1. பட²மபுஞ்ஞாபி⁴ஸந்த³ஸுத்தம்

1027. ஸாவத்தி²னிதா³னம். ‘‘சத்தாரோமே, பி⁴க்க²வே, புஞ்ஞாபி⁴ஸந்தா³ குஸலாபி⁴ஸந்தா³ ஸுக²ஸ்ஸாஹாரா. கதமே சத்தாரோ? இத⁴, பி⁴க்க²வே, அரியஸாவகோ பு³த்³தே⁴ அவேச்சப்பஸாதே³ன ஸமன்னாக³தோ ஹோதி – இதிபி ஸோ ப⁴க³வா…பே… ஸத்தா² தே³வமனுஸ்ஸானம் பு³த்³தோ⁴ ப⁴க³வாதி. அயம் பட²மோ புஞ்ஞாபி⁴ஸந்தோ³ குஸலாபி⁴ஸந்தோ³ ஸுக²ஸ்ஸாஹாரோ.

‘‘புன சபரம், பி⁴க்க²வே, அரியஸாவகோ த⁴ம்மே அவேச்சப்பஸாதே³ன ஸமன்னாக³தோ ஹோதி – ஸ்வாக்கா²தோ ப⁴க³வதா த⁴ம்மோ…பே… பச்சத்தம் வேதி³தப்³போ³ விஞ்ஞூஹீதி. அயம் து³தியோ புஞ்ஞாபி⁴ஸந்தோ³ குஸலாபி⁴ஸந்தோ³ ஸுக²ஸ்ஸாஹாரோ.

‘‘புன சபரம், பி⁴க்க²வே, அரியஸாவகோ ஸங்கே⁴ அவேச்சப்பஸாதே³ன ஸமன்னாக³தோ ஹோதி – ஸுப்படிபன்னோ ப⁴க³வதோ ஸாவகஸங்கோ⁴…பே… அனுத்தரம் புஞ்ஞக்கே²த்தம் லோகஸ்ஸாதி. அயம் ததியோ புஞ்ஞாபி⁴ஸந்தோ³ குஸலாபி⁴ஸந்தோ³ ஸுக²ஸ்ஸாஹாரோ.

‘‘புன சபரம், பி⁴க்க²வே, அரியஸாவகோ அரியகந்தேஹி ஸீலேஹி ஸமன்னாக³தோ ஹோதி அக²ண்டே³ஹி…பே… ஸமாதி⁴ஸம்வத்தனிகேஹி. அயம் சதுத்தோ² புஞ்ஞாபி⁴ஸந்தோ³ குஸலாபி⁴ஸந்தோ³ ஸுக²ஸ்ஸாஹாரோ. இமே கோ², பி⁴க்க²வே, சத்தாரோ புஞ்ஞாபி⁴ஸந்தா³ குஸலாபி⁴ஸந்தா³ ஸுக²ஸ்ஸாஹாரா’’தி. பட²மம்.