5. து³தியஸாரிபுத்தஸுத்தம்

1001. அத² கோ² ஆயஸ்மா ஸாரிபுத்தோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னம் கோ² ஆயஸ்மந்தம் ஸாரிபுத்தம் ப⁴க³வா ஏதத³வோச – ‘‘‘ஸோதாபத்தியங்க³ம், ஸோதாபத்தியங்க³’ந்தி ஹித³ம், ஸாரிபுத்த, வுச்சதி. கதமம் நு கோ² ஸாரிபுத்த, ஸோதாபத்தியங்க³’’ந்தி? ‘‘ஸப்புரிஸஸம்ஸேவோ ஹி, ப⁴ந்தே, ஸோதாபத்தியங்க³ம், ஸத்³த⁴ம்மஸ்ஸவனம் ஸோதாபத்தியங்க³ம், யோனிஸோமனஸிகாரோ ஸோதாபத்தியங்க³ம், த⁴ம்மானுத⁴ம்மப்படிபத்தி ஸோதாபத்தியங்க³’’ந்தி. ‘‘ஸாது⁴ ஸாது⁴, ஸாரிபுத்த! ஸப்புரிஸஸம்ஸேவோ ஹி, ஸாரிபுத்த, ஸோதாபத்தியங்க³ம், ஸத்³த⁴ம்மஸ்ஸவனம் ஸோதாபத்தியங்க³ம், யோனிஸோமனஸிகாரோ ஸோதாபத்தியங்க³ம், த⁴ம்மானுத⁴ம்மப்படிபத்தி ஸோதாபத்தியங்க³ம்’’.

‘‘‘ஸோதோ, ஸோதோ’தி ஹித³ம், ஸாரிபுத்த, வுச்சதி. கதமோ நு கோ², ஸாரிபுத்த, ஸோதோ’’தி? ‘‘அயமேவ ஹி, ப⁴ந்தே, அரியோ அட்ட²ங்கி³கோ மக்³கோ³ ஸோதோ, ஸேய்யதி²த³ம் – ஸம்மாதி³ட்டி², ஸம்மாஸங்கப்போ, ஸம்மாவாசா, ஸம்மாகம்மந்தோ, ஸம்மாஆஜீவோ, ஸம்மாவாயாமோ, ஸம்மாஸதி, ஸம்மாஸமாதீ⁴’’தி. ‘‘ஸாது⁴ ஸாது⁴, ஸாரிபுத்த! அயமேவ ஹி, ஸாரிபுத்த, அரியோ அட்ட²ங்கி³கோ மக்³கோ³ ஸோதோ, ஸேய்யதி²த³ம் – ஸம்மாதி³ட்டி²…பே… ஸம்மாஸமாதி⁴’’.

‘‘‘ஸோதாபன்னோ, ஸோதாபன்னோ’தி ஹித³ம், ஸாரிபுத்த, வுச்சதி. கதமோ நு கோ², ஸாரிபுத்த, ஸோதாபன்னோ’’தி? ‘‘யோ ஹி, ப⁴ந்தே, இமினா அரியேன அட்ட²ங்கி³கேன மக்³கே³ன ஸமன்னாக³தோ அயம் வுச்சதி ஸோதாபன்னோ, ஸ்வாயம் ஆயஸ்மா ஏவம்னாமோ ஏவம்கோ³த்தோ’’தி. ‘‘ஸாது⁴ ஸாது⁴, ஸாரிபுத்த! யோ ஹி, ஸாரிபுத்த, இமினா அரியேன அட்ட²ங்கி³கேன மக்³கே³ன ஸமன்னாக³தோ அயம் வுச்சதி ஸோதாபன்னோ, ஸ்வாயம் ஆயஸ்மா ஏவம்னாமோ ஏவம்கோ³த்தோ’’தி. பஞ்சமம்.