7. து³தியமித்தாமச்சஸுத்தம்

1013. ‘‘யே தே, பி⁴க்க²வே, அனுகம்பேய்யாத², யே ச ஸோதப்³ப³ம் மஞ்ஞேய்யும் – மித்தா வா அமச்சா வா ஞாதீ வா ஸாலோஹிதா வா – தே, பி⁴க்க²வே, சதூஸு ஸோதாபத்தியங்கே³ஸு ஸமாத³பேதப்³பா³, நிவேஸேதப்³பா³, பதிட்டா²பேதப்³பா³. கதமேஸு சதூஸு? பு³த்³தே⁴ அவேச்சப்பஸாதே³ ஸமாத³பேதப்³பா³, நிவேஸேதப்³பா³, பதிட்டா²பேதப்³பா³ – இதிபி ஸோ ப⁴க³வா…பே… ஸத்தா² தே³வமனுஸ்ஸானம் பு³த்³தோ⁴ ப⁴க³வா’’தி.

‘‘ஸியா, பி⁴க்க²வே, சதுன்னம் மஹாபூ⁴தானம் அஞ்ஞத²த்தம் – பத²வீதா⁴துயா, ஆபோதா⁴துயா, தேஜோதா⁴துயா, வாயோதா⁴துயா – ந த்வேவ பு³த்³தே⁴ அவேச்சப்பஸாதே³ன ஸமன்னாக³தஸ்ஸ அரியஸாவகஸ்ஸ ஸியா அஞ்ஞத²த்தம். தத்ரித³ம் அஞ்ஞத²த்தம் – ஸோ வத பு³த்³தே⁴ அவேச்சப்பஸாதே³ன ஸமன்னாக³தோ அரியஸாவகோ நிரயம் வா திரச்சா²னயோனிம் வா பேத்திவிஸயம் வா உபபஜ்ஜிஸ்ஸதீ’’தி – நேதம் டா²னம் விஜ்ஜதி. ‘‘த⁴ம்மே…பே… ஸங்கே⁴…பே… அரியகந்தேஸு ஸீலேஸு ஸமாத³பேதப்³பா³, நிவேஸேதப்³பா³, பதிட்டா²பேதப்³பா³ அக²ண்டே³ஸு…பே… ஸமாதி⁴ஸம்வத்தனிகேஸு. ஸியா, பி⁴க்க²வே, சதுன்னம் மஹாபூ⁴தானம் அஞ்ஞத²த்தம் – பத²வீதா⁴துயா, ஆபோதா⁴துயா, தேஜோதா⁴துயா, வாயோதா⁴துயா – ந த்வேவ அரியகந்தேஹி ஸீலேஹி ஸமன்னாக³தஸ்ஸ அரியஸாவகஸ்ஸ ஸியா அஞ்ஞத²த்தம். தத்ரித³ம் அஞ்ஞத²த்தம் – ஸோ வத அரியகந்தேஹி ஸீலேஹி ஸமன்னாக³தோ அரியஸாவகோ நிரயம் வா திரச்சா²னயோனிம் வா பேத்திவிஸயம் வா உபபஜ்ஜிஸ்ஸதீதி – நேதம் டா²னம் விஜ்ஜதி. யே தே, பி⁴க்க²வே, அனுகம்பேய்யாத², யே ச ஸோதப்³ப³ம் மஞ்ஞேய்யும் – மித்தா வா அமச்சா வா ஞாதீ வா ஸாலோஹிதா வா – தே, பி⁴க்க²வே, இமேஸு சதூஸு ஸோதாபத்தியங்கே³ஸு ஸமாத³பேதப்³பா³, நிவேஸேதப்³பா³, பதிட்டா²பேதப்³பா³’’தி. ஸத்தமம்.