதிந்த்³ரியம் பா⁴வேதி உபஸமகா³மிம் ஸம்போ³த⁴கா³மிம், ஸமாதி⁴ந்த்³ரியம் பா⁴வேதி உபஸமகா³மிம் ஸம்போ³த⁴கா³மிம், பஞ்ஞிந்த்³ரியம் பா⁴வேதி உபஸமகா³மிம் ஸம்போ³த⁴கா³மிம். ஏத்தாவதா கோ², பி⁴க்கு², பி⁴க்கு² இந்த்³ரியஸம்பன்னோ ஹோதீ’’தி. நவமம்.

10. ஆஸவக்க²யஸுத்தம்

490. ‘‘பஞ்சிமானி, பி⁴க்க²வே, இந்த்³ரியானி. கதமானி பஞ்ச? ஸத்³தி⁴ந்த்³ரியம்…பே… பஞ்ஞிந்த்³ரியம் – இமானி கோ², பி⁴க்க²வே, பஞ்சிந்த்³ரியானி. இமேஸம் கோ², பி⁴க்க²வே, பஞ்சன்னம் இந்த்³ரியானம் பா⁴விதத்தா ப³ஹுலீகதத்தா பி⁴க்கு² ஆஸவானம் க²யா அனாஸவம் சேதோவிமுத்திம் பஞ்ஞாவிமுத்திம் தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரதீ’’தி. த³ஸமம்.

முது³தரவக்³கோ³ து³தியோ.

தஸ்ஸுத்³தா³னம் –

படிலாபோ⁴ தயோ ஸம்கி²த்தா, வித்தா²ரா அபரே தயோ;

படிபன்னோ ச ஸம்பன்னோ [படிபன்னோ சூபஸமோ (ஸ்யா. கம். பீ. க.)], த³ஸமம் ஆஸவக்க²யந்தி.